1, 2. Bwakinyi luteko nyi nkya buntu kikata? Bwakinyi abitungu’shi twiukye akilongyesha Bible pabitale luteko?

P’ATUPWANDJIKISHA Nsenga na bungi bwi nyenyenyi, atumono’shi nsenga ngipeela ngofu. Byabya, Yehowa p’atala pa nsenga, bisamba byoso bya bantu be panka abimweneka ku meso kwaye bu ekopola dya mema adipono ku mbeketshi. (Misambo 115:15; Yeeshaya 40:15) P’atutala nyenyenyi, atumono’shi ibungi ngofu kwitukila. Sunga mbyabya, mukanda wa Misambo 145:18, 19 awamba’shi: “Yehowa e peepi na booso abamwididi, bano booso abamwididi, mu binyibinyi. Akumbasha akikyebe abamutshinyi, ateemesha misaase yaabo, ebapaasha.” Uno nyi mmwabi ukata watudi nao! Mupangi sha bukome booso Yehowa, akumiina’shi twikale pepi naye, na akumiina dingi kutemesha nteko yetu. Oolo, luteko nyi mmwabi na nkya buntu kikata kitupe Yehowa.

² Anka bwashi Yehowa etuteemeshe, abitungu’shi twisambe naye mu kipaso kyakumiina. Twi balombeene kukita byabya naminyi? Tubandeyi kutaluula akilongyesha Bible pabitale luteko.

3. Bwakinyi abitungu’shi otekye Yehowa?

³ Yehowa akumiina’shi omutekye, na wesambe naye. Nkinyi akishinkamisha byabya? Badika namu Beena-Fidipe 4:6, 7. Banda kunangushena pabitale luno lwitanyino. Mupangi a bintu byoso kwete kwitatshisha boobe na akumiina’shi omulungule byoso byokwete kupusha na myanda ayikukalakasha.

4. Kwikala na kiubishi kya kuteka Yehowa akunyingisha bukuuku boobe naye naminyi?

 ⁴ Luteko alukukwasha bwa kudya bukuuku na Yehowa. Su bakuku be na kiubishi kya kwisamba myanda yabo na kwileshena nkalo yabo, bukuuku bwabo abunyiisha kutama. Bi mumune na kuteka Yehowa. Ku bukwashi bwa Bible, Yehowa akulesha binangu byaye na mpàngo yadi nayo bwa mafuku aafiki. We mulombeene kumulungula myanda yooso i mwishimba dyobe pa kwikala na kiubishi kyakumuteka. Su bokitshi byabya, onyingisha bukuuku boobe naye na abunyiisha kutama.​—Shake 4:8.

5. Nkinyi akitulesha’shi Yehowa t’apushaa nteko yooso?

⁵ Yehowa apushaa namu nteko yooso su? Ooo. Mu mafuku a Yeeshaya, Yehowa balungwile beena Isaleele shi: “Sunga nwanteka misûsa ikile bungi, tampusha, ooo, mwanda mwamwa mu mâsa mwenu mwi tompoloshi mase a bantu banudi baipê.” (Yeeshaya  1:15, EEM) Byabya, su tatwi badimukye, twi kukita myanda ikumbeene kwitwikasha kula na Yehowa, naye namu apele kupusha nteko yetu.

6. Bwakinyi abitungu kulesha lukumiino? We kulesha naminyi shi we na lukumiino?

⁶ Su atukumiina’shi Yehowa apushe nteko yetu, abitungu tutuule lukumiino lwetu mwadi. (Maako 11:24) Mutumibwa Mpoolo baadi mwambe’shi: “Kushii lukumiino, takwi kipaso kya kulongamina Efile Mukulu, mwanda yawa efubwila kwi Efile Mukulu ee na kya kukumiina’shi ee kudi binyibinyi, naa’shi apeyaa abamukimbi bwedi.” (Beena-Ebelu 11:6) Kadi, kwamba penda shi twi na lukumiino ta nkupwa kwa mwanda nya. Abitungu tuleshe lukumiino lwetu p’akukookyela Yehowa efuku dyooso.​—Badika Shake 2:26.

7. (a) Bwakinyi abitungu twikale na kwiyisha na kanemo p’atutekye Yehowa? (b) Atulesha naminyi shi myanda yatutekye ngya binyibinyi?

⁷ Abitungu twikale na kwiyisha na kanemo p’atutekye Yehowa. Bwakinyi? Bantu p’abende mu kwisamba na nfumu kampanda, abamulungulaa wabadi nao na kanemo kooso. Yehowa ngi Efile Mukulu sha bukome booso. Byabya, t’omono’shi abitungu twikale na kanemo na kwiyisha kukata nsaa y’atwakula naye su? (Kibangilo 17:1; Misambo 138:6) Na dingi, abitungu tuleshe’shi myanda yatutekye ngya binyibinyi, ayikatukila mwishimba dyetu, kushii kwambuula bishima bimune misusa ibungi.​—Mateo 6:7, 8.

8. Su atutekye pabitale kintu kampanda, tukite dingi kinyi?

⁸ Bwa kufudiisha, su atutekye pabitale kintu kampanda, abitungu’shi tukite myanda ayipushena na byatutekye. Kileshesho, su atutekye Yehowa bwa nkalo yetu ya kwifuku n’efuku, byabya, t’abitungu’shi tushaale batengyele Yehowa bwashi etupe bintu byoso kushii kukita mudimo nya. Abitungu tufube ngofu na kukumiina  kukita ka mudimo kooso akamweneka. (Mateo 6:11; 2 Beena-Tesalonika 3:10) Na dingi, su atukyebe’shi Yehowa etukwashe bwa kuleka mwanda kampanda wibubi, abitungu’shi tusuukye myanda yooso ilombeene kwitufisha ku bubi. (Beena-Kolose 3:5) Binobino, tubande kutalula nkonko y’abakambaa kwela pabitale luteko.

9. Nnanyi atudi balombeene kuteka? Yowano 14:6 etulongyesha kinyi pabitale luteko?

⁹ Nnanyi atudi balombeene kuteka? Yesu balongyeshe balongi baye bwa kuteka “Yaay’eetu ee mwiyilu.” (Mateo 6:9) Bakwile’nyi shi: ‘Ami ne eshinda, ne binyibinyi, ne muwa. Muntu su ngumune takwenda kwi Yaya kushii kukiila kwandji.’ (Yowano 14:6) Kumbi, abitungu tutekye nka penda Yehowa kukidila kwi Yesu. A kuteka Yehowa kukidila kwi Yesu akupatuula kinyi? Bwashi Yehowa apushe nteko yetu, abitungu tunemekye mbalo i pabwayo yadi mupe Yesu. Nka bu byatupwile kulonga, Yesu bafikile pa nsenga bwa kwitupasha ku bubi na ku lufu. (Yowano 3:16; Beena-Looma 5:12) Na dingi, Yehowa mmutuule Yesu bu Tshite-mwakwidi e panundu na bu Nsushi.​—Yowano 5:22; Beena-Ebelu 6:20.

10. Twi balombeene kwikala mushindo kinyi nsaa y’atutekye? Patuula.

¹⁰ Twi balombeene kwikala mushindo kinyi nsaa y’atutekye? Yehowa t’etutekye’shi tukuname, tushale sunga kwimana bwimane nsaa y’atutekye nya. Bible etulongyesha bwa kuteka Yehowa mu mushindo aulesha kanemo kwadi. (1 Myanda 17:16; Neemiya 8:6; Ndanyele 6:10; Maako 11:25) Ki na muulo p’atutekye Yehowa mbyatwisamba naye na binangu bibuwa, ta mushindo watudi bekale nya. Twi balombeene kumuteka n’eyi di bukopo sunga diikye mbalo yooso yatudi na nsaa yooso, bufuku sunga kaanya. P’atutekye Yehowa, tukulupile’shi  etupusha sunga ungi muntu ooso akutwa kupusha byatwakula.​—Neemiya 2:1-6.

11. Twi balombeene kuteka Yehowa pabitale myanda kinyi?

¹¹ Nkinyi kyatudi balombeene kuteka Yehowa? Twi balombeene kuteka Yehowa kyoso akimusankisha. Bible amba’shi: “Su twamuteka kintu muyiile kukumiina kwaye, aye eetuteemesha.” (1 Yowano 5:14) Twi kumuteka bwa nkalo yetu su? Oolo. P’atutekye Yehowa abitungu tumone bu’twe bakwete kwisamba na kuuku a p’eshimba. Twi balombeene kulungula Yehowa kyoso ki mu binangu byetu na mwishimba dyetu. (Misambo 62:8) Twi balombeene kumuteka kikudi kyaye bwashi tukite myanda ibuwa. (Luka 11:13) Twi balombeene’nyi kuteka Yehowa binangu bwatudya kwata bitshibilo bibuwa, na kumuteka bukome bwa kukambila nkalakashi. (Shake 1:5) Tumutekye dingi lusa bwa bilubilo byetu. (Beena-Fidipe 1:3, 7) Tutemune namu bangi mu nteko yetu, kushii kwilwankana kifuko kyetu, na beena kakongye.​—Bikitshino 12:5; Beena-Kolose 4:12.

12. Nkinyi ki na muulo ukata akitungu kwela mu nteko yetu?

¹² Nkinyi ki na muulo ukata akitungu kwela mu nteko yetu? Tutekye bwa myanda itale Yehowa na kikyebe ky’eshimba dyaye. Tumutumbule n’eshimba dimune bwa byoso byadi mwitukitshine. (1 Myanda 29:10-13) Atwiuku bino mwanda Yesu p’abaadi pa nsenga, balongyeshe balongi baye byabadya kuteka. (Badika Mateo 6:9-13.) Bebalungwile bwa kuteka kya kumpala, bwashi eshina dy’Efile Mukulu ditumbishibwe, kwamba’shi; bantu bedimone bu dya kishila sunga diselele. Akupu Yesu bebalungwile bwa kuteka’shi Bufumu bw’Efile Mukulu bufikye na kikyebe ky’eshimba Dyaye kikitshikye pa nsenga. Kunyima kwaye kulongyesha bya kuteka pabitale ino myanda i na muulo, Yesu baadi muleshe’shi twi balombeene kuteka’nyi bwa nkalo yetu. P’atutuulu Yehowa  na kikyebe ky’eshimba dyaye pa mbalo ya kumpala mu nteko yetu, atulesha’shi atwiuku ngofu kyakya ki na muulo ukata kwatudi.

13. Nteko yetu abitungu’shi ikale bula bwi naminyi?

¹³ Abitungu nteko yetu ikale bula bwi naminyi? Bible t’ebilesha nya. Nteko yetu i kwikala iipi sunga ila, muyiile mbalo na nsaa yatudi. Kileshesho, twi balombeene kwela luteko lwipi kumpala kwa kudya, kadi twela luteko lula p’atutumbula Yehowa sunga p’atumulungula nkalo  yetu. (1 Samwele 1:12, 15) T’atwelanga nteko ibula penda bwashi bangi betupushe nya, bu bibakitanga bamo bantu ba mu mafuku a Yesu. (Luka 20:46, 47) Kwela nteko i byabya t’akukemesha Yehowa nya. Ki na muulo kwi Yehowa nyi nkumulungula bi mwishimba dyetu.

14. Abitungu kuteka misusa bungi kinyi, na bino abitulongyesha kinyi pabitale Yehowa?

¹⁴ Abitungu kuteka misusa bungi kinyi? Yehowa kwete kwitukankamika bwa kwikala na kiubishi kya kumuteka. Bible amba’shi abitungu ‘kuteka kushii kupungila,’ ‘kuteka na kishima’ na kuteka ‘kushii kukooka.’ (Mateo 26:41; Beena-Looma 12:12; 1 Beena-Tesalonika 5:17) Yehowa akumiinaa kupusha nteko yetu misusa yooso. Twi balombeene kumutumbula efuku dyoso bwa kifulo na bumuntu bwaye. Twi balombeene dingi kumuteka bukunkushi,  bukome na bukwashi. Su tukwete kumona luteko bu kya buntu ki na muulo kitupe Yehowa, t’atukumanga kukisha nsaa yooso ayimweneka ya kwisamba naye.

15. Bwakinyi twi balombeene kwamba “amene” ku nfudiilo kwa luteko?

¹⁵ Bwakinyi twi balombeene kwamba “Amene” pa kufudiisha luteko? Kishima “amene” akipatuula’shi “mbinyibinyi” sunga’shi “bikale nka byabya.” (Misambo 41:13) Nyi nkipaso kyatushinkamisha’shi bishima byetu tubebyakula n’eshimba dyetu dimune. Bible etulungula’shi bibuwa kwamba “amene” munda sunga n’eyi dibukopo ku nfudiilo kwa luteko lwabakitshi bwa bantu bebungi bwa kulesha’shi atukumiina byoso bibabakatuka mu kwakula.​—1 Myanda 16:36; 1 Beena-Kodinda 14:16.

16. Yehowa alulaa nteko yetu binyibinyi su? Patuula.

¹⁶ Yehowa alulaa binyibinyi nteko yetu su? Oolo, alulaa. Bible amwitanyina’shi “Obe, apusha nteko.” (Misambo 65:3) Yehowa apusha na kwalula nteko yabeele kwi binunu na binunu bya bantu balulame, na eyalulaa mu bipaso bilekenelekene.

17. Yehowa atumaa ba miikeyilu na bafubi baye be pa nsenga bwa kwalula nteko yetu naminyi?

¹⁷ Yehowa atumaa ba miikeyilu na bafubi baye be pa nsenga bwa kwalula nteko yetu. (Beena-Ebelu 1:13, 14) Kwi bileshesho bya bantu bebungi abatekyele Yehowa bwa kupusha Bible kalolo, na mu nsaa ipeela kunyima kwabo kuteka, Temwe umune a Yehowa baadi mufikye mu kwibakwasha. Bible alesha’shi ba miikeyilu bakwete kukwatshishena ku mudimo wa kulungula “mukandu wibuwa” pa nsenga ishima. (Badika Kibafumbwilwe 14:6.) Dingi’nyi, Bantu bebungi ba kwatudi mbatekye Yehowa bukwashi pabitale lukalakashi sunga mwanda kampanda akupu abo nkumona  mwina Kidishitu mulume sunga mukashi afiki mu kwibakwasha.​—Nkindji 12:25; Shake 2:16.

18. Yehowa atumikaa na kikudi kyaye na Bible bwa kwalula nteko naminyi?

¹⁸ Yehowa atumikaa dingi na kikudi kyaye bwa kwalula nteko yetu. P’atutekye bukwashi bwa kukambila lukalakashi kampanda, mmulombeene kutumika na kikudi kyaye bwa kwitukunkusha na kwitupa bukome. (2 Beena-Kodinda 4:7) Yehowa atumikaa dimo na Bible bwa kwalula nteko yetu na kwitukwasha bwa kwata bitshibilo bibuwa. P’atubadika Bible, twi balombeene kupeta kifundwe akitukwasha. P’atudi mu bisangilo, Yehowa mmukumbeene kutakula mwina Kidishitu netu bwa kutuusha lwalulo alwitukankamika, sunga mukulu mu kakongye bwa kwitulungula mwanda kampanda wa mu Bible.​—Beena-Ngalatea 6:1.

19. Bwakinyi twi kumona bu Yehowa anyengakana bwa kwalula nteko yetu?

¹⁹ Ingi nsaa, we kwiyipusha’shi, ‘Bwakinyi Yehowa tabandjile kwalula luteko lwande?’ Tentekyesha’shi Yehowa auku nsaa na mushindo wa kwalula nteko yetu. Auku kyoso kyatudi nakyo lukalo. Twi balombeene kutungunuka na kuteka bwa kulesha’shi twi na lukalo lwa binyibinyi na lukumiino mwadi. (Luka 11:5-10) Ingi saa, Yehowa alula nteko yetu mu kipaso kyatush’atutengyelanga. Kileshesho, twi balombeene kumuteka bwa mwanda kampanda wibukopo, anka pamutwe pa kwitukatwisha wanka, mmulombeene kwitupa bukome bwa kunyingiila.​—Badika Beena-Fidipe 4:13.

20. Bwakinyi abitungu’shi tutekye Yehowa misusa ibungi?

²⁰ Ô mwabi bukata watudi nao wa kuteka Yehowa baboo! Twi balombeene kushinkamisha’shi etuteemesha. (Misambo 145:18) Na dingi, su twateka Yehowa misusa ibungi n’eshimba dimune, atunyingisha bukuuku bwetu naye.