1. Koleā le vesili e lagi e kotou fai i leia kua kotou iloa a ʼiki māʼoki o uiga mo le Tosi-Tapu?

ILE akoʼi o le tosi leinei, na kotou ako ai ni māʼoki o uiga mo le Tosi-Tapu. Sakinake la pe lakotou maʼua a māʼoki anei o uiga mo le kau mate, le amanaki ki le fakatuʼuake ti mo le fakapapau ki le maʼuli leʼegato. (Ekelesiasi 9:5; Luka 23:43; Soane 5:28, 29; Apokalipisi 21:3, 4) Lagi e kotou kau ki fono a le Kau Fakamāʼoki a Seova ti e kotou manatu ko le tausi lenā e mālieʼia ki le Atua. (Soane 13:35) Na lagi kamata tuputupu ai loa lakotou fakakausoa mo Seova ti e kotou loto ke kotou kaunaga kiate ia.  Kae lagi kotou vesili feneʼeki: ‘Koleā e tonu ke kau ʼaga o fai ke kau kaunaga ai ki le Atua?’

2. Koleā na loto ai e se Etiopia ke papitema?

² I le temi o Sesu na iai se tagata Etiopia, ko le Enuke. Na fakakaukau a ia pe koleā e tonu ke ʼaga a ia o fai ke kaunaga ai ki le Atua. Sili ki ai ni temi i le ʼoki o le fakatuʼuake o Sesu, ko Filipo, ko le tasi ana tisipulo na fakamafola ki le tagata lenā. Na fakasā a Filipo ni fakamāʼoki ki le Enuke ko Sesu ko le Mesia. I le fiafia lasi o le Enuke ki le neʼa na logo a ia ki ai, na pati a ia i le temi faʼi lenā: “Ko leinei se vai, kolea ka taofi ia loku papitema ?”—Tosi Gaoi 8:26-36.

3. (1) Koleā le fakatotonu na fai e Sesu ki ana tisipulo? (2) E tonu ke fefeʼaki mokā papitema se tasi?

³ E fakasā fakaʼagatonu i le Tosi-Tapu, kāpau e kotou fia tausi kia Seova, ti e tonu ke kotou papitema. Na fakatotonu e Sesu ki ana tisipulo: “Kotou fai ni tisipulo i puleaga fuli, o papitema latou.” (Mateo 28:19) Na fakasā e Sesu le faifaitaki lenā i lona papitemaʼi. Na se liligi fua se gā vai ki lona ʼulu, kae na uku kātoa a ia ki le vai. (Mateo 3:16) Ka papitema se Kilisiteano, e tonu mo ia ke uku kātoa ki le vai.

4. Koleā e tou fakasā ki ʼiki mokā tou papitema?

⁴ Mokā tou papitema, e tou fakasā ai ki ʼiki e tou fia kausoa maʼoki ti mo fia kaunaga mo le Atua. (Pesalemo 40:7, 8) I le temi nei, lagi e kotou vesili feneʼeki: ‘Koleā e tonu ke kau ʼaga o fai ke kau papitema ai?’

5. (1) I muʼa o lakotou faiga ke papitema, koleā e tonu ke kotou ʼaga o fai? (2) Koleā e maʼuiga ai ke kotou kau ki fono Fakakilisiteano?

⁵ I muʼa o lakotou faiga ke papitema, e tonu ke kotou ako ke kotou iloa a Seova mo Sesu. Ti kua kotou kamata  fai le anoʼaga lenā i lakotou akoʼi le Tosi-Tapu. (Lau Soane 17:3.) Kae leʼaise feʼauga. E pati i le Tosi-Tapu: E tonu ke kotou “apele i le iloa” o le finegalo o Seova. (Kolose 1:9) E tokoi atu loa a fono a le Kau Fakamāʼoki a Seova ke makeke tuʼumaʼu ai lau fakakausoa mo Seova. Ko ia e maʼuiga ai ke kotou kau tuʼumaʼu ki fono anā.—Epeleo 10:24, 25.

6. I muʼa o lokotou papitema, koā akonaki o le Tosi-Tapu e tonu ke kotou ʼaga o iloa?

⁶ E leʼese fakamaʼua atu e Seova ke kotou iloa kātoa le Tosi-Tapu i muʼa o lokotou papitema. Na se fakamaʼua e ia ki le tagata Etiopia, ke iloa a neʼa fuli i muʼa o lona papitema. (Tosi Gaoi 8:30, 31) Talie e se mafai ke toe gato a neʼa alā e tou ako o uiga mo Seova. (Ekelesiasi 3:11) Kae i muʼa o lokotou papitema, e tonu ke kotou iloa mo tali a akonaki tafito alā o le Tosi-Tapu.—Epeleo 5:12.

7. Koleā na tokoi atu ki ai e lakotou ako Tosi-Tapu?

⁷ E pati i le Tosi-Tapu: “Sala mo le tui, e leaise feala ke malie se tasi ki le Atua.” (Epeleo 11:6) Ko ia e tonu ke kotou maʼua le tui ki le Atua i muʼa o lokotou papitema. I le logo a le kakai Kolinito ki le fai akonaki a le kau tisipulo a Sesu, ko ʼiki ia lātou na “lotou tui loa, mo papitema.” (Tosi Gaoi 18:8) O toe felaʼaki, na tokoi atu a lakotou ako Tosi-Tapu ke kotou tui ki fakapapau a le Atua. Na toe tokoi atu a ia ke kotou tui ki le sakilifisio faitotogi o Sesu leia e mafaiʼia ke saofaki tātou mei le ʼagasala mo le mate.—Sosue 23:14; Tosi Gaoi 4:12; 2 Timoteo 3:16, 17.

8. Koleā ka ekenakiʼia loa kotou ke kotou māsau ki ʼiki o uiga mo māʼoki o le Tosi-Tapu?

⁸ I le lasi o anoʼaga e kotou akoʼi i le Tosi-Tapu e kotou  tokagaʼi ai lona ʼaoga kia koutou, ti e toe tuputupu ai mo lakotou tui. Ti e kotou fia māsau loa ki fenua o uiga mo neʼa alā e kotou lolotoga ako.—Selemia 20:9; 2 Kolinito 4:13.

9, 10. (1) Ko ai lātou alā e mafai ke kotou ʼuluaki māsau ki ai o uiga mo neʼa alā e kotou ako? (2) Koleā e tonu ke kotou fai mo kāpau e kotou fia fakamafola mo le kokelekasio?

⁹ E lagi kotou fia māsau loa ki okotou fāmili pe ki okotou kauneʼa, pe ko okotou vasa’a fale mo okotou kauga gaʼoi o uiga mo neʼa alā e kotou lolotoga ako. E mālie, kae kotou fai tuʼumaʼu, i le agamālie mo le agafakaʼapaʼapa. I le ano o le temi e kotou fia fakamafola loa mo le kokelekasio. Mokā e kotou logoʼi loa kua kotou tokamālie, kotou fakasā ki le Fakamāʼoki a Seova leia e faiʼia a lakotou ako. Kāpau e tio a ia kua kotou tokamālie mo tokagaʼi e kotou maʼuli o mulimuli ki pelesepeto o le Tosi-Tapu, ti e kolua ano loa o fakafelavei ki ni tagata āfea e tokalua o le kokelekasio.

¹⁰ Koleā le tupuʼaga o le fakafelavei lenā? E māsau loa a tagata āfea mo koutou ke lotou tio pe ku kotou matala mo tui ki pelesepeto tafito alā o le Tosi-Tapu. Ti e lotou toe fia iloa pe kotou maʼuliʼi a pelesepeto anā mo fia liliu māʼoki ko se Fakamāʼoki a Seova. ʼAua na kotou ʼī i le māsau ki tagata āfea. Kotou manatuʼi, e lotou tokaga ki fenua fuli o le kokelekasio mo koutou foki. (Tosi Gaoi 20:28; 1 Petelo 5:2, 3) I le ʼoki o le fakafelavei lenā, e lotou pati atu loa pe kua mafai lakotou faifakamafola mo le kokelekasio.

11. Koleā e ʼaoga ai ke tou fai ni ʼiki a fetogi mokā pati mai a tagata āfea ke fai?

¹¹ Lagi e fakasā atu loa e tagata āfea kia koutou, e toe iai a ʼiki fetogi ke fai i muʼa o lakotou ano o faifakamafola mo le kokelekasio. Koleā e ʼaoga ai ke fai a fetogi anā? Talie,  e tou fakafofoga a Seova mokā tou māsau ki ʼiki o uiga mo ia. Ko ia e tonu ke tou fakasā i lotātou maʼuli le aga leia e fakakololiaʼi ai a ia.—1 Kolinito 6:9, 10; Kalate 5:19-21.

12. Koleā e ʼaoga ai ki fenua fuli ke lotou fakasemala?

¹² I muʼa o lokotou papitema, e iai le tasi ake koga e tonu ke kotou fai. Na pati feneʼeki a le apositolo ko Petelo: “Kotou fakasemala mo kotou tafoki, ke fakamolemole ai akoutou agasala.” (Tosi Gaoi 3:19) Koleā le fakaʼuiga “ke fakasemala”? Ko lona fakaʼuiga, e tou fakasemala māʼoki ki neʼa veveli fuli alā na tou fai. Sakinake mo kāpau e kotou fai ni agafakatino leʼe ʼaoga, ti e tonu ke kotou fakasemala. Logo ai mo kāpau na kotou faiga tuʼumaʼu ke kotou fai le neʼa leia e mālie, kae e tonu ke kotou fakasemala. E tou ʼagasala fuli, ko ia leia e ʼaoga ai kia tātou fuli ke tou kole fakamolemole ki le Atua.—Loma 3:23; 5:12.

13. Koleā le fakaʼuiga “ke tafoki”?

¹³ E feʼauga faʼi ko ia ke kotou fakasemala ki neʼa veveli alā na kotou ʼaga o fai? Leʼai. Na pati a Petelo: E tonu foki ke “kotou tafoki.” Ko lona fakaʼuiga, e tonu ke kotou tiʼaki a agaveveli fuli kae kotou fai le neʼa leia e mālie. Tou toʼo se faifaitaki: E kotou ano ki se gāneʼa ko lakotou ʼuluaki ano ki ai. I le tasi a temi, e kotou tokagaʼi na leʼaise ko le ala lenā na tonu ke kotou ano ai. Koleā e kotou fai? E kotou anoano māmālie loa ti mo tuʼu. Ti e kotou toe maliu ko lona fakaʼuiga, e kotou tiʼaki le ala lenā kae kotou toʼo le ala leia e mālie, na tonu ke kotou ano ai. O toe felaʼaki, i lakotou ako le Tosi-Tapu, lagi e kotou tokagaʼi loa e tonu ke kotou ʼaga o fai ni fetogi i lokotou maʼuli pe  kotou tiʼaki a aga alā e kotou masani ki ai. Ko ia kotou teuteu o “tafoki,” ko lona fakaʼuiga ke kotou fai ni fetogi ʼaoga, ti ke kotou ʼaga o fai a neʼa alā e mālilie.

14. Koleā le fakaʼuiga “ke soli o lokoutou maʼuli” kia Seova?

¹⁴ I muʼa o lokotou papitema, e iai mo le tasi ake anoʼaga maʼuiga e tonu ke kotou ʼaga o fai, ko le soli o lokoutou maʼuli kia Seova. Ko le soli o lokoutou maʼuli ki le Atua, ko le fai o le fakapapau, i le faikole, e kotou tausi loa kiate ia tokatasi. Ti ko le fai o lona finegalo, ko le anoʼaga faʼi lenā e tasi ka maʼuiga ake loa i lokotou maʼuli.—Tetelonome 6:15.

15, 16. Koleā ka ekenakiʼia loa se tasi ke tausi kia Seova?

¹⁵ Ko le fakapapau ke tausi faʼi kia Seova tokatasi, e fai pe le fakapapau ke tou nofo i lotātou maʼuli kātoa mo se tasi leia e tou alofa ki ai. Tou toʼo se faifaitaki: Ko se tagata mo se fafine e lā fia fakatasi. I le iloa e le tagata le agaaga o le fafine lenā, na tuputupu ai loa lona alofa mo lona fia āvaga mo ia. Ko ia ko se tonu maʼuiga, kae o tupu ko lona alofa ki le fafine lenā e tali loa e ia a maʼua alā o le nofo āvaga.

¹⁶ Mokā lasi a neʼa alā e kotou ako o uiga mo Seova, ti e toe lasi ake loa mo lokotou alofa ti mo lokotou fia kaunaga kiate ia. Ko le anoʼaga lenā e ekenakiʼia loa ke kotou fakapapau i se faikole ke kotou kaunaga ki le Atua. E pati a le Tosi-Tapu: Ko ia leia e fia liliu ko se tisipulo a Sesu e tonu “ke fakafiti a ia kiate ia totonu.” (Maleko 8:34) Ko lona fakaʼuiga, ko le fakalogo kia Seova e tonu ko se anoʼaga maʼuiga a ia kia koutou. Talie, e maʼuiga ake a neʼa alā e loto ki ai a Seova i neʼa alā e kotou oli mo loto ki ai.—Lau 1 Petelo 4:2.

17. Koleā e leʼese soli ai a ʼiki lolātou maʼuli kia Seova?

¹⁷ Ko ʼiki e se lotou soli olātou maʼuli kia Seova talie e lotou ʼī na se mafai ke lotou taupau lalātou fakapapau ke lotou kaunaga kiate ia. E se lotou fia ʼaga o fakamamaeʼi lona loto. Pe lagi lotou manatu, kāpau e leʼese soli lolātou maʼuli ki le Atua, ti leʼese tukugaveliʼi loa e ia lātou o uiga mo neʼa ala e lotou fai.

18. Koleā loa ka tokoi atu loa ke kotou tauʼi lokotou ʼī ki le fakamamae o le loto o Seova?

¹⁸ E tokoi atu loa lokotou alofa kia Seova ke kotou tauʼi lokotou ʼī ki le fakamamae o lona loto. E kotou faiga loa ke kotou taupau lakotou fakapapau talie e kotou alofa kia Seova. (Ekelesiasi 5:4; Kolose 1:10) E se kotou pati loa e faigataʼa a le fai o lona finegalo. Na tosi e le apositolo ko Soane: “Talie ko leinei le alofa ki le Atua, ko le fai o ana fakatotonu ; ti e leaise faigataa ana fakatotonu kia tatou.”—1 Soane 5:3.

19. Koleā e leʼese tonu ai ke kotou ʼī i le soli o lokotou maʼuli kia Seova?

¹⁹ E leʼese fakamaʼua ke kotou māʼokiʼoki ke soli ai lokotou maʼuli kia Seova. E loʼina e ia otātou gatoʼaga. (Pesalemo 103:14) E tokoi atu loa a ia ke kotou fai le neʼa leia e mālie. (Esaia 41:10) Kāpau e kotou fānaki i lokotou loto kātoa kiate ia, “ti e fakatokatoka loa e ia ou ala.”—Taagapati 3:5, 6.

20. Koleā le fakatuʼutuʼu e tonu ke kotou fai i le ʼoki o le soli o lokotou maʼuli kia Seova?

²⁰ Kua kotou tokamālie ko ia ke soli lokotou maʼuli kia Seova? Ko le fakatuʼutuʼu leia e tonu ke kotou fai i le ʼoki o le soli o lokotou maʼuli kia Seova, ke kotou papitema.

21, 22. E fefeʼaki loa lakotou “fakasa i le gutu” i muʼa o le tokaʼapi a lakotou tui?

 ²¹ Kotou fakasā ki le kolotinatea o lokotou kokelekasio kua kotou soli lokotou maʼuli kia Seova ti e ku kotou fia papitema. E kole loa a ia ki ni tagata āfea ke fakatiotio mo kotou a manatu tafito alā o le Tosi-Tapu. Kāpau e lotou tio kua kotou tokamālie ti e lotou pati atu loa, i le fakatasi ka soko mai o le Kau Fakamāʼoki a Seova e mafai ai loa ke  kotou papitema. I le fakatasi lenā, e iai loa se akonaki e fakamatala ai le fakaʼuiga o le papitema. Ti e iai mo vesili e lua e fai loa kia lātou alā ka papitema. I le tali ki vesili anā, e kotou “fakasa i le gutu” i muʼa o le tokaʼapi a lakotou tui.—Loma 10:10.

²² ʼOki, ti papitemaʼi loa koutou. E ukuʼi kātoa loa koutou ki le vai. I lokotou papitema, e kotou fakasā loa i muʼa  o le tokaʼapi, kua soli lokotou maʼuli kia Seova ti kua kotou liliu ko se Fakamāʼoki a Seova.

23. Koleā le fakaʼuiga ke papitema “i le suafa o le Tamana, mo le Alo mo le Laumalie Maokioki”?

²³ Na pati a Sesu e papitema loa ana tisipulo “i le suafa o le Tamana, mo le Alo mo le Laumalie Maokioki.” (Lau Mateo 28:19.) Ko lona fakaʼuiga e tonu ke tou tali le pule o le Atua. Ti ke tou tali le tuʼulaga o Sesu i le fakatuʼutuʼu a le Atua. E tonu ke tou tali le faʼasiga fakaʼaogaʼi e le Atua o lona laumālie māʼokiʼoki ki le fakasoko o lona finegalo.—Pesalemo 83:19; Mateo 28:18; Kalate 5:22, 23; 2 Petelo 1:21.

24, 25. (1) Koleā e fakatatau ki ai a le papitema? (2) Koleā ka tali loa ki ai e le kapite fakaʼoki?

²⁴ E fakatatau le papitema ki se anoʼaga maʼuiga. Mokā uku koutou ki le vai ko lona fakaʼuiga, e puliʼi lokotou maʼuli āfea. E fakasā ai e kotou tiʼaki le maʼuli lenā. Ti ka kotou mavae mei le vai, ko lona fakaʼuiga kua kotou kamata se maʼuli foʼou, o tausi ki le Atua. E fakasā ai i le temi lenā, e kotou kaunaga kia Seova. Kotou manatuʼi, na se soli lokotou maʼuli ke tausi ki se tagata, pe ko se kautasi, pe ko ni ʼiki atu fakatuʼutuʼu kae na soli lokotou maʼuli kia Seova.

²⁵ Ko le fakapapau na kotou fai kia Seova, e tokoi atu loa ke tuputupu lakotou fakakausoa o mālie. (Pesalemo 25:14) E se fakaʼuiga, e tou sao loa o tupu ko lotātou papitema. Na tosi e le apositolo ko Paulo: “Kotou gaoi ki lokoutou saofaki i le i mo le lulu.” (Filipe 2:12) Ko le papitema, ko le kamataʼaga fua a ia. Kae, e fefeʼaki loa lakotou nonofo ko le kausoa o Seova? E tali loa le kapite fakaʼoki ki le vesili lenā.