1. ¿Kunsa Biblian cheqa yatichäwinakap yateqasajj jisktʼasisma?

 AKA libronjja, kunjamas jutïrin wiñay jakasjjañäni, jiwatanakajj kunjamäsipkisa, jiwatanakajj jaktanipjjaniti janicha ukanakatwa yateqawaytajja (Eclesiastés 9:5; Lucas 23:43; Juan 5:28, 29; Apocalipsis 21:3, 4). Inas Jehová Diosan Testigonakapan tantachäwinakaparus sarjjaraksta. Ukanjja kunjamsa Bibliarjam sarnaqapjje uksa amuyarakpachätawa (Juan 13:35). Jehová Diosampis sum apasjjarakpachätajja,  inas jupar serviñsa amtjjaraksta. Ukatwa akham sasin jisktʼasisma: “¿Kunsa Jehová Diosar serviñatakejj lurañaja?” sasa.

2. ¿Kunatsa mä etíope jaqejj bautisasiñ munäna?

² Jesusajj aka oraqenkkäna uka urunakan jakir mä etíope jaqejj ukhamarakiw jisktʼasïna. Jesusajj jiwatat jaktayatäkäna uka qhepatwa Felipejj etíope jaqerojj Mesiasat yatiyäna. Kuntï Felipejj yatichkäna ukajj chuymaparuw purtʼäna, ukatwa akham säna: “¡Uñtam! Akajjay umajja, ¿kunarak nayan bautisasiñajatak jarkʼitaspasti?” sasa (Hechos 8:26-36).

3. 1) ¿Kun lurapjjañapsa Jesusajj discipulonakapar mayïna? 2) ¿Kunjamsa maynejj bautisasiñapa?

³ Jehová Diosar serviñatakejj bautisasiñaw wakisi sasaw Bibliajj yatichi. Jesusajj discipulonakapar akham sänwa: “Taqe markankir jaqenakar nayan discipulojar tukuyapjjam, bautisapjjam” sasa (Mateo 28:19). Jesusas ukhamarakiw bautisasïna. Bautisaskäna ukhajja, janiw pʼeqetak umampi chʼalljjatatäkänti, jan ukasti umar qʼala chhaqtayatänwa (Mateo 3:16). Jichhürunakanjja, khitinakatï bautisasipki ukanakajj ukhamarakiw umar chhaqtayatäpjjañapa.

4. ¿Kunsa maynejj bautisasisajj taqenir uñachtʼayi?

⁴ Bautisasisajja, maynejj Jehová Diosan amigopäñ munatapa, jupar serviñ munatapwa taqe jaqenakar uñachtʼayi (Salmo 40:7, 8). Ukatwa jumajj akham sasin jisktʼaspachäta: “¿Kunsa bautisasiñatakejj lurañaja?” sasa.

5. 1) ¿Kunsa bautisasiñatakejj lurañama? 2) ¿Kunatsa tantachäwinakar sarañajj wali wakiskirejja?

⁵ Bautisasiñatakejja, Jehová Diosampiru Jesusampiruw  uñtʼañama. Jumajja, Bibliat yateqañ qalltkayäta ukhat aksaruw jupanakar uñtʼasktajja (Juan 17:3 liytʼañataki). Ukampis janiw ukakejj wakiskiti. Biblianjja ‘Jehová Diosan munañap sum yatipjjañamawa’ sasaw sistu (Colosenses 1:9). Jehová Diosan Testigonakapan tantachäwipar sarañaw Diosar jakʼachasiñatakejj yanaptʼätam. Ukatwa uka tantachäwinakarojj jan faltasisa sarañama (Hebreos 10:24, 25).

6. ¿Bautisasiñatakejj Bibliat taqpach yatiñamat wakisi?

⁶ Jehová Diosajja, janïr bautisaskasin Bibliat taqpach yatiñam janiw suykiti. Etiopía markankir jaqet amtañäni, Diosajj janiw juparojj janïr bautisaskipan Bibliat taqpach yatiñap maykänti (Hechos 8:30, 31). Jehová Diosar uñtʼañajj janiw tukuskaniti, jutïrinsa jupat yateqaskakiñäniwa (Eclesiastés 3:11). Ukampis bautisasiñatakejja, Biblian cheqa yatichäwinakap yatiñamawa, uka yatichäwinakarus creyiñamarakiwa (Hebreos 5:12).

7. ¿Kunjamsa Bibliat yatjjatañajj yanaptʼawaytam?

⁷ Bibliajj akham siwa: “Maynitejj Diosar jan confiykaspajja, janiw kunäkipansa Diosarojj kusisiykaspati” sasa (Hebreos 11:6). Ukhamasti bautisasiñatakejj Jehová Diosar confiyañamaw wakisi. Corinto markan jakasir jaqenakat parltʼañäni, jupanakat yaqhepajj Jesusan discipulonakapan yatiyäwinakap istʼasajj “creyiñ qalltapjjäna, ukatjja bautisasipjjänwa” (Hechos 18:8). Bibliat yatjjatañajj ukhamarakiw jumarojj Jehová Diosan arsutanakaparu, Jesusan jaqenak layku jiwataparu confiyañatak yanaptʼawaytamjja. Jesusan jaqenak layku jiwatap toqekiw juchampita jiwañampita salvatäsna (Josué 23:14; Hechos 4:12; 2 Timoteo 3:16, 17).

8. ¿Kunas Bibliat yaqhanakar parlañatakejj yanaptʼätam?

⁸ Bibliat jukʼamp yatjjatasajja, kunjamsa Bibliajj jakäwiman yanaptʼtam ukwa amuyäta, ukaw Diosar jukʼamp confiyañatak yanaptʼarakïtam. Kuntï Biblian yateqkta ukanakatsa yaqhanakar parlañwa munarakïta (Jeremías 20:9; 2 Corintios 4:13). ¿Khitinakarus parlasma?

9, 10. 1) ¿Khitinakampis Bibliat parlasma? 2) ¿Kunsa jilat kullakanakampi chika yatiyañatakejj lurañama?

⁹ Kuntï Bibliat yateqkta ukanakatjja, inas familiamaru, amigonakamaru, vecinonakamaru, trabajir masinakamaru parlañ munchïta. Ukham lurañ munatamajj waliwa, ukampis amtapunim, wali munasiñampiw parltʼañama. Qhepatjja, jilat kullakanakampiw yatiyir mistjjarakïta. Wakichtʼatäjjäta ukhajja, “jilat kullakanakamp chikaw yatiyir sarañ munta” sasaw Bibliat yatichirimar sasma. Yatichirimatï wakichtʼatätamsa, Bibliarjam sarnaqatamsa amuyanejja, congregacionankir pä jilïr irpirinakampiw parltʼapjjäta.

¹⁰ ¿Kuna toqetsa jilïr irpirinakampejj parltʼapjjäta? Jupanakajja, Biblian cheqa yatichäwinakapar creytati, uka yatichäwinak sumti amuyta uka toqenakatwa jumamp parltʼapjjani. Bibliarjamat sarnaqaskta janicha, cheqapunit Jehová Diosan Testigopañ munta uka toqenakatwa jumampi parltʼapjjarakini. Jilïr irpirinakajj jilat kullakanakat wal llakisipjje, jumatsa llakisipjjarakiwa. Ukhamajj jupanakampi parltʼañ jan ajjsaramti (Hechos 20:28; 1 Pedro 5:2, 3). Parlañ tukuyatarojja, jilat kullakanakamp chika yatiyir mistütati janicha ukjja jilïri irpirinakaw yatiyapjjätam.

11. ¿Kunatsa yatiyir mistuñatakejj jan walinak jaytañamajj wakisi?

 ¹¹ Jilat kullakanakampi chika janïr yatiyir mistkasajja, jan walinak jaytañamaw wakisi sasin inas jilïr irpirinakajj sapjjchïtam. ¿Kunatsa jan walinak jaytañamajj wakisi? Jaqenakar yatiyir sarasajja, Jehová Diosan sutip aptanjja, ukhamarus sarnaqatasajj Jehová Diosaruw jachʼañchañapa, ukatwa jan walinak jaytañamajj wakisi (1 Corintios 6:9, 10; Gálatas 5:19-21).

12. ¿Kunatsa taqenis arrepentisiñasa?

¹² ¿Kunampsa bautisasiñatakejj lurañama? Apóstol Pedrojj sänwa: “Arrepentisipjjam, kuttʼanjjapjjarakim juchanakamajj qʼomachatäñapataki” sasa (Hechos 3:19). Arrepentisiñajja, jan wali luratanakat chuym usuyasiña sañ muni. Amuytʼañataki, jumatï qʼañu juchanak lurawaystajja, taqe chuymaw arrepentisiñama. Sum sarnaqañatakejj walsa chʼamachaskstajja, arrepentisiñamajj wakisikipuniniwa. ¿Kunatsa ukham sistanjja? Taqeniw pantjasirïtanjja, ukatwa Diosar perdón mayisiñajj wakisi (Romanos 3:23; 5:12).

13. ¿‘Kuttʼanjjaña’ arojj kamsañsa muni?

¹³ Jan wali luratanakasat janiw aleqakejj chuym usuyasiñasäkiti. Jan ukasti ‘kuttʼanjjañasawa’ sasaw apóstol Pedrojj säna. Kuttʼanjjaña arojja, jan walinak jaytasin kunatï cheqapäki uk lurjjaña sañwa muni. Amuytʼañataki, mä jan uñtʼat cheqarus viajkasma ukham sañäni. Sarkasinjja, akatjamatwa yaqha cheqar saraskatam amuyasisma. ¿Kunsa ukhajj lurasma? Janiw jukʼamp sarjjasmati, kuttʼanjjasmawa. Niya ukhamarakiw Bibliat yatjjatkasajj jumamp pasaspa, yatjjatkasinjja jan wali costumbrenaka, jan wali lurañanaka jaytañ wakisitapwa amuyasma. Ukhamächi ukhajja,  ‘kuttʼanjjañamawa’, mä arunjja jan walinak apunukusin kunatï cheqapäki ukanakwa lurjjañama.

14. ¿Kunjamsa Diosarojj vidam katuyasiñama?

¹⁴ Bautisasiñatakejj Jehová Diosaruw vidam katuyasiñamaraki. ¿Kunjamsa katuyasisma? Mä oracionanwa Jehová Diosarojj jumarukiw servïma, munañam lurañaw jakäwijan nayrankani sasin sañama (Deuteronomio 6:15).

15, 16. ¿Kunas Diosar vidap katuyasiñatakejj maynir yanaptʼaspa?

¹⁵ Jumarukiw servïma sasin Jehová Diosar sañajja, maynirus jumampikiw jiwañkam jakasï sisksna ukamp sasiwa. Amuytʼañatakejj casarasiñataki parlata mä waynampita tawaqompit parltʼañäni. Waynajj tawaqor jukʼamp uñtʼjjasajja, jukʼampiw tawaqor munasi, ukatwa jupampi casarasiñ amtaraki. Casarasiñ amtañajj janis aleq ukhamakïkchejja, waynajj tawaqor wal munasitap laykuw jupampi casarasiñ amti.

¹⁶ Jehová Diosat jukʼamp yateqasajja, jukʼampiw jupar munasïta, jupar serviñatakis wal chʼamachasirakïta. Ukatsti mä oracionanwa Jehová Diosarojj jumarukiw serviñ munsma sasin sarakïta. Biblianjja, khitinakatï Jesusan discipulopäñ munapki ukanakajja, ‘jupa pachpat armtʼasipjjañapawa’ sasaw qhanañchi (Marcos 8:34). ¿Ukajj kamsañsa muni? Jehová Diosar istʼañaw vidaman nayrankañapa, ukwa uka arunakajj sañ muni. Munañas lurañat sipansa, Jehová Diosan munañap lurañaw nayrankañapa (1 Pedro 4:2 liytʼañataki).

17. ¿Kunatsa yaqhepajj Diosar jakäwip katuyasiñ ajjsarapjje?

¹⁷ Yaqhepajja, janiw arsutaj phoqañ puedkäti sasaw  ajjsarayasipjje, ukatwa Diosarojj jakäwip jan katuyasipkiti. Pantjasiristwa sapjjewa. Diosarutï jan katuyaskäjja, janiw jan wali luratanakajat cuenta churañajajj wakiskaniti sapjjarakiwa.

18. Pantjasiristwa sasin jan ajjsarañatakejja, ¿kunas yanaptʼätam?

¹⁸ Jehová Diosar munasiñaw jan ajjsarañatak yanaptʼätam. Uka munasiñaw arsutam phoqañatakis yanaptʼarakïtam (Eclesiastés 5:4; Colosenses 1:10). Jehová Diosan munañaparjam sarnaqañajj wali chʼamäkaspas ukham janirakiw amuykätati. Apóstol Juanajj akham sänwa: “Jiwasatejj Diosar munasstan ukhajja, mandamientonakap phoqarakiñäniwa, mandamientonakap phoqañajj janiw chʼamäkiti” sasa (1 Juan 5:3).

19. ¿Kunatsa Jehová Diosaru jakäwim katuyasiñ jan ajjsarañamäki?

¹⁹ Jehová Diosar jakäwim katuyasiñatakejj janiw perfecto jaqëñamajj wakiskiti. Jehová Diosajj janipuniw kuntï jan lurirjamäkta uk maykätamti (Salmo 103:14). Jupaw cheqaparjam sarnaqañatak yanaptʼätam (Isaías 41:10). Jehová Diosaru taqe chuyma confiyam, “jupajj cheqa thakinjamwa irpaskätam” (Proverbios 3:5, 6).

20. ¿Kunsa Jehová Diosar jakäwim katuyasjjasajj lurañama?

²⁰ ¿Jehová Diosaru jakäwim katuyasiñatakejj wakichtʼatäjjtati? Jehová Diosar jakäwim katuyasjjasinjja, bautisasjjasmawa.

21, 22. ¿Kunjamsa ‘lakamampi’ arsusajj Diosar confiyatam uñachtʼayasma?

²¹ Congregacionaman jilïr irpirinakar pʼeqtʼki uka jilataruw bautisasiñwa munta sasin sañama. Jupaw mä qhawqha jilïr irpirinakar jumamp parltʼapjjañapataki  sani. Jupanakajja, Biblian cheqa yatichäwinakapatwa jumamp parltʼapjjani. Jupanakatï bautisasiñatak wakichtʼatätam amuyapjjani ukhajja, jutïr jachʼa tantachäwin bautisasjjasmawa sasaw sapjjätam. Uka jachʼa tantachäwinjja, mä jilataw kunatsa bautisasiñajj wali wakiskirejja uka toqet mä discurson qhanañchtʼani. Ukjjarojja, pä jisktʼanakwa jisktʼarakini, ukarusti bautisasirinakaw jaysapjjañapa.  Uka jisktʼanakar jaysasajja, ‘lakamampi’ arsusaw Diosar confiyatam uñachtʼayäta (Romanos 10:10).

²² Ukjjarojj bautisasjjätawa. Umaruw taqpach cuerpom chhaqtayapjjani. Bautisasitamajja, Jehová Diosar katuyasitama, Jehová Diosan Testigopätamwa uñachtʼayani.

23. ¿“Awkina, Yoqana, espíritu santon” sutipjjaru bautisasiñajj kamsañsa muni?

²³ Discipulonakajajj “Awkina, Yoqana, espíritu santon” sutipjjaruw bautisasipjjani sasaw Jesusajj säna (Mateo 28:19 liytʼañataki). ¿Jesusan uka arunakapajj kamsañsa munpacha? Jehová Diosajj taqe chʼamanïtapa, kunjamsa Jesusajj Jehová Diosan amtap phoqasiñapatakejj yanaptʼi, kunjamsa Jehová Diosajj espíritu santop taypejj amtanakap phoqe ukanakar taqe chuyma confiyatamwa bautisasisajj uñachtʼaytajja (Salmo 83:18, NM; Mateo 28:18; Gálatas 5:22, 23; 2 Pedro 1:21).

24, 25. 1) ¿Bautisasitamajj kunsa uñachtʼayi? 2) ¿Kuna toqetsa qhep qhepa yatichäwin yatjjataskañäni?

²⁴ Bautisasitamajj wali wakiskir mä uñachtʼäwiwa. Umar chhaqtatamajja nayra sarnaqäwim jaytatam uñachtʼayi. Umat mistutamasti Diosan munañap lurañ qalltatam uñachtʼayaraki. Ukürutjja Diosan munañap lurañatakiw jakjjäta. Ak amtapunim, jakäwimjja janiw mä jaqerusa, mä institucionarusa ni mä trabajorus katuyasktati, jan ukasti Jehová Diosaruw katuyastajja.

²⁵ Jehová Diosar katuyasitamajja, jupamp sum apasiñatakiw yanaptʼätam (Salmo 25:14). Bautisasisajja maynejj salvasjjaspasa ukham janiw sañ munkiti. Apóstol Pablojj akham qellqäna: “Salvasiñatakejj ajjsartʼasa khatattʼasa jukʼamp chʼamachasisipkakim” sasa (Filipenses 2:12). Bautisasisajj Diosar serviñwa qallttajja. Ukampis ¿kunsa Jehová Diosat jan jitheqtañatakejj lurasma? Uka toqetwa qhep qhepa yatichäwin yatjjataskañäni.