ون سەگىزىنشى تاراۋ
قۇدايعا باعىشتالىپ، شومىلدىرۋ راسىمىنەن ٶتۋ
1. وسى كىتاپتى زەرتتەۋ بارىسىندا قانداي ويعا كەلدىڭىز؟
ٴسىز وسى كىتاپتى زەرتتەۋ بارىسىندا كيەلى كىتاپتان ٴبىراز شىندىقتاردى، مىسالى قۇدايدىڭ ماڭگى ٶمىردى ۋادە ەتكەنىن، ولگەن سوڭ اداممەن نە بولاتىنىن جانە مارقۇمداردىڭ تىرىلەتىنىن ٴبىلدىڭىز (ۋاعىزداۋشى 9:5؛ لۇقا 23:43؛ جوحان 5:28، 29؛ ايان 21:3، 4). ەحوبا كۋاگەرلەرىنىڭ جينالىستارىنا بارىپ، ولاردىڭ قۇدايعا دۇرىس عيبادات ەتەتىنىنە كوز جەتكىزگەن دە شىعارسىز (جوحان 13:35). سونداي-اق ەحوبامەن دوستىعىڭىز نىعايا ٴتۇسىپ، ونىڭ قىزمەتشىسى بولعىڭىز كەلەتىن شىعار. سودان «قۇدايعا قىزمەت ەتكىم كەلسە، نە ىستەۋىم كەرەك؟» دەپ ويلاناتىن بولارسىز.
2. ەفيوپيالىق كىسى شومىلدىرۋ راسىمىنەن نە سەبەپتى وتكىسى كەلگەن؟
2 ٴبىرىنشى عاسىردا ٶمىر سۇرگەن ەفيوپيالىق ٴبىر كىسى قۇدايدىڭ قىزمەتشىسى بولعىسى كەلگەن. يسا تىرىلگەننەن ٴبىرشاما ۋاقىت وتكەن سوڭ، ول كىسىگە يسانىڭ ٴفىلىپ ەسىمدى شاكىرتى ۋاعىزدادى. ٴسۇيتىپ، وعان يسانىڭ ٴماسىح بولعانىن دالەلدەپ بەردى. بىلگەندەرى قاتتى اسەر ەتىپ، الگى كىسى: «مىناۋ سۋ عوي! شومىلدىرۋ راسىمىنەن وتۋىمە قانداي كەدەرگى بار؟»— دەدى (ەلشىلەردىڭ ىستەرى 8:26—36).
3. ا) يسا ٸزباسارلارىنا قانداي تاپسىرما بەرگەن؟ ٵ) شومىلدىرۋ ٴراسىمى قالاي وتكىزىلەدى؟
3 كيەلى كىتاپتا ەحوباعا قىزمەت ەتكىسى كەلەتىن ادامنىڭ شومىلدىرۋ راسىمىنەن ٶتۋى كەرەكتىگى انىق ايتىلعان. يسا ٸزباسارلارىنا: «بارلىق حالىقتاردان شاكىرتتەر دايىنداپ، ولاردى... شومىلدىرۋ راسىمىنەن وتكىزىڭدەر»،— دەگەن (ماتاي 28:19). يسانىڭ ٶزى دە شومىلدىرۋ راسىمىنەن ٶتىپ ۇلگى كورسەتتى. ول سۋعا تولىعىمەن باتىپ شىقتى (ماتاي 3:16). بۇگىندە دە ماسىحشىلەر شومىلدىرۋ راسىمىنەن وتكەندە، سۋعا تولىق باتىرىلىپ شىعارىلادى.
4. شومىلدىرۋ راسىمىنەن وتكەندە، ٴسىز نەنى كورسەتەسىز؟
4 شومىلدىرۋ راسىمىنەن وتكەندە، ٴسىز قۇدايدىڭ دوسى بولىپ، وعان قىزمەت ەتكىڭىز كەلەتىنىن جۇرت الدىندا پاش ەتەسىز (ٴزابۇر 40:7، 8). شومىلدىرۋ راسىمىنەن ٶتۋدى قالاساڭىز، قانداي قادامدار جاساۋىڭىز كەرەك؟
ٴبىلىم جانە سەنىم
5. ا) شومىلدىرۋ راسىمىنەن ٶتۋ ٷشىن نە ىستەۋ كەرەك؟ ٵ) ەحوبا كۋاگەرلەرىنىڭ جينالىستارىنا بارۋ نەگە ماڭىزدى؟
5 شومىلدىرۋ راسىمىنەن ٶتۋ ٷشىن، ەحوبا مەن يسا تۋرالى ٴبىلىم الۋ كەرەك. ٴسىز كيەلى كىتاپتى زەرتتەۋدىڭ ارقاسىندا مۇنداي ٴبىلىمدى الىپ تا جاتىرسىز (جوحان 17:3 وقىڭىز). ٴبىراق بۇل جەتكىلىكسىز. كيەلى كىتاپتا: «ونىڭ [ەحوبانىڭ] ەركى جايلى تۋرا بىلىمدەرىڭ ارتا بەرسىن»،— دەپ جازىلعان (قولوستىقتارعا 1:9). بۇل ورايدا ەحوبا كۋاگەرلەرىنىڭ جينالىستارى زور كومەك بولادى. بۇل كەزدەسۋلەر ەحوبامەن تىعىز قارىم-قاتىناس دامىتۋعا كومەكتەسەدى. سوندىقتان جينالىستارعا ۇزبەي بارۋ وتە ماڭىزدى (ەۆرەيلەرگە 10:24، 25).
شومىلدىرۋ راسىمىنەن وتپەس بۇرىن، كيەلى كىتاپتى زەرتتەۋ قاجەت
6. شومىلدىرۋ راسىمىنەن وتكىسى كەلەتىن ادام كيەلى كىتاپتى قانشالىقتى ٴبىلۋ كەرەك؟
6 ەحوبا سىزدەن شومىلدىرۋ راسىمىنەن ٶتۋ ٷشىن كيەلى كىتاپتا جازىلعانداردىڭ ٴبارىن ٴبىلۋدى تالاپ ەتپەيدى. ول مۇنى ەفيوپيالىق كىسىدەن دە تالاپ ەتپەگەن (ەلشىلەردىڭ ىستەرى 8:30، 31). ٴبىز قۇداي تۋرالى ماڭگىلىك بويى ٴبىلىم الاتىن بولامىز (ۋاعىزداۋشى 3:11). ٴبىراق شومىلدىرۋ راسىمىنەن ٶتۋ ٷشىن كەم دەگەندە كيەلى كىتاپتاعى نەگىزگى ىلىمدەردى ٴبىلىپ، سولارعا سەنۋ قاجەت (ەۆرەيلەرگە 5:12).
7. كيەلى كىتاپتى زەرتتەۋدىڭ ارقاسىندا نە نارسەگە قول جەتكىزدىڭىز؟
7 كيەلى كىتاپتا: «سەنىم بولماسا، قۇدايعا ۇناۋ مۇمكىن ەمەس»،— دەلىنگەن (ەۆرەيلەرگە 11:6). سوندىقتان شومىلدىرۋ راسىمىنەن ٶتۋ ٷشىن سەنىمنىڭ بولعانى ماڭىزدى. ەجەلگى قورىنت قالاسىندا كەيبىر ادامدار يسانىڭ ٸزباسارلارىنان ىزگى حاباردى ەستىگەن، ناتيجەسىندە ايتىلعاندارعا «سەنىپ، شومىلدىرۋ راسىمىنەن وتكەن» (ەلشىلەردىڭ ىستەرى 18:8). ٴسىز دە كيەلى كىتاپتان ٴبىلىم العاننىڭ ارقاسىندا قۇدايدىڭ ۋادەلەرىنە جانە يسانىڭ ٴبىزدى كۇنا مەن ولىمنەن ازات ەتۋ ٷشىن ٶمىرىن قۇربان ەتكەنىنە سەندىڭىز (ەشۋا 23:14؛ ەلشىلەردىڭ ىستەرى 4:12؛ تىموتەگە 2-حات 3:16، 17).
كيەلى كىتاپتان بىلگەنىمىزدى باسقالارعا ايتۋ
8. كيەلى كىتاپتان بىلگەنىمىزدى باسقالارعا ايتۋعا نە تالپىندىرادى؟
8 ٴبىلىمىڭىز ارتىپ، ومىرىڭىزدە كيەلى كىتاپتىڭ كوپ پايداسىن كورگەندە، سەنىمىڭىز كۇشەيە تۇسەدى. سوندا بىلگەندەرىڭىزدى باسقا دا ادامدارعا ايتۋدى قالارسىز (ەرەميا 20:9؛ قورىنتتىقتارعا 2-حات 4:13). مۇندايدا كىمدەرگە ايتساڭىز بولادى؟
سەنىم كيەلى كىتاپتان بىلگەندەرىڭىزدى باسقالارعا ايتۋعا قوزعاۋ سالادى
9، 10. ا) بىلگەندەرىڭىز جايلى ايتۋدى كىمدەردەن باستاۋعا بولادى؟ ٵ) قاۋىممەن بىرگە ۋاعىزداعىڭىز كەلسە، نە ىستەۋىڭىز كەرەك؟
9 ٴسىز بىلگەندەرىڭىزدى تۋىستارىڭىز، دوستارىڭىز، كورشىلەرىڭىز بەن ارىپتەستەرىڭىزگە ايتقىڭىز كەلۋى مۇمكىن. بۇل وتە جاقسى. ٴبىراق ىزەتتىلىكپەن، مەيىرىممەن سويلەۋدى ۇمىتپاڭىز. ۋاقىت وتە ەحوبا كۋاگەرلەرىمەن دە ۋاعىزداۋدى قالارسىز. بۇل جايىندا سىزبەن كيەلى كىتاپتى زەرتتەيتىن ادامعا ايتساڭىز بولادى. ول ٴسىزدى قاۋىمداعى باۋىرلاستارمەن ۋاعىزداۋعا دايىن ٵرى كيەلى كىتاپتىڭ تالاپتارىنا ساي ٶمىر سۇرەدى دەپ ەسەپتەسە، ەكەۋىڭىز قاۋىمداعى ەكى اقساقالعا جولىعاسىزدار.
10 اقساقالدار سىزبەن سويلەسىپ، كيەلى كىتاپتاعى نەگىزگى ىلىمدەردى تۇسىنەسىز بە، ولارعا سەنەسىز بە، كيەلى كىتاپتا ايتىلعانعا ساي ٶمىر سۇرەسىز بە، ەحوبا كۋاگەرى بولۋدى شىنىمەن قالايسىز با، سونى انىقتايدى. اقساقالدار قاۋىمداعى ٵربىر ادامنىڭ، سونىڭ ىشىندە سىزدىڭ دە قامىڭىزدى ويلايتىندىقتان، ولارمەن سويلەسۋدەن قورىقپاڭىز (ەلشىلەردىڭ ىستەرى 20:28؛ پەتىردىڭ 1-حاتى 5:2، 3). سىزبەن سويلەسكەننەن كەيىن ولار سىزدىڭ قاۋىمداعى باۋىرلاستارمەن ۋاعىزداۋعا دايىن نە دايىن ەمەس ەكەنىڭىزدى ايتادى.
11. قاۋىممەن ۋاعىزداماس بۇرىن ومىرىڭىزدە وزگەرىستەر جاساۋ نەلىكتەن ماڭىزدى؟
11 بالكىم، اقساقالدار سىزگە قاۋىممەن ۋاعىزداماس بۇرىن تاعى ٴبىر وزگەرىستەر جاساۋىڭىز كەرەكتىگىن ايتاتىن شىعار. ولارعا قۇلاق اسقانىڭىز وتە ماڭىزدى. ويتكەنى باسقالارعا قۇداي تۋرالى ۋاعىزداعاندا، ٴبىز ەحوبانىڭ اتىنان سويلەيمىز، سوندىقتان ٴجۇرىس-تۇرىسىمىز دا ونى ماداقتايتىنداي بولۋى كەرەك (قورىنتتىقتارعا 1-حات 6:9، 10؛ عالاتتىقتارعا 5:19—21).
وكىنۋ جانە تەرىس جولدان قايتۋ
12. نەگە بارلىق ادام وكىنۋى قاجەت؟
12 شومىلدىرۋ ٴراسىمىنىڭ الدىندا تاعى ٴبىر نارسە جاساۋ قاجەت. ەلشى پەتىر: «وكىنىپ، تەرىس جولدان قايتىڭىزدار. سوندا كۇنالارىڭىز كەشىرىلەدى»،— دەگەن (ەلشىلەردىڭ ىستەرى 3:19). مىسالى، زيناقورلىق جاساپ، ونەگەسىز ٶمىر سۇرگەن ادام مۇنىسىنا قاتتى وكىنۋى قاجەت. ٴتىپتى ەڭ جاقسى دەگەن ادامنىڭ ٶزى دە وكىنۋى كەرەك. سەبەبى ادامداردىڭ ٴبارى دە كۇناكار، سوندىقتان قۇدايدىڭ كەشىرىمىنە مۇقتاج (ريمدىكتەرگە 3:23؛ 5:12).
13. «تەرىس جولدان قايتۋ» دەگەن نەنى بىلدىرەدى؟
13 كۇنالارىمىزعا وكىنۋ جەتكىلىكتى مە؟ ەلشى پەتىر «تەرىس جولدان قايتۋ» كەرەكتىگىن دە ايتقان. بۇل بۇرىن جاساعان جامان ىستەردى تاستاپ، ەحوباعا ۇنامدى ٶمىر ٴسۇرۋدى بىلدىرەدى. مىسال ٷشىن، ٴسىز ٴبىر بەيتانىس جەرگە كولىكپەن بارا جاتىرسىز دەلىك. ٴبىراز ۋاقىتتان كەيىن مۇلدەم باسقا جولعا ٴتۇسىپ كەتكەنىڭىزدى بايقايسىز. سوندا نە ىستەيسىز؟ جىلدامدىقتى ازايتىپ، كولىكتى بۇراسىز دا، دۇرىس جولعا تۇسەسىز. سول سياقتى، قۇدايدىڭ ٴسوزىن وقىپ-ٴبىلۋ بارىسىندا وزىڭىزدىڭ وزگەرتۋ كەرەك جاقتارىڭىزدى بايقاۋىڭىز مۇمكىن. سول كەزدە «تەرىس جولدان قايتۋدى»، ياعني وزگەرىستەر جاساۋدى كەيىنگە قالدىرماڭىز جانە دۇرىس ارەكەت ەتۋدى باستاڭىز.
ٶمىردى قۇدايعا باعىشتاۋ
ەحوباعا عانا قىزمەت ەتۋدى ۋادە ەتتىڭىز بە؟
14. ەحوباعا باعىشتالۋ دەگەن نە؟
14 شومىلدىرۋ راسىمىنەن ٶتۋ ٷشىن جاساۋ كەرەك تاعى ٴبىر ماڭىزدى قادام — ٶمىرىڭىزدى ەحوباعا باعىشتاۋ. بۇل دەگەنىمىز — ەحوباعا عانا قىزمەت ەتىپ، ونىڭ ەركىن ومىرىڭىزدە باستى ورىنعا قوياتىنىڭىزدى دۇعادا ۋادە ەتۋ (مۇسانىڭ 5-جازباسى 6:15).
15، 16. ادامدى ٶمىرىن قۇدايعا باعىشتاۋعا نە تالپىندىرادى؟
15 ٶمىردى ەحوباعا باعىشتاۋدى وزىڭنىڭ سۇيەتىن ادامىڭمەن بۇكىل ٶمىرىڭدى وتكىزۋگە ۋادە ەتۋمەن سالىستىرۋعا بولادى. مىسالى، كەزدەسىپ جۇرگەن قىز بەن جىگىتتى الايىق. جىگىت قىزدى جاقسىراق بىلگەن سايىن، ونى جاقسى كورىپ، سول قىزعا ۇيلەنۋدى شەشەدى. ۇيلەنۋ وتە جاۋاپتى شەشىم بولسا دا، جىگىت بۇعان دايىن، سەبەبى ول قىزدى شىن سۇيەدى.
16 ەحوبامەن قارىم-قاتىناسىمىزدا دا سولاي. ەحوبا جايلى بىلگەن سايىن ونى جاقسى كورىپ، وعان جان-تانىمىزبەن قىزمەت ەتكىمىز كەلەدى. ناتيجەسىندە دۇعادا وعان قىزمەت ەتۋدى ۋادە ەتەمىز. كيەلى كىتاپتا يسانىڭ شاكىرتى بولعىسى كەلەتىندەر «وزدەرىنەن باس تارتۋلارى» كەرەكتىگى جازىلعان (مارقا 8:34). بۇل نەنى بىلدىرەدى؟ بۇل بارلىق جاعدايدا ەحوباعا مويىنسۇنۋدى، ونىڭ ەركىن جەكە قالاۋلارىمىز بەن ماقساتتارىمىزدان جوعارى قويۋدى بىلدىرەدى (پەتىردىڭ 1-حاتى 4:2 وقىڭىز).
جاۋاپكەرشىلىكتەن قورىقپاڭىز
17. كەيبىرەۋلەر ومىرلەرىن ەحوباعا نە سەبەپتى باعىشتامايدى؟
17 كەي ادامدار ەحوباعا بەرگەن ۋادەمدە تۇرا المايمىن دەپ قورىققاندىقتان، ومىرلەرىن وعان باعىشتامايدى. ولار ەحوبانى رەنجىتىپ الۋدان قورقادى نەمەسە «ەحوباعا باعىشتالماساق، ٸس-ارەكەتىمىز ٷشىن ونىڭ الدىندا جاۋاپ بەرمەيمىز» دەپ ويلايدى.
18. ەحوبانى رەنجىتىپ الامىن دەپ قورىقپاۋعا نە كومەكتەسەدى؟
18 ەگەر ەحوبانى جاقسى كورسەڭىز، ونى رەنجىتىپ الامىن دەپ قورىقپايسىز. ويتكەنى ونى سۇيگەندىكتەن، وعان بەرگەن ۋادەڭىزدە تۇرۋعا بار كۇشىڭىزدى سالاسىز (ۋاعىزداۋشى 5:4؛ قولوستىقتارعا 1:10). ەحوبانىڭ قالاۋىن ورىنداۋ قيىن دەگەن ويدا بولمايسىز. ەلشى جوحان: «قۇدايدى ٴسۇيۋ دەگەنىمىز — ونىڭ وسيەتتەرىن ورىنداۋ. ال ولاردى ورىنداۋ قيىن ەمەس»،— دەپ جازعان (جوحاننىڭ 1-حاتى 5:3).
19. ەحوباعا باعىشتالۋدان نەگە تارتىنباعان ٴجون؟
19 ەحوباعا باعىشتالۋ ٷشىن ٴمىنسىز بولۋ تالاپ ەتىلمەيدى. ول بىزدەن ەشقاشان شامامىز كەلمەيتىن نارسەنى ىستەۋدى سۇرامايدى (ٴزابۇر 103:14). ول دۇرىس ارەكەت ەتۋىمىزگە كومەكتەسەدى (يشايا 41:10). كيەلى كىتاپتا: «ەحوباعا بار جۇرەگىڭمەن سەنىم ارت،.. سوندا ول جولىڭدى تەگىستەر»،— دەپ جازىلعان (ناقىل سوزدەر 3:5، 6).
شومىلدىرۋ راسىمىنەن ٶتۋ
20. قۇدايعا باعىشتالعاننان كەيىنگى قادام قانداي؟
20 شومىلدىرۋ راسىمىنەن وتۋگە دايىنسىز با؟ ٶزىڭىزدى ەحوباعا باعىشتاعان بولساڭىز، جاساۋىڭىز كەرەك كەلەسى قادام — شومىلدىرۋ راسىمىنەن ٶتۋ.
21، 22. قاي كەزدە «سەنىمىڭىزدى اۋىزبەن جاريالايسىز»؟
21 ٴسىز اقساقالدار كەڭەسىنىڭ ۇيلەستىرۋشىسىنە جولىعىپ، ەحوباعا باعىشتالعانىڭىزدى جانە شومىلدىرۋ راسىمىنەن وتكىڭىز كەلەتىنىن ايتساڭىز بولادى. ول بىرنەشە اقساقالدىڭ سىزبەن سويلەسۋىنە قام جاسايدى. ولار سىزبەن كيەلى كىتاپتىڭ نەگىزگى ىلىمدەرىن شولىپ شىعادى. اقساقالدار ٴسىزدىڭ دايىن ەكەنىڭىزگە كوز جەتكىزسە، ەحوبا كۋاگەرلەرىنىڭ كونگرەسىندە شومىلدىرۋ راسىمىنەن وتە الاتىنىڭىزدى ايتادى. كونگرەستە وسى راسىمنىڭ ٴمانى تۇسىندىرىلەتىن بايانداما ايتىلادى. بايانداماشى شومىلدىرۋ راسىمىنەن وتۋشىلەرگە قاراپايىم ەكى سۇراق قويادى. سول سۇراقتارعا داۋىستاپ جاۋاپ بەرگەندە، «سەنىمىڭىزدى اۋزىڭىزبەن جاريالايسىز» (ريمدىكتەرگە 10:10).
22 سودان كەيىن سۋعا تولىعىمەن باتىرىلىپ، شومىلدىرۋ راسىمىنەن وتەسىز. شومىلدىرۋ راسىمىنەن ٶتۋ ارقىلى ٶمىرىڭىزدى ەحوباعا باعىشتاعانىڭىزدى جانە ەحوبا كۋاگەرى بولعانىڭىزدى ەل الدىندا پاش ەتەسىز.
شومىلدىرۋ راسىمىنىڭ ٴمانى
23. «اكەنىڭ، ۇلدىڭ جانە كيەلى رۋحتىڭ اتىنان» شومىلدىرۋ راسىمىنەن ٶتۋ دەگەن نە؟
23 يسا شاكىرتتەرى «اكەنىڭ، ۇلدىڭ جانە كيەلى رۋحتىڭ اتىنان» شومىلدىرۋ راسىمىنەن وتەتىنىن ايتقان (ماتاي 28:19 وقىڭىز). بۇل نەنى بىلدىرەدى؟ «اكەنىڭ اتىنان» دەگەن ەحوبانىڭ بيلىگىن مويىنداۋدى بىلدىرەدى. ال «ۇلدىڭ جانە كيەلى رۋحتىڭ اتىنان» دەگەن ەحوبا ٶز نيەتىن جۇزەگە اسىرۋ ٷشىن يسانى جانە كيەلى رۋحىن قولداناتىنىن مويىنداۋدى بىلدىرەدى (ٴزابۇر 83:18؛ ماتاي 28:18؛ عالاتتىقتارعا 5:22، 23؛ پەتىردىڭ 2-حاتى 1:21).
شومىلدىرۋ راسىمىنەن وتكەندە، قۇداي ەركىن ورىنداعىڭىز كەلەتىنىن كورسەتەسىز
24، 25. ا) شومىلدىرۋ ٴراسىمىنىڭ ٴمانى قانداي؟ ٵ) سوڭعى تاراۋدان نە بىلەمىز؟
24 شومىلدىرۋ ٴراسىمىنىڭ ٴمانى وتە تەرەڭ. ادام سۋعا باتىرىلعاندا، بۇرىنعى ٶمىرى ٷشىن ولگەنىن، ياعني جامان ىستەرىن تاستاعانىن بىلدىرەدى. ال سۋدان شىققاندا، ەندى قۇدايدىڭ ەركىن ورىنداۋ ٷشىن ٶمىر سۇرەتىنىن بىلدىرەدى. ەش ۇمىتپاڭىز، ٴسىز ٶمىرىڭىزدى ادامعا، ۇيىمعا نە ٴمانساپقا ەمەس، ەحوباعا ارنايسىز.
25 قۇدايعا ٶمىرىڭىزدى ارناساڭىز، ونىمەن قارىم-قاتىناسىڭىز نىعايادى (ٴزابۇر 25:14). ٴبىراق شومىلدىرۋ ٴراسىمى قۇتقارىلۋعا كەپىلدىك ەمەس. ەلشى پاۋىل: «قۇتقارىلۋعا ۇمتىلا بەرىڭدەر»،— دەپ جازعان (فىلىپىلىكتەرگە 2:12). شومىلدىرۋ ٴراسىمى — قۇتقارىلۋ ٷشىن جاسالاتىن العاشقى قادام عانا. ولاي بولسا، ەحوبامەن دوستىعىمىز ٵرى قاراي دا بەرىك بولۋ ٷشىن نە ىستەي الامىز؟ بۇل تۋرالى سوڭعى تاراۋدا ايتىلادى.
