1, 2. a) ¿Nda̱chun túviún ña̱ iin regalo ña̱ va̱ʼaní kúú ña̱ oración? b) ¿Nda̱chun ndáyáʼviní kunda̱a̱-iniyó ña̱ káʼa̱n Biblia xa̱ʼa̱ ña̱ oración?

KÁʼNUNÍKA ndiví nu̱ú ñuʼú yóʼo. Ta na̱ yiví na̱ ndóo nu̱ú ñuʼú yóʼo nda̱a̱ táki̱ʼva íyo iin gota loʼo ti̱kui̱í saá íyona nu̱ú Jehová (Salmo 115:15; Isaías 40:15). Ni válíníka miíyó na̱ yiví nu̱ú ndiví, ña̱ Biblia káchiña: “Jehová yatin íyora xíʼin ndiʼi na̱ káʼa̱n xíʼinra, ta saátu xíʼin ndiʼi na̱ káʼa̱n xíʼinra xíʼin ndinuʼu-inina. Ta táxira mií ña̱ kúni̱ na̱ íxato̱ʼó-ñaʼá tá ndúkúnaña nu̱úra; ta xíniso̱ʼora tá káʼa̱nna xíʼinra ña̱ chindeétáʼanra xíʼinna, ta sáka̱kurana” (Salmo 145:18, 19). Miíyó kúúmiíyó iin ña̱ va̱ʼaní, Jehová ta̱ i̱xava̱ʼa ndiʼi ña̱ʼa kúni̱ra koora migoyó ta kúni̱ra kuniso̱ʼora ña̱ káʼa̱nyó xíʼinra. Ña̱ oración kúúña iin regalo ña̱ va̱ʼaní táxi Jehová ndaʼa̱ iin tá iinyó.

² Ña̱ va̱ʼa kuniso̱ʼo Jehová ña̱ káʼa̱nyó, xíniñúʼu ka̱ʼa̱nyó xíʼinra nda̱a̱ táki̱ʼva kúni̱ miíra. ¿Ndáa ki̱ʼva keʼéyó ña̱yóʼo? Ná kotoyó ndáa ña̱ káʼa̱n Biblia xíʼinyó xa̱ʼa̱ ña̱ oración.

3. ¿Nda̱chun xíniñúʼu ka̱ʼún xíʼin Jehová?

³ Jehová kúni̱ra ña̱ ná ka̱ʼún xíʼinra. ¿Nda̱chun va̱ʼa xíni̱yó ña̱yóʼo? Ndakanixi̱ní xa̱ʼa̱ ña̱ káʼa̱n Ndióxi̱ xíʼinyó nu̱ú Filipenses 4:6, 7 (kaʼviña). Ta̱ i̱xava̱ʼa ndiʼi ña̱ʼa ndíʼi̱ní-inira xa̱ʼún ta kúni̱ra ña̱ ná ka̱ʼún xíʼinra xa̱ʼa̱ ndiʼi ña̱ ndóʼún.

4. Tá ná ka̱ʼa̱n ni̱ʼiyó xíʼin Jehová, ¿ndáa ki̱ʼva koo ña̱ kítáʼanyó xíʼinra, ta nda̱chun?

⁴ Ña̱ oración kúú ña̱ chíndeétáʼan xíʼinyó ña̱ viíka  kutáʼanyó xíʼin Jehová. Tá u̱vi̱ na̱ migo nátúʼun xíʼin táʼanna xa̱ʼa̱ ña̱ ndákanixi̱nína, ña̱ ndóʼona xíʼin ña̱ sándi̱ʼi̱-inina, va̱ʼaníka xáa̱na kítáʼanna. Ta ki̱ʼva saátu íyo ña̱ kéʼé Jehová, chi nu̱ú Biblia káʼa̱nra xíʼún xa̱ʼa̱ ña̱ ndákanixi̱níra xíʼin ña̱ ndóʼora ta saátu káʼa̱nra xíʼún xa̱ʼa̱ ña̱ kúni̱ra keʼéra chí nu̱únínu. Ta saátu kivi ka̱ʼa̱n miíún xíʼin Jehová xa̱ʼa̱ ndiʼi ña̱ ndóʼún. Tá ná ka̱ʼa̱n ni̱ʼún xíʼinra, va̱ʼaníka xa̱ún kutáʼún xíʼinra (Santiago 4:8).

5. ¿Nda̱chun va̱ʼa kúnda̱a̱-iniyó ña̱ va̱ása xíniso̱ʼo Jehová ndiʼi ña̱ káʼa̱nyó xíʼinra?

⁵ ¿Á xíniso̱ʼo Jehová ndiʼi ña̱ káʼa̱n na̱ yiví xíʼinra? Va̱ása. Tá tiempo ña̱ ni̱xi̱yo ta̱ profeta Isaías, Jehová ni̱ka̱ʼa̱nra ña̱yóʼo xíʼin na̱ ñuu Israel: “Tá ndániʼindó ndaʼa̱ndó chí ndiví, kǒo xítoi̱ nu̱úndó. Ni ku̱a̱ʼákaví yichi̱ káʼa̱nndó xíʼi̱n, va̱ása xíniso̱ʼi̱ ña̱ káʼa̱nndó; chi iin chu̱tú ndaʼa̱ndó xíʼin ni̱i̱” (Isaías 1:15). Tá va̱ása kíʼinyó kuenta, kivi keʼéyó iin ña̱ʼa ña̱  va̱ása va̱ʼa ta sandíʼi-xa̱ʼa̱yó ña̱ kítáʼanyó xíʼin Jehová. Tá saá ná keʼéyó, va̱ása kuniso̱ʼora ña̱ káʼa̱nyó.

6. a) ¿Nda̱chun ndáyáʼviní kandíxayó Ndióxi̱? b) ¿Ndáa ki̱ʼva náʼa̱yó ña̱ kándíxayó Ndióxi̱?

⁶ Tá kúni̱yó ña̱ ná kuniso̱ʼo Jehová ña̱ káʼa̱nyó xíʼinra xíniñúʼu kandíxayóra (Marcos 11:24). Ta̱ apóstol Pablo ka̱chira: “Saáchi tá va̱ása kándíxana Ndióxi̱ kǒo kivi kuyatinna nu̱úra, chi na̱ kúni̱ kuyatin nu̱úra xíniñúʼu kandíxana ña̱ íyora ta saátu kandíxana ña̱ taxira ña̱ va̱ʼa ndaʼa̱ na̱ nándukúníñaʼá” (Hebreos 11:6). Soo va̱ása xíniñúʼu ka̱ʼa̱n kuitíyó ña̱ kándíxayó Jehová. Chi xíniñúʼu na̱ʼa̱yó ña̱ xíniso̱ʼoyó ña̱ káʼa̱nra ndiʼi ki̱vi̱ (kaʼvi Santiago 2:26).

7. a) ¿Nda̱chun xíniñúʼu vitá koo iniyó ta xíʼin ña̱ to̱ʼó ka̱ʼa̱nyó xíʼin Jehová? b) ¿Ndáa ki̱ʼva náʼa̱yó ña̱ xíʼin ndiʼi níma̱yó káʼa̱nyó xíʼinra?

⁷ Tá káʼa̱nyó xíʼin Jehová xíniñúʼu vitá koo iniyó ta to̱ʼó ka̱ʼa̱nyó xíʼinra. ¿Nda̱chun? Saáchi tá ná ku̱ʼu̱nyó ka̱ʼa̱nyó xíʼin iin na̱ kúú rey á iin na̱ presidente xíʼin ña̱ to̱ʼó xíniñúʼu ka̱ʼa̱nyó xíʼinna. Soo Jehová kúúra iin Ndióxi̱ ta̱ kúúmií ndiʼi ndee̱, ña̱kán xíniñúʼu ixato̱ʼóníkayóra ta vitá koo iniyó tá káʼa̱nyó xíʼinra (Génesis 17:1; Salmo 138:6). Ta saátu xíniñúʼu ka̱ʼa̱nyó xíʼinra xíʼin ndiʼi níma̱yó, ta va̱ása tuku ta tuku kuniñúʼuyó tu̱ʼun ña̱ xa̱a̱ ni̱ka̱ʼa̱nyó (Mateo 6:7, 8).

8. ¿Ndáaña xíniñúʼu keʼéyó tá ndúkúyó iin ña̱ʼa nu̱ú Jehová?

⁸ Tá ndúkúyó iin ña̱ʼa nu̱ú Jehová, xíniñúʼu chika̱a̱yó ndee̱ ña̱ keʼéyó ña̱ ni̱ka̱ʼa̱nyó xa̱ʼa̱ xíʼinra. Tá kúú, sana ni̱ka̱ʼa̱nyó xíʼinra ña̱ ná chindeétáʼanra xíʼinyó ña̱ va̱ʼa kuumiíyó ña̱ʼa ña̱ xíniñúʼuyó ña̱ kutakuyó. Soo va̱ása xíniñúʼu xúxán kooyó ta kundatuyó ña̱ ná taxi Jehová ndiʼi ña̱ xíniñúʼuyó. Tá kivi kachíñuyó ña̱ va̱ʼa kuumiíyó ña̱ʼa ña̱ xíniñúʼuyó ná keʼéyóña, ta ná keʼéyó nda̱a̱ ndáaka chiñu ña̱ íyo (Mateo 6:11; 2 Tesalonicenses 3:10). Soo tá ni̱ka̱ʼa̱nyó xíʼin Jehová ña̱ ná chindeétáʼanra xíʼinyó ña̱ sandákooyó ña̱ va̱ása va̱ʼa ña̱ kéʼéyó, ná chika̱a̱yó ndee̱ ña̱ kǒo ndikó  tukuyó keʼéyóña (Colosenses 3:5). Vitin ná ka̱ʼa̱nyó xa̱ʼa̱ sava ña̱ ndáka̱tu̱ʼun na̱ yiví miína xa̱ʼa̱ ña̱ oración.

9. a) ¿Ndáana xíniñúʼu ka̱ʼa̱nyó xíʼin? b) ¿Ndáaña sánáʼa̱ Juan 14:6 miíyó xa̱ʼa̱ ña̱ oración?

⁹ ¿Ndáana xíniñúʼu ka̱ʼa̱nyó xíʼin tá kéʼéyó oración? Ta̱ Jesús sa̱náʼa̱ra na̱ discípulora ndáa ki̱ʼva xíniñúʼu ka̱ʼa̱nna xíʼin Ndióxi̱, ka̱chira: “Yivándi̱ ta̱ íyo chí ndiví” (Mateo 6:9). Xa̱ʼa̱ ña̱kán iinlá xíʼin Jehová xíniñúʼu ka̱ʼa̱nyó. Ta saátu ni̱ka̱ʼa̱n ta̱ Jesús: “Yi̱ʼi̱ kúú yichi̱, yi̱ʼi̱ kúú ta̱ kúúmií ña̱ nda̱a̱, yi̱ʼi̱ kúú ta̱ táxi ña̱ táku na̱ yiví. Nda̱a̱ ni iinna kǒo kivi xa̱a̱ nu̱ú yivái̱ tá kǒo ndíku̱nna yi̱ʼi̱” (Juan 14:6). Ña̱yóʼo sánáʼa̱ña miíyó, ña̱ tá káʼa̱nyó xíʼin Jehová xíniñúʼu kuniñúʼuyó ki̱vi̱ ta̱ Jesús. ¿Ndáaña kúni̱ kachi ña̱yóʼo? Tá kúni̱yó ña̱ ná kuniso̱ʼo Jehová ña̱ káʼa̱nyó xíʼinra, xíniñúʼu na̱ʼa̱yó ña̱ íxato̱ʼóyó chiñu ña̱ ta̱xira ndaʼa̱ se̱ʼera. Nda̱a̱ táki̱ʼva xa̱a̱ sa̱kuaʼayó, ta̱ Jesús ki̱xira nu̱ú ñuʼú yóʼo ña̱ va̱ʼa sakǎkura miíyó nu̱ú ku̱a̱chi xíʼin ña̱ xíʼi̱yó (Juan 3:16; Romanos 5:12). Saátu ta̱xi Jehová chiñu ndaʼa̱ra ña̱ koora su̱tu̱ káʼnu xíʼin Juez (Juan 5:22; Hebreos 6:20).

10. ¿Ndáa ki̱ʼva xíniñúʼu keʼéyó tá káʼa̱nyó xíʼin Jehová? Ka̱ʼa̱n xa̱ʼa̱ña.

¹⁰ ¿Ndáa ki̱ʼva xíniñúʼu keʼéyó tá káʼa̱nyó xíʼin Jehová? Jehová va̱ása káʼa̱nra xíʼinyó ña̱ xíniñúʼu kuxítíyó, kooyó á kundichiyó tá káʼa̱nyó xíʼinra. Ña̱ Biblia sánáʼa̱ña miíyó ña̱ kiviva ka̱ʼa̱nyó xíʼin Jehová ndáa ki̱ʼva kúni̱ miíyó, soo xíʼin ña̱ to̱ʼó keʼéyóña (1 Crónicas 17:16; Nehemías 8:6; Daniel 6:10; Marcos 11:25). Chi ña̱ ndáyáʼvika nu̱ú Jehová kúú ña̱ ka̱ʼa̱nyó xíʼinra xíʼin ndinuʼu-iniyó, ta su̱ví ndáa ki̱ʼva kéʼéyó tá káʼa̱nyó xíʼinra. Tá káʼa̱nyó xíʼinra kivi ndeé ka̱ʼa̱nyó ta kivitu ka̱ʼa̱n ya̱áyó xíʼinra, ni nda̱a̱ ndáaka nu̱ú xíkayó kúúña káʼñu á ñuú. Tá káʼa̱nyó xíʼin Jehová kivi kandíxayó  ña̱ xíniso̱ʼora ña̱ káʼa̱nyó ni kǒo inka na̱ xíniso̱ʼo ña̱yóʼo (Nehemías 2:1-6).

11. ¿Ndáa ña̱ʼa kúú ña̱ kivi ka̱ʼa̱nyó xa̱ʼa̱ xíʼin Jehová?

¹¹ ¿Ndáa ña̱ʼa kúú ña̱ kivi ka̱ʼa̱nyó xa̱ʼa̱ xíʼin Jehová? Kivi ka̱ʼa̱nyó xíʼinra xa̱ʼa̱ nda̱a̱ ndáaka ña̱ʼa, soo tá ña̱ kúni̱ra kúúña. Ña̱ Biblia káchiña: “Kivi ndukúyó nda̱a̱ nda̱saaka ña̱ʼa nu̱úra, tá ña̱ kúni̱ miíra kúúña xíniso̱ʼovara ña̱ káʼa̱nyó xíʼinra” (1 Juan 5:14). ¿Á kivi ka̱ʼa̱nyó xíʼinra xa̱ʼa̱ ña̱ ndóʼoyó? Kiviva. Tá káʼa̱nyó xíʼin Jehová xíniñúʼu ka̱ʼa̱nyó xíʼinra nda̱a̱ táki̱ʼva káʼa̱nyó xíʼin iin na̱ va̱ʼaní kúú migoyó. Kivi ka̱ʼa̱nyó xíʼinra xa̱ʼa̱ ndiʼi ña̱ ndóʼoyó xíʼin ña̱ ndákanixi̱níyó (Salmo 62:8). Saátu kivi ka̱ʼa̱nyó xíʼinra ña̱ ná taxira espíritu santora ndaʼa̱yó ña̱ keʼéyó ña̱ va̱ʼa (Lucas 11:13). Ta saátu kivi ndukúyó ña̱ ndíchi nu̱úra ña̱ va̱ʼa vií ndaka̱xinyó ña̱ keʼéyó, ta ka̱ʼa̱nyó xíʼinra ña̱ ná taxira ndee̱ ndaʼa̱yó ña̱ va̱ʼa ya̱ʼayó nu̱ú tu̱ndóʼo (Santiago 1:5). Ta xíniñúʼu ka̱ʼa̱nyó xíʼin Jehová ña̱ ná ixakáʼnu-inira xa̱ʼa̱ ku̱a̱chiyó (Efesios 1:3, 7). Saátu xíniñúʼu ka̱ʼa̱nyó xíʼinra xa̱ʼa̱ na̱ veʼeyó xíʼin xa̱ʼa̱ na̱ hermano na̱ ñúʼu ti̱xin congregación (Hechos 12:5; Colosenses 4:12).

12. ¿Ndáaña xíniñúʼu kundayáʼvika nu̱úyó tá kéʼéyó oración?

¹² ¿Ndáaña xíniñúʼu kundayáʼvika nu̱úyó tá kéʼéyó oración? Ña̱ xíniñúʼu kundayáʼvika nu̱úyó kúú Jehová xíʼin ña̱ káʼa̱nra xíʼinyó keʼéyó. Ta xíʼin ndiʼi níma̱yó xíniñúʼu taxiyó tíxa̱ʼvi ndaʼa̱ Jehová xa̱ʼa̱ ndiʼi ña̱ ke̱ʼéra xa̱ʼa̱yó (1 Crónicas 29:10-13). Tá sa̱náʼa̱ ta̱ Jesús na̱ discípulo ndáa ki̱ʼva ka̱ʼa̱nna xíʼin Ndióxi̱, ni̱na̱ʼa̱ra ndáa ña̱ kúú ña̱ ndáyáʼviní xíniñúʼu ndukúyó tá kéʼéyó oración (kaʼvi Mateo 6:9-13). Ni̱ka̱ʼa̱nra ña̱ nu̱ú ña xíniñúʼu ndukúyó kúú ña̱ ná nduyi̱i̱ ki̱vi̱ Jehová. Tándi̱ʼi ni̱ka̱ʼa̱nra ña̱ xíniñúʼu ndukúyó ña̱ ná kixaa̱ Reino Ndióxi̱, ta ná koo ña̱ kúni̱ Ndióxi̱ iníísaá nu̱ú ñuʼú. Ta saátu ni̱ka̱ʼa̱n ta̱ Jesús ña̱ tá xa̱a̱ ndi̱ʼi ni̱ka̱ʼa̱nyó xa̱ʼa̱ ña̱ʼa ña̱ ndáyáʼviní yóʼo, kivi ka̱ʼa̱nyó xíʼin Jehová xa̱ʼa̱  ña̱ kúni̱ miíyó. Tá siʼnaka xa̱ʼa̱ Jehová xíʼin xa̱ʼa̱ ña̱ kúni̱ra káʼa̱nyó tá kéʼéyó oración, saá náʼa̱yó ndáa ña̱ kúú ña̱ ndáyáʼvika nu̱úyó.

13. ¿Nda̱saa tiempo xíniñúʼu ka̱ʼa̱nyó xíʼin Ndióxi̱?

¹³ ¿Nda̱saa tiempo xíniñúʼu keʼéyó oración? Ña̱ Biblia va̱ása káʼa̱nña nda̱saa tiempo xíniñúʼu keʼéyó ña̱yóʼo. Kivi loʼo á ku̱a̱ʼá tiempo ka̱ʼa̱nyó xíʼin Jehová. Tá kúú, kivi loʼo tiempo ka̱ʼa̱nyó xíʼinra tá kúma̱níka kuxuyó, soo kivi  ku̱a̱ʼáka tiempo ka̱ʼa̱nyó xíʼinra tá táxiyó tíxa̱ʼvi ndaʼa̱ra á tá káʼa̱nyó xíʼinra xa̱ʼa̱ ña̱ ndóʼoyó (1 Samuel 1:12, 15). Soo va̱ása xíniñúʼu naʼání keʼéyó oración xa̱ʼa̱ ña̱ kúni̱ kuitíyó sandákanda̱yó-ini inka na̱ yiví, nda̱a̱ táki̱ʼva xi̱keʼé sava na̱ yiví na̱ ni̱xi̱yo tá tiempo ta̱ Jesús (Lucas 20:46, 47). Chi Jehová kǒo kútóora ña̱yóʼo. Ta̱kán kúni̱ra ña̱ ná ka̱ʼa̱nyó xíʼinra xíʼin ndiʼi níma̱yó.

14. a) ¿Nda̱saa yichi̱ xíniñúʼu keʼéyó oración? b) ¿Ndáaña sánáʼa̱ ña̱yóʼo miíyó xa̱ʼa̱ Jehová?

¹⁴ ¿Nda̱saa yichi̱ xíniñúʼu keʼéyó oración? Jehová káʼa̱nra xíʼinyó ña̱ ná ka̱ʼa̱n ni̱ʼiyó xíʼinra. Ña̱ Biblia káchiña: “Ka̱ʼa̱n ni̱ʼindó xíʼin Ndióxi̱” ta “kǒo sandákoondó ka̱ʼa̱nndó xíʼin Ndióxi̱” (Mateo 26:41; 1 Tesalonicenses 5:17; Romanos 12:12). Ndiʼi tiempo íyo tu̱ʼva Jehová ña̱ kuniso̱ʼora ña̱ káʼa̱nyó. Ndiʼi ki̱vi̱ kivi taxiyó tíxa̱ʼvi ndaʼa̱ra xa̱ʼa̱ ña̱  va̱ʼaní-inira xíʼinyó, ta saátu xa̱ʼa̱ ña̱ kúʼvi̱ní-inira xínira miíyó. Tá ndáyáʼvi ña̱ oración nu̱úyó, ndiʼi tiempo ka̱ʼa̱nyó xíʼin Jehová.

15. ¿Nda̱chun xíniñúʼu ka̱ʼa̱nyó “saá koo” tá xa̱a̱ ndi̱ʼi ke̱ʼéyó oración?

¹⁵ ¿Nda̱chun xíniñúʼu ka̱ʼa̱nyó “saá koo” tá xa̱a̱ ndi̱ʼi ke̱ʼéyó oración? Tá káʼa̱nyó ña̱ tu̱ʼun yóʼo, náʼa̱yó ña̱ xíʼin ndinuʼu-iniyó ni̱ka̱ʼa̱nyó xíʼin Ndióxi̱, ta ña̱ nda̱a̱ kúú ña̱ ni̱ka̱ʼa̱nyó (Salmo 41:13). Ta saátu, ña̱ Biblia sánáʼa̱ña miíyó ña̱ tá xa̱a̱ ndi̱ʼi ke̱ʼé iinna oración nu̱ú íyo ku̱a̱ʼá na̱ yiví, kivi ndeé á kúee ka̱ʼa̱nyó “saá koo”. Saá náʼa̱yó ña̱ kíndo̱o-iniyó xíʼin ña̱ ni̱ka̱ʼa̱nna (1 Crónicas 16:36; 1 Corintios 14:16).

16. ¿Nda̱chun va̱ʼa xíni̱yó ña̱ ndákuiin Ndióxi̱ ña̱ káʼa̱nyó xíʼinra?

¹⁶ ¿Á ndixa ndákuiin Ndióxi̱ ña̱ káʼa̱nyó xíʼinra? Ndákuiinvaraña. Ña̱ Biblia káchiña ña̱ xíniso̱ʼova Ndióxi̱ ndiʼi ña̱ káʼa̱nyó ta saátu ndákuiinraña (Salmo 65:2; Isaías 30:19). Jehová xíniso̱ʼora ña̱ káʼa̱n ku̱a̱ʼání na̱ yiví xíʼinra, ta saátu ku̱a̱ʼání ki̱ʼva ndákuiinra ña̱ káʼa̱nna.

17. ¿Ndáa ki̱ʼva xíniñúʼu Jehová na̱ ángel xíʼin na̱ káchíñu nu̱úra ña̱ ndakuiinra oración ña̱ kéʼéyó?

¹⁷ Jehová xíniñúʼura na̱ ángel xíʼin na̱ káchíñu nu̱úra ña̱ va̱ʼa ndakuiinra oración ña̱ kéʼéyó (Hebreos 1:13, 14). Ku̱a̱ʼání na̱ yiví káʼa̱nna xíʼin Ndióxi̱ ña̱ ná chindeétáʼanra xíʼinna ña̱ kunda̱a̱-inina xa̱ʼa̱ ña̱ káʼa̱n Biblia, ta tá yáʼa loʼo xáʼa̱n na̱ hermano xítona na̱yóʼo. Ña̱yóʼo náʼa̱ña nu̱úyó ña̱ chíndeétáʼan na̱ ángel xíʼinyó ña̱ natúʼunyó tu̱ʼun va̱ʼa xa̱ʼa̱ Reino Ndióxi̱ iníísaá ñuyǐví (kaʼvi Apocalipsis 14:6). Sana ku̱a̱ʼání miíyó ni̱ka̱ʼa̱nyó xíʼin Jehová ña̱ ná chindeéra miíyó tá ni̱ya̱ʼayó nu̱ú iin tu̱ndóʼo á tá xi̱kuma̱ní ña̱ xíniñúʼuyó, soo tá ni̱ya̱ʼa loʼo tiempo na̱ hermano ti̱xin congregación chi̱ndeétáʼanna xíʼinyó (Proverbios 12:25; Santiago 2:16).

18. ¿Ndáa ki̱ʼva xíniñúʼu Jehová espíritu santora xíʼin Biblia ña̱ ndakuiinra ña̱ káʼa̱nyó xíʼinra?

 ¹⁸ Ta saátu, ña̱ va̱ʼa ndakuiin Jehová ña̱ káʼa̱nyó xíʼinra xíniñúʼura espíritu santora. Tá káʼa̱nyó xíʼinra ña̱ ná chindeétáʼanra xíʼinyó ña̱ ya̱ʼayó nu̱ú iin tu̱ndóʼo, kivi kuniñúʼura espíritu santora ña̱ kuniʼira yichi̱ nu̱úyó á ña̱ taxira ndee̱ ndaʼa̱yó (2 Corintios 4:7). Ta saátu, Jehová xíniñúʼura Biblia ña̱ va̱ʼa ndakuiinra ña̱ káʼa̱nyó xíʼinra á ña̱ chindeétáʼanra xíʼinyó ña̱ ndaka̱xin viíyó ña̱ keʼéyó. Tá káʼviyóña kivi ndani̱ʼíyó sava texto ña̱ kivi chindeétáʼan xíʼinyó. Ta kivitu kuniñúʼu Jehová iin na̱ hermano ña̱ taxina iin comentario ti̱xin reunión ña̱ kivi chindeétáʼan xíʼinyó. Sanatu kivi kuniñúʼura iin na̱ anciano ti̱xin congregación ña̱ va̱ʼa na̱ʼa̱na sava ña̱ va̱xi nu̱ú Biblia nu̱úyó (Gálatas 6:1).

19. Tá sava yichi̱ túviún ña̱ va̱ása ndákuiin Jehová ña̱ káʼún xíʼinra, ¿ndáa xa̱ʼa̱ kúúña?

¹⁹ Soo tá sava yichi̱ túviún ña̱ va̱ása ndákuiin Jehová ña̱ káʼún xíʼinra, ndakaʼún ña̱ miíra kúú ta̱ xíni̱ ama ndakuiinra ña̱ ni̱ka̱ʼún ta ndáa ki̱ʼva keʼéraña. Jehová xíni̱ va̱ʼara ndáa ña̱ʼa kúú ña̱ xíniñúʼuyó. Soo sana xíniñúʼu ndakundeéyó ka̱ʼa̱nyó ku̱a̱ʼá tiempo xíʼinra ña̱ va̱ʼa na̱ʼa̱yó ña̱ ndáyáʼviní ña̱ ndu̱kúyó, ta kándíxaníyó miíra (Lucas 11:5-10). Sava yichi̱ va̱ása ndákuiin Jehová yuʼúyó nda̱a̱ táki̱ʼva kúni̱ miíyó. Tá kúú, sana káʼa̱nyó xíʼin Jehová xa̱ʼa̱ iin tu̱ndóʼo ña̱ ndeéní ña̱ kúúmiíyó, soo Jehová kǒo sáku̱taʼara tu̱ndóʼo yóʼo chi táxi kuitíra ndee̱ ndaʼa̱yó ña̱ va̱ʼa kundeé-iniyó ya̱ʼayó nu̱úña (kaʼvi Filipenses 4:13).

20. ¿Nda̱chun xíniñúʼu ka̱ʼa̱n ni̱ʼiyó xíʼin Jehová?

²⁰ Mií ña̱ nda̱a̱ iin regalo ña̱ va̱ʼaní ña̱ ta̱xi Jehová ndaʼa̱yó kúú ña̱ oración. Ná kandíxayó ña̱ xíniso̱ʼora ña̱ káʼa̱nyó xíʼinra (Salmo 145:18). Tá ná ndakundeéyó ka̱ʼa̱nyó xíʼinra xíʼin ndinuʼu-iniyó va̱ʼaníka xa̱a̱yó kutáʼanyó xíʼinra.