1. Finshi ifyo mufwile ukutontonkanyapo pa numa ya kusambilila ifyaba muli cino citabo?

MULI cino citabo, mwalisambilila ifintu ifingi pamo nga umweo wa muyayaya uo Lesa atulaya, pa fyo umuntu aba nga afwa e lyo na pe subilo lya kubuushiwa. (Lukala Milandu 9:5; Luka 23:43; Yohane 5:28, 29; Ukusokolola 21:3, 4) Limbi mwalitampa no kulongana ne Nte sha kwa Yehova kabili mwalisumina no kuti bapepa Lesa ukulingana ne fyo afwaya. (Yohane 13:35) Nalimo bucibusa bwenu na Yehova bwalikoselako kabili mwalisalapo no kuti mwakulamubombela. E ico kuti mwayipusha  amuti, ‘Bushe finshi mfwile ukulacita pa kuti ndebombela Lesa?’

2. Cinshi calengele umwaume umwina Etiopia afwaye ukubatishiwa?

² Ifi fine e fyatontonkenye umwina Etiopia uwaliko ilyo Yesu ali pano calo. Ilyo papitile inshita iinono ukutula apo Yesu abuushiwe, Filipi umusambi wa kwa Yesu alibilile imbila nsuma kuli uyu mwaume. Filipi alimwafwile ukushininkisha ukuti cine cine Yesu e Mesia. Umwaume umwina Etiopia alitemenwe sana ifyo asambilile ica kuti ilyo line fye atile: “Mona amenshi aya; cinshi cilendesha ukubatishiwa?”—Imilimo 8:26-36.

3. (a) Lifunde nshi Yesu apeele abasambi bakwe? (b) Bushe umuntu afwile ukubatishiwa shani?

³ Baibolo isambilisha ukuti, nga mulefwaya ukulabombela Yehova mumfwile fye ukubatishiwa. Yesu aebele abasambi bakwe ati: ‘Kalengeni aba nko shonse ukuba abasambi, mulebabatisha.’ (Mateo 28:19) Yesu nao wine alibatishiwe. Tabamusanshile fye amenshi pa mutwe lelo balimutubike mu menshi. (Mateo 3:16) Kanshi, na ino ine nshita ilyo umwina Kristu alebatishiwa afwile ukutubikwa mu menshi.

4. Finshi ulubatisho lwenu lulangilila?

⁴ Nga mwabatishiwa, ninshi mulelangilila ukuti mulefwaya ukuba cibusa wa kwa Lesa kabili mulefwaya ukulamubombela. (Amalumbo 40:7, 8) Kanshi kuti mwayipusha amuti ‘Finshi mfwile ukucita pa kuti mbatishiwe?’

5. (a) Cinshi mufwile ukubalilapo ukucita ilyo mushilabatishiwa? (b) Mulandu nshi ukulongana ne Nte sha kwa Yehova kwawamina?

⁵ Ilyo tamulabatishiwa mufwile mwaishiba Yehova na Yesu. Apo mwalitendeka ukusambilila Baibolo ninshi mwalitampa ukubeshiba. (Belengeni Yohane 17:3.) Lelo  te kusambilila fye Baibolo epela. Baibolo itila mufwile ‘ukwisushiwamo ukwishiba’ ukufwaya kwa kwa Yehova. (Abena Kolose 1:9) Ukulalongana ne Nte sha kwa Yehova kukamwafwa ukukwata bucibusa ubwakosa na Yehova. Uyu e mulandu mufwile ukulalonganina lyonse.—AbaHebere 10:24, 25.

6. Finshi ifyaba muli Baibolo ifyo mulingile mwaishiba ilyo mushilabatishiwa?

⁶ Kwena Yehova tenekela ukuti mwishibe fyonse ifyaba mu Baibolo ilyo mushilabatishiwa. Taleenekela na ulya umwaume umwina Etiopia ukwishiba fyonse ilyo ashilabatishiwa. (Imilimo 8:30, 31) Tukatwalilila fye ukusambilila pali Lesa. (Lukala Milandu 3:11) Lelo, nga mulefwaya ukubatishiwa mufwile mwasambilila amasambililo ya kutendekelapo aya mu Baibolo kabili mufwile no kusumina ukuti aya masambililo ya cine.—AbaHebere 5:12.

7. Bushe ukusambilila Baibolo kwamwafwa shani?

⁷ Baibolo itila: “Ukwabula icitetekelo te kuti tusekeshe Lesa.” (AbaHebere 11:6) Kanshi ilyo mushilabatishiwa, mufwile ukutetekela Yehova. Baibolo itweba ukuti ilyo abantu bamo abaleikala mu musumba wa Korinti baumfwile ifyo abasambi ba kwa Yesu balesambilisha, “balitetekele no kubatishiwa.” (Imilimo 18:8) Apo na imwe mulasambilila Baibolo mwalitetekela mu malayo ya kwa Lesa na mu maka ayo ilambo lya kwa Yesu lyakwata aya kutulubula ku lubembu ne mfwa.—Yoshua 23:14; Imilimo 4:12; 2 Timote 3:16, 17.

8. Cinshi cikalenga mukalefwaya ukwebako abantu ifyo mulesambilila?

⁸ Nga mulesambilila Baibolo no kumona ifyo ilemwafwa, icitetekelo cenu cikakoselako. Mukalafwaya no kwebako abantu ifyo mulesambilila.  (Yeremia 20:9;  2 Abena Korinti 4:13) Nomba ni bani abo mufwile ukwebako?

9, 10. (a) Ni bani mwingabalilapo ukushimikilako ifyo mulesambilila? (b) Finshi ifyo mufwile ukucita nga mulefwaya ukulabomba umulimo wa kushimikila abantu imbila nsuma pamo ne cilonganino?

⁹ Nalimo kuti mwafwaya ukwebako balupwa wenu, ifibusa, abena mupalamano, ne lyo abo mubomba nabo ifyo mulesambilila. Ukucita ifi kusuma nomba mufwile ukuba ne cikuuku no kubalanga ukuti mwalibatemwa. Lyena mukatampa ukulashimikila abantu imbila nsuma pamo na bakasabankanya mu cilonganino. Nga mwamona ukuti namufikapo ukulashimikilako abantu imbila nsuma, kuti mwaebako Inte uumusambilisha Baibolo ukuti mulefwaya ukulabomba umulimo wa kushimikila ne cilonganino. Uumusambilisha nga amona ukuti namufikapo ukulabila imbila nsuma no kuti mulakonka na mafunde ya mu Baibolo, lyena bonse babili mukayalanshanya na baeluda babili aba mu cilonganino mwaba.

¹⁰ Finshi mukayalanshanya na baeluda? Baeluda bakafwaya ukumona nga mwalyufwikisha ifyo musambilila, nga mwalisumina ukuti amasambililo ya kutendekelapo aya mu Baibolo ya cine, nga mulakonka ifyo Baibolo ilanda kabili nga ca kuti cine cine mulefwaya ukuba Inte ya kwa Yehova. E ico mwilaumfwa umwenso ukulanda na baeluda pantu balasakamana bonse aba mu cilonganino ukubikako fye na imwe bene. (Imilimo 20:28; 1 Petro 5:2, 3) Nga mwalanshanya na baeluda, bakamweba nga kuti mwatendeka ukulashimikila abantu imbila nsuma pamo ne cilonganino nelyo iyo.

11. Cinshi mulingile ukwalukila muli fimo ilyo mushilatendeka ukushimikila abantu imbila nsuma pamo ne cilonganino?

¹¹ Baeluda kuti bamweba ukuti mufwile ukwaluka  muli fimo ilyo mushilatendeka ukubombela pamo ne cilonganino. Mulandu nshi mufwile ukwalukila muli fimo? Pantu tusambilisha abantu pali Lesa, twimininako Yehova kabili tufwile ukulacita ifintu ifilanga ukuti twalicindika Yehova.—1 Abena Korinti 6:9, 10; Abena Galatia 5:19-21.

12. Mulandu nshi abantu bonse bafwile ukulapila?

¹² Kuliko na fimbi ifyo mufwile ukucita ilyo mushilabatishiwa. Umutumwa Petro atile: “Lapileni, no kwalukila kuli Lesa pa kuti imembu shenu shifuutwe.” (Imilimo 3:19) Bushe ukulapila calola mwi? Ukulapila kumfwa ububi sana pa fibi ifyo twalecita no kukanabwekeshapo. Ku ca kumwenako, nga mwalecita ubulalelale mulingile ukulapila. Na kabili, nangu ca kuti mulabombesha ukucita ifisuma, mulingile fye ukulapila, pantu bonse tulalufyanya kabili tufwile ukulomba Lesa ukuti atwelele imembu shesu.—Abena Roma 3:23; 5:12.

13. Bushe “ukwaluka” calola mwi?

¹³ Bushe ukumfwa fye ububi pa fyo twalecita e cifwaikwa fye? Awe. Petro atile mulingile “ukwaluka.” Ukwaluka cipilibula ukuleka fyonse ifibi ifyo mwalecita no kutendeka ukucita ifisuma. Natulangilile, elenganyeni ukuti muleya ku ncende iyo mushatala amuyako. Ilyo mwaendako panono mwamona ukuti na muluba. Kuti mwacita shani? Ukwabula no kutwishika tamwakatwalilile ukuya, mukapilibuka no kutendeka ukubwelela ku numa pa kuti mukonke inshila iingamutungulula uko mulefwaya ukuya. Na imwe bene, ilyo mulesambilila Baibolo mukasanga ukuti kuli ifintu fimo ifibi ifyo mwalecita ifyo mulingile ukuleka. E ico mufwile fye “ukwaluka,” e kutila ukuleka ukulacita ifyabipa no kutampa ukulacita ifisuma.

14. Finshi mufwile ukucita pa kuipeela kuli Lesa?

¹⁴ Na cimbi icacindama ico mufwile ukucita ilyo mushilabatishiwa kuipeela kuli Yehova. Pa kuipeela kuli Yehova, mufwile ukumweba mwi pepo ukuti e o mukulapepa fye eka kabili ukucita ukufwaya kwakwe e cikacindama mu bumi bwenu.—Amalango 6:15.

15, 16. Cinshi cilenga ukuti umuntu aipeele kuli Lesa?

¹⁵ Ukulaya Yehova ukuti e o mukulabombela fye, cimo no kulaya umuntu uo mwatemwa ukuti mukatwalilila ukuba pamo nankwe mpaka ne mfwa. Tutile umwaume no mwanakashi baleishishanya. Nga ca kuti umwaume aishiba bwino umwanakashi, amona no kuti imibele yakwe isuma, alamutemenwako ica kuti amweba no kuti bakopane. Nangu ca kuti ukupingulapo ukuupa calyafya, umwaume alaipeelesha pantu alitemwa umwanakashi.

¹⁶ Nga mulesambilila pali Yehova, mukamutemwa kabili mukalafwaya fye ukulamubombela. Ukucita ifi kukalenga mukamulaye mwi pepo ukuti mwakulamubombela. Baibolo itweba ukuti onse uulefwaya ukukonka Yesu afwile “aikaane umwine.” (Marko 8:34) Bushe amashiwi ya kuti “aikaane umwine” yalola mwi? Yalola mu kuti ukumfwila Yehova e cintu icifwile ukucindamisha kuli imwe. Ifyo Yehova afwaya e fifwile ukucindama sana ukucila ne fintu ifyo mwe bene mufwaya ukucita. —Belengeni 1 Petro 4:2.

17. Mulandu nshi abantu bamo batiinina ukuipeela kuli Yehova?

¹⁷ Abantu bamo balatiina ukuipeela kuli Yehova, pantu bamona ukuti nalimo te kuti batwalilile ukulamubombela. Batontonkanya ukuti nga tabaipeele  kuli Yehova, nangu bengacita shani ifintu ifibi, takabafulilwe.

18. Cinshi cikamwafwa ukukanaba no mwenso wa kuti nalimo mukalacita ifintu ifingakalifya Yehova?

¹⁸ Nga mwalimutemwa Yehova tamwakulatiina ukuti nalimo mukacita ifintu ifikamukalifya, lelo mukalabombesha pa kuti mukatwalilile aba cishinka kuli ena. (Lukala Milandu 5:4; Abena Kolose 1:10) Tamwakalemona ukuti calyafya sana ukucita ukufwaya kwa kwa Yehova. Umutumwa Yohane atile: “Uku e kutemwa Lesa, ukuti tulekonka amafunde yakwe; kabili amafunde yakwe taya-afya.”—1 Yohane 5:3.

19. Mulandu nshi mushilingile ukutiinina ukuipeela kuli Yehova?

¹⁹ Tamufwile ukuba abapwililika pa kuti muipeele kuli Yehova. Na kuba, Yehova tatwenekela ukucita ifintu ifyo tushingacita. (Amalumbo 103:14) Akulamwafwa ukucita ifyalungama. (Esaya 41:10) E ico tetekeleni Yehova no mutima wenu onse kabili ‘na o akatambalika inshila shenu.’—Amapinda 3:5, 6.

20. Cinshi cimbi ico mufwile ukucita nga mwaipeela kuli Lesa?

²⁰ Bushe muleumfwa ukuti namufikapo ukuipeela kuli Yehova? Nga mwaipeela kuli Yehova ninshi namulinga ukucita icintu na cimbi icacindama. Mufwile ukubatishiwa.

21, 22. Finshi mufwile ukucita pa ‘kuisosela mwe bene’ ukuti mwalitetekela Yehova?

²¹ Ebeni kampanya we bumba lya baeluda mu cilonganino mwaba ukutila namuipeela kuli Yehova no kuti mulefwaya ukubatishiwa. Lyena kampanya akeba baeluda bamo ukumupitulusha mu masambililo ya kutendekelapo aya mu Baibolo. Baeluda nabo nga  basuminishanya ukuti namufikapo ukubatishiwa, bakamweba ukuti mukabatishiwa pa kulongana kwa muputule nelyo ukwa citungu ukwa Nte sha kwa Yehova. Pali uku kulongana pakaba ilyashi ilikalondolola bwino ifyo ulubatisho lupilibula. Kalanda we lyashi akepusha bonse abalebatishiwa ifipusho fibili. Nga mwayasuka ifi fipusho  ninshi ‘mwaisosela mwe bene’ ukuti mwalitetekela Yehova.—Abena Roma 10:10.

²² Nga mwayasuka ninshi kuti mwabatishiwa. Bakamutubika mu menshi. Ulubatisho lwenu lukalanga abantu bonse ukuti mwaipeela kuli Yehova kabili muli Nte yakwe.

23. Bushe amashiwi ya kuti ukubabatisha “mwi shina lya kwa Tata ne lya Mwana ne lya mupashi wa mushilo,”yalola mwi?

²³ Yesu atile abasambi bakwe balingile ukubabatisha “mwi shina lya kwa Tata ne lya Mwana ne lya mupashi wa mushilo.” (Belengeni Mateo 28:19.) Bushe aya amashiwi yalola mwi? Aya mashiwi yalola mu kuti mufwile ukusumina ukuti cine cine Yehova e ufwile ukututungulula no kuti mufwile ukwishiba umulimo uo Yesu akwata ku kufikilisha ubufwayo bwa kwa Lesa kabili mufwile ukwishiba ifyo Yehova abomfya umupashi wakwe uwa mushilo ku kufikilisha ubufwayo bwakwe.—Amalumbo 83:18; Mateo 28:18; Abena Galatia 5:22, 23; 2 Petro 1:21.

24, 25. (a) Finshi ulubatisho lupilibula? (b) Cipusho nshi tukasuka mu cipandwa ca kulekeleshako muli cino citabo?

²⁴ Ulubatisho lwimininako icintu icacindama nga nshi. Nga bamutubika mu menshi ciba kwati mwafwa nelyo mwaleka fyonse ifyo mwalecita ilyo mushilabatishiwa. Lelo ilyo line fye mwafuma mu menshi ninshi mwatendeka ubumi ubupya, e kutila ukulacita ifyo Lesa afwaya no kulamubombela. Muleibukisha ukuti tamuipeele ku muntu, ku kabungwe, no kuti te ncito mwatendeka iyo. Lelo muipeele kuli Yehova.

²⁵ Nga mwaipeela kuli Lesa bucibusa bwenu na ena bukalakoselako. (Amalumbo 25:14) Lelo ici tacilepilibula ukuti nga mwabatishiwa ninshi calaala capwa mwapusuka. Umutumwa Paulo atile: “Mulebombela ipusukilo lyenu no mwenso no kututuma.” (Abena Filipi 2:12) Ulubatisho ni ntendekelo fye ya bucibusa bwenu na Yehova. Nomba kuti mwacita shani pa kuti mwatwalilila ukuba na bucibusa ubwakosa na Yehova? Icipandwa ca kulekeleshako muli cino citabo cikasuka ici cipusho.