1. Ntangu nge me longaka matsyeleka yina ke na kati ya Biblia, wapi kyuvu nge lenda yufula na manima?

NTANGU nge me longaka buku yayi, nge me zaba matsyeleka mingi ke na kati ya Biblia. Nge me zaba promese ya Nzambi ya kupesa bantu luzingu ya ntangu nyonso, mambu ke kumina beto na manima ya lufwa, mpe kuvumbuka ya bantu ya kufwa. (Longi 9:5; Luke 23:43; Yoane 5:28, 29; Luzabusu 21:3, 4) Ntangu ya kaka nge me banda na kuvukana na Batemwe ya Yehova, mpe nge  me ndima ti bawu ke sambila Nzambi na tsyeleka. (Yoane 13:35) Ntangu ya nkaka, nge me banda na kutunga kindiku ya nge na Yehova, mpe nge me baka mukanu ya kusadila yandi. Kasi, nge lenda yufula, ‘Yinki mu zola sala samu na kusadila Yehova?’

2. Samu na yinki bakala mosi ya yinsi ya Ethiopi lomba na kuzwa bateme?

² Na siecle ya ntete, bakala mosi ya yinsi ya Ethiopi, yufula mpe kyuvu yina. Kilandi mosi ya Yesu na nkumbu ya Filipe, longa bakala yina. Filipe longisa yandi na kitini ya Biblia ti, Yesu vanda Masiya. Ntangu yandi bakula matsyeleka na mambu ba vanda longa yandi, bakala yango zonza: “Maza yawu yayi! Yinki ke na [kanga] munu nzila na kuzwa bateme?”​—Bisalu 8:26-36.

3. (a) Wapi musiku Yesu pesa na bilandi ya yandi? (b) Wapi faso bateme zola salama?

³ Biblia ke zonza pwelele ti, si nge zola kusadila Yehova, nge zola kuzwa bateme. Na yina, Yesu zonza na bilandi ya yandi: “Beno kumisa bantu ya bayinsi nyonso bilandi ya munu, mpe beno pesa bawu bateme.” (Matayi 28:19, nwt-MK) Yesu pesa kifwani ntangu yandi mosi kuzwa bateme. Ntangu ya bateme ya yandi, balosa ve yandi kaka maza na zulu ya yintu, kasi ba dyamisa yandi nzutu nyonso na kati ya maza. (Matayi 3:16) Bubu yayi mpe, ntangu mukristo ke zwaka bateme, ba zola dyamisa yandi nzutu nyonso na kati ya maza.

4. Ntangu beto ke zwaka bateme, beto ke longisa yinki na meso ya bantu?

⁴ Ntangu beto ke zwaka bateme, beto ke longisa na meso ya bantu nyonso ti beto me zola kuvanda ndiku ya Yehova mpe beto zola kusadila yandi. (Nkunga 40:7, 8) Na yawu, nge lenda yufula: ‘Yinki mu me lunga na kusala na kuzwa bateme?’

5. (a) Wapi kima ya ntete nge me bonga na kusala avant nge kuzwa bateme? (b) Samu na yinki ya ke mfunu na kuvukana na bakristo ya nkaka?

⁵ Avant nge kuzwa bateme, nge zola longaka na kuzaba Yehova na Yesu. Malongi yina nge me kuzwa na Biblia, me sadisa nge na kuzaba nani ke Yehova na Yesu. (Tanga Yoane 17:3.) Kasi, ya me suka ve kuna. Biblia me zonza ti nge zola “fuluka na malongi” ya luzolo ya Yehova. (Bakolose 1:9) Kifu ya kuvukana na ba Temwe ya Yehova ke sadisa nge na kukulisa kindiku ya nge na Yehova. Na yawu, ya ke mfunu na nge na kuvukana na bawu lumingu na lumingu.​—Baebre 10:24, 25.

6. Na kuzwa bateme, wapi malongi ya Biblia nge me lunga na kuzaba?

⁶ Simba mambu yayi, Yehova me lomba ve na nge na kuzaba mambu nyonso ke na kati ya Biblia, samu na kuzwa bateme. Yandi lomba ve na bakala yina, ya bwala ya Ethiopi na kuzaba ntete Biblia nyonso, samu na kuzwa bateme. (Bisalu 8:30, 31) Ata beto zinga mvula na mvula, beto lenda zaba ve mambu nyonso yina Nzambi sala. (Longi 3:11) Kasi, na kuzwa bateme, nge me lunga na kuzaba mpe kundima malongi ya ntete ya Biblia.​—Baebre 5:12, nwt-MK.

7. Wapi faso malongi ya Biblia me sadisa nge?

⁷ Biblia ke zonza: “Ata muntu mosi lenda [sepelisa] Nzambi si yandi ke ve na kiminu.” (Baebre 11:6) Na yawu, na kuzwa bateme, nge zola vanda na kiminu. Biblia ke zonza ti, bantu ya nkaka ya bwala ya Korinte, ntangu ba kuwa mambu yina bilandi ya Yesu vanda longa, ba “kwikila mpe [ba kuzwa bateme].” (Bisalu 18:8) Mutindu mosi mpe, malongi ya Biblia me sadisa nge na kukwikila na bapromese ya Nzambi. Ya me sadisa nge dyaka na kuvanda na kiminu na munkayulu ya Yesu yina  me kuula beto na disumu mpe na lufwa.​—Yosua 23:14; Bisalu 4:12; 2 Timote 3:16, 17.

8. Yinki lenda nata nge na kuzonzila na bantu ya nkaka mambu yina nge ke longakaka?

⁸ Ntangu nge ke longaka Biblia, nge ke tala mutindu ya ke sadisa nge na luzingu ya nge, mpe kiminu ya nge ke kula. Nge ke kuma na nsatu ya kuzonzila yawu na bantu ya nkaka. (Yeremia 20:9; 2 Bakorinto 4:13) Kasi, na nani nge ke zonzila yawu?

9, 10. (a) Na ba nani nge lenda zonzila ntete mambu yina nge ke longaka? (b) Na kusamuna mambu ya Nzambi na kimvuka, yinki nge me bonga na kusala?

⁹ Nge lenda zonzila mambu yina nge ke longaka na bantu ya dikanda ya nge, bandiku ya nge, ba yina ke vanda pene-pene na nge, mpe na ba yina ke sala na nge. Ya ke kima ya mbote, kasi sadila yawu na buzitu mpe na lembami nyonso. Kifu yina ke pesa nge ngolo ya kulonga mambu ya Nzambi na ba Temwe ya Yehova. Ntangu nge ke zola kusala mambu yango, zonzila yawu na Temwe ya Yehova yina ke longa nge Biblia. Si yandi me tala ti nge me lunga na kusala kisalu yina, mpe ti nge ke landa misiku ya Biblia na luzingu ya nge, beno zole ke kwenda solola na bakuluntu ya kimvuka.

¹⁰ Samu na yinki beno ke kwenda kusolola na bawu? Bakuluntu ke sosa kuzaba si nge me simba mpe nge me ndima malongi ya ntete ya Biblia, mpe si nge ke sadila mambu yina Biblia ke zonza na luzingu ya nge. Kuzimbana ve, bakuluntu ke kipeke bantu nyonso ya kimvuka, na nge mpe. Na yina, kuvanda ve na boma ya bawu. (Bisalu 20:28; 1 Piere 5:2, 3) Na manima ya masolo yina nge ke lutisa na bawu, ba ke zabisa nge, si nge lenda banda kulonga mambu ya Nzambi na kimvuka.

11. Na kusamuna mambu ya Nzambi, samu na yinki ya ke mfunu na kuvanda na ndyatulu ya mbote?

 ¹¹ Bakuluntu ke lakisa nge mambu yina nge me bonga na kusoba na ndyatulu ya nge, samu na kubanda kusamuna mambu ya Nzambi. Samu na yinki ya ke mfunu? Samu ti beto ke nata nkumbu ya Yehova ntangu beto ke longa mambu ya Nzambi. Na yina, ndyatulu ya beto zola pesa lukumu na Yehova.​—1 Bakorinto 6:9, 10; Bagalate 5:19-21.

12. Samu na yinki bantu nyonso me bonga na kunyonga yimbi yina ba salaka?

¹² Na kuzwa bateme, ya ke na kima ya nkaka ya kusala. Apotre Piere zonza: “[Beno nyonga mambu ya yimbi yina beno sala mpe beno soba ndyatulu], samu yandi lemvokila masumu ya beno.” (Bisalu 3:19) Ya zola zonza yinki? Ya zola zonza ti, na ntima mosi beto me yiina ndyatulu ya yimbi yina beto vanda na yawu. Na kifwani, si nge vanda na dikangu, nge me lunga na kubika ndyatulu yina. Ata nge ke sala ve masumu ya ngolo, nge mpe zola nyonga yimbi yina nge sala, samu ti beto nyonso ke bantu ya masumu, mpe beto ke na nsatu ya mulemvo ya Nzambi.​—Baroma 3:23; 5:12.

13. Kusoba ndyatulu zola zonza yinki”?

¹³ Beto zola suka kaka na kunyonga masumu ya beto? Ve. Apotre Piere zonza dyaka ti “beno soba ndyatulu.” Ya zola zonza ti, beto zola bika ndyatulu nyonso ya yimbi yina beto vanda na yawu, mpe kubaka mukanu ya kusala mambu ya mbote. Kanisa fioti na mambu yayi: nge ke na kwenda na bwala yina nge me kuma ntete ve. Ntangu nge me kuma ntama, nge me pamuka ti nzila yina nge ke na landa ni yawu ve. Yinki nge  ke sala? Tembe ve, nge ke kwenda telama, nge ke bika kulanda nzila yina, mpe nge ke baka nzila ya mbote yina ke nata nge tii na bwala yango. Faso mosi mpe, kulongaka ya nge ya Biblia, me lakisa nge bandyatulu na makanisi yina nge zola soba na luzingu ya nge. Sala bangolo samu​—na kubika mambu ya yimbi​—mpe banda na kusala mambu ya mbote.

14. Wapi faso nge lenda pesa luzingu ya nge nyonso na Nzambi?

¹⁴ Kima ya nkaka ya mfunu yina nge lenda sala na kuzwa bateme, ke ni kupesa luzingu ya nge nyonso na Yehova. Samu na kupesa luzingu ya nge na Yehova, nge ke zonzila yandi na lusambu mukanu yina nge me baka ya kusadila kaka yandi mosi. Kusala luzolo ya Yehova ke kima yina me lutila mfunu na luzingu ya beto.​—Kulonga Misiku 6:15.

15, 16. Yinki ke nata muntu na kupesa luzingu ya yandi na Nzambi?

¹⁵ Dikanisi ya kusadila kaka Yehova, ke mutindu dikanisi yina ke nata bakala na kulutisa luzingu ya yandi nyonso na kento yina yandi ke zolaka. Na kifwani, ntangu bakala ke zola kento, yandi ke sosa kuzaba bifu ya mbote ya kento. Na manima, luzolo ya yandi ke kula, mpe yandi ke kuma na nsatu ya kukwela yandi. Ata ya ke mambu ya nene, luzolo yina yandi ke na yawu samu na kento yina, ke nata bakala na kukwela yandi.

¹⁶ Ntangu nge ke na longaka na kuzaba Yehova, luzolo ya nge samu na yandi ke kula, mpe nge ke sala bangolo na kusepelisa yandi. Na yina, Biblia ke zonza ti, muntu yina zola kukuma kilandi ya Yesu, zola “bika na [kukanisa kaka] na yandi mosi.” (Marke 8:34) Ya zola zonza yinki? Ya zola zonza ti, kusala luzolo ya Yehova ke kima yina me lutila mfunu na luzingu ya nge. Ya me lutila mpe mfunu na bansatu to makanisi ya nge.​—Tanga 1 Piere 4:2.

17. Samu na yinki ba ya nkaka ke zola ve kupesa luzingu ya bawu na Yehova?

¹⁷ Boma ya kubwa na disumu ke nata bantu mingi na kukima kupesa luzingu ya bawu na Yehova. Ba zola ve kusala mambu yina ke nyongisa Yehova. Ba ke zonza mpe ti, si ba pesa ve luzingu ya bawu na Yehova, yandi lenda semba ve bawu ntangu ba ke sala mambu ya yimbi.

18. Yinki lenda sadisa nge na kusala ve mambu yina Yehova ke yinaka?

¹⁸ Luzolo ya nge samu na Yehova ke sadisa nge na kusala ve mambu yina yandi ke yinaka. Samu ti nge ke zola yandi, nge ke sala bangolo na kuzitisa mukanu yina nge bakaka. (Longi 5:4; Bakolose 1:10) Zaba ti ya ke ve mpasi na kusadila misiku ya Yehova. Apotre Yoane sonika: “Ya tsyeleka, kuzola Nzambi ke ni kusadila misiku ya yandi. Misiku ya yandi ke ve [kilo] samu na beto.”​—1 Yoane 5:3.

19. Samu na yinki nge zola vanda ve na boma ya kupesa luzingu ya nge na Yehova?

¹⁹ Na kusadila Yehova, nge ke ve na nsatu ya kuvanda muntu yina ke sala ata disumu. Yandi lenda lomba ve beto yina beto lenda sala ve. (Nkunga 103:14) Yandi ke sadisa nge na kusala mambu ya mbote. (Izaya 41:10) Si nge tula ntima ya nge nyonso na Yehova, “yandi ke bongisa banzila ya nge.”​—Bingana 3:5, 6.

20. Na manima ya kupesa luzingu ya nge na Yehova, yinki nge ke sala dyaka?

²⁰ Nge me kanisa ti ntangu me lunga na nge na kupesa luzingu ya nge na Yehova? Na manima ya kupesa  luzingu ya nge na Yehova, ya ke na kima ya kaka ya kusala: ni kuzwa bateme.

21, 22. Wapi faso nge ke “zabisa na meso ya bantu” kiminu ya nge?

²¹ Zonzila na kuluntu mosi ya kimvuka ti nge me pesa deja luzingu ya nge na Yehova mpe nge zola kuzwa bateme. Bakuluntu zole ke tala na nge malongi ya ntete ya Biblia. Si ba me tala ti nge me zaba malongi yango, ba ke pesa nge nzila ya kuzwa bateme na lukutakanu ya nene ya Batemwe ya  Yehova. Na lukutakanu yina, ya ke na diskur ke lakisa yinki ke bateme. Muntu ke sala yawu, ke yufula na ba yina ke kuzwa bateme, byuvu zole. Ntangu nge ke pesa bamvutu na byuvu yina, nge ke “zabisa na meso ya bantu” kiminu ya nge.​—Baroma 10:10, nwt-MK.

²² Na manima, nge lenda kuzwa bateme. Ba ke dyamisa nge nzutu nyonso na kati ya maza. Bateme ya nge ke  lakisa na bantu nyonso ti nge me pesa luzingu ya nge na Yehova, mpe nge me kuma Temwe ya Yehova.

23. Kuzwa Bateme “na nkumbu ya Tata, ya Mwana, mpe ya mpeve ya santu” zola zonza yinki?

²³ Yesu zonza ti, bilandi ya yandi ke baka bateme “na nkumbu ya Tata, ya Mwana, mpe ya mpeve ya [santu].” (Tanga Matayi 28:19.) Yinki ya zola zonza? Ya zola zonza ti nge zola ndima ti Yehova ke Mfumu, mpe Yesu ke muntu yina Yehova sadila samu na kulungisa luzolo ya yandi. Nge zola ndima mpe ti Yehova ke sadila mpeve ya yandi ya santu, samu na kulungisa bansatu ya yandi.​—Nkunga 83:18; Matayi 28:18; Bagalate 5:22, 23; 2 Piere 1:21.

24, 25. (a) Bateme ke kidimbu ya yinki? (b) Yinki beto ke zonzila na kikapu ya nsuka?

²⁴ Bateme ke kidimbu ya mfunu mingi. Ntangu ba ke dyamisa nge na maza, ya zola zonza ti nge me kufwa na yina me tadila mambu yina nge vanda sala na ntama; kubasika na maza, zola zonza ti nge me banda luzingu ya malu-malu mutindu kisadi ya Yehova. Banda kilumbu yina, nge me kuma Temwe ya Yehova. Kuzimbana ve ti, nge me pesa ve luzingu ya nge na muntu, na kimvuka to na kisalu. Kasi, ni na Yehova nge me pesa yawu.

²⁵ Mukanu yina nge me baka ya kusadila Nzambi ke sala ti nge kuma ndiku ya yandi. (Nkunga 25:14) Ya zola zonza ve ti beto ke kuzwa luzingu ya ntangu nyonso kaka samu beto me kuzwa bateme. Apotre Paul sonika: “Beno sala ngolo samu na kuvuukisa [luzingu] ya beno, na [boma na kutekita].” (Bafilipe 2:12) Bateme ke kaka kubanda. Kasi wapi faso nge lenda sala samu na kukulisa kindiku ya nge na Yehova? Kikapu ya nsuka ke pesa mvutu na kyuvu yayi.