1, 2. Соске и молитва тани јекх посебно поклон? Соске ваљани те џана со сикавела амен и Библија баши молитва?

АМАРИ Пхув тани бут тикни ки споредба е черењенцар со иси ко небо. Кеда о Јехова дикхела ки Пхув, са о мануша сој ки лате тане сар тикни капка пани ки јекх кофа (Псалм 115:15; Исаија 40:15). Иако сием бут тикне ки споредба е буќенцар со керѓа лен о Јехова ко небо, ко Псалм 145:18, 19 пишинела: „О Јехова тано паше узи сариненде со родена ле, узи сариненде со родена ле искрено. Ов ка исполнинел и желба адаленгири со дарана лестар, ка шунел лен кеда ола родена ле хем ка спасинел лен“. Кобор бари предност иси амен! О Јехова, о семоќно Девел кова со керѓа са, мангела те овел паше аменцар хем те шунел амаре молитве. Оја, и молитва тани бари предност, јекх посебно поклон со денѓа ле о Јехова секаске амендар.

² Ама, о Јехова ка шунел амаре молитве само ако молинаја амен ко начин сар ов со мангела. Сар шај те кера адава? Те дикха со вакерела и Библија баши молитва.

3. Соске ваљани те молина амен е Јеховаске?

³ О Јехова мангела те молина амен леске, или јавере лафенцар, те кера леа лафи. Котар џанаја адава? Молинаја тут читин Филипјаните 4:6, 7. Размислин башо акала лафија. О Девел кова со керѓа са, бут грижинела пе аменге хем мангела те вакера леске амаре проблемија хем сар осетинаја амен.

4. Сар адава со ка молина амен редовно е Јеховаске ка керел амен попаше амала леа?

 ⁴ И молитва поможинела амен те ова паше амала е Јеховаја. Кеда о амала редовно керена лафи башо адава со мислинена, башо пле секирацие хем чувствија, тегани ола овена панда попаше. Слично тано аменцар хем е Јеховаја. Преку и Библија, о Јехова вакерѓа аменге бут буќа баши песте, хем исто аѓаар вакерела аменге со ка керел ки иднина. Амен шај те вакера леске чак амаре најхор чувствија адалеа со редовно ка кера леа лафи ки молитва. Кеда кераја адава, ка ова панда попаше амала е Јеховаја (Јаков 4:8).

5. Котар џанаја кај о Јехова на шунела са о молитве?

⁵ Дали о Јехова шунела са о молитве? На, на шунела. Ко пурано време, о Јехова вакерѓа е Израелцонге: „Вакерена бут молитве, ама ме на шунава — тумаре васта тане пхерде ратеа“ (Исаија 1:15). Ако на пазинаја, шај те кера буќа кола со мрзинела лен о Јехова хем тегани ов нане те шунел амаре молитве.

6. Соске тано бут важно те овел амен вера? Сар шај те сикава амари вера?

 ⁶ Ако мангаја о Јехова те шунел амаре молитве, мора те овел амен вера ки лесте (Марко 11:24). О апостол Павле вакерѓа: „Бизи вера нашти те угодина е Девлеске, соске окова со мангела те авел паше џи лесте мора те верујнел кај ов постојнела хем кај наградинела околен со искрено родена ле“ (Евреите 11:6). Ама, нане доволно само те вакера кај верујнаја ко Девел. Ваљани те сикава амари вера, аѓаар со ка кера адава со мангела о Јехова секова диве. (Читин Јаков 2:26.)

7. а) Соске ваљани те ова понизна хем те сикава кај поштујнаја е Јехова кеда молинаја амен леске? б) Сар шај те сикава кај сием искрена кеда молинаја амен?

⁷ Амен ваљани те ова понизна хем те сикава кај поштујнаја е Јехова кеда молинаја амен леске. Соске? Па, ако кераја лафи несаве цареа или претседателеа, ка кера лафи ко начин со сикавела кај поштујнаја ле. О Јехова тано Семоќно Девел, адалеске на ваљани ли те сикава панда побаро поштовање хем понизност кеда кераја леа лафи? (1. Мојсеева 17:1; Псалм 138:6). Исто аѓаар, ваљани те ова искрена хем те молина амен таро вило, на ваљани само те повторина са иста лафија (Матеј 6:7, 8).

8. Кеда молинаја амен башо нешто, со ваљани те кера?

⁸ Кеда молинаја башо нешто, тегани ваљани те да са амендар те кера аѓаар сар со молинѓем амен. На пример, шај молинаја амен е Јеховаске башо буќа со ваљанена аменге секова диве. Ама, на ваљани те ова мрзале хем само те аџикера о Јехова те дел амен са со ваљани аменге. Ваљани те трудина амен те кера бути хем те прифатина секоја бути со шај те кера ла (Матеј 6:11; 2. Солуњаните 3:10). Или, ако молинаја е Јехова те поможинел аменге те чхинава несаве лошна буќенцар, тегани мора те цида амен таро ситуацие со шај  те чхивен амен ко искушение (Колошаните 3:5). Те дикха некобор пучиба баши молитва.

9. Каске ваљани те молина амен? Со сикљоваја таро Јован 14:6 баши молитва?

⁹ Каске ваљани те молина амен? О Исус сикавѓа пле ученикон те молинен пе е Девлеске кова сој ко небо (Матеј 6:9). Ов исто аѓаар вакерѓа ленге: „Ме сиум о друмо, о чачипе хем о живото. Никој нашти те авел џи ко Дад, освен преку манде“ (Јован 14:6). Амен ваљани те молина амен е Јеховаске преку о Исус. Со значинела те молина амен преку о Исус? Те шај о Јехова те прифатинел амаре молитве, амен ваљани те сикава кај ценинаја и посебно улога со денѓа о Јехова е Исусеске. Сар со сиклилем, о Исус ало ки Пхув те спасинел амен таро грево хем таро мерибе (Јован 3:16; Римјаните 5:12). О Јехова биринѓа е Исусе те овел Првосвештенико преку касте со шај те простинен пе амаре гревија. Ов исто аѓаар биринѓа ле те овел Судија (Јован 5:22; Евреите 6:20).

10. Дали ваљани те ова ки несави посебно положба кеда молинаја амен? Објаснин.

¹⁰ Дали ваљани те ова ки несави посебно положба кеда молинаја амен? На, о Јехова на родела амендар те пера ко кочака, те беша или те терѓова кеда молинаја амен. Тари Библија џанаја кај шај те молина амен е Јеховаске ки било која положба колаја со ка сикава кај поштујнаја ле (1. Летописи 17:16; Неемија 8:6; Даниел 6:10; Марко 11:25). Е Јеховаске тано најважно кеда молинаја амен те сикава поштовање хем амаре лафија те овен таро вило, а на ки сави положба сием џикоте молинаја амен. Шај те молина амен ко гласо или ки аменде, било коте те ова хем ко било саво време, сајекх дали дивескоро или раќате. Кеда молинаја амен е Јеховаске, шај те ова сигурна  кај ов ка шунел амен, чак кеда нијекх јавер нашти те шунел амен (Неемија 2:1-6).

11. Башо кола буќа шај те молина амен?

¹¹ Башо со шај те молина амен? Шај те молина амен башо са сој прифатливо е Јеховаске. И Библија вакерела: „Било со те рода, ако и спрема лескири волја, ов шунела амен“ (1. Јованово 5:14). Шај ли те молина амен башо амаре лична буќа? Оја. И молитва ваљани те овел сар кеда кераја лафи јекхе паше амалеа. Е Јеховаске шај те вакера са со мислинаја хем са со пашљола аменге ко вило (Псалм 62:8). Шај те молина ле те дел амел пло свети дух кова со ка поможинел аменге те кера адава сој шукар (Лука 11:13). Исто аѓаар, шај те рода лестар мудрост те шај те ана шукар одлуке, хем сила те икљова ко крајо е проблеменцар (Јаков 1:5). Ваљани те молина е Јехова те простинел амаре гревија (Ефешаните 1:3, 7). Исто аѓаар, ваљани те молина амен е јаверенге да, сар на пример амаре фамилијаке хем амаре пхраленге хем пхењенге таро собрание (Дела 12:5; Колошаните 4:12).

12. Со ваљани те овел аменге најважно кеда молинаја амен?

¹² Со ваљани те овел аменге најважно кеда молинаја амен? О Јехова хем лескири волја. Ваљани вилестар те вакера леске кај бут ценинаја са со керѓа аменге (1. Летописи 29:10-13). Акава џанаја адалеске со о Исус сикавѓа пле ученикон сар те молинен пе. (Читин Матеј 6:9-13.) Ов вакерѓа кај прво ваљани те молина амен те славинел пе е Девлескоро свето анав. Дујто, ваљани те молина амен те авел е Девлескоро Царство хем е Јеховаскири волја те керел пе ки цело Пхув. Кеда вакерѓа акала дуј важна буќа, пало адава о Исус вакерѓа кај шај те молина амен башо амаре лична потребе. Кеда ко амаре молитве ко прво тхан тано о Јехова хем лескири волја, сикаваја сој аменге најважно.

13. Кобор баре ваљани те овен амаре молитве?

 ¹³ Кобор баре ваљани те овен амаре молитве? И Библија на вакерела аменге кобор баре ваљани те овен о молитве. Ола шај те овен тикне или баре, зависинела тари ситуација. На пример, шај те вакера тикни молитва англедер те ха маро, а бари кеда мангаја те благодарина е Јеховаске или кеда мангаја те вакера леске нешто со мучинела амен (1. Самоилова 1:12, 15). На мангаја те вакера баре молитве само те  сикава амен англо јавера, сар со керена сине несаве мануша ко време е Исусескоро (Лука 20:46, 47). Е Јеховаске асавке молитве на врединена. Леске тано важно кеда молинаја амен таро вило.

14. Кобор често ваљани те молина амен, хем со сикавела аменге адава башо Јехова?

¹⁴ Кобор често ваљани те молина амен? О Јехова мангела редовно те кера леа лафи ки молитва. Ки Библија пишинела кај ваљани „те ова истрајна ки молитва“, „секогаш те молина амен“, хем те вакера „молитве диве хем рат“ (Римјаните 12:12; 1. Солуњаните 5:17; 1. Тимотеј 5:5). Акава сикавела аменге кај о Јехова тано секогаш спремно те шунел амен. Секова диве шај те благодарина леске башо лескоро мангипе хем башо адава со дела амен бут буќа. Исто аѓаар, шај те рода лестар те водинел амен, те дел амен сила хем  утеха. Ако чаче ценинаја адава со шај те молина амен е Јеховаске, тегани ка користина секоја прилика те кера леа лафи ки молитва.

15. Соске ко крајо тари молитва ваљани те вакера „амин“?

¹⁵ Соске ваљани те вакера „амин“ ко крајо тари молитва? О лафи „амин“ значинела „аѓаар тано“ или „аѓаар те овел“. Адалеа сикаваја кај чаче мангаја те овел аѓаар сар со вакерѓем ки молитва (Псалм 41:13). И Библија сикавела амен кај тано шукар ко крајо тари молитва те вакера „амин“, сајекх дали ки аменде или ко гласо. Исто аѓаар, кеда молинена пе о јавера да ваљани те вакера „амин“, соске аѓаар сикаваја кај согласинаја амен адалеа со сине вакердо ки молитва (1. Летописи 16:36; 1. Коринќаните 14:16).

16. Дали о Јехова чаче одговоринела ко амаре молитве? Објаснин.

¹⁶ Дали о Јехова чаче одговоринела ко амаре молитве? Оја, одговоринела. Ки Библија пишинела кај ов тано „адава со шунела о молитве“ (Псалм 65:2). О Јехова шунела буте манушенгере искрена молитве, хем одговоринела ленге ко различно начин.

17. Сар о Јехова користинела е ангелен хем пле слуген ки Пхув те шај те одговоринел ко амаре молитве?

¹⁷ О Јехова користинела е ангелен хем пле слуген ки Пхув те шај те одговоринел ко амаре молитве (Евреите 1:13, 14). Иси бут искуствија таро мануша со молинѓе пе те хаљовен и Библија или пошукар те пенџарен е Девле хем кратко пало адава, але ки ленде е Јеховаскере сведокија. Асавке искуствија сикавена аменге кај о ангелија поможинена те вакерел пе „о шукар хабери“ ко цело свето. (Читин Откровение 14:6.) Исто аѓаар, бут џене амендар молинѓем амен башо несаво проблеми или башо нешто со ваљанѓа  аменге, хем пало адава добинѓем помош таро амаре духовна пхраља хем пхења (Изреки 12:25; Јаков 2:16).

18. Сар о Јехова користинела пло свети дух хем и Библија те шај те одговоринел ко амаре молитве?

¹⁸ О Јехова користинела пло свети дух те шај те одговоринел ко амаре молитве. Кеда молинаја те поможинел амен те икљова ко крајо несаве проблемеа, ов шај те користинел пло свети дух аѓаар со ка водинел амен хем ка дел амен сила (2. Коринќаните 4:7). О Јехова исто аѓаар преку и Библија одговоринела ко амаре молитве хем поможинела амен те ана мудра одлуке. Кеда читинаја и Библија, тегани шај те аракха стихија кола со ка поможинен аменге. Исто аѓаар, о Јехова шај те користинел некас кеда коментиринела ко состанок те вакерел нешто со баш аменге ваљани или јекхе старешина ко собрание те вакерел аменге несави мисла тари Библија (Галатите 6:1).

19. Соске некогаш шај те изглединел аменге кај о Јехова на одговоринела ко амаре молитве?

¹⁹ Понекогаш, шај пучаја амен: „Соске панда о Јехова на одговоринела ко мле молитве?“ Ма те бистра кај ов џанела кеда хем сар те одговоринел ко амаре молитве. Ов најшукар џанела со ваљани аменге. Шај баши несави бути ка ваљани те молина амен повише пути соске аѓаар ка сикава кај чаче мангаја адава со родаја таро Јехова хем кај чаче иси амен вера ки лесте (Лука 11:5-10). Понекогаш о Јехова одговоринела ко амаре молитве, ама на ко начин сар амен со мислинаја. На пример, шај молинаја амен баши јекх пхари ситуација, ама наместо те решинел о проблеми, о Јехова ка дел амен сила. (Читин Филипјаните 4:13.)

20. Соске ваљани често те молина амен е Јеховаске?

²⁰ Бари чест иси амен со шај те молина амен е Јеховаске! Шај те ова сигурна кај ов ка шунел амен (Псалм 145:18). Кобор почесто молинаја амен е Јеховаске таро вило, добором попаше оваја леа.