1. ¿Ima tapuna ʼruacuyta ateranqui cá librút estudias chaymanta?

 CÁ LIBRUPI, ckam ashca verdares Bibliamanta aprenderanqui, cáusaj ʼrisckayshta únay unáypaj, imátaj sucedeáysh huañuptíysh y suyana causayman voliacuyta (Eclesiastés 9:5; Lucas 23:43; Juan 5:28, 29; Revelación 21:3, 4). Nacha na ʼrishcanqui tantacunasman Jehóvap testigusninmanta y creenqui paycuna religiún verdaderata apincu (Juan 13:35). Y ckallareranqui  suj ancha alli amistar Jehovaan apiyta y decideranqui siruipuyta. Y tapunacunqui: «¿Ima astaan ʼruánay tían Tata Yayát siruíypaj?».

2. ¿Imajchus suj ckari Etiopiamanta bautisacuyta munara?

² Chayta tapunacora suj ckari Etiopiamanta ima causara huámaj siglupi. Jishu causachiscka captin chaymantá, suj discipulusninmanta, Felipe, cháckay ckarít predicapora y ckaachera Jishu Mesías casckanta. Cá ckarít ancha gustapora aprendesckanta y chayllapi nera «¡Ckáay! Yacu; ¿ima impédej ʼrin nocka bautisascka canayta?» (Hechos 8:26-36).

3. a) Jishu discipulusninta, ¿imápaj cachacora? b) ¿Imaina suj persunát bautisacunan tían?

³ Biblia allít niáysh, ckam Jehovát siruiyta munaspá, bautisacunayqui tían. Jishu discipulusninta cachara; «Discipulusta ʼruaychis gente túcuy naciunesmanta». Y chaymanta nera: «Bautisapucuychis» (Mateo 28:19). Pay bautisacus ejemplunta churapucora. Cháypaj, mana ichaporancu uman saanpi suj utula yacút, manapé túcuy cuerpunta yacupi utquichiporancu (Mateo 3:16). Punchausniyshpipas, áicap suj persunát bautisancu, chaynapas ʼruapunancu tían túcuy cuerpun yacupi utquichiscka canan tían.

4. Bautismu, ¿imát ckaachin?

⁴ Suj persuna bautisacus sujcunastas ckaachicun dejuru Tata Yáyap yanasun cayta munan y siruipuyta (Salmo 40:7, 8). Ckam atinqui tapunacuyta: «¿Imát ʼruánay tían bautisacunáypaj?».

5. a) ¿Ima ʼruanayqui tían ckam manáraj bautisacuptiyqui? b) ¿Imajchus allis cancu tantacunas cristianas?

⁵ Manáraj bautisacus, ckam Jehovát y Jishút ʼrejsinayqui tían. Na ʼrejsicuyta ckallareranqui Bibliát  estudias (Juan 17:3 léey). Pero precisanqui astaan. Biblia nin ckam «alli conocimientu» apinayqui tían Tata Yáyap voluntarninmanta (Colosenses 1:9). Jehóvap testigusninpa tantacunasnin yanapasonckancu amistarniyqui Jehovaan sinchi canánpaj. Cay can suj alli rasón ckam mana tantacunasman chusanayquípaj (Hebreos 10:24, 25).

6. ¿Aicata yachanayqui tían Bibliamanta bautisacuyta atinayquípaj?

⁶ Jehová mana suyan ckam yachanayquita túcuy Biblia nisckanta bautisacuyta atinayquípaj. Chaypachá pay mana suyara etíope tucuyta yachananta manáraj bautisacus (Hechos 8:30, 31). Ni aicappas Jehovamanta aprendeyta puchucasúysh (Eclesiastés 3:11). Pero bautisacuyta atinayquípaj, ckam ʼrejsinayqui tían y aceptayta yachachinas principales Bibliamanta (Hebreos 5:12).

7. ¿Imaina yanapasora estudiuyqui Bibliamanta?

⁷ Biblia nin Tata Yayapi «mana fe apispá mana atíysh alli agradunmanta capuyta» (Hebreos 11:6). Chayraycu ckam fe apinayqui tían atinayquípaj bautisacuyta. Bibliapas nin huaquin persunascka ñaupa Corintomanta uyarerancu Jíshup discipulusninta y «ckallarerancu creeyta y bautisacuyta» (Hechos 18:8). Quiquin layamanta, estudiu Bibliamanta ckamta yanapasora apiyta fe Tata Yáyap promesasninpi y Jíshup sacrificiunpi, ima atin ckeshpichiayshta uchasmanta y huañuymanta (Josué 23:14; Hechos 4:12; 2 Timoteo 3:16, 17).

8. ¿Ima animásoj ʼrin aprendeshcasckayquimanta ʼrimayta?

⁸ Feyqui astaan sinchi ʼruaconcka Biblia yachachisckanta aprendes ʼriptiyqui y ckaas imaina causayniyquipi yanapasun. Y múnaj ʼrinqui sujcunasta  ʼrimapucuyta aprendesckayquimanta (Jeremías 20:9; 2 Corintios 4:13). Pero, ¿pít ʼrimapuyta atinqui?

9, 10. a) ¿Picunasta ʼrimapucuyta atinqui aprendesckayquimanta? b) Ckam, ¿imát ʼruayta atinqui llojsíypaj congregaciunuan predicáypaj?

⁹ Atinqui ʼrimayta aprendeshcasckayquimanta familiaresniyquian, yanasus, vecinus o compañerusuan escuelamanta o llamcaymanta. Y chay ancha alli can. Siempre ʼrúay amabilidaruan y respetuan. Astaan ñauckeman, ckallariyta atinqui congregaciunuan predicayta. Creeptiyqui ima na predicayta atinqui, maestruyquian ʼrímay y nípuy gustasunman congregaciunuan predicayta. Si maestruyqui ckaan ckam na listu tianqui predicáypaj y ckam causanqui imaina Biblia yachachin, ckamcuna ishcayniyquísh tantacunayquísh tían íshcay huauckes capacitasckasuan congregaciunmanta.

¹⁰ Chá tantacunapi, huauckes capacitasckas ckamuan ʼrimanckancu ckaáypaj si unanchanqui y creenqui yachachinas principalespi Bibliamanta, y si causanqui imaina Biblia yachachin. Segurus tianancu tían na dejuru ckam Jehóvap testigun cayta munanqui. Yúyay huauckes capacitasckas cuidancu picunastas congregaciunmanta cancu, y ckamtapas. Ama manchacuychu paycunaan ʼrimáypaj (Hechos 20:28; 1 Pedro 5:2, 3). Chá tantacuna puchucaptin, huauckes capacitasckas nisonckancu si na atinqui llojsiyta congregaciunuan predicáypaj.

11. ¿Imajchus ancha alli can cambiusta ʼruayta manáraj predicas?

¹¹ Huauckes capacitasckas nisuyta atincu ckam huaquin cambiusta ʼruanayqui tían manáraj predicas huauckesuan congregaciunmanta. ¿Imajchus chá cambius  ancha alli can ʼruayta? Áicap predicáysh Tata Yayát representáysh. Chayraycu apanáysh tían suj cáusay payta honrát ckochun (1 Corintios 6:9, 10; Gálatas 5:19-21).

12. ¿Imajchus tucuycunas arrepenticunáysh tían?

¹² Astaan ʼruanayqui tían manáraj bautisacus. Apóstul Pilu nera: «Arrepenticuychis, y voliacuychis chayna uchasniyquísh ckechusckas canancunápaj» (Hechos 3:19). ¿Ima niyta munan arrepenticuyta? Ancha llaquisckas senticuyta túcuy mana alli imastismanta ʼruasckayshta. Por ejemplu, si ckam uchas sexualesta cometeranqui, arrepenticunayqui tían. ¿Y si ckam afanacoranqui túcuy imastis alli ʼruáypaj? Aun chayna arrepenticunayqui tían, tucuycunas uchallícoj cáysh y Tata Yáyap perdunninta precisáysh (Romanos 3:23; 5:12).

13. ¿Ima niyta munan voliacuyta?

¹³ ¿Suficiente can lamentacuyta ʼruasckayshmanta? Mana. Apóstul Pilupas nera: «Voliacuychis». Cá niyta munan rechasanayqui tían túcuy mana allít ʼruasckayquita ñaupapi y ckallariyta ʼruayta alli tiasckanta. Pénsay caypi: si ckam viajanqui suj lugarman y huámaj cutis can. Carupi ʼris ckaanqui ima chá ñan ʼrishcasckayqui mana can. ¿Imát ʼruanquiman? Dejuru mana ʼrej ʼrinqui, voliácoj ʼrinqui, chaypachá ʼrej ʼrinqui ñanraycu ima chá lugarman pusan. Quiquin can, Bibliát estudias ckam ckaayta atinqui ima huaquin imastis causayquimanta cambias seguinayqui tían. Dispuestu voliacuyta tíay, chá niyta munan, cambiusta ʼruanayqui tían y ckalláriy alli tiasckanta ʼruas.

14. ¿Imát ʼruanayqui tían Tata Yayaman dedicacunayquípaj?

¹⁴ Suj imasti importante can ckam manáraj bautisacus oraciunpi Tata Yayát dedicácuy. Áicap pillapas dedicacuyta munan, Jehovát suj oraciunta ʼruapun maypi prometepun payllata adorayta y siruipuyta astaan importante causayninpi cancka (Lucas 4:8).

15, 16. ¿Imajchus suj persuna Tata Yayaman dedicacuyta munan?

¹⁵ Jehovát prometepuyta payllát siruípoj ʼrisckayquita, can imaina prometepuyta chá persunát ancha munasckayqui, cáusaj ʼrisckayquita payuan túcuy causayniyquípaj. Pénsay suj parejapi noviusmanta. Ckari novianta astaan ʼrejsiptin, astaan munan y payuan casaracuyta munan. Cay decisión ancha seria can, pero pay igualllát decidiscka tían aceptayta cá responsabilidarta, imaraycu pay novianta ancha munan.

¹⁶ Chaynapas ckam Jehovát astaan ʼrejsiptiyqui, ashcát munayta chayanqui y ʼrúaj ʼrinqui ímaj cachun siruipúypaj. Cay ʼruancka ckam Tata Yayaman dedicacunayquita. Jishu discipulusninta nipucora: «Si pillapas seguiayta munan, sackechun payllápaj causayta» (Marcos 8:34, nota). Cay niyta munan Jehovát casucuyta huámaj túcuy imastismanta. Dejuru, ckámpaj astaan importante cancka Jehová munasckan y mana ckam desiasckayqui o munasckayqui ʼruayta (1 Pedro 4:2 léey).

17. ¿Imajchus huaquin persunas Jehovaman mana dedicacuncu?

¹⁷ Huaquin persunas Jehovaman mana dedicacuncu manchacus mana atiyta cumpliyta promesasnincuta  siruipuyta. Mana Jehovát llaquichiyta munancu. O pensancu Jehová cuentata mana mañaconcka ʼruasckancumanta si mana payman dedicacorancu.

18. ¿Ima yanapasoncka chincayta recelo ima apinqui Jehovát llaquichiyta?

¹⁸ Munayniyqui Jehovaraycu yanapasoncka chincayta chá recelo llaquichiyta. Yanapasonckapas ashcát afanacuyta cumplíypaj promesaan ima ʼruaporanqui (Eclesiastés 5:4; Colosenses 1:10). Y mana inacusoncka difícil ʼruayta paypa voluntarninta. Apóstul Juanchu nera: «Yáyap munaynin cayta niyta munan: mandamientusninta casucunayshta; imaraycu mandamientusnin mana lásaj cancu», mana difícil can cumplíypaj (1 Juan 5:3).

19. ¿Imajchus mana manchacunayqui tían Jehovaman dedicacuyta?

¹⁹ Jehovaman dedicacunáyshpaj mana perfectus canáysh tían. Pay ni aicappas suyan nockayshmanta astaan ʼruayta atisckayshmanta (Salmo 103:14). Nátaj, Jehová yanapáaj ʼríysh ʼruayta alli tiasckanta (Isaías 41:10). Imaina Biblia nin: «Pay checkalla ʼruancka ñanesniyquita». Chayraycu, Jehovapi cónfiay túcuy sonckoyquian (Proverbios 3:5, 6).

20. ¿Imát ʼruanayqui tían Jehovaman dedicacus chaymanta?

²⁰ Ckam, ¿creenqui ima na atinqui Jehovaman dedicacuyta? Chaypachá, dedicacuptiyqui, preparascka tíaj ʼrinqui bautisacunayquípaj.

21, 22. ¿Imaina ckaachinqui Jehovaman dedicacusckayquita?

²¹ Nípuy suj ckarít capacitascka congregaciunniyquimanta ima ckam Jehovaman na dedicacoranqui y bautisacuyta munanqui. Pay encargaconcka  ima huaquin ckaris capacitasckas ckamuan repasanancunata yachachinas principales Bibliamanta. Si paycuna ckaancu ima ckam na preparascka tianqui, nisonckancu átej ʼrisckayquita bautisacuyta ámoj atun tantacunapi Jehóvap testigusninmanta. Atun tantacunapi ckoj ʼrincu suj discursu maypi nisun imát niyta munan bautismu. Huaucke ima cá discursút ckon íshcay tapunas sencillitas  ʼruapúcoj ʼrin tucuycunasta ima bautisácoj ʼrincu. Contestas cá tapunasta, ckam «tucuycúnap ñauckenpi ckaáchej ʼrinqui» feyquita (Romanos 10:10).

²² Chaymantá, ckam bautisácoj ʼrinqui. Túcuy cuerpuyqui yacupi utquichiscka caj ʼrin. Bautismuyqui ckaáchej ʼrin tucuycunasta ckam Tata Yayaman  dedicacoranqui y chá punchaumantapacha Jehóvap Testigun canqui.

23. ¿Imát niyta munan bautisacuyta «Tatanpa y Huaanpa y espíritu sántup sutinpi»?

²³ Jishu nera discipulusnin bautisacuncuman «Tatanpa y Huaanpa y espíritu sántup sutinpi» (Mateo 28:19 léey). Jishu nisckanta, ¿imát niyta munan? Ima reconocéysh Jehóvap autoridarninta, y Jishu ʼruashcasckanta Tata Yáyap propositun cumplicunánpaj, imaina Jehová utilisan espíritu santunta voluntarninta cumplíypaj (Salmo 83:18; Mateo 28:18; Gálatas 5:22, 23; 2 Pedro 1:21).

24, 25. a) Bautismu, ¿ima can? b) Ckepa capitulopi, ¿imát ckáaj ʼríysh?

²⁴ Bautismu suj imasti ancha importante representan. Yacupi utquichiscka cas, ckam «huañusckayqui» ina can, huasapi sackenqui mana alli cáusay ima únay aperanqui. Y, yacumanta llojsis, ckallarinqui suj mósoj cáusay Jehóvap voluntarninta ʼruáypaj. Chayna ckam ckaachinqui ima chá punchaumantapacha suj testigu Jehovamanta casckayquita. Yúyay mana dedicacoranqui suj persunaman, suj organisaciunman ni suj llamcayman. Jehovaman causayquita dedicaporanqui.

²⁵ Dedicaciunniyqui yanapasoncka sinchiyachiyta amistarniyquita Jehovaan (Salmo 25:14). Pero bautisascka tiayta ni pipasta nipun na ckeshpiscka casckanta. Chayraycu, apóstul Pablu escribera «Afanacus seguiychis ckeshpicunayquíshpaj» (Filipenses 2:12). Bautismu ckallariyninlla can. Chaypachá, ¿imaina ckam atinqui Jehóvap yanasun cas seguiyta? Ckepa capítulo cá librumanta chá tapunát contestancka.