1. Avyani vino mungatalika ukwelenganya pa nsizi ya kusambilila mwe lyo-o ibuku?

UKUFUMA pano mwatalicizile ukusambilila Baibolo mwe lyo-o ibuku, musambilizile ivintu ivivule vino Baibolo ikasambilizya. Musambilizile pa wumi wa muyayaya wuno Leza watulaya, vino umuntu akawa nga wafwa nu kuti awafwe walizyulupuka. (Ekawizya 9:5; Luka 23:43; Yohani 5:28, 29; Ukuwumbulika 21:3, 4) Pamwi mwatalika nu kuzanwa mu kulongana ni Nte zya kwe Yehova swinya mwasinincizya nu kuti awano wakapepa Leza ukulingana na vino akalonda. (Yohani 13:35) Pamwi wuciwuza winu ne Yehova wuwomezileko ica kuti mukulonda nu  kutalika ukumuwombela. Nce pamwi mwatalika nu kuyiwuzya ukuti, ‘Ningacita wuli pa kuti nawombela Leza?’

2. Acani cino calenzile ukuti umwina Ethopia alonde ukubatizwa?

² Avino nu mwina Ethopia wino walinjiko mu mpindi ya kwe Yesu watalisile ukwelenganya. Pano papisile impindi ukufuma pano Yesu wazyulupucizile, e Filipi wayile awizizya umwina Ethopia. E Filipi wavwizye umwina Ethopia ukusinincizya ukuti e Yesu walinji we Mesia. Umwina Ethopia watemilwe sana vino wasambilizile ica kuti walanzile ukuti: “Lola aminzi ya-a; acani cino cikundesya ukubatizwa?”​—Imilimo 8:26-36.

3. (a) Alisundo ci lino Yesu wapile awasambilizi wakwe? (b) Uzye umuntu afwile ukubatizwa wuli?

³ E Baibolo ikasambilizya ukuti umuntu nga akulonda ukuwombela Yehova afwile ukubatizwa. E Yesu wanenile awasambilizi wakwe ukuti: ‘Kapangani awa mu nko zyonsinye ukuwa awasambilizi, muwawabatizya.’ (Mateyu 28:19) E Yesu nawenye wabatizizwe pa kulanjizya ukuti ulubatizyo lwacindama sana. Pano wabatizwanga, wamuzuwisile wensinye mu minzi, watamusansizile vye aminzi pa mutwe. (Mateyu 3:16) Fwandi ni mpindi yonye Umwina Klistu nga akulonda ukubatizwa, wazipizile ukumuzuwika wensinye mu minzi.

4. Uzye umuntu nga wabatizwa akalanjizya cani?

⁴ Umuntu nga wabatizwa akalanjizya ukuti akulondesya ukuwombela Yehova nu kuwa e ciwuza wakwe. (Amalumbo 40:7, 8) Fwandi mungatalika ukuyiwuzya ukuti, ‘Acani cino mfwile ukucita pa kuti mbatizwe?’

5. (a) Avyani vino mufwile ukucita pano mutani mubatizwe? (b) Amulandu ci wuno cacindamila ukuzanwa mu kulongana ni Nte zya kwe Yehova?

⁵ Pano mutani mubatizwe, mufwile ukumanya Yehova  ne Yesu. Pano mwatalisile ukusambilila Baibolo mwatalisile ukumanya Yehova ne Yesu. (Wazyani Yohani 17:3.) Lelo kuli na vinji vino mufwile ukucita. E Baibolo ikalanda ukuti mufwile ‘ukwizulamo ukumanya’ ukulonda kwa kwe Yehova. (Wakolose 1:9) Nga mukuzanwa mu kulongana ni Nte zya kwe Yehova muliwa e ciwuza wa kwe Yehova. Awuli umulandu wuno cacindamila ukuzanwa lyonsinye mu kulongana.​—Waheberi 10:24, 25.

6. Avyani vino mufwile ukumanya mwe Baibolo pano mutani mubatizwe?

⁶ Kweni e Yehova asikwenecela ukuti mufwile ukumanya vyonsinye mwe Baibolo pano mutani mubatizwe, ngati awulyanye vino atenecelanga nu mwina Ethopia ukumanya vyonsinye pano atani abatizwe. (Imilimo 8:30, 31) Tufwile ukumanya ukuti tulitwalilila ukusambilila pe Leza umuyayaya. (Ekawizya 3:11) Lelo pa kuti mubatizwe mufwile ukumanya nu kusuwila amasambilizyo ya mu Baibolo aya kutalicilako.​—Waheberi 5:12.

7. Uzye ukusambilila Baibolo kwamyavwa wuli?

⁷ E Baibolo ikati: “Ukwasowa isuwilo tutanga tusecelesye Leza.” (Waheberi 11:6) Fwandi pano mutani mubatizwe mufwile ukuwa ni suwilo. E Baibolo ikatunena ukuti awantu wamwi wano wikalanga mu Korinte watili wivwa vino awasambilizi wa kwe Yesu wasambilizyanga, “wasuwizile nu kubatizwa.” (Imilimo 18:8) Na mwemwenye ukusambilila Baibolo kulenzile mwawa ni suwilo mwe vino Leza watulaya na mu maka yano imfwa ya kwe Yesu yakwata aya kutupususya ku luwembu ni mfwa.​—Joshua 23:14; Imilimo 4:12; 2 Timoti 3:16, 17.

8. Acani cino cililenga mwavwamba ukuneko awantu wanji vino mu kusambilila?

⁸ Pano mu kusambilila Baibolo nu kulola vino  ikumyavwa, isuwilo linu lyandi lyawomelako. Muliwavwamba ukunenako wanji vino mu kusambilila. (Jeremiya 20:9; 2 Wakorinte 4:13) Nomba awaweni wano mufwile ukunenako?

9, 10. (a) Awaweni wano munganenako vino mu kusambilila mu Baibolo? (b) Acani cino muzipizile ukucita nga mukulonda ukutalika ukuwizizya ponga ni wungwe?

⁹ Mufwile mwanenako walupwa, iviwuza, awina mupalamano nanti wano mukawomba nawo vino mu kusambilila mu Baibolo. Nga mu kucita wo-o lyo mu kucita icete, lelo mwakwizuka ukuti mufwile ukuwalondololela mu mucinzi. Mu kupita kwa mpindi mulitalika ukuwizizya ponga ni wungwe. Nga mu kulonda ukutalika ukuwizya ponga ni wungwe, mufwile ukunena wino akamisambilizya Baibolo. Nga ca kuti nawe walola ukuti mufisilepo swinya mukwikala ukulingana na vino Baibolo ikasambilizya, alinena waeluda mwi wungwe linu pa kuti mwize mulanzyanye na waeluda wawili lyo muli na wino akamisambilizya Baibolo.

¹⁰ Uzye avyani vino mulilanzyanya? Waeluda walilonda ukumanya nga ca kuti mwazumila nu kwivwicisya amasambililo ya mu Baibolo aya kutalicilapo, nga ca kuti mukakonka vino Baibolo ikalanda swinya nga ca kuti mukuvwambisya ukuwa Inte ya kwe Yehova. Mutazipizile ukutina pano mukulanzyanya nawo, amuno waeluda awano wakasakamala wonsinye wano wawa mwi wungwe ukuwikako na mwemwenye. (Imilimo 20:28; 1 Peter 5:2, 3) Pa nsizi ya kulanzyanya, waliminena nga ca kuti mufisilepo ukutalika ukuwizya ponga ni wungwe.

11. Amulandu ci wuno cacindamila ukuzifyako imiwele pano mutani mutalike ukuwizizya ponga wungwe?

¹¹ Waeluda wangaminena nga ca kuti mufwile ukuzifyako imiwele yimwi pano mutani mutalike ukuwizya ponga ni wungwe. Amulandu ci wuno cacindamila ukuzifyako  imiwele? Amulandu wa kuti tukasambilizya wantu pe Leza nu kwimililako Yehova. Acino imiwele yitu yifwile yiwalanjizya ukuti twamucindika.​—1 Wakorinte 6:9, 10; Wagalatiya 5:19-21.

12. Amulandu ci wuno swensinye tukalondekwa ukulapila?

¹² Kuli na vinji vino mufwile ukucita pano mutani mubatizwe. Umutumwa Peter walanzile ukuti: “Lapilani, nu kupiliwucila kwe Leza, pa kuti imembu zinu zifutwe.” (Imilimo 3:19) Uzye ukulapila cikapiliwula cani? Cikapiliwula ukwivwa uwuwi nu kukana nyocezyapo iviluwo vyonsinye vino mwacitanga. Ica kulolelako, nga ca kuti mwacitanga uwuzelele pano mutani mutalike ukusambilila Baibolo mufwile ukulapila. Kweni pamwi mungalanga mukawombesya ukucita ivizima, lelo naponye muzipizile ukulapila amuno swensinye swe wawembu swinya tukavwamba ukuti Leza awatutetela.​—Waroma 3:23; 5:12.

13. Uzye “ukupiliwuka,” akuli ukucita cani?

¹³ Uzye tuzipizile ukupelela vye pa kwivwa uwuwi pa viluwo vino twacitanga? Awe. Umutumwa Peter walanzile ukuti tuzipizile nu “kupiliwuka.” Co-o cikupiliwula ukuti tufwile ukuleka ukucita iviwipe vyonsiye vino twacitanga nu kutalika ukucita ivizima. Pa kuti mwivwicisye cino tukulandapo, yelenganyani ukuti mukuya ku ncende kuno musitela muye. Lelo pano mutani mufike patali, mwiluka ukuti musovile. Acani cino mungacita? Ukwasowa nu kuvwilika mungapiliwuka vye nu kutalika ukuya ku nzila yino yingamitwala kuno mukuya. Avino cikawa na pano mu kusambilila Baibolo. Mungazana ukuti muzipizile ukupiluka mwe vimwi vino mwacitanga pano mutani mutalike ukusambilila Baibolo. Mwayitemelwa “ukupiliwuka,” akuli ukuti ukuleka ukucita iviwipe nu kutalika ukucita ivizima.

14. Avyani vino muzipizile ukucita pa kuyipa kwe Leza?

¹⁴ Icintu cinji icicindame cino muzipizile ukucita pano mutani mubatizwe, akuyipa kwe Yehova. Pa kuyipa kwe Yehova, mufwile ukumunena mwi pepo ukuti awino mwandi mwapepa vye ampela nu kuti ukucita ukulonda kwakwe acino cacindama sana mu wumi winu.​—Amasundo 6:15.

15, 16. Acani cino cikalenga umuntu ukuyipa kwe Leza?

¹⁵ Ukulaya Yehova ukuti awino mwandi mwawombela acili conga nu kulaya umuntu wino mwatemwa ukuti muliyikala nawe mpaka imfwa. Yelenganyani ukuti umulumendo nu mukazyana wakuvwambana. Nga ca kuti umulumendo wamanya icete imiwele ya mukazyana, akamutemelwako swinya akalonda nu kuti ayize amutwale. Nanti aca kuti ukupingulapo ukutwala citapepuka, pa mulandu wakutemwa umukazyana, umulumendo akayipelesya ukuti mpaka wize watwalane.

¹⁶ Nga mu kusambilila pe Yehova mulimutemwa swinya muliwalonda vye ukuti mwamuwombela. Ukucita wo-o kulilenga mu mulaye mwi pepo ukuti mwandi muwamuwombela. E Baibolo ikati wensinye wino akulonda ukukonka Yesu azipizile “ayikane umweneco.” (Marko 8:34) Uzye amazwi ya kuti “ayikane umweneco” yakasula cani? Yakasula ukuti ukwivwila Yehova acino cacindama sana kwe mwemwe. Swinya vino Yehova akalonda avino vifwile ukucindama nkaninye ukucila vino mweweneco mukalonda ukucita.​—Wazyani 1 Peter 4:2.

17. Acani cino wamwi wakatinila ukuyipa kwe Yehova?

¹⁷ Awantu wamwi wakatina ukuyipa kwe Yehova, amuno wakakwelenganya ukuti watanga wakumanisye ukutwalilila ukumuwombela. Swinya wakakwelenganya nu kuti  nga watayipile kwe Yehova kusi wino aliwaluwulusya pe vyonsinye vino wangacita.

18. Acani cino cilimyavwa ukukanawa ni ntete zya kuti nga mwayipa kwe Yehova pamwi mungiza mucite vino wapata?

¹⁸ Nga mwatwalilila ukutemwa Yehova mutaliwatina ukuti nga mwayipa kwe weliwe pamwi mungiza mucite vino wapata. Pa mulandu wa kuti mwamutemwa, muliwakwelelezya na maka ukuficilizya vino mwamulaya. (Ekawizya 5:4; Wakolose 1:10) Swinya mutaliwalola ukuti ukucita ukulonda kwa kwe Yehova kwatala. Umutumwa Yohani walemvile ukuti: “Ko-o akuli ukutemwa Leza, ukuti twakonka amasundo yakwe, swinya amasundo yakwe yatatala.”​—1 Yohani 5:3.

19. Amulandu ci wuno mutazipizile ukutinila ukuyipa kwe Yehova?

¹⁹ Mutafwile ukuwa awapwililike pa kuti muyipe kwe Yehova. Swinya e Yehova atanga atunene ukucita cino amanyile ukuti tutanga tukumanisye. (Amalumbo 103:14) Aliwamyavwa ukucita ivilungamane. (Ayizeya 41:10) Acino mwasuwila Yehova nu mwezo winu wonsi, swinya ‘nawe alitambalika inzila zinu.’​—Imilumbe 3:5, 6.

20. Uzye acani cinji cino muzipizile ukucita nga mwayipa kwe Leza?

²⁰ Uzye nomba mukuyivwa ukuti mufisilepo ukuyipa kwe Yehova? Nga mwayipa kwe Yehova lyo mu kulanjizya ukuti muyine ukucita icintu na cinji icicindame. Muzipizile ukubatizwa.

21, 22. Avyani vino muzipizile ukucita pa ‘kuyilandila mwe weneco’ ukuti mwasuwila mwe Yehova?

²¹ Muzipizile ukunena e kampanya wi wumba lya eluda mwi wungwe muno mwawa ukuti mwayipa kwe Yehova nu kuti mukulonda ukubatizwa. Nga pano e kampanya alinena waeluda wamwi ukuti wamipitulusye mu masambililo  ya kutalicilapo aya mu Baibolo. Waeluda wano waliwamipitulusyamo nga walola ukuti mufisilepo ukubatizwa, walimimanyisya ukuti mulibatizwa pa kulongana kwa muputule nanti ukwa citungu ukwa Nte zya kwe Yehova. Pe ko-o ukulongana paliwa ilyasi lino lililondolola icete sana muno ulubatizyo lwasula. E kalanda wi lyasi aliwuzya wonsinye wano wakulonda ukubatizwa amawuzyo yawili. Nga mwasuka ya-a amawuzyo,  lyo ‘mwayilandila mwe weneco’ ukuti mwasuwila mwe Yehova.​—Waroma 10:10.

²² Nga mwacita wo-o, apano mungabatizwa. Pa kumibatizya, walimizuwika umuwili wonsinye mu minzi. Nga mwabatizwa awantu wonsinye walimanya ukuti mwayipa kwe Yehova nu kuti nomba mwe Nte ya kwe Yehova.

23. Uzye cikapiliwula cani ukubatizwa “mwi zina lya kwe Tata ni lya Mwana ni lya muzimu wutele”?

²³ E Yesu walanzile ukuti awasambilizi wakwe wazipizile ukubatizwa “mwi zina lya kwe Tata ni lya Mwana ni lya muzimu wutele.” (Wazyani Mateyu 28:19.) Uzye ya-a amazwi yakapiliwula cani? Yakapiliwula ukuti tufwile ukuzumila ukuti e Yehova awino wayana ukututungulula nu kuti tufwile ukumanya umulimo wuno Yesu wawa nawo pa kuficilisya ukulonda kwa kwe Leza, swinya tuzipizile nu kumanya vino Yehova akawomvya umuzimu wutele pa kuficilisya ukulonda kwakwe.​—Amalumbo 83:18; Mateyu 28:18; Wagalatiya 5:22, 23; 2 Peter 1:21.

24, 25. (a) Uzye ulubatizyo lukakwimililako cani? (b) Acani cino tulisambililapo mu cipandwa ca kulecelezya?

²⁴ Ulubatizyo lukakwimililako icintu cimwi icicindame sana. Nga wamizuwika mu minzi cikawa ngati mwafwa nanti ukuleka ukucita vino mwacitanga pano mutani mubatizwe. Nga wamizuwula lyo mwatalika uwumi uwupya uwa kucita ukulonda kwa kwe Leza. Swinya lyo mwalanjizya ukuti mulitwalilila ukuwombela Yehova uwumi winu wonsinye. Mwakwizuka ukuti nga mwayipa nu kubatizwa lyo mwayipa vye kukuwombela Yehova, asa ku muntu, ku kawungwe nanti ukuti mwinjila incito kwe Yehova.

²⁵ Ukuyipa kwinu kulimyavwa ukuwa na wuciwuza uwuwome ne Leza. (Amalumbo 25:14) Co-o citakupiliwula ukuti umuntu nga wabatizwa lyo wapusuka. Umutumwa Paulo walemvile ukuti: “Mwawombela ipusucilo linu ni ntete nu kuzakaza.” (Wafilipi 2:12) Nga mwabatizwa lyo apano mwatalika ukuwombela Leza. Nomba uzye mungacita wuli pa kuti mutwalilile ukupalamila kwe Yehova? Icipandwa ca kulecelezya candi casuke lyo-o iwuzyo.