1. Mini e’yo buku ’di ma alea ri onizu kililiru ’bo ri ma vutia, mi eco e’yo ega ngoni?

E’YO ada Biblia ni imba mini oni buku ’di ma alea si ’diyi di sa ’disi kakau. E’yo mini oni ’bo ’diyi ma azi e’yo Mungu ni ondri idri ’dani ’dani ma dria ri i, e’yo ada ’ba odrapi ’bo ’diyi ma dria ri i, azini asi ’baza amani engata ma dria ri i. (Eklesiaste 9:5; Luka 23:43; Yohana 5:28, 29; E’yo Eceza 21:3, 4) Mi eco di ’dile e’do aci okuta ’ba Yehova ma E’yo Eti Nzepi ’Diyi niri ma alea ’bo, dika mi a’i vini eyi inzita ada ri ma alea ri ra. (Yohana 13:35)  Agyi mini Yehova beri eco ’dile e’do zo ’bo, dika mi eco vini ’dile peta pe eri inzizu ’bo. Mi eco di ’vini mi ngulupi zi ’dini, ‘Afa mani eco ’ye sa ’disi inzita fezu Mungu ni ri a’duni?’

2. Agu engapi Etiopia ri le ndra batisimu isu a’dusi?

² ’Di bani e’yo agu azi Etiopia ndra o’api ewu Yesu ngari risi rini ega ri. Eli azi ni alizu engata Yesu niri ma vutia were ’bo ria, Filipo ndra Yesu ma vuti bipi ri olu e’yo agu nde ni ra. Filipo e’da erini Yesu ni Mesia i ri nditiri. E’yo agu engapi Etiopia ’dani oni rini eri ma asi elozu saaru risi, ’yo ’dini: “Mi lu, yi eri indi ’do! A’di oga mani baputizi bizuni ya?”​—’Yeta 8:26-36.

3. (a) Azita Yesu ni fe ’ba ima vuti bipi ’diyi niri ngoni? (b) Geri ’bani ecozu batisimu fezu ’ba azi niri ngoni?

³ Biblia ece amani ndritiri kini, ika le Yehova ni inzi ra, le mi ma isu batisimu ra. Yesu ’yo ba ima vuti bipi ’diyi ni ’dini: ‘Emi oja suru dria ’ba ma vuti bipiriru, emi fe baputizi yi dri.’ (Matayo 28:19) Yesu e’da vini amani eceta niri eri ma ngulupi ni batisimu isuzu indi risi. ’Ba awini ndra yi oya eri ma dria i ku, te ’ba su eri yi ma alea pi. (Matayo 3:16) Kristiani azi ka vini sa ’disi batisimu isu, le ’ba ma su eri yi ma alea pi.

4. Mini batisimu isuzu ri ni nga ’ba azi ’diyi ni a’du ma e’yo eda?

⁴ Ika batisimu isu ra, eri nga e’da ’ba azi ’diyi ni mi avasi ecazu Mungu ma agyiru, azini azi ngazu erini. (Zaburi 40:7, 8) Mi eco di e’yo ega ’dini, ‘Le di ma ma ’ye a’duni ecozu batisimu isuzu?’

5. (a) De nga mi isuni batisimu ku, le mi ma ’ye a’duni? (b) Okuta Kristiani amavu ’diyi niri orodriru tu a’dusi?

⁵ De nga mi isuni batisimu ku, le mi ma oni e’yo Yehova pi ma dria Yesu be raka. Mini e’dozu Biblia  onizu ’bo risi, mi di bani ’di e’yo oniria eyi ma dria. (Mi la Yohana 17:3.) Te ’dileri ’yezu i a’dule ri cani ku. Biblia ’yo kini, le mi ma “ga tre” nita e’yo Yehova ni leleri nizu risi. (’Ba Kolosaia ’Diyi 1:9) Mini acizu okuta ’Ba Yehova ma E’yo Eti Nzepi ’Diyi niri ma alea rini nga mi aza ko agyi emini Yehova beri sizu okporu. Asisile okporu ’disi, le di mi ma ece okuta ’diyi ku.​—’Ba Ebraniani 10:24, 25.

6. Ama eco e’yo Biblia ma alea ri oni ngopi ka, ama batisimu isu ndo?

⁶ E’yo adasi ria, Yehova econi le ama ma oni e’yo Biblia ma alea ’diyi woro raka, ama di batisimu isu ndo ’dini ku. Awini ndra fe agu engapi Etiopia ’da ma oni e’yo dria raka ma isu batisimu ndo ’dini ku. (’Yeta 8:30, 31) Ama vini nga mu drile e’yo onizu Mungu ma dria ewule ewule. (Eklesiaste 3:11) Te mini ecozu batisimu isuzu, le mi ma ni, azini mi ma a’i imbata okporu Biblia ma alea ’diyi raka.​—’Ba Ebraniani 5:12.

7. E’yo mini onile Biblia ma alea ri ebi mi aza ko geri ngosi?

⁷ Biblia ’yo ’dini: ‘A’ita kokoru ’ba econi ayiko fe Mungu dri ku.’ (’Ba Ebraniani 11:6) Ani de nga mi isuni batisimu ku, le mi a’ita ma ovu okporu. Biblia ece amani kini ’ba azi ndra o’api aku ambo azi omvele Korinto ruri ma alea ’diyini e’yo ’ba Yesu ma vuti bipi ’diyini imbaleri erizu ’bo ri ma vutia, “yi a’i” e’yo nde ra, dika “bi baputizi” ra. (’Yeta 18:8)Geri alu ’disi, Biblia mini oni ri ko mi aza a’ita ’bazu e’yo Mungu ni azile amani ’diyi ma dria, azini owita Yesu ni i owizu, ecozu ama onzezu ezata ma alea azini dra ma alea ri ma dria.​—Yosua 23:14; ’Yeta 4:12; 2 Timoteo 3:16, 17.

8. Afa ecopi mi aza kopi e’yo mini oni ’diyi ecezu ’ba azi ’diyi ni ri a’duni?

⁸ Mini e’yo onizu Biblia ma alea angiri azini mini nezu e’yo alenia ’diyi mi aza ko ria idri mini ri ma alea rini nga fe mi a’ita ni ecazu okporu. Mi vini nga le e’yo mini onile ri ece ’ba azi ’diyi ni indi. (Yeremia 20:9; 2 ’Ba Korintoa ’Diyi 4:13) Te di le mi ece e’yo nde a’di ni?

9, 10. (a) Mi eco oko risi e’do e’yo mini oni ri olu a’dini? (b) Le di mi ma ’ye a’duni ika le e’do e’yo olu ’ba ongulumu ma alea ’diyi pie tualu ra ria?

⁹ Mi nga le afa mini oni ’diyi ece ’ba mi ori’ba ru, agyiru, mi jo ejelea, kaniku emini azi ngazu tualu ’diyi ni ra. ’Dileri ’yezu ri onyiru tu, te le mi ma ece e’yo nderi asi ndriza si, azini leta si. E’yere e’yere, mi di nga e’do e’yo olu ’ba ongulumu ma alea ’diyi pie tualu ra. Ika di ovu ngonde e’dozu ’dileri ’yezu, mi ece mi asisile lezu e’yo oluzu tualu ’ba ongulumu ma alea ’diyi pie ri ’ba mini e’yo Biblia ma alea ri imbapi ri ni. Agu mini Biblia imbapi ri ka ni ra mi di ngonde e’yo oluzu azini idri mini ri ma alea mi azita Biblia ni fe amani ’diyi ma vuti obi ra, eri nga e’yo ni ece mbaza yini, dika mbaza azi iri ongulumu ma alea ni yi di nga dri fu emi be iritro raka.

¹⁰ A’du ma e’yo ni di nga i ’ye drifuza ’da ma alea ni? Mbaza nde yi nga e’yo nze mi be ecozu mi ma vata, azini mi ma a’ita imbata okporu Biblia ma alea diyi ma dria ci yari onizu, dika eyi vini nga le mi imbata nde ma vuti obi ria yari oni. Eyi vini nga le mi adaru avasi ecazu ’Ba Yehova ma E’yo Eti Nzepi ’Diyi ma azi ru ra yari isu. Le mi ma ni ra, mbaza yi ageyi teza fe ’ba ongulumu ma alea ’diyi ni dria, mi vini alenia indi. Ani le di mi ma ’ye  orisi e’yo nzezu eyi pie ku. (’Yeta 20:28; 1 Petero 5:2, 3) Drifuza ’di ma vutia, mbaza nde ’diyi di nga mi eco e’do e’yo olu ongulumu be ra yari ece mini ra.

11. Eri orodriru mini ojata ’yezu idri mini ri ma alea raka mi e’do e’yo olu ongulumu be ndo a’dusi?

¹¹ Sa azini si, mbaza yi nga ece mini le mi ma ’ye ojata azi idri mini ri ma alea raka, de nga mi e’do e’yo olu ’ba ongulumu ma alea ’diyi pie tualu ku. Eri orodriru mini ojata ’daleri ’yezu raka a’dusi? A’dusiku aka e’yo olu Mungu ma dria, ama ’da e’yo nze Yehova ma paria, dika le vini di ama ma o’a idri amani ri ma alea geri ecopi erini ayiko fepi ra risi.​—1 ’Ba Korintoa ’Diyi 6:9, 10; ’Ba Galatia ’Diyi 5:19-21.

12. Le ’ba dria ma oga ima ezata ra a’dusi?

¹² Afa azi vini le mi ma ’ye ra de nga mi isuni batisimu ku ni ci. ’Ba ti pele Petero ’yo ’dini: Emi oga emi ezata, ‘emi ma oja emi asi ovuzu ’ba nduru, ’dini emi nga ojita isu e’yo onzi eminisi.’ (Yeta 3:19) Amani ama ezata ogazu ri ma efi ngoni? Ezata ogazu ri ma efi, candi ni fi ama asia angiri tu e’yo amani ndra eza ’diyi si. Eceta si, eri le mi oga mi ezata ece kokoru ika ndra ovu ’ba azi ali o’bapi ni ria. Ika tro ndra o’bi idri mini ri ma alea e’yo onyiru ri ’ye asi dria si, le kiri mi ma oga mi ezata ra a’dusiku ama woro ezata ’ye ra, dika le vini ama ma zi Mungu ni truta a’izu ra.​—’Ba Rumia ’Diyi 3:23; 5:12.

13. ‘Asi ojazu’ ri ma efi ngoni?

¹³ Mini o’azu candi si e’yo mini eza risi ri ca ra ya? Yo, cani ku. Petero ’yo ndra kini le ama ma ‘oja’ vini ama asi ovuzu ’ba nduru. Efini si le ama ma ku afa amani ebi ’ye onzi idri amani ri ma alea ’diyi ja, dika le ama ma e’do e’yo onyiru ri ’ye idri amani ri ma alea i. Ecozu e’yo ’di  ecezu, mi ega di nga mi muria pari azia pale oko risi. Mini muzu were ’bo ri ma vutia, mi isu geri mini bi ri ovuni muke ri’i ku. Mi di nga a’du ’ye? Mi nga pa so, mi ti oja dri dazu, dika mi di e’do mu geri muke risi. Geri alu ’dile risi, mini Biblia oni ria, mi nga isu oni kini e’yo azi ndra mini ’ye idri mini ma alea ’diyi ovuni muke ku, ani le mi ma oja idri mini ri ra. Le mi ma ovu ngonde idri mini ri ‘ojazu’​—efini si, le mi ma ’ye ojata ndu ndu ’diyi, mi eco ani e’do e’yo muke ri ’ye beni.

14. Mi eco mi owi Mungu ni ngoniru?

¹⁴ Afa azi orodriru mini eco ’ye de nga mi isuni batisimu ku ri mini mi idri owizu Yehova niri i. Ika mi owi Yehova ni, mi ece erini izita ma alea kini, ile di inzita fe erini a’dule, azini e’yo erini leleri ma ovu di afa idri mini ri ma alea orodriru ndeni ri i.​—Azita Amvizu 6:15.

15, 16. Afa ecopi ’ba azi ma aza kopi ima idri owizu Mungu ni ri a’duni?

¹⁵ Mini oyo sozu Yehova ni inzizu ri si ekile mini oyo sozu mi nga o’a ’ba azi mini lele tu ni be idri mini ri ma alea dria ri le. Mi ega di nga e’yo agu azi e’dopi ima ezo azipi ni ma dria. Erini e’yo onizu ezo nde ma dria angiri ria, leta erini ezo nde lezu rini zo ecazu okporu, ani eri di le eri ’du ima oku ru pi. E’yo ’dileri ’yezu ri ni tro ovuzu ewaru ra ti, agupi ni le nziza ’dileri ’du erini zamva nde lezu asi ada siri si.

¹⁶ Ika mu drile e’yo onizu Yehova ma dria, leta mini eri lezu ri ni nga eca okporu, dika mi di nga le azi nga erini asi dria si. Leta okporu ’dari nga mi aza ko mini oyo sozu izita ma alea, mi owizu azi erini ri ngazu. Biblia ece kini ’ba azi ka le Yesu ma vuti bi ra, le “ma ga i ma ngulupisi.” (Marako 8:34) E’yo erini ’yo ’di ma efi ngoni?  Efinisi, afa oko idri mini ri ma alea ri ni ovu mini Yehova ma ti erizu ri i. E’yo Yehova ni leleri ni ovu mini orodriru aga e’yo mi ngulupi ni lele ’diyi ra.​—Mi la 1 Petero 4:2.

17. ’Ba azi eyi ’yo orisi eyi ma idri owizu Yehova ni a’dusi?

¹⁷ ’Ba azi ’diyi ni egazu eyi nga e’de oyo soza eyini so Yehova ni inzizu ri ma alea risi ra risi, eyi ga eyi ma idri owizu Yehova ni si. Eyi ’ye orisi e’yo ezazu Yehova ma rua, kaniku eyi ega kini eyini eyi ma idri owizu ku risi, Yehova econi nga e’yo eyini eza ri ma e’yo ’ba eyi ma dria okporu ku.

18. A’du eco mi aza ko ori e’yo ezazu Yehova ma rua ri nzezu ni?

¹⁸ Leta mini Yehovani lezu ri ni nga mi aza ko ori e’yo onzi ’yezuri nzezu mi asia risi te. Mini eri lezu ra risi, mi nga okpo ’ba angiri oyo soza mini ri ma ta mbazu. (Eklesiaste 5:4; ’Ba Kolosaia ’Diyi 1:10) Mi econi nga ega kini, e’yo Yehovani lele ri yezuri ewaru tu ’dini ku. ’Ba ti pele Yohana si ’dini: “Leta amani Mungu lezuri ’di, amani azita erini ma ta mbazuri ’i. Te azita erini ovuni nzizaru ku.”​—1 Yohana 5:3.

19. Le mi ma ’ye orisi idri mini ri owizu Yehova ni ku a’dusi?

¹⁹ Ovuni mi o’a okpo ako kokoru ka, mi idri mini ri owi Yehova ni ndo ’dini ku. Yehova econi afa ama okpo ndepi ra ri a’i amavu ’yezaru ku. (Zaburi 103:14) Eri nga mi aza ko e’yo onyiru ri ’yezu ra. (Isaya 41:10) Mi a’i Yehovani mi asi driasi, “erini ngazu leti mini ’bazu kililiru” be ni.​—E’yo O’beza 3:5, 6.

20. Ika idri mini ri owi Yehova ni ’bo, le di mi ma ’ye vutinia a’duni?

²⁰ Mini ega risi mi di ngonde idri mini ri owizu  Yehova ni ya? Ika di idri mini ri owi Yehova ni ’bo, mi di ngonde e’yo azi nduni ’yezu. Le mi ma isu di batisimu.

21, 22. Mi eco ‘e’yo e’da’ a’ita mini ri ma dria nditiri ngoniru?

²¹ Le di mi ma ece e’yo mini idri mini ri owizu Yehova ni, azini mini lezu batisimu isuzu ri mbaza adripi mbazaru ’diyi ecipi tualu rini. Eri di nga otuta ’ye mbaza azi yini mi ozizu imbata okporu Biblia ni imba amani ’diyi ma dria. Mbaza nde ’diyi ka a’i ra kini mi di ngonde batisimu isuzu, eyi  nga lu mini, mi eco di nga batisimu isu okuza ’Ba Yehova ma E’yo Eti Nzepi ’Diyi ni ngapi emupi ri ma alea ra. Okuza nde ma alea, ’ba nga e’yo nzeza azi aluni ma alea e’yo ’bani batisimu isuzu ri ma efi ngoni yari ece. Agu e’yo nzeza ’da fepi niri ni di nga ’ba lepi batisimu isupi ’diyi zi zita azi iri ewa kokoru ni yi si. Ika di zita ’dayi omvi ’bo, mi ‘e’da di e’yo’ a’ita mini ri ma dria nditiri ’bo.​—’Ba Rumia ’Diyi 10:10.

²² Mi eco di batisimu isu ra. ’Ba di nga mi su yi ma alea  pi. Batisimu ni di nga mi e’da ’ba i owipi Yehova ni ’bo ri ru, azini ’Ba Yehova ma E’yo Eti Nzepi ’Diyi ma azi ru.

23. Batisimu isuzu “ru Atanisi, Mvinisi, Orindi Alatararunisi” ri ma efi ngoni?

²³ Yesu ’yo ’ba i ma vuti bipi ’diyi nga batisimu isu “ru Atanisi, Mvinisi, Orindi Alatararunisi” (Mi la Matayo 28:19.) ’Di ma efi ngoni? Efini kini, le mi ma ni driceza Yehova niri azini azi Yesu ni ngari, dika Mungu ni orindi alatararuri ayu azi ini ri ngazu ngoniru ya ri.​—Zaburi 83:18; Matayo 28:18; ’Ba Galatia ’Diyi 5:22, 23; 2 Petero 1:21.

24, 25. (a) Batisimu ma efi ngoni? (b) Ama nga capita ’di ma drilea ri ma alea e’yo oni a’du ma dria?

²⁴ Batisimu eri afa azi orodriru ni e’da. ’Bani mi suzu yi ma etia ri ma efi kini, idra di e’yo onzi ndra mini ’ye oku drio idri mini ma alea ’diyi pie ’bo, kaniku iku di e’yo onzi oku drio idri mini ma alea ’diyi ’bo. Ika efu yi alea risi ’bo, mi di idri azi o’diru ni e’do azi Munguniri ngazu. Efini kini mi di nga Yehovani inzi e’dozu sa ’dasi muzu drile. Le mi ma ni ra, owita mini mi owizu ’di ovuni ’ba ada ni ku, ovuni vini amuti azi ni ku, dika ovuni azi ngaza azi ngazu ’dini ku. Mi owi ’di mi ngulupi Yehova ni.

²⁵ Owita mini mi owizuri ni nga fe mi agyi Mungu be ri ni ecazu okporu. (Zaburi 25:14) ’Di ma efi ovuni kini, mi nga pata isu lu mini batisimu isuzu ’bo risi ’dini ku. ’Ba ti pele Paulo si ’dini: “Emi ma nga azi pata eminirini rutasi azini rua yaza be.” (’Ba Filipia ’Diyi 2:12) Batisimu isuzu ri nga lu e’doza ni. Mi eco di awi Yehova vu enyia ngoniru? Ama nga zita ’di ma omvita isu capita ’di ma drilea ri ma alea.