1, 2. a) Ckam, ¿imajchus creenqui alli casckanta Jehovát orapuyta? b) ¿Imajchus importante can yachayta Biblia yachachisckanta oraciunmanta?

 TÚCUY cielúp tiajmanta Ashpa astaan utula can. Jehovápaj, túcuy persunas Ashpapi yácup sutun ina cancu (Salmo 115:15; Isaías 40:15). Amapas ancha utulitas cáysh, Biblia nin: «Jehová ckaylla tían túcuy huajyapojcunamanta, túcuy huajyapojcunamanta checkaan. Pay ckopucun desiasckancunata picunas payta respetancu, y uyárej ʼrin rogapuptincuna yanapa mañapus, y ckeshpichiconcka» (Salmo 145:18, 19). ¡Suj atun honor apiycu! Jehová can pi tucuyta ʼruara y túcuy atiyníyoj can, y pay yanasúysh cayta munan y oraciunesniyshta uyariyta. Oraciún suj ancha sumaj regalu can ima sapa sujta ckoaráysh.

² Jehová uyariasúysh orapuptíysh imaina pay munan. ¿Imaina chayta ʼruayta atíysh? Ckaasúysh Biblia yachachiasckayshta oraciunmanta.

3. ¿Imajchus importante can Jehovát orapunayquita?

³ Jehová munan ckam orapunayquita, payuan ʼrimanayquita. ¿Imaina yacháysh? Pénsay cá ancha súmaj invitaciunpi ima Tata Yaya ʼruasun Filipensespi 4:6, 7 (léey). Pi tucuyta ʼruara, cielus, Ashpa, y estrellasta,  ckampi ashcát interesacun y munan sentimientusniyquimanta y problemasniyquita cuentapunayquita.

4. Cutis cutis oraptíysh, ¿ima sucédej ʼrin amistarniyshuan Jehovaan, imajchus?

⁴ Oraciún yanapaáysh ancha súmaj amistar Jehovaan apináyshpaj. Áicap íshcay yanasus pensasckancumanta, sentisckancumanta y preocupapucusckanmanta ʼrimancu, amistarnincu astaan sinchi ʼruacun. Quiquin layamanta, Jehová Bibliapi ckamta cuentasora pensasckanta y sentisckanta, y nisun ámoj pachapi ʼrúaj ʼrisckanta. Oraciunpi, ckam Jehovát cuentapuyta atinqui sentimientusniyquimanta astaan ucumanta. Ari, cutis cutis oraptiyqui, amistarniyqui Jehovaan astaan sinchi ʼruácoj ʼrin (Santiago 4:8).

5. ¿Imaina yacháysh ima Jehová mana uyarin túcuy oraciunesta?

⁵ Jehová, ¿túcuy oraciunesta uyarin? Mana. Profeta Isaiaspa punchausninpi, Jehová israelitasta nipucora: «Amapas ashca oraciunesta ʼruanquísh, nocka mana  uyaripucuni; maquisniyquísh yaaruan mapachasckas tiancu» (Isaías 1:15). Mana cuidau apispá, ʼruayta atíysh imastis Jehová chejnisckanta y pay oraciunesniyshta mana uyárej ʼrin.

6. a) ¿Imajchus fe ancha importante can? b) ¿Imaina ckaachíysh fe apisckayshta?

⁶ Si munáysh Jehová oraciunesniyshta uyarianayshta, fe paypi apináysh tían (Marcos 11:24). Apóstul Pablu nera: «Mana fe apispá mana atíysh alli agradunmanta capuyta, imaraycu pi Tata Yayaman ckemicun creenan tían pay causasckanta y premian picunasta payta afanuan mascancu» (Hebreos 11:6). Pero manalla nináysh tían fe apisckayshta. Ckaachináysh tían casucus Jehovata sapa punchau (Santiago 2:26 léey).

7. a) Jehovát oraptíysh, ¿imajchus humildes y respetuosos canáysh tían? b) Oraptíysh, ¿imaina ckaachíysh sincerus casckayshta?

⁷ Jehovát orapuptíysh, humildes y respetuosos canáysh tían. ¿Ímaj? Si ʼrimanáysh tían suj gobernadoruan o presidente, respetuan ʼruayshman. Jehová can Tata Yaya túcuy atiyníyoj, chayraycu astaan respetuosos y humildes canáysh tían payuan ʼrimaptíysh (Génesis 17:1; Salmo 138:6). Astaanpas, Jehovát sonckomanta orapunáysh tían, mana quiquin palabras cutis, cutis nis (Mateo 6:7, 8).

8. ¿Imát ʼruanáysh tían ímaj cachun oraciunpi mañaptíysh?

⁸ Áicap ímaj cachun oraciunpi mañáysh, esforsacunáysh tían ʼruáypaj de acuerdo imaina Jehovát mañaporáysh. Por ejemplu, mañapuptíysh yanapaanáyshpaj apíypaj precisasckayshta causáypaj. Mana ckellas canáysh tían suyas Jehová tucuyta ckoanayshta. Llamcayta atispá precisasckayshta apíypaj, sinchít llamcanáysh tían y máyckanp cachun llámcay ima ʼruayta  atíysh aceptanáysh tían (Mateo 6:11; 2 Tesalonicenses 3:10). O, si Jehovát orapúysh yanapaanáyshpaj sackeyta ʼruayta mana alli casckanta, evitanáysh tían máyckanp cachun tentaciunta (Colosenses 3:5). Cunan ckaasúysh huaquin tapunas oraciunmanta ima persunas ʼruacuncu.

9. a) ¿Pít orapunáysh tían? b) Juan 14:6, ¿imát yachachiáysh oraciunmanta?

⁹ ¿Pít orapunáysh tían? Jishu discipulusninta yachachera chayna orayta: «Tata Yayáysh ima cieluspi tianqui» (Mateo 6:9). Chayraycu, Jehovallát orapunáysh tían. Jishu ninpas: «Nocka ñan y verdar y cáusay cani. Ni pipas Tataman chayayta atin si mana can nockaraycu» (Juan 14:6). Cá yachachiáysh Jíshup sutinpi oranáysh tían. ¿Imát niyta munan Jíshup sutinpi orayta? Respetu ckaachináysh tían ancha súmaj responsabilidarta ima Jehová Huaanta ckora. Imaina na aprenderáysh, Jishu Ashpaman amora ckeshpichianáyshpaj uchamanta y huañuymanta (Juan 3:16; Romanos 5:12). Nátaj, Jehová Jishút nombrara Sumo Sacerdote y Jues canánpaj (Juan 5:22; Hebreos 6:20).

10. ¿Ckonckoricunáysh tían Jehovát orapuptíysh? Niy ímaj.

¹⁰ ¿Ckonckoricunáysh tían oráypaj? Mana. Jehová mana nin orapunáysh tiasckanta ckonckoricus, tiacus o chaquimanta sayascka. Biblia yachachiáysh ima orayta atíysh máypip cachun y respetuan (1 Crónicas 17:16; Nehemías 8:6; Daniel 6:10; Marcos 11:25). Jehovápaj astaan importante can respetuan y sonckomanta payta orapunayshta. Atíysh orayta upallas tias o sinchít ʼrimas, máypip cachun o imóraj cachun, punchaupi o  tutapi. Áicap oráysh, segurus tiayta atíysh Jehová uyariáysh, atera ni pipas uyariayshta (Nehemías 2:1-6).

11. ¿Ima imastisraycu orayta atíysh?

¹¹ ¿Ima imastisraycu orayta atíysh? Orayta atíysh ímaj cachun imastiraycu de acuerdo tiachun Jehóvap voluntarninuan. Biblia nin: «Mana importas imachus can mañasckayshta conforme voluntarninuan, pay uyariáysh» (1 Juan 5:14). ¿Pasaasckayshmanta orayta atíysh? Ari. Jehovaan ʼrimayta, canan tían imaina suj alli yanasuan ʼrimayta. Nipuyta atíysh túcuy pensasckayshta y sentisckayshta (Salmo 62:8). Mañapuypas atíysh ckoanayshta atiyninta espíritu santumanta alli casckanta ʼruáypaj (Lucas 11:13). Nátaj, alli can mañapunayshta yáchay ckoanayshta allít decidíypaj y fuersas problemas enfrentáypaj (Santiago 1:5). Jehovát mañanáysh tían uchasniyshta perdonachun (Efesios 1:3, 7). Oranáysh tianpas sujcuna persunasraycu, familiayshraycu y huauckesniyshraycu congregaciunmanta (Hechos 12:5; Colosenses 4:12).

12. Oraciunesniyshpi, ¿ima astaan importante canan tían?

¹² Oraciunesniyshpi, ¿ima astaan importante canan tían? Jehová y voluntarnin. Jehovát gracias sonckomanta ckonáysh tían túcuy ʼruasckanta nockayshraycu (1 Crónicas 29:10-13). Áicap Jishu discipulusninta orayta yachachicora, nipucora astaan importante oraciunesniyshpi canan tiasckanta (Mateo 6:9-13 léey). Pay nera, huámaj mañanáysh tían Jehóvap sutin santificascka cachun, niyta munara, sagradu o santu considerascka cachun. Chaymantá, Jishu nipucora mañanáysh tían Tata Yáyap Reinun amuchun y Tata Yáyap voluntarninta túcuy Ashpapi ʼruacuchun. Nera huamajta oraspá cá importantes imastisraycu chaymantá mañayta atíysh precisasckayshta.  Oraciunesniyshpi huamajta Jehovát y voluntarninmanta ʼrimas, ckaachíysh ima can nockáyshpaj astaan importante.

13. ¿Oraciunesníysh sunis canancu tían?

¹³ ¿Oraciunesníysh ancha sunis canancu tían? Biblia mana nin. Oraciunesníysh sunis o mana sunis cayta atincu, cayta atin imasmanta orayta munáysh. Suj ejemplu, manáraj micuyta ckallaris suj oraciún mana sunít ʼruayta atíysh, pero suj astaan suni cayta  atin Jehovát gracias ckopuptíysh o suj problemamanta cuentapuptíysh (1 Samuel 1:12, 15). Mana munaycu ʼruayta oraciunes sunista sujcunas ckaahuanaycúpaj, imaina huaquin persunas Jíshup punchausninpi ʼrúaj carancu (Lucas 20:46, 47). Jehová chá oraciunesta mana uyarin. Pay munan sonckoyshmantapacha orapunayshta.

14. a) ¿Aica cutis oranáysh tían? b) Cá, ¿ima yachachiáysh Jehovamanta?

¹⁴ ¿Aica cutis oranáysh tían? Jehová niáysh imóraj cachun payuan ʼrimayta atíysh. Biblia nin: «Túcuy tiempupi oraychis», «Oras seguiychis» y «Ama orayta sackeychis» (Mateo 26:41; Romanos 12:12; 1 Tesalonicenses 5:17). Jehová máypip cachun imóraj cachun uyariáysh. Túcuy punchaus agradecepuyta atíysh  munayninta y túcuy ckoasckayshmanta. Mañapuyta atíysh encaminaanayshta y fuersata y consuelu ckoanáyshpaj. Valoraspá regalu oraciunmanta, máypip cachun, imóraj cachun Jehovaan ʼrimasúysh.

15. ¿Imajchus «amén» nináysh tían orayta puchucaptincuna?

¹⁵ ¿Imajchus «amén» nináysh tían orayta puchucaptincuna? Amén niyta munan «chayna cachun» o «ciertu can». Amén nis, ckaachíysh sincerus casckayshta oraciunesniyshpi (Salmo 41:13). Astaanpas, Biblia yachachiáysh suj oraciún ashca persunaspa ñauckenpi ʼruacuptin y puchucaptin alli can niyta «amén», upallas o sinchít ʼrimas. Chayna, ckaachíysh de acuerdu tiasckayshta nicusckanuan (1 Crónicas 16:36; 1 Corintios 14:16).

16. ¿Tata Yaya oraciunesniyshta contestan? Niy ímaj.

¹⁶ ¿Tata Yaya oraciunesniyshta costestanchu? Ari. Biblia nin Tata Yaya «oraciunesta uyarin» y contestaasúysh (Salmo 65:2; Isaías 30:19). Jehová uyarin oraciunes sincerasta ancha ashca ashca persunaspa y ashcas layasmanta contestan.

17. ¿Imaina Jehová angelesninta utilisan y persunastas ima siervusnin cancu oraciunesniyshta contestáypaj?

¹⁷ Jehová angelesninta utilisan y persunastas ima siervusnin cancu oraciunesniyshta contestáypaj (Hebreos 1:13, 14). Ashca persunas orarancu yanapa mañas Bibliát unancháypaj, y punchaus chaymanta Testigus chá persunasta visitacorancu. Cá ckaachin ángeles predicaciunuan «alli noticiasmanta» yanapashcancu túcuy Ashpapi (Revelación 14:6 léey). Nátaj, ashcas nockayshmanta Jehovát oraporáysh suj problema o suj necesidar apisckayshraycu, y chasqueráysh yanapa  suj huaucke congregaciunmanta (Proverbios 12:25; Santiago 2:16).

18. ¿Imaina Jehová espíritu santunta y Bibliát utilisan oraciunesniyshta contestáypaj?

¹⁸ Oraciunesta contestáypaj, Jehová espíritu santuntapas utilisan. Áicap yanapa mañapúysh suj problema enfrentáypaj, Tata Yaya espíritu santunta utilisayta atin yanapaáyshpaj y animaáyshpaj (2 Corintios 4:7). Nátaj, Jehová Bibliát utilisan oraciunesniyshta contestáypaj y allít decidíypaj yanapaáysh. Leeptíysh tariyta atíysh suj testu ima yanapaayshta atin. Jehová ʼruaytapas atin pillapas suj tantacunapi comentaptin nichun precisasckayshta uyariyta. Utilisayta atin suj ckari capacitascka congregaciunmanta ckaachianáyshpaj Bibliaan precisasckayshta yachayta (Gálatas 6:1).

19. ¿Imajchus pensayta atíysh Jehová oraciunesniyshta mana contestaáysh?

¹⁹ Si huaquin cutis tapunacoranqui ímaj Jehová suj oraciunta mana contestasora, yúyay pay yachan imaina y áicap contestáaj ʼríysh. Jehová yachan precisasckayshta. Pero atíysh astaan orapus seguiyta Jehovata ckaachipúypaj ashca importaasckayshta mañapusckayshta y paypi fe apisckayshta (Lucas 11:5-10). Huaquin cutis Jehová contestaáysh suj layamanta ima mana suyaráysh. Suj ejemplu, orapuyta atíysh imaraycu suj sajra problema apíysh, pero Jehová chá problema mana sorckoáysh, manapé aguantáypaj fuersas ckoáysh (Filipenses 4:13 léey).

20. ¿Imajchus ashca cutis oras seguináysh tían?

²⁰ Mana dudáysh oraciún suj regalu ancha súmaj can ima Jehová ʼruaaráysh. Segurus tiayta atíysh pay uyariáysh (Salmo 145:18). Astaan orapuptíysh sinceridaruan, amistarníysh payuan astaan sinchi ʼruácoj ʼrin.