1, 2. Naho ty ama’o, nagnino ro fagnomezagne miambake ty vavake, sady nagnino ro toko’e hofantarentikagne ty raha ampianare ty Baiboly miomba izay?

FARA’E kidikidy ty tane toy naho oharegne amy ze kila raha amy i lagnitsey ey. Hoe rano mitsopake indraike boake agnate siny ty fivazohoa i Jehovah ty ndaty amy ty tane toy iaby. (Salamo 115:15; Isaia 40:15) Faie ndra tie fara’e kidikidy hoe izay tikagne, le hoe ty Salamo 145:18, 19: “Agnila ze mitoka aze eo ty Jehovah, le ze mitoka aze iaby amy ty hamarenagne. Hagnatò ty fagniria ze matahotse aze reke, le hojanjigne’e iareo.” Tombotsoa vata’e zay! Te hagnarine naho te hijanjigne ty vavake anoentikagne ty Jehovah, Mpamorogne naho tompo ty herỳ. Maregne zay. Tombotsoa ty mivavake sady fagnomezagne miambake nimey i Jehovah antikagne tsikiraidraike.

² Faie naho fa mifanandrife amy ty zoton’arofo’e ty vavake ataontikagne vaho izay janjigne’e. Akore ty hanoantikagne izay? Andao tika hagnente ty raha rehafe ty Baiboly miomba ty vavake.

3. Nagnino rehe ro toko’e hivavake amy i Jehovah?

³ Teà i Jehovah hivavake, ndra hirehake ama’e rehe. Akore ty ahafantarantikagne izay? Vakio ty Filipianina 4:6, 7, le dineho ty raha teà’e hataontikagne. Teà i Mpitondra ze kila raha iabỳ hirehake ty fihetseham-po’o naho ty olagne mahazo azo rehe.

4. Nagnino ro magnamafe ty fifandrambesa’o amy i Jehovah ty vavake?

 ⁴ Magnampe antikagne hifandrambe soa amy i Jehovah ty vavake. Mihamafe ty fifandrambesa ty mpiragnetse naho fa mifampirehake tsy tapake miomba ty eretsere’e naho ty fihetseham-po’e. Mitovy amy izay ka ty mivavake amy i Jehovah. Saontsie’e agnate Baiboly ao ty agn’arofo’e naho ty fikasà’e amy ty hoavy. Azo’o rehafegne ama’e ty fihetseham-po’o. Hihasoa ty fifandrambesa’o amy i Jehovah naho manao izay rehe.—Jakoba 4:8.

5. Akore ty ahafantarantikagne fa tsy mijanjigne ze kila vavake ty Jehovah?

⁵ Mijanjigne ze kila vavake vao ty Jehovah? Aha’a. Hoe ty Jehovah tamy i Isiraelita rey tamy ty andro i Isaia mpaminany: “Ndra tie manao vavake maro nareo, tsy hitsanogne anareo raho fa feno lio o ndaty ty tagna’areo.” (Isaia 1:15) Toko’e hitao soa tikagne mba  tsy hanao ze raha hahavy i Jehovah tsy hijanjigne ty vavake ataontikagne.

6. Nagnino ro paliaegne vata’e ty finoagne? Akore ty ampisehoa’o fa manam-pinoagne rehe?

⁶ Tsy maintsy mino i Jehovah tikagne naho teàntikagne hojanjigne’e ty vavake ataontikagne. (Marka 11:24) Hoe ty apositoly Paoly: “Naho tsy amy ty finoagne, le tsy misy azo atao hampifaleagne an’Andrianagnahare. Fa ze magnarine aze tsy maintsy mino fa misy reke sady mpamale soa ze mipay aze.” (Hebreo 11:6) Faie tsy ampe ty mirehake tie manam-pinoagne. Ty fagnorihagne ty fagnanara i Jehovah ty anoroantikagne fa manam-pinoagne vata’e tikagne.—Vakio Jakoba 2:26.

7. a) Nagnino tikagne ro toko’e hiambane naho hiasy i Jehovah naho fa mivavake? b) Akore ty ampisehoagne fa avy am-po ty vavake ataontikagne?

⁷ Toko’e hiambane naho hiasy i Jehovah tikagne naho fa mivavake ama’e. Inogne ty anto’e? Tsy maintsy magnaja tikagne naho fa mirehake amy ty mpanjaka ndra amy ty porejidà. Andrianagnahare Tompo ty Hery ty Jehovah, le toko’e hiambane naho hiasy ka tikagne naho fa mirehake ama’e. (Genesisy 17:1; Salamo 138:6) Ze am-pontikagne ao ro toko’e horehafegne amy i Jehovah, fa tsy hagnerekeregne rehake mitovy.—Matio 6:7, 8.

8. Inogne ty raha ila’e toko’e hataontikagne naho fa mivavake?

⁸ Toko’e hikezake hanao raha mifanandrife amy ty vavake nataontikagne tikagne. Naho mivavake ohatse tikagne mba hahazo ty raha paliaentikagne isan’andro, le tsy toko’e ho kamo miasa sady hitamà tie mbe hagnomey ze raha paliaentikagne ty Jehovah. Toko’e hiasa mafe tikagne sady hagneke ze asa azontikagne atao. (Matio 6:11; 2 Tesalonianina 3:10) Naho fa mivavake amy i Jehovah tikagne mba tsy hagneregne hanao raty, le toko’e hialantikagne ze tsapa hevetse hahavy izay.  (Kolosianina 3:5) Andao hodinehentikagne ty fagnontenea o ndatio miomba ty vavake.

9. Ia ty toko’e hivavahagne, sady inogne ty raha rehafe ty Jaona 14:6 miomba ty vavake?

⁹ Ia ty toko’e hivavahagne? Nampianatse ze mpanonjohy aze hivavake amy i ‘Raentikagne an-dagnitse’ agney ty Jesosy. (Matio 6:9) Hoe ka reke: “Izaho ro lalagne, naho hamarenagne, sady havelogne. Tsy misy mahazo mandeha mbaman-dRaeko mbeo naho tsy amy ty alalako.” (Jaona 14:6) I Jehovah raike avao ty toko’e hivavahagne sady toko’e hatao amy ty alala i Jesosy. Inogne ty dika tihoe atao amy ty alala i Jesosy ty vavake? Janjigne i Jehovah ty vavake ataontikagne naho magneke ty toeragne nanendrea’e i Jesosy tikagne. Nianarantikagne fa niavy an-tane etoy mba hagnavotse antikagne amy ty ota naho ty fate ty Jesosy. (Jaona 3:16; Romanina 5:12) I Jehovah ro nanendre i Jesosy ho Mpisorom-bey naho Mpitsara.—Jaona 5:22; Hebreo 6:20.

10. Misy fihetseke manokagne tsy maintsy atao vao naho fa mivavake? Hazavao.

¹⁰ Misy fihetseke manokagne tsy maintsy atao vao naho fa mivavake? Aha’a. Tsy mandily antikagne hitongaleke, ndra hitoboke, ndra hitsangagne ty Jehovah. Ampianare ty Baiboly fa toko’e hagnaja i Jehovah tikagne naho fa mivavake. (1 Tantara 17:16; Nehemia 8:6; Daniela 6:10; Marka 11:25) Ty toe-pontikagne ro lahibey amy i Jehovah naho fa mivavake fa tsy ty fihetsentikagne. Azontikagne atao ty mirehake mafe ndra mirehake agnate fo ao avao, ndra aia ndra aia ty misy antikagne ndra handro ndra halegne. Matoky tikagne fa hojanjigne i Jehovah ty vavake ataontikagne ndra tie tsy misy ndaty maharey aze.—Nehemia 2:1-6.

11. Inogne iaby ty raha azontikagne rehafegne amy i Jehovah?

 ¹¹ Inogne ty azo rehafegne naho fa mivavake? Ze teàntikagne horehafegne amy i Jehovah faie mifanandrife amy ty zoton’arofo’e. Hoe ty Baiboly: “Ndra inogn’inogne angatahentikagne naho fa mifanandrife amy ty zoton’arofo’e, le mijanjigne antikagne reke.” (1 Jaona 5:14) Azo rehafegne vao ty raha manahiragne antikagne? Eka. Mitovy amy ty mirehake amy ty ragnetse ty mirehake amy i Jehovah. Azo rehafegne ama’e ze am-po naho ze an-tsaintikagne ao. (Salamo 62:8) Azo angatahegne ama’e ka ty fagnahy masigne, hagnampe antikagne hanao ty maregne. (Lioka 11:13) Azo atao ka ty mangatake fahendreagne boake amy i Jehovah naho fa hanapa-kevetse, ndra mangatake hery hiatrehagne raha sarotse. (Jakoba 1:5) Toko’e hangatake famelankeloke amy i Jehovah tikagne. (Efesianina 1:3, 7) Toko’e hivavake hoahy ty hafa ka tikagne, agnisa izay ty keleiantikagne naho ty mpiharo finoagne amantikagne.—Asan’ny Apostoly 12:5; Kolosianina 4:12.

12. Inogne ty raha lahibey toko’e horehafegne naho fa mivavake?

¹² Inogne ty raha lahibey toko’e ho rehafegne naho fa mivavake? I Jehovah naho ty fikasà’e. Toko’e hisaorantikagne ty raha maro nimei’e antikagne. (1 Tantara 29:10-13) Maregne zay fa nampianatse i mpiana’e rey hivavake ty Jesosy tamy ie tan-tane etoỳ. (Vakio Matio 6:9-13.) Nirehake reke fa toko’e hohamasinegne hey ty tahinan’Andrianagnahare. Le toko’e hangatahegne ty hiavia i Fanjakà’ey naho ty hanoagne ty zoton’arofo’e an-tane etoy. Vaho izay tikagne mangatake ty raha paliaentikagne manokagne. Ty fanoagne izay ty anoroantikagne fa i Jehovah naho ty zoton’arofo’e ro lahibey amantikagne.

13. Toko’e ho fire lera ty vavake ataontikagne?

 ¹³ Toko’e ho fire lera ty vavake ataontikagne? Tsy mirehake ty miomba izay ty Baiboly. Miankigne amy ty raha misy ty hahavy i vavakey ho lava ndra ho boribory. Va’e ho boribory ohatse ty vavake aloha ty hihinagne, faie va’e ho lava naho fa hirehake ty raha manahiragne ndra hisaotse i Jehovah. (1 Samoela 1:12, 15) Tsy teàntikagne ty hanao vavake lavabey mba hipaliavagne tsiriry, manahake ty ndaty ila’e tamy ty andro i Jesosy.  (Lioka 20:46, 47) Tsy teà i Jehovah ty vavake hoe izay. Vavake avy am-po ro lahibey amy i Jehovah.

14. Isake ombiagne tikagne ro toko’e hivavake, sady inogne ty ampianare izay miomba i Jehovah?

¹⁴ Isake ombiagne tikagne ro toko’e hivavake? Taone i Jehovah hivavake ama’e lognandro tikagne. Hoe ty Baiboly: “Mivavaha avao”, “mahareta amy ty vavake”, sady “mivavaha lognandro.” (Matio 26:41; Romanina 12:12; 1 Tesalonianina 5:17) Vognogne hijanjigne antikagne lognandro ty Jehovah. Toko’e hisaorantikagne reke fa matarike sady bey hatea. Azontikagne atao ka ty mangatake tari-dalagne naho hery vaho fampaherezagne boake ama’e. Naho sarobily amantikagne ty mivavake amy i Jehovah, le hipay hirike hirehafagne ama’e tikagne.

15. Nagnino tikagne ro toko’e hirehake tihoe “amena” naho fa vita i vavakey?

 ¹⁵ Nagnino tikagne ro toko’e hanao “amena” naho fa vita i vavakey? “To vata’e” ndra “lonike abey” ty dika tihoe “amena.” Izay ty anoroantikagne fa avy am-po naho misy heve’e amantikagne i vavakey. (Salamo 41:13) Ampianare ty Baiboly fa toko’e hanao “amena” tikagne ndra atao mafe zay ndra am-po ao, naho fa vita ty vavake atao ty ndaty raike. Izay ty anoroagne fa ekentikagne ty raha nirehafe’e.—1 Tantara 16:36; 1 Korintianina 14:16.

16. Mamale ty vavake ataontikagne vao ty Jehovah? Hazavao.

¹⁶ Mamale ty vavake ataontikagne vao ty Jehovah? Eka. Rehafe ty Baiboly fa “Mpijanjigne vavake Reke.” (Salamo 65:2) Mijanjigne naho mamale ty vavake anoe ty ndaty soa fo an-tapetrisa’e ty Jehovah, faie sambe hafa ty fomba amalea’e aze.

17. Akore ty ampiasà i Jehovah ty anjeli’e naho ty mpanompo’e an-tane etoy mba hamalea’e ty vavake ataontikagne?

¹⁷ Mampiasa ty anjeli’e naho ty mpanompo’e an-tane etoy ty Jehovah mba hamalea’e ty vavake ataontikagne. (Hebreo 1:13, 14) Maro ty ndaty mirehake fa nisy Vavaolombelo i Jehovah nitilike aze tafara ty nivavaha’e mba hisy ndaty hagnampe aze hahazo ty raha rehafe ty Baiboly. Rehafe ty Baiboly fa mandrambe anjara amy ty fitoriagne i “talily soay” magneneke ty tane toy o anjelio. (Vakio Apokalypsy 14:6.) Maro tamantikagne ka ty nivavake tamy i Jehovah naho fa nisy raha nanahiragne antikagne, le nahazo fagnampeagne boake amy ty mpiharo finoagne amantikagne.—Ohabolana 12:25; Jakoba 2:16.

18. Akore ty ampiasà i Jehovah ty fagnahi’e masigne naho ty Baiboly mba hamaleagne vavake?

 ¹⁸ Mampiasa ty fagnahi’e masigne ty Jehovah mba hamaleagne vavake. Naho mivavake mba hiatrehagne olagne tikagne, le ampiasae’e ty fagnahi’e masigne hagnomeagne tari-dalagne naho hery antikagne. (2 Korintianina 4:7) Mampiasa o Baibolio ka ty Jehovah mba hamaleagne vavake naho hagnampeagne antikagne hahay hanapa-kevetse. Naho fa mamaky Baiboly tikagne, le va’e hahatrea andalan-teny hagnampe antikagne. Va’e handrisike ndaty raike hagnomey toin-drehake mampahery am-pivoriagne agne ka ty Jehovah, ndra hisy androanavi-pagnahy hirehake hevetse mampahery boake agnate Baiboly ao.—Galatianina 6:1.

19. Nagnino ro tsy le avy le valea i Jehovah ty vavake ataontikagne?

¹⁹ Misy fotoagne tikagne va’e hagnontane tie: ‘Inogne ty anto’e tsy amalea i Jehovah ty vavake nataoko?’ Ko haligno, fa fanta i Jehovah soa ty fotoagne naho ty fomba hamalea’e ty vavake ataontikagne. Fanta’e ty raha paliaentikagne. Atorontikagne fa matoky i Jehovah tikagne naho mivavake lognandro miomba ty raha paliaentikagne. (Lioka 11:5-10) Misy fotoagne va’e tsy hibaribary ty amalea i Jehovah ty vavake ataontikagne. Naho ohatse zao tikagne mivavake miomba ty tsapa hevetse mahazo antikagne, tsy hagnafake i olagney reke fa hagnomey hery mba hiaretantikagne aze.—Vakio Filipianina 4:13.

20. Nagnino tikagne ro toko’e hivavake tsy tapake amy i Jehovah?

²⁰ Tombotsoa tsy misy hoe’e ty mivavake amy i Jehovah! Matoky tikagne fa hijanjigne antikagne reke. (Salamo 145:18) Hihamafe ty fifandrambesantikagne amy i Jehovah naho mivavake ama’e tsy tapake tikagne.