1, 2. Thangwi yanji musanyerezera kuti kucita phembero ndi muoni wakupambulika? Thangwi yanji tisafunika kudziwa pinapfundzisa Bhibhlya thangwi ya phembero?

YAHOVA nciti wakudzulu na pantsi, asaona madzindza onsene a anthu ninga thotho ing’ono ya madzi yakubuluka n’nkhali. (Masalmo 115:15; Izaiya 40:15) Ngakhale ndife ang’ono kakamwe tingalandaniswa na thambo, lemba ya Masalmo 145:18, 19 isalonga: ‘Yahova ali dhuzi na onsene anancemera, mbaphemba ciphedzo cace na ntima wadidi. Ale anangopa anaapasa pinafuna iwo; anaabvera mikhuwo yawo.’ Tiri na mwai wadidi kakamwe! Yahova, Nciti Wamphambvu zonsene, asafuna kuti tikhale cifupi na iye, pontho asafuna kubvesera maphembero athu. Inde, kucita phembero ndi mwai, muoni wakupambulika unatipasa Yahova.

² Mbwenye Yahova anadzatibvesera basi ene tingalonga naye munjira yakutawirika kuna iye. Tinacita tani pyenepi? Tendeni tione pinalonga Bhibhlya thangwi ya phembero.

3. Thangwi yanji musafunika kuphembera kuna Yahova?

³ Yahova asafuna kuti mucite phembero, peno kulonga na iye. Tisadziwa tani pyenepi? Taphata miyendo, lerini Afilipi 4:6, 7. Nyerezerani basi ntundu unoyu wa ncemerero. Ntongi wakudzulu na pantsi asakufunani kakamwe, pontho asafuna kuti mumpange mabvero anu na nyatwa zanu.

4. Ndi munjira ipi kucita phembero mwakukhonda phonya kuna Yahova kusawangisa uxamwali wanu na iye?

⁴ Phembero isatiphedza toera kukhala na uxamwali wapadhuzi na Yahova. Ndzidzi onsene axamwali angacedza pya manyerezero awo, pinaadzudzumisa na mabvero awo,  uxamwali wawo usakhala wakuwanga. Pyenepi pyalandana na kucita phembero kuna Yahova. Kubulukira m’Bhibhlya, iye asadziwisa manyerezero na mabvero ace kuna imwe, pontho asakupangani pinafuna kudzacita iye ntsogolo. Munakwanisa kundziwisa mabvero anu a muntima mukucedza naye mwakukhonda phonya. Mungacita pyenepi, uxamwali wanu na Yahova unadzakula mwakuwanga kakamwe.​—Tyago 4:8.

5. Tisadziwa tani kuti Yahova nee asabvesera maphembero onsene?

⁵ Kodi Yahova asabvesera maphembero onsene? Nkhabe. M’midzidzi ya mprofeta Izaiya, Yahova apanga Aisraele: ‘Mungathimiza kuphembera, ine nkhabe kukubveserani, thangwi manja anu adzala na ciropa.’ (Izaiya 1:15) Natenepa tingakhonda kucita mphole-mphole, tinacita pinthu pyakuti pinaticitisa kukhala kutali na Yahova, mbapicitisa kuti maphembero athu akhonde kubviwa.

6. Thangwi yanji kukhala na cikhulupiro nkhwakufunika? Munapangiza tani kuti muli na cikhulupiro?

⁶ Khala tisafuna kuti Yahova abvesere maphembero athu,  tisafunika kukhala na cikhulupiro kuna iye. (Marko 11:24) Mpostolo Paulu afokotoza: ‘Mwakusowa cikhulupiro, tinacimwana kukomeresa Mulungu. Thangwi onsene anafendedzera Mulungu asafunika kukhulupira kuti iye alipo na asapasa nkhombo ale ananfuna na ntima onsene.’ (Ahebere 11:6) Pyenepi nee pisabveka kuti tisafunika kulonga kwene kuti tiri na cikhulupiro. Tisafunika kupangiza mwapakweca cikhulupiro cathu mukubvera Yahova ntsiku zonsene.​—Lerini Tyago 2:26.

7. (a) Thangwi yanji tisafunika kukhala akucepeseka na acilemedzo tingacita phembero kuna Yahova? (b) Tinapangiza tani kuti tisalonga undimomwene tingacita phembero?

⁷ Tisafunika kukhala akucepeseka na acilemedzo tingacita phembero kuna Yahova. Thangwi yanji? Khala tikulonga na mambo peno prezidenti, tisafunika kulonga naye mwacilemedzo. Yahova ndi Mulungu Wamphambvu zonsene, kodi nee tisafunikambo kupangiza cilemedzo kakamwe na kucepeseka tingalonga naye? (Genesi 17:1; Masalmo 138:6) Tisafunikambo kulonga undimomwene tingacita phembero kuna Yahova bulukira muntima, tayu mwakubwereza-bwereza mafala mabodzi ene.​—Mateo 6:7, 8.

8. Tingacita phembero thangwi ya cinthu cinafuna ife, ninji pontho cisafunika ife kucita?

⁸ Pakumalisa, tingacita phembero thangwi ya cinthu cinafuna ife, tisafunika kucita pinthu mwakubverana na phembero yathu. Mwacitsandzo, tingacita phembero kuna Yahova toera atipase pyakufuna pya ntsiku na ntsiku, nee tisafunika kupolola mbatidikhira kuti Yahova anadzatipasa pyonsene ngakhale pinthu pyakuti tinakwanisa kupiphatira basa toera kukhala napyo. Tisafunika kuphata basa mwakuwanga na kutawira basa yonsene inakwanisa ife kucita. (Mateo 6:11; 2 Atesalonika 3:10) Peno tingacita phembero kuna Yahova toera atiphedze kusiya kucita pinthu pyakuipa, tisafunika kucalira makhaliro onsene akuti anakwanisa kutiyesera. (Akolose 3:5) Tendeni tidinge cincino  mibvundzo mingasi inacitwa kazinji kene thangwi ya phembero.

9. Tisafunika kuphembera kuna ani? Kodi lemba ya Jwau 14:6 isatipfundzisanji thangwi ya phembero?

⁹ Tisafunika kuphembera kuna ani? Yezu apfundzisa atowereri ace toera kuphembera kuna ‘Babathu wakudzulu.’ (Mateo 6:9) Iye alonga pontho: ‘Ine ndine njira, undimomwene na umaso. Nkhabepo munthu anafika kuna Baba mbakhonda kupita pana ine.’ (Jwau 14:6) Natenepa tisafunika basi ene kuphembera kuna Yahova kubulukira mwa Yezu. Kodi kucita phembero kubulukira mwa Yezu kusabvekanji? Toera Yahova atawire maphembero athu, tisafunika kupangiza cilemedzo ku basa yakupambulika idapereka Yahova kuna Yezu. Ninga tapfundza, Yezu abwera pa dziko yapantsi toera kutipulumusa m’madawo na kufa. (Jwau 3:16; Aroma 5:12) Yahova akhazikisambo Yezu ninga Nyantsembe Wankulu na Nyakutonga miseru.​—Jwau 5:22; Ahebere 6:20.

10. Kodi tisafunika kukhala na n’khaliro wakupambulika pakucita phembero? Fokotozani.

¹⁰ Kodi tisafunika kukhala na n’khaliro wakupambulika pakucita phembero? Nkhabe, Yahova nee asatiphemba toera kugodama, kukhala pantsi, peno kukhala dzololo pakucita phembero. Bhibhlya isatipfundzisa kuti tinakwanisa kulonga na Yahova munjira yonsene mwacilemedzo. (1 Pya dziko ya Israele 17:16; Nehemiya 8:6; Danyele 6:10; Marko 11:25) Pyakufunika kakamwe kuna Yahova ndi kulonga naye na cifuno cadidi, tayu n’khaliro wakupambulika tingacita phembero. Tinakwanisa kucita phembero mwakugaluza peno mwacipantsipantsi, mwakukhonda tsalakana mbuto inagumanika ife, pontho pa ndzidzi onsene ngakhale masikati peno masiku. Tingacita phembero kuna Yahova, tisafunika kukhala na cinyindiro cakuti iye  anatibvesera ngakhale nkhabe unango pontho wakuti anatibvesera.​—Nehemiya 2:1-6.

11. Ndi pinthu pipi pinango pyakuti tinakwanisa kupiphemba kuna Yahova?

¹¹ Tisafunika kuphembanji? Ife tinakwanisa kuphemba cinthu cakuti ndi cakutawirika kuna Yahova. Bhibhlya isalonga: ‘Tingamphemba cinthu ninga munafunira iye, iye asatibva.’ (1 Jwau 5:14) Tisafunika kucita phembero thangwi ya pinthu pinafuna ife? Inde. Kucita phembero kuna Yahova kwalandana na kulonga na xamwali wapantima. Tinakwanisa kupanga Yahova cinthu consene ciri m’manyerezero na muntima mwathu. (Masalmo 62:8) Tinakwanisa kuphembera kuna iye kuti atipase nzimu wace wakucena toera kutiphedza kucita pinthu pyadidi. (Luka 11:13) Tinakwanisa kuphembambo Yahova udziwisi toera kucita cisankhulo cadidi, pontho tinacita phembero kuti atipase mphambvu toera kuthimbana na nyatwa. (Tyago 1:5) Ife tisafunika kuphemba Yahova toera alekerere madawo athu. (Aefesi 1:3, 7) Tisafunikambo kucita phembero thangwi ya anango, kuphataniza banja yathu na abale na alongo athu a mu mpingo.​—Machitiro 12:5; Akolose 4:12.

12. Ndi cinthu cipi cakufunika kakamwe m’maphembero athu?

¹² Ndi cinthu cipi cakufunika kakamwe m’maphembero athu? Yahova na cifuno cace. Tisafunika kupereka takhuta kuna iye kubulukira muntima thangwi ya pinthu pyonsene pinaticitira iye. (1 Pya dziko ya Israele 29:10-13) Tisadziwa pyenepi thangwi pikhali Yezu pa dziko yapantsi, iye apfundzisa anyakupfundzace kuti anaphembera tani. (Lerini Mateo 6:9-13.) Iye alonga kuti iwo akhafunika pakutoma kuphembera kuti dzina ya Mulungu iceneswe, peno kuti ioniwe ninga yakucena. Buluka penepo Yezu apangiza kuti tisafunika kucita phembero toera Umambo wa Mulungu udze, pontho toera cifuno ca Yahova cicitwe pa dziko yonsene yapantsi. Basi ene pakumala kuphembera thangwi ya pinthu pyakufunika kakamwe  pidalonga Yezu, tinakwanisambo kuphembera thangwi ya pyakufuna pyathu. Tingaikha Yahova na cifuno cace pa mbuto yakutoma m’maphembero athu, tisapangiza kuti ndi cinthu cipi cakufunika kakamwe kuna ife.

13. Kodi maphembero athu asafunika kumala ndzidzi ungasi?

¹³ Kodi maphembero athu asafunika kumala ndzidzi ungasi? Bhibhlya nee isalonga. Maphembero athu anakwanisa kukhala akubvira peno akulapha, mwakubverana na makhaliro. Mwacitsandzo, tinakwanisa kucita phembero yakubvira mbatidzati kudya, mbwenye tinacita phembero  yakulapha tingacita takhuta kuna Yahova peno kumpanga thangwi ya pifuno pyathu. (1 Samwele 1:12, 15) Ife nee tisafunika kucita maphembero akulapha basi ene toera anthu aone, ninga pikhacita anango mu ntsiku za Yezu. (Luka 20:46, 47) Yahova nkhabe kudzumatirwa na maphembero ninga anewa. Pyakufunika kuna Yahova ndi kucita phembero yakubulukira muntima.

14. Kodi tisafunika kuphembera kangasi na pyenepi pisatipfundzisanji thangwi ya Yahova?

¹⁴ Kodi tisafunika kuphembera kangasi? Yahova asatiphemba toera kulonga naye mwakukhonda phonya. Bhibhlya isalonga kuti tisafunika ‘kupitiriza kuphembera,’ ‘kuwangisira kuphembera,’ na ‘kuphembera ndzidzi onsene.’ (Mateo 26:41; Aroma 12:12; 1 Atesalonika 5:17) Yahova ndzidzi onsene ali dzololo toera kubvesera maphembero athu. Tinakwanisa kupereka takhuta kuna iye ntsiku zonsene thangwi ya ufuni wace na kupasa kwace mwakudzala  manja. Tinakwanisambo kuphemba citsogolero cace, mphambvu na ciwangiso. Khala ife tisapasa ntengo mwai wathu wakucita phembero kuna Yahova, tinadzaphatisira miyai yonsene toera kulonga naye.

15. Thangwi yanji tisafunika kulonga “amen” kunkhomo kwa phembero?

¹⁵ Thangwi yanji tisafunika kulonga “amen” kunkhomo kwa phembero? Fala yakuti “amen” isabveka “ndimomwene” peno “mbipicitike.” Ineyi ndi njira yakupangiza kuti ife tabvesesa pidalonga ife m’phembero yathu, pyenepi pisabveka, kucita phembero yakubuluka muntima. (Masalmo 41:13) Bhibhlya isatipfundzisa kuti ndi pyakufunikambo kulonga “amen,” ngakhale mwacipantsipantsi peno mwakugaluza, kunkhomo kwa phembero yapakweca toera kupangiza kuti ife tisatawira pidalongwa m’phembero.​—1 Pya dziko ya Israele 16:36; 1 Akorinto 14:16.

16. Kodi Yahova asatawiradi maphembero athu? Fokotozani.

¹⁶ Kodi Yahova asatawiradi maphembero athu? Inde, iye asatawira. Bhibhlya isancemera ‘Nyakubvesera maphembero.’ (Masalmo 65:2) Yahova asabvesera na asatawira maphembero a anthu azinji akuti asacita phembero yakubulukira muntima, pontho iye asacita pyenepi munjira zakusiyana-siyana.

17. Kodi Yahova asaphatisira tani aanju na atumiki ace pa dziko yapantsi toera kutawira maphembero athu?

¹⁷ Yahova asaphatisira aanju na atumiki ace pa dziko yapantsi toera kutawira maphembero athu. (Ahebere 1:13, 14) Pana pitsandzo pizinji pya anthu adacita phembero toera aphedzwe kubvesesa Bhibhlya na mwakukhonda dembuka acedzerwa na m’bodzi wa Mboni za Yahova. Bhibhlya isapangiza kuti aanju asacita khundu mu kumwaza “mphangwa zadidi” pa dziko yonsene yapantsi. (Lerini Apokalipse 14:6.) Pontho, azinji a ife acita phembero kuna Yahova thangwi ya nyatwa peno pyakufuna pyathu, buluka penepo  tatambira ciphedzo cikhafuna ife kubulukira kuna m’bale peno mulongo Wacikristu.​—Misangani 12:25; Tyago 2:16.

18. Kodi Yahova asaphatisira tani nzimu wace wakucena na Bhibhlya toera kutawira maphembero athu?

¹⁸ Yahova asaphatisira nzimu wace wakucena toera kutawira maphembero athu. Tingaphembera toera kuphemba ciphedzo cakuthimbana na nyatwa, iye panango anaphatisira nzimu wace wakucena toera kutitsogolera na kutiwangisa. (2 Akorinto 4:7) Yahova asaphatisirambo Bhibhlya toera kutawira maphembero athu na kutiphedza toera kucita pisankhulo pyadidi. Tingaleri Bhibhlya, panango tinagumana lemba yakuti inakwanisa kutiphedza. Pontho Yahova anakwanisa kucitisa munthu anapereka matawiro pa misonkhano toera kulonga pinafuna ife kubva peno nkulu wa mpingo anatipangiza ntsonga za m’Bhibhlya zinafuna ife kudinga.​—Agalata 6:1.

19. Thangwi yanji pinakwanisa kuoneka ninga Yahova nkhabe kutawira maphembero athu?

¹⁹ Midzidzi inango, panango tinabvundza, ‘Thangwi yanji Yahova adzati kutawira maphembero anga?’ Kumbukani, iye asadziwa ndzidzi wakuthema, pontho kuti anatawira tani maphembero athu. Iye asadziwa pinthu pinafuna ife. Panango tisafunika kupitiriza kuphembera mu ndzidzi uzinji toera kupangiza kuti pinalonga ife pisapangiza kuti mwandimomwene tisankhulupira. (Luka 11:5-10) Midzidzi inango Yahova asatawira maphembero athu munjira yakuti nee tikhaidikhira. Mwacitsandzo, panango tinaphembera thangwi ya midzidzi ya nyatwa, mbwenye mbuto mwakumalisa nyatwa, Yahova panango anatipasa mphambvu toera kupirira pyenepi.​—Lerini Afilipi 4:13.

20. Thangwi yanji tisafunika kuphembera kuna Yahova kazinji kene?

²⁰ Tiri na mwai wakudzumatirisa kakamwe wakuphembera kuna Yahova! Tinakwanisa kukhala na cinyindiro cakuti iye anadzabvesera maphembero athu. (Masalmo 145:18) Kazinji kene tingacita phembero yakubulukira muntima kuna Yahova, uxamwali wathu na iye unadzakhala wakuwanga.