1. Bu muubamanyik myand ya biin-biin yivul yidy mu Bibl, wiiyihahanguj misang yikwaabw bicy?

MUKULONG kwa mukand oow, udy mulong myand yivul ya biin-biin yidy mu Bibl. Cileejel, udy mujingunun biin-biin habitaatal bafw, kutakamin kwa kusanguk, ni mulay a buumy bwa mwendelel. (Muleej 9:5; Luuk 23:43; Jah 5:28, 29; Myand Yisokolweel Jah 21:3, 4) Utweetweel misang yikwaabw mu bisangil bya Batemw ba Yehow ni wiitaatabiij neey bahahambidil Mawej mu mushind mulengel. (Jah 13:35) Cikwaabw, ukaady  mutwaadij kukashish biin-biin bulund ni Yehow ni udy mukat kumukadil mudimw. Ki wiiyihahanguj misang yikwaabw neey: ‘Nady ni bwa kulong biny bwa kukadil Mawej mudimw?’

2. Bwabingany mwiin Etiyopih ukacil bwa kutambuley?

² Mwiin Etiyopih wakaadyok ciisang cya Yeez wiiyihangujil cyaakadyey ni bwa kulong bwa kukadil Mawej mudimw. Ciisang kahand hanyim ha kusanguk kwa Yeez, umw wa ku biiyij bindiy, Filipw, waakady mudiil muut oow musah. Umujaadikil neey, Yeez waakady Mesih. Mwiin Etiyopih umvwiil bya muteng ku micim umvwiiley bwaal oobw ni umb waleeb neey: “Talaak, mwanz yoowoh, i cingany cikuleelekesh bwiibuh kuuyiiteel [kubatiiz]?”​—Myand yilongel Bapostol 8:26-36.

3. a) I diiy kaay dyaakady Yeez mwambil biiyij bindiy? b) I mushind kaay udyobw babaatiiz muut?

³ Bibl uleeleeb hatook neey: uw mukat kukadil Yehow mudimw, bikaam utambul. Yeez wambiil biiyij bindiy neey: “Yindaay byeen, kudy baat ba bis byoos bya ha bulab, nwiibaalabul bashaal biiyij ba mim. Nwiibiiteel [Nwiibabatiz].” (Matewus 28:19) Yeez utwaadil cileejel hatambwiiley. Kabaakadyoh bend bamuhumwiin kamwanz kakeeh ha mut, ki bamutweejel yiy woos mu mwanz. (Matewus 3:16) Hady mwiin Krist utambul baatiisumw, bikaam bamutweej yiy woos mu mwanz.

4. Hady muut utambul baatiisumw, uleeleej biny kudy bakwaabw?

⁴ Hady muut utambul baatiisumw, uleeleej kudy bakwaabw mudyey mukat kwiikal biin-biin mulund a Mawej ni ukat kumukadil mudimw. (Misambw 40:7, 8, NWT) Kaabaak oow, udy mwa kwiiyihanguj misang yikwaabw neey: “Bikaam nalong biny bwa kutambul baatiisumw?”

5. a) Bikaam ulong biny kuuhal kwiibuh kutambul baatiisumw? b) Bwabiny bisangil bya biin Krist bidy ni buseeb?

⁵ Kuuhal kwiibuh kutambul baatiisumw, bikaam ulong bwa kumanyik Yehow ni Yeez. Utangil kal kulong nook, ha kulong Bibl bwa kwiibamanyik. (Bal Jah 17:3.) Ki kabiin bikaam kwimanyin hiinaah. Bibl uleeleeb neey, nwiikal: “Bamanyik bamanyikilomw myand” ya lukat lwa Yehow. (Kolos 1:9) Bisangil bya Batemw ba Yehow biiyiiy kukukwanjok bwa kwiikal ni bulund bukasakan menmen ni Yehow. Ki kabingil ka buseeb katutweetweedyel mu bisangil misang yoos.​—Ebreh 10:24, 25.

6. Kuuhal kwiibuh kutambul, bikaam umanyik malongweesh kaay ma mu Bibl?

⁶ Yehow kiish ukulomb bwa umanyik myand yoos yidy mu Bibl kuuhal kwiibuh kutambul baatiisumw. Yehow kaakady mulomb mwiin Etiyopih bwa neey amanyik myand yoos kuuhal kwa kutambul baatiisumw. (Myand yilongel Bapostol 8:30, 31) Mu biin-biin, twiiyiiy kutungunuk ni kulong myand yihyaamuhy habitaatal Mawej. (Muleej 3:11) Ki kuuhal kwa kutambul baatiisumw, bikaam umanyik ni wiitab malongweesh mashimat ma mu Bibl.​—Ebreh 5:12.

7. I mu mushind kaay mudy kulong kwa Bibl kukukwanjok?

⁷ Bibl uleeleeb nook, kakuy diitabij i bikasakan bwa kutookel Mawej ku micim. (Ebreh 11:6) Bikaam wiikal ni diitabij kudy Mawej kuuhal kwiibuh kutambul baatiisumw. Hanyim a baman kumvw cyaakady biiyij ba Yeez balongweesh, baat bakwaabw ba mu cibunj cya korent “biitabijil byaabw ni biibiiteelel [bibaabatizil].” (Myand yilongel Bapostol 18:8) Bya mushind aakaabumw, kulong kwiibuh kwa Bibl i kukukwanjok bwa kwiikal ni diitabij mu malay ma Mawej. I kukukwanjok cikwaabw bwa kwiikal ni diitabij mu mulambw a Yeez, udy mwa  kwiitukuul ku pekaat ni ku lufw.​—Jozuweh 23:14; Myand yilongel Bapostol 4:12; 2 Timoteh 3:16, 17.

8. I cingany ciikal mwa kukusak bwa kwambil bakwaabw myand yiwuloolong?

⁸ Hawuloolong bikasakan myand ya Bibl, wiiyiiy kutal mudyey yikukwanjok mu shikacil iibuh, ni diitabij diibuh diiyiiy kukasakan. Wiiyiiy kwiikal ni micim ya kwambiloh bakwaabw myand yiwuloolong. (Jeremih 20:9; 2 Biin Korent 4:13) I bangany bawudy mwa kwambil myand yiwuloolong?

9, 10. a) I bangany ba kuuhal-hal bawudy mwa kwambil myand yiwudy mulong? b) Bikaam ulong biny uw mukat kudiil baat musah aakaabumw ni cisumbw?

⁹ Wiiyiiy kumvw micim misang yikwaabw yikusak bwa kwambiloh biin mu cisak ciinun, balund biibuh, biin mutumb ni banukakal naab mudimw myand yiwuloolong. I bwaal bulengel, ki i bambil teng mu mushind mulengel ni bukalang. Kuuhal kwa mafuk, wiiyiiy kukat bwa kudiil baat musah ni cisumbw. Hawiiyiiy kwiiyumvw neey ukaady habwiih, ambil Temw ukuloolongweesh Bibl, neey nady mukat kudiil baat musah aakaabumw ni cisumbw. Yiy mulang neey ukaady mukumban ni ukaady ni shikacil umvumvwangan ni may matam ma mu Bibl, diib aady uw ni yiy nuyay katal bakuluuh babidy ba mu cisumbw.

¹⁰ Kusambakeen ook kudy ni kihacil kaay? Bakuluul biiyiiy kwiisamb neeb bwa kutal ni udy mumanyik malongweesh mashimat ma mu Bibl, ning udy mwiimiitabij, wiimakokooyel mu shikacil iibuh wa mafuk moos, ning udy mukat biin-biin kwiikal Temw a Yehow. Kuciin bwa kwiisamb ni bakuluuh. Vuluk neey: bakuluuh biitatacish bwa baat bady mu cisumbw, ni bwiibuh byeeb. (Myand yilongel Bapostol 20:28; 1 Pyeel 5:2, 3) Hanyim a mwiisamb  oow, bakuluuh biiyiiy kukwambil ning udy mukumban bwa kudiil baat Musah aakaabumw ni cisumbw.

11. Bwabiny i bya buseeb buvul bwa kufutulul bilong biibuh mu myand yikwaabw kuuhal kwa kudiil baat musah aakaabumw ni cisumbw?

¹¹ Bakuluuh biiyiiy ku kumvwiij misang yikwaabw neey bikaam ufutulul bilong biibuh mu myand yikwaabw kuuhal kwa kudiil baat musah aakaabumw ni biin mu cisumbw. Bwabiny i bya buseeb buvul bwa kufutuluk? Bwaal atwambambil baat bakwaabw myand habitaatal Mawej, tudy baleej-hal ba Yehow. Bikaam twiikal ni shikacil umwaamwaakish lutumb.​—1 Biin Korent 6:9, 10; Kalatih 5:19-21.

12. Bwabiny bikaam baat boos biifwiij naay?

¹² Kuuhal kwa kutambul baatiisumw, kudy bwaal kahand buwudy mwa kulong. Mupostol Pyeel uleebel neey: “Naak, ifwiijaay naay bwa mibiih yiinun, yaalabulaay micim, bwa Mawej avulaminok buyiil myand yiinun yibiih.” (Myand yilongel Bapostol 3:19, NWT) “Kwiifwiij” kumvumvwiij biny? Kumvumvwiij kwiikunying kwa biin-biin kwa bwaal boos bubiih butudy balong. Cileejel, uw mulong pekaat a masandy, bikaam wiifwiij naay. Ning uw mwiikal muteet kulongok bwaal bulengel, udy teng bwa kwiifwiij naay. Bwaal tut boos tudy bamulong a pekaat. Nook, tukakaam bwa Mawej itufwiil lus ni avulaminok mibiih yiitut.​—Biin Rom 3:23; 5:12.

13. “Kwaalabuk” kumvumvwiij biny?

¹³ I bikumban teng kwiikunying bituh bwa myand yibiih yiwudy mulong eeny? Waakweeh. Pyeel uleebel cikwaabw neey, bikaam “kwaalabuk.” Aaby byumvumvwiij neey bikaam kulek bikadil bibiih ni kulong myand yilengel. Cileejel: uyaay cyaab kahand bwa musang iibuh a kuuhal. Kunyim, wiiyiiy kujingunun neey ukaady muhamban njil. Wiiyiiy kulong biny?  Kakuy mpat, utetekesh lwend, wiiman, “uhihingomw” ni wangat njil mulengel. Bya mushind aakaabumw, ha wuloolong Bibl, wiiyiiy kujingunun misang yikwaabw neey bikaam ufutuluk mu shikacil iibuh eeny ulek bikadil bibiih. Iikal habwiih bwa “kwaalabuk,” i bwiin kuleeb neey i bya buseeb bwiibuh kufutuluk ni long myand yilengel.

14. “Kwiilambul” kudy Yehow kumvumvwiij biny?

¹⁴ Kuuhal kwa kutambul baatiisumw, bikaam ulong bwaal bukwaabw bwa buseeb: wiilambul kudy Yehow. Kwiilambul kudy Mawej, i ku mulay mu diisambil neey, teng yiy uwiikal mwa kuhambidil ni kuteek lukat lwindiy a cyaab cya kuuhal mu shikacil iibuh.​—May Mumbulul 6:15.

15, 16. I biny bisasak muut bwa kwilambuley kudy Yehow?

¹⁵ Kulay bwa kukadil teng Yehow mudimw, bidy bu kulay bwa kushikat ni muut utudy bakat mu mafuk ma buumy mady mashaal. Twangat cileejel: lang neey sand mwaan-mulum ni sand mwaan-mukaj baloolongangan bikadil bwa kumonangan. Hady sand mwaan-mulum ulong bikadil bya sand mwaan-mukaj, hadyeby bimusangeej, umukakat bikasakan ni umulalay bwa kumumon. I dihangadik dya buseeb, bwaal i mu mukat, udy habwiih bwa kwangatey majit ma mu diibak.

¹⁶ Hawuloolong bwa kumanyik Yehow, wiiyiiy kumukat bikasakan ni wiiyiiy kulong mwiibuh moos bwa kumukadil mudimw. Biiyiiy bikusak bwa kumulay mu diisambil, bwa kumukadil mudimw. Bibl uleeleeb neey: oow woos udy mukat kulond yeez, “alek kuteek myand yindiy kuuhal.” (Mark 8:34) Byumvumvwiij neey kukooyel Yehow i bwaal bwa buseeb buvul kuwudy. Biin-biin, cidy Yehow mukat cidy ni buseeb buvul kuhitok kwaalakan kwiitut ni bihacil biitut.​—Bal 1 Pyeel 4:2.

17. Bwabiny baat bakwaabw baciciin bwa kwiilambulobw kudy Yehow?

¹⁷ Baat bakwaabw baciciin bwa kwiilambulobw kudy Yehow bwaal balaalang neey kabakukumbajoh bend mulay a babw bwa kumukadil mudimw. Kabiin bakat kumumb mwanz ku mikon. Eecy balang neey, babw kabay bilambul kudy Mawej, kakwiibalumbulwiishoh bend bwa myand yidyobw balong.

18. I biny bidy mwa kukukwanjok bwa kucimun mooy bwa kulek kumb Yehow mwanz ku makas?

¹⁸ Lukat luwudy naalw bwa Yehow lwiiyiiy kukukwanjok bwa kucimun mooy, bwa kulek kumumb mwanz ku makas. Bwaal hawumukakat, wiiyiiy kulong mwiibuh moos bwa kukumbaj mulay iibuh. (Muleej 5:4; Kolos 1:10) Kuleeboh bend neey i bikasakan menmen bwa kulong lukat lwa Yehow. Mupostol Jah ufundil neey: “Bwaal, kukat Mawej, i kukooyel ku may mindiy. Ni may mindiy kamiishoh bend mahit kwiitukasakeen.”​—1 Jah 5:3.

19. Bwabiny kwiin mwa kumvw mooy bwa kwiilambul kudy Yehow?

¹⁹ Kabiish bikaam kwiikal muwaakan bwa kwiilambul kudy Yehow. Kiin wiitulomb myand yitudy katuy ni bukookesh bwa kulong. (Misambw 103:14) Wiiyiiy kukukwanjok bwa kulong cidy cilengel. (Yeshaay 41:10) Uw muteek mucim iibuh woos kudyey naak, “myand yiibuh yoos yiwuloolong, naak yiy wiiyiiy kukuleej mwa kwiikal kwiiyilong.”​—Tusumw 3:5, 6.

20. Bikaam ulong biny uw muman kwiilambul kudy Yehow?

²⁰ Ukady habwiih bwa kwiilambul kudy Yehow eeny? Hanyim a uw muman kwiilambul kudy Yehow, bikaam utambul baatiisumw.

21, 22. I mushind kaay uwudy mwa “kuleeb hatook” diitabij diibuh?

 ²¹ Leej mulombol a kasumbw ka bakuluuh ba cisumbw ciinun neey ukaady muman kwiilambul kudy Yehow ni ukakaam kutambul baatiisumw. Wiiyiiy ulomb bakuluuh bwa bakononon neeb malongweesh mashimat ma mu Bibl. Babw batal neey ukaady mukumban, biiyiiy bakwambil neey udy mwaakutambul baatiisumw mu ciwiil eeny mu wiil a batemw ba Yehow. Mu  wiil, baloolongomw mwiisamb wiiyiiy kuleej cidy kutambul baatiisumw kumvwiij. Hanyim mulong a mwiisamb wiiyiiy umb baat batatambul baatiisumw majooj mabidy mahehel. Hawaalalabul majooj aam, “uleeleeb hatook” diitabij diibuh.—Biin Rom 10:10.

²² Hanyim, wiiyiiy kutambul baatiisumw. Biiyiiy kukutweej uw woos mu mwanz. Baatiisumw wiibuh wiiyiiy  uleej baat hatook neey ukaady mwiilambul kudy Yehow ni udy kaabaak Temw a Yehow.

23. Kubatiijibw mu “diijin dya Taat, dya Mwaan ni dya spirit mujilang” kumvumvwiij biny?

²³ Yeez wambiil neey: biiyij bindiy biiyiiy kubatijiibw “mu diijin dya Taat, dya Mwaan ni dya spirit mujilang.” (Bal Matewus 28:19, NWT.) Byumvumvwiij neey: bikaam kwiitab bufumw bwa Mawej. Bikaam kwiitab cikwaabw mudimw udy nend Yeez mu myand yidy Mawej mulongolol. Ni bikaam kwiitab mushind udy Mawej ukal mudimw ni spirit mujilang indiy bwa kukumbaj lukat lwindiy.​—Misambw 83:18; Matewus 28:18; Kalatih 5:22, 23; 2 Pyeel 1:21.

24, 25. a) Baatiisumw uleeleej biny? b) I dijooj kaay diikal shapitil a bulekel oow mwa kwaalabul?

²⁴ Baatiisumw uleeleej bwaal kahand bwa buseeb. Hadyoobw bakutweej mu mwanz, i bilong teng bu neey ufwaafw habitaatal shikacil iibuh a kal. Biin aaby bileeleej neey ubamulek. Ni hawuhahatuk mu mwanz, byumvumvwiij neey, ubatang shikacil muhyaamuhy a kukadil Yehow mudimw. Wiiyiiy kukadil Yehow mudimw teng diib aady. Vuluk neey kwiin mwiilambul kudy muut, ni kudy bulongolody, ni ku mudimw kahand, ki udy mulambul buumy bwiibuh kudy Yehow.

²⁵ Kwiilambul kwiibuh kwiiyiiy kukukwanjok bwa kukashish bulund bulengel ni Yehow. (Misambw 25:14) Kabiin byumvwiij neey biiyiiy bitukuuloh teng tut baabatiijibw. Mupostol Pool ufundil neey: “Kalaay mudimw ni mooy ni muzakeej bwa nun kuhet luhand lwiinun.” (Filipw 2:12) Baatiisumw, i bwaal bwa kuuhal bufifikish muut ku luhand. Ki, i mushind kaay uwudy mwa kushaal mulund a Yehow? Shapitil a bulekel wiiyiiy kwaalabul dijooj eedy.