1, 2. (a) Mwaa shani kushwali ni shawadi ikumene namene? (b) mwaa shani indituvaikila tumanye mwashi mwaipundishidya Ibibiliya kwaupande wa kushwali?

SHILAMBO shapai ni shidikidiki namene tukalinganianga na kuwa. Ndyomana, Yeova akalola shilambo shapai, vanu uti avona kenga lideni lya medi mu mpende au mulidovo. (Dimu 115:15; Ishaiya 40:15) Ata ikava kenga tunkwaneka kuva tuvadikidiki tukalilinganidya na shilambo uti, Dimu 145:18, 19 pankushidoni: ‘Yeova ankupagwa pepi na avalá vanjugwa, na uti avalá vanjugwa kwaumwiu. Nae anatandedya malotelo a valá vanjopa; anaigwa kulamadika kwave na andavaposha.’ Mwiu, adi ni dinema dyatuvenavo! Mwaa Yeova Namalunda Wadimongo-uti, alota kula munu ammandike, na alota aigwe kushwali kwake. Napavedoni, Kushwali ni shawadi ikumene namene yatupele Yeova.

² Kanji kushwali kwetu kundaigwinika kumwe Yeova tukashwali kwodana na amulá mwailatakela. Tulota kuulula dashi? Tuke tulole mwaipundishidya Ibibiliya kwaupande wa kushwali.

3. Mwaa shani indituvaikila tushwali kumwe Yeova?

³ Yeova akulota wako utangole namu nae kupitila indila ya kushwali. Tunkumanya dashi? Shonde Shomya Vapilipo 4:6, 7. Kumbukila mwaliko au. Namalunda Washilambo-uti ankukwangaikangila wako na alota ummanyie matatisho na makumbukililo ako.

4. Kushwali kula wakati kulota kukupwashela dashi kuvanavo umbodi wakunonowangika namu Yeova?

 ⁴ Kushwali kunatupwashela Kuvanavo umbodi ukumene namu Yeova. Myanda vyoe vambodi vakamanyiania vinu kenga makumbukililo, mangaikilo na malotelo avo umbodi unanonowangika namene. Nimumo momo mwamuvalalele kushwali kwetu kumwe Yeova. Kwaindila ya Ibibiliya, nae ankukumanyia makumbukililo na malotelo ake, na avilá vyalota kutenda muwakati wamushu. Wako unkuulula kumwaulila nae vinu vyauvenavo muntima mwako muwakati woewoe. Ukatenda davo, umbodi wako namu Yeova unanonowangika.—Tiyagu 4:8.

5. Tunkumanya dashi kenga Yeova hanaigwilila shinu kushwali kwa vanu uti?

⁵ Da Yeova anaigwilila kushwali kwa vanu uti? Mene, hanaigwilila shinu. Kwampano, muwakati wankulava Ishaiya, Yeova andívaulila vanaishilaeli doni: ‘Ata  mukashwali myanda vyoe, Nangu hangwigwa mwiko; Makono lenu, andyumbala myadi.’ (Ishaiya 1:15) Napanelo wetu tukanalilaledya, tunatenda vinu vilota kutwapukanianga namu Yeova, na kuntadya kwita kwigwilila kushwali kwetu.

6. (a) Mwaa shani likulupililo ni shinu Shikumene? (b) Ulota kulodya dashi kenga undivanavo likulupililo?

⁶ Tukalota Yeova aigwilile kushwali kwetu, ituvaikidile tunkulupile nae. (Malukushi 11:24) Myombe Paulu andivalanga doni: “Kwabila likulupililo hayululika Nnungu kupuwanga mwaa aijá álota ammandike nae, inimmaikila akulupile kenga Nnungu jo apali na ankuvatudya avalá vannambéla.” (Vabalaniya 11:6) Kanji, hainatosha shinu kutangola vila kenga tunkuvanavo likulupililo. Ituvaikidile tulodye ngala likulupililo lyetu kwa kumwigwilila Yeova kula liduva.—Shomya Tiyagu 2:26.

7. (a) Mwaa shani inkutuvaikila tuvenavo ishima na kulishapeya patushwali kumwe Yeova? (b) Tulota kulilodya dashi kenga kushwali kwetu kunkwaloka muntima?

⁷ Inkutuvakila tuvenavo ishima na kulishapeya muwakati watushwali kumwe Yeova. Mwaa wa nyamani? Kumbukila doni, ukalota kutangola namu umu au nanangalaledi, wako unauka na ishima. Naivedoni, Yeova ni Nnungu Wadimongo-uti, ndyomana indituvaikila tuvenavo ishima na kulishapeya patutangola namu nae. (Kutunduvanga 17:1; Dimu 138:6) Namomo, Kushwali kwetu kundivaikila kuve kwa kwaloka muntima, na tummalangile malotelo etu i kujidyaujidya malove amo lolo.—Mateu 6:7, 8.

8. Tukajugwa shinu mukushwali, ituvaikidile tutende nyamani?

⁸ Tukajugwa shinu mukushwali, indituvaikila tutende shoeshoe shatuulula pakulota tupate ashilá shatujugwile. Kwampano, ikava kenga tuninjugwa Yeova atupe vinu vyatulota kula liduva, na tukavanavo dimongo dyakukalela  madengo, hatunaikale vila tukulupila kenga Yeova anatenda makango pakulota tupate ashilá shatulota. Indituvaikila tulikanyalidye nadimongo kukola lidengo lyoelyoe pakulota tupate ashilá shatulota. (Mateu 6:11; 2 Vateshalonika 3:10) Au tukashwali tunjugwa Yeova pakulota atupwashele kuleka vinu vyakunyata, inkutuvaikila twapukanangenavo shinamilo shilota kututubya. (Vakoloshu 3:5) Napanelo tuke tulole vinu vyavanalyudya vanu nkati mukushwali.

9. (a) Ituvaikidile tushwali kumwe nyani? (b) Lyaandiko limwe Nshuwau 14:6 linkutupundisha nyamani kwaupande wa kushwali?

⁹ Tushwali kumwe nyani? Yesu andívapundisha vakwodya vake pakulota vashwali doni: “Atata wetu úvele kuwa.” (Mateu 6:9) Namomo akashidoni: “Nangu ni indila, umwiu na shingumi. Hapali wakwida kumwe atata pàkapitila kwangu Nangu.” (Nshuwau 14:6) Nadoni, ituvaikidile tushwali bai kumwe Yeova gweka kupitila kwamwanagwe Yesu. Mwaa shani inkutuvaikila tushwali palina limwe Yesu? Pakulota Yeova aigwilile kushwali kwetu, ituvaikidile tumwishimu Yesu kwa ashilá shatandile kwaupande wetu. Kenga mwatulipundishididye kunyuma, Yesu andida mushilambo shapai pakulota kutwambola mulidambi na kupela. (Nshuwau 3:16; Valoma 5:12) Nayadavo, Yeova animmika Yesu kenga Nkúlangalalela-shadaka Nkumene na Nkúukumu.—Nshuwau 5:22; Vabalaniya 6:20.

10. Da ipali inamuna ivaikidile twikale pashwali? Valanganga.

¹⁰ Da inamuna shani ituvaikidile tupagwe patushwali? Yeova hanatujugwa shinu twikale, tuguguvale au twimile muwakati watushwali. Ibibiliya inkutupundisha kenga tunkuulula kutangola namu Yeova kwainamuna yoeyoe kanji na ishima. (1 Maimyo 17:16; Neemiya 8:6; Daniyele 6:10; Malukushi 11:25) Kanji shinu shikumene shilateka  kwake Yeova ni kushwali na ntima wambone i inamuna yakwikala muwakati watushwali. Patushwali, tunkuulula kumya lidi au shimaladi, palyutu lyoelyoe na wakati woewoe. Patushwali kumwe Yeova tunkuulula kuvanavo wakika kenga ata tukatangola shimaladi nae anatwigwa.—Neemiya 2:1-6

11. Patushwali kumwe Yeova tujugwe nyamani?

¹¹ Tujugwe nyamani patushwali? Tunkuulula kushwali tujugwa shoeshoe kwodana na malotelo ake Yeova. Ibibiliya inkushidoni: “Patujugwa kwodananavo malotelo ake, nae ankutwigwa.” (1 Nshuwau 5:14) Kula munu ankuulula kujugwa shalota mwene? Elo. Kushwali kwake Yeova ni kenga kwomba mwaa na mbodi wakunagwaleka. Wetu indituvaikila tummalangangile Yeova shinu shoeshoe shatukumbukila au shitupwateka muntima. (Dimu 62:8) Tunkuulula kushwali kumwe Yeova pakulota atupe imumu yanashwe itupwashele kuulula kutenda wambone. (Lukashi 11:13) Tunkuulula kushwali kumwe Yeova pakulota atupe limanyilo lya kumya wamushi wambone na atupe dimongo dyakuulula kulipililila mauvilo. (Tiyagu 1:5) Ituvaikidile tunjugwe Yeova pakulota atulivalive madambi etu. (Vaepeshu 1:3, 7) Indituvaikila tushwali tuvajugwila vanu vanji, na likola lyetu pamo na vanung’unumunu vapashipinga.—Vitendo 12:5; Vakoloshu 4:12.

12. Vinu shani vikumene vituvaikidile tujugwe patushwali?

¹² Vinu shani vikumene vituvaikidile tujugwe patushwali? Tujugwe malotelo ake Yeova atandeke. Ituvaikidile tunnambwalele na ntima wetu uti kwavinu vyatutandadile. (1 Maimyo 29:10-13) Tunkumanya davo, mwaa Yesu paidile mushilambo shapai andivapundisha vakwoda vake mwashi mwakushwalidya. (Shomya Mateu 6:9-13.) Shinu shitandi, andivapundisha vashwali pakulota lina lya Nnungu lishwalele, au limanyikane kenga shinu shanashwe. Badae Yesu andivamanyia kenga indivavaikila vashwali vajugwa  Utawala wa Nnungu wide, na malotelo ake atandeke mushilambo shapai. Baada ya kujugwa vinu avyo vikumene, Yesu andítangola kenga tunkuulula kujugwa shinu shoeshoe shatulota wetu. Tukantenda Yeova na malotelo ake kuva shinu shitandi nkati mukushwali kwetu, tunalodya kenga nae ni munu wakunagwaleka namene kwetu.

13. Indituvaikila kutima patushwali au mene?

¹³ Da kushwali kwetu kundituvaikila tutwale wakati woe? Ibibiliya hainavalanga shinu davo. Kushwali kwetu kunkuululika kuva kwakulepa au kungwipi kwodana na  ashilá shatujugwa. Kwampano, patulota kulya tunashwali kwaungwipi kanji tunkuulula kutima patunnambwalela au patummalangangila mangaikangilo etu Yeova. (1 Samuwele 1:12, 15) Hatunalota kutima patushwali pakulota tulilodye kenga mwavashitandela vanu vanji mumaduva amwe Yesu. (Lukashi 20:46, 47) Yeova hanalota shinu kushwali kenga ako. Shikumene kwake Yeova ni kushwali kwakwaloka muntima.

14. Ituvaikidile tushwali myanda mingapi kwa liduva, na shinu ashi shitupundisha nyamani kwake Yeova?

¹⁴ Ituvaikidile tushwali myanda mingapi kwa kula liduva? Yeova ankutulalika tutangole namu nae kula wakati. Ibibiliya inkutumanyia kenga “shwali pakulota hamunainjile mukutubigwa,” “shwali kwabila kudoba.” (Mateu 26:41; Valoma 12:12; 1 Vateshalonika 5:17) Yeova ave tayali pakulota kwigwilila kushwali kwetu wakati woewoe. Wetu  tunkuulula kutangola namu Yeova kula liduva kwamwaa nae ni walinagwaledyo na wantima wambone. Tunkuulula kunjugwa atupe dimongo, atulangalalele na lipuwilo. Ikava kenga tunkumanya ipaida ya kushwali tunauka mushu tunjugwa Yeova.

15. Mwaa shani tunaitikila “Ame” patumalila kushwali?

¹⁵ Mwaa shani tunaitikila “Ame” patumalila kushwali? Lilove lya “Ame” manaake ni “mwiu” au “muve momo.” Ai ni india yatutumila pakulota kulodya kenga tunkukubali vinu uti vitangaleke mukushwali na kuva viu. (Dimu 41:13) Ibibiliya inkupundisha kenga ni shambone kwitikila “Ame,” ata tukashwali shimaladi au tukaumya lidi, kupunda namene tukashwali pamo mushipinga pakulota kulodya kenga tunkuungila nkono avilá vitangaleke.—1 Maimyo 16:36; 1 Vakolintu 14:16.

16. Da mwiu Yeova anajang’ula kushwali kwetu? Valanganga.

¹⁶ Da mwiu Yeova anajang’ula kushwali kwetu? Elo, anajang’ula. Ibibiliya inkuvalanga kenga nae ni “Anaigwa kushwali.” (Dimu 65:2) Yeova anaigwa na anajang’ula kushwali kwa dyalupu dya vanu voe, atumila dindila dyakuvilingananga.

17. Yeova avatumila dashi vanjelo, na vatumika pakulota kujang’ula kushwali kwetu?

¹⁷ Yeova anavatumila vanjelo, na vatumika vake vapagwa mushilambo shapai pakulota kujang’ula kushwali kwetu. (Vabalaniya 1:13, 14) Kwampano, vanu voe vashinashwali vajugwa lipwashalelo pakulota vaigwe shana Ibibiliya, muwakati padiki vandipata ujeni wa mashaidi va Yeova. Ibibiliya inkulodya kenga vanjelo vankupwashela kwandadya “ntenga wambone” mushilambo uti. (Shomya Maono 14:6.) Myanda vyoe, wetu tundiwai kushwali kwake Yeova kwamwaa wamatatisho loeloe au ashilá shatulota  na tundipata lipwashalelo kwa vanung’unumunu.—Mikong’o 12:25; Tiyagu 2:16.

18. Yeova atumila dashi imumu yanashwe na Ibibiliya pakulota kujang’ula kushwali kwetu?

¹⁸ Yeova anatumila imumu yake yanashwe pakulota ajang’ule kushwali kwetu. Patujugwa lipwashalelo lya matatisho loeloe, atumila imumu yake yanashwe pakulota atulangalalele na dimongo. (2 Vakolintu 4:7) Yeova momo anatumila Ibibiliya pakulota kujang’ula kushwali kwetu na kutupwashela kumya wamushi wambone. Tukashomya Ibibiliya, tunauluula kupata maandiko alota kutupwashela. Yeova ankuulula kuntadya munu kutangola shinu shatulota muwakati watujang’ula kumikutano vya pashipinga au ankuulula kuntumila nang’olo wapashipinga kushomya lyaandiko lyoelyoe pakulota kutupa ntima shii kupitila mu Ibibiliya.—Vagalata 6:1.

19. Mwaa shani wakati unji tunaona kenga Yeova hanajang’ula shinu kushwali kwetu?

¹⁹ Wakati unji tunkuulula kulyudya doni: ‘Mwaa shani Yeova anajang’ula shinu kushwali kwetu?’ Kumbukila kenga Yeova ankumanya wakati na mwashi mwakujang’ulila kushwali kwetu. Nae ankumanya nyamani shatulota. Ndyomana, indituvaikila tushwali bila kuleka, tukatenda davo tunalilodya kenga tunkuvanavo likulupililo kwa Nnungu. (Lukashi 11:5-10) Mwaa myanda vinji Yeova anajang’ula kushwali kwetu kwa dindila dyatukashilindila. Kwampano, tukashwali kwamwaa wa matatisho, Yeova hanamalidya muwakati wowo, Kanji nae anatupa dimongo pakulota tuulule kulipililila.—Shomya Vapilipo 4:13.

20. Mwaa shani indituvaikila tunjugwe Yeova wakati woewoe?

²⁰ Kwaumwiu, kushwali ni shawadi ikumene yatupele Yeova! Ndyomana wetu tunkuvanavo wakika kenga nae ankwigwa kushwali kwetu. (Dimu 145:18) Tukauka mushu tunjugwa Yeova na ntima wetu uti, umbodi wetu unauka mushu unonoangika.