1, 2. a) ¿Imarasha quiringui oracionda rurana shu gustu cuyashca an? b) ¿Imarasha yachana anchi Biblia imara yachachin oracionmanda?

AHUA PACHAI tucui estrellagunahuaj ricujpiga cai Allpaga ichillashituhuami an. Jehová ñaupai, tucui caibi causaj runaunaga shu ichilla shulla quihua yacu cuintami anun (Salmo 115:15; Isaías 40:15). Cai intiru Allpamanda ñucanchi yapa ichilla ashas, Biblia ninmi: “Jehová paita tucui mañaujcunaj mayanllami tian, tucui paita ciertora mañaujcunamandas. Paita manzhajcuna munaira pactachingami, paiguna yanapahuai nisha ninujpi uyangami, shinallara quishpichingami” (Salmo 145:​18, 19). Cai sumaj valishcara charinchi. Tucuira Ruraj Ushaj Jehová Dios, ñucanchi amigo tucuna munan, ñucanchi mañaigunara uyana munanmi. Oracionga Dios partimanda gustu cuyashcami an, caran shujma cushca.

² Jehová Dios uyangami, pai munashca cuinta mañajpi. ¿Imasnara chita rurana ushanchi? Ricushun imara Bibliaga yachachin oración ruranamanda.

3. ¿Imarasha valishca an Jehová Diosta mañangahua?

³ Jehová munanmi ñucanchi paita mañachu, paihua cuintarichu. ¿Imasnara yachanchi? Iyari cai gustu Dios cumbirashcara Filipenses 4:6, 7pi (leapai). Tucuira Ruraj  Dios, canda cuirangahua munasha can tucui sintirishcara, problemagunaras paita cuintachu munanmi.

4. Caran huras Diosta mañashaga ¿imara tucunga?

⁴ Oracionga yanapanmi Jehová Dioshua ali amigo tucungaj. Ishqui amigopura tucui huras ima iyarisha, ima sintirisha cuintasha mas ali amigoguna tucunun. Shinallara, Jehová canda Bibliai ima iyarishcara, sintirishcara cuintashca, astaun shamuj punzhaunai ima rurangaraushcara rimashca. Jehová Diosta oracionda rurasha, camba shungu ucui ima sintirishcara cuintana ushangui. Caran huras Diosta mañashaga, paihua mas ali amigo tucungui (Santiago 4:8).

5. ¿Imasnara yachanchi Jehová Dios tucui oraciongunara mana uyashcara?

⁵ ¿Tucui oraciongunara Jehová Dios uyanzhu? Mana. Profeta Isaías punzhaunai, Jehová israelitagunara nica, canguna “ashca oraciongunara rurashas, mana uyanichu; canguna maquiunara yahuarlla aparishcami an”  (Isaías 1:15). Mana riparasha purijpi, maicambi Jehová Dios chijnishcara rurai tucushun, shina rurajpi Jehová Diosga ñucanchi oraciongunara mana uyangachu.

6. a) ¿Imarasha quirinara charina ministishca an? b) ¿Imasnara quirina charishcara ricuchinchi?

⁶ Jehová Dios ñucanchi oraciongunara uyachu munajpiga, paita quirinami anchi (Marcos 11:24). Apóstol Pablo rimacami: “Quirina illaj, mana ushaihuajchu Diosta cushiyachingaj. Ministirinmi Diospajma shamuj runa Dios ajta quiringaj, shinallara Dios paita mascajcunara pagajmi” (Hebreos 11:6). Mana rimanallachu anchi quirinchimi nisha. Astaun ricuchinami anchi, Jehová Diosta tucui huras casusha (leapai Santiago 2:26).

7. a) ¿Imarasha mansu shunguhua, respetohua Jehová Diosta mañana anchi? b) ¿Imasnara mana pacasha rimana anchi?

⁷ Jehová Diosta mañashaga mansu shunguhua, respetohua rimanami anchi. ¿Imarasha? Shu reyhua o shu presidentehua cuintanuna munashaga respetohua rimashun. Jehová Tucui Ushaj Diosmi an, chiraigu mas respetohua, mas mansu shunguhua paihua rimana anchi (Génesis 17:1; Salmo 138:6). Imaras mana pacasha shungumanda mañana anchi, mana chillarara chillarara rimanachu anchi oracionda raushca huraspi (Mateo 6:​7, 8).

8. Mañaushaga, ¿imara rurana anchi?

⁸ Jehová Diosta oracionda rurasha, ursarinami anchi mañashca cuinta rurangaj. Huaquimbi mañanchichari ñuca ministishcara charingahua yanapahuai nisha. Chiraigu mana quilla runa ashun, mana chapashun Jehová tucuira cuchu. Tarbana ushashaga shinzhira tarbana anchi, astaumbas maican tunu tarbanara rurana anchi (Mateo 6:11; 2 Tesalonicenses 3:10). Shinallara manali ruranamanda Jehová Diosta yanapahuai nisha mañasha,  tucui manali ruranamanda anzhurinami anchi (Colosenses 3:5). Cuna, ricushun maican tapuigunara runauna oracionmanda ruraushcara.

9. a) ¿Pitara mañana anchi? b) ¿Imara Juan 14:6 oracionmanda yachachin?

⁹ ¿Pitara mañana anchi? Jesús paita catijcunara casna mañanguichi nica: “Ñucanchi ahua pachai tiaj Yaya” (Mateo 6:9). Chiraigu Jehová Diosllara mañana anchi. Jesús shinallara nica: “Ñuca ñambi ani, sirtu shimi ani, causais ani. Mana pihuas Yayajma shamunzhu mana ñucahua shamujpi” (Juan 14:6). Caita yachachin Jesuspa shutii mañana anchi. ¿Imara ricuchin Jesuspa shutii mañana? Jehová ñucanchi oraciongunara uyachu munashaga, Jesusta sumaj mingashcara respetora ricuchinami anchi. Imasna ña yachashcanchi, Jesús cai Allpama shamuca uchamanda huañuimandas quishpichingaj (Juan 3:16; Romanos 5:12). Astaumbas Jehová, Jesusta churashca Sacerdote Atun apu, Taripaj nisha (Juan 5:22; Hebreos 6:20).

10. ¿Ministirinzhu shayarishalla oracionda rurangahua? Intindichipai.

¹⁰ ¿Ministirinzhu shayarishalla oracionda rurangahua? Mana. Jehová mana rimanzhu cungurishalla, tiarishalla o shayarishalla paita mañachu. Biblia yachachin ima tunui rurasha respetohua mañanami anchi (1 Crónicas 17:16; Nehemías 8:6; Daniel 6:10; Marcos 11:25). Jehová mana ricun ima tunui mañaunchi, paihua ñaupai mas valishcami an, paita respetohua, shungumanda rimangahua. Mañanara ushanchi shinzhi rimasha o shungu ucullai, maican lugarbis, maican huraspi, tuta o  punzha ajpis. Oracionda rurasha Jehová uyanmi, mana pis uyaushcai (Nehemías 2:​1-6).

11. ¿Imamandara mañana ushanchi?

¹¹ ¿Imamandara mañana ushanchi? Imamandas mañasha, Jehová munashca cuinta mañanami anchi. Biblia ninmi: “Caimi ñucanchi Diospi quirishca, ñucanchi imaras mañajpi pai munashcasna, pai ñucanchira uyan” (1 Juan 5:14). Ñucanchi ministishcaunamanda ¿mañana ushanchichu? Ari. Jehová Dioshua cuintarinaga shu amigohua cuintarishca shinami an. Tucui ñucanchi iyarishcara, sintishcara cuintana ushanchi (Salmo 62:8). Shinallara alira rurangahua paihua sumaj espíritu santora cuchu mañana ushanchi (Lucas 11:13). Astaumbas paihua yachaira cuchu alira ajllangaj, paihua ursaras problemagunara ahuantangaj (Santiago 1:5). Jehová ñucanchi ucharashcaunara perdonachu rugana anchi (Efesios 1:​3, 7). Shinallara shujcunamanda, ñucanchi familiamanda, ñucanchi huauqui paniunamandas mañana anchi (Rashcauna 12:5; Colosenses 4:12).

12. Oracionda raushca hurasga ¿imara mas valishcara mañana anchi?

¹² Oracionda raushca hurasga ¿imara mas valishcara mañana anchi? Jehová, paihua munashcaras. Jehová Diosta ñucanchira tucuira cushcamanda intiru shunguhua pagarachuna anchi (1 Crónicas 29:​10-13). Jesús paita catijcunara imasna mañanara yachachisha, ricuchica imara mas valishca mañangaj (leapai Mateo 6:​9-13). Pai nicami ñaupa punda Jehová shuti ahuayachishca achu mañanami anchi, chita nisha nin tucuiguna paihua shuti valichichu o santo cuinta ricuchu. Huasha, Jesús ricuchica Diospa Reino shamuchu, paihua munashcara cai Allpai pactarichu mañanami anchi. Pai yachachica cai mas valishcara mañashca huasha, ñucanchi  ministishcamanda mañana alimi anga. Ñaupa punda Jehová Dios, paihua munashcara, ñucanchi oraciombi mañausha ricuchishun ñucanchihuaj imara mas valishca an.

13. ¿Masna timpura oracionda rurana anchi?

¹³ ¿Masna timpura oracionda rurana anchi? Biblia mana ninzhu. Ima pasaushcai, ansalla o ashcara mañana ushanchimi. Shu ejemplo churasha, manara micusha ansalla mañana ushanchi, shinajpi  Jehová Diosta agrasingahua o llaquiunara cuintangahua unaira oracionda mañana ushanchi (1 Samuel 1:​12, 15). Mana munanchi unaira mañangaj shujcuna ricungahualla nisha, imasna Jesuspa punzhaunai rurajcuna aca (Lucas 20:​46, 47). Jehová Diosta chi tunu mañashcauna mana manzhachinzhu. Paiga munanmi shungumanda mañachu.

14. a) ¿Masna cuti oracionda rurana anchi? b) ¿Imara yachachin Jehovamanda?

¹⁴ ¿Masna cuti oracionda rurana anchi? Jehovaga munanmi tucui huras paita mañachu. Biblia nin: “Mañaichi”, “mana saquisha mañasha”, astaun “mana saquisha mañaichi” (Mateo 26:41; Romanos 12:12; 1 Tesalonicenses 5:17). Jehová tucui huras ñucanchira uyana munan. Tucui punzhauna paihua llaquishcara ricuchishcamanda  agrasina ushanchi. Shinallara ñucanchira pushachu, ursara cuchu, cushiyachichu mañana ushanchi. Diosta mañana ushashcara agrasishaga, tucui huras paita rimashun.

15. ¿Imarasha “amén” ninchi oracionda tucuchingaj?

¹⁵ ¿Imarasha “amén” ninchi oracionda tucuchingaj? Cai shimi amén nisha nin “shina achu”. Casna rimashaga ricuchinchi shungumanda mañashcara (Salmo 41:13). Shinallara Biblia yachachinmi, runauna ñaupai shu oracionda rurasha alimi an “amén” nisha, shinzhira o alilla rimangaj. Shina rasha ricuchinchi chi mañaushca cuinta munashcara (1 Crónicas 16:36; 1 Corintios 14:16).

16. ¿Ciertochu Yaya Dios ñucanchi oracionda cutipan? Intindichipai.

¹⁶ ¿Ciertochu Yaya Dios ñucanchi oracionda cutipan? Ari. Bibliaga nin Yaya Dios “oracionda Uyaj” an, astaun ñucanchira cutipanga (Salmo 65:2; Isaías 30:19). Jehová uyanmi huaranga huaranga runauna shungumanda mañashcara, shinallara ashca tunui cutipanmi.

17. ¿Imasnara Jehová paihua angelgunahua, paihua sirvij runaunahuas ñucanchi mañashcara cutipan?

¹⁷ Jehová Dios angelgunahua o paita sirvij runaunahuas ñucanchi mañashcara cutipanmi (Hebreos 1:​13, 14). Ashca runauna mañanushca Bibliara intindingahua yanapahuai nisha, chi huashalla Testigoguna visitanuca. Caita ricuchinmi angelguna Bibliamanda ali shimiuna yachachinara pushashcara intiru Allpai (leapai Ricuchina 14:6). Shinallara, ñucanchi problemagunamanda o ima ministishcamanda, Jehová Diosta mañajpi,  congregación ucui shu huauqui yanapashcami (Proverbios 12:25; Santiago 2:16).

18. ¿Imasnara Jehová paihua espíritu santohua, Bibliahuas ñucanchi mañashcara cutipan?

¹⁸ Oraciongunara cutipangahua, Jehová paihua espíritu santora cun. Maicambi shu problemara ahuantangaj yanapaira mañajpiga, Jehová paihua espíritu santohua pushasha shinzhiyachinmi (2 Corintios 4:7). Shinallara, Jehová Bibliahua ñucanchi oraciongunara cutipan, alira ajllangaj yanapanmi. Bibliara leasha maican textogunamanda yanapaira tupana ushanchi. Shinallara Jehová maicandas animana ushan tandarinaibi shu ali comentario cuchu, ñucanchira yanapangaj. Huaquimbi shu Tandarijcunara Cuiraj huauquihua Bibliamanda ali intindichina ushanmi (Gálatas 6:1).

19. ¿Imarasha Jehová ñucanchi oracionda mana cutipashcara iyana ushanchi?

¹⁹ Maicambi tapurishcanguichari imarasha Jehová camba oracionda mana cutipashca, shinajpi iyari, pai yachanmi ima huras, imasna rasha cutipanara. Jehová alirami yachan ñucanchi ima ministishcara. Maicambi ashca timpuuna mañasha catina anchi, Jehová Diosta ricuchingahua ñucanchi mañaira ashca valishcara shinallara paihuajpi quirishcara (Lucas 11:​5-10). Huaquimbi mana chapaushca cuinta Jehová cutipanmi. Maicambi shu shinzhi problemamanda mañajpi, Jehová chi problemara mana anzhuchisha, ahuantangaj ursara cungami (leapai Filipenses 4:13).

20. ¿Imarasha tucui huras Jehová Diosta mañana anchi?

²⁰ Oracionga, Jehová Dios partimanda ali gustu cuyashcami an. Pai ciertora uyanmi nisha, quirina ushanchi (Salmo 145:18). Astaumbas, mas shungumanda mañashaga, mas paihua amigo tucushun.