1. Ulota kulyudya dashi baada yakulipundisha Libuku ali?

PAULIPUNDISHIDYE libuku ali, undimanya umwiu woe wa mu Ibibiliya. Kwampano: lilindililo lyakupata shingumi shíkamalilika, umwiu kwaupande wa vakupela, na lilindililo lyakudyuka kwa vakupela. (Nkúvalanga 9:5; Lukashi 23:43; Nshuwau 5:28, 29; Maono 21:3, 4) Inkuululika kenga unditunduvanga kuka kumikutano vya mashaidi va Yeova na unkwamini kenga vanavo vankutandedya malotelo a Nnungu. (Nshuwau 13:35) Unkuulula kulyona kenga unditunduvanga tayali umbodi wako namu Yeova, na unkulota untumikile. Kanji unkuulula kulyudya doni: ‘Inguvaikidile ngutende nyamani pakulota nintumikile Nnungu?’

2. Nyamani shintadidye mwitiyope alote ubatisho?

 ² Ibibiliya inkummalanga nnume jumo mwitiyope ashilota amanye nyamani shivaikidile atende pakulota antumikile Nnungu. Muwakati padyoko baada ya kudyuka Yesu, Pilipo nkwoda umwe Yesu andímwandadidya ntenga munu ajo. Pilipo andímupa wakika kenga Yesu avele mashiya. Mwitiyope ajo inínnagwela namene ashilá shampundishídye Pilipo, na akaudya doni: “Wako, medi ala apa. Da shipali shinu shingudingadínga shakungutadya napate ubatisho?”—Vitendo 8:26-36

3. (a) Yesu avalamulidile nyamani vakwoda vake? (b) Ubatisho wa vaklistu uvaikidile uve dashi?

³ Ibibiliya inkupundisha ngala kenga pakulota untumikile Yeova, indikuvaikila upate ubatisho. Yesu andivalamulila vakwoda vake doni: “Wena mukavatadye vanu vave vakwoda vangu muvenentete uti muvabatisha.” (Mateu 28:19) Yesu anditupa mpano wakati wapatile ubatisho. Nae havantajíle medi padyoko mmuti kanji mili wake uti vanínshuvika mmedi. (Mateu 3:16) Wetu yadavo, munu pabatishwa mili uti vananshuvika mmedi.

4. Paubatishwa uvalodya nyamani vanu?

⁴ Paubatishwa, uvalodya vanu kenga ulota uve umbodi wa Nnungu na untumikile. (Dimu 40:7, 8) Kanji inkuululika kulyudya doni: ‘Inguvaikidile ngutende nyamani pakulota ngubatishwe?’

5. (a) Shikuvaikidile utende nyamani ukanava kubatishwa? (b) Mwaa shani ni shinu shikumene kuka ngwengwe kumikutano?

⁵ Ukanava kubatishwa, ikuvaikidile ummanye Yeova namu Yesu. Wako unditunduvanga kupata limanyilo alyo kwa kulipundisha Ibibiliya. (Shomya Nshuwau 17:3.) Kanji mapundisho alo gweka  hanatosha shinu. Ibibiliya inkutwaulila pakulota ‘tuumbaligwe na limanyilo liu lyalilotelo’ lyake Yeova. (Vakoloshu 1:9) Mikutano vya mashaidi va Yeova, vinakupwashela wako kuvanavo limanyilo na kunonowanga umbodi wako namu Yeova. Ai ni shabaa ikumene ilota kukutadya wako kuka kumikutano ngwengwe.—Vabalaniya 10:24, 25.

6. Ukanava kubatishwa, ikuvaikidile umanye nyamani kwaupande wa Ibibiliya?

⁶ Kwaumwiu, Yeova hanakulindila shinu wako umanye vinu uti vyamu Ibibiliya pakulota ubatishwe. Yeova hanindidíle Mwitiyope amanye vinu uti hakanava kubatishwa. (Vitendo 8:30, 31) Tunauka mushu tulipundisha vyake Nnungu Yeova ngwengwe. (Nkúvalanga 3:11) Kanji ukanava kubatishwa, ikuvaikidile umanye mapundisho akutunduvanga amu Ibibiliya na ukulupile.—Vabalaniya 5:12.

7. Mapundisho lamu Ibibiliya akupwashadile dashi?

⁷ Ibibiliya inkushidoni: “Kwabila likulupililo hayululika kunnagwaledya Nnungu.” (Vabalaniya 11:6) Wako ikuvaikidile uvenavo likulupililo ukanava kubatishwa. Ibibiliya inkuvalanga kenga vanu vanji vakunjini waku Kolintu pavaigwite mapundisho na vakwoda vake Yesu, vanavo “vandíkulupila, na vandípata ubatisho.” (Vitendo 18:8) Wako yadavo, mapundisho a Ibibiliya andikupwashela kuvanavo likulupililo kwa avilá vyalivikidile Nnungu, na shadaka shaumidye Yesu pakulota kutwambola mulidambi na kupela.—Yoshuwa 23:14; Vitendo 4:12; 2 Timoti 3:16, 17.

8. Ni nyamani Shilota kukutadya wako kuvamanyia vanu avilá vyaulipundisha mu Ibibiliya?

⁸ Ukauka mushu ulipundisha Ibibiliya na wona  ipaida yake mushinamilo shako, likulupililo lyako linanonowangika. Lyanavo linakutadya wako kuvamayia vanu avilá vyaulipundisha. (Yelemiya 20:9; 2 Vakolintu 4:13) Kanji ulota kuvamanyia vanyani?

9, 10. (a) Ulota kummanyia nyani avilá vyaulipundisha? (b) Shikuvaikidile utende nyamani ukalota kwandadya ntenga pamo na shipinga?

⁹ Unkuulula kuvamanyia valikola lyako, vavao, majilani au vavao vakumadengo avilá vyaulipundisha. Ukatenda davo shindava shinu shambone, kanji ivaikidile utangole kwa wambone na kwalinagwaledyo. Ikakunagwela kutunduvanga kwandandya ntenga pamo na shipinga, mwaulile anakupundisha Ibibiliya. Mwalimu wako akakwona kenga unkuvaikila na shinamilo shako shinkulingana na mwailatela Ibibiliya, wako na mwalimu wako indivaikila mukadyane na vanang’olo vavili vashipinga. Baada ya apo, unkuulula kwandandya ntenga pamo na shipinga.

¹⁰ Vanag’olo avo valota kutangola nyamani? Vanavo valota kukudyangidya wako pakulota vamanye kenga unkumanya na unkukulupila mapundisho akutunduvanga amu Ibibiliya, na mwiu unkulota uve Nshaidi wa Yeova. Manya kenga vanang’olo, vankushunga shipinga uti mpaka wako momo na linagwaledyo, ndyomana hainavaikila shinu wako uvajope kutangolanavo. (Vitendo 20:28; 1 Patulu 5:2, 3) Baada ya nkutano awo, vanang’olo vanakushema pakulota kukwaulila kenga unkuvaikila kwandadya ntenga pamo na shipinga.

11. Mwaa shani ni shinu shikumene kutenda mabadiliko ukanava kwandadya ntenga pamo na shipinga?

¹¹ Inkuululika vanang’olo kukwaulila pakulota utende mabadiliko lavaikidile ukanava kutunduvanga kwandadya ntenga pamo na shipinga. Mwaa shani ni shinu shikumene kutenda mabadiliko alo? Mwaa  patwandadya ntenga, tunkulyunganianga namu Nnungu Yeova, ndyomana shinamilo shetu shivaikidile shive shaishima.—1 Vakolintu 6:9, 10; Vagalata 5:19-21.

12. Mwaa shani wetu uti indituvaikila tulyambile?

¹² Shipali shinu shinji shikuvaikidile utende ukanava kubatishwa. Myombe patulu anditangola doni: ‘Nadoni lyambile na shiliuka pakulota madambi enu alivalivigwe.’ (Vitendo 3:19) Kulyambila manaake nyamani? Kulyambila ni kulimanya kenga unditenda vinu vyakunyata na kuleka vyautandile. Kwampano, ikava kenga wako ushinavanavo shinamilo shakulauka ikuvakidile ulyambile. Ata ikava kenga ushinalikanyalidya kutenda vinu vyambone, indikuvaikila ulyambile mwaa wetu uti tuvakutega, na indituvaikila tunjugwe Nnungu pakulota atulivalive madambi etu.—Valoma 3:23; 5:12.

13. Kushiliuka manaake ni nyamani?

¹³ Da inkutosha kulyambila vila kwamwaa wa vinu vyakunyata vyautandile? Mene. Myombe Patulu anditangola kenga ikuvaikidile “ushiliuke.” Manaake ni kuleka shinamilo shakunyata na kutunduvanga kutandedya wambone. Kwampano, kumbukila kenga wako unkuka kushinu kwaukanava kupita. Baada yakupita wakati padyoko, ukalyanalela kenga undijaika. Ulota kutenda dashi? Kwaumwiu, wako unawena padiki, kutwala kwimila na undashiliuka pakulota uke indila yaulota. Nimumu momo mwakuvalalele kulipundisha kwa Ibibiliya, inkuululika kwanalela madyavalelo au shinamilo shivaikidile kuleka. Indikuvaikila uvenavo lilotelo “lyakushiliuka”—au kwamalove lanji, shilateka  ni kutenda mabadiliko na kutunduvanga kutandedya wambone.

14. Ukalijaula kwake Yeova unkulilodya nyamani?

¹⁴ Imbande inji ikuvaikidile wako utende ukanava kubatishwa, ni kulijaula kumwe Yeova. Paulijaula kumwe Yeova kwaindila ya kushwali, unkulilodya kenga unalipudya kwake nae bai na unavika mushu malotelo ake mushinamilo shako.—Kumbukumbu 6:15.

15, 16. Nyamani shinantadya munu kulijaula kwake Nnungu?

¹⁵ Kukubali kuntumikila Yeova bai, ni kenga kulivikila kunama na munu akunagwadile pakati pashinamilo shako. Kumbukila vanu vavili valindila kulambana. Wakati aija nnume palota kummanya shana nkongwe. Ata ikava kenga kulambana hashinava shinu shadimbenje, kanji kwamwaa wakunnagwaledya shana aija nkongwe, nae anava tayali kunnomba.

¹⁶ Kulingana na mwaulipundishidya kwaupande umwe Yeova, wako unannagwaledya na unava tayali kulota kuntumikila. Ashi ni shilota kukutadya wako kulijaula na kumwaulila nkati mukushwali kenga uve tayali kuntumikila nae. Ibibiliya inkushidoni: kula munu aija alota kumwoda Yesu “alishukulu jo mwene.” (Malukushi 8:34) Kutenda davo manaake nyamani? Manaake kuntumikila Yeova ni shinu shitandi nkati mushinamilo shako. Yeova akulota wako uvike malotelo ake nae kuva shinu shitandi kupunda malotelo ako.—Shomya 1 Patulu 4:2.

17. Mwaa shani vanu vanji havanalijaula shinu kumwe Yeova?

¹⁷ Vanu vanji havanalijaula shinu kumwe Yeova, mwaa vankujopa kutatakela kutandedya avilá vyavalivikidile  pakulota kuntumikila Nnungu. Vanavo havanalota shinu kunkashedya Yeova, na vakumbukila kenga vakanalijaula havaitikanga shinu kumwe Yeova.

18. Nyamani shilota kukupwashela wako pakulota haunajope kunkashedya Yeova?

¹⁸ Linagwaledyo lyako kumwe Yeova, linakupwashela wako kuleka makumbukililo akujopa kunkashedya nae. Kwamwaa wakunnagwaledya, undalikanyalidya kutandedya avilá vyaulivikidile. (Nkúvalanga 5:4; Vakoloshu 1:10) Wako haikukamadyangidya shinu kutenda malotelo ake Yeova. Myombe Nshuwau andyaandika doni: “Amu ni mwatunnagwaladyedya Nnungu kwaupande wetu: patwigwilila malamulo ake na malamulo ake lo, hanaidopa shinu.”—1 Nshuwau 5:3.

19. Mwaa shani hainakuvaikila shinu ujope kulijaula kumwe Yeova?

¹⁹ Hainakuvaikila shinu uve munu ukave kasholo pakulota ulijaule kumwe Yeova. Nae mwiko hatujugwa shinu wetu tutende vinu vyatukaulula. (Dimu 103:14) Yeova andakupwashela wako kutenda wambone. (Ishaiya 41:10) Nkulupile Yeova na ntima wako uti, ‘nae andaudulanga dindila dyako.’—Mikong’o 3:5, 6.

20. Baada ya kulijaula kumwe Yeova, ikuvaikidile utende nyamani shinji?

²⁰ Wako uvele tayali pakulota kulijaula kumwe Yeova? Baada ya kulijaula kumwe Yeova, shipali shinu shinji shikuvaikidile utende. Ikuvaikidile ubatishwe.

21, 22. Ulota kulilodya dashi kenga, unkwang’ula paumbala nkati mulikulupililo lyako?

²¹ Ikava kenga undilijaula tayali, mwaulile nkúlangalela madengo pakati pavanang’olo vashipinga shako, pakulota amanye kenga, wako undilijaula  kumwe Yeova na ulota ubatishwe. Nae andavajugwa vanang’olo vashipinga pakulota kukukumbuwanga mapundisho akutunduvanga amu Ibibiliya pamo namu wako. Vanavo vakakwona kenga wako undivaikila kubatishwa, vandakwaulila kenga unauka nabatishwa muwakati ulota kupagwa nkutano ukumene wa Mashaidi va Yeova. Muwakati wa nkutano awo, nung’unumunu jumo anatangalanga avalanga mana a ubatisho. Pankutano awo, nkúvalanga ntenga andavajugwa  avalá valota kubatishwa pakulota vajang’ule vyakudya vivili. Paulota kujang’ula vyakudya avyo mushu, undalilodya kenga ‘unkwang’ula paumbala’ nkati mu likulupililo lyako.—Valoma 10:10.

²² Baada ya apo undabatishwa. Mili wako uti vandakushuvika mmedi. Ubatisho undalodya shalowa kenga wako undilijaula kumwe Yeova, na kutunduvangila apo wako ni Unshaidi wa Yeova.

23. Kubatishwa ‘palina lya Tata, lya Mwana, na lya imumu yanashwe’ Manaake nyamani?

²³ Yesu andívalanga kenga vakwoda vake vakandibatishwa ‘palina lya Tata, lya Mwana na lya imumu yanashwe.’ (Shomya Mateu 28:19.) Manaake nyamani? Palina lya Tata manaake kwamini kenga Yeova ni Nnungu Wadimongo-uti, palina lya Mwana manaake ni kumanya na kwishimu shimadengo shimwe Yesu nkati mu malotelo a Nnungu, na palina lya imumu yanashwe manaake ni kumanya kenga Yeova atumila imumu yanashwe pakulota kutenda malotelo ake.—Dimu 83:18; Mateu 28:18; Vagalata 5:22, 23; 2 Patulu 1:21.

24, 25. (a) Ubatisho manaake nyamani? (b) Shakudya shani shilota kujang’uligwa mu lishomo lyamwisho lya libuku ali?

²⁴ Ubatisho unkuvanavo mana makumene kwetu. Pavakushuvika mmedi, manaake ni kenga undipela au undileka shinamilo shako shakala. Pauma mmedi, ni kenga kutunduvanga shinamilo shaambi na kuva tayali pakulota kutenda malotelo a Nnungu. Wako paubatishwa, uvalodya vanu kenga kutunduvangila ambi ulota kuntumikila Yeova. Manya kenga haunalijaula shinu kwavanu, lishilika au kwa lidengo lyoelyoe. Wako ulijaula kumwe Yeova.

²⁵ Kulijaula kwako kundakupwashela kunanowanga umbodi wako namu Yeova. (Dimu 25:14) Kanji kupata kwa ubatisho gweka hakunava shinu kenga wako undyambolegwa. Myombe paulu andyandika doni: ‘Wena mushu mutandedya kwambwalegwa kwenu mujopa na mutatamela.’ (Vapilipo 2:12) Ubatisho ni shitunduvangilo. Kanji ulota kuulula dashi kummandika Yeova? Shakudya ashi shinajang’uligwa mu lishomo lyamwisho lya libuku ali.