1, 2. Ndi ngani ni tshi dzhia thabelo i tshifhiwa tsho khetheaho nahone ndi ngani ri tshi fanela u ḓivha zwine Bivhili ya zwi funza nga hayo?

ḼIFHASI ndi ḽiṱuku vhukuma musi ḽi tshi vhambedzwa na ṋaledzi nnzhi dzi re ṱaḓulu. Musi Yehova a tshi sedza ḽifhasi, tshaka dzoṱhe dza vhathu dzi vhonala dzi tshi nga shotha ḽa maḓi kha mvuvhelo. (Phisalema 115:15; Yesaya 40:15) Naho ri vhaṱuku vhukuma musi ri tshi vhambedzwa na zwithu zwinzhi zwi re ṱaḓulu na kha ḽifhasi, Phisalema 145:18, 19 i ri: “Yehova u tsini na vhoṱhe vhane vha mu vhidzelela, vhoṱhe vhane vha mu vhidza nga ngoho. U fusha lutamo lwa vhane vha mu ofha; u pfa tshililo tshavho tsha u ṱoḓa thuso, a vha tshidza.” Yeneyi ndi ndugelo yavhuḓi vhukuma ine ra vha nayo. Yehova, Musiki ramaanḓaoṱhe, u ṱoḓa u vha tsini na riṋe nahone u ṱoḓa u thetshelesa thabelo dzashu. Thabelo ndi ndugelo, ndi tshifhiwa tsho khetheaho tshe Yehova a tshi ṋea muṅwe na muṅwe washu.

² Fhedzi Yehova u ḓo ri thetshelesa arali ra amba nae nga nḓila ine a i ṱanganedza. Zwenezwo ri nga zwi itisa hani? Kha ri vhone zwine Bivhili ya zwi amba nga ha thabelo.

3. Ndi ngani ni tshi fanela u rabela Yehova?

³ Yehova u ṱoḓa ni tshi mu rabela kana u amba nae. Ri zwi ḓivha hani zwenezwo? Nga khumbelo vhalani Vhafilipi 4:6, 7. Humbulani nga ha honoho u rambiwa havhuḓi. Muvhusi wa fhethu hoṱhe u na ndavha vhukuma na inwi  nahone u ṱoḓa ni tshi mu vhudza nḓila ine na ḓipfa ngayo na nga ha thaidzo dzaṋu.

4. U rabela Yehova tshifhinga tshoṱhe zwi khwaṱhisa hani vhushaka haṋu nae?

⁴ Thabelo i ri thusa uri ri vhe na vhukonani ha tsini na Yehova. Musi khonani dzi tshi amba tshifhinga tshoṱhe nga ha zwine dza zwi humbula, mbilaelo dzadzo na nḓila ine dza ḓipfa ngayo, vhukonani vhu a khwaṱha. Zwo tou ralo na musi ri tshi rabela Yehova. O shumisa Bivhili u ni vhudza nga ha zwi re muhumbuloni wawe, nḓila ine a ḓipfa ngayo na zwine a ḓo zwi ita tshifhingani tshi ḓaho. Musi ni tshi mu rabela tshifhinga tshoṱhe, ni nga kona u mu somolela zwa haṋwani. U ita zwenezwi, zwi ḓo ita uri vhukonani haṋu na Yehova vhu khwaṱhe.​—Yakobo 4:8.

5. Ri zwi ḓivha hani uri Yehova ha thetshelesi thabelo dzoṱhe?

⁵ Naa Yehova u thetshelesa thabelo dzoṱhe? Hai. Tshifhingani tsha muporofita Yesaya, Yehova o vhudza Vhaisiraele  a ri: “Naho ni tshi nga rabela lunzhi-lunzhi, a thi nga ni thetshelesi; ngauri zwanḓa zwaṋu zwo ḓala malofha.” (Yesaya 1:15) Nga zwenezwo, arali ra sa ṱhogomela, ri nga ita zwithu zwine zwa nga ri sendedza kule na Yehova, zwa ita uri a si thetshelese thabelo dzashu.

6. Ndi ngani lutendo lu lwa ndeme? Ni nga zwi sumbedza hani uri ni na lutendo?

⁶ Arali ri tshi ṱoḓa uri Yehova a thetshelese thabelo dzashu, ri fanela u vha na lutendo khae. (Marko 11:24) Muapostola Paulo o ri: “U nga si kone u takadza Mudzimu arali u si na lutendo, ngauri ane a sendela tsini nae u fanela u tenda uri u hone na uri u lambedza vhane vha mu ṱoḓa zwi tshi bva mbiluni.” (Vhahevheru 11:6) Fhedzi a zwo ngo eḓana u sokou amba uri ri na lutendo. Ri fanela u sumbedza uri ri na lutendo nga u thetshelesa Yehova ḓuvha ḽiṅwe na ḽiṅwe.​—Vhalani Yakobo 2:26.

7. (a) Ndi ngani ri tshi fanela u ḓiṱukufhadza na u sumbedza ṱhonifho musi ri tshi rabela Yehova? (b) Ri nga zwi sumbedza hani uri thabelo yashu i bva mbiluni?

⁷ Musi ri tshi rabela Yehova, ri fanela u ḓiṱukufhadza na u sumbedza ṱhonifho. Ndi ngani? Arali ha pfi ri ambe na khosi kana muphuresidennde, ri ḓo amba nga ṱhonifho. Samusi Yehova e Mudzimu Ramaanḓaoṱhe, naa a ro ngo fanela u mu ṱhonifha zwihulu na u ḓiṱukufhadza musi ri tshi amba nae? (Genesi 17:1; Phisalema 138:6) Zwiṅwe hafhu, ri fanela u rabela Yehova zwi tshi bva mbiluni, hu si u sokou dovholola maipfi mathihi lunzhi-lunzhi.​—Mateo 6:7, 8.

8. Musi ri tshi humbela Yehova tshiṅwe tshithu, ndi zwifhio zwiṅwe zwine ra fanela u zwi ita?

⁸ Tsha u fhedza, musi ri tshi humbela Yehova tshiṅwe tshithu, ri tea u ita zwoṱhe zwine ra nga kona u itela u tshi wana. Sa tsumbo, arali ra humbela uri Yehova a ri thuse nga zwishaiwa zwashu zwa ḓuvha ḽiṅwe na ḽiṅwe, a ro ngo  tea u vha vhabva nahone ra lavhelela uri Yehova a ri ṋee zwithu zwoṱhe naho ri tshi kona u zwi shumela. Ri fanela u shuma vhukuma nahone ri ṱanganedze mushumo une ra kona u u ita. (Mateo 6:11; 2 Vhathesalonika 3:10) Kana arali ra rabela Yehova uri a ri thuse u litsha u ita tshiṅwe tshithu tsho khakheaho, ri fanela u iledza tshiṅwe na tshiṅwe tshine tsha nga ri linga. (Vhakolosa 3:5) Zwino kha ri ṱolisise zwine zwa anzela u vhudziswa nga ha thabelo.

9. Ri fanela u rabela nnyi? Yohane 14:6 i ri gudisa mini nga ha thabelo?

⁹ Ri fanela u rabela nnyi? Yesu o gudisa vhatevheli vhawe uri vha rabele “Khotsi ashu wa ṱaḓulu.” (Mateo 6:9) O dovha a ri: “Ndi nṋe nḓila na ngoho na vhutshilo. A hu na ane a ḓa kha Khotsi a songo fhira kha nṋe.” (Yohane 14:6) Nga zwenezwo, ri fanela u rabela Yehova fhedzi, nga dzina ḽa Yesu. Zwi amba mini u rabela nga dzina ḽa Yesu? Arali ri tshi ṱoḓa uri Yehova a ṱanganedze thabelo dzashu, ri fanela u ṱhonifha mushumo wo khetheaho we Yehova a u ṋea Yesu. Samusi ro zwi guda, Yesu o ḓa kha ḽifhasi u itela u ri tshidza kha tshivhi na lufu. (Yohane 3:16; Vharoma 5:12) Yehova o dovha a vhea Yesu sa Tshifhe Muhulu na Muhaṱuli.​—Yohane 5:22; Vhahevheru 6:20.

10. Naa hu na nḓila ine ra tea u ima kana u dzula ngayo musi ri tshi rabela? Ṱalutshedzani.

¹⁰ Naa hu na nḓila ine ra tea u ima kana u dzula ngayo musi ri tshi rabela? Hai, Yehova ha ri humbeli uri ri gwadame, u dzula kana u ima musi ri tshi rabela. Bivhili i ri gudisa uri ri nga amba na Yehova ri kha vhuimo vhuṅwe na vhuṅwe vhu ṱhonifheaho. (1 Koronika 17:16; Nehemia 8:6; Daniele 6:10; Marko 11:25) Zwa ndeme vhukuma kha Yehova musi ri tshi rabela khae a si maimele kana madzulele  ashu, fhedzi ndi uri ri ambe nae ri na mavhonele avhuḓi. Ri nga rabelela nṱha kana mbiluni hu sa londwi hune ra vha hone na nga tshifhinga tshiṅwe na tshiṅwe, masiari kana vhusiku. Musi ri tshi rabela Yehova, ri nga fhulufhela uri u ḓo ri pfa naho hu si na muṅwe muthu ane a khou ri pfa.​—Nehemia 2:1-6.

11. Ndi zwifhio zwiṅwe zwithu zwine ra nga amba na Yehova nga hazwo?

¹¹ Ri nga humbela Yehova mini? Ri nga humbela tshiṅwe na tshiṅwe tshine Yehova a tshi ṱanganedza. Bivhili i ri: “Ra humbela zwine zwa tshimbidzana na zwine a zwi funa, u ḓo ri pfa.” (1 Yohane 5:14) Naa ri nga humbela zwine riṋe vhaṋe ra zwi ṱoḓa? Ee. U rabela Yehova zwi fana na musi ni tshi khou amba na khonani ya tsini. Ri nga vhudza Yehova zwoṱhe zwi re muhumbuloni na mbiluni dzashu. (Phisalema 62:8) Ri nga rabela uri a ri ṋee muya wawe mukhethwa u re na maanḓa uri u ri thuse u ita zwo lugaho. (Luka 11:13) Zwiṅwe hafhu, ri nga humbela Yehova vhuṱali ha u ita phetho dzavhuḓi na nungo dza u kona u sedzana na thaidzo. (Yakobo 1:5) Ri fanela u humbela Yehova uri a ri hangwele zwivhi zwashu. (Vhaefesa 1:3, 7) Ri fanela u rabelela na vhaṅwe, muṱa washu na vhahashu vha tshivhidzoni.​—Mishumo 12:5; Vhakolosa 4:12.

12. Ndi zwithu zwifhio zwa ndeme zwine ra fanela u rabela nga hazwo?

¹² Ndi zwithu zwifhio zwa ndeme zwine ra fanela u rabela nga hazwo? Yehova na zwine a funa zwi tshi itwa. Ri fanela u livhuwa zwoṱhe zwe a ri itela zwone zwi tshi bva mbiluni. (1 Koronika 29:10-13) Zwenezwo ri a zwi ḓivha ngauri musi Yesu e kha ḽifhasi, o gudisa vhafunziwa vhawe nḓila ya u rabela. (Vhalani Mateo 6:9-13.) O ri vha fanela u thoma u rabelela uri dzina ḽa Mudzimu ḽi itwe ḽikhethwa. Zwiṅwe hafhu, Yesu o sumbedza uri ri fanela u rabelela Muvhuso wa Mudzimu uri u ḓe na uri zwine Yehova a funa  zwi itwe kha ḽifhasi ḽoṱhe. Yesu o amba uri ri fanela u thoma u rabelela zwenezwo zwithu zwa ndeme vhukuma, ra kona u rabelela zwithu zwine ra zwi ṱoḓa. Musi ri tshi rabela nga ha Yehova na zwine a zwi funa ri vha ri tshi khou sumbedza uri ndi zwone zwa ndeme kha riṋe.

13. Thabelo dzashu dzi fanela u vha nngafhani?

¹³ Thabelo dzashu dzi fanela u vha nngafhani? Bivhili a i ri vhudzi. Thabelo dzashu dzi nga vha pfufhi kana dza vha ndapfu zwi tshi ya nga zwiimo. Sa tsumbo, musi ri tshi  rabelela zwiḽiwa ri nga ita thabelo pfufhi, fhedzi i nga vha ndapfu musi ri tshi livhuwa Yehova kana u mu vhudza mbilaelo dzashu. (1 Samuele 1:12, 15) A ri ṱoḓi u ita thabelo ndapfu u itela u takadza vhaṅwe, sa zwe vhaṅwe vha ita tshifhingani tsha Yesu. (Luka 20:46, 47) Yehova ha takadzwi nga thabelo dzo raloho. Tsha ndeme kha Yehova ndi u rabela zwi tshi bva mbiluni.

14. Ri fanela u rabela lungana nahone zwenezwi zwi ri gudisa mini nga ha Yehova?

¹⁴ Ri fanela u rabela lungana? Yehova u ri ramba uri ri ambe nae tshifhinga tshoṱhe. Bivhili i ri ri fanela u ‘bvela phanḓa ri tshi rabela’ na uri ‘ri dzule ri tshi rabela.’ (Mateo 26:41; Vharoma 12:12; 1 Vhathesalonika 5:17) Yehova u dzula o ḓiimisela u ri thetshelesa. Ri nga mu livhuwa ḓuvha ḽiṅwe na ḽiṅwe nge a ri funa na u ri sumbedza mafunda.  Ri nga dovha ra mu humbela uri a ri livhise, a ri khwaṱhise na u ri khuthadza. Arali ngangoho ri tshi dzhiela nṱha ndugelo ine ra vha nayo ya u rabela Yehova, ri ḓo shumisa tshibuli tshiṅwe na tshiṅwe u itela u amba nae.

15. Ndi ngani ri tshi fanela u ri “amen” magumoni a thabelo?

¹⁵ Ndi ngani ri tshi fanela u ri “amen” magumoni a thabelo? Ipfi “Amen” ḽi amba “ngangoho,” kana “nga zwi ralo.” Ndi nḓila ya u khwaṱhisedza uri zwe ra zwi amba kha thabelo zwi bva mbiluni. (Phisalema 41:13) Bivhili i ri funza uri zwi dovha zwa vha zwavhuḓi u ri “amen,” mbiluni kana zwi tshi pfala, musi muṅwe muthu a tshi fhedza u rabela hu u itela u sumbedza uri ri tendelana na zwe zwa ambiwa.​—1 Koronika 16:36; 1 Vhakorinta 14:16.

16. Naa Yehova u a fhindula thabelo dzashu? Ṱalutshedzani.

¹⁶ Naa Yehova u a fhindula thabelo dzashu? Ee, u a dzi fhindula. Bivhili i mu vhidza “Mupfi wa thabelo.” (Phisalema 65:2) Yehova u pfa na u fhindula thabelo dzi bvaho mbiluni dza vhathu vha dzimiḽioni nahone u zwi ita nga nḓila dzo fhambanaho.

17. Yehova u fhindula hani thabelo dzashu a tshi shumisa vharuṅwa na vhashumeli vhawe vha kha ḽifhasi?

¹⁷ Yehova u fhindula thabelo dzashu a tshi shumisa vharuṅwa na vhashumeli vhawe vha kha ḽifhasi. (Vhahevheru 1:13, 14) Hu na tsumbo nnzhi dza vhathu vhe vha rabela uri vha thusiwe u pfesesa Bivhili nahone nga murahu ha zwenezwo vha dalelwa nga muṅwe wa Ṱhanzi Dza Yehova. Bivhili i sumbedza uri vharuṅwa vha shela mulenzhe kha u ḓivhadza “mafhungo maḓifha” ḽifhasini ḽoṱhe. (Vhalani Nzumbululo 14:6.) Zwiṅwe hafhu, vhunzhi hashu ro no rabela kha Yehova nga ha thaidzo ine ra vha nayo kana zwine ra zwi shaya nahone ra wana thuso ye ra vha ri tshi khou  i ṱoḓa kha wahashu wa Mukriste.​—Mirero 12:25; Yakobo 2:16.

18. Yehova u fhindula hani thabelo a tshi shumisa muya wawe mukhethwa na Bivhili?

¹⁸ Yehova u fhindula thabelo dzashu a tshi shumisa muya wawe mukhethwa. Musi ri tshi rabela uri a ri thuse u konḓelela thaidzo, a nga shumisa muya wawe mukhethwa u itela u ri ṋea vhulivhisi na nungo. (2 Vhakorinta 4:7) Yehova u dovha a fhindula thabelo dzashu na u ri thusa u ita phetho dza vhuṱali a tshi shumisa Bivhili. Musi ri tshi vhala Bivhili, ri nga wana maṅwalo ane a ḓo ri thusa. Yehova a nga ṱuṱuwedza muṅwe muthu ane a khou fhindula tshivhidzoni u amba zwithu zwine zwa ḓo ri thusa kana muhulwane tshivhidzoni uri a ri sumbedze iṅwe mbuno i bvaho Bivhilini.​—Vhagalata 6:1.

19. Ndi ngani ri tshi nga vhona u nga Yehova ha athu u fhindula thabelo dzashu?

¹⁹ Nga zwiṅwe zwifhinga, ri nga ḓivhudzisa uri: ‘Ndi ngani Yehova a sa athu u fhindula thabelo dzanga?’ Humbulani uri u a ḓivha uri u fanela u fhindula thabelo dzashu hani nahone lini. U a ḓivha zwine ra zwi shaya. Ri nga kha ḓi tea u bvela phanḓa ri tshi rabela lwa tshifhinga tshilapfu u sumbedza uri ro ḓiimisela kha zwine ra ṱoḓa na u sumbedza uri ri a mu fhulufhela. (Luka 11:5-10) Nga zwiṅwe zwifhinga Yehova u fhindula thabelo dzashu nga nḓila ye ri si i lavhelele. Sa tsumbo, ri nga rabela nga ha vhuimo vhu konḓaho, fhedzi nṱhani ha u fhelisa thaidzo, a nga ri ṋea nungo dza u i konḓelela.​—Vhalani Vhafilipi 4:13.

20. Ndi ngani ri tshi fanela u rabela Yehova tshifhinga tshoṱhe?

²⁰ Ri na ndugelo yavhuḓi vhukuma ya u rabela Yehova. Ri nga vha na vhungoho ha uri u ḓo ri thetshelesa. (Phisalema 145:18) Musi ri tshi rabela Yehova tshifhinga tshoṱhe zwi tshi bva mbiluni, vhushaka hashu nae vhu ḓo khwaṱha.