1. Yɛ pələi yaa Biblə ŋɔ teɲa tamaa kɔlɔn na, kɛɛmaalən ləkɛɛ ɓə ya kɛ kiɛ gɛi ə́ kpɔɔ ɓa?

YAA Biblə ŋɔ teɲa tamaa kɔlɔn ɉɛɓɛi ŋɛi kalanŋaa hu. Gwa gɔɔmaa həɠə, yaa teɲa kɔlɔn yɛ hwilɛn na haaɓəlaa maamɛni ɓa, haaɓəlaa muhəɠə mɛni, ə lɛɛ yɛnɛɛ yii kpɛɛ ho ma ŋɔ kilitɔɔmaalaa (Kilimaa mun 9:5 ; Lukə 23:43 ; Záán 5:28, 29 ; Kulɔ ponoŋa 21:3, 4). Ya kɛ kiɛ lii Zehova ŋɔ Kəlaɠaa di wɔ ŋaakpɔnŋaa diɛ, ə lɛɛ yaa gaa yɛ́ kpinii yɛ́ ma diɛ ɓə teɲa kalan gaa di yəi (Záán 13:35). Ə lɛɛ nwɔnɔ yaa gɔwɔtɔɔ kiɛ yɛ́ Zehova ŋɔ ɓəlannaa hɔlɔɓo, ə lɛɛ ə́ kaa bɔ yɛ́ kóló kɛ ma. Kəlaa ya kɛ kiɛ  ə́ kpɔɔ maaləngɛi yɛ́ kɛ ma : ‘ Lə ɓə maanɛɛ ŋi gɛ ə gɛ gɛ́ pɛli kóló kɛi Zehova ɓa ? ’

2. Lə mɛni ɓa Etiopimun da ə kɛ bɔ di batiisə ?

² Zesu ŋɔ lowai, Etiopimun da ə gbɔɔ maaləngɛ yii maanɛɛ kɛ ə gɛ, ə gɛ yɛ pɛli kóló kɛi Zehova ɓa. Zesu muhəɠɛɛ pulu haaɓəlaa lowai, ŋɔ kalan non yii di kɛi kɛ ma Filipə ə Yálá Lawoo ɓo Etiopimun tii ɓa. Ə mo ma yɛ ma Zesu ɓə gaa a Nui Yálá ə maaminɛ həɠə. Etiopimun tii kwəi ə nɛɛ kpɔ kɛnɛ, ɲaaɓa ə mo yɛ ma : ‘ Tɛɛ ya kaa ɓɛ, lə mɛni ɓə a pɛli kpəɲan ɉii ŋɔ́ batiisə mɛni hu ’ (Túwɔ́ pələ 8:26-36).

3. (a) Lə ɓə Zesu ə mo ŋɔ kalan nea diɛ, yɛ diɛ di gɛ ? (b) Da nu batiisə pələ kɛ ləi ?

³ Biblə a mo kpɔ a ɉuponoɔ yɛ ma : Akɛ ə́ kaa bɔ ə́ kóló kɛ Zehova ɓa, maanɛɛ di ə́ batiisə. Zesu ə mo ŋɔ kalan nea diɛ yɛ ma : ‘ Ka li [...] ka nu kəlee kalan, ka di kɛ a ŋɔ́ kalan nea. Ka di batiisə ’ (Matie 28:19). Zesu yaa kpinii ə yili gɔɔmaa lɛ a batiisəi di mo. Yá wolo lɔ hwəi di gbɛŋɛn nwuɔ, di naa kəlee lɔ kpɔ ɲái (Matie 3:16). Háákələi, da kɛi kilistalon da batiisə, maanɛɛ di naa kəlee lɔ yái.

4. Lə ɓə ə́ wɔ batɛɛmu a nɛ nua diɛ ?

⁴ Ya ə́ batiisə kpɔn ɲɛi ɓa, ya nɛ yɛ́ ma ə́ kaa bɔ ə́ kɛ a Yálá məlanmun, ə lɛɛ ə́ kaa bɔ ə́ ti ma (Somə 40:7, 8, TMN). Kəlaa ya kɛ kiɛ ə́ kpɔɔ maaləngɛi yɛ kɛ ma : ‘ Lə ɓə maanɛɛ ŋi gɛ ə gɛ gɛ́ pɛli batɛɛmu hɔlɔɓoi ? ’

5. (a) Mɛni toloo maanɛɛ ə́ gɛ yɛ́ pa batɛɛmu hɔlɔɓoi, ya ɓaa lə ? (b) Lə mɛni ɓa nu li mɛni kilistalea di wɔ ŋaakpɔnŋaa diɛ kaa a mɛni wala-wala ?

⁵ Gɛɛ di ho ə́ batiisə, maanɛɛ ə́ Zehova da Zesu di kɔlɔnŋaa maakwɛli. Yaa gɔwɔtɔɔ kea yɛ́ yili kɛ a Biblə kalanŋaa (Záán 17:3 ɓo). Kəlaa gəlee hwəli. Biblə a mo yɛ ma : maanɛɛ ə́ Yálá liiɓa kɔlɔn “ kililatee ” yii Yálá  a dɛɛ ə́ pɔ ɉaalai (Kɔlɔsə 1:9). Zehova ŋɔ Kəlaɠaa di wɔ ŋaakpɔnŋaa kaa pai kpɔnmaa tɛɛi ə́ pɔ, ka Zehova ka wɔ ɓəlannaa hu ə wala-wala. Yili ɓa, ə́ li mɛni ŋaakpɔnŋaa diɛ kɛlɛ-kɛlɛ, kaa a mɛni yii maamɛni wala-walaa (Hebulu 10:24, 25).

6. Biblə ŋɔ teɲa nɛlɛɠaa ɓə maanɛɛ ə́ kɛ a gɔlɔnŋaa yɛ́ təɠa pa batɛɛmu hɔlɔɓoi ?

⁶ Zehova hwa Biblə hu mɛni kəlee kɔlɔn mɛni kɛ a hɔlɔhima. Ə́ ma wala Biblə hu mɛni kəlee kɔlɔn, ya pɛli ə́ batɛɛmu hɔlɔɓo. Zehova ho hɔlɔhima laa Etiopimun tii mɛi, Biblə hu mɛni kəlee kɔlɔn mɛni ɓa gɛɛ di ho batiisə (Túwɔ́ pələ 8:30, 31). Ə lɛɛ nwɔnɔ, gu kaa lɔ pai kɛi ma guɔ Yálá kɔlɔnŋaa maakwɛli a yələ kəlee, maahɔlɔɓo Yálá kɔlɔnŋaa maakwɛliɛ kpəla ɉii ho ma (Kilimaa mun 3:11). Kəlaa gɛɛ ə́ batɛɛmu hɔlɔɓo, maanɛɛ ə́ Biblə ŋɔ teɲa doloo-tolooɠaa kɔlɔn, ə lɛɛ ə́ ə́ yee hee di mu (Hebulu 5:12).

7. Kpɔnmaa ləkɛɛ ɓə ə́ wɔ Biblə kalanŋaa aa dɛɛ ə́ pɔ ?

⁷ Biblə a mo yɛ ma : ‘ Akɛ laanalaa hwəi, nui lɔpee ta hwa pɛli Yálá lii hon ɉii ’ (Hebulu 11:6). Yili ɓa, maanɛɛ laanalaa ə kɛ ə́ yəi yɛ́ təɠa pa batɛɛmu hɔlɔɓoi. Biblə a mo yɛ ma ɓɛlowai Kɔlɛntə nua taɠaa di Zesu ŋɔ kalan nea di wɔ wɛlɛɛwoo mɛn na ‘ di laana, ə lɛɛ di di batiisə ’ (Túwɔ́ pələ 18:8). Yɛ pələi lɔ Kɔlɛntə nua di gɛ la, ya kɛi Biblə kalan yili kaa pai kpɔnmaa tɛɛ ə́ pɔ, ə́ laa Yálá  ŋɔ mɛni laakwəlamoɔɠaa la. Yili kaa nwɔnɔ pai kpɔnmaa tɛɛ ə́ pɔ ə́ laa Zesu ŋɔ nwunmaaɓo halaa la, yii a ə́ kulɔ nɛŋɛn da haa di yəi (Zosue 23:14 TMN ; Túwɔ́ pələ 4:12 ; Timɔtə veelɛnaa 3:16, 17).

8. Lə ɓə pai gɛi yii ə́ kaa maakwɛlii mo wɛli yɛ too yɛ́ nu takpɛliɠaa diɛ ?

⁸ Ə́ kaa lɔ pai kɛi mɛni tamaa kɔlɔn ɉii yɛ hwilɛn na  Biblə ɓa, yɛ́ gaa yɛ́ ma tɔnɔ kaa ma, ə lɛɛ ə́ wɔ laanalaa hu yɛ kɛnɛ. Yili ɓa, mɛniɠaa ya kɛ maakwɛlii, mo wɛli kaa pai kɛi yɛ́ nu takpɛliɠaa diɛ (Zelemi 20:9, TMN ; Kɔlɛntə veelɛnaa 4:13). Kəlaa gbɛɛ ɓə ə́ kaa bɔ ə́ mɛniɠaa tii ɓo ma ?

9, 10. (a) Gbɛɛ ɓə toloo maanɛɛ ə́ Biblə ŋɔ teɲa ɓo ma ? (b) Akɛ ə́ kaa bɔ yɛ́ kulɔ Yálá Lawoo laa həlii ka galangbɔn ɉu nua, lə ɓə maanɛɛ ə́ gɛ ?

⁹ Ə́ kaa kiɛ pai kɛi bɔ yii ə́ kaa maakwɛlii yɛ́ mo ə́ yəi bɛlɛn nua diɛ, ə́ ɓəlaa, ə́ heeyɔwɔɠaa, ə lɛɛ ə́ kólókɛyɔwɔɠaa. Mɛni lɛlɛɛ ɓaa yili, kəlaa ya kɛi gɛ, ya gɛ a nɛlɛɛ. Lowai ta kaa pai ɉəlii ə́ kaa pai kɛi bɔ ə́ too galan kpɔn ɉu nua pɔ ka diɛni kaa Yálá Lawoo laa həli. Zehova ŋɔ Kəla yii a kɛ Biblə kalan ɉii yɛ́, ə́ woo hukulɔ ma, yɛ́ ma ə́ kaa bɔ ka galan gbɔn ɉu nua kaa Yálá Laawoo laa həli gee pɔ. A gaa yɛ ma ya pɛli ma, ə lɛɛ akɛ ya kɛ hiɛi a Biblə ŋɔ tɔn-nwooɠaa, ka yaa ka li ka kalaɉon veelɛ kaa galan gbɔn ɉu yili maamɛni ɓa.

¹⁰ Ka kalaɉonŋaa ka kee kaa mɛni nwun maa lə ? Galaɉonŋaa kaa pai hwaai ə́ pɔ ə gɛ di gaa akɛ ya Biblə ŋɔ teɲa doloɠaa ŋaakaa ə lɛɛ akɛ ə́ laa deɲaɠaa tii la. Di kaa nwɔnɔ pai gaai akɛ ya kɛ hiɛi a Yálá ŋɔ tɔn-nwooɠaa holo kəlee, ə lɛɛ akɛ ə́ kaa bɔ ə́ kɛ a Zehova ŋɔ Kəla. Nɛɛ ə́ kili pɔ yɛ́ ma kalaɉonŋaa da galangbɔn ɉu nua hon a nɛlɛɛ, ə ma kɛ yɛ́ kpinii, yili ɓa, ho ɲɔu hwaai di pɔ (Túwɔ́ pələ 20:28 ; Piɛli dɔlɔɔ 5:​2, 3). Ka wɔ kiikaa tii a kpɛɛ, galaɉonŋaa tii da mo yɛ́, akɛ ya pɛli gɔwɔtɔɔi, yɛ́ kulɔ Yálá Lawoo laa həlii ka galangbɔn ɉu nua.

11. Kalaɉonŋaa da kɛ ma ə́ ə́ túwɔ́ pələ taɠaa maahwalən, lə mɛni ɓa mɛni wala-wala ɓaa ə́ yili kɛ ?

¹¹ Galaɉonŋaa tii da pɛli di gaa diɛ ma maanɛɛ ə́ ə́ túwɔ́ pələ taɠaa maahwalən, da ə́ yii pələ taɠaa, yɛ́  təɠa pa kulɔi Yálá Lawoo laa həlii. Lə mɛni ɓa yili kɛɛ kaa a mɛni wala-wala ? Maahɔlɔɓo gwa kɛi Yálá Lawoo ɓo nuta ɓa akɛtii gu kɛɛ hwaa Zehova laa hu ka tii, yili ɓa maanɛɛ gu túwɔ́ pələ yɛ Yálá maawiɛ (Kɔlɛntə dɔlɔɔ 6:9, 10 ; Galatə 5:19-21).

12. Lə mɛni ɓa maanɛɛ nu kəlee lii ə too pulu gɛ nɛŋɛnŋaa maamɛni ɓa ?

¹² Mɛni takpɛliɠaa kaa nwɔnɔ laa yii maanɛɛ ə́ gɛ diɛ təɠa pa ə́ batiisəi. Apɔtɛlɛ Piɛli ə mo nua diɛ yɛ ma : Maanɛɛ di lii ə too pulu di wɔ nɛŋɛnŋaa maa-mɛni ɓa, ‘ di tinɛn di pa Yálá pɔ, ə di kɛ nɛŋɛnŋaa waa ’ (Túwɔ́ pələ 3:​19). Nu lii toɔ pulu mukulaa ɓaa lə ? Yili mukulaa ɓaa, duwɔpələɲɔnŋaa kpɔ maanu aa gɛ, aa hee ɉu kpɔ kɛnɛ. Gwa gɔɔmaa həɠə, nui kɛi wɛli mɛni maanɛŋɛn ɉəɠə, maanɛɛ maanui lii ə too pulu. Kəlaa, ə ma kɛ nui ho kɛi tuwɔpələɲɔn gɛ, maanɛɛ maanui ə mɛni taɠaa maahwalən ɲii pələ hu, maa-hɔlɔɓo nukanŋaa kəlee kaa a nɛŋɛnɉəɠənua, ə lɛɛ nu kəlee maakpaan gaa Yálá ɓa yii yaan ə gɛ nɛŋɛnŋaa maahwaalɛɛ (Rɔmu 3:23 ; 5:​12).

13. Da kɛ ma “ ka tinɛn ka pa Yálá pɔ ”, yili mukulaa ɓaa lə ?

¹³ Ya lɔ hwaa nu ə mo yɛ ma duwɔpələɲɔnŋaa ə kɛi gɛ, daa hee ɉu kpɔ kɛnɛ. Piɛli ə mo nwɔnɔ yɛ ma “ ka tinɛn ka pa Yálá pɔ ”. Yili mukulaa ɓaa, maanɛɛ nwɔnɔ ə́ kpəla tuwɔpələɲɔnŋaa ə́ kɛi gɛ diɛ, ə lɛɛ ə́ mɛni kəlee kɛ yii yaan yɛ́ pɛli mɛni haŋaa kɛi. Gwa gɔɔmaa həɠə, gaa lɔ yɛ ya kɛi li kɛinaa ta, ɓɛi hó ta li li laa. ə́ lɛɛ lii ə́ gaa yɛ́ ma hó ɉon ni a bələ lɛlɛɛ. Akɛtii lə ɓə maanɛɛ ə́ gɛ ? Ya tɔɔ, ə́ yali ə́ pulu, ə lɛɛ ə́ ɉon a bələ lɛlɛɛ. Bələ lɔ ɓə gaa la, ya kɛi Biblə kalan, ə́ kaa kiɛ pai ɲaakaai yɛ́ ma maanɛɛ ə́ mɛni taɠaa maahwalən ə́ yii pələ hu.  Hwáá ma ə́ ‘ tinɛn ə́ pa Yálá pɔ ’. Yili mukulaa ɓaa ə́ ə́pulu tɔɔ mɛni ɲɔnwɔɔ kɛɛ ɓa, ə́ mɛni lɛlɛɛ kɛ.

14. Nu kpɔɔ tɛɛ mɛni Zehova Yálá pɔ mukulaa ɓaa lə ?

¹⁴ Mɛni takpɛli kaa nwɔnɔ laa maamɛni wala-walaa yii maanɛɛ nu ə gɛ diɛ təɠaa pa batiisəi. Maanɛɛ ə́ ə́ kpɔɔ tɛɛ Zehova pɔ. Nu kpɔɔ tɛɛ mɛni Zehova Yálá pɔ mukulaa ɓaa, ə́ mo ma hwɛliwoo hu yɛ́ ma yaa tɔnɔ gbən lɔ ɓə ə́ kaa pai kɛi matooi, ə lɛɛ yɛ́ niiɓa kɛ mɛni tɛɛ ə́ wɔ mɛni kəlee tɔwɔ. Ya mo ma yɛ́ ma ə́ kaa bɔ ə́ lɛɛ a ə́ kanaŋaa ma a yələ kəlee. (Detelonɔmə 6:​15, TMN).

15, 16. Lə ɓə a gɛ nu yɛ gbɔɔ tɛɛ Yálá pɔ ?

¹⁵ Mo Zehova ɓa, yɛ́ ma yaa tɔnɔ gbən ɓə ə́ kaa bɔ ə́ matoo. Yili kaa lɔ yɛ ya mo ə́ wɛlikɛmaamun da ɓa yɛ́ ma ə́ kaa bɔ ka yaa ka ka wɔ yɛnɛɛ kɛ gee ɓa. Gu gɔɔmaa həɠə : Gaa lɔ yɛ hulɔnu da nɛɛnu di ɲɛi a kulɔ di kee ni pɔ. Ɉulɔnu a kɛi nɛɛnu tii kɔlɔn, yɛ gaa yɛ ma duwɔ pələ lɛlɛɛi, nwɛli a too ma kpɔ kɛnɛ. Yili a pɛli gɛi ə mo nɛɛnu tii ɓa, yɛ ma da yaa di húlu lɔ. Ə ma kɛ húlu yii ɓoɔ kaa a mɛni yii gɛ laa walaa, wɛlikɛmaa ɓə pai gɛi ɉulɔnu tii yɛ nɛɛnu tii həɠə a nɛa.

¹⁶ Ə́ kaa lɔ pai kɛi Zehova kɔlɔnŋaa maakwɛlii, ŋɔ nwɛlikɛmaa hu yɛ kɛnɛ ə́ nii hu, ə lɛɛ ə́ kaa pai kɛi bɔ ə́ mɛni kəlee kɛ ə gɛ yɛ́ ti ma. Yili kaa nwɔnɔ pai gɛi ə́ mo ma hwɛliwoo hu yɛ́ ma ə́ kaa bɔ ə́ ti ma. Biblə a mo yɛ ma, nui lɔpee gaa bɔ ə hwilɛn Zesu pulu, maanɛɛ maanui “ ə lənə gbɔɔ ɓa ” (Matie 16:24). Yili mukulaa ɓaa lə ? Yili mukulaa ɓaa maanu hwa niiɓa mɛniɠaa da gɛ kólóɠaa lɛɛ laa di ho kpean dɔwɔ nɛɛ mɛni ɓa Yálá woo mu. A teɲa, yii Zehova kaa bɔ, ya ɓə maanɛɛ ə tɛɛ gu liiɓa mɛniɠaa kəlee tɔwɔ (Piɛli dɔlɔɔ 4:​2 ɓo).

17. Lə mɛni ɓa nu taɠaa di hwa gɛ di ho di kpɔɔ tɛɛ Zehova pɔ ?

¹⁷ Nutaɠaa di hwa di kpɔɔ tɛɛ Zehova pɔ, maahɔlɔɓo da kɛ ɲɔui. Da kɛ kɛi ma, mɛnii di mo Zehova ɓa, di ho pai pɛlii bɔ mɛni kɛi. Di ho bɔ di túwɔ́ pələ ho pa ɲɔnwɔ Yálá ɲɛi ɓa. Da kɛ nwɔnɔ di kiliŋahiɛi diɛ ma da wala di kpɔɔ tɛɛ Zehova pɔ, Zehova ho pai di wɔ tuwɔpələɲɔnŋaa gbɔu laai di nwuɔ.

18. Lə ɓə pai kpɔnmaa tɛɛ ə́ pɔ ə́ ɲɔu kulɔ ə́ kɔlɔi yɛ́ pɛli Zehova liiɓa kɛi ?

¹⁸ Zehova ŋɔ wɛlikɛmaa ŋɛi ə́ nii hu, ya ɓə pai kpɔnmaa tɛɛ ə́ pɔ ə́ ɲɔu kulɔ ə́ kɔlɔi yɛ́ pɛli Zehova liiɓa kɛi. Nwɛlikɛmaa tii haalai ɓə ə́ kaa pai pɛlii mɛni kəlee kɛi la ə gɛ mɛnii ə́ mo Zehova ɓa, yɛ́ pɛli bɔ tuwɔ ɓoi (Kilimaa mun 5:​4 ; Kɔlɔsə 1:10). Hó pai kɛi ma Zehova liiɓa kɛ mɛni kaa a mɛni wala-wala, maahɔlɔɓo, apɔtɛlɛ Záán ə mo yɛ ma : ‘ Pələi Yálá ŋɔ wɛlikɛmaa kɛ pələ kaa la, bələ ka, ya ɓaa : Gu ŋɔ liɛwoo hon, yaan ŋɔ liɛwooɠaa tii hon na ho wala li ’ (Záán dɔlɔɔ 5:​3).

19. Lə mɛni ɓa maahonɛɛli ho ɲɔu ə́ kpɔɔ tɛɛi Yálá pɔ ?

¹⁹ Ə ma kɛ nɛŋɛn gaa yɛ́, ya pɛli ə́ ə́ kpɔɔ tɛɛ Zehova pɔ. Mɛniɠaa gu hwa pɛli ma, Zehova hwa gu tɔɔ la (Somə 103:​14, TMN). Gaa pai kpɔnmaa tɛɛ ə́ pɔ, ə́ mɛni lɛlɛɛ kɛ (Izai 41:​10, TMN). Ya laana a ə́ lii kəlee, gaa pai “ ə́ tənəndɔɔi ” (Haŋɔn 3:​5, 6, TMN).

20. Ya kpɛɛ a ə́ kpɔɔ tɛɛ Zehova pɔ, lə ɓə maanɛɛ ə́ gɛ ?

²⁰ Ə́ kɛ pələ pɛliɛi ə́ kpɔɔ tɛɛ mɛni ɓa Zehova pɔ ? Ya kpɛɛ a ə́ kpɔɔ tɛɛ Zehova pɔ, yii kea a lɛɛ naa pulu ya ɓaa di ə́ batiisə.

21, 22. Ya pɛli ə́ wɔ ‘ laanalaa lɛi ’ ləi  kpɔn ɲɛi ɓa ?

²¹ Galaɉon ɲii a kpɔnmaa tɛɛ məlaa kalaɉonŋaa pɔ diɛ pɛli mɛniɠaa hee gbanŋa ka wɔ kalangbɔn hu, mó  ma yɛ́ ma yaa ə́ kpɔɔ tɛɛ Yálá pɔ ə lɛɛ ə́ kaa bɔ di ə́ batiisə. Gaa pai mɛniɠaa heei gbanŋa ə gɛ ka kalaɉonŋaa ka ka kee kaa, diɛ pɛli kɛɛmaalən daɠaa pilii yɛ́, yɛ hwilɛn na Biblə ŋɔ teɲa doloo-tolooɠaa diɛ. Galaɉonŋaa tii da gaa diɛ ma ya pɛli ə́ batiisəi, da mo yɛ́ diɛ ma Zehova ŋɔ Kəlaɠaa di wɔ ŋaakpɔn gɛnɛ ŋɛi pai ya pɛli ə́ batɛɛmu hɔlɔɓo. Ŋaakpɔn gɛnɛi tii ɓa, gɛɛ  di ho batɛɛmu kɛ, da pələɓo ta kɛ yii a batɛɛmu mukulaa lɛ. Nuai pai batɛɛmu həɠəi, bələɓokɛmun a mo diɛ di kɛɛmaalən veelɛ mukulɔ. Da gɛɛmaalən veelɛi tii mukulɔ, yili kaa a di wɔ ‘ laanalaa lɛ pələ ’, kpɔn ɲɛi ɓa (Rɔmu 10:10).

 ²² Yili a həɠə laa, da ə́ batiisə. Ə́ wɔ batɛɛmu lowai, da ə́ naa kəlee lɔ yái. Batɛɛmu ɓə a nɛ nu kəlee ɲɛi ɓa yɛ yaa ə́ kpɔɔ tɛɛ Zehova pɔ, ə lɛɛ yaa kɛ kea a Zehova ŋɔ Kəla.

23. Nu batiisəɛ “ Nán Yálá da Non da Yálá Nii laa hu ”, mukulaa ɓaa lə ?

²³ Zesu ə mo yɛ di ŋɔ kalan neai batiisə “ Nán Yálá da Non da Yálá Nii laa hu ” (Matie 28:​19 ɓo). Yili mukulaa ɓaa nu a kɛi pa batiisəi, maanu a Zehova kɔlɔn a nwun namu, ə lɛɛ Zesu ŋɔ matii Yálá ə dɛɛ bɔ, maanu ə ɲee hee mu. Ə lɛɛ nwɔnɔ yii Zehova a gɛ a ŋɔ nii maahəɠɛɛ, niiɓa laahwɛɛ mɛni ɓa, maanu ə ɲee hee nwɔnɔ yili mu (Somə 83:18, TMN ; Matie 28:​18 ; Galatə 5:22, 23 ; Piɛli veelɛnaa 1:21).

24, 25. (a) Batɛɛmu mukulaa ɓaa lə ? (b) Kɛɛmaalən nɛlɛ ɓə gu kaa pai mukulɔi Ɉɛɓɛ ɲaakwɛlɛi gbəli hu ?

²⁴ Batɛɛmu mukulaa kaa hwilɛn ɉii mɛni wala-wala ta ɓa. Da ə́ lɔ yái, yili mukulaa ɓaa ə́ yii pələ pɔlɔi tii kɛ ə́ yəi yaa kulɔ ɉu. Da ə́ kulɔ ɲái, yili mukulaa ɓaa yaa lɔ kea yii ninɛ hu Yálá liiɓa kɛ mɛni ɓa. Ə́ kili lɛɛ ɉu yɛ́ ma ho ə́ kpɔɔ tɛɛ li kóló ta maamɛni ɓa, nukanŋaa maamɛni ɓa, ə lɛɛ kpɔn maamɛni ɓa, kəlaa Zehova ya tɔnɔ gbən ɓə ə́ ə́ kpɔɔ tɛɛ bɔ.

²⁵ Mɛnii ə́ mo Zehova ɓa a ɓɛlowai ə́ kɛɛ ə́ kpɔɔ tɛɛ la ɓɔ, yili ɓə pai kpɔnmaa tɛɛ ə́ pɔ, ka Zehova ka ɓəlannaa lɛlɛɛ kɔwɔtɔɔ (Somə 25:​14, TMN). Yili mukulaa hwaa da nu batiisə, maanui nwun maa aa ɓo. Apɔtɛlɛ Pɔli ə bɛɛn yɛ ma : “ Ka túwɔ́ pələ ə kɛ a yii a ka nwun maaɓo mɛni kulɔ ponoŋa Yálá ŋɔ ɲɔu maa hu ” (Filipə 2:​12). Batɛɛmu kaa lɔ a mɛni kɔwɔtɔɔ ninɛ. Kəlaa ya pɛli lɛɛ ləi a Yálá məlanmun ? Ɉɛɓɛ ɲaakwɛlɛi gbəli kaa pai yili mukulɔi guɔ.