1, 2. a) Hi mhaka muni u pimisa leswaku xikhongelo i xihiwa xohlawuleka? b) Hi mhaka muni hi fanele hi tiva leswi Bibele liswi djondzisaka hi xikhongelo?

MISAVA i yitsongo swinene loko yi ringanisiwa ni wuyaku hinkwalu. Loko Yehovha a languta laha misaveni, vanhu va matiko hinkwawu va fana ni donakati la mati ndzeni ka bakidi. (Tipisalema 115:15; Esaya 40:15) Kambe hambileswi hinga vatsongo swinene loko hi ringanisiwa ni wuyaku hinkwalu, buku ya Tipisalema 145:18, 19 yi vula leswaku “Yehovha a kusuhi ni hinkwavo lavamuvitanaka,ni ka hinkwavo lavamuvitanaka hi ntiyiso. Ayenelisa kunavela ka lava vamuchavaka,wavatwa loko varila vakombela kupfuniwa, kutani wavaponisa.” Leli i lunghelo lohlamalisa swinene! Yehovha, Muvumbi lweyi anga ni matimba, a lava kuva kusuhi na hina naswona a lava kuyingisa swikhongelo swa hina. Hakunene, xikhongelo i lunghelo naswona i xihiwa xohlawuleka lexi Yehovha ahi nyikeke xona.

² Kambe Yehovha ata yingisa swikhongelo swa hina ntsena loko hi vulavula na yena hi ndlela leyi ayi yamukelaka. Hinga yendlisa kuyini? Ahi voni leswi Bibele liswi vulaka hi xikhongelo.

3. Hi mhaka muni hi fanele hi khongela ka Yehovha?

³ Yehovha a lava leswaku u vulavula na yena hi xikhongelo. Hiswi tivisa kuyini? Lerha Vafilipiya 4:6, 7. Pimisa hi xirhambu xolexo xa lirhandzu. Mufumi wa wuyaku hinkwalu wa karhateka swinene hi wena naswona a lava umu byela leswi u titwisaka xiswona ni kuva umu byela swikarhatu swa wena.

4. Hi mhaka muni kukhongela ka Yehovha nkama ni nkama swi kulisa wuxaka la wena na yena?

 ⁴ Xikhongelo xihi pfuna kuva ni wuxaka lelinene na Yehovha. Loko vanghanu va vulavulisana nkama ni nkama hi swikarhatu swa vona, hi leswi swiva vilelisaka ni ndlela leyi va titwaka hi yona, wunghanu la vona la kula. Swa fana ni kukhongela ka Yehovha. Hi kutirhisa Bibele, aku byele miyanakanyu ya yena ni leswi a titwisaka xiswona naswona aku byele leswi angataswi yendla ankameni lowu taka. Ungamu byela leswi u titwisaka xiswona hi kuvulavula na yena nkama ni nkama. Loko u yendla leswo, wuxaka la wena na yena lita kula swinene. — Yakobo 4:8.

5. Hiswi tivisa kuyini leswaku Yehovha anga yingisi swikhongelo hinkwaswu?

⁵ Kunga va leswaku Yehovha a yingisa swikhongelo hinkwaswu? Nikatsongo! Ka nkama wa muprofeta Esaya, Yehovha a vule leswi ka Vayisrayele: “Naswona loko mitlakusa mavoko ya n’wina, nimifihlela matihlo ya mina. Hambileswi miyendlaka swikhongelo swotala, aniyingisi; mavoko ya n’wina matale hi ngati.” (Esaya 1:15) Hi mhaka leyo,  loko hingati voneli, hinga yendla swilo leswingahi hambanisaka na Yehovha.

6. Hi mhaka muni lipfumelo li li la lisima? Ungaswi kombisa kuyini leswaku u ni lipfumelo?

⁶ Loko hi lava leswaku Yehovha a yingisa swikhongelo swa hina, hi fanele hi va ni lipfumelo. (Marka 11:24) Mupostola Pawulo a hlamusela leswi: ‘Handle ka kupfumela aswikoteki kutsakisa Xikwembu. Mani na mani lweyi alavaka kutshinelela Xikwembu afanele kupfumela leswaku xikona, ni leswaku xihakela lava vaxilavaka.’ (Vaheveru 11:6) Kambe aswi yenelanga kuvula leswaku hi ni lipfumelo ntsena. Hi fanele hi kombisa lipfumelo hi kuyingisa Yehovha siku ni siku. — Lerha Yakobo 2:26.

7. a) Hi mhaka muni hi fanele hi tiveka hansi ni kukombisa xihloniphu loko hi khongela? b) Hingaswi kombisa kuyini leswaku ha tshembeka loko hi yendla xikhongelo?

⁷ Hi fanele hi tiveka hansi ni kukombisa xihloniphu loko hi khongela ka Yehovha. Hi mhaka muni? Loko hi lava kuvulavula ni hosi yokarhi, ahingata vulavula hi ndlela ya xihloniphu? Yehovha i Xikwembu xa Matimba Hinkwawu. Kutani, hi fanele hi kombisa xihloniphu lexikulu ni kutlhela hi tiveka hansi loko hi vulavula na yena. (Genesa 17:1; Tipisalema 138:6) Hi fanele hi tshembeka naswona hi khongela swi huma mbilwini, kunga li kuphindhaphindha maritu lama fanaka nkama ni nkama. — Matewu 6:7, 8.

8. Loko hi khongela hi nchumu xokarhi, hi fanele hi tlhela hi yendla yini?

⁸ Hi wugamu, loko hi khongela hi nchumu xokarhi, hi fanele hi yendla hinkwaswu leswi hingaswi kotaka leswaku hi fambisana ni leswi hiswi khongelelaka. Hi xikombiso, loko hi khongela ka Yehovha leswaku ahi nyika leswi hiswi lavaka siku ni siku, hi fanele hi gama hi yendla xokarhi. Ahi fanelanga hi tiyendla malolo hi rindzela leswaku Yehovha atahi nyika hinkwaswu na hi khondle mavoko. Hi fanele hi tirha hi matimba naswona hi pfumela ntirho wun’wana ni  wun’wana hambiloko wu li wa xiyimo xa le hansi. (Matewu 6:11; 2 Vatesalonika 3:10) Loko hi kombela Yehovha leswaku ahi pfuna kutshika kuyendla swilo swobiha, hi fanele hi fambela kule ni swiyimo leswingahi ringaka leswaku hi tlhela hiswi yendla. (Vakolosa 3:5) Swoswi ahi kambisisi swivutiso swin’wana hi xikhongelo.

9. Hi fanele hi khongela ka mani? I yini leswi buku la Yohane 14:6 lihi djondzisaka swona hi xikhongelo?

⁹ Hi fanele hi khongela ka mani? Yesu a djondzise valandzeli va yena leswaku va khongela ka “Tatana wa hina lweyi anga matilweni”. (Matewu 6:9) A tlhele a ku: “Hi mina ndlela, ni ntiyiso, ni vutomi, aku na munhu lweyi ataka ka Tatana, loko kungali ha mina.” (Yohane 14:6) Hi fanele hi khongela ka Yehovha ntsena hi kutirhisa vitu la Yesu. Swi vula yini kukhongela hi kutirhisa vitu la Yesu? Leswaku Yehovha a yamukela swikhongelo swa hina, hi fanele hi kombisa leswaku hiswi teka swi li swa lisima leswi Yesu aswi yendleke. Hilaha hinga djondza hi kona, Yesu a te laha misaveni leswaku atahi ponisa ka xidjoho ni lifu. (Yohane 3:16; Varhoma 5:12) Naswona Yehovha amu lange kuva Muprista Lwenkulu ni Muyavanyisi. — Yohane 5:22; Vaheveru 6:20.

10. Hi fanele hi tshama kumbe hi nyima hi ndlela yokarhi loko hi khongela? Hlamusela.

¹⁰ Hi fanele hi khongela hi li ka xiyimo xa kutshamisa kuyini? Yehovha angahi kombeli leswaku hi khizama, hi tshama kumbe hi nyima loko hi khongela. Bibele lihi djondzisa leswaku hinga vulavula na Yehovha hambiloko hiyo nyima kumbe hiyo tsama, ntsena loko hi kombisa xihloniphu. (1 Tikronika 17:16; Nehemiya 8:6; Daniyele 6:10; Marka 11:25) Leswinga swa lisima ka Yehovha ahi leswi hinga nyimisa xiswona loko hi khongela, kambe i xihloniphu lexi hixi kombisaka. Hinga khongelela mbilwini, hi rito leli twalaka, ka ndhawu yin’wana ni yin’wana naswona  minkama hinkwayu. Loko hi khongela ka Yehovha, hinga tiyiseka leswaku atahi yingisa hambiloko hinga twiwi hi munhu. — Nehemiya 2:1-6.

11. Hi yihi minchumu yin’wana leyi hinga vulavulaka na Yehovha ka xikhongelo?

¹¹ Hinga khongelela yini? Hinga khongelela swilo hinkwaswu leswi yamukelekaka ka Yehovha. Bibele li vula leswi: “Loko hikombela xokarhi mayelanu ni kurhandza ka yena, yena wahiyingisa.” (1 Yohane 5:14) Hinga khongela hi minchumu leyi yihi khumbaka? Ina. Kukhongela ka Yehovha swi fanele swi fana ni kubula ni munghanu wa wena. Hingamu byela minchumu hinkwayu leyinga ka mimpimiso ya hina kumbe leswinga ambilwini. (Tipisalema 62:8) Hinga khongela hi kombela leswaku ahi nyika moya wokwetsima leswaku wuhi pfuna kuyendla leswinga swinene. (Luka 11:13) Hinga tlhela hi kombela Yehovha leswaku ahi nyika wutlharhi loyendla swiboho leswinene naswona hinga kombela leswaku ahi tiyisa leswaku hi kota kulangutana ni swikarhatu. (Yakobo 1:5) Hi fanele hi kombela Yehovha leswaku ahi rivalela swidjoho swa hina. (Vaefesa 1:3, 7) Hi fanele hi khongelela van’wana, kukatsa ni ndjangu wa hina ni vamakwerhu abandleni. — Mintirho 12:5; Vakolosa 4:12.

12. I yini leswi faneleke swi va swa lisima swinene ka swikhongelo swa hina?

¹² I yini leswi faneleke swi va swosungula ka swikhongelo swa hina? I Yehovha ni kurhandza ka yena. Hi fanele hi tlangela hi mbilu hinkwayu leswi angahi yendlela swona. (1 Tikronika 29:10-13) Loko Yesu waha li la misaveni a djondzise valandzeli va yena ndlela yokhongela. (Lerha Matewu 6:9-13.) A vule leswaku hi fanele hi rhanga hi khongelela leswaku vitu la Xikwembu li kwetsimisiwa, kunga leswi, li tekiwa tani hi leli tengeke kumbe leli kwetsimeke. Ndzhaku ka leswo, Yesu a vule leswaku hi fanele hi khongelela leswaku Mfumu wa Xikwembu wu ta ni leswaku kuyendleka kurhandza ka Yehovha la misaveni. Ndzhaku kokhongelela  swilo leswo swa lisima, Yesu a game vula leswaku hinga kombela leswi hiswi lavaka. Loko hi rhangisa Yehovha ni kurhandza ka yena ka swikhongelo swa hina, hi kombisa leswinga swa lisima ka hina.

13. Swikhongelo swa hina swi fanele swi leha kufikela kwihi?

¹³ Swikhongelo swa hina swi fanele swi leha kufikela kwihi? Bibele a li vuli. Swikhongelo swa hina swinga koma kumbe swi leha hikuya hi swiyimo. Hi xikombiso, hinga yendla xikhongelo xa kukoma loko hi lava kudla. Kambe hinga yendla xikhongelo xa kuleha loko hi tlangela  Yehovha hi swilo swokarhi kumbe loko himu byela leswihi karhataka. (1 Samuwele 1:12, 15) Ahi fanelanga hi yendla swikhongelo swoleha leswaku hi voniwa hi vanhu van’wana, hilaha van’wana ava yendla hi kona masikwini ya Yesu. (Luka 20:46, 47) Yehovha angaswi yingisi swikhongelo swa muxaka wolowo. Leswinga swa lisima ka Yehovha i kukhongela swi huma mbilwini.

14. Hi fanele hi khongela kangani hi siku, naswona leswo swihi djondzisa yini hi Yehovha?

¹⁴ Hi fanele hi khongela kangani hi siku? Yehovha ahi rhamba leswaku hi vulavula na yena minkama hinkwayu. Bibele li vula leswaku hi fanele hi ‘lavelela na hili karhi hikhongela’, hi ‘hiteka kukhongeleni’ naswona hinga ‘tshiki kukhongela.’ (Matewu 26:41; Varhoma 12:12; 1 Vatesalonika 5:17) Leswo swi kombisa leswaku Yehovha a lunghekile kuva a yingisa swikhongelo swa hina minkama hinkwayu.  Hinga tlangela lirhandzu ni malwandla ya yena siku ni siku. Hinga tlhela hi kombela nkongomiso, matimba ni kuva ahi chavelela. Loko hi twisisa lisima la xikhongelo, hita susumeteleka kuvulavula na yena minkama hinkwayu.

15. Hi mhaka muni hi fanele hi ku “amen” loko hi gimeta xikhongelo?

¹⁵ Hi mhaka muni hi fanele hi ku “amen” loko hi gimeta xikhongelo? Rito lelinge “amen” li vula leswaku “ha pfumela” kumbe “a kuyendleki swoleswo.” I ndlela yokombisa leswaku hi nyima ni leswi hingaswi vula ka xikhongelo. (Tipisalema 41:13) Bibele li vula leswaku loko hi pfumelelana ni leswi vuliweke hi munhu mun’wana ka xikhongelo, hi fanele hi ku “amen,” hi rito la le hansi kumbe leli twalaka. — 1 Tikronika 16:36; 1 Vakorinto 14:16.

16. Kunga va leswaku Yehovha wa hlamula swikhongelo swa hina hakunene? Hlamusela.

¹⁶ Kunga va leswaku Yehovha wa hlamula swikhongelo swa hina hakunene? Ina, wa hlamula. Bibele limu vitana “Mutwi wa xikhongelo”. (Tipisalema 65:2) Yehovha waswi yingisa ni kuswi hlamula swikhongelo swa vanhu votala swinene va timbilu letinene. A yendla leswo hi tindlela totala.

17. Yehovha a tirhisa tintsumi ni vagandzeli va yena hi ndlela yihi leswaku a hlamula swikhongelo swa hina?

¹⁷ Yehovha a tirhisa tintsumi leswaku a hlamula swikhongelo swa hina. Nakambe a tlhela a tirhisa vagandzeli va yena va laha misaveni. (Vaheveru 1:13, 14) Hi xikombiso, ku ni vanhu votala lavanga khongela va kombela kupfuniwa leswaku va twisisa Bibele va tekela kuyamukela Timboni ta Yehovha leswaku ti va chumayela. Bibele li vula leswaku tintsumi ta katseka ka ntirho wochumayela “Evhangeli” yotsakisa amisaveni hinkwayu. (Lerha Nhlavutelo 14:6.) Makhambi yotala vamakwerhu vahi pfuna  ndzhaku kokhongela ka Yehovha himu byela swikarhatu ni swilaveko swa hina. — Swivuriso 12:25; Yakobo 2:16.

18. Yehovha awu tirhisa kuyini moya wokwetsima ni Bibele leswaku a hlamula swikhongelo swa hina?

¹⁸ Nakambe Yehovha a hlamula swikhongelo swa hina hi kutirhisa moya wokwetsima. Loko hi kombela mpfunu leswaku hi kota kulangutana ni swikarhato, anga tirhisa moya wokwetsima leswaku ahi nyika nkongomiso ni matimba. (2 Vakorinto 4:7) Yehovha a tlhela a tirhisa Bibele leswaku a hlamula swikhongelo swa hina. Loko hi li lerha hi kuma matsalwa lamahi pfunaka kuyendla swiboho leswinene. Nakambe anga tirhisa nhlamulu ya munhu wokarhi aminhlanganwini kumbe tsalwa lokarhi leli hinga lerheliwaka hi doda. — Vagalatiya 6:1.

19. Hi mhaka muni minkama yin’wana hingaha vona ingi Yehovha anga hlamuli swikhongelo swa hina?

¹⁹ Kambe minkama yin’wana, hingahati vutisa: ‘Hi mhaka muni Yehovha angase hlamula swikhongelo swa mina?’ Khumbuka leswaku Yehovha waswi tiva leswi hiswi lavaka, nkama lowu hiswi lavaka hi wona ni ndlela leyi angatahi hlamula ha yona. Hi fanele hi tama hi khongela kuva hi kombisa leswaku swikombelo swa hina swi huma mbilwini ni leswaku haxi tshemba Xikwembu. (Luka 11:5-10) Minkama yin’wana Yehovha angaha hlamula swikhongelo swa hina hi ndlela leyi ahingayi rindzelanga. Hi xikombiso, hinga khongela hi xiyimo xokarhi lexihi karhataka; kambe Yehovha angaxi susi, ntsena ahi nyika ntamu wa kutiyisela. — Lerha Vafilipiya 4:13.

20. Hi mhaka muni hi fanele hi khongela ka Yehovha nkama ni nkama?

²⁰ Hakunene, kukhongela i lunghelo lotsakisa leli hi nyikiweke lona hi Yehovha! Hinga tiyiseka leswaku atahi yingisa. (Tipisalema 145:18) Loko hi khongela ka Yehovha swi huma mbilwini nkama ni nkama, wunghanu la hina na yena lita ya li kula.