1. Dahme ke kakete medewe mwurin omw onopkiher ni keneinei pwuhk wet?

KE SUKUHLKIHER padahk mehlel en Paipel tohto erein omw onopki pwuhk wet, me duwehte sapwellimen Koht inou en mour soutuk, irair en me melahr kan, oh koapworopwor en kaiasada. (Eklesiasdes 9:5; Luk 23:43; Sohn 5:28, 29; Kaudiahl 21:3, 4) Ele ke tepidahier iang mihting en Sounkadehdehn Siohwa kan oh kamehlele me irail kin wia kaudok mehlel. (Sohn 13:35) Ele ke tepidahier  kakairada nanpwungmwahu keren rehn Siohwa, oh ele ke piladahier me ke men papah ih. Eri ele ke pahn medewe, ‘Dahme I anahne wia ni ahnsouwet pwehn papah Koht?’

2. Dahme kahrehda ohlen Idiopiao men papidaisla?

² Ih met me ohlen Idiopia men me momour ni mwehin Sises medewe. Sapwellimen Sises tohnpadahk Pilip kalohk ong ohl menet ahnsou kei mwurin Sises eh ketin iasada. Pilip kadehdehiong ohlo me Sises iei me Mesaia. Uwen en ohlen Idiopiao eh mwekidkihda dahme e sukuhlki me e mwadangete nda: “Iet pihlen, dahme kerompwa pwe I en dehr papidaisla?”​—Wiewia 8:26-36.

3. (a) Kehkehlik dahieu me Sises ketikihong sapwellime tohnpadahk kan? (b) Ia duwen aramas emen eh pahn papidais?

³ Paipel padahngki ni sansal me, ma ke men papah Siohwa, e konehng ken papidaisla. Sises mahsanihong sapwellime tohnpadahk kan: “Padahkihong tohn wehi kan koaros; pwe re en wiahla nei tohnpadahk: papidaisihirailla.” (Madiu 28:19) Pein Sises ketikihda mehn kahlemeng mwahu ni eh ketin papidaisla nan pihl. Paliwere pwon duhdi nan pihl, kaidehn usupihki kisin mwaramwarahk en pihl pohn tapwio. (Madiu 3:16) Rahnwet ni Kristian emen eh pahn papidais, paliwere pwon anahne duhdi nan pihl.

4. Dahme omw papidais kin kasalehiong meteikan?

⁴ Ni ahnsou me ke pahn papidaisla, e pahn kasalehiong meteikan me ke uhdahn men wia kompoakepahn Koht oh papah ih. (Melkahka 40:7, 8)  Eri ele ke pahn medewe, ‘Dahme I anahne wia pwe ien papidaisla?’

5. (a) Dahme ke anahne wia mahs mwohn omw pahn kak papidaisla? (b) Dahme kahrehda mihting en Kristian kan kesempwal?

⁵ Mwohn omw pahn kak papidaisla, ke anahne esehla Siohwa oh Sises. Ke tepidahr wia met ni omw kin onopki Paipel. (Wadek Sohn 17:3.) Ahpw met sohte itar. Paipel mahsanih me ke anahne audaudkihda loalokong pwung en kupwuren Siohwa. (Kolose 1:9) Mihting en Sounkadehdehn Siohwa kan pahn seweseiuk en ahneki nanpwungmwahu keren rehn Siohwa. Met iei ehu kahrepe kesempwal ken kaukaule iang towehda mihting pwuko.​—Ipru 10:24, 25.

6. Ia uwen laud en omw pahn anahne esehla duwen Paipel mwohn omw pahn kak papidaisla?

⁶ Mehlel, Siohwa sohte ketin kasik ken esehla soahng koaros nan Paipel mwohn omw pahn papidais. E sohte ketin kasik ohlen Idiopiao en esehla soahng koaros mwohn eh papidaisla. (Wiewia 8:30, 31) Oh kitail pahn pousehlahte sukusukuhlki duwen Koht kohkohlahte. (Eklesiasdes 3:11) Ahpw pwe ken kak papidaisla, ke anahne ese oh pwungki tepin padahk kan en Paipel.​—Ipru 5:12.

7. Ia duwen omw onop Paipel eh seweseiuk?

⁷ Paipel mahsanih: “Sohte me kak kenikenla pahn kupwur en Koht ma sohte eh pwoson.” (Ipru 11:6) Eri ke anahne ahneki pwoson mwohn omw pahn papidaisla. Paipel padahkihong kitail me  ekei aramas akan nan kahnimw en Korint mahso rong dahme sapwellimen Sises tohnpadahk ko padahngki oh, ni imwila, “re ahpw pil pwosonla oh papidaisla.” (Wiewia 18:8) Pil duwehte, omw onop Paipel me kin seweseiuk en pwosonla sapwellimen Koht inou kan oh pil pwosonla manaman en sapwellimen Sises meirong me kak kapitkitailsang dihp oh mehla.​—Sosua 23:14; Wiewia 4:12; 2 Timoty 3:16, 17.

8. Dahme pahn kamwakid uhk en padahkihong meteikan duwen dahme ke sukuhlki?

⁸ Ni omw kalaudehla omw sukuhlki Paipel oh kilang ia duwen eh kin seweseiuk nan omw mour, omw pwoson pahn kehlailla. Ke pahn men padahkihong meteikan duwen dahme ke sukusukuhlki. (Seremaia 20:9; 2 Korint 4:13) Ahpw ihs me ke anahne padahkihong?

9, 10. (a) Ihs me ke kakehr tepida ehukihong dahme ke sukuhlkier? (b) Dahme ke anahne wia ma ke men iang mwomwohdiso wia doadoahk en kalohk?

⁹ Ele ke pahn men padahkihong omw peneinei, kompoakepahmw kan, mehn mpomw kan, de iengomw tohndoadoahk kan duwen dahme ke sukusukuhlki. Met mwahu, ahpw ahnsou koaros wia met ni elen kadek oh limpoak. Kedekedeo, ke pahn men tepida iang mwomwohdiso wia doadoahk en kalohk. Ma ke pehm me ke onopadahngehr en wia met, ke kak koasoiong Sounkadehdehn Siohwa me  kin onop Paipel rehmw oh padahkihong ih me ke men iang mwomwohdiso wia doadoahk en kalohk. Ma e medewe me ke onopadahr oh ma omw mour pahrekiong koasoandi en Paipel kan, eri kumwa pahn tuhwong elder riemen nan mwomwohdiso.

¹⁰ Dahme pahn wiawi ni amwa pahn tuhwong elder ko? Elder ko pahn koasoiong uhk pwehn kilang ma ke wehwehki oh kamehlele tepin padahk kan en Paipel, ma ke kin peikiong dahme Paipel mahsanih nan omw mour ehuehu rahn, oh ma ke uhdahn men wiahla emen Sounkadehdehn Siohwa. Tamataman me elder kan kin apwalih tohnmwomwohdiso pwon, iangahki kowe, eri dehr masak koasoiong irail. (Wiewia 20:28; 1 Piter 5:2, 3) Mwurin amwail tuhpene, elder ko pahn padahkihong uhk ma ke kakehr tepida iang mwomwohdiso wia doadoahk en kalohk.

11. Dahme kahrehda e inenen kesempwal en wiahda wekidekla kan mwohn omw pahn kak iang mwomwohdiso wia doadoahk en kalohk?

¹¹ Elder pwukat pahn kakete kawehwehiong uhk me ke anahne wiahda mahs pil ekei wekidekla kan mwohn omw pahn kak tepida iang mwomwohdiso wia doadoahk en kalohk. Dahme kahrehda e inenen kesempwal en wiahda soangen wekidekla pwuko? Pwehki ni atail kin koasoiaiong meteikan duwen Koht, kitail kin wia wiliepen Siohwa oh kitail anahne mourki mour me kin kawauwih.​—1 Korint 6:9, 10; Kalesia 5:19-21.

12. Dahme kahrehda aramas koaros anahne koluhla?

¹² Pil mie mehkot me ke anahne wia mwohn omw pahn kak papidaisla. Wahnpoaron Piter koasoia: “Kumwail koluhla oh wiliakapwala oh wekiong Koht pwe en ketin kamwakeleweisang kumwail dipamwail kan.” (Wiewia 3:19) Ia wehwehn en koluhla? E kin wehwehki en uhdahn nsensuwedkihla soangen sapwung koaros me kitail wiahda. Karasepe, ma ke kin mourki mour en tiahk samin, eri ke anahne koluhla. Oh mehnda ma erein omw mour ke kin wia uwen omw kak en wia dahme pwung, ke pil anahnehte koluhla, pwehki kitail koaros kin wiahda dihp oh anahne peki sapwellimen Koht mahk.​—Rom 3:23; 5:12.

13. Ia wehwehn en “wiliakapwala”?

¹³ Ia duwe, e itar en ihte nsensuwedkihla dahme ke wiahda mahso? Soh. Piter koasoia me ke pil anahne “wiliakapwala.” Met wehwehki me ke anahne kesehla omw wiewia suwed koaros en mahs oh tepida wia dahme pwung. Pwehn karasahda, medewehla me ke seiseiloaklahng wasa ieu me ehdin omw pahn kohla mwo. Mwurin ahnsou kis, ke tehkada me ke kohkohlahng ni ahl sapwung. Dahme ke pahn wia? Uhdahn ke pahn wawaila, uhdi, wekidek, oh mwuri kohla ni ahl me pwung. Pil duwehte, ni omw kin onop Paipel, ele ke pahn diarada me mie soahng kan de wiewia kan me ke kin ahnla wia nan omw mour me ke anahne wekidala. Ken perenki “wiliakapwala,” me iei,  en wiahda wekidekla kan me anahn, oh tepida wia dahme pwung.

14. Ia duwen omw pahn inoukihong Koht omw mour?

¹⁴ Pil ehu kahk kesempwal me ke anahne wia mwohn omw pahn papidaisla iei en inoukihong Siohwa omw mour. Ni ahnsou me ke inoukihong Siohwa omw mour, ke inoukihong ni kapakap me ke pahn kaudokiong ih kelehpw oh kin wiahki kupwure me keieu kesempwal nan omw mour.​—Deuderonomi 6:15.

15, 16. Dahme kin kamwakid aramas emen en inoukihong Koht eh mour?

¹⁵ Inoukihong Siohwa me ke pahn papah ih kelehpw kin duwehte omw wiahda inou ong emen me ke poakohng me ke pahn mi reh erein omw mour. Medewehla me ohl emen oh lih emen kin pehsepene. Ni ohlo eh kin ekisekis esehla liho, e kin tepida poakohng ih oh men pwoudikihda. Mehnda ma met wia pilipil kesempwal ehu, ohlo kin men ale pwukoa wet pwehki e poakohng liho.

¹⁶ Ni omw kin sukuhlki duwen Siohwa, ke pahn poakohngala oh men wia uwen omw kak pwehn papah ih. Met pahn kamwakid uhk en wiahda inou ehu ni kapakap pwehn papah ih. Paipel mahsanih me mehmen me men idawehn Sises e anahne “tounmeteikihla pein ih.” (Mark 8:34) Ia wehwehn met? E kin wehwehki me ke pahn kin  mwohneki mahs peikiong Siohwa nan omw mour. Kupwuren Siohwa kesempwalsang omw ineng kan oh mehn akadei kan.​—Wadek 1 Piter 4:2.

17. Dahme kahrehda ekei aramas sohte kin inoukihong Siohwa arail mour?

¹⁷ Ekei aramas sohte kin inoukihong Siohwa ar mour, pwehki re masak me re sohte pahn kak kolokol arail inou en papah ih. Irail sohte men kansensuwedihala Siohwa, de ele re kin medewe me ma irail sohte inoukihong Siohwa arail mour, eri Siohwa sohte pahn ketin kapwukoahkin irail dahme irail wia.

18. Dahme pahn seweseiuk en powehdi omw masak en kansensuwedihala Siohwa?

¹⁸ Omw poakohng Siohwa pahn seweseiuk en powehdi omw masak en kansensuwedihala ih. Pwehki ke poakohng ih, ke pahn wia uwen omw kak en kolokolete omw inou ong ih. (Eklesiasdes 5:4; Kolose 1:10) Ke sohte pahn medewe me e nohn apwal en wia kupwuren Siohwa. Wahnpoaron Sohn ntingihedi: “Pwe iet duwen wehwehn poakohng Koht: kitail en peikiong sapwellime kosonned akan. Oh sapwellime kosonned akan me sohte apwal.”​—1 Sohn 5:3.

19. Dahme kahrehda ken dehr masak inoukihong Siohwa omw mour?

¹⁹ Ke sohte anahne wia aramas unsek men pwehn inoukihong Siohwa omw mour. E sohte ketin  kasik kitail en wia laudsang dahme kitail kak wia. (Melkahka 103:14) E pahn ketin seweseiuk en wia dahme pwung. (Aiseia 41:10) Likih Siohwa ni omw mohngiong unsek, oh “e pahn ketin kasalehiong uhk ahl me pwung.”​—Lepin Padahk 3:5, 6.

20. Mwurin omw wiahier omw inou ong Koht, kahk dah me ke anahne wia mwuri?

²⁰ Ia duwe, ke medewe me ke onopadahngehr inoukihong Siohwa omw mour? Mwurin omw inoukihongehr Siohwa omw mour, ke onopadahngehr wia kahk en mwurin met. Ke anahne papidaisla.

21, 22. Ia duwen omw pahn kak “kadehde” omw pwoson ong wehipokon?

²¹ Kehsehki soun koasoanehdi pwihn en elder kan en omw mwomwohdiso me ke inoukihongehr Siohwa omw mour oh me ke men papidaisla. Eri e pahn koasoanehdi pwe ekei elder kan en kousapahlih rehmw tepin padahk kan en Paipel. Ma re pwungki me ke onopadahngehr papidais, re pahn padahkihong uhk me ke pahn kak papidais ni ehu mihting tohrohr en Sounkadehdehn Siohwa kan. Nan mihting tohrohro, e pahn mie padahk ehu me pahn kawehwehda wehwehn papidais. Aramaso me wia padahko pahn idek rehn irail akan koaros me onopadahngehr en papidaisla peidek mengei riau. Omw pasapeng ong peidek riau  pwuko pahn “kadehde” ong wehipokon duwen omw pwoson.​—Rom 10:10.

²² Eri ke pahn papidaisla. Paliweromw pwon pahn duhdi douluhl nan pihl. Papidais pahn kadehdehiong koaros me ke inoukihongehr Siohwa omw mour oh met wialahr emen Sounkadehdehn Siohwa.

23. Ia wehwehn en papidaisla ni mwaren Sahm oh Sapwellimeo oh sapwellime manaman?

²³ Sises mahsanih me sapwellime tohnpadahk kan pahn papidaisla ni mwaren Sahm oh Sapwellimeo oh sapwellime manaman. (Wadek  Madiu 28:19.) Ia wehwehn met? E wehwehki me ke kin pohnese sapwellimen Siohwa kaunda oh sapwellimen Sises pwukoa ong kupwuren Koht oh pil mwomwen Koht eh kin ketin doadoahngki sapwellime manaman pwehn kapwaiada kupwure.​—Melkahka 83:18; Madiu 28:18; Kalesia 5:22, 23; 2 Piter 1:21.

24, 25. (a) Papidais kin wia kilelepen dah? (b) Dahme kitail pahn koasoiapene ni kaimwiseklahn irelaud en pwuhk wet?

²⁴ Papidais kin wia kilelepen mehkot me inenen kesempwal. Ni ahnsou me ke duhdi pahn pihlo, e kin wehwehki me ke mehsang de kesehla omw mour en mahso. Ni ahnsou me ke kohdahsang nan pihlo, ke pahn tapiada mour kapw ehu ong wia kupwuren Koht. E kasalehda me ke pahn papah Siohwa sang met kohla. Tamataman me omw inou me ke wiahda kaidehn ong aramas emen, de pwihn ehu, de ong palien doadoahk ehu. Ke inoukidahr omw mour ong Siohwa.

²⁵ Omw inou pahn seweseiuk en kakairada omw nanpwungmwahu keren rehn Koht. (Melkahka 25:14) Met sohte wehwehki me aramas emen pahn komourala pwehki e papidaislahr. Wahnpoaron Pohl ntingihedi: “Kumwail nantihong doadoahk ni lemmwin oh poadidi pwe kumwail en kaunsekala komourpamwail.” (Pilipai 2:12) Papidais wia tepin kahk ong komourala. Ahpw ia duwen omw pahn kak karanihte Siohwa? Kaimwiseklahn irelaud en pwuhk wet pahn sapengala peidek wet.