1. ¿Toni xa tionmotajtania satepan ke tionmomachtijya nejin amatajkuilol?

ITECH nejin amatajkuilol, tionmomachtijya miak taman tein yekmelauj tamachtia Biblia. Seki taman yejua ke Dios kijtoua ke tinemiskej nochipaya, toni techpanoua keman timomikiliaj uan ke mikemej oksepa nemiskej (Eclesiastés 9:5; Juan 5:28, 29; Apocalipsis 21:3, 4). Xa tionyajtokya ininnechikoluan itaixpantijkauan Jiova uan tikonneltoka ke yejuan moajsij itech taneltokalis tein melauak (Juan 13:35). Xa no peuakya kuali tionmouika iuan Jiova uan tikonneki tikontekitilis. Yejua ika xa tionmotajtania: “¿Toni no moneki nikchiuas?”.

2. ¿Keyej se takat kayot Etiopía kinekik moauis?

 ² Yejua nejon motajtanij se takat kayot Etiopía akin nemik itech yekinika siglo. Seki metsti satepan ke Jesús oksepa nemik uan yajki iluikak, se imomachtijkauj akin monotsaya Felipe, kinojnotsak nejon takat uan kimelauilij ke Jesús katka Mesías. Yejua semi kiyolpaktij tein momachtij uan yejua ika niman kijtoj: “Nikan ongak at. ¿Xe amo uelis ma xinechaui tech nijin at?” (Hechos 8:26-36).

3. 1) ¿Toni kinnauatij Jesús itatojtokakauan? 2) ¿Keniuj moneki se moauis?

³ Biblia senkis kijtoua ke komo tikonneki tikontekitilis Jiova, moneki tionmoauis. Jesús kinnauatij itatojtokakauan: “Xikinnextilikan nochi in taltikpakuani ma yejuan no ma mochiuakan nomomachtijkauan”. Uan ompa kijtoj: “Xikinauijtinemikan” (Mateo 28:19). Jesús kinnextilij ke moneki ijkon se kichiuas keman moauij. Ijkuak, amo kikuatekilijkej tepitsin at, ta senkis kipankalakijkej itech at (Mateo 3:16). Keman axkan moauia se akin kichiua kemej Cristo, no moneki senkis kipankalakiskej itech at.

4. ¿Toni tiknextiaj keman timoauiaj?

⁴ Keman timoauiaj tikinnextiliaj oksekin ke yekmelauj tiknekij kuali timouikaskej iuan Dios uan tiktekitiliskej (Salmo 40:7, 8). Yejua ika xa tionmotajtania: “¿Toni moneki nikchiuas uan ijkon uelis nimoauis?”.

5. 1) ¿Toni moneki tikonchiuas achto ke tionmoauis? 2) ¿Keyej moneki tionyas nechikolmej?

⁵ Achto ke tionmoauis, moneki tikonixmatis Jiova uan Jesús. Peuakya tikonchiua nejin porin tionmomachtijtok Biblia (xikonixtajtolti Juan 17:3). Sayoj ke  moneki tikonchiuas okse taman. Biblia kijtoua ke moneki senkis tikonixmatis tein Dios kineki (Colosenses 1:9). Nechikolmej tein kipiaj itaixpantijkauan Jiova mitsonpaleuiskej okachi kuali xionmouika iuan Jiova. Yejua ika moneki nochipa tionyas nechikolmej (Hebreos 10:24, 25).

6. ¿Moneki tikonixmatis nochi tein kijtoua Biblia achto ke tionmoauis?

⁶ Jiova amo kichia xikonixmati nochi tein kijtoua Biblia uan ijkon uelis tionmoauis. Yejuatsin amo kichiaya maj takat kayot Etiopía kimatini nochi achto ke moauiskia (Hechos 8:30, 31). Tein melauj, nochipa tiksentokaskej tikixmatiskej Jiova (Eclesiastés 3:11). Sayoj ke, komo tikonneki tionmoauis, moneki tikonixmatis tamachtilismej tein okachi tayekantokej itech Biblia uan tikonneltokas (Hebreos 5:12).

7. ¿Keniuj mitsonpaleuiani tionmomachtis Biblia?

⁷ Biblia kijtoua ke “komo se aksa amo takuautamatinemis iuan Dios, ijkuakon amo uelis kiyolpaktijtinemis” (Hebreos 11:6). Nejin kinextia ke komo tikonneki tionmoauis, moneki tiontakuaujtamatis. Biblia no kijtoua ke sekin akin nemiaj Corinto kikakkej tein tamachtiayaj itatojtokakauan Jesús uan “takuautamatke” uan moauijkej (Hechos 18:8). No ijkon, tionmomachtis Biblia mitsonpaleuiani xiontakuaujtamati ke mochiuas tein Dios kijtoj uan ke inemilis Jesús tein kitemakak uelis techpaleuis maj amo titajtakolejkejok nion maj timomikilikanok (Josué 23:14; Hechos 4:12; 2 Timoteo 3:16, 17).

8. ¿Toni kichiuas xikonneki tikontapouis oksekin tein tionmomachtijtok?

⁸ Ijkon kemej tionmomachtijtiyas tein Biblia tamachtia uan tikonitas keniuj mitsonpaleuia, okachi  tiontakuaujtamatis. Tikonnekis tikontapouis oksekin tein tionmomachtijtok (Jeremías 20:9; 2 Corintios 4:13). Sayoj ke ¿akoni uelis tikontapouis?

9, 10. 1) ¿Akonimej uelis peuas tikontapouis tein tionmomachtijtok? 2) ¿Toni moneki tikonchiuas komo tikonneki tiontanojnotsas iniuan tokniuan?

⁹ Tein tionmomachtijtok xa tikonnekis tikontapouis mochankauan, akin kuali iniuan tionmouika, akin nemij kampa ika tionnemi oso akin iniuan tiontekiti oso iniuan timomachtia. Semi kuali komo ijkon tikonchiua. Sayoj ke keman iniuan tiontajtos, nochipa xionkualtakat uan xikonmouiskaita oso xikonpoujkaita. Satepan, uelis tionpeuas tiontanojnotsas iniuan tokniuan itech nechikol. Keman tikonnemilis ke uelisya tikonchiuas nejon, uelis tiontajtos iuan akin mitsonmachtijtok Biblia uan tikoniluis ke tikonuelitaskia tiontanojnotsas iniuan tokniuan. Komo yejua kiita ke tionuelisya uan komo tikonchiujtokya tein Biblia tanauatia, nanomen nanmosentiliskej iniuan ome tayekananij itech nechikol.

¹⁰ Ijkuak, tayekananij tajtoskej mouan uan ijkon kiitaskej ox tikonajsikamati uan tikonneltoka tamachtilismej tein tayekantokej itech Biblia uan ox tikonchiujtokya tein Biblia tanauatia. No kitemoskej kiitaskej ox yekmelauj tikonneki tionmochiuas itaixpantijkauj Jiova. Xikonelnamiki ke tayekananij kitemouaj maj kuali yetokan nochin akin moajsij itech nechikol, uan tejuatsin no ompa tionmoajsi. Yejua ika amo xionmoui tiontajtos iniuan (Hebreos 13:17; 1 Pedro 5:2, 3). Satepan ke mouan tajtoskej, tayekananij mitsoniluiskej ox uelisya tionpeuas tiontanojnotsas iniuan tokniuan.

11. ¿Keyej achto ke tipeuaskej titanojnotsaskej iniuan tokniuan moneki tikchiujtoskej tein Biblia kijtoua?

¹¹ Tayekananij xa mitsoniluiskej ke ayamo uelis tiontanojnotsas iniuan tokniuan porin monekiok tikonchiuas  seki taman tein kijtoua Biblia. ¿Keyej moneki nejon? Porin keman tikintapouiaj oksekin tein Biblia tamachtia, tiknextiaj ke tiitekitikauan Dios. Yejua ika moneki tikchiuaskej tein ika uelis tikueyitaliskej (1 Corintios 6:9, 10; Gálatas 5:19-21).

12. ¿Keyej tinochin moneki timoyolnonotsaskej?

¹² Moajsi okse taman tein moneki tikonchiuas achto ke tionmoauis. Tatitanil Pedro kijtoj: “Ximoyolnemilikan de namotajtakoluan uan ximokuepakan [...], uan ijkon Totajtsin Dios namechtapojpoluilis” (Hechos 3:19). ¿Toni kijtosneki ‘timoyolnemiliskej’ oso timoyolnonotsaskej? Kijtosneki semi timotayokoltiskej porin tikchiuanij tein amo kuali. Kemej neskayot, komo tejuatsin tionauilnemia, moneki tionmoyolnonotsas. Uan maski nochipa tionmochikauani tikonchiuas tein kuali, no moneki tionmoyolnonotsas porin tinochin titajtakolejkej uan moneki maj Dios techtapojpolui (Romanos 3:23; 5:12).

13. ¿Toni kijtosneki se mokepas?

¹³ ¿Moneki sayoj timotayokoltiskej porin tikchiujkej tein amo kuali? Amo. Tatitanil Pedro no kijtoj: “Ximokuepakan”. Nejin kijtosneki ke moneki tikonixtopeuas nochi tein amo kuali tein achto tikonchiuaya uan moneki tionpeuas tikonchiuas tein kuali. Kemej neskayot, xikonnemili ke tionyajtok itech se xolal kampa amo keman tionyani. Satepan ke uejkaya tionyajki, tikonita ke amo yejua ojti kampa ika monekia tionyas. ¿Toni tikonchiuaskia? ¿Melauj ke tionmoketsaskia, tionmokepaskia uan peuaskia tionyaskia kampa ika moneki? No ijkon, ijkon kemej tionmomachtijtiuj Biblia xa tikonitas ke monekiok tikonkauas seki taman tein tikonchiuaya. Yejua ika xikonixtali  kemej yeskia tionmokepas, oso tikonpatas tein monekis uan xionpeua xikonchiua tein kuali.

14. ¿Keniuj timotemaktiaj iuan Dios?

¹⁴ Okse taman tein no moneki tikonchiuas achto ke tionmoauis yejua tionmotemaktis iuan Dios. Keman timotemaktiaj, tikchiuaj se netataujtil kampa tikiluiaj Jiova ke sayoj yejuatsin tikueyichiuaskej uan ke tiktayekanaltiskej tiktekitiliskej (Lucas 4:8).

15, 16. ¿Keyej timotemaktiaj iuan Dios?

¹⁵ Tikoniluis Jiova ke sayoj yejuatsin tikontekitilis kemej yeskia ijkuak tikoniluia takat oso siuat akin tikontasojta ke nochipaya iuan tionnemis. Xiontanemili itech se takat uan se siuat akin peua moixmatij. Ijkon kemej takat okachi kuali kiixmati siuat, kitasojta uan kineki iuan monamiktis. Maski nejin amo auil, kemej takat kitasojta siuat, kiixtalia monamiktis maski kipias okachi tekimej.

¹⁶ Ijkon kemej tejuatsin okachi tikonixmati Jiova, peua tikontasojta uan yejua ika tikonneki tionmochikauas tikontekitilis. Nejon kichiuas xionmotemakti iuan. Jesús kiniluij imomachtijkauan: “Takan aksa kineki nechtoktilijtiyas, ijkuakon ma kikauteua ne tanejnekilis de yejua san” (Marcos 8:34). Tikauaskej ‘totanejnekilis’ kijtosneki nochipa tiktemoskej tiktakamatiskej Jiova. Tein melauj, tejuatsin tikonitas ke okachi moneki tikonchiuas tein Jiova kineki ke tikonchiuas tein tejuatsin tikonneki (xikonixtajtolti 1 Pedro 4:2).

17. ¿Keyej sekin amo motemaktiaj iuan Jiova?

¹⁷ Sekin akin momachtijtokej Biblia amo motemaktiaj iuan Jiova porin kinemiliaj ke amo uelis kitekitiliskej  ijkon kemej kiluijkej. Xa amo kinekij kiyolkokoskej. Oso xa kinemiliaj ke Jiova amo teyi kinchiuilis komo kichiuaj tein amo kuali porin ayamo motemaktiaj iuan.

18. ¿Toni mitsonpaleuis amo xikonnemili ke tikonyolkokos Jiova?

¹⁸ Netasojtalis tein tikonpialia Jiova mitsonpaleuis amo xikonnemili ke uelis tikonchiuas teisa tein ika tikonyolkokos. No mitsonpaleuis xionmochikaua tikonchiuas tein tikoniluij (Eclesiastés 5:4; Colosenses 1:10). Uan amo tikonnemilis ke semi ouij se kichiuas tein Jiova kineki. Tatitanil Juan kijtoj: “Nestinemi ke melau tikpiaj ne tetasojtalis de Dios, kuak no tiktakamatij ya in tanauatil ten Dios technauatilia ma tikchiutinemikan. Uan in tanauatilme de Dios amo techmachililtia ke kox semi oui para se kintakamatinemis” (1 Juan 5:3).

19. ¿Keyej moneki amo tikonnemilis ke amo uelis tionmotemaktis iuan Jiova?

¹⁹ Maski titajtakolejkej, uelis timotemaktiskej iuan Jiova. Yejuatsin amo keman kichia maj tikchiuakan tein amo ueli tikchiuaj (Salmo 103:14). Uan no, Jiova techpaleuis maj tikchiuakan tein kuali (Isaías 41:10). Biblia kijtoua: “Yejuatsin kimelauas moojuan”. Yejua ika senkis xiontakuaujtamati iuan Jiova (Proverbios 3:5, 6).

20. ¿Toni moneki tikonchiuas satepan ke tionmotemaktis iuan Jiova?

²⁰ ¿Tikonnemilia ke uelisya tionmotemaktis iuan Jiova? Komo ijkon, satepan ke tionmotemaktis, uelisya tionmoauis.

21, 22. ¿Keniuj uelis tikonnextis “senteixteno” ke tiontakuaujtamati?

²¹ Xikonilui semej tayekananij ke tionmotemaktijya iuan Jiova uan ke tikonneki tionmoauis. Ompa, seki tayekananij mouan kiitaskej tamachtilismej tein tayekantokej itech Biblia. Komo yejuan kiitaj ke  tionuelisya, mitsoniluiskej ke uelisya tionmoauis itech ueyi nechikol tein kipiaskej itaixpantijkauan Jiova. Itech nejon ueyi nechikol motemakas se tanojnots kampa momelauas toni kijtosneki se moauis. Tokniuj akin kitemakas tanojnots kinchiuilis ome netajtanilmej nochin akin moauiskej. Keman tikonnankilis nejon ome netajtanilmej, tikonnextis “senteixteno” ke tiontakuaujtamati (Mateo 10:32).

 ²² Satepan, tejuatsin tionmoauis uan senkis mitsonpankalakiskej itech at. Keman tionmoauis tikonnextilis nochin akin ompa moajsiskej ke tionmotemaktijya iuan Dios uan ke itech nejon tonal tionmochiua itaixpantijkauj Jiova.

23. ¿Toni kijtosneki se moauis itokaykopa Dios, iKonetsin uan yektikatsin espíritu?

²³ Jesús kijtoj ke imomachtijkauan moauiskiaj “ika itokaytsin de Toueyitajtsin Dios uan de Ikonetsin Dios uan de in [y]ektikatsin [e]spíritu” (xikonixtajtolti Mateo 28:19). ¿Toni kijtosneki nejin? Kijtosneki ke tikitaj Jiova kemej toueyi taixyekankauj, ke tikpatiuitaj keniuj Jiova itechkopa Jesús kichiua tein kiixtalijtok uan keniuj kikui iyektikatsin espíritu keman kichiua itanejnekilis (Salmo 83:18; Mateo 28:18; Gálatas 5:22, 23; 2 Pedro 1:21).

24. ¿Toni kiixnextia neauilis?

²⁴ Neauilis kiixnextia se taman tein semi moneki. Keman mitsonpankalakiskej itech at, kemej yeskia tionmomikilis, porin tikonkaua tein achto tikonchiuaya. Uan keman tionkisas, kemej yeskia oksepa tionyoli porin peua tikonchiua tein Jiova kineki. Ijkon tikonnextis ke tionmochiuakya itekitikauj Dios. Xikonelnamiki ke amo tionmotemaktia iuan se taltikpaknenkej, se nechikol oso se tekit, ta tikonmaktilia monemilis Jiova.

25. ¿Toni tikitaskej itech okse tamachtilis?

²⁵ Keman tionmotemaktis iuan Jiova, okachi kuali tionmouikas iuan (Salmo 25:14). Sayoj ke amo kijtosneki ke timakisaskej sayoj porin timoauijkejya. Tein melauj, tatitanil Pablo kijkuiloj: “Xiksentokakan xitakuautamatiyakan. [...] Uan amo no ximosekokauakan de ne Tajtoltsin de Dios ten kualkui ne nemakixtilis” (Colosenses 1:23). Nejin kinextia ke keman timoauiaj peua tikchiuaj se taman tein techpaleuis maj timakisakan. ¿Toni mitsonpaleuis xikonsentoka kuali xionmouika iuan Jiova? Tamachtilis tein ika tami nejin amatajkuilol kinankilis nejin netajtanil.