1. Со шај пучеа тут акана кеда сиклиљан бут буќа тари Библија?

ЏИКОТЕ проучинѓан акава лил, ту сиклиљан бут буќа тари Библија, сиклиљан кај о Девел ка дел амен вечно живото, ки сави состојба тане о муле, хем и надеж башо воскресение (Проповедник 9:5; Лука 23:43; Јован 5:28, 29; Откровение 21:3, 4). Шај почминѓан те џа ко состанокија со икерена лен е Јеховаскере сведокија, хем уверинѓан тут кај ола служинена е Девлеске ко исправно начин (Јован 13:35). Аѓаар ту почминѓан те ове паше е Девлеа хем одлучинѓан кај мангеа те служине леске. Акана шај пучеа тут: „Со ваљани те керав те шај те служинав е Девлеске?“

2. Соске јекх Етиопјани мангља те крстинел пе?

 ² Акава пучибе исто пучља пе јекх Етиопјани кова со живинѓа ко време е Исусескоро. Несаво време пало е Исусескоро воскресение, о Филип кова со сине е Исусескоро ученико проповединѓа акале манушеске. Ов докажинѓа леске кај о Исус сине о Месија. О Етиопјани сине добором поттикнимо таро адава со шунѓа хем одма вакерѓа: „Дикх аке пани! Со чхинавела ман те крстинав ман?“ (Дела 8:26-36).

3. а) Со вакерѓа о Исус пле учениконге те керен? б) Сар ваљани јекх мануш те овел крстимо?

³ И Библија јасно сикавела кај мора те крстина амен ако мангаја те служина е Јеховаске. О Исус вакерѓа пле учениконге: „Керен ученикија таро мануша таро са о народија, хем крстинен лен“ (Матеј 28:19). О Исус денѓа амен пример адалеа со крстинѓа пе. Ов сине целосно потопимо ко пани, а на само прскимо пањеа ко шеро (Матеј 3:16). Авдиве да кеда некој крстинела пе, ов мора те овел целосно потопимо ко пани.

4. Со ка сикаве е јаверенге тле крстибаја?

⁴ Кеда ка крстине ту, адалеа ка сикаве е јаверенге кај чаче мангеа те ове паше амал е Девлеа хем те служине леске (Псалм 40:7, 8). Шај пучеа тут: „Со ваљани те керав те шај те крстинав ман?“

5. а) Со ваљани те кере англедер те крстине ту? б) Соске тано важно редовно те џа ко состанокија?

⁵ Англедер те крстине ту, мора прво шукар те пенџаре е Јехова хем е Исусе. Ту почминѓан адава те кере ле адалеа со проучинеа и Библија. (Читин Јован 17:3.) Ама, адава нане доволно. И Библија  вакерела кај ту мора шукар те џане која тани е Јеховаскири волја (Колошаните 1:9). О состанокија кола со икерена е Јеховаскере сведокија ка поможинен туке те ове попаше е Јеховаја. Акаја тани јекх важно причина соске ваљани редовно те џа ко акала состанокија (Евреите 10:24, 25).

6. Кобор ваљани те џане тари Библија англедер те крстине ту?

⁶ О Јехова на родела тутар те џане са тари Библија англедер те крстине ту. Ов на родинѓа адава ни таро Етиопјани (Дела 8:30, 31). Амен вечно ка продолжина те сикљова башо Девел (Проповедник 3:11). Ама, те шај те крстине ту, ваљани те џане хем те прифатине о основна буќа со сикавела и Библија (Евреите 5:12).

7. Сар поможинѓа туке адава со сиклиљан тари Библија?

⁷ Ки Библија пишинела: „Бизи вера нашти те угодина е Девлеске“ (Евреите 11:6). Значи, англедер те крстине ту ваљани те овел тут вера. И Библија вакерела аменге кај несаве мануша тари пурани диз Коринт, кеда шунѓе сар проповединена е Исусескере ученикија, ола „верујнѓе ко адава хем крстинѓе пе“ (Дела 18:8). Адава со сиклиљан тари Библија поможинѓа туке да те овел тут вера ко буќа со вакерѓа о Девел кај ка керел хем ки жртва е Исусескири со шај те спасинел амен таро грево хем таро мерибе (Исус Навин 23:14; Дела 4:12; 2. Тимотеј 3:16, 17).

8. Со ка поттикнинел тут те вакере е јаверенге о буќа со сикљовеа?

⁸ Сар со сикљовеа повише тари Библија хем дикхеа сар поможинела туке ко живото, тегани тли вера ка овел позорали. Адава ка поттикнинел тут  те вакере е јаверенге о буќа со сикљовеа (Еремија 20:9; 2. Коринќаните 4:13). Ама, каске ваљани те вакере?

9, 10. а) Каске шај те вакере адава со сикљовеа тари Библија? б) Со ваљани те кере ако мангеа те проповедине е јаверенцар таро собрание?

⁹ Адава со сикљовеа тари Библија шај ка манге те вакере ле тле фамилијаке, тле амаленге, е комшиенге или адаленге со кереа ленцар бути. Шукар тано те кере адава, ама секогаш ов љубезно. Сар со накхела о време, ту ка шај те проповедине заедно е јаверенцар таро собрание. Кеда ка осетине тут спремно те кере адава, ту шај те кере лафи адалеа со проучинеа и Библија хем те вакере леске или лаке, кај ту да мангеа те џа те проповедине. Ако адава со проучинела туја, дикхела кај сиан спремно хем кај кереа адава со вакерела и Библија, тегани заедно ка керен лафи дује старешиненцар таро собрание.

¹⁰ Башо со ка керен туја лафи о старешине? Ка керен туја лафи хем ка дикхен дали ту хаљовеа хем верујнеа ко основна буќа со сикавела амен и Библија, дали кереа адава со пишинела ки лате, хем дали чаче мангеа те ове е Јеховаскоро сведоко. О старешине грижинена пе секоле јекхеске ко собрание хем туке да, адалеске ма дара те кере ленцар лафи (Дела 20:28; 1. Петрово 5:2, 3). Кеда ка керен туја лафи о старешине, пало адава ка вакерен туке дали шај те џа те проповедине е јаверенцар таро собрание.

11. Соске тано важно те кере промене англедер те проповедине е јаверенцар?

¹¹ О старешине шај ка вакерен туке кај ваљани те кере панда промене ко тло живото англедер те проповедине  е јаверенцар таро собрание. Соске тано важно те кере адала промене? Соске кеда кераја лафи е јаверенцар башо Девел, амен претставинаја е Јехова хем мора те живина ко начин со фалинела ле (1. Коринќаните 6:9, 10; Галатите 5:19-21).

12. Соске секова мануш ваљани те кајнел пе?

¹² Иси панда несаве буќа со ваљани те кере лен англедер те крстине ту. О апостол Петар пхенѓа кај ваљани те кајна амен хем те менина амаро начин сар живинаја те шај амаре гревија те овен простиме (Дела 3:19). Со значинела те кајна амен? Адава значинела кај ваљани бут те жалина башо лошна буќа со керѓем лен. На пример, ако живинеа сине неморално живото, тегани ваљани те кајне тут. Шај цело тло живото трудинѓан тут те кере адава сој исправно, ама палем ка ваљани те кајне тут, соске сарине грешинаја хем ваљани те рода таро Девел те простинел аменге (Римјаните 3:23; 5:12).

13. Со значинела те менине о начин сар живинеа?

¹³ Дали тано доволно само те жалина башо адава со керѓем? На, о апостол Петар исто аѓаар пхенѓа кај ваљани те менина амаро начин сар живинаја. Акава значинела те циде тутар са о погрешна буќа, хем те почмине те кере адава сој исправно. Те дикха јекх пример со ка поможинел амен полокхесте те хаљова акава. Замислин туке кај џаја прво пути ко јекх тхан. Пало несаво време хаљовеа кај цело време џаја ко погрешно друмо. Со ка кере тегани? Џанѓола пе, ка ачхове, ка циде тут таро погрешно друмо хем ка џа ко исправно друмо. Слично аѓаар, џикоте проучинеа и Библија шај ка дикхе  кај ваљани те менине несаве буќа ко тло живото. Ов спремно те циде тут таро погрешно друмо хем почмин те кере адава сој исправно.

14. Со значинела те де лафи кај ка служине е Јеховаске?

¹⁴ Јавер важно бути со ваљани те кере ла англедер те крстине ту, тани те де лафи кај ка служине е Јеховаске. Кеда деа лафи кај ка служине е Јеховаске, адава значинела ки молитва те вакере кај ка служине само леске, хем најважно ко живото ка овел туке те кере адава со мангела ов (5. Мојсеева 6:15).

15, 16. Со поттикнинела некас те дел лафи кај ка служинел е Девлеске?

¹⁵ Те де лафи кај ка служине само е Јеховаске тано слично сар кеда деа лафи кај ка накхаве цело тло живото некасаја со мангеа ле. Замислин туке кај јекх мурш хем џувли запознајнена пе. Сар со запознајнела ла пошукар, ов замангела ла хем мангела те лел пе лаја. Иако адаја тани сериозно одлука, о мурш тано спремно те прифатинел акаја одговорност адалеске со мангела ла.

¹⁶ Сар со сикљовеа башо Јехова, ту замангеа ле хем мангеа те служине леске ко најшукар начин. Акава ка поттикнинел тут ки молитва те де лафи кај ка служине леске. Ки Библија пишинела кај секој со мангела те џал пало Исус мора „те откажинел пе коркори пестар“ (Марко 8:34). Со значинела адава? Адава значинела кај најважно ко живото ка овел аменге те ова послушна е Девлеске. Адава со мангела о Јехова тано бут поважно таро амаре желбе хем таро адава со мангаја те кера ко живото. (Читин 1. Петрово 4:2.)

17. Соске несаве мануша на мангена те ден лафи е Девлеске?

¹⁷ Несаве мануша на мангена те ден лафи кај ка служинен е Јеховаске соске дарана кај нане те икерен пло лафи. Ола на мангена те разочаринен е Јехова, или мислинена кај ако на дена леске лафи, тегани нане те овен одговорна башо буќа со керена лен.

18. Со ка поможинел туке те накхаве и дар кај ка разочарине е Јехова?

¹⁸ О мангипе кон о Јехова ка поможинел туке те накхаве и дар кај ка разочарине ле. Адалеске со мангеа ле, ка де тутар са те ачхове ко тло лафи со денѓан леске (Проповедник 5:4; Колошаните 1:10). Нане те мислине кај тано бут пхаро те кере адава со мангела о Девел. О апостол Јован пишинѓа: „Те мангел пе е Девле значинела те икерен пе лескере заповедија, а лескере заповедија нане пхаре“ (1. Јованово 5:3).

19. Соске на ваљани те дара те служине е Јеховаске?

¹⁹ На ваљани те ове совршено те шај те служине е Девлеске. Ов никогаш на родела амендар те кера нешто со нашти те кера (Псалм 103:14). Ов ка поможинел туке те кере адава сој исправно (Исаија 41:10). Нека овел тут доверба ко Јехова цело вилеа хем „ов ка испрајнел тле друмија“ (Изреки 3:5, 6).

20. Ако више денѓан лафи кај ка служине е Девлеске, со ваљани јавер те кере?

²⁰ Дали мислинеа кај сиан спремно те де лафи кај ка служине е Девлеске? Ако више керѓан адава, тегани ваљани те крстине ту.

21, 22. Сар шај јавно те сикаве тли вера ко Девел?

 ²¹ Вакер е пхралеске со служинела сар координатор е старешиненге ко тло собрание, кај денѓан лафи е Девлеске хем кај мангеа те крстине ту. Ов ка договоринел пе е старешиненцар те керен лафи туја башо основна буќа со сиклиљан тари Библија. Ако ола мислинена кај сиан спремно, тегани ка вакерен туке кај шај те крстине ту ко конгрес со  ка икерен ле е Јеховаскере сведокија. Ко конгрес, ка овел икердо говор со ка објаснинел со значинела о крстибе. О пхрал со ка икерел о говор, ка пучел дуј едноставна пучиба адален со мангена те крстинен пе. Кеда ка одговорине ко адала пучиба, ту јавно сикавеа тли вера ко Девел (Римјаните 10:10).

 ²² Тегани, ка ове спремно те крстине ту. Ка ове целосно потопимо ко пани. Тле крстибаја сикавеа сариненге кај денѓан лафи те служине е Јеховаске хем кај сиан е Јеховаскоро сведоко.

23. Со значинела те крстине ту „ко анав е Дадескоро хем е Чхавескоро хем е свети духоскоро“?

²³ О Исус вакерѓа кај лескере ученикија ка овен крстиме „ко анав е Дадескоро хем е Чхавескоро хем е свети духоскоро“. (Читин Матеј 28:19.) Со значинела акава? Акава значинела кај признајнеа е Јеховаскоро авторитети хем е Исусескири улога ки намера е Девлескири. Исто аѓаар, кај признајнеа о начин сар о Девел користинела пло свети дух те шај те исполнинел пли намера (Псалм 83:18; Матеј 28:18; Галатите 5:22, 23; 2. Петрово 1:21).

24, 25. а) Со значинела о крстибе? б) Башо со ка керел пе лафи ко последно поглавје?

²⁴ О крстибе тано бут важно. Кеда сиан цело потопимо ко пани, адава значинела кај мукхеа о пурано начин сар живинеа сине. Кеда икљовеа таро пани, почминеа нево живото коте со кереа е Јеховаскири волја. Адава сикавела кај таро адава моменти ту ка служине е Јеховаске. Памтин кај ту денѓан лафи те служине е Девлеске, а на несаве организацијаке или манушеске.

²⁵ Адава со ка де лафи е Јеховаске, ка поможинел ту те ове попаше леа (Псалм 25:14). Адава на значинела кај ка ове спасимо само адалеске со ка крстине ту. О апостол Павле пишинѓа: „Ден тумендар са, те шај те овен спасиме таро Девел“ (Филипјаните 2:12). О крстибе тано само почеток со ингарела џи ко спасение. Ама, сар шај те ачхове паше е Јеховаја? О последно поглавје таро акава лил ка дел амен одговор башо акава пучиба.