1, 2. Ndaŵa yanji tingalaŵile kuti pemphelo ni mphaso yapadela yawatipasa Mulungu, soti ndaŵa yanji tufunikila kuziŵa vayuphunzisa Baibolo pa nkhani yokhuza pemphelo?

CHALO ni kanthu katontho ngako polinganija na chilengedwe chonse. Yehova akalolesha pachalo, mitundu ya ŵanthu ili monga ni kadontho kamanzi kofumila mumgomo. (Salimo 115:15; Yesaya 40:15) Olo kuti nise atontho polinganija na chilengedwe chonse, lemba ya Salimo 145:18, 19 yunena kuti: “Yehova ali pafupi na onse oita pali yove. Yove ali pafupi na onse omuita m’choonadi, soti ŵanthu omuyopa akaŵachitile vofuna vawo, akamvwe kulila kwawo kosenga thandizo soti akaŵapulumushe.” Kulaŵila chendi, tili na mwayi uweme ngako! Yehova, Nyamalenga wamphamvuzonse, ofuna kunkhala nase pafupi soti ofuna kumvwishila mapemphelo ŵasu. Kulaŵila chendi, pemphelo ni mphaso yapadela yawatipasa Yehova.

² Koma kuti Yehova amvwe mapemphelo ŵasu, tufunika kupemphela m’njila yakuvomeleja yove. Kansi tingachite tyani vamene ivi? Tiyeni tiwone vayunena Baibolo pa nkhani ya pemphelo.

3. Ndaŵa yanji tufunikila kupemphela kwa Yehova?

³ Yehova ofuna kuti mukolaŵila naye m’pemphelo. Kansi tuziŵa tyani vamene ivi? Ŵelengani Afilipi 4:6, 7. Mawu ali pa vesi yamene iyi ni ochitisha chidwi ngako. Onani kuti wolamulila wa chilengedwe chonse ali na chidwi ngako na mwewo soti ofuna kuti mukomuuja mwamumvwila na nkhaŵa zanu.

4. Kansi kupemphela kwa Yehova nthawe zonse kungatang’ishe tyani ushamwali wasu na yove?

 ⁴ Pemphelo yutiyavya kunkhala pa ushamwali uweme na Yehova. Keno ŵanthu amene ali pa ushamwali oujana malingalilo ŵawo na nkhaŵa zawo nthawe zonse, ushamwali wawo unkhala wotang’a. N’chimozi-mozi na pemphelo kwa Yehova. Kupitila m’Baibolo, yove otiuja malingalilo ŵake na mwakumvwila, soti otiuja vati azachite kusogolo. Tingamuuje mwatumvwila mu ntima mwasu keno tulaŵila naye m’pemphelo nthawe zonse. Keno tukochita vamene ivi, ushamwali wasu na Yehova ukule.—Yakobo 4:8.

5. Kansi tuziŵa tyani kuti Yehova omvwishilalini mapemphelo onse?

⁵ Kansi Yehova omvwishila mapemphelo onse? Yayi omvwishilalini. Mu nthawe ya mneneli Yesaya, Yehova euja Aisiraeli kuti: “Olo kuti muchite mapemphelo anyinji, newo numvwishilalini; manja ŵanu azula na milopa yamwakhesa.” (Yesaya 1:15) Tetyo keno tusamalalini, tingachite  vinthu vingachitishe kuti tinkhale patali na Yehova soti angamvwelini mapemphelo ŵasu.

6. Ndaŵa yanji chikhulupililo n’chofunika ngako? Kansi mungawoneshe tyani kuti muli na chikhulupililo?

⁶ Keno tufuna kuti Yehova amvwishile mapemphelo ŵasu, tufunika kunkhala na chikhulupililo muli yove. (Maliko 11:24) Ntumwi Paulo elaŵila kuti: “Paliye chikhulupililo n’vosakwanishika kumukondwelesha Mulungu, pakuti aliyense wofwika kwa Mulungu ofunika kukhulupilila kuti yove aliko chendi, na kuti opeleka mphoto kuli ŵanthu omusakila-sakila na ntima wonse.” (Aheberi 11:6) Koma kungolaŵila tyala kuti tili na chikhulupililo ni kosakwanila. Tufunikila kuwonesha chikhulupililo chasu mwa kumvwila Yehova nsiku zonse.—Ŵelengani Yakobo 2:26.

7. (a) Ndaŵa yanji tufunikila kunkhala olichefya komasoti aulemu popemphela kwa Yehova? (b) Kansi tingawoneshe tyani kuti tuchita vinthu mwachilungamo popemphela?

⁷ Tufunikila kunkhala olichefya komasoti aulemu popemphela kwa Yehova. Ndaŵa yanji? Keno tapasiwa mwayi wolaŵila na mfumu olo pulezidenti, tingachite vamene ivi mwaulemu. Poziŵa kuti Yehova ni Mulungu Wamphamvuzonse, kansi tufunikilalini kuwonesha ulemu nonkhala olichefya polaŵila naye? (Genesis 17:1; Salimo 138:6) Popemphela kwa Yehova tufunika kuwonesha ulemu nonkhala olichefya komasoti kulaŵila naye mofumila pansi pa ntima, osati tyala kungowelejela mawu ŵamo na ŵamo.—Mateyu 6:7, 8.

8. Tikasenga chinthu chiyakine m’pemphelo, kansi tufunikila kuchita chinji?

⁸ Chosilijila, keno tapemphela pa chinthu chiyakine, tufunikila kuyeja-yeja kuchita vinthu mokatijana na pemphelo yasu. Mwachisanzo, keno tusenga kuti Yehova atipase vinthu vatufunikila pa moyo wasu, tufunikalini kunkhala aulesi noyembekezela kuti Yehova atipase vilivonse, pamene tingakwanishe kuseŵenza novifwana. Tufunikila  kukata ntchito na mphamvu nonkhala okonzeka kukata ntchito iliyonse yatingakwanishe. (Mateyu 6:11; 2 Atesalonika 3:10) Tikasenga kuti Yehova atiyavye kuleka kuchita vinthu viipa, tufunika kupewa chinthu chilichonse chingatiike pa chiyeso. (Akolose 3:5) Tiyeni lomba tiwone makonsho ayakine okhuza pemphelo.

9. Kansi tufunikila kupemphela kwa ŵani? Kansi lemba ya Yohane 14:6 yutiphunzisa chinji pa nkhani ya pemphelo?

⁹ Kansi tufunikila kupemphela kwa ŵani? Yesu ephunzisa ophunzila ŵake kupemphela kuti: “Atata ŵasu muli kululu.” (Mateyu 6:9) Elaŵilasoti kuti: “Newo nine njila, choonadi na moyo. Paliye ofwika kwa Atata osapitila muli newo.” (Yohane 14:6) Tetyo tufunika kupemphela tyala kuli Yehova kupitila muli Yesu. Kansi kupemphela kupitila muli Yesu kutanthauza chinji? Kuti Yehova avomekeje mapemphelo ŵasu, tufunikila kuwonesha ulemu pa udindo wapadela wechipasiwa Yesu na Yehova. Monga mwetiphunzilila kale, Yesu ewela pano pachalo kuti atipulumushe ku uchimo na imfwa. (Yohane 3:16; Aroma 5:12) Yehova esankhasoti Yesu kunkhala Nkulu wa Ansembe na Woweluza.—Yohane 5:22; Aheberi 6:20.

10. Kansi pali kankhalidwe kapadela kofunikila popemphela? Fotokozani.

¹⁰ Kansi pali kankhalidwe kapadela kofunikila popemphela? Yayi, Yehova otiujalini kuti tikogwada, kunkhala olo kupanama popemphela. Baibolo yutiphunzisa kuti tingalaŵile na Yehova mu njila zosiyana-siyana. (1 Mbiri 17:16; Nehemiya 8:6; Danieli 6:10; Maliko 11:25) Chinthu chofunika ngako kwa Yehova popemphela ni kulaŵila vala vili mu ntima mwasu, osati kapanamidwe na kankhalidwe. Tingapemphele mofumya mawu olo chamuntima kulikonse kwatingankhale pa nthawe iliyonse mzuŵa olo usiku. Tikapemphela kwa Yehova, tingakhulupilile kuti atimvwe  olo kuti paliye munthu aliyense otimvwa.—Nehemiya 2:1-6.

11. Kansi ni nkhani ziyakine zotyani zatingalaŵile na Yehova m’mapemphelo ŵasu?

¹¹ Kansi ni nkhani zotyani zatingaike m’mapemphelo? Tingasenge chilichonse chovomekejeka kwa Yehova. Baibolo yunena kuti: “Chilichonse chatingamusenge mokatijana na chifunilo chake, otimvwila.” (1 Yohane 5:14) Kansi tingasenge vinthu vatufunikila pa moyo wasu? Eye. Kupemphela kwa Yehova kufunikila kunkhala monga tulaŵila na shamwali wasu wapantima. Tingamuuje Yehova vilivonse vili m’malingalilo na mu ntima mwasu. (Salimo 62:8) Tingasenge kuti atipase mzimu utuŵa kuti utiyavye kuchita vinthu voyenela. (Luka 11:13) Tingasengesoti Yehova kuti atipase nzelu kuti tipange vosankha viweme, soti tingasenge kuti atipase mphamvu kuti tipilile mavuto. (Yakobo 1:5) Tufunikila kusenga Yehova kuti atikhululukile machimo ŵasu. (Aefeso 1:3, 7) Tufunikilasoti kuikamo ŵanthu ayakine mmapemphelo ŵasu, kuyangijilapo abanja ŵasu komasoti abale na alongo mu mpingo.—Machitidwe 12:5; Akolose 4:12.

12. Kansi ni nkhani zofunika ngako zotyani zatingaike mmapemphelo ŵasu?

¹² Kansi ni nkhani zofunika ngako zotyani zatingaike m’mapemphelo ŵasu? Ni nkhani zokhuza Yehova na chifunilo chake. Tufunika kumuyamikila kufumila pansi pa ntima pa vilivonse vawatichitila. (1 Mbiri 29:10-13) Tuziŵa vamene ivi chifukwa chakuti Yesu penze pano pachalo, ephunzisa ophunzila ŵake mwangapemphelele. (Ŵelengani Mateyu 6:9-13.) Yove elaŵila kuti choyambilila ofunika kupemphela kuti zina ya Mulungu ituŵishiwe, kutanthauza kuti ofunika kuiwona kunkhala yopatulika olo kuti ituŵa. Pechilaŵila ivi, Yesu elaŵila soti kuti tufunika kupemphela kuti Ufumu wa Mulungu uwele komasoti kuti chifunilo cha Yehova chichitike pano pachalo. Pavuli potomola  nkhani zofunika ngako zatingaike m’mapemphelo ŵasu, Yesu elaŵila kuti niye patingasenge vinthu vatufunikila pa moyo wasu. Keno tuika Yehova na chifunilo chake pa malo oyamba m’mapemphelo ŵasu, tuwonesha kuti vinthu vofunika ngako kuli sewo ni votyani.

13. Kansi mapemphelo ŵasu ofunikila kunkhala atali tyani?

¹³ Kansi mapemphelo ŵasu ofunikila kunkhala atali tyani? Baibolo yutiujalini kuti mapemphelo ofunikila kunkhala atali tyani. Mapemphelo ŵasu angaŵe afupi  olo atali kulingana na vochitika. Mwachisanzo, payakine tingachite pemphelo ifupi tikaliyeyamba kulya, koma tingachite pemphelo itali keno tutamanda Yehova olo patumuuja nkhaŵa zasu. (1 Samueli 1:12, 15) Tufunalini kuchita mapemphelo atali pofuna tyala kusangalasa ŵanthu monga ni mwenzechitila ŵanthu ayakine m’nthawe ya Yesu. (Luka 20:46, 47) Yehova okondwelalini na mapemphelo oteti. Chinthu chofunika kwa Yehova ni kupemphela kufumila pansi pa ntima.

14. Kansi tufunikila kupemphela kangani pa nsiku, soti vamene ivi vutiphunzisa chinji za Yehova?

¹⁴ Kansi tufunikila kupemphela kangani pa nsiku? Yehova otiuja kuti tufunikila kulaŵila naye nthawe zonse. Baibolo yunena kuti “pemphelani nthawe zonse,” “pemphelani mosalekeja” komasoti “limbikilani kupemphela.”  (Mateyu 26:41; Aroma 12:12; 1 Atesalonika 5:17) Yehova ni wokonzeka kumvwishila mapemphelo ŵasu nthawe zonse. Tingamuyamikile nsiku iliyonse pa chikondi chake komasoti chifukwa cha vinthu viweme vakutichitila. Komasoti tufunikila kumusenga kuti akotisogolela, akotitang’isha na kutitonthoja. Keno tuyamikila mwayi watili nawo wolaŵila na Yehova m’pemphelo, tikokatishila ntchito mpata uliwonse kulaŵila naye.

15. Ndaŵa yanji tufunika kunena kuti “ame” posilijila pa pemphelo?

¹⁵ Ndaŵa yanji tufunika kunena kuti “ame” posilijila pa pemphelo? Mawu akuti “ame” otanthauza kuti “ni chendi” olo kuti “vinkhale tetyo.” Ni njila yowoneshela kuti vatalaŵila mu pemphelo vafumila pansi pa ntima. (Salimo 41:13) Baibolo yutiphunzisa kuti ni chinthu chiweme ngako kunena kuti “ame,” mu ntima olo mofumya mawu posilijila pa pemphelo ya pagulu, kuti tiwoneshe kuti takatijana nawo mawu alaŵiliwa.—1 Mbiri 16:36; 1 Akorinto 14:16.

16. Kansi Yehova oyankha chendi mapemphelo ŵasu? Fotokozani.

¹⁶ Kansi Yehova oyankha chendi mapemphelo ŵasu? Eye, oyankha. Baibolo yumutomola kuti “Wakumvwa pemphelo.” (Salimo 65:2) Yehova akumvwa noyankha mapemphelo ofumila pansi pa ntima a ŵanthu mamiliyoni anyinji ndipo ochita vamene ivi mu njila zosiyana-siyana.

17. Kansi Yehova okatishila tyani ntchito angelo na atumiki ŵake pachalo kuti ayankhe mapemphelo ŵasu?

¹⁷ Yehova okatishila ntchito angelo na atumiki ŵake pachalo kuti ayankhe mapemphelo ŵasu. (Aheberi 1:13, 14) Pali visanzo vinyinji va ŵanthu epemphela kuti ayavyiwe kuimvwisha Baibolo, koma paliyepite nthawe ikulu a Mboni za Yehova eŵafwikila. Baibolo yuwonesha kuti angelo osogolela pa ntchito yolalikila “uthenga uweme” pachalo chonse. (Ŵelengani Chivumbulutso 14:6.) Komasoti, anyinji a sewo tipemphela kwa Yehova kuti atiyavye pa  vuto iyakine ndipo teyavyiwa na abale na alongo a chikhilisitu.—Miyambo 12:25; Yakobo 2:16.

18. Kansi Yehova okatishila tyani ntchito mzimu wake utuŵa na Baibolo poyankha mapemphelo ŵasu?

¹⁸ Yehova okatishila ntchito mzimu wake utuŵa poyankha mapemphelo ŵasu. Keno tasenga kuti atiyavye kulimbana na mavuto, angaseŵenzeshe mzimu wake kutipasa malangizo na mphamvu. (2 Akorinto 4:7) Yehova okatishilasoti ntchito Baibolo poyankha mapemphelo ŵasu notiyavya kupanga vosankha vanzelu. Poŵelenga Baibolo, tingafwane malemba amene angatiyavye. Yehova angachitishe munthu muyakine pa misonkhano kulaŵila mfundo yoyavya pa vuto yasu, olo nkulu wa mumpingo angatifotokozele mfundo ya m’Baibolo.—Agalatiya 6:1.

19. Ndaŵa yanji vingawoneke monga Yehova ochelwa kuyankha mapemphelo ŵasu?

¹⁹ Koma nthawe ziyakine tingakonshe kuti, ‘Ndaŵa yanji Yehova ochelwa kuyankha mapemphelo ŵangu?’ Kumbukilani kuti yove oziŵa nthawe na njila yoyankhilamo mapemphelo ŵasu. Yove oziŵa vatufunikila. Nthawe ziyakine tingafunike kupitilija kupemphela kwa kanthawe kuti tiwoneshe kuti tufunishisha chendi vinthu vatusenga na kuti tiwoneshe kuti tumukhulupilila chendi. (Luka 11:5-10) Nthawe ziyakine Yehova oyankha mapemphelo ŵasu mu njila yatisayembekezela. Mwachisanzo, tingasenge pa vuto iyakine, koma m’malo mosilija vuto yamene iyo, angatipase mphamvu kuti tipilile.—Ŵelengani Afilipi 4:13.

20. Ndaŵa yanji tufunikila kupemphela kwa Yehova nthawe zonse?

²⁰ Kulaŵila chendi, tili na mwayi ukulu wolaŵila na Yehova m’pemphelo! Tingaŵe osimikijila kuti yove akumvwa mapemphelo ŵasu. (Salimo 145:18) Tikapitilija kupemphela kwa Yehova nthawe zonse mofumila pansi pa ntima, ushamwali wasu na yove unkhala wotang’a.