1, 2. Tae-i ǃaroma du ra ǂâi ǀgores a ǀō-aisa ǀkhae ǃkhaisa tsî tae-i ǃaroma da nî ǂan ǂgao Elobmîs tae-e ǀgores xa ra ǁkhāǁkhāsa?

ǀHOMMI ǀkha da ga ra ǃhūbaiba ǀgopeǀnō o, ob ge ǀhomma ǃhūbaib xa a kai. Jehovab ga ǃhūbaiba kē o, on ge hoa khoen tsî ǁaedi hoade emers ǁgamro-i khami ra mûsen. (Psalmdi 115:15; Jesajab 40:15) ǁNātikōse da a ǂkhariro xawes ge Psalmdi 145:18, 19 sa ra mî: “ǃKhūb [“Jehovab,” NW] ge a ǀgū ǁîba ra ǂgaiǀîn hoana, ǁîba amab ǃnâ ra ǂgaiǀîn hoana. ǁÎb ge ǁîba ra ǃaoǃgân ra tura xūna ra dī, tsîb ge ǂgais âna ǁnâu tsî ǁîna ra ore.” Kaise ǂoaǂamsa aiǂhanuba da ge ūhâ! Jehovab, hoaǀgaixa Kuru-aob ge sada ǀgūse ra hâ ǂgao tsîb ge sada di ǀgorede ra ǁnâu-am ǂgao. Î, ǀgores ge amabes ǃnâ a aiǂhanu, ǀō-aisa ǀkhaeb Jehovab ge hoa da a māba.

² Xawe Jehovab ge ǁîb mā-am hâ ǀgaub ai da ga ǁîb ǀkha ǃhoa o, ǀgui nî ǃgâ da. Mati da ǁnāsa a dī ǁkhā? Hā re î da kē Elobmîs tae-e ǀgores xa ra mî ǃkhaisa.

3. Tae-i ǃaroma du Jehovab ǃoa nî ǀgore?

³ Jehovab ge ra ǂhâba î du ǁîb ǃoa ǀgore tamas ka io ǁîb ǀkha ǃhoa. Mati da ǁnāsa a ǂan? Toxoba khomai re Filipeǁîn 4:6, 7. ǂÂiǃgâ re ǁnā khoexa ǁkhauǂuis xa. ǀHommi tsî ǃhūbaib di ǂGaeǂgui-aob ge sadu ǃnâ ǃgâiǃgâibasensa ūhâ tsî ǁîb ge ra ǂhâba î du mîba bi sadu ǃgomsin tsî mati du ra tsâ ǀgaus tsîna.

4. Mati i hoaǁae Jehovab ǃoa ǀgoresa sadu ǀhōsasisa ǁîb ǀkha ra ǀgaiǀgai?

 ⁴ ǀGores ge ra hui da î da ǃgâi ǃgaeǁaesa Jehovab ǀkha ūhâ. ǀHōsan ga ra hoaǁae ǃhoa-ūgu tsî mîba gu o, ǁîn ǂâiǂhansendi tsî tsâsigu xa on ge ǁîn ǀhōsasisa ra ǀgai. ǁNās ge a ǀgui Jehovab ǃoa ǀgores ǀkha. Elobmîs ǃnâ-ūb ge ǁîb ǂâidi tsî tsâsigu tsîna sadu ǀkha ra ǀgoragu tsîb ge ra mîba du tae-eb hānîǁaeb ǃnâ nî dī ǃkhaisa. Sadu ǃgam tsâsigu tsîna du ge ǁîb ǀkha hoaǁae a ǀgoragu ǁkhā. Nēsa du ra dī khamis ge sadu ǀhōsasisa Jehovab ǀkha kai tsî nî ǀgai.—Jakobub 4:8.

5. Mati da a ǂan Jehovab hoa ǀgorena ǁnâu-am tama ǃkhaisa?

⁵ Jehovaba hoa ǀgorede ra ǁnâu-am? Hî-î, dī tama hâ. Kēbo-aob Jesajab di tsēdi ǃnâb ge Jehovaba Israelǁaesa ge mîba: “ǀGoresa du ga ǂguiǂgui xawe ta ge ǁnâu tide, sadu di ǃomgu ǀaob xa ǀoa hâ xui-ao.” (Jesajab 1:15) ǂAnbasen tama da ga io, o da ge xūna a dī  ǁkhā Jehovaba xu a ǃnūǃnū da ǁkhāna tsî ǁnās ge a ǃaroma ǁkhā îb tā sada ǀgorede ǃeream.

6. Tae-i ǃaromas ǂgomsa ǁnātikōse a ǂhâǂhâsa? Mati du a ǁgau ǁkhā ǂgomsa du ūhâsa?

⁶ Jehovab nî sada ǀgorede ǃgâsa da ga ra ǂgao o, o da ge ǁîb ǃnâ nî ǂgom. (Markub 11:24) Apostel Paulub ge ra ǁguiǃā: “ǂGoms ose Eloba ǃgâiǃgâibas ge a ī ǁoa; Elob tawa ra sī-i nî ǂgom amaga, hâb a ǃkhaisa, tsîb a ǁîba ra ôan di dīdawa-amao ǃkhaisa.” (Hebreǁîn 11:6) ǂÂu tama i ge hâ mîsa ǂgom da ra di. Sada di ǂgomsa da ge nî ǁgau ǃgāsase tsēs hoasa Jehovaba ǁnâuǀnams ǃnâ-ū.—Khomai re Jakobub 2:26.

7. (a) Tae-i ǃaroma da nî ǃgamǃgamsen tsî ǃgôasib ǀkha Jehovab ǃoa nî ǀgore? (b) Mati da a ǁgau ǁkhā ǂhauǃnâ da asa ǀgore da ga ra o?

⁷ ǃGamǃgamsen tsî da ge ǃgôasib ǀkha Jehovab ǃoa nî ǀgore. Tae-i ǃaroma? Gao-ao-i tamas ka io presidenti ǀkha da ga sī ǃhoa o, o da ge ǃgôasib ǀkha ǁnāsa ra dī. Jehovab a Hoaǀgaixa Elo, amaga da ge ǃgôasib tsî ǃgamǃgamsens tsîna ǁîba nî ǁgau ǂgao ǁîb ǀkha da ga ra ǃhoa o, tamasa? (Genesis 17:1; Psalmdi 138:6) ǂHauǃnâ da ge nî tsî ǂgaoba xu Jehovab ǀkha nî ǃhoa, ǁkhā mîdi ǀguide ǃnās hoasa sîsenūs xa.—Mateub 6:7, 8.

8. Xū-e da ga ǀgoreba o, tae-e da ǂhâ hâ dīsa?

⁸ Xū-e da ga ra ǀgoreba o, o da ge nî ǁgūtsâ sada ǀgoredi ǀkha ǀguiǃnâxase ûisa. Aiǁgause da ga Jehovab ǃoa sada tsēkorobe ǂhâba ǀgoreba o, o da ge ǀopesa tide tsî ǃâubasen tide Jehovab nî hoa xūna mā da ǃkhaisa sîsen ǁkhā da a hîna. ǃGarisase da ge nî sîsen tsî mâ ga hâ sîsen-i hoa-e nî dī ǁkhā. (Mateub 6:11; 2 Tesalonikaǁîn 3:10) Jehovab ǃoa da ga ǀgore o, îb hui da î da tsū xūna ǀû, o da ge ǃâitsâb ǃnâ a ǂgā da ǁkhā xūna xu nî  ǂgōsen. (Koloseǁîn 3:5) Hā re î da hoaǃnâ-aixa dîdi ǀgores didi xa ǃhoa.

9. Ham-i ǃoa da nî ǀgore? Johaneb 14:6 sa tae-e ra ǁkhāǁkhā da ǀgores xa?

⁹ Ham-i ǃoa da nî ǀgore? Jesub ge ǁîb ǁkhāǁkhāsabega ge ǁkhāǁkhā î gu “sida Îtse ǀhommi ǃnâ hâtse” ti ǀgore. (Mateub 6:9) ǁÎb tsîn ge ge a mî: “Tita ge daota, tsî amata, tsî ûita. Khoe-i xare-i ge Abob tawa a sī ǁoa, tita xu i ga sī tama io.” (Johaneb 14:6) Jesub ǃnâ-ū da ge Jehovab ǃoa nî ǀgore. Jesub ǃnâ-ū ǀgoresa tae-e ra ǂâibasen? Jehovab nî sada ǀgorede ūǃoasa da ga ra ǂgao o, o da ge Jesub di ǁgaumâisa ǃharos Jehovab xab ge māhesa ǃgôasiba nî ǁgau. ǁKhāǁkhāsen da go khamib ge Jesuba ǃhūbaiba ǃoa ge hā îb ǁoreb tsî ǁōba xu xore da. (Johaneb 3:16; Romeǁîn 5:12) Jehovab ge Jesuba ǀGapiprister tsî ǀGoraǃgâ-aose ǁgaumâi hâ.—Johaneb 5:22; Hebreǁîn 6:20.

10. ǀŌ-aisa ǃharos ai da nî mâ ǀgore da ga ra o? ǁGuiǃā re.

¹⁰ ǀŌ-aisa ǃharos ai da nî mâ ǀgore da ga ra o? Hî-î, Jehovab ge ǂgan da tama hâ î da ǃhonǁgoa, ǂnû tamas ka io mâ tsî ǀgore. Elobmîs ge ra ǁkhāǁkhā da Jehovab ǀkha da ge ǃgôasib ǃnâ mâ ǀgaub hoab ai a ǃhoa ǁkhā. (1 Kroniks 17:16; Nehemiab 8:6; Danieli 6:10; Markub 11:25) Jehovaba kaise a ǂhâǂhâsabas ge ǁîb ǀkha da ra ǃhoa ǃkhaisa ǂhanu ǂgaob ǀkha, sada mâ ǀgaub ose. ǃGarise tamas ka io ǃnōsase da ge a ǀgore ǁkhā mâ ǃkhai-i hoa-i tawa, tsēa tamas ka io ǃuia. ǀGore da ga ra o, o da ge a ǂgomǃgâ ǁkhā Jehovab nî ǁnâu da ǃkhaisa khoe-i ga ǁnâu da tama i xawe.—Nehemiab 2:1-6.

11. Taena ǀnî xūna Jehovab ǀkha da a ǃhoa ǁkhāna?

 ¹¹ Tae-e da a ǀgoreba ǁkhā? Mâ xū-i hoa-e da ge a ǀgoreba ǁkhā Jehovab mā-amsa ūhâna. Elobmîs ge ra mî: “Xū-e da ga ǁîb di ǂâis ǃoa ǂgano, ob ge ra ǁnâu-am da.” (1 Johaneb 5:14) Khoexaǃnâ xūn xa ǀgore ǁkhā î da a? Î. Jehovab ǃoa da ga ra ǀgore o, o da ge ǀgū ǀhōsa-i ǀkha da ra ǃhoa khami ǁîb ǀkha nî ǃhoa. Jehovaba da ge mâ xū-i hoa-e a mîba ǁkhā sada ǂgaob tsî ǂâis ai hâna. (Psalmdi 62:8) ǀGore ǁkhā da ge a îb ǁîb di ǃanu gagaba mā da, î da ǂhanuse dī. (Lukab 11:13) Jehovab tsîna da ge a ǂgan ǁkhā îb gā-aisiba mā da î da ǃgâi mîǁguiga dī. ǀGore tsî da ge ǀgaiba a ǂgan ǁkhā î da ǃgomsina tani ǁkhā. (Jakobub 1:5) Jehovab tsîna da ge a ǂgan ǁkhā îb sada ǁorena ǀûba da. (Efeseǁîn 1:3, 7) Nau khoen tsîna da ge nî ǀgoreba, sada ǀaokhoen tsî sada ǃgâsan ǀhaohâb ǃnâ hân tsîna.—ǃNaeǃkhaidi 12:5; Koloseǁîn 4:12.

12. Tae-e kaise nî ǂhâǂhâsa sada di ǀgoredi ǃnâ?

¹² Tae-e sada ǀgoredi ǃnâ nî ǂhâǂhâsase ī? Jehovab tsî ǁîb ǂâis tsîna dīsa. ǁÎba da ge ǂgaob ǃgamsiba xu nî gangan dība dab ra xūn amsi. (1 Kroniks 29:10-13) ǁNāsa da ge a ǂan Jesub ge ǃhūbaib ai hâ i o, ob ge ǁîb ǁkhāǁkhāsabega ge ǁkhāǁkhā mati gu nî ǀgore ǃkhaisa. (Khomai re Mateub 6:9-13.) ǁÎb ge ǁîga ge mîba î gu ǂgurose ǀgore is Elob ǀonsa khaihe, tamas ka io ǃanuse ūhâ-e. ǁNāpaxūb ge Jesuba ge a ǁgau î da Elob Gaosiba ǀgoreba îb hā tsî is Jehovab ǂâisa hoaraga ǃhūbaib ai dīhe. ǁNā ǂhâǂhâsa xūna ǂgurose mîs khaoǃgâb ge Jesuba ge mî khoexaǃnâ ǂhâsigu tsîna da a ǀgoreba ǁkhā di. Jehovab di ǂâisa ta ga sada ǀgore di ǃnâ ǂgurose mâi o, o da ge ra ǁgau tae-i sida a ǂhâǂhâsaba ǃkhaisa.

13. Sida di ǀgorede matikōse nî gaxu?

 ¹³ Sada di ǀgorede matikōse nî gaxu? Elobmîs ge mî tama hâ. Sada ǀgoredi ge ǃnubu tamas ka io a gaxu ǁkhā, mâsib ga ra mā-am o. Aiǁgause ǂû da nîs aiǃâ da ge ǃnuburose a ǀgore ǁkhā xawe da ge ǀnîsi gaxuse a ǀgore ǁkhā Jehovaba da ga koasa ga ra mā tamas ka io sada ǂâiǂhansedi xa a mîba o. (1 Samueli 1:12, 15) Gaxuse da ge ǀgore ǂgao tama hâ ǀnî khoen khami kai  ǀon-e dīs ǃaroma, ǀnî khoen gere Jesub tsēdi ǃnâ dī khami. (Lukab 20:46, 47) Jehovab ge ǁnāti ī ǀgoredi xa mâǂoabahe tama hâ. Jehovaba a ǂhâǂhâsaba i ge ǂgaoba xu ǀgoresa.

14. Matikō ǃnāde da nî ǀgore tsî nēsa tae-e Jehovab xa ra ǁkhāǁkhā da?

¹⁴ Matikō ǃnāde da nî ǀgore? Jehovab ge ra ǁkhau da î da ǁîb ǀkha hoaǁae ǃhoa. Elobmîs ge ra mî î da “ǂkhaikari hâ î ǀgore,” “hâhâ ǀgores ǃnâ,” tsî “ǀûs ose ǀgore.” (Mateub 26:41; Romeǁîn 12:12; 1 Tesalonikaǁîn 5:17) Jehovab ge māsenxase hoaǁae sada ra ǃgâ. ǁÎba da ge tsēs hoasa ǁîb ǀnammi tsî ǃgâisib amsi a gangan ǁkhā. Daoǁgauhes, ǀgaiǀgaihes tsî ǁkhaeǂgaohes tsîna da ge a ǂgan ǁkhā. Amabes ǃnâ da ga ǀgores di  aiǂhanuba ǃgôaǃgâ o, o da ge mâ ǃēs hoasa nî sîsenū Jehovab ǀkha ǃhoasa.

15. Tae-i ǃaroma da “amen” ti nî mî ǀgores ǀams ai?

¹⁵ Tae-i ǃaroma da “amen” ti nî mî ǀgores ǀams ai? “Amen” ti hâ mîs ge ra ǂâibasen “ǁaposa” tamas ka io “a-i ti ī.” ǀGores ǃnâ da go a mî xūna da ra ǂâibasen tsî da a ǂhauǃnâ ǃkhaisa da ge ra ǁgau. (Psalmdi 41:13) Elobmîs tsîn ge ra ǁkhāǁkhā da ǃgâi i asa “amen” ti ǃnōsase tamas ka io ǃgarisase mîsa ǀhaohâb ǃnâ ra dīhe ǀgores ǀams ai, ǁnās ǀkha da ge ra ǁgau ǃkhō-am da rasa mîhe go xūna.—1 Kroniks 16:36; 1 Korinteǁîn 14:16.

16. Jehovaba amabes ǃnâ sada di ǀgorede ǁnâu-am-i ra? ǁGuiǃā.

¹⁶ Jehovaba amabes ǃnâ sada ǀgorede ǁnâu-am îb ta? Î, dī ra. Elobmîs ge ǁÎba ‘ǀgoresa ra ǁnâub’ ti ra ǂgai. (Psalmdi 65:2) Jehovab ge miliundi ǂhauǃnâ khoen di ǀgorede ra ǁnâu tsî ǃeream, ǁnāsab ge ǃkharagaǃnâgu ǀgaugu ai ra dī.

17. Jehovaba mati ǀhomǃgāgu tsî ǁîb di ǃoaba-aon ǃhūbaib ai hâna ra sîsenū sada ǀgorede ǃereamsa?

¹⁷ Jehovab ge ǀhomǃgāgu tsî ǁîb di ǃoaba-aon ǃhūbaib ai hâna ra sîsenū ǀgorede ǃereams ǃnâ-ū. (Hebreǁîn 1:13, 14) ǂGui Aiǁgaudi ge hâ khoen hîna gere ǀgoren în Elobmîsa ǁnâuǃā tsî ge ǀgore toan hâ hîna Jehovab di ǀHûǀguitimî-aon di ǀgui-i xa sarihe tsî huihena. Elobmîs ge ra ǁgau ǀhomǃgāgu “ǃgâiǂhôasa” ra ǂkhâǃnâ ǃkhaisa hoaraga ǃhūbaib ai. (Khomai re ǂHaiǂhais 14:6.) ǂGui khoe da tsîn ge ǀō-aisa ǃgomsin tsî ǂhâb tsîna Jehovaba ǀgores ǃnâ-ū ge mîba tsî da ge ǂhâbasa huiba ge a ǃkhōǃoa ǃgâsana xu.—ǂKhoamîdi 12:25; Jakobub 2:16.

18. Jehovaba mati ǁîb ǃanu gagab tsî Elobmîs tsîna ra sîsenū îb sada ǀgorede ǃeream?

 ¹⁸ Jehovab ge ǁîb ti ǃanu gagaba ra sîsenū sada ǀgorede ǃereams ǃaroma. Huiba da ga ǀgoreba o, ǃgomsina tanis diba ob ge ǁîba ǃanu gagaba ra sîsenū daoǁgau da tsî ǀgaiǀgai das ǃaroma. (2 Korinteǁîn 4:7) Jehovab tsîn ge Elobmîs ǃnâ-ū sada ǀgorede ra ǃeream, î da gā-ai mîǁguiga dī. Elobmîsa da ga khomai o, o da ge xoade ra hō huib ase ī de. Jehovab tsîn ge khoe-e a sîsenū ǁkhā ǀhaodi tawa sada ra ǂkhâǃnâ xū-e ra mî-e tamas ka iob ge ǀhaohâb ǃûi-aoba Elobmîsa xu ǂâiro-e sada ǀkha a ǀgoragu ǁkhā.—Galateǁîn 6:1.

19. Tae-i ǃaroma i a mûsen ǁkhā Jehovab sada di ǀgorede ǃeream tama ti?

¹⁹ ǀNî ǁaegu ai da ge a ǂhâ ǁkhā, ‘tae-i ǃaromab Jehovaba noxoba ti ǀgorede ǃeream tama hâ?’ ǂÂis ǃnâ ūhâ re ǁîb ge a ǂan mâǁae tsî matib sada ǀgorede nî ǃereamsa. ǁÎb ge a ǂan tae-e da ǂhâ hâsa. ǀGore ǀgara da ge nî î da ǁîba ǁgau amabes ǃnâ da ra ǂâibasen ǃkhaisa ǁîba da ra ǂgan xūna tsî ǁnās ǀkha nî ǁgau amabes ǃnâ da ǁîb ǃnâ ra ǂgom ǃkhaisa. (Lukab 11:5-10) ǀNî ǁaegu aib ge Jehovaba sada di ǀgorede ǃâubasen tama da hâ ǀgaub ai ra ǃeream. Aiǁgause, ǃgom mâsib ǃaroma da ge huiba a ǂgan ǁkhā xawe ǃgomsiba ūbēs xab ge Jehovaba nî ǀgaiǀgai da, î da ǁî-e tani ǁkhā.—Khomai re Filipeǁîn 4:13.

20. Tae-i ǃaroma da hoaǁae Jehovab ǃoa nî ǀgore?

²⁰ ǂOaǂamsa aiǂhanub Jehovab ǃoa ǀgores diba da ge ūhâ! ǂGomǃgâsiba da ge ūhâ ǁîb sada ra ǃgâ ǃkhaisa. (Psalmdi 145:18) Tsî hoaǁae da ga ra Jehovab ǀkha ǂgaoba xu ǃhoa o, os ge sida di ǀhōsasisa ǁîb ǀkha ra ǀgai.