1. Bíhwiiniłʼą́ą́ʼígíí, kʼad haʼátʼíí baa nitsíníkees doo?

DÍÍ naaltsoos biiʼdóó ląʼígóó Diyin Bizaad biiʼdę́ę́ʼ tʼáá aaníinii bee nanitin baa íhwiiniłʼą́ą́ʼ. Éí iiná doo ninítʼiʼii God nihaa deeshłééł níigo yee haadzííʼgi, deetsaahgo haa yitʼįįhgi, dóó daneeznánę́ę náábidiʼdooljahgi baa íhwiiniłʼą́ą́ʼ. (Ecclesiastes 9:5; Luke 23:43;  John 5:28, 29; Revelation 21:3, 4) Jiihóvah Yá Dahalneʼé biKingdom Hallgi shı̨́ı̨́ kʼad nánídááh dóó God bikʼehgóó ádaʼoołʼįįłgo tʼáá aaníí nínízin. (John 13:35) Jiihóvah éí áhánígo nikʼis íinilaago átʼé áádóó kʼad bá naashʼaʼ doo shı̨́ı̨́ nínízin. Áko kwíinínízin shı̨́ı̨́, ‘Kʼad haa deeshníiłgo God bá naashʼaʼ doo?’

2. Iithiyópiyadóó diné, haʼátʼíí biniyé taah shidiʼdooltééł niizı̨́ı̨́ʼ?

² Jesus bíyoołkááłdą́ą́ʼ, Iithiyópiyadóó diné léiʼ ałdóʼ ákwíinínízin ńtʼééʼ. Jesus náábiʼdiilzáádóó bikʼijįʼ, bóhołʼaahii yę́ę Philip díí hastiin yił nahasneʼ. Philip éí Jesus Mesáíyah átʼı̨́įgi, díí hastiin yił ííshjání áyiilaa. Áko díí hastiin yidiiztsʼą́ą́ʼígíí bidiisnáaʼgo ání: Jó, ákǫ́ǫ́ tó! Biiʼ shidiʼdooltéełgi haʼátʼíísh shinóołtłʼah?​—Acts 8:26-36.

3. (a) Jesus bikééʼ naakai yę́ę haʼátʼíí yidííniid? (b) Haitʼéego baptize áhodiʼdoolnííł?

³ Diyin Bizaad ání, Jiihóvah bá naashʼaʼ doo jinízingo éí baptize áhodiʼdoolnííł. Jesus bikééʼ naakai yę́ę kwíidííniid: “Ałʼąą dineʼé tʼáá ałtso ídahoołʼaahii danilı̨́įgo” baptize ádaahłeʼ doo. (Matthew 28:19) Jesus éí kótʼéego nihinááł baptize ályaa. Éí táyiʼ góyaa tʼáá jizı̨́ı̨́ ńtʼééʼ taah hoʼdooltı̨́, bitsiitʼáagi doo tó bąąh ályaa da. (Matthew 3:16) Jiihóvah Yá Dahalneʼé tʼáá ákótʼéego táyiʼ góyaa t’áá jizı̨́ı̨́ ńtʼééʼ taah biʼdiltéehgo baptize ábiʼdilʼįįh.

4. Baptize ániʼdiilyaago éí haʼátʼíí diné bee bił ííshjání íinilaa doo?

⁴ Baptize ániʼdiilyaago éí God bikʼis deeshłeeł dóó bá naashʼaʼ doo diníigo ánítʼı̨́. Éí kótʼéego baptize ániʼdiilyaago díí diné bee bił ííshjání íinilaa doo. (Psalm 40:8) Áko kwíinínízin doo, ‘Haʼátʼíí laʼ ádzaago baptize áshidiʼdoolnííł?’

5. (a) Tʼah doo baptize ániʼdilnééhgóó, haʼátʼíí áłtsé ádíínííł? (b) Haʼátʼíí biniyé Jiihóvah Yá Dahalneʼé áłah nádleehgi nánídáah doo?

⁵ Tʼah doo baptize ániʼdilnééhgóó éí áłtsé Jiihóvah dóó Jesus bééhodíísįįł. Diyin Bizaad bóhoołʼaahgo tʼáá áłah bił ahééhonílzįįh. (John 17:3 yíníłtaʼ.) Ndi doo tʼóó bił ahééhodíilzįįł da. Diyin Bizaad ání, God íinízinii ‘hazhóʼó nił bééhodoozįįł.’ (Colossians 1:9) Jiihóvah Yá Dahalneʼé áłah nádleehgi éí áhánígo Jiihóvah bił kʼé haʼníigi, bíhwiidiilʼááł. Éí bąą tʼáá ahą́ą́h ákweʼé nánídááh.​—Hebrews 10:24, 25.

6. Diyin Bizaad ayóó nił bééhózingoósh tʼéiyá baptize ándiʼdoolnííł?

⁶ Jiihóvah éí Shizaad ałtso bíhwiiniłʼą́ąʼgo tʼéiyá baptize ándiʼdoolnííł, doo nóʼníi da. Iithiyópiyadóó diné baa haneʼ yę́ęgi átʼéego, éí Diyin Bizaad doo tʼáá átʼé bił bééhózin da ndi baptize ályaa. (Acts 8:30, 31) God tʼáá baa íhwiilʼaahgo ahoolʼáa doo. (Ecclesiastes 3:11) Áko baptize áhodiʼdoolníiłgo éí, íiyisíí Diyin Bizaad yee naʼnitinígíí baa íhwiizhdoołʼááł dóó bikʼeh ájítʼée doo.​—Hebrews 5:12.

7. Diyin Bizaad bíhoołʼaahgi haitʼéego níká eelwod?

⁷ Diyin Bizaad ání: “Tʼáá háiida hweʼoodląʼ tʼáágééd éí Diyin God tsʼídá doo bił hojíshǫ́ǫ leʼ átʼée da.” (Hebrews 11:6) Áko iinídlą́ągo binahjįʼ baptize ándiʼdoolnííł. Diyin Bizaad yaa halneʼgo éí Kórinthgi diné kéédahatʼínę́ę, Jesus bikééʼ nidaakai yę́ę binaʼnitin deidiiztsʼą́ą́ʼ áádóó “daʼoosdląądgo” baptize ádaalyaa. (Acts 18:8) Diyin Bizaad bóhoołʼaahgo díí yinídlą́ągo ániilaa. Éí God yee ádee hahaasdzííʼ yę́ę índa bąąhági ádaatʼéii danihiiʼígíí dóó anoonééł bitsʼąą nihéedidoochiłgo Jesus nihá nááʼádiisʼniiʼ.—Joshua 21:45; Acts 4:12; 2 Timothy 3:16, 17.

8. Bíhwiiniłʼą́ą́ʼígíí, haʼátʼíí biniyé baa hashneʼ doo díníízįįł?

⁸ Ląʼígóó Diyin Bizaad baa íhoołʼaahgo áádóó níká análwoʼgo baa ákonínízı̨́įʼgo neʼoodląʼ bidziilgo áyoolíił doo. Bíhwiiniłʼą́ą́ʼígíí łaʼda bee bił hodeeshnih nínízin doo. (Jeremiah 20:9; 2 Corinthians 4:13) Áko háí bił hodíílnih?

9, 10. (a) Bíhwiiniłʼą́ą́ʼígíí háí bee bił dahólneʼ doo? (b) Atah nahashneʼ doo nínízingo, haʼátʼíí bikʼeh áʼdíílííł?

⁹ Bíhwiiniłʼą́ą́ʼígíí nikʼéí, nikʼis, bił kééhonítʼínígíí, doodaiiʼ bił nidanilnishígíí bił dahodeeshnih nínízingo nizhóní dooleeł. Ndi, ajoobaʼ dóó ayóóʼóʼóʼní bee ánítʼéego bił hodíílnih. Tʼahádóó Jiihóvah Yá Dahalneʼé bił nidaholneʼ doogo átʼé. Kʼad bííníshghah nahashneʼ doo nininzíiʼgo, Jiihóvah Yá Halneʼé Diyin Bizaad yee níhoołʼaahígíí bił hodíílnih. Éí nábíighah niizı̨́įʼgo índa Diyin Bizaad bikʼeh neʼiiná yíłtʼihgo, éí bí índa elders naakigo bił ahíídiikah.

¹⁰ Elders bił ahíinikaigo haʼátʼíí baa nídadóohtʼįįł? Éí Diyin Bizaad binaʼnitin bikʼidiʼyiitįįhgo yinídlą́ą daatsʼí, Diyin Bizaad bikʼehgo neʼiinaʼ daatsʼí yíłtʼih, dóó tʼáá daatsʼí aaníí Jiihóvah Yá Dahalneʼé deeshłeeł nínízinígi baa nídadóohtʼįįł. Elders éí Jiihóvah Yá Dahalneʼé Kingdom Hallgi yah anájahígíí yaa ádahalyą́. Áko ní ałdóʼ naaʼáháyą́, éí bąą tʼáadoo bichʼįʼ ádaa nánítʼíní. (Acts 20:28; 1 Peter 5:2, 3) Elders bił ahíinikaigo, Jiihóvah Yá Dahalneʼé bił nidaholneʼ dooígi, nábíighah daatsʼí dooleełígi yee nił nidahodoolnih.

11. Atah nahashneʼ doo nínízingo, haʼátʼíí áłtsé hazhóʼó hashtʼedíílííł?

¹¹ Jiihóvah Yá Dahalneʼé bił nidaholneʼ dooígi, elders tʼah áłtsé dandidooniiłgoda átʼé. Éí áłtsé neʼiinaʼ siláagi  hashtʼenilééh dandidooniił. Díí haʼátʼíí biniyé áłtsé hashtʼezhdoolííł? Jó, Jiihóvah bá nidahwiilneʼ dóó niheʼiinaʼ bee baa dahwiiʼniih.​—1 Corinthians 6:9, 10; Galatians 5:19-21.

12. Haʼátʼíí biniyé hazhóʼó tsíńdahizdidookos?

¹² Tʼah doo baptize ániʼdilnééhgóó, áłtsé łahgo hashtʼenáádíídlííł. Peter ání: “Nihibąąhági ádaatʼéii nihá kʼéédaʼdoolchǫǫł biniyé łahgo átʼéego tsíńdahidohkeesgo Diyin God bichʼįʼ dah nídahidoohkááh.” (Acts 3:19) Łahgo átʼéego tsíńdahidohkees níigo haʼátʼíí áhyiłní? Éí bąąhági ádaatʼéii ádeiitʼįįd yę́ę bąąh nihíniʼgo baa nitsíikeesgo áhyiłní. Éí naʼageh bee tsiʼnaʼadá ádaatʼéii baa neidáá ńtʼéeʼgo, éí bitsʼą́ąjįʼ dahdidíínááł. Azhą́ shı̨́ı̨́ neʼiinaʼ yáʼátʼéehgo yíłtʼihgo hoolzhish ndi, hazhóʼó tsíńdídííkoos. Tʼáá áníłtso éí nidaʼiyiilzíh, áko shá yóóʼanídíʼaah dadiiʼníigo God nídeiniikąąh łeh.​—Romans 3:23; 5:12.

13. “Diyin God bichʼįʼ dah nídahidoohkááh” níigo haʼátʼíí áhyiłní?

¹³ Bąąhági ádaatʼéii ádeiitʼįįd yę́ę, tʼóósh bąąh nihíniʼgo baa nitsíikees doo? Ndagaʼ. Peter ání, “Diyin God bichʼįʼ dah nídahidoohkááh.” Díí áhyiłníigo éí bąąhági ádaatʼéii yóóʼádidííʼáałgo yáʼádaatʼéhígíí ánítʼı̨́į doo. Tʼah doo hóółtseii léiʼgóó yinááł laʼ jiní. Nizaadgóó chʼaa yinááł, ńtʼééʼ doo áájígo da yinááł lágo baa ákoninizı̨́ı̨́ʼ. Áko haa díínííł? Éí niʼádíílííł, náánídíídááł, áádóó díníyáhą́ą́jįʼgo dah nídidíídááł. Diyin Bizaad bíhoołʼaahgo tʼáá ákótʼé, bąąhági ádaatʼéii baa nanináago, díí hashtʼedoolnííł lá díníízįįł. Áko  náánídeeshdáałgo yáʼádaatʼéehgo óʼoołʼįįłígíí áshtʼı̨́į doo, díníízįįł.

14. Haitʼéego éí God baa ádidíítʼááł?

¹⁴ Náánáłaʼ éí tʼah doo baptize áhoʼdilnééhgóó éí Jiihóvah baa ázhdidootʼááł. Éí tʼáá ní tʼéiyá naʼííníshłíigo íinínízinii áłtsé séłʼą́ągo íínísin doo, diníigo Jiihóvah bichʼįʼ sodidiilzįįł.​—Exodus 34:14.

15, 16. Haʼátʼíí binahjįʼ łaʼda God yaa ádítʼááh?

¹⁵ Kótʼéego Jiihóvah ná naashʼaʼ doo bidiiʼníigo bichʼįʼ ádee hadíídzih. Łaʼda ayóóʼánííníshʼní áko iiná nił ádeeshłííł bidiiʼní nahalin. Hastiin dóó asdzání léiʼ ádééhodiilzįįł nízin łeh. Hastiin nilínígíí éí asdzání hazhóʼó yééhoosįįdgo ayóóʼáyóʼníi yileeh, áádóó sheʼasdzą́ą́ dooleeł niizįįh. Díí éí ílíinii átʼéego ádaazhdeetʼą́ą doo, hastiin éí bíneeshʼą́ nízin doo, háálá asdzání ayóóʼájóʼní.

¹⁶ Jiihóvah baa íhoołʼaahgo éí ayóóʼíníʼníigo ándoolííł, áádóó bá naashʼaʼ nínízin doo. Áko díí binahjįʼ ná naashʼaʼ doo bidiiʼníigo nisodizin bee baa ádidíítʼááł. Diyin Bizaad ání, tʼáá háiida Jesus bikééʼ yisháał doo nízinígíí éí “ádeizhdiyooʼnah.” (Mark 8:34) Díísh haʼátʼíí áhyiłní? Éí Jiihóvah bikʼé hóʼı̨́įgi áłtsé jisʼą́ą doo. Jiihóvah íinízinii éí aláahdi ílı̨́, nihí niidzinígíí dóó bináhwiitʼahígíí éí aʼohgo ííníilzin doo.​—1 Peter 4:2 yíníłtaʼ.

17. Haʼátʼíí biniinaa łaʼ God doo yaa ádaʼdíítʼáah da?

¹⁷ Łaʼ éí Jiihóvah doo yaa ádítʼáah da, háálá éí ná naashʼaʼ dooleeł deididooniiłígi doo bíneeshʼą́ą da danízin.  Bikʼee bił dayéeʼgo Jiihóvah doo bidinéeshʼa da danízin. Doodaiiʼ Jiihóvah doo baa ádinishtʼą́ą́góó éí tʼáadoo bee shikʼíhótʼahí da doo, danízin.

18. Jiihóvah bidinéeshʼa nínízinígi haitʼéego doo ákwíinínízin da doo?

¹⁸ Jiihóvah ayóóʼííníʼníigo éí bikʼee nił yéeʼ yę́ęgi níká adoolwoł. Jiihóvah ayóóʼííníʼníigo baa ádíínítʼánígi beʼiilʼı̨́į doo. (Ecclesiastes 5:4; Colossians 1:10) Jiihóvah íinízinii bikʼehgóó ájooníiłgo doo nanitłʼah da lá, díníízįįł. John kóníigo íʼiilaa: God “yee hasʼáanii bikʼeh hólʼínígíí éí Diyin God ayóóʼóóʼní átʼé. Áádóó yee hasʼáanii doo ade átʼée da.”​—1 John 5:3.

19. Haʼátʼíí biniinaa Jiihóvah baa ádidíítʼáałgi doo nił yéeʼ da doo?

¹⁹ Azhą́ shı̨́ı̨́ nidaʼiyiilzíh ndi, Jiihóvah baa ádidíítʼáałgi bííníghahgo átʼé. Jiihóvah éí ániitʼéhígíí bił bééhózin, áko ayóó ádííníiłgo éí doo nihił nayólíi da. (Psalm 103:14) Yáʼádaatʼéhígíí ááníiłgo yee nihíká análwoʼ doo. (Isaiah 41:10) Nijéí bee Jiihóvah baa dzíínílí, áko “hidínááhgóó . . . yáʼátʼéehgo dahonítʼiʼgóó niyoołáał doo.”​—Proverbs 3:5, 6.

20. Sodizin bee Jiihóvah baa ádíínítʼą́ą́dóó haʼátʼíí ánáádíídlííł?

²⁰ Jiihóvah baa ádidíítʼáałgi, kʼad bííníshghahísh nínízin? Jiihóvah bichʼįʼ sodiilzingo baa ádíínítʼą́ągo áádóó baptize ándiʼdoolnííł.

21, 22. Neʼoodląʼ haitʼéego bee ádee hadiidzih?

²¹ Jiihóvah Yá Dahalneʼé áłah nádleehgi elder coordinator nilínígíí, Jiihóvah baa ádinishtʼą́ áko baptize áshidiʼdoolnííł nisin, bididííniił. Áádóó elders łaʼ bił ahíídiikahgo ná íidoolííł, éí Diyin Bizaad  bíhwiiniłʼą́ą́ʼígíí yíndahódíłkid. Baptize ándiʼdooníiłgi nábíighah daniizı̨́įʼgo éí nitsaago áłah nááʼádleehgi baptize ándiʼdoolnííł dandidooniił. Díí nitsaago áłah aleehgi biniyé baptize áhoʼdilnééhígíí baa hání. Ákweʼé achʼįʼ hadziihígíí éí baptize ádabiʼdilnééhígíí naakigo naʼídíkid áyiiłʼįįh. Díí naʼádéékidígíí bichʼįʼ lá ajisłı̨́įʼgo éí diné binááł hweʼoodląʼ bee ádee hajoodzíiʼ doo.​—Matthew 10:32.

 ²² Áádóó baptize áhodiʼdoolnííł. Táyiʼ góyaa t’áá sínízı̨́ı̨́ ńtʼééʼ taah nidiʼdooltéełgo baptize ándiʼdoolnííł. Kótʼéego baptize ániʼdiilyaago éí Jiihóvah baa ádíínítʼánígi ííshjání íinilaa doo, áádóó Jiihóvah Yá Halneʼé nílı̨́į doo.

23. Haʼátʼíí biniyé aTaaʼ, aYeʼ índa níłchʼi diyinii bee baptize áhoʼdilnéeh doo?

²³ Jesus éí bídahoołʼaahii,“aTaaʼ áádóó aYeʼ índa níłchʼi diyinii . . . bee” baptize ádaałeʼ doo yidííniid. (Matthew 28:19 yíníłtaʼ.) Díísh haʼátʼíí áhyiłní? Éí aTaaʼ Jiihóvah bóhólnííh dóó aYeʼ Jesus éí God íinízinii yinidoolnishgo bąąh niilyá, áádóó níłchʼi diyinii chooʼı̨́įgo God íinízinii bee łaʼ yiłʼı̨́. Díí baa ákohwiinidzin doo biniyé bee baptize áhoʼdilʼįįh.​—Psalm 83:18; Matthew 28:18; Galatians 5:22, 23; 2 Peter 1:21.

24, 25. (a) Baptize haʼátʼíí óolyé? (b) Bíhooʼaah 19 biiʼ haʼátʼíí baa nídíitʼįįł?

²⁴ Baptize áhoʼdilnéehgo ayóó ílı̨́įgo baa nitsáhákees. Tʼáá jizı̨́ı̨́ ńtʼééʼ taah hoʼdiltéehgo éí doo yáʼátʼééhgóó iiná joołtʼih ńtʼééʼ yę́ę yóóʼazhdííʼánígi átʼéego ájiilaa doo. Táyiʼdę́ę́ʼ haa hoʼdooltı̨́ı̨́dóó iiná ániidígíí bee háájoodzáa doo, éí kʼad God íinínízinii ájooníił doo. Jiihóvah bá naashʼaʼ doo dinínę́ęgi ííshjání íinilaa doo. Doo éí bílaʼashdlaʼii doodaiiʼ naʼanish ádaatʼéii doo baa ádíínítʼą́ą da. Éí Jiihóvah neʼiinaʼ baa dííníʼą́.

²⁵ Jiihóvah baa ádíínítʼánígi áhánígo nikʼisgo íidoolííł. (Psalm 25:14) Baptize áshiʼdiilyaa, áko kʼad yisdáshiʼdooltı̨́ doo niidzin da doo. Paul kóníigo áʼiilaa: “Yisdánihiʼdooʼnilígíí łaʼdooníiłgi dadíínóhsingo índa bąą ádaa dasoohtiʼgo bindaałnish.” (Philippians 2:12) Áko baptize áhoʼdiilyaago éí kʼad binaʼanishgo yisdáʼdoodáałjįʼ bee hodeeztʼiʼ. Ákoshąʼ haitʼéego éí áhánígo Jiihóvah bił nilı̨́į doo? Díí akéedi Bíhooʼaah 19 biiʼdę́ę́ʼ yee nihił hodoolnih.