1, 2. (a) Ligongo chichi lipopelo lili mtuka wapajika? (b) Ana ligongo chichi tukusosekwa kumanyilila yajikusasala Baibulo pakwamba ya lipopelo?

CHILAMBO chapasichi chili chamwana mnope pakuchilandanya ni mwinani. Yehofa pakwawona ŵandu pachilambo chapasichi, akusiŵawonaga mpela kadondo ka mesi kakutyochela mu m’lulo. (Salimo 115:15; Yesaya 40:15) Atamose kuti m’weji tuli ŵamwana mnope, lilemba lya Salimo 145:18, 19 likusati, “Yehofa ali pakuŵandika ni wosope ŵakusam’ŵilanga jwalakwe mu usyesyene. Jwalakwe akusiŵapaga ŵakusamjogopa yakumbila yawo. Akusapikana kugumila kwawo pakusaka chikamuchisyo, soni jwalakwe akusiŵakulupusya.” Welewutu uli upile wapenani mnope. Yehofa jwali Mkupanganya jwamachili gosope ni jwakusasaka kuti tuŵe najo paunasi. Jwalakwe akusasachililaga kupikanila mapopelo getu. Kusala yisyene lipopelo lili mtuka wapenani mnope wapeleche Yehofa kwa mundu jwalijose.

² Nambo kuti Yehofa apikanile mapopelo getu tukusosekwa kupopelaga m’litala lyakusalijitichisya jwalakwe. Ana mpaka tutende yeleyi chamtuli? Kwende tulole yajikusasala Baibulo panganiji.

3. Ana ligongo chichi akusosekwa kupopelaga kwa Yehofa?

³ Yehofa akusasaka kuti aŵechetaneje najo kupitila m’lipopelo. Ana tukumanyilila yeleyi chamtuli? Aŵalanje Afilipi 4:6, 7. Aganichisye yakutuŵenda palilembapa. Jwakulamulila jwa yakupanganyidwa yosope akusakola lung’wanu mnope ni wawojo, soni akusasaka kuti amsalileje jwalakwe yakusawusya yawo soni mwakupikanila mumtima.

4. Ana kupopela mwakutamilichika mpaka kulimbisye chamtuli unasi wetu ni Yehofa?

 ⁴ Lipopelo likusatukamuchisya kuti tuŵe paunasi wambone ni Yehofa. Naga ŵandu ŵali paunasi akusasalilana ndaŵi syosope nganisyo syawo, yakusyawusya yawo, soni mwakupikanila mumtima, unasi wawo ukusalimba mnope. Ni mwayikusaŵelasoni patukupopela kwa Yehofa. Jwalakwe kupitila m’Baibulo, akusatusalila nganisyo syakwe soni mwakusapikanila mumtima, akusasalasoni yachachitenda kusogoloku. Mpaka amsalile ya mumtima mwawo pakupopela mwakutamilichika. Pakutenda yeleyi, unasi wawo ni Yehofa uchiŵa wakulimba mnope.—Yakobo 4:8.

5. Ana tukumanyilila chamtuli kuti Yehofa jwangapikanila mapopelo gosope?

⁵ Ana Yehofa akusapikanila mapopelo gosope? Iyayi. Mundaŵi ja jwakulochesya Yesaya, Yehofa ŵasalile Ayisalayeli kuti, “Atamose apeleche mapopelo gejinji, une jwangagapikanila, ligongo makono gawo gagumbele ni miyasi.” (Yesaya 1:15) M’yoyo naga ngatukusamala, mpaka tutendeje yindu  yampaka yimtendekasye Yehofa kuti akapikanilaga mapopelo getu.

6. (a) Ana ligongo chichi chikulupi chili chakusosekwa mnope? (b) Ana mpaka alosye chamtuli kuti akwete chikulupi?

⁶ Naga tukusaka kuti Yehofa apikanileje mapopelo getu, tukusosekwa kumkulupilila. (Maliko 11:24) Ndumetume Paulo jwasasile kuti, “Naga ngakola chikulupi ngakomboleka kumsangalasya Mlungu, pakuti jwalijose jwakum’ŵandichila Mlungu, akwenela kulupilila kuti Mlungu apali nditu, soni kuti akusiŵapa mbote ŵandu ŵele ŵakusamsosa jwalakwejo.” (Ahebeli 11:6) Nambo kwamba kusalape kuti tukwete chikulupi nganikuŵa kwakwanila. Tukusosekwa kulosya chikulupi chetu pelanga mwa kumpikanila Yehofa lisiku lililyose.—Aŵalanje Yakobo 2:26.

7. (a) Ana ligongo chichi tukusosekwa kupopela mwakulinandiya soni mwauchimbichimbi kwa Yehofa? (b) Ana mpaka tulosye chamtuli kuti tuli ŵakuwona mtima patukupopela?

⁷ Tukusosekwa kupopela kwa Yehofa mwakulinandiya soni mwauchimbichimbi. Ligongo chichi tukusosekwa kutenda yeleyi? Mwambone, naga tukusaka kuŵechetana ni mwenye kapena pulesidenti, tukusatendaga yeleyo mwauchimbichimbi. Nambi kuli uli Yehofa jwali Mlungu Jwamachiligosope, ana nganiyiŵa yakupikanika kuti patukuŵechetana najo tutendeje yeleyo mwakulinandiya soni mwakumchimbichisya mnope? (Genesesi 17:1; Salimo 138:6) Patukupopela tukusosekwa kuŵa ŵakuwona mtima soni kupopela kutyochela pasi pamtima. Mpaka tutende yeleyi mwakuŵambala kwamba kwinjisya maloŵe mumtima ni kugasalaga mwakuwilisyawilisya, kapena kamulichisya masengo chiŵecheto changapikanika, soni kwamba kuŵalanga mapopelo kutyochela m’buku ja mapopelo.—Mateyu 6:7, 8.

8. Ana patuŵendile yine yakwe m’lipopelo, tukusosekwasoni kutenda chichi?

⁸ Chindu chine chatukusosekwa kutenda patukuŵenda chine chakwe mwipopelo, chili kutenda yindu yakamulana ni yatuŵendileyo. Mwambone, patum’ŵendile Yehofa yatukusosechela paumi wetu wa lisiku lililyose, tukajembecheya  kuti Yehofa chatupe yatuŵendileyo naga tukwamba kutama. Tukusosekwa kamula masengo mwakulimbichila soni kamula masengo galigose gampaka tukombole. (Mateyu 6:11; 2 Atesalonika 3:10) Nambosoni naga tum’ŵendile Yehofa kuti atukamucisye kuleka ndamo jine jakwe jakulemwecheka, tukusosekwa kuŵambala chilichose champaka chitulongolele kutenda chakulemwechekacho. (Akolose 3:5) Kwende sambano tulole yiwusyo yine yakusaliwusya ŵandu ŵajinji pangani ja lipopelo.

9. Ana tupopeleje kwa ŵani? Ana lilemba lya Yohane 14:6 likutujiganya chichi pakwamba ya lipopelo?

⁹ Ana tupopeleje kwa ŵani? Yesu ŵasalile ŵakulijiganya ŵakwe kupopela kwa “Atati ŵetu ŵakwinani.” (Mateyu 6:9) Jwalakwe ŵasasile soni kuti, “Une ndili litala, usyesyene, soni umi, pangali mundu jwakusayika kwa Atati ngapitila mwa une “ (Yohane 14:6) M’yoyo tukusosekwa kupopela kwa Yehofa kupitila mwa Yesu. Ana kupopela kupitila mwa Yesu kukusagopolela chichi? Kuti Yehofa ajanje mapopelo getu, tukusosekwa kuchimbichisya masengo gapajika gaŵapeleche Yehofa kwa Yesu. Mpela mwatulijiganyichisye, Yesu ŵayiche pachilambo chapasi kukutukulupusya ku ulemwa soni chiwa. (Yohane 3:16; Aloma 5:12) Yehofa ŵampelesoni Yesu udindo ŵakuŵa Jwamkulungwa jwa Ŵambopesi soni Jwakulamula.—Yohane 5:22; Ahebeli 6:20.

10. Ana tukusosekwa kola katame kapajika patukupopela? Alondesye.

¹⁰ Ana tukusosekwa kola katame kapajika patukupopela? Iyayi, Yehofa jwangatuŵendaga kuti tutindiŵaleje, tutameje kapena tujimeje patukupopela. Baibulo jikusatujiganya kuti mpaka tuŵechetane ni Yehofa mkatame kalikose kauchimbichimbi. (1 Mbili 17:16; Nehemiya 8:6; Daniele 6:10; Maliko 11:25) Chindu chakusosekwa mnope kwa Yehofa nganichiŵa katame ketu patukupopela, nambo jwalakwe akusasaka kuti tuŵechetaneje najo mwakuŵajilwa. Mpaka tupopeleje kanga mwakukoposya maloŵe kapena chamumtima pamalo galigose gatuli soni pandaŵi jilijose, kanga musi kapena  chilo. Patukupopela kwa Yehofa, tukakayichila kuti jwalakwe chachitupikana atamose kuti mundu jwine ngaŵa mkupikana.—Nehemiya 2:1-6.

11. Ana yindu yine yapi yampaka tumsalile Yehofa mwipopelo?

¹¹ Ana yindu yapi yampaka tumsalile Mlungu mwipopelo? Mpaka tumsalile Yehofa yiliyose yayili yakuŵajilwa kwa jwalakwe. Baibulo jikusati, “Chilichose champaka tum’ŵende mwakamulana ni yakusasaka jwalakwe, akusatupikanila.” (1 Yohane 5:14) Ana yili yakomboleka kumsalila yindu yawusyegwe mwipopelo? Elo. Kupopela kwa Yehofa kuŵeje mpela mwatukusatendela patukuŵechetana ni mjetu jwapamtima. Yehofa mpaka tumsalile chilichose chachili munganisyo mwetu soni mumtima mwetu. (Salimo 62:8) Mpaka tum’ŵende kuti atupe msimu wakwe weswela wawuli wamachili mnope kuti utukamuchisyeje kutenda yambone. (Luka 11:13) Mpakasoni tum’ŵende Yehofa lunda lwakutukamuchisya kusagula yakuŵajilwa, soni mpaka tum’ŵende kuti atupe machili gakutukamuchisya kupilila yakusyausya yatukusimana nayo. (Yakobo 1:5) Mpaka tum’ŵende Yehofa kuti atukululuchile yakulemwa yetu. (Aefeso 1:3, 7) Tukusosekwasoni kwapopelela ŵane, kupwatikapo ŵamwiŵasa mwetu soni abale ni alongo ŵa mumpingo.—Masengo 12:5; Akolose 4:12.

12. Ana chakusosekwa mnope m’mapopelo getu chiŵeje chichi?

¹² Ana chakusosekwa mnope m’mapopelo getu chiŵeje chichi? Chiŵeje Yehofa soni chakulinga chakwe. Tukusosekwa kum’yamichilaga Yehofa kutyochela pasi pamtima pa chilichose chatutendele. (1 Mbili 29:10-13) Tukusamanyilila yeleyi ligongo lyakuti Yesu paŵaliji pachilambo chapasi, ŵajiganyisye ŵakulijiganya ŵakwe mwampaka apopelele. (Aŵalanje Mateyu 6:9-13.) Jwalakwe jwasalile ŵakulijiganyawo kuti, chandanda apopeleje kuti lina lya Mlungu liswejesyedwe. Yeleyi yigopolela kuti tukusosekwa kuliwonaga lina lya Mlungu kuŵa lyapajika. Kaneko Yesu ŵasasile kuti tukusosekwa kupopelela Uchimwene wa Mlungu kuti uyiche, soni kuti lisosa lya Yehofa litendekwe pachilambo chosope chapasi. M’yoyo panyuma pakuti Yesu akolasile yindu yakusosekwa mnopeyi m’lipopelo lyakwe, kaneko ni piŵasalaga kuti tupopeleleje yindu  ya usyegwe. Naga tukuŵika Yehofa soni chakulinga chakwe pamalo gandanda m’mapopelo getu, tuchilosya yayili yakusosekwa mnope kwa m’weji.

13. Ana mapopelo getu galewupeje chamtuli?

¹³ Ana mapopelo getu galewupeje chamtuli? Baibulo jangasalaga chilichose panganiji. Kujigalila ni mwayiŵelele yindu pandaŵijo, mapopelo getu komboleka kuŵa gelewu kapena iyayi. Mwambone, mpaka tupeleche lipopelo lyejipi mkanitulye chakulya, soni lipopelo lyelewu patukum’yamichila Yehofa kapena kumsalila yayikutulagasya nganisyo.  (1 Samuele 1:12, 15) Ngatukusosekwa kupeleka mapopelo gakulilosya kwa ŵane, mpela muŵatendelaga ŵandu ŵa mundaŵi ja Yesu. (Luka 20:46, 47) Yehofa nganaŵa asangalele ni mapopelo mpela gelego. chakusosekwa mnope kwa Yehofa chili chakuti tupopeleje kutyochela mumtima.

14. Ana tukusosekwa kupopelaga kalingwa, soni ana yeleyi yikusatujiganya yamtuli pakwamba Yehofa?

¹⁴ Ana tukusosekwa kupopelaga kalingwa? Yehofa akusatusalila kuti tupopeleje kwa jwalakwe ndaŵi syosope. Baibulo jikusasala kuti “ajendelechele kupopela,” “alimbichile kupopela,” soni “akaleka kupopela.” (Mateyu 26:41; Aloma 12:12; 1 Atesalonika 5:17) Yehofa akusaŵa jwakoseka kutupikanila ndaŵi syosope. Mpaka tum’yamichileje jwalakwe lisiku lililyose ligongo lya chinonyelo soni koloŵa makono kwakwe. Mpakasoni tum’wende kuti atuloleleje, atulimbikasyeje soni kututondoya. Naga tukusawuwona upile ŵakupopela kwa Yehofa kuŵa ŵakusosekwa mnope, nikuti tuchiwukamulichisya masengo ndaŵi jilijose pakuŵecheta ni jwalakwe.

15. Ana ligongo chichi tukusosekwa kusala kuti “ame” pambesi pa lipopelo?

 ¹⁵ Ana ligongo chichi tukusosekwa kusala kuti “ame” pambesi pa lipopelo? Maloŵe gakuti “ame” gakusagopolela kuti “yisyene” kapena kuti “yiŵe m’yoyo.” Kusala kuti ame kukusalosya kuti tukusimichisya yatuŵechete mwipopelo kapena kuti tuŵechete yisyesyene yakutyochela mumtima. (Salimo 41:13) Baibulo jikusatujiganya kuti tukusosekwa kusala kuti “ame” chinga mwangakoposya maloŵe kapena mwakwesya maloŵe naga lili lipopelo lya pekuga pakulosya kuti tukamulana ni yaŵechete jwakupopelajo.—1 Mbili 16:36; 1 Akolinto 14:16.

16. Ana yili yisyene kuti Yehofa akusajangaga mapopelo getu? Alondesye.

¹⁶ Ana yili yisyene kuti Yehofa akusajangaga mapopelo getu? Elo akusajangaga. Baibulo jikusamkolanga kuti ‘jwakupikana lipopelo.’ (Salimo 65:2) Yehofa akusapikana soni akusajangaga mapopelo ga ŵandu ŵajinji. Jwalakwe akusajangaga mapopelo m’matala gakulekanganalekangana.

17. Ana Yehofa akusakamulichisya masengo chamtuli malayika soni ŵakutumichila ŵakwe ŵapachilambo chapasi pakwanga mapopelo getu?

¹⁷ Yehofa akusakamulichisya masengo malayika soni ŵakutumichila ŵakwe ŵapachilambo chapasi pakwanga mapopelo getu. (Ahebeli 1:13, 14) Pana yisyasyo yejinji ya ŵandu ŵaŵapopesile pakusaka kuti ajipikanichisye chenene Baibulo. Ali apopesile nganipajigala ndaŵi jelewu, Jwamboni sya Yehofa jwayiche ni kwakamuchisya. Baibulo jikusalosya kuti malayika gakusajigala nawo mbali pamasengo gakulalichila “ngani syambone” pachilambo chosope chapasi. (Aŵalanje Chiwunukuko 14:6.) Soni ŵane mwa m’weji panyuma pakupopela kwa Yehofa pakwamba ya chakusawusya chinechakwe, kapena yakusosechela yine, twapochele chikamuchisyo kutyochela kwa m’bale kapena mlongo jwachiklistu.—Misyungu 12:25; Yakobo 2:16.

18. Ana Yehofa akusakamulichisya masengo chamtuli msimu weswela soni Baibulo pakwanga mapopelo getu?

 ¹⁸ Yehofa akusakamulichisya masengo msimu wakwe weswela pakwanga mapopelo getu. Patum’ŵendile kuti atukamuchisye kulimbana ni chakusawusya chine, jwalakwe mpaka akamulichisye masengo msimu wakwe weswela kuti utulongolele soni kutulimbikasya. (2 Akolinto 4:7) Yehofa akusakamulichisya soni masengo Baibulo pakwanga mapopelo getu, soni pakutukamuchisya kuti tusagule yindu mwalunda. Patukuŵalanga Baibulo, mpaka tupate malemba gakutukamuchisya. Yehofa mpaka amtendekasye mundu jwine jwakwanga pa misongano kusala yindu yatukusosechela. Yehofa mpaka amtendekasyesoni jwamkulungwa jwa mumpingo kusala songa jakamuchisya kutyochela m’Baibulo.—Agalatiya 6:1.

19. Ligongo chichi ndaŵi sine mpaka yiwoneche kuti Yehofa nganajanga mapopelo getu?

¹⁹ Nambo ndaŵi sine mpaka asimonjeje kuti, ‘Ana ligongo chichi Yehofa ngakwanga mapopelo gangu?’ Tukaliŵalila kuti Yehofa akusamanyililaga ndaŵi soni mwampaka ajanjile mapopelo getu. Jwalakwe akusamanyilila yatukusosechela. Ndaŵi sine mpaka tusosekwe kupitilisya kupopela kwakandaŵi pakusaka kusimichisya kuti tukusosechela kwene yatukuŵendayo soni kulosya kuti tukusamkulupilila mnope jwalakwe. (Luka 11:5-10) Ndaŵi sine Yehofa mpaka ajanje mapopelo getu m’litala lyanganitulijembecheyaga. Mwambone, komboleka kum’ŵenda kuti atukamuchisye pa chakusawusya chine chakwe, nambo m’malo mwakututyochesya chakusawusyacho, jwalakwe mpaka agambe kutupa machili gakutukamuchisya kuti tupilile chakusawusyacho.—Aŵalanje Afilipi 4:13.

20. Ana ligongo chichi tukusosekwa kupopela kwa Yehofa ndaŵi ni katema?

²⁰ Kupopela kwa Yehofa uli upile wapenani mnope. Tukakayichilaga kuti jwalakwe akusapikana mapopelo getu. (Salimo 145:18) Patukupopela kwa Yehofa ndaŵi ni katema, nikuti unasi wetu ni jwalakwe uchiŵa ŵakulimba mnope.