1, 2. Xeeni ohimyaka wira ovekela eparakha ya vameekhaaya, ni xeeni vanitthuneya ahu osuwela ele Biibiliya enihimya awe sa ovekela?

ELAPO ti yaamukhaani nalikanyiha ni erimu. Vaavo Yehova vaniweha awe elapo, atthu a maloko otheene anikhala ntoko mattoittoi a maasi anikhuma mmwaapuni. (Esalimo 115:15; Yesaya 40:15) Hata vari siiso, hiyo nootepa oyeva nailikanyiha ni erimu. Esalimo 145:18, 19, enihimya wira: “Apwiya anniwattamela othene ale anavekela, yale anaroromela ni murim’aya w’ekekhai. Apwiya annavaha simphavelaya ale anattittimiha: anniwiriyana okhuwela waya, khuwòpola”. Tthiri eparakha yuulupale nrina ahu! Yehova, Mpattuxa oowerya sotheene, oniphavela onaattamela, ni owiriyana mavekelo ahu. Mwekeekhai, nivekelo eparakha, niire so, yoovaha yuulupale yeeyo Yehova ennivaha awe otheene ahu.

² Yehova onooniwiriyana akhala wira ninlavulana mwa enamuna eniphavela awe. Nto ninrowa opaka sai eyo? Nrowe noone ele Biibiliya enihimya awe.

3. Xeeni vaninvekela ahu Yehova?

³ Yehova oniphavela wira ninvekeleke aahiiso olavulana. Ninsuwela sai eyo? Xontte mmusome aFilipi 4:6, 7. Nkahaya muupuwele nlattulo nna. Mpattuxa a olumwenku onnisiveliwa vanceene ni nyuwo ni oniphavela wira mmuleeleke muupuwelo anyu ni mixankiho sanyu.

4. Moota xeeni onvekela Yehova khula okathi onlipiha aya wataana wahu ni yena?

⁴ Nivekelo ninninikhaliherya olipiha wataana wahu ni Yehova. Vaavo apatthani vanilavulihana aya okathi ti okathi  aleelanaka miyuupuwelo saya, moonelo aya, ele enaasivela, ompatthani aya onnilipa. Etthu emosaru enniiraneya ni onvekela Yehova. Nave Yehova onnihimya mBiibiliyani muupuwelo awe, moonelo awe, ni ele enrowa awe opaka muhoolo. Vano nyuwo pooti omuleela ni murima anyu wotheene muupuwelo anyu nvekelaka okathi ti okathi. Vaavo vanipaka anyu eyo, ompatthani anyu ni Yehova onrowa otepaka olipa.​—Yakobo 4:8.

5. Ninsuwela sai wira Yehova khoniwiriyana mavekelo otheene?

⁵ Niireke Yehova onniwiriyana mavekelo otheene? Nnaari. Okathi wa profeta Yesaya, Yehova aahaahimeerya aIsarayeli wira: “Mwathipelelaka okivekela, miyo nkinowiriyanani. Tthiri matat’anyu t’òsareya ephome”. (Yesaya 1:15) Tthiri, naahiivahe ephoole, ninrowa opaka itthu saarowa onrakameliha Yehova, nto eyo yammwiiriha ohiwiriyana mavekelo ahu.

6. Nthowa xeeni waamini oryaaya wootthuneya? Munrowa wooniherya sai wira munnaamini?

 ⁶ Naphavela wira Yehova owiriyane mavekelo ahu, nihaana omwaamini yena. (Marko 11:24) Murummwa Paulo onitthokiherya so: “Khavo mutthu onwerya omusiveliha Muluku, ahaminiki: mana ole onimwattamela Muluku ohana wamini wira Muluku òkhala ni wira onnatthuvela ale animphavela”. (aHéberi 11:6) Nto khivaniphiyerya ohimya wira ninnaamini. Nihaana wooniherya waamini iwo nimwiiwelelaka Yehova khuta nihiku.​—Mmusome Yakobo 2:26.

7. (a) Xeeni vanitthuneya ahu wiiyeviha ni ottittimiha okathi oninvekela ahu Yehova? (b) Moota xeeni ninrowa ahu wooniherya wira ninvekela ni murima wotheene?

⁷ Okathi onivekela ahu wa Yehova nihaana okhala oowiiyeviha ni omuttittimiha. Nthowa xeeni? Vaakhanle wira ninlavula ni mwene aahiiso presidenti, niireke khinaapaka eyo mwa nttittimiho? Yehova Muluku Toowerya Sotheene, niireke khivanitthuneya wooniherya nttittimiho ni wiiyeviha wuulupale? (Maphattuwelo 17:1; Esalimo 138:6) Nave-tho, nihaana olavulaka ni murima wotheene okathi oninvekela ahu Yehova, ohiya omakelaka otthikela olavula masu mamosaru.​—Matheyo 6:7, 8.

8. Okathi oniveka ahu etthu, exeeni-tho enitthuneya ahu opaka?

⁸ Akhala wira ninveka etthu, nihaana wiimananiha wira niphwanye ele evekenle ahu. Mwa ntakiheryo, akhala wira nninvekela Yehova wira onivahe itthu sinnithowa, nihaana oluttuweliwa ovara muteko nikupaliki wira Yehova onrowa onikhaliherya ophwanya ele eniphavela ahu. Nihaana wiimananiha ni weemererya khuta muteko oniwerya ahu opaka. (Matheyo 6:11; 2 aTesalonika 3:10) Akhala wira nninvekela Yehova wira onikhaliherye ottharuwa etthu yoohiloka, nihaana osyaka khula etthu yaarowa oneehererya. (aKolosi  3:5) Nrowe nthokorerye makoho animakela opakiwa voohimya sa mavekelo.

9. Mavekelo ahu nroiheke wa pani? Yohani 14:6 onniixuttiha exeeni voohimya sa mavekelo?

⁹ Mavekelo ahu nroiheke wa pani? Yesu aahaaleela awiixutti awe wira anvekeleke ‘Tith’ihu ori wirimu!’ (Matheyo 6:9) Nave aahimmye wira: “Miyo k’ephiró. Miyo k’ekekhayí. Miyo k’ekumí. Khavo onwerya orowa w’Atithi, ahivinre mwa miyo”. (Yohani 14:6) Tivonto, nihaana onvekela paahi Yehova orweela mwa Yesu. Enitaphulela exeeni ovekela orweela mwa Yesu? Wira Yehova aakhule mavekelo ahu, nihaana ottittimiha vanceene muteko Yehova onvanha awe Yesu. Ntoko siixuntta ahu, Yesu aahirwa valaponi wira onoopole mwa soottheka ni okhwa. (Yohani 3:16; aRoma 5:12) Nave-tho, Yehova oomukhaliha Yesu Muulupale aalipa a Mukuttho ni Namaphuka.​—Yohani 5:22; aHéberi 6:20.

10. Aakhala makhalelo a vameekhaaya ntoko weemela aahiiso okilaathi wira nivekele? Mutthokiherye.

¹⁰ Aakhala makhalelo a vameekhaaya ntoko weemela aahiiso okilaathi wira nivekele? Nnaari, Yehova khonnivekela okokhora, okilaathi, aahiiso weemela okathi onivekela ahu. Biibiliya onniixuttiha wira hiyo pooti olavulana Yehova mwa enamuna enooniherya nttittimiho. (1 Wahala 17:16; Nehemiya 8:6; Daniyeli 6:10; Marko 11:25) Etthu yootepa otthuneya wa Yehova wooniherya muupuwelo wooloka okathi onivekala ahu ohiya weemela aahiiso okilaathi. Hiyo pooti ovekela mowiiwanyeya, aahiiso moohiiwanyeya khuta opuro oryaahu, okhale othana wala ohiyu. Okathi onivekela ahu wa Yehova, nihaana okupali wira onrowa oniwiriyana hata mutthu mukina ohiiwaka.​—Nehemiya 2:1-6.

11. Nivekeleke exeeni wa Yehova?

 ¹¹ Nivekeleke exeeni? Hiyo pooti ovekela khuta etthu enivarihana ni otthuna wa Yehova. Biibiliya onihimya wira: “Hiyo nosuwela wira Muluku onninìwa nanvekelaka etthu, nanvekelakaru sintthara otthuna wawe”. (1 Yohani 5:14) Nto niireke pooti onvekela itthu siniphavela ahu? Aayo. Onvekela Yehova onlikana ni olavula ni mpatthani ahu onimphenta ahu. Hiyo pooti omuleela Yehova ele enuupuwela ahu ni eri vamurimani vahu. (Esalimo 62:9) Hiyo pooti onvekela munepa awe wootteela wira onikhaliherye opaka itthu sooloka. (Luka 11:13) Nave pooti onvekela Yehova wira onivahe ankhili annikhaliherya opaka soothanla sooloka, ni wira onikhaliherye oxintta mixankiho. (Yakobo 1:5) Nave-tho pooti onvekela Yehova wira onlevelele soottheka sahu. (aÉfeso 1:3, 7) Nihaana waavekelela akina, waahela muhina amusi ahu, anna ni arokora a mmulokoni.​—Miteko 12:5; aKolosi 4:12.

12. Itthu xeeni sootepa otthuneya sinireerela ahu ovekela?

¹² Etthu xeeni yootepa otthuneya mmavekelo ahu? Yehova ni yoolakela awe. Nihaana omuxukhuru ni murima ahu wotheene mwaha wa itthu sotheene sinniirela awe. (1 Wahala 29:10-13) Ninnisuwela eyo mwaha woowi vaavo Yesu aaryaawe valaponi, aahiwiixuttiha atthareli awe moota woovekela. (Mmusome Matheyo 6:9-13.) Yesu aahiwiixuttiha wira wanipacerya avekeleke otteelihiwa wa nsina na Muluku, eyo piiyo, othokoreriwa ntoko noowaarya. Moottharelana Yesu aahiwooniherya otthuneya waya ovekela wira oMwene wa Muluku orwe ni wira otthuna wa Yehova wiiraneye elapo yotheene. Nto nuumala ovekela itthu iya sootepa otthuneya, Yesu aahimmye wira nihaana ovekela itthu siniphavela ahu. Vaavo vanimpweha ahu Yehova ni yoolakela awe opuro woopacerya mmavekelo ahu, ninnooniherya wira ninnithokorerya itthu iyo okhala sootepa otthuneya.

13. Mavekelo ahu aviriheke okathi mikavi?

 ¹³ Aviriheke okathi mikavi mavekelo ahu? Biibiliya khonihimya etthu sa mwaha ola. Mavekelo ahu pooti ohipisa aahiiso opisa moovarihana ni mikhalelo sa okathi owo. Mwa ntakiheryo, mavekelo anipaka ahu nihinatthi olya pooti ohipisa, masi pooti opisa vaavo vanilavula ahu ni Yehova nimuleelaka myaha sahu aahiiso naamuxukhurelaka. (1 Samuweli 1:12, 15) Masi khivantthuneya opisiha mavekelo ahu niphavelaka owooniherya atthu akina, ntoko  siira aya atthu okathi wa Yesu. (Luka 20:46, 47) Yehova khonsiveliwa ni mavekelo moota owo. Masi etthu yootthuneya wa Yehova mavekelo anipakiwa ni murima wotheene.

14. Nivekeleke okathi mikavi, nto eyo enniixuttiha exeeni voohimya sa Yehova?

¹⁴ Nivekeleke ikwaha kavi? Yehova onninlattula olavulana okathi wotheene. Biibiliya onihimya wira: “Mulompeke”, ni “mulipiheryeke olompa”, ni “mulompeke vohihiyererya”. (Matheyo 26:41; aRoma 12:12; 1 aTesalonika 5:17) Okathi wotheene Yehova onninwiriyana mavekelo ahu. Hiyo pooti omuxukhurela Yehova mwaha wa oniphenta wawe ni onireerela wawe murima. Nave pooti onvekela malakiheryo, ikuru, ni wira onlipihe. Nto akhala wira ninnuupuwelela eparakha erina ahu ya onvekela Yehova, ninrowa waavyaka okathi wira nilavulane.

15. Xeeni vanitthuneya ahu wira “amen” wanikisa wa nivekelo?

 ¹⁵ Xeeni vaniira ahu “amen” wanikisa wa nivekelo? Nuulumo noowi “amen” nintaphulela “ekeekhai” aahiiso “ekhalé siso”. Eyo enooniherya wira ele ehimmye ahu munivekeloni, ti yeeyo, ni ekeekhai. (Esalimo 41:14) Nave, Biibiliya onniixuttiha wira ti vooloka wira “amen”, pooti okhala nivekelo nowiiwanyeya aahiiso noohiiwanyeya, wanikisa wa nivekelo nooniheryaka wira ninneemererya ele ehimmwale.​—1 Wahala 16:36; 1 aKorinto 14:16.

16. Niireke Yehova onnaakhula tthiri mavekelo ahu? Mutthokiherye.

¹⁶ Niireke Yehova onnaakhula tthiri mavekelo ahu? Aayo. Biibiliya onnimuhimya okhala ole ‘Oniwa mavekelo’. (Esalimo 65:3) Yehova onniwiriyana ni onnaakhula mavekelo anipakiwa ni murima wotheene a atthu imilyau sinceene; masi mwa inamuna soovirikana.

17. Yehova onirumeela sai malaikha aahiiso arumeyi awe wira aakhule mavekelo ahu?

¹⁷ Yehova onnirumeela malaikha ni arumeyi awe ari valaponi wira aakhule mavekelo ahu. (aHéberi 1:13, 14) Aakhala matakiheryo manceene a atthu yaale yaavekenle omwiiwexexa Biibiliya, nto moohipisa axukuriwa ni Namoona a Yehova. Biibiliya onnoonniherya wira malaikha anniirela mpantta muteko wa olaleya “ihapari sorera” onivariwa elapo yotheene. (Mmusome Wisupulula 14:6.) Nave anceene a hiyo nootoko onvekela Yehova voohimya sa muxankiho aahiiso etthu yaaphavela ahu, nto khukhaliheriwa ni munna wala murokora a mmulokoni.​—Miruku 12:25; Yakobo 2:16.

18. Yehova onivarihela sai muteko munepa awe wootteela ni Biibiliya wira aakhule mavekelo?

 ¹⁸ Yehova onnirumeela munepa awe wootteela wira aakhule mavekelo ahu. Vaavo vaninvekela ahu Yehova wira onikhaliherye oxintta mixankiho sahu, owo pooti orumeela munepa awe wootteela wira onivahe malakiheryo ni ikuru. (2 aKorinto 4:7) Nave Yehova onnimurumeela Biibiliya wira aakhule mavekelo ahu ni onikhaliherya opaka soothanla sooloka. Okathi onimusoma ahu Biibiliya, pooti ophwanya soolepa sinrowa onikhaliherya. Yehova onoowerya omwiiriha munna ohimya etthu yaaphavela ahu okathi onikomentari awe aahiiso mutokweene olavula etthu yoolipiha enikhuma mBiibiliyani.—aGalasia 6:1.

19. Xeeni vanikhala aya ntoko wira Yehova khonaakhula mavekelo ahu?

¹⁹ Okathi mukina, hiyo pooti wiikoha so: ‘Xeeni nlelo Yehova ohaakhunle awe mavekelo aka?’ Muupuweleke wira Yehova onnisuwela okathi ni moota wowaakhula mavekelo ahu. Nave onnisuwela ele enitthuneya wa hiyo. Tivonto, nihaana ovikaniha ovekela moohihiyererya nooniheryaka wira ninvekela ni ekeekhai ni wira ninnimwaamini. (Luka 11:5-10) Ikwaha sikina Yehova onnaakhula mavekelo ahu mwa enamuna yahaalipelela ahu. Mwa ntakiheryo, pooti onvekela mwaha wa muxankiho, masi ohiya omaliha muxankiho owo Muluku pooti onivaha ikuru wira niwerye ovilela.​—Mmusome aFilipi 4:13.

20. Xeeni vanitthuneya ahu onvekela Yehova khula okathi?

²⁰ Tthiri eparakha yuulupale erina ahu ya onvekela Yehova! Nikupaliki wira Yehova onniwiriyana mavekelo ahu. (Esalimo 145:18) Nto vaavo vanitepa ahu onvekela Yehova ni murima ahu wotheene, ninrowa otepaka olipiha ompatthani ahu ni yena.