1. So šaj pučea tut akana keda sikliljan but bukja tari Biblija?

DŽIKOTE proučingjan akava lil, tu sikliljan but bukja tari Biblija, sikliljan kaj o Devel ka del amen večno životo, ki savi sostojba tane o mule, hem i nadež bašo voskresenie (Propovednik 9:5; Luka 23:43; Jovan 5:28, 29; Otkrovenie 21:3, 4). Šaj počmingjan te dža ko sostanokija so ikerena len e Jehovaskere svedokija, hem uveringjan tut kaj ola služinena e Devleske ko ispravno način (Jovan 13:35). Agjaar tu počmingjan te ove paše e Devlea hem odlučingjan kaj mangea te služine leske. Akana šaj pučea tut: „So valjani te kerav te šaj te služinav e Devleske?“

2. Soske jekh Etiopjani manglja te krstinel pe?

 ² Akava pučibe isto pučlja pe jekh Etiopjani kova so živingja ko vreme e Isuseskoro. Nesavo vreme palo e Isuseskoro voskresenie, o Filip kova so sine e Isuseskoro učeniko propovedingja akale manušeske. Ov dokažingja leske kaj o Isus sine o Mesija. O Etiopjani sine doborom pottiknimo taro adava so šungja hem odma vakergja: „Dikh ake pani! So čhinavela man te krstinav man?“ (Dela 8:26-36).

3. a) So vakergja o Isus ple učenikonge te keren? b) Sar valjani jekh manuš te ovel krstimo?

³ I Biblija jasno sikavela kaj mora te krstina amen ako mangaja te služina e Jehovaske. O Isus vakergja ple učenikonge: „Keren učenikija taro manuša taro sa o narodija, hem krstinen len“ (Matej 28:19). O Isus dengja amen primer adalea so krstingja pe. Ov sine celosno potopimo ko pani, a na samo prskimo panjea ko šero (Matej 3:16). Avdive da keda nekoj krstinela pe, ov mora te ovel celosno potopimo ko pani.

4. So ka sikave e javerenge tle krstibaja?

⁴ Keda ka krstine tu, adalea ka sikave e javerenge kaj čače mangea te ove paše amal e Devlea hem te služine leske (Psalm 40:7, 8). Šaj pučea tut: „So valjani te kerav te šaj te krstinav man?“

5. a) So valjani te kere angleder te krstine tu? b) Soske tano važno redovno te dža ko sostanokija?

⁵ Angleder te krstine tu, mora prvo šukar te pendžare e Jehova hem e Isuse. Tu počmingjan adava te kere le adalea so proučinea i Biblija. (Čitin Jovan 17:3.) Ama, adava nane dovolno. I Biblija  vakerela kaj tu mora šukar te džane koja tani e Jehovaskiri volja (Kološanite 1:9). O sostanokija kola so ikerena e Jehovaskere svedokija ka pomožinen tuke te ove popaše e Jehovaja. Akaja tani jekh važno pričina soske valjani redovno te dža ko akala sostanokija (Evreite 10:24, 25).

6. Kobor valjani te džane tari Biblija angleder te krstine tu?

⁶ O Jehova na rodela tutar te džane sa tari Biblija angleder te krstine tu. Ov na rodingja adava ni taro Etiopjani (Dela 8:30, 31). Amen večno ka prodolžina te sikljova bašo Devel (Propovednik 3:11). Ama, te šaj te krstine tu, valjani te džane hem te prifatine o osnovna bukja so sikavela i Biblija (Evreite 5:12).

7. Sar pomožingja tuke adava so sikliljan tari Biblija?

⁷ Ki Biblija pišinela: „Bizi vera našti te ugodina e Devleske“ (Evreite 11:6). Znači, angleder te krstine tu valjani te ovel tut vera. I Biblija vakerela amenge kaj nesave manuša tari purani diz Korint, keda šungje sar propovedinena e Isuseskere učenikija, ola „verujngje ko adava hem krstingje pe“ (Dela 18:8). Adava so sikliljan tari Biblija pomožingja tuke da te ovel tut vera ko bukja so vakergja o Devel kaj ka kerel hem ki žrtva e Isuseskiri so šaj te spasinel amen taro grevo hem taro meribe (Isus Navin 23:14; Dela 4:12; 2. Timotej 3:16, 17).

8. So ka pottikninel tut te vakere e javerenge o bukja so sikljovea?

⁸ Sar so sikljovea poviše tari Biblija hem dikhea sar pomožinela tuke ko životo, tegani tli vera ka ovel pozorali. Adava ka pottikninel tut  te vakere e javerenge o bukja so sikljovea (Eremija 20:9; 2. Korinkjanite 4:13). Ama, kaske valjani te vakere?

9, 10. a) Kaske šaj te vakere adava so sikljovea tari Biblija? b) So valjani te kere ako mangea te propovedine e javerencar taro sobranie?

⁹ Adava so sikljovea tari Biblija šaj ka mange te vakere le tle familijake, tle amalenge, e komšienge ili adalenge so kerea lencar buti. Šukar tano te kere adava, ama sekogaš ov ljubezno. Sar so nakhela o vreme, tu ka šaj te propovedine zaedno e javerencar taro sobranie. Keda ka osetine tut spremno te kere adava, tu šaj te kere lafi adalea so proučinea i Biblija hem te vakere leske ili lake, kaj tu da mangea te dža te propovedine. Ako adava so proučinela tuja, dikhela kaj sian spremno hem kaj kerea adava so vakerela i Biblija, tegani zaedno ka keren lafi duje starešinencar taro sobranie.

¹⁰ Bašo so ka keren tuja lafi o starešine? Ka keren tuja lafi hem ka dikhen dali tu haljovea hem verujnea ko osnovna bukja so sikavela amen i Biblija, dali kerea adava so pišinela ki late, hem dali čače mangea te ove e Jehovaskoro svedoko. O starešine grižinena pe sekole jekheske ko sobranie hem tuke da, adaleske ma dara te kere lencar lafi (Dela 20:28; 1. Petrovo 5:2, 3). Keda ka keren tuja lafi o starešine, palo adava ka vakeren tuke dali šaj te dža te propovedine e javerencar taro sobranie.

11. Soske tano važno te kere promene angleder te propovedine e javerencar?

¹¹ O starešine šaj ka vakeren tuke kaj valjani te kere panda promene ko tlo životo angleder te propovedine  e javerencar taro sobranie. Soske tano važno te kere adala promene? Soske keda keraja lafi e javerencar bašo Devel, amen pretstavinaja e Jehova hem mora te živina ko način so falinela le (1. Korinkjanite 6:9, 10; Galatite 5:19-21).

12. Soske sekova manuš valjani te kajnel pe?

¹² Isi panda nesave bukja so valjani te kere len angleder te krstine tu. O apostol Petar phengja kaj valjani te kajna amen hem te menina amaro način sar živinaja te šaj amare grevija te oven prostime (Dela 3:19). So značinela te kajna amen? Adava značinela kaj valjani but te žalina bašo lošna bukja so kergjem len. Na primer, ako živinea sine nemoralno životo, tegani valjani te kajne tut. Šaj celo tlo životo trudingjan tut te kere adava soj ispravno, ama palem ka valjani te kajne tut, soske sarine grešinaja hem valjani te roda taro Devel te prostinel amenge (Rimjanite 3:23; 5:12).

13. So značinela te menine o način sar živinea?

¹³ Dali tano dovolno samo te žalina bašo adava so kergjem? Na, o apostol Petar isto agjaar phengja kaj valjani te menina amaro način sar živinaja. Akava značinela te cide tutar sa o pogrešna bukja, hem te počmine te kere adava soj ispravno. Te dikha jekh primer so ka pomožinel amen polokheste te haljova akava. Zamislin tuke kaj džaja prvo puti ko jekh than. Palo nesavo vreme haljovea kaj celo vreme džaja ko pogrešno drumo. So ka kere tegani? Džangjola pe, ka ačhove, ka cide tut taro pogrešno drumo hem ka dža ko ispravno drumo. Slično agjaar, džikote proučinea i Biblija šaj ka dikhe  kaj valjani te menine nesave bukja ko tlo životo. Ov spremno te cide tut taro pogrešno drumo hem počmin te kere adava soj ispravno.

14. So značinela te de lafi kaj ka služine e Jehovaske?

¹⁴ Javer važno buti so valjani te kere la angleder te krstine tu, tani te de lafi kaj ka služine e Jehovaske. Keda dea lafi kaj ka služine e Jehovaske, adava značinela ki molitva te vakere kaj ka služine samo leske, hem najvažno ko životo ka ovel tuke te kere adava so mangela ov (5. Mojseeva 6:15).

15, 16. So pottikninela nekas te del lafi kaj ka služinel e Devleske?

¹⁵ Te de lafi kaj ka služine samo e Jehovaske tano slično sar keda dea lafi kaj ka nakhave celo tlo životo nekasaja so mangea le. Zamislin tuke kaj jekh murš hem džuvli zapoznajnena pe. Sar so zapoznajnela la pošukar, ov zamangela la hem mangela te lel pe laja. Iako adaja tani seriozno odluka, o murš tano spremno te prifatinel akaja odgovornost adaleske so mangela la.

¹⁶ Sar so sikljovea bašo Jehova, tu zamangea le hem mangea te služine leske ko najšukar način. Akava ka pottikninel tut ki molitva te de lafi kaj ka služine leske. Ki Biblija pišinela kaj sekoj so mangela te džal palo Isus mora „te otkažinel pe korkori pestar“ (Marko 8:34). So značinela adava? Adava značinela kaj najvažno ko životo ka ovel amenge te ova poslušna e Devleske. Adava so mangela o Jehova tano but považno taro amare želbe hem taro adava so mangaja te kera ko životo. (Čitin 1. Petrovo 4:2.)

17. Soske nesave manuša na mangena te den lafi e Devleske?

¹⁷ Nesave manuša na mangena te den lafi kaj ka služinen e Jehovaske soske darana kaj nane te ikeren plo lafi. Ola na mangena te razočarinen e Jehova, ili mislinena kaj ako na dena leske lafi, tegani nane te oven odgovorna bašo bukja so kerena len.

18. So ka pomožinel tuke te nakhave i dar kaj ka razočarine e Jehova?

¹⁸ O mangipe kon o Jehova ka pomožinel tuke te nakhave i dar kaj ka razočarine le. Adaleske so mangea le, ka de tutar sa te ačhove ko tlo lafi so dengjan leske (Propovednik 5:4; Kološanite 1:10). Nane te misline kaj tano but pharo te kere adava so mangela o Devel. O apostol Jovan pišingja: „Te mangel pe e Devle značinela te ikeren pe leskere zapovedija, a leskere zapovedija nane phare“ (1. Jovanovo 5:3).

19. Soske na valjani te dara te služine e Jehovaske?

¹⁹ Na valjani te ove sovršeno te šaj te služine e Devleske. Ov nikogaš na rodela amendar te kera nešto so našti te kera (Psalm 103:14). Ov ka pomožinel tuke te kere adava soj ispravno (Isaija 41:10). Neka ovel tut doverba ko Jehova celo vilea hem „ov ka isprajnel tle drumija“ (Izreki 3:5, 6).

20. Ako više dengjan lafi kaj ka služine e Devleske, so valjani javer te kere?

²⁰ Dali mislinea kaj sian spremno te de lafi kaj ka služine e Devleske? Ako više kergjan adava, tegani valjani te krstine tu.

21, 22. Sar šaj javno te sikave tli vera ko Devel?

 ²¹ Vaker e phraleske so služinela sar koordinator e starešinenge ko tlo sobranie, kaj dengjan lafi e Devleske hem kaj mangea te krstine tu. Ov ka dogovorinel pe e starešinencar te keren lafi tuja bašo osnovna bukja so sikliljan tari Biblija. Ako ola mislinena kaj sian spremno, tegani ka vakeren tuke kaj šaj te krstine tu ko kongres so  ka ikeren le e Jehovaskere svedokija. Ko kongres, ka ovel ikerdo govor so ka objasninel so značinela o krstibe. O phral so ka ikerel o govor, ka pučel duj ednostavna pučiba adalen so mangena te krstinen pe. Keda ka odgovorine ko adala pučiba, tu javno sikavea tli vera ko Devel (Rimjanite 10:10).

 ²² Tegani, ka ove spremno te krstine tu. Ka ove celosno potopimo ko pani. Tle krstibaja sikavea sarinenge kaj dengjan lafi te služine e Jehovaske hem kaj sian e Jehovaskoro svedoko.

23. So značinela te krstine tu „ko anav e Dadeskoro hem e Čhaveskoro hem e sveti duhoskoro“?

²³ O Isus vakergja kaj leskere učenikija ka oven krstime „ko anav e Dadeskoro hem e Čhaveskoro hem e sveti duhoskoro“. (Čitin Matej 28:19.) So značinela akava? Akava značinela kaj priznajnea e Jehovaskoro avtoriteti hem e Isuseskiri uloga ki namera e Devleskiri. Isto agjaar, kaj priznajnea o način sar o Devel koristinela plo sveti duh te šaj te ispolninel pli namera (Psalm 83:18; Matej 28:18; Galatite 5:22, 23; 2. Petrovo 1:21).

24, 25. a) So značinela o krstibe? b) Bašo so ka kerel pe lafi ko posledno poglavje?

²⁴ O krstibe tano but važno. Keda sian celo potopimo ko pani, adava značinela kaj mukhea o purano način sar živinea sine. Keda ikljovea taro pani, počminea nevo životo kote so kerea e Jehovaskiri volja. Adava sikavela kaj taro adava momenti tu ka služine e Jehovaske. Pamtin kaj tu dengjan lafi te služine e Devleske, a na nesave organizacijake ili manušeske.

²⁵ Adava so ka de lafi e Jehovaske, ka pomožinel tu te ove popaše lea (Psalm 25:14). Adava na značinela kaj ka ove spasimo samo adaleske so ka krstine tu. O apostol Pavle pišingja: „Den tumendar sa, te šaj te oven spasime taro Devel“ (Filipjanite 2:12). O krstibe tano samo početok so ingarela dži ko spasenie. Ama, sar šaj te ačhove paše e Jehovaja? O posledno poglavje taro akava lil ka del amen odgovor bašo akava pučiba.