1, 2. a) Ku makengelo mobe, kabamba kakizi kusega kuli kitondo kya bukuti kyatukasile Kalaga? b) Kabamba ka buni buli busoga kumenya byatenda Biblia ku kabamba ka masego?

KESÉ kili kikeke nunse gakyalengemanizibwa n’igulu. Gekulolaga kesé, Yehowa ekumonaga bantu ba bilongo binsania buno beli anga imata (tone) lya maze. (Nimbo 115:15; Isaya 40:15) Aba buno tuli bakeke nunse ndi twalengemanizibwa na igulu, tondo mu Nimbo 145:18, 19 Biblia byatenda bunee: “Yehowa eli bwigi na bansania bekumusega, gamozi na babo bekumusega na bulili. Azindilizie mpusia za babo bekumukua boba; ungwe idilo lyabo nu kubonia.” Kasi Yehowa, Mubumbi wa binsania nu uli na magala mansania, ekutunda kuba bwigi na beiswe: ekutunda kuba Mwida weitu! Nu ekutunda kuungwilila masego meitu! Lebelebe masego meli nkaso nu bukuti bunene bwakasile Yehowa ku naa muntu ku beiswe.

² Tondo Yehowa aungwilile tugu masego meitu ndi twamusega mu nzila z’ekutunda. Kasi tumone buni bwatenda Biblia ku kabamba ka masego.

3. Kabamba kakizi twatunganana kusega ku Yehowa?

³ Yehowa ekutunda wezezye nage kutingila masego. Buni butwamenya bubo? Sanzula Bafilipi 4:6, 7. Kengela busoga ku bibyo byakukakizia Kalaga buno ukite: Mubumbi  w’igulu nu kesé ekukukengelaga nu ekutunda umusolele bukujungwa nu mankunku mobe.

4. Kabamba ka buni bwida bwobe na Yehowa bwagugumane ndi ukusega kweli nkungu insania?

⁴ Kutingila masego, bwida bwobe na Yehowa bunagugumana. Geba bilemba bibélé bili na mwezezyo musoga nu kuba na mugomyo wa kwezezya nu kulosyana makengelo nu bubekwijungwa, bulemba bwabo ntibwagugumana. U buli bubo gatukusega ku Yehowa. Mu Biblia, akulosya makengelo mage, bwekwijungwaga nu byekakita ku nkungu za galwabusyo. Mambizi meingi unezezya nage kwa kumusolela aba makengelo mobe ma keinda (ma uli namo mwobe mu mutima). Ndi wabukita, bwida bweinyu nti bwagugumane.​—Yakobo 4:8.

5. Buni butwamenya buno Yehowa ntekuungwililaga masego mansania?

⁵ Ndi Yehowa ekuungwililaga masego mansania? Nu kilo. Mu nkungu za mulengania Isaya, Kalaga  abwide Baisraeli bunee: “Mu [. . .] nkungu zimukusega nsyungwilile. Maboko meinyu meiyala na mikila.” (Isaya 1:15) Ndi tatukulola busoga, tunakita bitondo binatulekanukya na Yehowa. Mu lukita lulo, ntenuungwilila masego meitu.

6. a) Kabamba kakizi bukatizyo buli bwa kilemanizyo? b) Buni buunalosya buno uli na bukatizyo ku Kalaga?

⁶ Ndi tukutunda buno Yehowa aungwilile masego meitu, twatunganana kuba na bukatizyo kweli. (Marko 11:24) Musengwa Paulo atendile bunee: “Geteli bukatizio, tabunakulungana kumutananizia, kubuno muntu ukukunda ku Kalaga atunganana kukatizia buno we eligo, nu ekukasana lukalilo ku babo bekumulonda.” (Baebrania 11:6) Tondo tatunatenda tugu buno tuli na bukatizyo ku Kalaga. Twatunganana kulosya bubo kwa kumwanza bindi binsania.​—Sanzula Yakobo 2:26.

7. a) Kabamba kakizi twatunganana kulosya lwanzo nu kwisigulizya gatukusega Yehowa? b) Gatukusega, buni butunalosya buno tukusega bitondo bili mu mutima weitu?

⁷ Gatukusega Yehowa, twatunganana kwisigulizya nu kulosya lwanzo. Kabamba kabuni? Gatunezezya na mukota aba na prezida, tunakita bubo na lwanzo. Embe leno Yehowa, Kalaga mwija Magala-Mansania! Kasi twatunganana kwezezya nage na lwanzo lunene nu kwisigulizya. (Kulinga 17:1; Nimbo 138:6) Twatunganana lingo kusega ku Yehowa bitondo bikutuka ku mutima weitu, ta kusubilila bitondo bibyo-bibyo mu masego meitu mansania.​—Matayo 6:7, 8, NWT.

8. Twatunganana kukita kikizi gatukusega kitondo kishembe ku Yehowa?

⁸ Ndi tukusega ku kitondo kishembe, twatunganana kukambya magala meitu manse buno tukite bulingilingi na masego meitu. Anga, ndi twasega Yehowa buno atukase kitukwiyanizya mu kalamo keitu, tatwatunganana  kuba anga kyana kya kazoni. Tatunalindila tugu buno atukase binse nu tuli na mélémo zitunakita. Twatunganana kukita mélémo kwa bupuka aba kwitabizya mélémo zinse zitunakosya kukita. (Matayo 6:11; 2 Batesalonika 3:10) Nu lingo, ndi tukusega Yehowa atukasye buno tusige kukita bitondo bibé, twatunganana kwibembukya na binsania binatuluta ku bubi. (Bakolosayi 3:5) Twakule léno mbuzya zikwibuzyaga bantu beingi ku kabamba ka masego.

9. a)  Twatunganana kusega ku nazi? b) Isanzo lya Yoana 14:6 lyatwigisya kikizi ku kabamba ka masego?

⁹ Twatunganana kusega ku nazi? Yesu atwigisizye kusega ku “Tateiswe uli mwigulu.” (Matayo 6:9) Atendile lingo bunee: “Nne nili nzila, bulili nu kalamo. Takuli muntu umozi unabasa ku Tatane ndi ntabasila mundi.” (Yoana 14:6) Kasi twatunganana kusega tugu ku Yehowa mu nzila za Yesu aba mu izina lya Yesu. Bubo bwisulilwa buni? Buno Yehowa itabizye masego meitu, twatunganana kwanza mulimo wakasilwe Yesu na Yehowa. Anga butwijigisizye, Yesu avwile ku kesé buno atukulule ku bwagi nu lukuo. (Yoana 3:16; Baroma 5:12) Lingo, Yehowa emekile Yesu kuba Sankoga Munene nu Ngatu.​—Yoana 5:22; Baebrania 6:20.

10. Ndi twatunganana kwemana, kwikala gansi, kukoma mazu aba kutulama gatukusega?

¹⁰ Ndi twatunganana kwemana, kwikala gansi, kukoma mazu aba kutulama gatukusega? Nu kilo. Yehowa ntekutusega buno tube mu lukita kishembe gatukusega. Biblia byatwigisya buno tunasega Yehowa kwa: kwikala gansi, kutulama, kukoma mazu aba kwemana. (1 Nkiko 17:16; Nehemia 8:6; Danieli 6:10; Marko 11:25)  Kitondo kya kilemanizyo ku Yehowa u kumusolela bitondo bya mu mutima, kasi kwikala gansi, kutulama, kukoma mazu aba kwemana tabili bya kilemanizyo kweli. Tunasega kw’iyuki nene aba kusega mu mutima, nako-nako nakutuli, mu nkungu insania, mu mosé aba mu kindi. Tunalemanina buno Yehowa atuungwilile aba buno takuli muntu ukutungwa.​—Nehemia 2:1-6.

11. Bikizi bitunasega ku Yehowa?

¹¹ Bikizi bitunasega? Tunasega ku Yehowa binsania byamutananizya. Biblia byatenda bunee: “Ndi twasega kintu anga buli lutundo lwage nti atungwe.” (1 Yoana 5:14) Ndi tunasega ku meijanizyo meitu ma kwikazi (ma bwelebwele)? Lebelebe. Kusega ku Yehowa kuli anga kwezezya na mwida wobe. Tunamusolela bikutuzangya-zangya nu butukujungwa ku mutima. (Nimbo 62:8) Tunamusega muuza wage wasililila buno tukite bili bisoga. (Luka 11:13) Tunamusega tondi menge buno tukate bungatu busoga nu tunamusega magala ma kwikalila mankunku. (Yakobo 1:5) Twatunganana kumusega buno atusigilile bwagi bweitu. (Baefeso 1:3, 7) Tunasegela bango, anga bantu ba kikanga kyeitu, mibuto nu babitu ba mu makundamano.​—Misako 12:5; Bakolosayi 4:12.

12. Kikizi kitwatunganana kubéka ku kiziki kitangi mu masego meitu?

¹² Kikizi kitwatunganana kubéka ku kiziki kitangi mu masego meitu? Yehowa nu ntundo zage (kusombola kwage). Twatunganana kumusima na mutima weitu unse ku binsania byekutukitila. (1 Nkiko 29:10-13) Buni butwamenya bubo? Gabede Yesu mu kesé, igisizye basengwa bage kusega. (Sanzula Matayo 6:9-13.) Ababwide buno batungananine tangi kusega buno izina lya Kalaga liswagibwe [NWT] (ukutenda buno lisugusilwe aba limonwe buno lyasililila), nu kusega Bukota bwa Kalaga buvwe nu ntundo zage zikitwe ga kesé. Nu abalolesizye  buno kusila kusega ku bibyo bitondo bya kilemanizyo, benasegile léno ku meijanizyo mabo. Gatwabeka Yehowa nu ntundo zage ku kiziki kitangi mu masego meitu, twalosye buno we nu ntundo zage u byakilemanizyo nunse kweitu.

13. Masego matunganana kuba na bulazi bukizi?

¹³ Masego meitu matunganana kuba na bulazi bukizi? Biblia tabyatendela kyampi kububo. Masego meitu  menaba malazi aba meigi, bulingilingi na lukita lutuli mulo. Anga buno, lwabusyo lwa kulya, masego menaba meigi. Tondo menaba malazi gatukusima Yehowa aba gatukumusolela mankunku meitu. (1 Samweli 1:12, 15) Tatunakita masego malazi ma kwangamya bango, anga bwakitaga bantu kishembe mu nkungu za Yesu. (Luka 20:46, 47) Yehowa ntekwitabizyaga masego ma bubo. Kitondo kikumutananizya u buno masego meitu matuke ku mutima.

14. Tunasega mambizi manga? Nu bubo bwatwigisya kikizi ku kabamba ka Yehowa?

¹⁴ Tunasega mambizi manga? Yehowa atukakizya tumusege nkungu insania. Biblia byatenda buno “kesiazi ntende nu segazi,” “mwikokomezie mu kusega” nu “segazi na komanizia.” (Matayo 26:41; Baroma 12:12; 1 Batesalonika 5:17) Yehowa ekutungwililaga bindi binsania.  Tunamusima naa busi ku lutundo lwage nu ku binsania byekutukitila. Tunamusega lingo buno atusondelezye, atubobelezye nu atukase magala. Ndi tukumona buno masego ku Kalaga meli bukuti kweitu, bindi binsania twamusege ndi twamona kiziki kya kukita bubo.

15. Kabamba kakizi twatunganana kutenda “amena” kuzinda kwa masego?

¹⁵ Kabamba kakizi twatunganana kutenda “amena” kuzinda kwa masego? Kitondo “amena” u kutenda buno “bulili” aba “u buligo.” Kutenda “amena” kuli kulosya buno twitabizya bitwatendaga, buno bitwatendile mu masego u bili mu makengelo meitu. (Nimbo 41:13) Biblia byatwigisya lingo buno buli busoga kutenda “amena” (kw’iyuki nene aba ku mutima) kuzinda kwa masego, kukulosya buno twitabizya byatendagwa mu masego.​—1 Nkiko 16:36; 1 Bakorinto 14:16.

16. Ndi Yehowa ekwakulaga masego meitu?

¹⁶ Ndi Yehowa ekwakulaga masego meitu? Lebelebe. Biblia byatenda buno ku kabamba kage: “Uwe ukungwaga masego.” (Nimbo 65:2) Yehowa ekungwililaga masego ma ma milioni ma bantu bekumusega na mutima unse nu ekumaakulaga mu nzila niingi zatingana-tingana.

17. Buni bukukambyaga Yehowa, banzelo nu bakambi bage ga kesé kwa kwakula ku masego meitu?

¹⁷ Yehowa ekukambyaga banzelo nu bakambi bage beli mu kesé, buno aakule ku masego meitu. (Baebrania 1:13, 14) Anga buno, bantu beingi basegile Kalaga buno bamenye Biblia, nu mu nkungu nkeke na gago, nti batabangilwa na Mulongeki wa Yehowa. Biblia byalosya buno banzelo beli na mulimo munene mu busambazi bwa “musagu musoga.” (Sanzula Kulolesibwa 14:6.) Embe, beingi kutuli twasegile busi bumozi ku mankunku  aba ku meijanizyo matwabezaga namo, nu kusila nkungu kishembe mubuto umozi aba mubitu atukasile lukaso lutwijanizyaga.​—Misumo 12:25; Yakobo 2:16.

18. Buni bukukambyaga Yehowa muuza wage wasililila nu Biblia kwa kwakula masego meitu?

¹⁸ Kwa kwakula ku masego meitu, Yehowa ekukambyaga muuza wage wasililila. Gatukumusega nkaso kwa kwikalila mankunku, ekukambyaga muuza wage wasililila kwa kutusondelezya nu kutukasa magala. (2 Bakorinto 4:7) Ekukambyaga tondi Biblia kwa kwakula ku masego meitu nu kutukasya tukate bungatu busoga. Gatukusanzula Biblia, tunasanga masanzo menatukasya. Kwa kutalika, Yehowa enasenga muntu umozi mu ikundamano buno akasene lwakulo lutwijanizyaga. Aba enasenga mukungu umozi w’ikundamano buno atukase makengelo kishembe ma Biblia matukasye.​—Bagalatia 6:1.

19. Kabamba ka buni tunamona buno Yehowa ntekwakula masego meitu?

¹⁹ Tondo mango tuniibuzya bunee: “Kabamba kabuni Yehowa ntekwakula léno masego mane?” Yehowa izi mu nkungu nkizi nu buni bwaakule masego meitu. Nu izi bitukwijanizya. Mu nzila niingi, twatunganana kukuzya kumusega kwa kumulosya buno twijanizya nunse bitukumusega nu tuli lebelebe na bukatizyo kweli. (Luka 11:5-10) Mambizi meingi, ekwakulaga masego meitu mu nzila zitutalemaninaga. Anga, gatukusegaga ku mankunku matuli namo, kuteli kumazindya, Yehowa enatukasa magala ma kumeikalila.​—Sanzula Bafilipi 4:13.

20. Kabamba kakizi twatunganana kusega Yehowa nkungu insania?

²⁰ Buli bukuti bunene kwezezya na Yehowa kutingila masego! Tunakatizya buno atuungwilile. (Nimbo 145:18) Butukukuzya kusega kweli na mutima unse, unubwagugumane bwida bweitu nage.