1. Ndai laika buk hpe hkaja ngut ai hpang nang gara hku myit wa na kun?

NDAI laika buk hpe hkaja ai majaw, Karai Kasang ga sadi jaw da ai htani htana asak hkrung na lam, si mat ai ni a lam, hkrung rawt ai hte seng ai myit mada lam ni re ai Chyum Laika a teng man ai lam ni hpe nang chye wa sai. (Hpaji Ningli 9:5; Luka 23:43; Yawhan 5:28, 29; Shingran 21:3, 4) Yehowa Sakse Ni a nawku zuphpawng ni hpe nang lung hpang sai nga yang, teng man ai hku shanhte nawku nga ai hpe nang mu na re. (Yawhan 13:35) Yehowa hte nang grau hku hkau wa nna, shi a magam gun na matu nang dawdan mayu wa na re. Dai majaw, ‘Yehowa a  magam gun na matu hpa galaw ra ai kun?’ nga nna nang myit na re.

2. Ehtiopi masha gaw hpa majaw hkalup hkam mayu wa ai kun?

² Tsa ban langai hta Ehtiopi masha langai mung dai zawn myit wa ai. Yesu hkrung rawt nna loi mi na ai hpang, Yesu a sape Hpilip gaw dai wa hpe hkaw tsun wa ai. Yesu gaw, Meshia re ai lam shi hpe Hpilip sakse hkam wa ai. Ehtiopi masha gaw shi chye na wa ai shaloi, myit katu let kalang ta ndai hku tsun ai: “Yu u, nang e hka nga nga ai; ngai baptisma [hkalup] hkam na, hpa hkum shara nga a ta?”—Kasa 8:26-36.

3. (a) Yesu gaw shi hpang hkan ai ni hpe hpa htet da ai kun? (b) Masha langai hkalup hkam yang gara hku hkam ra ai kun?

³ Yehowa hpe nawku mayu yang hkalup hkam ra ai nga nna, Chyum Laika hta asan sha tsun da ai. Yesu gaw, shi hpang hkan ai ni hpe “masha amyu baw shagu hpe sape shatai let, . . . shanhte hpe baptisma jaw” mu nga nna tsun wa ai. (Mahte 28:19) Yesu shi nan mung hkalup hkam nna kasi madun wa sai. Shi gaw hka lapri ai hku n re ai sha, hka hta lup wa ai. (Mahte 3:16) Ya mung Hkristan ni hkalup hkam yang hka hta lup ra ai.

4. Nang hkalup hkam ai gaw hpa hpe madun dan ai hte bung ai kun?

⁴ Nang hkalup hkam ai gaw, Karai Kasang a jinghku teng sha byin mayu nna, shi a magam gun mayu ai lam madun dan ai re. (Shakawn 40:7, 8) Dai majaw, ‘hkalup hkam na matu ngai hpa galaw ra ai kun?’ nga nna nang myit na re.

5. (a) Hkalup n hkam shi yang nang shawng n nan hpa galaw ra ai kun? (b) Hkristan zuphpawng ni gaw hpa majaw ahkyak ai kun?

⁵ Hkalup garai n hkam shi yang, Yehowa hte Yesu hpe nang chye chyang ra ai. Chyum Laika hkaja ai kaw nna, nang shanhte a lam chye wa sai. (Yawhan 17:3 hpe hti u.) Raitim, dai hte sha n mai ai. Nang hta Yehowa ra sharawng  ai, ‘chye chyang ai lam hte hpring chyat’ ra ai lam Chyum Laika hta tsun da ai. (Kolose 1:9) Yehowa Sakse Ni a nawku zuphpawng ni gaw, Yehowa hte grau hku hkau wa hkra nang hpe karum ya lu ai. Dai majaw zuphpawng ni hpe galoi mung lung na matu ahkyak ai.—Hebre 10:24, 25.

6. Hkalup n hkam shi yang Chyum Laika kade daram chye ra ai kun?

⁶ Ehtiopi masha hpe hkalup n hkam shi yang, Chyum Laika lam yawng chye ra ai ngu nna Yehowa n myit mada wa ai. Dai zawn sha, nang hkalup n hkam shi yang, Chyum Laika lam yawng mayawng chye na matu Yehowa n myit mada ai. (Kasa 8:30, 31) Karai Kasang a lam matut nna galoi mung naw hkaja ra na re. (Hpaji Ningli 3:11) Raitim, hkalup hkam na matu Chyum Laika a madung lam ni hpe gaw chye na nna hkap la ra ai.—Hebre 5:12.

7. Chyum Laika hkaja ai gaw nang hpe gara hku akyu jaw ai kun?

⁷ “Makam masham n rawng yang gaw, shi a man e sharawng awng ai lu la na n rai” nga nna Chyum Laika hta tsun da ai. (Hebre 11:6) Dai majaw, nang hkalup n hkam shi yang, makam masham nga ra ai. Moi Korinhtu masha nkau mi gaw, Yesu a sape ni sharin ya ai hpe na la nna, “kam sham ai hte baptisma hkam la” wa ai lam Chyum Laika hta tsun da ai. (Kasa 18:8) Nang mung Chyum Laika hkaja wa sai majaw, Karai Kasang a ga sadi ni hte anhte hpe yubak hte si ai kaw nna shalawt ya ai Yesu a gawng malai jahpu hpe kam sham wa sai.—Yawshu 23:14; Kasa 4:12; 2 Timohti 3:16, 17.

8. Nang chye wa ai lam kaga masha ni hpe tsun dan na matu hpa gaw shadut ya ai kun?

⁸ Chyum Laika hpe grau hkaja yang, na a prat hpe gara hku akyu jaw ai lam chye wa nna, makam masham mung grau ngang kang wa na re. Nang chye wa ai hpe mung  kaga masha ni hpe tsun dan mayu wa na re. (Yeremia 20:9; 2 Korinhtu 4:13) Raitim, nang kadai hpe tsun dan na kun?

9, 10. (a) Nang chye wa ai lam ni hpe kadai ni hpe shawng tsun na kun? (b) Nawku hpung hte rau hkaw tsun mayu yang nang hpa galaw ra ai kun?

⁹ Nang chye wa ai lam ni hpe nta masha ni, manang ni, htingbu ni hte bungli manang ni hpe tsun dan mayu na re. Raitim tsawra myit hte hkungga let tsun dan ra ai. Dai hpang nawku hpung hte rau hkaw tsun bungli hta nang shang lawm mayu na re. Nawku hpung hte rau hkaw tsun mayu yang, Chyum Laika sharin ya ai wa hpe tsun dan mai ai. Chyum ga matsun hte maren, asak hkrung na matu nang jin nga sai lam shi mu yang, hpung myitsu salang lahkawng hte jahkrum ya na re.

¹⁰ Dai hkrum zup ai lam hta hpa galaw na kun? Myitsu salang ni gaw, nang Chyum Laika a madung lam ni hpe chye na kam sham ai kun? Chyum ga matsun hte maren asak hkrung ai kun? Yehowa Sakse langai teng sha byin mayu ai kun? ngu ai ni hpe chye na matu nang hte shaga na re. Myitsu salang ni gaw, nang hte nawku hpung hta nga ai hpunau nauna ni yawng hpe tsawra ai majaw, shanhte hte shaga na matu hkrit n ra ai. (Kasa 20:28; 1 Petru 5:2, 3) Ndai hku hkrum ngut ai hpang, nawku hpung hte rau hkaw tsun mai sai nga yang nang hpe myitsu salang ni shana ya na re.

11. Nawku hpung hte rau hkaw tsun bungli n galaw shi yang hpa majaw galai shai na ahkyak ai kun?

¹¹ Nawku hpung hte rau hkaw tsun bungli n galaw shi yang, matut galai shai ra ai lam ni nga yang myitsu salang ni tsun dan na ra ai. Dai zawn galai shai na matu hpa majaw ahkyak ai kun? Anhte kaga ni hpe Karai Kasang a lam tsun dan ai shaloi, Yehowa a amying hkam la da ai ni re ai majaw, shi hpe shagrau ai lam hku nna asak hkrung ra ai.—1 Korinhtu 6:9, 10; Galati 5:19-21.

12. Masha yawng hpa majaw myit malai la ra ai kun?

¹² Hkalup garai n hkam shi yang, nang galaw ra ai lam ni nga ai. Kasa Pawlu gaw, “nanhte a yubak raw mat na matu, myit malai lu nna kayin wa ma rit” nga nna tsun wa ai. (Kasa 3:20) Myit malai lu ai ngu ai gaw hpa rai kun? Anhte galaw wa ai mara ni a matu, grai yawn ai ngu ai lachyum re. Ga shadawn, hpye ai amu galaw ai nga yang myit malai lu ra ai. Na a prat hta nang dang lu ai daram kaja ai hku asak hkrung wa yang pyi, myit malai la ra ai. Hpa majaw nga yang, anhte yawng gaw yubak masha ni re ai majaw, anhte a yubak mara ni hpe raw ya na matu, Karai Kasang kaw hpyi nem ra ai.—Roma 3:23; 5:12.

13. “Kayin wa marit” ngu ai lachyum gaw hpa rai kun?

¹³ Nang galaw wa ai lam ni a matu myit malai lu ai hte sha ngut sai kun? N ngut shi ai. “Kayin wa marit” nga nna Petru tsun da ai. Dai gaw, shut ai lam yawng hpe ninghkap ra nna teng man ai hpe galaw ra ai lachyum re. Ga shadawn, nang n sa ga ai shara de sa ai ngu nna myit yu ga. Kade nna yang lam shut ai hpe chye dat ai. Nang hpa galaw na kun? Matut n sa ai sha, bai kayin wa nna jaw ai lam de sa na re. Dai hte maren, Chyum Laika chye na wa ai shaloi, na prat hta galai shai ra ai lailen nkau mi hpe nang mu wa na re. Galai shai ra ai ni hpe galaw na matu shut ai lam kaw nna sharawng awng let kayin wa ra ai. Ngut yang teng man ai hpe galaw hpang ra ai.

14. Yehowa hpang tinang hkum hpe gara hku apnawng ra ai kun?

¹⁴ Kaga ahkyak ai lam langai gaw, hkalup n hkam shi yang, tinang hkum hpe Yehowa hpang apnawng ra ai. Yehowa hpang tinang hkum tinang apnawng ai gaw, Yehowa hpe sha nawku na, shi a myit ra ai hku asak hkrung na ngu akyu hpyi nna ga sadi jaw ai re.—Tara Jahprang 6:15.

15, 16. Marai langai Karai Kasang hpang tinang hkum hpe apnawng na matu hpa gaw myit shadut ya ai kun?

 ¹⁵ Yehowa hpe sha nawku na ngu ga sadi jaw ai gaw, na a prat hpe nang tsawra ai wa a matu sha, akyu jashawn ai hte bung ai. Numsha hte lasha shada da tsawra hkat taw ai ngu myit yu ga. Lasha gaw, numsha hpe grau chye wa ai shaloi, shi hpe grau tsawra wa nna hkungran mayu wa na re. Ndai gaw grai ahkyak ai dawdan lam rai nna numsha hpe shi grai tsawra ai majaw sharawng awng let hkungran na matu dawdan ai.

¹⁶ Yehowa a lam chye wa ai shaloi, anhte shi hpe tsawra wa nna kaja htum sak jaw mayu wa na re. Shi hpang akyu hpyi nna, tinang hkum tinang apnawng mayu wa hkra shadut ya na re. Yesu hpang hkan mayu ai ni gaw, “tinang hkum hpe ndang kau” ra ai nga nna Chyum Laika hta tsun da ai. (Marku 8:34) Lachyum gaw hpa rai kun? Na a prat hta Yehowa a ga madat ai hpe shawng tawn ra ai ngu tsun mayu ai re. Na a bandung hte ra sharawng ai lam ni hta grau nna Yehowa ra sharawng ai hpe shawng galaw na matu ahkyak ai.—1 Petru 4:2 hpe hti u.

17. Yehowa hpang apnawng na matu masha nkau hpa majaw htingnut ma ai kun?

¹⁷ Nkau mi gaw Yehowa hpe sha nawku na ngu ai ga sadi n dung lu na tsang ai majaw, Yehowa hpang apnawng na matu htingnut nga ma ai. Shanhte gaw apnawng da ai hte maren n galaw lu yang, Yehowa myit daw na hpe mung tsang ma ai. Apnawng da ai lam n nga yang, tinang kam ai hku hpa mi raitim mai galaw ai ngu sawn la ma ai.

18. Yehowa n ra ai hpe n galaw na matu nang hpe hpa gaw karum ya na kun?

¹⁸ Yehowa hpe tsawra ai myit gaw, mara galaw hkrup na tsang ai myit hpe tawt lai lu na matu karum ya ai. Hpa majaw nga yang, shi hpe tsawra ai majaw shi ntsa tawn ai  na a ga sadi hpe dung lu hkra shakut na re. (Hpaji Ningli 5:4; Kolose 1:10) Yehowa myit ra ai hku galaw na matu, grai yak ai nga nna hkam sha na n re. “Karai Kasang a hkang da ai ga hpe hkan galaw ai lam gaw, shi hpe tsaw ra ngu ai lam rai nga ai; shi a hkang da ai ga chyawm gaw, yak la nga ai n rai” nga nna kasa Yawhan tsun wa ai.—1 Yawhan 5:3.

19. Yehowa hpang apnawng na matu nang hpa majaw n tsang ra ai kun?

¹⁹ Yehowa hpang apnawng na matu hkum tsup ai masha byin ra ai nga nna n hpyi shawn da ai. Anhte galaw lu ai hta jan nna galaw na matu, shi n myit mada ai. (Shakawn 103:14) Teng man ai hpe nang galaw lu hkra shi karum ya na re. (Esaia 41:10) Na a myit masin mahkra hte shi hpe kam sham na nga yang, “shi na a lam shading na ra ai.”—Ga Shagawp 3:5, 6.

20. Karai Kasang kaw apnawng ngut ai hpang, hpa galaw ra ai kun?

²⁰ Yehowa hpang apnawng na matu nang jin nga sai kun? Yehowa hpang tinang hkum tinang apnawng ngut jang, kahtap nna galaw ra ai lam nga ai. Dai gaw hkalup hkam ra ai re.

21, 22. Na a makam masham hpe “n-gup hte tsun” ai lam gara hku madun mai ai kun?

²¹ Nang Yehowa hpang apnawng ngut nna, hkalup hkam mayu ai nga yang, myitsu salang hpung a hpa-awn hpe tsun dan u. Rai yang, shi gaw Chyum Laika madung lam ni hpe nang hte bai maram na matu, myitsu salang nkau mi hpe lajang ya na re. Nang hkalup hkam na hpe shanhte myit hkrum yang, Yehowa Sakse Ni a du wa na ginwang zuphpawng (sh) ninghtawn zuphpawng hta hkam mai sai lam tsun na re. Zuphpawng hta hkalup mungga hpe madat lu na. Mungga htawn ai wa gaw hkalup hkam na ni hpe ga san lahkawng san na re. Dai ga san  ni hpe masha a man hta “n-gup hte tsun” nna, na a makam masham hpe madun ra ai.—Roma 10:10.

²² Dai hpang nang hkalup hkam mai sai. Hka kata hta tsep kawp lup ra ai. Dai zawn hkalup hkam ai gaw, nang Yehowa hpe apnawng nna Yehowa Sakse langai rai sai lam masha yawng hpe madun dan ai re.

23. “Kawa a, Kasha a, chyoi pra ai Wenyi a amying nsang hta” hkalup hkam u ngu ai gaw hpa lachyum kun?

²³ Yesu gaw sape ni hpe “Kawa a, Kasha a, chyoi pra ai Wenyi a amying nsang hta” hkalup hkam ra ai nga nna tsun wa ai. (Mahte 28:19 hpe hti u.) Lachyum gaw hpa  rai a ta? Lachyum gaw, Yehowa a ahkang aya hte shi a yaw shada lam hta lawm ai Yesu a lit hpe hkap la ra ai. Yehowa gaw shi myit ra ai hku byin wa hkra chyoi pra ai wenyi hpe akyu jashawn nga ai lam hpe mung hkap la ra ai.—Shakawn 83:17; Mahte 28:18; Galati 5:22, 23; 2 Petru 1:21.

24, 25. (a) Hkalup hkam ai gaw hpa a masat dingsat rai kun? (b) Hpang jahtum daw hta anhte hpa lam hkaja na kun?

²⁴ Hkalup hkam ai gaw grai ahkyak ai masat dingsat re. Nang hka hta lup dat ai gaw, na a prat dingsa hpe tawn kau da sai ngu ai lachyum re. Hka hta na bai pru wa ai shaloi, prat ningnan hte Yehowa a magam gun sana ngu ai lachyum re. Dai aten kaw nna Yehowa a magam gun hpang sana ngu ai hpe madun ai. Raitim, marai langai, hpung langai (sh) bungli langai a matu nang apnawng ai n re ai hpe dum ra ai. Hpan Madu Yehowa hpang apnawng ai she re.

²⁵ Na a apnawng ai lam gaw, Karai Kasang hte grau hku hkau wa hkra karum ya na re. (Shakawn 25:14) Hkalup hkam ngut ai hte hkye hkrang la hkrum sai n re. Chyum Laika hta “jahtum du hkra shakut sharang ai wa gaw, hkye hkrang la ai hkrum na” nga nna tsun da ai. (Mahte 24:13) Dai majaw, hkalup hkam ai gaw nnan hpang ai she re. Rai yang, Yehowa hte matut nna gara hku nihtep lu na kun? Ndai laika buk a hpang jahtum daw hta ndai ga san a mahtai hpe chye lu na re.