1،‏ 2.‏ (‏الف)‏ دُعا اِک قیمتی تحفہ کیوں اے؟‏ (‏ب)‏ ساڈے لئی ایہہ جاننا ضروری کیوں اے کہ پاک کلام چ دُعا بارے کیہہ دَسیا گیا اے؟‏

ساڈی زمین کائنات دے مقابلے چ بوہت ای چھوٹی اے۔‏ جدوں یہوواہ خدا زمین تے ویکھدا اے تے اوہنوں سارے انسان اِنج لگدے نیں جیویں بالٹی چ پانی دا اِک قطرہ۔‏ (‏زبور 115:‏15؛‏ یسعیاہ 40:‏15‏)‏ بھانویں کہ اَسی کائنات دے مقابلے چ بوہت ای چھوٹے آں پر فیر وی زبور 145:‏18،‏ 19 چ لکھیا اے کہ یہوواہ اوہناں سارے لوکاں دے نیڑے وے جیہڑ‌ے اوہدے کولوں دُعا کردے نیں۔‏ یعنی اوہناں ساریاں دے جیہڑ‌ے سچائی نال دُعا کردے نیں۔‏ جیہڑ‌ے اوہدے توں ڈردے نیں اوہ اوہناں دی مُراد پوری کرے گا۔‏ اوہ اوہناں دی فریاد سُنے گا تے اوہناں نُوں بچا لوے گا۔‏ ایہہ بڑے مان دی گل اے کہ پوری کائنات دا مالک یہوواہ ساڈے نیڑے آؤنا چاہندا اے تے ساڈیاں دُعاواں سُننا چاہندا اے۔‏ واقعی دُعا خدا وَلّوں اِک قیمتی تحفہ اے۔‏

² پر یہوواہ خدا ساڈی دُعا اوہدوں ای سُنے گا جدوں اَسی اوہدی مرضی دے مطابق دُعا کراں گے۔‏ تے اِنج کرن لئی ایہہ جاننا ضروری اے کہ پاک کلام چ دُعا بارے کیہہ دَسیا گیا اے۔‏ آؤ ایہدے بارے پاک کلام چوں کجھ خاص گلاں تے غور کریئے۔‏

3.‏ توانوں یہوواہ خدا کولوں دُعا کیوں کرنی چاہی دی اے؟‏

³ یہوواہ خدا چاہندا اے کہ تُسی اوہدے کولوں دُعا کرو یعنی اوہدے نال گل‌بات کرو۔‏ ایہہ گل سانوں کیویں پتہ اے؟‏ مہربانی نال فِلپّیوں 4:‏6،‏ 7 نُوں پڑھو۔‏ ذرا ایہناں ایتاں تے غور کرو۔‏ ایہناں چ دَسیا گیا اے کہ پوری کائنات دا حکمران یہوواہ خدا توانوں بوہت پیار کردا اے تے چاہندا اے کہ تُسی اوہنوں دَسو کہ تُسی کیہڑیاں مشکلاں چوں لنگھ رہے او تے کیہہ محسوس کر رہے او۔‏

4.‏ یہوواہ خدا کولوں ہر روز دُعا کرن نال،‏ تواڈی دوستی اوہدے نال مضبوط کیوں ہو جاندی اے؟‏

 ⁴ یہوواہ خدا کولوں دُعا کرن نال،‏ ساڈی دوستی اوہدے نال گُوڑھی ہوندی اے۔‏ جدوں دو دوست اِک دُوجے نال اپنے دُکھ‌سُکھ پھولدے نیں تے اوہناں دی دوستی ہور پکی ہو جاندی اے۔‏ ایسے طرحاں جدوں اَسی یہوواہ خدا نال اپنے دل دِیاں گلاں کرنے آں تے اوہدے نال ساڈی دوستی پکی ہو جاندی اے۔‏ یہوواہ خدا توانوں اپنے کلام بائبل دے ذریعے دَسدا اے کہ کجھ کماں تے گلاں بارے اوہدی سوچ کیہہ اے نالے اوہ مستقبل چ کیہہ کجھ کرن والا اے۔‏ تے تُسی ہر روز دُعا دے ذریعے اوہنوں اپنے جذباتاں،‏ مشکلاں تے سوچاں بارے دَس سکدے او۔‏ ایس طرحاں اوہدے نال تواڈی دوستی ہمیشاں مضبوط رہوے گی۔‏—‏یعقوب 4:‏8‏۔‏

5.‏ سانوں کیویں پتہ اے کہ یہوواہ خدا ساریاں دُعاواں نئیں سُن دا؟‏

⁵ کیہہ یہوواہ خدا ساریاں دُعاواں سُن دا اے؟‏ بالکل نئیں۔‏ یسعیاہ نبی دے زمانے چ یہوواہ خدا نے بنی‌اِسرائیل نُوں کہیا سی کہ تُسی بھانویں جنیاں وی دُعاواں کرو مَیں نئیں سناں گا۔‏ تواڈے ہتھ خون نال رنگے ہوئے نیں۔‏ (‏یسعیاہ 1:‏15‏)‏ ایس لئی جے اَسی خبردار نئیں رہندے تے شاید  ساڈے کولوں کوئی ایہو جیہا کم ہو جائے جیہڑ‌ا سانوں خدا توں دُور کر دَوے تے اوہ ساڈیاں دُعاواں نہ سُنے۔‏

6.‏ (‏الف)‏ خدا تے ایمان رکھنا کیوں ضروری اے؟‏ (‏ب)‏ تُسی ایس گل دا ثبوت کیویں دے سکدے او کہ تُسی خدا تے ایمان رکھدے او؟‏

⁶ سانوں خدا تے پورا ایمان وی رکھنا چاہی دا اے تاں ای اوہ ساڈیاں دُعاواں سُنے گا۔‏ (‏مرقس 11:‏24‏)‏ پولس رسول نے لکھیا سی کہ بغیر ایمان توں خدا نُوں خوش کرنا ممکن نئیں کیونکہ جیہڑ‌ا وی خدا دی عبادت کردا اے،‏ اوہنوں ایمان رکھنا پوے گا کہ اوہ سچ مچ ہے وے تے اوہناں ساریاں نُوں اجر دَوے گا جیہڑ‌ے جی جان نال اوہدی خدمت کردے نیں۔‏ (‏عبرانیوں 11:‏6‏)‏ پر صرف ایہہ کہنا ای کافی نئیں کہ اَسی ایمان رکھنے آں۔‏ سانوں ہر روز یہوواہ خدا دے حکماں تے عمل کر کے ایس گل دا ثبوت وی دینا پوے گا۔‏—‏یعقوب 2:‏26 نُوں پڑھو۔‏

7.‏ (‏الف)‏ سانوں یہوواہ خدا کولوں خاکساری تے احترام نال دُعا کیوں کرنی چاہی دی اے؟‏ (‏ب)‏ ایس گل دا پتہ کیویں چلے گا کہ اَسی خدا کولوں دِلوں دُعا کرنے آں؟‏

⁷ سانوں یہوواہ خدا کولوں دُعا کردے ویلے خاکساری تے احترام نال وی کم لینا چاہی دا اے۔‏ ذرا سوچو کہ جے سانوں کسے بادشاہ یاں صدر نال گل کرنی پوے تے کیہہ اَسی اوہدے نال عزت تے احترام نال گل نئیں کراں گے۔‏ بالکل کراں گے۔‏ تے فیر یہوواہ خدا نال تے سانوں ہور وی زیادہ احترام تے خاکساری نال گل کرنی چاہی دی اے کیونکہ اوہ تے ساری کائنات دا بادشاہ اے۔‏ (‏پیدایش 17:‏1؛‏ زبور 138:‏6‏)‏ ایہدے علاوہ سانوں اوہدے کولوں دِلوں دُعا کرنی چاہی دی اے۔‏ سانوں رٹیاں ہوئیاں دُعاواں نئیں کرنیاں چاہی دِیاں۔‏—‏متی 6:‏7،‏ 8‏۔‏

8.‏ جدوں اَسی یہوواہ خدا کولوں کسے گل بارے دُعا کرنے آں تے فیر سانوں کیہہ کرنا چاہی دا اے؟‏

⁸ جدوں اَسی یہوواہ خدا کولوں کسے گل بارے دُعا کرنے آں تے فیر سانوں سب کجھ اوہدے تے ای نئیں چھڈ دینا چاہی دا سگوں اوس گل نُوں پورا کرن لئی سانوں آپ وی کجھ کوشش کرنی چاہی دی اے۔‏ مثال دے طور تے جے اَسی دُعا کرنے آں کہ یہوواہ ساڈیاں لوڑاں پوریاں کرے تے  فیر سانوں ایہہ نئیں سوچنا چاہی دا کہ ہُن جو وی کرنا اے اوہنے ای کرنا اے سگوں سانوں آپ وی ہر طرحاں دا کم محنت نال کرن لئی تیار رہنا چاہی دا اے۔‏ (‏متی 6:‏11؛‏ 2-‏تھسلُنیکیوں 3:‏10‏)‏ یاں جے اَسی ایہہ دُعا کرنے آں کہ یہوواہ کسے غلط کم نُوں چھڈن چ ساڈی مدد کرے تے فیر سانوں ایہو جہے حالاتاں توں بچنا چاہی دا اے جنہاں چ اَسی اوہ کم کرن دی ازمیش چ پے سکنے آں۔‏ (‏کُلسّیوں 3:‏5‏)‏ آؤ ہُن دُعا بارے کجھ ایہو جہے سوالاں تے غور کریئے جیہڑ‌ے لوکاں دے ذہن چ آؤندے نیں۔‏

9.‏ (‏الف)‏ سانوں کدے کولوں دُعا کرنی چاہی دی اے؟‏ (‏ب)‏ اَسی یوحنا 14:‏6 توں دُعا بارے کیہہ سکھنے آں؟‏

⁹ سانوں کدے کولوں دُعا کرنی چاہی دی اے؟‏ یسوع مسیح نے اپنے شاگرداں نُوں سکھایا سی کہ اوہ اسمانی باپ کولوں دُعا کرن۔‏ (‏متی 6:‏9‏)‏ اوہناں ایہہ وی کہیا کہ مَیں راہ تے سچائی تے زندگی آں۔‏ لوک صرف میرے ای ذریعے باپ کول جا سکدے نیں۔‏ (‏یوحنا 14:‏6‏)‏ ایس توں پتہ چلدا اے کہ سانوں صرف یہوواہ خدا کولوں دُعا کرنی چاہی دی اے تے صرف یسوع مسیح دے ذریعے کرنی چاہی دی اے۔‏ یسوع مسیح دے ذریعے دُعا کرن دا کیہہ مطلب اے؟‏ یہوواہ خدا اوہدوں ای ساڈیاں دُعاواں سُنے گا جدوں اَسی اوس خاص کردار دا احترام کراں گے جیہڑ‌ا اوہنے یسوع مسیح نُوں دِتا اے۔‏ اَسی سکھیا اے کہ یسوع مسیح نُوں زمین تے انساناں نُوں گناہ تے موت توں چھڈاؤن لئی گھلیا گیا سی۔‏ (‏یوحنا 3:‏16؛‏ رومیوں 5:‏12‏)‏ ایہدے علاوہ یہوواہ خدا نے یسوع مسیح نُوں عظیم کاہن تے منصف وی بنایا اے۔‏—‏یوحنا 5:‏22؛‏ عبرانیوں 6:‏20‏۔‏

10.‏ کسے خاص ڈھنگ نال دُعا کرنا ضروری کیوں نئیں؟‏

¹⁰ کیہہ ایہہ ضروری اے کہ دُعا گوڈے ٹیک کے،‏ بیٹھ کے یاں فیر کھلو کے کیتی جائے؟‏ ایہہ ضروری نئیں۔‏ یہوواہ خدا نے ایس بارے کوئی خاص حکم نئیں دِتا۔‏ اَسی کسے وی مناسب ڈھنگ نال دُعا کر سکنے آں۔‏ (‏1-‏تواریخ 17:‏16؛‏ نحمیاہ 8:‏6؛‏ دانی‌ایل 6:‏10؛‏ مرقس 11:‏25‏)‏ خدا دی نظر چ دُعا کرن دے ڈھنگ نالوں بوہتی ضروری گل ایہہ وے کہ اَسی کیس نیت نال دُعا کر رہے آں۔‏ اَسی کسے وی تھاں تے کسے وی ویلے اُچی آواز چ یاں دل چ دُعا کر سکنے آں۔‏ جدوں اَسی دُعا کرنے آں تے اَسی  پورا یقین رکھ سکنے آں کہ بھانویں ساڈی دُعا کوئی ہور نہ وی سُن رہیا ہووے،‏ یہوواہ خدا اوہنوں ضرور سُن رہیا ہوندا اے۔‏—‏نحمیاہ 2:‏1-‏6‏۔‏

11.‏ اَسی کیہڑیاں گلاں بارے دُعا کر سکنے آں؟‏

¹¹ اَسی کیہڑیاں گلاں بارے دُعا کر سکنے آں؟‏ اَسی ہر اوس گل بارے دُعا کر سکنے آں جیہڑ‌ی خدا دی مرضی مطابق ہووے۔‏ بائبل چ دَسیا گیا اے کہ اَسی اوہدی مرضی مطابق جو وی منگاں گے اوہ ساڈی سُنے گا۔‏ (‏1-‏یوحنا 5:‏14‏)‏ کیہہ اَسی ذاتی معاملیاں بارے دُعا کر سکنے آں؟‏ بالکل کر سکنے آں۔‏ یہوواہ خدا کولوں دُعا کرنا اِنج ای اے جیویں کسے دوست نال گل کرنا۔‏ اَسی یہوواہ خدا نُوں اپنے دل دی ہر گل دَس سکنے آں۔‏ (‏زبور 62:‏8‏)‏ اَسی اوہدے کولوں پاک روح منگ سکنے آں تاکہ اَسی اوہی کم کریئے جیہڑ‌ے اوہنوں پسند نیں۔‏ (‏لُوقا 11:‏13‏)‏ اَسی یہوواہ خدا کولوں عقل‌مندی تے دنائی منگ سکنے آں تاکہ اَسی اپنی زندگی چ صحی فیصلے کریئے۔‏ ایہدے علاوہ اَسی مشکلاں دا مقابلہ کرن لئی اوہدے کولوں طاقت منگ سکنے آں۔‏ (‏یعقوب 1:‏5‏)‏ سانوں یہوواہ خدا کولوں اپنے گناہواں دی معافی وی منگنی چاہی دی اے۔‏ (‏اِفسیوں 1:‏3،‏ 7‏)‏ سانوں اپنے گھر والیاں تے کلیسیا دے بھین بھراواں لئی وی دُعا کرنی چاہی دی اے۔‏—‏اعمال 12:‏5؛‏ کُلسّیوں 4:‏12‏۔‏

12.‏ ساڈیاں دُعاواں چ سب توں اہم کیہہ ہونا چاہی دا اے؟‏

¹² ساڈیاں دُعاواں چ سب توں اہم کیہہ ہونا چاہی دا اے؟‏ یہوواہ خدا تے اوہدی مرضی۔‏ سانوں یہوواہ خدا دا دِلوں شکر کرنا چاہی دا اے کہ اوہنے ساڈے واسطے بوہت کجھ کیتا اے۔‏ (‏1-‏تواریخ 29:‏10-‏13‏)‏ یسوع مسیح نے اپنے شاگرداں نُوں سکھایا کہ اوہناں نُوں دُعا کیویں کرنی چاہی دی اے۔‏ ‏(‏متی 6:‏9-‏13 نُوں پڑھو۔‏)‏ اوہناں کہیا کہ سانوں سب توں پہلاں ایہہ درخاست کرنی چاہی دی اے کہ خدا دا ناں پاک منیا جائے۔‏ فیر سانوں ایہہ منگنا چاہی دا اے کہ خدا دی بادشاہی آئے تے زمین اُتے اوہدی مرضی ہووے۔‏ یسوع نے کہیا کہ ایہناں ضروری گلاں بارے دُعا کرن توں بعد اَسی اپنیاں روز دِیاں لوڑاں بارے دُعا کر سکنے آں۔‏ اپنیاں دُعاواں چ یہوواہ خدا تے اوہدی مرضی نُوں پہلا درجہ دین نال اَسی ظاہر کرنے آں کہ ساڈی زندگی چ کیہہ اہم اے۔‏

13.‏ ساڈیاں دُعاواں کِنّیاں لمیاں ہونیاں چاہی دِیاں نیں؟‏

 ¹³ ساڈیاں دُعاواں کِنّیاں لمیاں ہونیاں چاہی دِیاں نیں؟‏ ایہدے بارے پاک کلام چ کجھ نئیں دَسیا گیا۔‏ ساڈیاں دُعاواں موقعے دے حساب نال لمیاں وی ہو سکدیاں نیں تے چھوٹیاں وی۔‏ مثال دے طور تے کھانا کھان توں پہلاں اَسی چھوٹی جہی دُعا کر سکنے آں جد کہ یہوواہ دی شکرگزاری کردے ویلے یاں اوہنوں اپنیاں پریشانیاں دَسدے ویلے اَسی لمی دُعا کر سکنے آں۔‏ (‏1-‏سموئیل 1:‏12،‏ 15‏)‏ پر سانوں صرف دُوجیاں نُوں وکھاؤن لئی لمیاں دُعاواں نئیں کرنیاں چاہی دِیاں جیویں کہ یسوع مسیح  دے زمانے چ کجھ لوک کردے سن۔‏ (‏لُوقا 20:‏46،‏ 47‏)‏ یہوواہ نُوں ایہو جہیاں دُعاواں بالکل پسند نئیں۔‏ اوہنوں اوہ دُعا پسند اے جیہڑ‌ی دِلوں کیتی جاوے۔‏

14.‏ (‏الف)‏ سانوں کِنّی واری دُعا کرنی چاہی دی اے؟‏ (‏ب)‏ ایس گل توں اَسی یہوواہ خدا بارے کیہہ سکھنے آں؟‏

¹⁴ سانوں کِنّی واری دُعا کرنی چاہی دی اے؟‏ یہوواہ خدا چاہندا اے کہ اَسی دُعا کرن دی عادت بنائیے۔‏ بائبل چ لکھیا اے کہ دُعا کردے رہوو،‏ دُعا کرن چ لگے رہوو تے ہر ویلے دُعا کرو۔‏ (‏متی 26:‏41؛‏ رومیوں 12:‏12؛‏ 1-‏تھسلُنیکیوں 5:‏17‏)‏ یہوواہ ساڈیاں دُعاواں سُنن لئی ہمیشاں تیار رہندا اے۔‏ اَسی ہر روز ایس گل لئی اوہدا شکر کر سکنے آں کہ اوہ سانوں پیار کردا اے تے دل کھول کے برکتاں دیندا اے۔‏ اَسی اوہدے کولوں رہنمائی،‏ طاقت تے تسلی وی منگ سکنے آں۔‏ جے اَسی خدا کولوں دُعا کرنا اِک مان دی گل سمجھاں گے تے فیر اَسی دُعا کرن دا کوئی وی موقع ہتھوں جان نئیں دنواں گے۔‏

15.‏ سانوں دُعا دے آخر چ آمین کیوں کہنا چاہی دا اے؟‏

 ¹⁵ سانوں دُعا دے آخر چ آمین کیوں کہنا چاہی دا اے؟‏ لفظ آمین دا مطلب اے:‏ یقیناً یاں اِنج ای ہووے۔‏ آمین کہن نال اَسی ظاہر کرنے آں کہ اَسی دُعا چ جو کجھ وی کہیا اے،‏ اوہ دِلوں کہیا اے۔‏ (‏زبور 41:‏13‏)‏ بائبل چ دَسیا گیا اے کہ جدوں کوئی دُوجا بندہ دُعا کر رہیا ہووے تے اَسی اوہدوں وی اُچی آواز چ یاں دل چ آمین کہہ سکنے آں۔‏ ایس طرحاں اَسی ظاہر کرنے آں کہ اوہنے دُعا چ جو کجھ وی کہیا اے اَسی اوہدے نال متفق آں۔‏—‏1-‏تواریخ 16:‏36؛‏ 1-‏کُرنتھیوں 14:‏16‏۔‏

16.‏ اَسی کیوں کہہ سکنے آں کہ یہوواہ خدا واقعی ساڈیاں دُعاواں سُن دا اے؟‏

¹⁶ کیہہ خدا واقعی ساڈیاں دُعاواں سُن دا اے؟‏ بالکل۔‏ بائبل چ لکھیا اے کہ اوہ دُعا دا سُنن والا اے۔‏ (‏زبور 65:‏2‏)‏ یہوواہ خدا اوہناں لکھاں لوکاں دِیاں دُعاواں سُن دا اے جیہڑ‌ے اوہدے کولوں دِلوں دُعا کردے نیں۔‏ اوہ ایہناں دُعاواں دا فرق فرق طریقیاں نال جواب دیندا اے۔‏

17.‏ یہوواہ خدا اپنے فرشتیاں تے خادماں دے ذریعے ساڈیاں دُعاواں دا جواب کیویں دیندا اے؟‏

¹⁷ یہوواہ خدا اپنے فرشتیاں تے خادماں دے ذریعے ساڈیاں دُعاواں دا جواب دیندا اے۔‏ (‏عبرانیوں 1:‏13،‏ 14‏)‏ مثال دے طور تے کئی واری اِنج ہویا اے کہ کسے بندے نے پاک کلام نُوں سمجھن لئی خدا کولوں دُعا کیتی تے ایہدے تھوڑی دیر بعد ای کوئی یہوواہ دا گواہ اوہنوں مِلن پونچ گیا۔‏ فیر پاک کلام توں پتہ چلدا اے کہ فرشتے پوری دُنیا چ بادشاہی دی خوش‌خبری سناؤن دے کم چ حصہ لے رہے نیں۔‏ ‏(‏مکاشفہ 14:‏6 نُوں پڑھو۔‏)‏ ساڈے وچوں کئیاں نُوں ایہہ تجربہ وی ہویا اے کہ جدوں اوہناں نے کسے پریشانی یاں لوڑ بارے یہوواہ خدا کولوں دُعا کیتی تے یہوواہ نے کلیسیا دے کسے بھرا یاں بھین دے ذریعے اوہناں دی مدد کیتی۔‏—‏امثال 12:‏25؛‏ یعقوب 2:‏16‏۔‏

18.‏ یہوواہ خدا پاک روح تے پاک کلام دے ذریعے ساڈیاں دُعاواں دا جواب کیویں دیندا اے؟‏

¹⁸ یہوواہ خدا اپنی پاک روح دے ذریعے وی ساڈیاں دُعاواں دا جواب دیندا اے۔‏ جدوں اَسی  کسے مشکل دا سامنا کرن بارے یہوواہ خدا کولوں دُعا کرنے آں تے اوہ اپنی پاک روح دے ذریعے ساڈی رہنمائی کر سکدا اے تے سانوں طاقت دے سکدا اے۔‏ (‏2-‏کُرنتھیوں 4:‏7‏)‏ یہوواہ خدا اپنے کلام بائبل دے ذریعے وی ساڈیاں دُعاواں دا جواب دیندا اے تے صحی فیصلے کرن چ ساڈی مدد کردا اے۔‏ پاک کلام نُوں پڑھدے ویلے سانوں ایہو جہیاں ایتاں مِل سکدیاں نیں جیہڑ‌یاں زندگی چ ساڈے کم آ سکدیاں نیں۔‏ اِنج وی ہو سکدا اے کہ یہوواہ خدا ساڈیاں عبادتاں تے کسے بھرا یاں بھین دے جواب دے ذریعے سانوں کسے مشکل نال نبڑن دی راہ وکھا دَوے۔‏ یہوواہ خدا کلیسیا دے کسے بزرگ دے دل چ وی ایہہ گل پا سکدا اے کہ اوہ کجھ ایتاں دے ذریعے ساڈی حوصلہ‌افزائی کرے۔‏—‏گلتیوں 6:‏1‏۔‏

19.‏ سانوں ایہہ کیوں لگ سکدا اے کہ خدا نے حالے تک ساڈیاں دُعاواں دا جواب نئیں دِتا؟‏

¹⁹ کدی کدار شاید تُسی سوچو کہ یہوواہ خدا نے حالے تک تواڈیاں دُعاواں دا جواب کیوں نئیں دِتا۔‏ یاد رکھو کہ اوہ چنگی طرحاں جان دا اے کہ اوہنے ساڈیاں دُعاواں دا جواب کدوں تے کیویں دینا اے۔‏ اوہ ساڈیاں لوڑاں نُوں وی چنگی طرحاں جان دا اے۔‏ شاید سانوں کسے گل بارے کئی واری دُعا کرنی پوے تاکہ ایہہ ظاہر ہو جائے کہ اَسی جو منگ رہے آں اوہ سچے دل نال تے پورے بھروسے تے ایمان نال منگ رہے آں۔‏ (‏لُوقا 11:‏5-‏10‏)‏ کدی کدی تے یہوواہ ساڈیاں دُعاواں دا جواب ایہو جہے طریقے نال دیندا اے جدے بارے اَسی سوچیا وی نئیں ہوندا۔‏ مثال دے طور تے شاید اَسی کسے مشکل نُوں دُور کرن بارے دُعا کریئے پر یہوواہ اوہنوں دُور کرن دی بجائے سانوں اوس مشکل نُوں برداشت کرن دی طاقت دے دَوے۔‏‏—‏فِلپّیوں 4:‏13 نُوں پڑھو۔‏

20.‏ سانوں یہوواہ خدا کولوں دُعا کیوں کردے رہنا چاہی دا اے؟‏

²⁰ واقعی یہوواہ کولوں دُعا کرنا ساڈے لئی بڑے مان دی گل اے۔‏ سانوں پورا یقین اے کہ یہوواہ خدا ساڈیاں دُعاواں ضرور سُنے گا۔‏ (‏زبور 145:‏18‏)‏ جِنّاں زیادہ اَسی یہوواہ خدا کولوں سچے دل نال دُعا کراں گے اونا ای زیادہ اَسی اوہدے نیڑے ہو جانواں گے تے اوہدے نال ساڈی دوستی گُوڑھی ہو جائے گی۔‏