1. Byowapwa kwifunda kino kitabo, i kipangujo’ka padi kyobwanya kwiipangula?

UBEFUNDE bubine buvule bwa mu Bible mu kino kitabo, kimfwa mulao wa Leza wa būmi bwa nyeke, mwikadile bafwe, ne lukulupilo lwa lusangukilo. (Musapudi 9:5; Luka 23:43; Yoano 5:28, 29; Kusokwelwa 21:3, 4) Padi kodi mushilule kutanwa ku kupwila kwa Batumoni ba Yehova ne kukulupila’mba butōtyi bwabo i bwa bine. (Yoano 13:35) Padi kodi mwanze kupwana na Yehova enka ne kukwata butyibi bwa kumwingidila.  Pa kino, ye uno padi ubeipangula’mba, ‘Pano i bika byomfwaninwe kulonga mwanda wa kwingidila Leza?’

2. Mwanda waka mwine Efiopya umo wālombele kubatyijibwa?

² Mo mwālongēle ne mwine Efiopya umo wādi’ko mu kitatyi kya Yesu. Difuku dimo, Fidipa mwanā bwanga wa Yesu, wāsapwidile uno muntu, papo Yesu ke musanguke. Fidipa wāpele uno muntu bukamoni bulombola’mba Yesu ye Meshiasa. Mwine Efiopya wātengwa na bintu byaāfundile, ko kunena wānena’mba: “Tala! Mema aa keo; le kinkankaja kubatyijibwa i kika le?”​—Bilongwa 8:26-36.

3. (a) Le Yesu wāpele balondi bandi musoñanya’ka? (b) Le muntu ufwaninwe kubatyijibwa muswelo’ka?

³ Bible witulombola patōkelela’mba shi usaka kwingidila Yehova, ufwaninwe kubatyijibwa. Yesu wāsapwidile balondi bandi amba: “Endai mukalonge bana ba bwanga mu bantu ba ku mizo yonso, mwibabatyijei.” (Mateo 28:19) Yesu wāshile kimfwa na kubatyijibwa bidi aye mwine. Kebāmutūtyilepo’tu mema ku mutwe, ino bāmutokenye aye yense mu mema. (Mateo 3:16) Dyalelo nadyo shi mwine Kidishitu kabatyijibwa, bafwaninwe kumutokenya aye yense mu mema.

4. Le kubatyijibwa kobe kulombolanga bantu bika?

⁴ Kubatyijibwa kobe kulombolanga bantu amba usakanga bine kwikala mulunda na Leza ne kumwingidila. (Ñimbo ya Mitōto 40:7, 8) Padi ubeipangula’mba, ‘I bika byomfwaninwe kulonga pa kubatyijibwa?’

5. (a) I bika byofwaninwe kulonga kumeso kwa kubatyijibwa? (b) Mwanda waka kupwila kwa bene Kidishitu i kwa kamweno?

⁵ Kumeso kwa abe kubatyijibwa, ufwaninwe kuyuka Yehova ne Yesu. Washilwile kala kwibayuka na kwifunda Bible. (Tanga Yoano 17:3.) Inoko kekupwilepo.  Bible unena’mba ufwaninwe kuyulwa “buyuki bwa binebine” bwa kiswa-mutyima kya Yehova. (Kolose 1:9) Kupwila kwa Batumoni ba Yehova kukakukwasha upwane bininge na Yehova. Buno i bubinga bumo bwa kamweno bofwaninwe kutaninwa’ko kyaba ne kyaba.​—Bahebelu 10:24, 25.

6. I bika byofwaninwe bidi kuyuka mu Bible kumeso kwa kubatyijibwa?

⁶ Shako, Yehova kakulombengapo amba poso’nka uyuke byonso bidi mu Bible ebiya kobatyijibwa, mhm. Nansha ke mwine Efiopya mwine kālombelwepo kuyuka byonso ebiya kabatyijibwa. (Bilongwa 8:30, 31) Tukendelela nyeke kwifunda myanda ya Leza. (Musapudi 3:11) Inoko pa kubatyijibwa, ufwaninwe kuyuka bidi bufundiji bwa kyalwilo budi mu Bible ne kwibwitabija.—Bahebelu 5:12.

7. Le kwifunda Bible i kukukwashe namani?

⁷ Bible unena’mba: “Pampikwa lwitabijo kebibwanikapo kusangaja Leza.” (Bahebelu 11:6) Nanshi ufwaninwe kwikala na lwitabijo kumeso kwa kubatyijibwa. Bible witulombola’mba bantu bamo mu kibundi kya kala kya Kodinda bātejeje bufundiji bwa balondi ba Yesu, enka nenki, “baanza kwitabija ne kubatyijibwa.” (Bilongwa 18:8) Nobe mo monka, kwifunda kowifunda Bible kubakukwasha wikale na lwitabijo mu milao ya Leza ne mu bukomo bwa kitapwa kya Yesu, kine kibwanya kwitupandija ku bubi ne ku lufu.​—Yoshua 23:14; Bilongwa 4:12; 2 Temote 3:16, 17.

8. Le i bika bikakulengeja usapwile bantu bakwabo byobya byowifunda?

⁸ Shi wifunde bintu bivule mu Bible ne kumona mobikukwashisha mu būmi bobe, lwitabijo lobe  lukaninga. Ukekala na mutyima wa kusapwila bantu bakwabo byobya byowifunda. (Yelemia 20:9; 2 Kodinda 4:13) Ino le i bāni bofwaninwe kusapwila?

9, 10. (a) Le i bāni bokashilula kusapwila byobya byowifunda? (b) I bika byofwaninwe kulonga shi usaka kusapula pamo na kipwilo?

⁹ Ubwanya kusapwila ba mu kisaka, balunda, balondakani, ne bomwingilanga nabo myanda yowifunda. Kwibasapwila’yo i kuyampe, inoko wibasapwile’yo na kanye ne buswe. Mwenda mafuku, ukabwanya kusapula pamo na kipwilo. Shi ubamone amba pano kobwanya kusapula pamo na kipwilo, yukija’mo Kamoni ukufundijanga Bible, mulombole amba pano usakanga kusapula pamo na kipwilo. Shi nandi wamone amba ubwanya, kadi pano kolondanga misoñanya ya mu Bible mu būmi bobe, nankyo banwe bonso pamo muketana na bakulumpe babidi ba pa kipwilo.

¹⁰ I bika byomukesamba nabo? Bakulumpe bakesamba nobe mwanda wa kuyuka shi wivwanije bufundiji bwa kyalwilo bwa mu Bible ne shi witabije’bo, shi ukōkelanga mu būmi bobe byobya binena Bible, ne shi usaka binebine kwikala Kamoni wa Yehova. Vuluka’mba bakulumpe batele mutyima bantu bonso mu kipwilo, kubadila’mo ne abe, nanshi kokevwana moyo wa kwisamba nabo. (Bilongwa 20:28; 1 Petelo 5:2, 3) Shi mubapu kwisamba nabo, ku mfulo bakulumpe bakakulombola shi ukokeja kusapula pamo na kipwilo.

11. Mwanda waka i biyampe kushinta mwiendelejo kumeso kwa kusapula pamo na kipwilo?

¹¹ Bakulumpe babwanya kukulombola’mba kukidi byofwaninwe kushinta kumeso kwa kusapula pamo na kipwilo. Mwanda waka i biyampe kushinta mungya byobakulombola?  Mwanda kitatyi kyotusapwila bantu myanda ya Leza, tunenanga pa kyaba kya Yehova, o mwanda nanshi tufwaninwe kwikala na mwiendelejo umupeja bulēme.​—1 Kodinda 6:9, 10; Ngalatea 5:19-21.

12. Mwanda waka bantu bonso bafwaninwe kwisāsa?

¹² Kudi ne bintu bikwabo byofwaninwe kulonga kumeso kwa kubatyijibwa. Mutumibwa Petelo wānenene amba: “Mwisāsei, kadi alamukai mwanda wa bubi bwenu bujimankanibwe.” (Bilongwa 3:19) Lelo kwisāsa kushintulula bika? Kushintulula kwialakanya bya binebine pa mwanda o-onso mubi otulongele. Kimfwa, shi wadi uloñanga busekese, nabya bikulomba kwisāsa. Nansha shi wadi uloñanga bukomo bwa kulonga byoloke mu būmi bobe bonso, napo kadi bikulomba’nka kwisāsa, mwanda batwe bonso tulubanga kadi tusakilwa kufwilwa lusa na Leza.​—Loma 3:23; 5:12.

13. Le ‘kwalamuka’ i bika?

¹³ Lelo shi ubealakanya pa bubi bolongele kubapu? Aa. Petelo wānenene amba ufwaninwe kadi ne ‘kwalamuka.’ Ko kunena’mba ufwaninwe kuleka mwiendelejo o-onso mubi wa kala, ulonge byoloke. Tulete kimfwa, langa’po bidi wenda ku kifuko kampanda kokwaendele kashā. Abe wenda’mo bityetye, ubajingulula’mba ubaluba dishinda. Le ukalonga’po namani? Na bubine ukatyepeja lwendo ne kwimana, kadi ukalamuka ne kwenda mu dishinda diyampe. Mo monka ne powifunda Bible, ukajingulula’mba kudi bibidiji nansha bintu kampanda byofwaninwe kushinta mu būmi bobe. Itabija ‘kwalamuka’​—ko kunena’mba, kushinta popa posakilwa kushinta​—ne kwanza kulonga byoloke.

14. Le bepānanga namani kudi Leza?

¹⁴ Ditabula dikwabo dyofwaninwe kutabula kumeso kwa kubatyijibwa i kwipāna abe mwine kudi Yehova. Kwipāna abe mwine kudi Yehova, i kumulaya mu milombelo amba usa kumutōta’nka aye kete ne amba kulonga kiswa-mutyima kyandi ko kwa mvubu mpata mu būmi bobe.​—Kupituluka 6:15.

15, 16. Le i bika bitononanga muntu epāne aye mwine kudi Leza?

¹⁵ Kulaya kwingidila Yehova bunka bwandi kudi pamo bwa kulaya kushikata mu būmi bobe bonso pamo na muntu osenswe. Langa shi ba mwana-mulume ne mwana-mukaji basaka kwisonga. Mwana-mulume paenda uyuka mwana-mukaji’wa biyampe, po pene buswe bwa kumusonga ke bwenda bubaila’ko. Kwisonga i mwanda mukatampe, ino nansha nabya, mwana-mulume witabijanga kino kiselwa mwanda wa buswe bwasenswe mwana-mukaji.

¹⁶ Byowefunda myanda ya Yehova, ubamusanswa ne pano usakanga kulonga bukomo bobe bonso bwa kumwingidila. Kino kyo kisa kukutonona umulaye mu milombelo amba ukamwingidila. Bible unena’mba yewa ense usaka kulonda Yesu “epele aye mwine.” (Mako 8:34) Le ko kunena namani? Ko kunena’mba ufwaninwe kutūla kikōkeji kyobe kudi Yehova pa kifuko kibajinji mu būmi bobe. Byobya bisaka Yehova i bya mvubu mpata kutabuka byobya byosaka ne bitungo byobe.​—Tanga 1 Petelo 4:2.

17. Mwanda waka bantu bamo kebepānangapo kudi Yehova?

¹⁷ Bantu bamo kebepānangapo kudi Yehova mwanda wa moyo wa amba basa kukomenwa kufikidija byobamulaya  kumwingidila. Batyinanga kufītyija Yehova mutyima, kadi balañanga’mba shi kebepēnepo kwadi, Yehova kakebatopekapo pa byobalonga.

18. I bika bikakukwasha uleke kutyina’mba padi ukalonga bintu bifītyija Yehova mutyima?

¹⁸ Buswe bosenswe Yehova bukakukwasha uleke kutyina’mba padi ukalonga bintu bimufītyija mutyima. Byomusenswe, ukalonga bukomo bwa kufikidija mulao obe. (Musapudi 5:4; Kolose 1:10) Kukamonepo amba i bikomo kulonga kiswa-mutyima kya Yehova. Mutumibwa Yoano wālembele amba: “Mwanda buno namino bo buswe bwa Leza, amba tulame mbila yandi; kadi mbila yandi keilēmangapo.”​—1 Yoano 5:3.

19. Mwanda waka kufwaninwepo kwivwana moyo wa kwipāna kudi Yehova?

¹⁹ Kebikulombepo kwikala mubwaninine pa kwipāna kudi Yehova. Aye ketulombengapo tulonge bivule kupita byotubwanya kulonga. (Ñimbo ya Mitōto 103:14) Ukakukwasha ulonge byoloke. (Isaya 41:10) Kulupila Yehova na mutyima obe onso, “nandi ukōlolanga tushinda tobe.”​—Nkindi 3:5, 6.

20. Shi kodi mwipāne kudi Yehova, le i ditabula’ka dikwabo dyofwaninwe kutabula?

²⁰ Lelo ulanga’mba wi mufwaninwe kwipāna kudi Yehova? Shi kodi mwipāne abe mwine kudi Yehova, nabya ufwaninwe kutabula ditabula dilonda’ko. Ke dya kubatyijibwa kadi.

21, 22. Le i muswelo’ka ‘okanena patōkelela’ lwitabijo lobe?

²¹ Yukija’mo mukwatakani wa kitango kya bakulumpe pa kyenu kipwilo amba kodi mwipāne abe mwine kudi Yehova, kadi pano usakanga kubatyijibwa. Aye  nandi ukatonga bakulumpe bamo bakabandaula nobe bufundiji bwa Bible bwa kyalwilo. Shi abamone amba wi mufwaninwe, bakakusapwila’mba usa kubatyijibwa ku kitango kilonda’ko kya Batumoni ba Yehova. Ku kitango, ye kobakashintulula buluji bwa lubatyijo. Ebiya muneni unena mwisambo ukepangula boba bafwaninwe kubatyijibwa bipangujo bibidi bipēla.  Shi ubalondolola ku bino bipangujo, nabya ‘ubanena patōkelela’ lwitabijo lobe.​—Loma 10:10.

²² Kupwa papo ukabatyijibwa. Bakakutokenya abe ense mu mema. Lubatyijo lobe lukalombola bantu bonso amba wepēne kudi Yehova ne amba pano kodi Kamoni wa Yehova.

23. Lelo kubatyijibwa “mu dijina dya Tata ne dya Mwana ne dya mushipiditu ujila,” ko kunena namani?

²³ Yesu wānenene amba bandi bana ba bwanga bakabatyijibwa “mu dijina dya Tata ne dya Mwana ne dya mushipiditu ujila.” (Tanga Mateo 28:19.) Le ko kunena namani? Ko kunena’mba ubaitabija lupusa lwa Yehova Leza ne mwingilo wa Yesu mu mpango Yandi, ne amba Leza wingidijanga mushipiditu ujila pa kufikidija mpango yandi.​—Ñimbo ya Mitōto 83:18; Mateo 28:18; Ngalatea 5:22, 23; 2 Petelo 1:21.

24, 25. (a) Le lubatyijo lwelekeja bika? (b) Le i bika byotukesambila’po mu shapita wa mfulo?

²⁴ Lubatyijo lwelekeja kintu kimo kya mvubu mpata. Kitatyi kyotokenibwa mu mema, ko kunena’mba ubafu, nansha’mba ubaleka būmi bobe bwa kala. Shi ubavubulwa mu mema, i būmi bupya bowashilula bwa kulonga kiswa-mutyima kya Leza. Kino kilombola’mba ubashilula tamba pano kwingidila Yehova nyeke ne nyeke. Vuluka’mba kwipēnepo kudi muntu kampanda, ku bulongolodi kamukaya, nansha ku mwingilo kabidye. I kudi Yehova kowapāna būmi bobe.

²⁵ Kwipāna kobe kukakukwasha upwane bininge na Leza. (Ñimbo ya Mitōto 25:14) Kino kekishintululapo amba muntu ukapanda mwanda’tu i mubatyijibwe. Mutumibwa Polo wālembele amba: “Mwielelei’ko nyeke mufikijije lupandilo lwenu na moyo ne luzakalo ponka.” (Fidipai 2:12) Lubatyijo i ngalwilo’tu. Ino i muswelo’ka okekala nyeke pabwipi na Yehova? Shapita wa mfulo uketupa kilondololwa.