1. Сірернің хайдағ сурығ поларға айабас?

ПУ КИНДЕНІ ӱгреніп, сірер Библиядағы кӧп ӱгредіглернең танызып алғазар, кӧзідімге: мӧгі чуртастаңар, ӱреен соонда кізінең ниме полчатханынаңар паза тірілістеңер (Экклезиаст 9:5; Лука 23:43; Иоанн 5:28, 29; Азых чоох 21:3, 4). Сірер Иегованың киречілерінің чыылығларына чӧріп, олар Худайға орта пазырчатханнарын піліп алған поларзар (Иоанн 13:35). Иегованаң палғалызыңар пиктең пик полып одырчатхан ӱчӱн ағаа  нымысчыланарға хын сыххазар, арса. Андада сірер сағынча поларзар: «Ам мағаа ниме идерге?»

2. Ноға эфиоп кіреске тӱзерге хынған?

² Иисус Христостың тузында чуртаан эфиоптың андағох сурығ полған. Ол сурған: «Мына суғ, мағаа кіреске тӱзерге ниме харығ полча?» (Илҷілернің 8:26—36). Ноға ол кіреске тӱзерге хынған? Филипп, Иисус Христостың ӱгренҷілерінің пірсі, Иисус Мессий полчатханын ағаа чарыда чоохтап пирген, анзы аның чӱреене теңен, аннаңар ол кіреске тӱзерге идібіскен.

3. а) Иисус ӱгренҷілеріне ниме идерге чахаан? б) Кізіні хайди кіреске тӱзірерге кирек?

³ Библияда Иеговаа нымысчыланарға хынчатхан кізее кіреске тӱзерге кирек тіп кӧні чоохталча. Иисус Христос позының ӱгренҷілерін нымысчыланарға ысханда, «кіреске тӱзіріп... оларны Минің ӱгренҷілерім ит салыңар» тіп чахаан (Матфей 28:19—20). Христос позы даа кіреске тӱскен. Ол кіреске тӱскенде, аның пазын на ӧллебееннер, ол суға пӱкӱлее кірген (Матфей 3:16). Амғы туста ідӧк, христианнар кіреске тӱсчетселер, оларға суға пӱкӱлее кірерге кирек.

4. Кіреске тӱскені ниме кӧзітче?

⁴ Кізі, кіреске тӱзіп, Худайның нанҷызы поларға паза ағаа нымысчыланарға хынчатханын кӧзітче (Псалом 40:7, 8). Кіреске тӱзер алнында ниме идерге кирек?

5. а) Кіреске тӱзерге хынчатсар, иң пастап ниме идерге кирек? б) Ноға Иегованың киречілерінің чыылығларына чӧрерге кирек?

⁵ Кіреске тӱзер алнында, Иеговадаңар паза Иисус Христостаңар пілістер алып аларға кирек. Сірер Библияны ӱгреніп пастааннаң сығара пілістер ал сыххазар.  (Иоанн 17:3 хығырыбызыңар.) Че анзы пастағы ла алтым. Библия, тізең, Иегованың пӧгіннерінеңер «толдыра піліс» аларға кӧӧктірче (Колосстағыларға 1:9). Анзында Иегованың киречілерінің чыылығлары полыс пирерлер. Ӧме чыылығларына сыбыра чӧрзер, Худайнаң пик палғалыстығ пол поларзар (Еврейлерге 10:24, 25).

6. Кіреске тӱзер алнында Библияны нинҷе чахсы пілерге кирек?

⁶ Иегова сірердең, кіреске тӱзер алнында, Библияда пазылған прай нимені пілзіннер тіп сағыбинча. Кіреске тӱзерге пӧгін алған эфиоптаң анзын сағыбаанох (Илҷілернің 8:30, 31). Піс Худайдаңар пілістерні тоозылбас-парбас тус аларбыс (Экклезиаст 3:11). Кіреске тӱзер ӱчӱн, Библияның ӧӧн ӱгредіглерін пілерге паза оларнаң чаразарға кирек (Еврейлерге 5:12).

7. Библиядаң алған пілістер сірерге хайди теңеннер?

⁷ Библияда чоохталча: «Киртінізі чох кізілернің пірдеезі Худайның кӧңніне кірбес» (Еврейлерге 11:6). Аннаңар кіреске тӱзер алнындох, кізінің киртінізі поларға кирек. Библияда пурунғы коринфтегілернің піреелері Иисустың ӱгренҷілерінің нимее ӱгреткеннерін ис салғанда, «киртініп, кіреске тӱскеннер» тіп чоохталча (Илҷілернің 18:8). Ідӧк сірер, Библиядаң пілістер алып, Худайның молҷағларына паза Иисустың тайии чазыхтаң паза ӧлімнең сірерні осхыр поларына киртін сыххазар (Иисус Навин 23:14; Илҷілернің 4:12; 2 Тимофейге 3:16, 17).

8. Пілістернең кемнең-де ӱлезерге сірерні ниме кӧӧктірер?

⁸ Библиядаң пілістер алып одырзар паза олар чуртазыңарда хайди полысчатханнарын кӧрзер,  киртінізіңер пиктең пик ле полып одырар. Андада ол пілістердеңер кемге-де чоохтирыңар килер (Иеремия 20:9; 2 Коринфтегілерге 4:13).

9, 10. а) Алған пілістернең кемнең ӱлезерге чарир? б) Ӧменең хада Худай сӧзін искіріп пастир ӱчӱн, ниме идерге кирек?

⁹ Арса, наа алған пілістернең сӧбіредегілернең, нанҷыларнаң, хонҷыхтарнаң паза хада тоғынчатханнарнаң ӱлезерге хынарзар. Ӱлесчетсер, паарсаснаң паза хыныснаң чоохтаңар. Пола-пола ӧмедегілернең хада Худай сӧзін искір поларзар. Ӧменең хада Худай сӧзін искірерге хынзар, аннаңар сірернең хада Библия ӱгренчеткен кізее чоохтаңар. Ол кізі, сірерні искірігҷі поларға тимде тіп санапчатса паза сірер Библияның принциптерінің хоостыра чуртапчатсар, сірернең хада ікі ах сағалнаң тоғазарға чоохтас салар.

¹⁰ Ол тоғазығ Библияның ӧӧн ӱгредіглерін орта оңнапчатханыңарны, оларға киртінчеткеніңерні, ол пілістер хоостыра чуртапчатханыңарны, Иегованың киречізі поларға сынап хынчатханыңарны піліп алар ӱчӱн иртірілер. Ол тоғазығдаң хорыхпаңар, ах сағаллар ӧмедегілердеңер сағыссырапчалар нооза (Илҷілернің 20:28; 1 Петрның 5:2, 3). Ол тоғазығ соонда ах сағаллар сірерге ӧменең хада Худай сӧзін искірерге чарир ба, чарабас па чоохтап пирерлер.

11. Ӧменең хада Худай сӧзін искірер алнында, ноға чуртазыңарда кирек алызығлар идерге кирек?

¹¹ Арса, ах сағаллар сірерге, ӧменең хада Худай сӧзін искірер алнында, чуртазыңарда ниме-де алыстырарға кирек тіп чоохтирлар. Ноға алызығлар идерге кирек? Піс Худайдаңар чоохтапчатсабыс, аның представительлері полчабыс, аннаңар піске Худайның сын нымысчыларына турыстығ чуртас апарарға кирек  (1 Коринфтегілерге 6:9, 10; Галат чиріндегілерге 5:19—21).

12. Ноға прай кізілерге пыросынарға кирек?

¹² Кіреске тӱзер алнында паза пірее ниме идерге кирек пе? Пётр илҷі теен: «Чазыхтарың тасталзын тіп, пыросыныңар паза Худайзар айланыңар» (Илҷілернің 3:19). Пыросынғаны нимедір ол? Мының алнында иткен саба киректердеңер ачырғанғаны. Кӧзідімге, сайбах чуртас апарған ползар, пыросынарға кирек. Чуртас тооза орта тудынарға кӱстенгеннерге дее пыросынарға кирек, прай кізілер чазыхтығлар паза Худай оларның пыроларын тастирында кирексінчелер нооза (Римдегілерге 3:23; 5:12).

13. «Айланғаны» нимедір ол?

¹³ Саба тудынған ӱчӱн пыросынғаннаң пасха пірее ниме идерге кирек пе? Йа. Пётр илҷі айланарға алай саба тудынысты артыс салып, наа чуртас апар сығарға кирек тіп чоохтаан. Кӧзідімге, сірер хайдағ-да саарзар пастағызын на парчазар. Саба чолҷа парчатханыңарны сизін салзар, ниме идерзер? Турыбызарзар, анаң нандыра айланып, орта чолҷа пар сығарзар. Библияны ӱгреніп, ідӧк, чуртазыңарда пірее ниме алыстырарға кирек полчатханын сизін саларзар, арса. Андада алызарға алай айланарға паза орта тудынарға тимде поларзар ба?

14. Худайға пирінгені нимедір ол?

¹⁴ Кіреске тӱзер алнында паза пір аарлығ алтым идерге кирек — ол Иеговаа пирінгені. Иеговаа ла  пазырарға паза аның кӧңнін чуртаста пастағы орынға турғызарға сӧс пирчеткен пазырыс Худайға пирінгені полча (Второзаконие 6:15).

15, 16. Нименің ӱчӱн кізі Худайға пирінібізерге хынар?

¹⁵ Иеговаа нымысчыланарға сӧс пиргенін пір кізінең чуртас тооза чуртирға сӧс пиргенінең тиңнестірерге чарир. Пір кӧзідім кӧр кӧреелер. Чиит оол хыснаң таныс сыхча. Ол аны чахсыдаң чахсы піліп одырча, нинҷе-де тус пазынаң, ағаа хыныбызып, аны ал саларға идібісче. Ипчі алғаны уғаа нандырығлығ пӧгін полчатханын ол пілче, че ол ағаа хынча, аннаңар аны ал саларға тимде.

¹⁶ Иегованаң чахсыдаң чахсы таныссар, ағаа хыныбызып, прай чӱрекнең ағаа нымысчыланарға хын сығарзар. Андада Худайға нымысчыланарға пазырыста сӧс пирерге кӧңніңер кӧдірілер. Библияда Иисустың соонҷа парарға итчеткеннер постарынаңар ундут салзыннар тіп чоохталча (Марк 8:34). Постаңар хайди ундут саларға? Худайның сӧзінең хаҷан даа хыйа сыхпасха кирек, аның кӧңнін толдырғаны позыбыстың кӧңнібістең паза кӧстеглерібістең аарлығ нооза. (1 Петрның 4:2 хығырыбызыңар.)

17. Ноға піреелері Худайға пирінминчелер?

¹⁷ Кем-де, Иеговаа пирген сӧзімні тут полбаспын тіп хорығып, Иеговаа пирінминче. Ол кізі Иегованы ачырғандырарға хынминча. Кем-де сағынча: Худайға пирінмезем, хомай киректер итчеткенім ӱчӱн нандырығ тударға кирек чох полар.

18. Нандырығ тударынаң хорыхпасха ниме полызар?

 ¹⁸ Иеговаа хыныс нандырығ тударынаң хорығысты тобырарға полыс пирер. Ағаа хынчатсар, пирген сӧзіңерні хайди даа тударға кӱстенерзер (Экклезиаст 5:4; Колосстағыларға 1:10). Худайның кӧңнін толдырарға уғаа аар тіп сағынмассар. Иоанн илҷі пас салған: «Худайның чахығларын толдырчатханыбыс Ағаа хынчатханыбысты таныхтапча. Аның чахығларын толдырарға, тізең, тың аар нимес» (1 Иоанның 5:3).

19. Ноға Иеговаа пирінерге хорығарға кирек чоғыл?

¹⁹ Иегова ағаа пирінібізерге хынчатханнар пыро чох поларға киректер тіп сағынминча. Худай піс ит полбас нимені киректебинче (Псалом 103:14). Ол піске орта тудынарға полызарбын тіп молҷапча (Исаия 41:10). Библияда чоохталча: «Иеговаа прай чӱрееңнең ізен... Ол синің чолларыңны тӱзет пирер» (Притчи 3:5, 6).

20. Иеговаа пирінібіскен соонда ниме идерге кирек?

²⁰ Иеговаа пирінібіскен ползар, пасха алтым идерге тимдезер. Ол алтым — кіреске тӱскені.

21, 22. Хайди сірер Худайға нымысчыланарға хынчатханыңарны чон алнында кӧзіт пирерзер?

²¹ Сірернің ӧмедегі ах сағалларның чӧбінің координаторына Иеговаа пазырыста пирінібіскем паза кіреске тӱзерге хынчам тіп чоохтап пиріңер. Ол ах сағалларның піреелерін сірернең Библияның ӧӧн ӱгредіглерін ӱзӱрібізерге сурынар. Олар, сірернің тимде полчатханыңарны кӧр салзалар, Иегованың киречілерінің иң чағын конгрезінде кіреске тӱзерге  чарадарлар. Анда кіреске тӱскені ниме таныхтапчатханын чарытчатхан чоох чоохталар. Анаң чоох чоохтапчатхан харындас кіреске тӱсчеткеннерге ікі олаңай сурығ пирер. Ол сурығларға «йа» тіп нандырып, сірер чон алнында Худайға нымысчыланарға хынчатханыңарны кӧзідерзер (Римдегілерге 10:10).

 ²² Амды сірер кіреске тӱзерге тимдезер. Сірерні пӱкӱлее суға кирерлер. Сірернің кіреске тӱскеніңер Иеговаа пирінібіскеніңерні паза мыннаң сығара Иегованың киречізі полчатханыңарны кӧзідер.

23. «Пабаның, Оолғының паза Худай Худының адынаң» кіреске тӱскені ниме таныхтапча?

²³ Иисус аның ӱгренҷілері «Пабаның, Оолғының паза Худай Худының адынаң кіреске тӱзерге» киректер теен. (Матфей 28:19—20 хығырыбызыңар.) Анзы піс Иегованы прай нименің пазы тіп санапчатханыбысты, Худайның сағын салған сағызында Иисус Христостың рольын пілчеткенібісті паза Иегова кӧңнін толдырарында ызых хутнаң тузаланчатханын оңнапчатханыбысты таныхтапча (Псалом 83:18; Матфей 28:18; Галат чиріндегілерге 5:22, 23; 2 Петрның 1:21).

24, 25. а) Кіреске тӱскені ниме таныхтапча? б) Халғанҷы пастағда нимедеңер чоох парар?

²⁴ Кіреске тӱсчеткен туста суға пӱкӱлее кіргені мының алнындағы чуртасха ӧл парчатханын таныхтапча, суғдаң сыхханы, тізең, сірер Худайның нымысчызы полып, наа чуртасты пастапчатханыңарны кӧзітче. Ундутпаңар, сірер кізее, организацияа алай пірее кирекке пирінминчезер. Сірер чуртазыңарны Иеговаа пирчезер.

²⁵ Худайға пирінгені паза кіреске тӱскені Иегованаң ынархазыңарны пик идерлер (Псалом 25:14). Че анзы, сірер кіреске тӱссер, хайди даа арачылан халарыңарны таныхтабинча. Павел илҷі теен: «Хорығып, халтырап ала, арачыланысха чидіңер» (Филипптегілерге 2:12). Ундутпаңар, кіреске тӱскені — арачыланысха апарчатхан пастағы алтым. Иегованаң аарлығ палғалысты чідірбес ӱчӱн, паза ниме идерге кирек? Пу сурығны халғанҷы пастағда ӱзӱрібізербіс.