1. Unsa tingali ang imong pangutana human matun-i kining libroha?

DAGHAN kag nakat-onan nga kamatuoran sa Bibliya niining libroha, sama sa saad sa Diyos nga kinabuhing walay kataposan, kahimtang sa patay, ug paglaom nga pagkabanhaw. (Ecclesiastes 9:5; Lucas 23:43; Juan 5:28, 29; Pinadayag 21:3, 4) Nagtambongan na tingali kag mga tigom sa mga Saksi ni Jehova ug nagtuo nga nagsimba sila sa Diyos sa hustong paagi. (Juan 13:35) Lagmit nasugdan na nimo ang pagpakigsuod kang Jehova ug gusto na  kang moalagad niya. Busa basig mangutana ka, ‘Unsay angay nakong himoon aron makaalagad sa Diyos?’

2. Nganong gustong magpabawtismo ang usa ka Etiopianhon?

² Kanay gihunahuna sa usa ka Etiopianhon sa panahon ni Jesus. Human sa pagkabanhaw ni Jesus, gisangyawan siya sa tinun-an ni Jesus nga si Felipe. Gipamatud-an ni Felipe nga si Jesus ang Mesiyas. Natandog siya pag-ayo sa iyang nakat-onan maong siya miingon dayon: “Tan-awa! Dunay tubig diri; unsay nakapugong nako nga mabawtismohan?”​—Buhat 8:26-36.

3. (a) Unsay gisugo ni Jesus sa iyang mga sumusunod? (b) Unsa ang hustong paagi sa pagbawtismo?

³ Ang Bibliya tin-awng nagtudlo nga kon gusto nimong moalagad kang Jehova, angay kang magpabawtismo. Giingnan ni Jesus ang iyang mga sumusunod: “Tudloi [ang mga tawo] aron mahimong akong mga tinun-an. Bawtismohi sila.” (Mateo 28:19) Si Jesus usab naghatag ug ehemplo kay nagpabawtismo siya. Gituslob siya sa tubig, wala lang kay wisiki ug tubig sa ulo. (Mateo 3:16) Busa kon bawtismohan ang usa ka Kristohanon, kinahanglan sab siyang ituslob, o ilusbog, sa tubig.

4. Unsay gipakita sa imong pagpabawtismo?

⁴ Dihang magpabawtismo ka, imong gipakita sa uban nga gusto gyod kang mahimong higala sa Diyos ug moalagad niya. (Salmo 40:7, 8) Busa basig mangutana ka, ‘Unsay angay nakong himoon aron mabawtismohan?’

5. (a) Unsay angay nimong buhaton sa dili pa magpabawtismo? (b) Nganong importante ang Kristohanong mga tigom?

⁵ Sa dili pa ka magpabawtismo, kinahanglang mailhan  nimo si Jehova ug Jesus. Nagsugod ka sa paghimo niini dihang nagtuon ka sa Bibliya. (Basaha ang Juan 17:3.) Pero naa pa kay angayng himoon. Ang Bibliya nag-ingon nga kinahanglan kang ‘mapuno sa tukmang kahibalo’ bahin sa kabubut-on ni Jehova. (Colosas 1:9) Ang mga tigom sa mga Saksi ni Jehova makatabang nimo nga mas masuod ka kaniya. Importante kana nga rason kon nganong angay kang motambong nga regular sa maong mga tigom.​—Hebreohanon 10:24, 25.

6. Unsa ka daghan ang kinahanglan nimong mahibaloan sa Bibliya ayha ka bawtismohan?

⁶ Siyempre, dili magdahom si Jehova nga mahibalo na ka sa tanan bahin sa Bibliya ayha ka bawtismohan. Kon bahin sa Etiopianhon, wala mag-ingon si Jehova nga kinahanglang nahibalo siya sa tanan aron mabawtismohan. (Buhat 8:30, 31) Kon hunahunaon, padayon tang magkat-on bahin sa Diyos hangtod sa hangtod. (Ecclesiastes 3:11) Pero aron mabawtismohan, kinahanglang imong mahibaloan ug dawaton ang pangunang mga pagtulon-an sa Bibliya.​—Hebreohanon 5:12.

7. Sa unsang paagi nakatabang nimo ang pagtuon sa Bibliya?

⁷ Ang Bibliya nag-ingon: “Kon walay pagtuo imposible nga mapalipay ang Diyos.” (Hebreohanon 11:6) Busa kinahanglang duna kay pagtuo ayha ka bawtismohan. Ang Bibliya nag-ingon nga ang ubang tawo sa karaang siyudad sa Corinto nakadungog sa gitudlo sa mga sumusunod ni Jesus maong sila “mituo ug nagpabawtismo.” (Buhat 18:8) Sa samang paagi, ang imong pagtuon sa Bibliya nakatabang nga makabaton kag pagtuo sa mga saad sa Diyos ug sa halad ni Jesus, nga makaluwas nato gikan sa sala ug kamatayon.​—Josue 23:14; Buhat 4:12; 2 Timoteo 3:16, 17.

8. Unsay magpalihok nimo nga mosulti sa uban bahin sa imong nakat-onan?

⁸ Sa magkadaghan ang imong nakat-onan sa Bibliya ug makita nimo ang maayong epekto niini sa imong kinabuhi, mas molig-on ang imong pagtuo. Mapalihok kang mosulti sa uban bahin sa imong nakat-onan. (Jeremias 20:9; 2 Corinto 4:13) Pero kinsay imong sultihan?

9, 10. (a) Kang kinsa tingali nimo isulti ang imong nakat-onan? (b) Unsay imong himoon kon gusto na nimong mosangyaw uban sa kongregasyon?

⁹ Tingali gusto nimong sultihan niini ang imong pamilya, mga higala, silingan, o katrabaho. Maayo kana, pero himoa na kanunay sa lumo ug mahigugmaong paagi. Sa ngadtongadto makasangyaw na ka uban sa kongregasyon. Kon sa tan-aw nimo andam na ka, sultihi ang Saksi nga nagtudlo nimo sa Bibliya nga gusto na kang mosangyaw uban sa kongregasyon. Kon nakita niya nga andam na ka ug nagsunod na sa mga sukdanan sa Bibliya, kuyogan ka niya aron makig-estorya sa duha ka ansiyano sa kongregasyon.

¹⁰ Unsay katuyoan niini? Gustong mahibaloan sa mga ansiyano kon nasabtan ba nimo ang pangunang mga pagtulon-an sa Bibliya ug mituo ba ka niini, kon gipadapat ba nimo ang giingon sa Bibliya, ug kon gusto ba gyod nimong mahimong Saksi ni Jehova. Hinumdomi nga giatiman sa mga ansiyano ang tanang membro sa kongregasyon, apil ka, busa ayawg kahadlok sa pagpakig-estorya nila. (Buhat 20:28; 1 Pedro 5:2, 3) Human niini, pahibaloon ka sa mga ansiyano kon puwede na kang mosangyaw uban sa kongregasyon.

11. Nganong importante kaayong mohimog mga kausaban ayha ka makasangyaw uban sa kongregasyon?

 ¹¹ Lagmit ipatin-aw sa mga ansiyano nga kinahanglan ka pang mohimog dugang kausaban ayha ka makasangyaw uban sa kongregasyon. Nganong importante kaayong mohimog mga kausaban? Kay dihang makig-estorya ta sa uban bahin sa Diyos, kita nagrepresentar kang Jehova ug kinahanglang magkinabuhi sa paagi nga makapasidungog kaniya.​—1 Corinto 6:9, 10; Galacia 5:19-21.

12. Nganong ang tanang tawo kinahanglang maghinulsol?

¹² Duna pay angay nimong himoon sa dili pa ka bawtismohan. Si apostol Pedro miingon: “Paghinulsol mo, ug balik mo aron mapapas ang inyong mga sala.” (Buhat 3:19) Unsa ang paghinulsol? Nagpasabot kini nga nagbasol ta pag-ayo sa atong mga sayop. Pananglitan, kon imoral ang imong pagkinabuhi, kinahanglan kang maghinulsol. Ug bisan pag sa tibuok nimong kinabuhi naningkamot kang himoon ang husto, kinahanglan gihapon kang maghinulsol, kay kitang tanan makasala ug kinahanglang mangayog pasaylo sa Diyos.​—Roma 3:23; 5:12.

13. Unsay ipasabot sa giingon ni Pedro nga ‘mobalik’?

¹³ Igo na ba nga magbasol ka sa imong nahimo? Dili. Si Pedro miingon nga kinahanglan sab kang ‘mobalik.’ Sa ato pa, kinahanglan nimong talikdan ang sayop nga binuhatan ug himoon na ang husto. Niay ilustrasyon: Nagbiyahe ka sa usa ka lugar sa unang higayon. Dayon, nakaamgo ka nga sayop ang imong giagian. Unsay imong himoon? Seguradong momenor ka, mohunong, mobalik, ug unya moagi sa hustong agianan. Sa samang  paagi, samtang nagtuon ka sa Bibliya, imong masayran nga may mga butang nga angay nimong biyaan o batasan nga angay nimong usbon. Busa kinahanglang andam kang ‘mobalik’​—sa ato pa, maghimog mga kausaban—​ug himoon na ang husto.

14. Unsaon nimo pagpahinungod ang imong kaugalingon sa Diyos?

¹⁴ Laing lakang nga kinahanglan nimong himoon ayha magpabawtismo mao ang pagpahinungod sa imong kaugalingon kang Jehova. Dihang magpahinungod ka, moampo ka ug mosaad nga siya lang ang imong simbahon ug ang iyang kabubut-on mao ang unahon nimo sa imong kinabuhi.​—Deuteronomio 6:15.

15, 16. Unsay magpalihok sa tawo sa pagpahinungod sa Diyos?

¹⁵ Ang pagsaad kang Jehova nga siya lang ang imong alagaron nahisamag pagsaad ngadto sa imong hinigugma nga unongan nimo siya hangtod sa hangtod. Pananglitan, ang lalaki ug babaye nagkasuod. Dihang mas nailhan sa lalaki ang babaye, gihigugma niya kini ug gusto niyang pakaslan. Bisag bug-at ni nga desisyon, andam siyang mopas-an sa responsabilidad kay gihigugma niya ang babaye.

¹⁶ Samtang nagkat-on ka bahin kang Jehova, anam-anam kang nahigugma niya ug gusto nimong himoon ang maarangan sa pag-alagad kaniya. Kini ang magpalihok nimo nga moampo ug mosaad nga alagaran siya. Ang Bibliya nag-ingon nga kon ang usa gustong mosunod kang Jesus, angay niyang “dumilian ang iyang kaugalingon.” (Marcos 8:34) Kini nagpasabot nga unahon nimo sa imong kinabuhi ang pagsunod kang Jehova. Ang iyang kabubut-on mas importante kay sa imong mga tinguha ug tumong.​—Basaha ang 1 Pedro 4:2.

17. Nganong ang uban dili magpahinungod kang Jehova?

¹⁷ Ang uban dili magpahinungod kang Jehova kay nahadlok nga basig dili nila matuman ang ilang saad nga alagaran siya. Dili nila gusto nga ilang mapakyas si Jehova, o tingali mangatarongan sila nga kon dili sila magpahinungod, wala silay tulubagon kaniya.

18. Unsay motabang nimo nga madaog ang kahadlok nga mapakyas nimo si Jehova?

¹⁸ Ang imong gugma kang Jehova motabang nimo nga madaog ang kahadlok nga mapakyas nimo siya. Kay imo siyang gihigugma, himoon nimo ang tanan aron matuman ang imong saad kaniya. (Ecclesiastes 5:4; Colosas 1:10) Dili ka maghunahuna nga lisod kaayo ang pagbuhat sa kabubut-on ni Jehova. Si apostol Juan misulat: “Kini ang kahulogan sa paghigugma sa Diyos, nga atong tumanon ang iyang mga sugo; ug dili bug-at ang iyang mga sugo.”​—1 Juan 5:3.

19. Nganong dili ka angayng mahadlok nga magpahinungod kang Jehova?

¹⁹ Dili kinahanglang hingpit ka aron makapahinungod kang Jehova. Dili gyod siya magdahom ug labaw sa imong mahimo. (Salmo 103:14) Tabangan ka niya nga mabuhat ang husto. (Isaias 41:10) Salig kang Jehova sa bug-os nimong kasingkasing, ug “tul-iron niya ang imong mga agianan.”​—Proverbio 3:5, 6.

20. Human ka magpahinungod sa Diyos, unsay sunod nimong buhaton?

²⁰ Sa imong hunahuna, andam na ba kang magpahinungod kang Jehova? Human sa imong pagpahinungod kang Jehova, andam na ka sa sunod nga lakang. Kinahanglan kang magpabawtismo.

21, 22. Unsaon nimo ‘pagpahayag sa imong pagtuo ngadto sa uban’?

 ²¹ Pahibaloa ang koordinetor sa mga ansiyano sa inyong kongregasyon nga nakapahinungod na ka kang Jehova ug gusto na nimong magpabawtismo. Dayon mag-asayn siyag mga ansiyano nga morepaso nimo sa pangunang mga pagtulon-an sa Bibliya. Kon magkauyon sila nga kuwalipikado na ka, pahibaloon ka nila nga puwede na kang bawtismohan sa sunod nga asembliya o kombensiyon sa mga Saksi  ni Jehova. Sa asembliya, dunay pakigpulong nga magpatin-aw sa kahulogan sa bawtismo. Dayon dunay duha ka simpleng pangutana ang mamumulong para sa mga magpabawtismo. Pinaagi sa pagtubag niini, imong ‘gipahayag ang imong pagtuo ngadto sa uban.’​—Roma 10:10.

²² Dayon bawtismohan na ka. Ituslob ka sa tubig. Ang bawtismo magpahibalo sa tanan nga nagpahinungod na ka kang Jehova ug ikaw usa na ka Saksi ni Jehova.

23. Unsay kahulogan nga mabawtismohan “sa ngalan sa Amahan ug sa Anak ug sa balaang espiritu”?

²³ Si Jesus miingon nga ang iyang mga tinun-an bawtismohan “sa ngalan sa Amahan ug sa Anak ug sa balaang espiritu.” (Basaha ang Mateo 28:19.) Kini nagkahulogan nga imong giila ang awtoridad ni Jehova, ang papel ni Jesus sa katuyoan sa Diyos, ug ang paggamit sa Diyos sa iyang balaang espiritu sa pagpalampos sa iyang kabubut-on.​—Salmo 83:18; Mateo 28:18; Galacia 5:22, 23; 2 Pedro 1:21.

24, 25. (a) Unsay gisimbolohan sa bawtismo? (b) Unsay hisgotan sa kataposang kapitulo?

²⁴ Importante kaayo ang gisimbolohan sa bawtismo. Dihang ituslob ka sa tubig, ikaw namatay sa simbolikong paagi, sa ato pa, mibiya na sa imong kanhing pagkinabuhi. Paghaw-as nimo sa tubig, magsugod na kag bag-ong kinabuhi​—ang pagbuhat sa kabubut-on sa Diyos. Nagpakita kini nga moalagad na ka kang Jehova. Hinumdomi nga wala ka magpahinungod sa usa ka tawo, organisasyon, o buluhaton. Gipahinungod nimo ang imong kinabuhi kang Jehova.

²⁵ Ang imong pagpahinungod makatabang nga mahimo kang suod nga higala sa Diyos. (Salmo 25:14) Pero wala magpasabot nga ang tawo maluwas tungod lang kay nabawtismohan siya. Si apostol Pablo misulat: “Padayon mong maningkamot sa inyong kaugalingong kaluwasan uban ang kahadlok ug pagpangurog.” (Filipos 2:12) Ang bawtismo sinugdanan lang. Pero unsaon nimo pagpabiling suod kang Jehova? Tubagon kana sa kataposang kapitulo niining libroha.