1, 2. Nongwa yafiki tukuyoba ukuti ulwiputo kyabupe kya pamwanya, kangi nongwa yafiki tukulondiwa ukumanya isi iBaibolo likuyoba pa fundo iyi?

IKISU kyapasi kinandi fiyo pakufwanikisya nifindu fingi ifi fipeliwe. Linga Yehova ikuketa pakisu, ikuketa ifikolo fyosa ifya bandu bo katonyelo ka misi ukufuma mu ndeko. (Salimo 115:15; Yesaya 40:15) Nalinga twebandu tuli banandi fiyo pakufwanikisya nifindu ifi fipeliwe, ilemba lya Salimo 145:18, 19 likuyoba likuti: ‘Yehova ali pipi itolo kuli bosa aba bikunsuma, na bosa aba bikwiputa kumyake mbwanaloli. Bosa aba bikuntila bo ikubabombela isi bikulonda, ikupilika ni nguto syabo kangi ikubapoka.’ Tuli nu lusako fiyo ulwakumfika mulwiputo! Yehova, Umpeli wa fyosa uyu ikulonda ukuti tuye nawe pabumanyani kangi umwene ikulonda ukuti apilikeghe inyiputo syitu. Naloli, ulwiputo lo lusako ulu Yehova ampele aliwesa wa uswe.

² Loli ukuti Yehova apilikeghe inyiputo syitu, tukulondiwa ukumwiputa munjila iyi umwene ikulonda. Ngimba tubaghile ukubomba bulebule? Isagha tukete isi iBaibolo likuyoba pa fundo ya kwiputa.

3. Nongwa yafiki mukulondiwa ukwiputa kwa Yehova?

³ Yehova ikulonda ukuti muyobeghe nawe. Ngimba tukumanya bulebule ukuti syo isi ikulonda? Belenga Bafilipi 4:6, 7. Mwinong’onelepo amasyu agha ghali pa mavesi agha. Umwalafyale wa kumwanya ni kisu, ikulonda ukuti  mumbuleghe indamyo isi mukwaghana nasyo kangi namuno mukwipilikila.

4. Ngimba ukwiputa akabalilo kosa kukukasya bulebule ubumanyani bwitu na Yehova?

⁴ Ulwiputo lukututula ukuti tuye pabumanyani bwa maka na Yehova. Linga uli nu m’manyani wako uyu akabalilo kosa mukuyobesania, ukubulana indamyo isi mukwaghana nasyo namuno mukwipilikila linga mwaghene nindamyo, fikutula fiyo ukuti mukolelaneghe. Ifi fifwene itolo linga tukwiputa kwa Yehova. Ukwendela m’Baibolo, Kyala ikutubula inyinong’ono syake namuno ikwipilikila kangi ikutubula isi isakubomba nkyeni. Ukwiputa akabalilo kosa kwa Yehova kukutupa ulusako lwa kumbula muno tukwipilikila mundumbula syitu. Linga mukubomba isi, ubumanyani bwinu na Yehova bukuya bwa maka.—Yakobu 4:8.

5. Ngimba tukumanya bulebule ukuti Yehova atikupilika inyiputo syosa?

⁵ Ngimba Yehova ikupilika inyiputo syosa? Hayi. Nkabalilo  ka nsololi Yesaya, Yehova ababulile abaIsraeli atile: ‘Napa linga mukufughama bo mukwiputa nkyeni m’myangu ndisakuketako, nalinga mukwiputa inyiputo indali ndisakupilikagha mma, namanga amaboko ghinu ghapakele ilopa.’ (Yesaya 1:15) Linga tutikubomba inunu, tubaghile ukupangisya ukuti ubumanyani bwitu na Yehova bonangike, isi sibaghile ukupangisya ukuti Yehova angapilikagha inyiputo syitu.

6. Nongwa yafiki ulwitiko lwakulondiwa fiyo? Ngimba mubaghile ukunangisya bulebule ukuti muli nulwitiko?

⁶ Linga tukulonda ukuti Yehova apilikeghe inyiputo syitu, tukulondiwa ukuya nulwitiko kumyake. (Marko 11:24) Untumiwa Pauli ayobile atile: ‘Loli nayumo akamanya ukunhobosya Kyala linga akaya nulwitiko, namanga uyu ikuseghelela kwa Kyala, fikuti yo itikeghe itolo ukuti aliko kangi nukuti ikubapa ifihombiwa bosa aba bikundonda.’ (Bahiburi 11:6) Loli ukuyoba ukuti tuli nulwitiko kukaya kwakufwana. Tukulondiwa ukumpilikila Yehova isiku lililyosa ukuti tunangisye naloli ukuti tuli nulwitiko kumyake.—Belenga Yakobu 2:26.

7. (a) Nongwa yafiki tuyeghe bakwiyisya na balughindiko linga tukwiputa kwa Yehova? (b) Ngimba tubaghile ukunangisya bulebule ukuti isi tukuyoba pakwiputa sikufuma pasi pa ndumbula yitu?

⁷ Linga tukwiputa, tukulondiwa ukuyoba mwakwiyisya kangi mwalughindiko. Nongwa yafiki? Linga tupeliwe ulusako lwakuyoba na Mwalafyale pamo Pulezidenti tubaghile ukuyoba nawe mwalughindiko. Yehova yo mwene maka ghosa, yo nongwa tukulondiwa ukuyoba nawe mwakwiyisya na mwalughindiko fiyo. (Ubwandilo 17:1; Salimo 138:6) Pakwiputa tuyobeghe ukufuma pasi pa ndumbula kangi tuleke ukwandisyakwandisya amasyu ghamoghene.—Matai 6:7, 8.

8. Linga tusumile fimo kwa Yehova, ngimba tukulondiwa ukubomba isyafiki?

⁸ Akabalilo kosa linga tukusuma fimo kwa Kyala, tubombeghe ifindu mwakufwana na ifi tusumile. Tufwanikisye ukuti tukunsuma Yehova ukuti atutule ifindu ifi tukulondiwa pa bumi bwitu, tutikulondiwa ukwikala itolo nukulindilila ukuti  umwene ikuya pakutupa loli tukulondiwa ukwiyula nukubomba imbombo ukuti tubwaghe ubutuli. (Matai 6:11; 2 Batesalonike 3:10) Linga tukunsuma Yehova ukuti atutule ukuleka ukubomba imbibi simo isi twalisibile, tuyeghe maso ukuleka ukubomba ifindu ifi fibaghile ukutwingisya kangi mu ndamyo yilayila. (Bakolosi 3:5) Lino isagha tuyobesanie amalalusyo ghamo agha abandu bikwilalusya pa fundo ya nyiputo.

9. Ngimba twiputeghe kwa nani? Ngimba ilemba lya Yohani 14:6 likutumanyisya isyafiki linga tukwiputa?

⁹ Ngimba twiputeghe kwa nani? Yesu abamanyisye abafundiwa bake ukuti biputeghe kwa ‘Tata witu wa kumwanya.’ (Matai 6:9) Ayobile kangi atile: ‘Yo une ne Njila, ne bwanaloli kangi ne bumi; nayumo atikwisako kwa Tata, pene papo linga ikwendela m’myangu.’ (Yohani 14:6) Yo nongwa tukulondiwa ukwiputa kwa Yehova mwene ukwendela mwa Yesu. Ngimba ukwiputa ukwendela mwa Yesu kukusanusya ukuti fiki? Ukuti Yehova apilike inyiputo syitu, tukulondiwa ukuyighindika imbombo iyi Yehova ampele Yesu. Ukufwana na muno twamanyilile, Yesu alisile pa kisu ukuti atupoke ku butulanongwa na ku nifwa. (Yohani 3:16; Baroma 5:12) Yehova ansalile Yesu ukuya Mputi kangi Mulongi.—Yohani 5:22; Bahiburi 6:20.

10. Ngimba tukulondiwa ukwima bulebule linga tukwiputa?

¹⁰ Ngimba tukulondiwa ukwima bulebule linga tukwiputa? Yehova atikuyoba ukuti tufughameghe, twikaleghe pamo ukwima linga tukwiputa. IBaibolo likuyoba ukuti tubaghile ukuyoba na Yehova mulimosa loli tumpeghe ulughindiko linga tukuyoba nawe. (1 Syambukulu 17:16; Nehemiya 8:6; Danieli 6:10; Marko 11:25) Ifi Yehova ikulonda fiyo kumyitu kukaya muno twimile pakwiputa loli umwene ikuketa indumbula yitu. Tubaghile ukusosya amasyu pamo ukuyoba mundumbula linga tukwiputa. Tubaghile kangi ukuyoba nawe kulikosa kuno tuli, pamusi pamo pakilo. Linga tukwiputa kwa  Yehova, tuyeghe nulusubilo ukuti ikuya pakupilika inyiputo syitu nalinga abandu abangi bakabaghila ukupilika.—Nehemiya 2:1-6.

11. Ngimba findu fiki ifi tubaghile ukunsuma Yehova?

¹¹ Ngimba tukulondiwa ukusuma ifindu fiki? Tubaghile ukwiputila filifyosa ifi Yehova ikwitikisya. IBaibolo likuyoba ukuti: ‘Aka linga tukusuma ukufwana nubwighane bwake, ikutupilika.’ (1 Yohani 5:14) Ngimba tubaghile ukuyoba nawe ifindu ifya twibene? Ena. Linga tukuyoba na Yehova, tuyobeghe nawe ukuya m’manyani witu wa pandumbula. Tubaghile ukumbula Yehova syosa isi sili m’nyinong’ono na isi sili mundumbula. (Salimo 62:8) Tubaghile ukwiputa kumyake ukuti atupe mbepo mwikemo ukuti atutuleghe ukubomba ifindu ifinunu. (Luka 11:13) Tubaghile ukunsuma Yehova ukuti atupe amahala ukuti tusaleghe ifindu mwamahala, kangi tubaghile ukunsuma ukuti atutule ukumalana nindamyo isi tukwaghana nasyo. (Yakobu 1:5) Tunsumeghe Yehova ukuti atuhobokeleghe imbibi syitu. (Baefesi 1:3, 7) Tubiputileghe abandu abangi, aba m’mbumba yitu nabakamu bitu nkipanga.—Imbombo Sya Batumiwa 12:5; Bakolosi 4:12.

12. Yoba ifindu ifi tukulondiwa ukuyoba linga tukwiputa.

¹² Ngimba ifya kulondiwa fiyo mu lwiputo fyo fiki? Yehova nu bwighane bwake. Tutighi ndagha ukufuma mundumbula yitu pa fyosa ifi atubombile. (1 Syambukulu 29:10-13) Tumenye ukuti isi syakulondiwa panongwa yakuti Yesu bo ali pa kisu abamanyisye abatumiwa bake ukuti syo babombeghe linga bikwiputa. (Belenga Matai 6:9-13.) Ayobile ukuti pabwandilo biputeghe ukuti ingamu ya Kyala yikemesiweghe pamo ukuti yighindikiweghe. Ukufuma apa Yesu anangisye ukuti tusumeghe ukuti Ubunyafyale bwa Kyala bwiseghe kangi ubwighane bwake bubombiweghe pa kisu. Panyuma pakusuma fyosa ifi, Yesu ayobile ukuti tuyobeghe ifyakulondiwa ifya twibene. Linga pakwiputa tukwanda ni sya Yehova nu bwighane bwake, tukunangisya ukuti fyo fyakulondiwa fiyo kumyitu.

13. Ngimba inyiputo syitu siyeghe ndali bulebule?

 ¹³ Ngimba inyiputo syitu siyeghe ndali bulebule? IBaibolo litikuyoba. Inyiputo syitu sibaghile ukuya ndali lumo mbimba, ukufwana namuno ifindu fiyilile. Mwakifwanikisyo, tubaghile ukwiputa ulwiputo ulupimba linga tukulya. Kangi tubaghile ukwiputa akabalilo akatali linga tukumpala pamo tukumbula isya ndamyo situ. (1 Samueli 1:12, 15) Tutikulondiwa ukwiputa inyiputo indali ukuti twinangisye ku bangi ukufwana namuno bamo babombelagha nkabalilo ka Yesu.  (Luka 20:46, 47) Yehova atikuhoboka ni nyiputo isya luko ulu. Loli Yehova ikulonda ukuti isi tukuyoba sifumeghe mu ndumbula.

14. Ngimba twiputeghe kalinga, kangi isi sikutubula isyafiki isya Yehova?

¹⁴ Ngimba twiputeghe kalinga? Kyala ikulonda ukuti tuyobeghe nawe akabalilo kosa. IBaibolo likuyoba ukuti “mukindilileghe ukwiputa,” “mwiyuleghe ukwiputa,” kangi “mwiputeghe akabalilo kosa.” (Matai 26:41 NWT; Baroma 12:12 NWT; 1 Batesalonike 5:17) Akabalilo kosa Yehova ikupilika inyiputo syitu. Tundaghisyeghe Yehova isiku lililosa panongwa ya lughano lwake na isi ikutubombela. Tubaghile ukunsuma ukuti atulongosyeghe, atupeghe amaka kangi ukuti atukasyeghe linga twaghene ni ndamyo. Linga tukuketa ukuti  lusako ukwiputa kwa Yehova, akabalilo kosa tukuya pakuyoba nawe apa linga ulusako lwaghiwe.

15. Nongwa yafiki tuyobeghe ukuti “ame” pabumalilo bwa lwiputo?

¹⁵ Nongwa yafiki ukuti “ame” pabumalilo bwa lwiputo kwakulondiwa? Amasyu ghakuti “ame” ghikusanusya ukuti “naloli” pamo ukuti “mo siyile”. Ukuyoba ukuti “ame” kukunangisya ukuti isi tuyobile mu lwiputo tukusimikisya ukuti syo sili mundumbula yitu. (Salimo 41:13) IBaibolo likuyoba kangi ukuti kununu ukuyoba ukuti “ame” mwakukwesya amasyu pamo mundumbula pabumalilo pa lwiputo lwa pa bwingi ukunangisya ukuti tukwitikisya isi siyobiwe mu lwiputo.—1 Syambukulu 16:36; 1 Bakorinti 14:16.

16. Ngimba Yehova ikwamula naloli inyiputo syitu? Lingania.

¹⁶ Ngimba Yehova ikwamula naloli inyiputo syitu? Ena ikwamula naloli. IBaibolo likunjoba Umwene ukuti ‘Uwe kwamula inyiputo.’ (Salimo 65:1) Yehova ikupilika nukwamula inyiputo isyakufuma pasi pa ndumbula isya bandu abingi mu njila isyakukindanakindana.

17. Ngimba Yehova ikubombela bulebule abandumi na babombi abinitu pakwamula inyiputo syitu?

¹⁷ Yehova ikubombela abandumi na babombi bake pakwamula inyiputo syitu. (Bahiburi 1:13, 14) Pali abandu bingi aba biputagha kwa Kyala ukuti abatule ukulipilikisya kanunu iBaibolo loli bo pakindilepo akabalilo akanandi itolo Abaketi ba Yehova bafikile nukwanda ukumanyila nabo. IBaibolo likunangisya ukuti abandumi bope tukubomba nabo imbombo iyakufumusya ‘amasyu amanunu’. (Belenga Ubusetuli 14:6.) Twe bingi tunsumilemo Yehova ukuti atutule pa ndamyo lumo ifindu fimo ifi tukulondiwa, bo akabalilo kakindilepo twalyambilile ubutuli ukufuma ku nKristu mwinitu.—Isya Mbupingamu 12:25; Yakobu 2:16.

18. Ngimba Yehova ikubombela bulebule mbepo mwikemo ni Baibolo pakwamula inyiputo syitu?

 ¹⁸ Yehova ikubombela mbepo mwikemo pakwamula inyiputo syitu. Linga tunsumile ukuti atupeko amaka ukuti tulimbane ni ndamyo yimo, Umwene ikutupako mbepo mwikemo ukuti atulongosyeghe nukututula. (2 Bakorinti 4:7) Yehova ikubombela kangi iBaibolo ukuti amule inyiputo syitu nukututula ukubomba ifindu mwamahala. Linga tukubelenga iBaibolo, tubaghile ukulyagha ilemba ili libaghile ukututula. Yehova abaghile ukupangisya yumo pangomano syitu isya kipanga ukuyoba isi twalondiwagha ukupilika lumo unkulumba yumo uwa kipanga ukuti alinganie kanunu ifundo yimo ya m’Baibolo iyi yikulondiwa fiyo kumyitu.—Bagalatiya 6:1.

19. Nongwa yafiki utubalilo tumo tubaghile ukuketa ukuti Yehova akali ukwamula isi tunsumile?

¹⁹ Loli lumo akabalilo kamo tubaghile ukwilalusya ukuti, ‘Nongwa yafiki Yehova akali ukwamula ulwiputo lwangu m’paka lino?’ Mukumbukeghe ukuti ikumanya akabalilo akanunu ni njila inunu iyakwamulila inyiputo. Amenye fyosa ifi tukulondiwa. Uswe tukulondiwa ukukindilila itolo ukunsuma ukuti tunangisye ukuti syo tukulonda naloli kangi tukunsubila ukuti abaghile ukututula. (Luka 11:5-10) Utubalilo tumo Yehova ikwamula inyiputo syitu mu njila iyi tukalinong’onilepo. Ikifwanikisyo, akabalilo kamo tubaghile ukusuma ukuti atutule pa ndamyo iyi twaghene nayo, loli Umwene m’malo mwakusosyapo indamyo lumo abaghile ukutupa amaka ghakuti ghatutule ukwifimbilisya.—Belenga Bafilipi 4:13.

20. Nongwa yafiki twiputeghe kwa Yehova pipipipi?

²⁰ Ukwiputa kwa Kyala lusako lunywamu fiyo! Tusimikisyeghe ukuti ikupilika linga tukwiputa. (Salimo 145:18) Linga tukwiputa pipipipi kwa Yehova ukufuma pasi pa ndumbula, ubumanyani bwitu nu Mwene bukuya bwamaka.