1, 2. (a) Ka nawe obwine oku isala luli luhembo lwinja bwenene? (b) Bulya gurhi kuli kwa bulagirire okumanya ebi Ebibliya eyigirizize okubiyerekire isala?

ERHI igulu lyakagererwa oku malunga, igulu liri lisungunu bwenene. Erhi Yehova akalaba igulu, anabone amashanja gayosire nka ntonyi y’amishi. (Ennanga 115:15; Izaya 40:15) Ciru akaba rhuli basungunu omukugererwa okumalunga, Ennanga 145:18, 19 zidesire ntya: “Yehova ali hofi ha ngasi yeshi omusengera, ngasi yeshi omusengera n’omurhima gurhajira bulyalya. Abamurhinya anabàjirire ngasi byoshi bacîfinja, anayumve emirenge yabo anabàcize.” Yehova, Lulema Ogala Byoshi alonzize arhuyegere: alonzize abe Mwira wirhu! Na kandi alonzize ayumvirhize amasala girhu! Kobinali isala luli luhembo lwinja na lukengwa lunene Yehova ahire ngasi muguma wirhu.

² Cikoki ly’arhuyumvirhiza rhukwanine okumushenga omu njira asimire. Rhulolage ebi Ebibliya edesire okubiyerekire isala.

3. Bulya gurhi rhukwanine okusalira Yehova?

³ Yehova alonzize rhumushenge. Gurhi rhumanyiremwo ntyo? Osome Abafilipi 4:6, 7. Orhanye bici Nnamahanga akuhunyire ojire: Nnahano w’igulu lyoshi akushibirire bwenene, analonzize omubwire oku oli waciyumva n’amazibu gawe goshi.

4. Bulya gurhi nka wankakasalîra ngasi mango obwira bwawe haguma na Yehova bwanazibuha bwenene?

 ⁴ Isala lyanakurhabaza okuba n’obwira buzibu haguma na Yehova. Erhi abira babwirana oku ngasi muguma ali aciyumva, amalagirire gabo, n’entanya zabo, obwira bwabo bunazibuhe bwenene. Kwo n’oko nirhu, nka rhwasalîra Yehova. Omu Bibliya, Yehova akubwizire entanya zage, gurhi aciyumva n’ebi ajira amango gayisha. Wanamuganiza ngasi mango, ciru wanamubwira oku oli waciyumva omu murhima gwawe. Erhi wakajira ntyo obwira bwawe haguma naye bwanazibuha bwenene.​—Yakobo 4:8.

5. Gurhi rhumanyiremwo oku Yehova arhayumvirhiza ngasi masala?

⁵ Ka Yehova anayumvirhize ngasi isala? Nanga. Amango gw’omulebi Izaya, Yehova abwîra aba Israheli ntya: ‘Mukalambûla amaboko, nnambwikire obusu bwani ntag’ibona; ciru mwankayushûla emisengero, niono ntayiyumvirhiza: Bulya amaboko ginyu gayunjwire muko.’ (Izaya 1:15) Nka rhurhacilabiri bwinja, rhwanahikira aha rhwajira  ebintu byankarhuhira kuli na Yehova. Okwo kwanarhuma arhayumvirhiza amasala girhu.

6. (a) Bulya gurhi kuli kwa bulagirire okuba n’obuyemere? (b) Gurhi rhwakayerekanamwo oku rhugwerhe obuyemere muli Nnamahanga?

⁶ Nka rhulonzize Yehova ayumvirhize amasala girhu, rhukwanine rhube n’obuyemere muli ye. (Marko 11:24) Entumwa Paolo yahugwîre erhi: “Buzira buyemere, kuli kuzibu okusimisa Nnamahanga, bulya owalonza okuyegêra Nnamahanga arhegesirwe ayemere oku ho abà, na kuhemba ahemba abamulonza n’omurhima goshi.” (Abahabraniya 11:6, NWT) Cikwone birhahunyiri rhuderhe kone oku rhuyemire Nnamahanga. Rhukwanine rhuyerekane ntyo omu kumurhumikira ngasi lusiku.​—Osome Yakobo 2:26.

7. (a) Bulya gurhi rhukwanine okuba birhohye na babukenge nka rhwashenga Yehova? (b) Gurhi rhwakayerekanamwo oku rhugwerhe omurhima gucire nka rhwashenga?

⁷ Bulya guhi rhukwanine okuba birhohye na babukenge nka rhwashenga Yehova? Nka rhwaganiza omwami erhi prezida, rhunajire ntyo n’obukenge. Yehova ye Nnamahanga Ogala Byoshi. Co cirhumire nka rhwaganiza Yehova rhukwanine rhumuganize n’obukenge bunji n’obwirhohye. (Omurhondêro 17:1; Ennanga 138:6) Nka rhwashenga rhukwanine rhubwire Yehova ebiri omu murhima gwirhu byoshi. Erhi akaba omurhima gwirhu gucire, rhurhakaja rhwagalukira enderho zonazirya nka rhwashenga.​—Mateyo 6:7, 8.

8. Bici rhwakajira nka rhwasalîra okubiyerekire kantu kalebe?

⁸ Erhi rhwakasalîra okubiyerekire kantu kalebe, rhukwanine okujira lugenda bilya rhwasaliriraga. Kwa lwiganyo, nka rhuhunyire Yehova arhuhe amalagirire girhu gw’olusiku, rhurhakwanini okuba balera ngolo/bôlo. Rhurhakalangalira oku arhuha ngasi byoshi rhulagirirekwo nka rhurhal’irhwakola. Rhukwanine rhukole bwenene  n’okuleka okugayaguza emikolo rhunagwerhe obuhashe bw’okuyikola. (Mateyo 6:11; 2 Abatesalonika 3:10) Gurhi rhwakajira nka rhuhunyire Yehova oku arhurhabale rhuleke okujira akantu kabi? Rhwanayaka ngasi kantu koshi koshi kakarhuma rhwajira ako kantu kabi. (Abakolosi 3:5) Rhukolaga rhwashuza madoso maguma na maguma abantu balug’icidosa okubiyerekire isala.

9. (a) Ndi rhukwanine okushenga? (b) Bici olwandiko lwa Yowane 14:6, lurhuyigirizize okubiyerekire isala?

⁹ Ndi rhukwanine okushenga? Yezu arhuyigirîzize gurhi rhwakashenga: “Larha, oli omu mpingu.” (Mateyo 6:9) Ashub’iderha ntya: ‘Nie Njira, nie n’Okuli, nie na Buzîne. Ntaye wakaja emwa Larha arhanangeziriho.’ (Yowane 14:6) Rhukwanine okusalira Yehova yene. Rhwanamusalîra kugerera Yezu, erhi omw’izino lya Yezu. Oko kw’okuderha gurhi? Lyo Yehova ayumvirhiza amasala girhu rhukwanine okukenga omukolo ahîre Yezu. Rhwayizîre oku Yezu ayishîre ah’igulu ly’arhucungula omu bujà bw’ecaha n’olufû. (Yowane 3:16; Abaroma 5:12) Kandi Yehova amujijîre Mudahwa Mukulu na Muzuzi.​—Yowane 5:22; Abahabraniya 6:20.

10. Ka hali uku rhushinganine rhuyorhe nka rhukola rhwashenga?

¹⁰ Ka hali oku rhukwanine rhuyorhe amango rhukola rhwashenga? Nanga. Yehova arharhuhunyiri oku amango rhukola rhwashenga mpu: rhufukame, rhuyimange erhi rhutamale. Ebibliya erhuyigirizize oku nt’irhegeko okubiyerekire okurhwakayorha nka rhukola rhwashenga, cikwone rhwanajira ntyo n’obukenge. (1 Enganîro 17:16; Nehemiya 8:6; Daniyeli 6:10; Marko 11:25) Arhali oku rhuyosire kwo kuli kwa bulagirire lyo Yehova ayumvirhiza isala lirhu, cikwone anakalola omurhima gwirhu. Rhwanashenga n’izu linene erhi omu murhima, akasanzi koshi,  bube budufu erhi mushi. Rhwanayemera n’obwalagale oku Yehova anarhuyumvirhiza, ciru akaba abali ahaburhambi bwirhu barhal’ibayumva ebi rhul’irhwaderha.​—Nehemiya 2:1-6.

11. Bici rhwakabwira Yehova nka rhwamushenga?

¹¹ Rhwanashenga okubiyerekire bici? Erhi akaba ebi rhwashenga Yehova biringanine n’obulonza bwage, rhwanamushenga ngasi kantu ananarhuyumvirhize. Ebibliya edesire ntya: “Erhi rhwankamushenga, akantu nk’oku alonzize, anarhuyumvirhize.” (1 Yowane 5:14) Ka rhwanashenga okubiyerekire amalagirire girhu rhwene? Neci. Bulya okushenga Yehova kuyosire nka kuganiza omwira wirhu rhuzigîra bwenene. Rhwanamubwira ngasi kantu rhulagirirekwo n’okurhuli rhwaciyumva omu murhima. (Ennanga 62:8) Rhwanamuhuna iroho lyage litagatifu lyo lirhurhabaza okujira aminja. (Luka 11:13) Rhwanamuhuna arhuhe emisi y’okulembera amazibu, na kandi rhwanamuhuna arhuhe obwenge bw’okurhola emihigo minja. (Yakobo 1:5) Kandi rhwanamuhuna arhubabalire ebyaha birhu. (Abefezi 1:3, 7) Kandi rhukwanine rhukahira abandi omu masala girhu, kwa lwiganyo omulala gwirhu na bene wirhu na bali birhu b’omu cigamba.​—Ebijiro by’Entumwa 12:5; Abakolosi 4:12.

12. Bici rhukwanine okushokoza nka rhwashenga?

¹² Bici rhukwanine rhushokoze nka rhwashenga? Rhwanashenga Yehova rhunamubwire obulonza bwage bujirikane. Rhwanamuvuga omunkwa kurhenga omu murhima gwirhu okubiyerekire ebi arhujirîre. (1 Enganîro 29:10-13) Gurhi rhumanyiremwo ntyo? Amango Yezu âli ah’igulu, ayigirizîze abaganda bage gurhi bakakashênga. (Osome Mateyo 6:9-13) Aderha oku burhangiriza bihunyire okusalira izino lya Nnamahanga likuzibwe, kw’okuderha licesibwe. kandi ly’Obwami bwage buyisha n’obulonza bwage bujirikane ah’igulu. Ahugûla oku rhwanashenga  okubiyerekire amalagirire girhu enyuma z’okushenga ebyo bintu bisharhu bw’obulagirire. Erhi rhwakakashokoza Yehova n’obulonza bwage omu masala girhu, rhwanayerekana oku ebyo, byo by’obulagirire omu kalamo kirhu.

13. Isala likwanine okuba na buliri bunganaci?

¹³ Isala lirhu lishinganine libè na buliri bunganaci? Ebibliya erhadesiri isala lirhu lyanahuna libè na buliri bunganaci. Akanga rhulimwo kwo kakarhuma isala lirhu  lyaba liriri erhi lyofi. Kwa lwiganyo, rhwanajira isala lyofi nka rhukola rhw’alya. Cikoki lyanabà liriri omu kasanzi rhuli rhwavuga Yehova omunkwa erhi omu kasanzi rhugwerhe amazibu rhwamubwira. (1 Samweli 1:12, 15) Rhurhashinganini rhujire isala liriri mpu lyo rhubonekana n’abantu, nk’oku abantu b’amango ga Yezu bakâg’ijira. (Luka 20:46, 47) Yehova arhashagalukira amasala ga ntyo. Amasala garhenga oku murhima go gamusimisa.

14. Ka rhukwanine okusalira ngasi mango? Na bici okwo kurhuyigirizize okubiyerekire Yehova?

¹⁴ Ka rhukwanine rhusalire burhahusa? Neci. Yehova arhuhire omurhima kugerera Ebibliya oku rhugendekere rhwamushenga “ngasi mango,” “buzira kurhama,” na “burhahusa.” (Mateyo 26:41; Abaroma 12:12; 1 Abatesalonika 5:17, NWT) Yehova anarhuyumvirhize ensiku zoshi.  Ngasi lusiku rhwanakamuvuga omunkwa okubiyerekire obuzigire bwage n’okubyoshi agendekire arhujirira. Kandi rhwanamuhûna arhulongoze, arhuhe emisi n’oburhulirize. Erhi rhwakabona oku isala luba luhembo na lukengwa lurhenga emwa Nnamahanga, rhukwanine rhukamushenga ngasi mango.

15. Bulya gurhi rhukwanine okuderha “amen” okubuzinda bw’isala?

¹⁵ Bulya gurhi rhukwanine rhuderhe “amen” oku buzinda bw’isala? “Amen” kuli kuderha “kobinali” erhi “bibe ntyo.” Okuderha “amen” eli njira y’okuyerekana oku rhugwerhe omurhima mwinja, n’okurhuyemire n’obwalagale oku ebi rhudesire biri by’okunali. (Ennanga 41:13) Kandi Ebibliya erhuyigirizize oku kuba kwinja okuderha “amen,” n’izu linene erhi omu murhima okubuzinda bw’isala ly’abantu banji lyo rhuyerekana okurhuyemire eby’aderhagwa omw’isala.​—1 Enganîro 16:36; 1 Abakorinti 14:16.

16. Ka Yehova anashuze oku masala girhu?

¹⁶ Ka Yehova anashuze oku masala girhu? Neci. Ebibliya edesire oku ye “Yagirwa oyumvirhiza ensengero.” (Ennanga 65:2) Yehova anakayumvirhiza n’okushuza amasala ga bene bantu bagwerhe emirhima minja.

17. Gurhi Yehova akolesamwo bamalahika n’abakozi bage ly’ashuza oku masala girhu?

¹⁷ Ly’ashuza oku masala girhu, Yehova anakolese bamalahika n’abakozi bage ah’igulu. (Abahabraniya 1:13, 14) Hali nyiganyo nyinji z’abantu basalisîre Nnamahanga abarhabale bahugûkwe Ebibliya, na hisanzi hisungunu, enyuma z’okusalira, Abahamirizi ba Yehova babalambagirira. Ebibliya eyerekine oku bamalahika bajira mukolo munji omu kuyalagaza “omwanzi mwinja.” (Osome Amafulûlo 14:6) Ciru nkaba hali bantu banji muli rhwe  basalisîre okubiyerekire mazibu malebe, buzinda bw’aho babona mwene wirhu erhi mwali wirhu abalerhire ebi balagirirekwo.​—Emigani 12:25; Yakobo 2:16.

18. Gurhi Yehova akolesamwo iroho lyage n’Ebibliya ly’ashuza oku masala girhu?

¹⁸ Yehova anakakolesa iroho lyage litagatifu ly’ashuza oku masala girhu. Erhi rhwakamuhûna oburhabale anakolese iroho litagatifu ly’arhulongoza n’okurhuha emisi. (2 Abakorinti 4:7) Kandi anakolese Ebibliya ly’ashuza oku masala girhu n’okurhurhabala rhurhole emihigo minja. Omu kusoma Ebibliya, rhwanabona amandiko gakarhurhabala. Kandi Yehova anakolesa muntu mulebe omu ntimanano ahâne ishuzo, lishuzize oku malagirire girhu. Ciru anakolesa omugula w’omu cigamba arhuhe ihano ly’Ebibliya lyakarhurhabala.​—Abagalasiya 6:1.

19. Bulya gurhi hali amango rhwakaciyumva nka Yehova arhashuzizi oku masala girhu?

¹⁹ Cikoki kanji kanji, rhwanacidosa ntya: “Bulya gurhi Yehova arhacishuza oku nsengero zani?” Yehova ayishi akasanzi kinja kw’okushuza oku nsengero zirhu, na gurhi azishuzamwo. Anamanyire ngasi byoshi rhulagirirekwo. Ciru akaba arhacirhushuza, rhukwanine rhugendekere rhwamushenga kurhenga oku murhima lyo rhuyerekana oku rhuli birhohye n’oku rhumulangalîre. (Luka 11:5-10) Kanji kanji Yehova anarhushuze omu njira rhurhal’irhanyize. Kwa lwiganyo, erhi rhwakashenga okubiyerekire mazibu malebe, hali amango arhakagayusa, cikwone anarhuha emisi y’okugalembera.​—Osome Abafilipi 4:13.

20. Bulya gurhi rhukwanine okushenga Yehova ngasi mango?

²⁰ Luli lukengwa lunene okuganiza Yehova kugerera isala! Rhwanayemera n’obwalagale oku arhuyumvirhiza. (Ennanga 145:18) Omu kugendekera rhwamushenga n’omurhima gwirhu goshi, obwira bwirhu haguma naye bwanazibuha.