1. So šaj te pučetu palo odova so sikljiljan kotar akija knjiga?

DŽI sikljiljan o čačipe andi Biblija kotar akija knjiga, tu haljiljan disave buča, sar soj tane: so ovela e muljenca, andi nada so o mulje ka irinenpe ko dživdipe hem so o Devel dija po lafi so ka ovelmen večno dživdipe (Vačerutno 9:5; Luka 23:43; Jovan 5:28, 29; Pučaribe 21:3, 4). Tu šaj počmijan te ave ko Jehovase svedokonenge sastankija hem verujineja so on služinena e Devljese sar so ov  mangela (Jovan 13:35). Šaj počmijan te bajačere to amaljipe e Jehova hem mangeja te služine oljese. Ama šaj pučeja tut: „So valjani te čerav te šaj te služinav e Devljese?“

2. Sose o manuš andi Etiopija manglja te krstinipe?

² Odova pučljape hem jekh manuš andi Etiopija kova živija ko Isuseso vakti. Palo odova ked o Isus irijape ko dživdipe, oljeso učeniko o Filip vačerdža odolje manušeja. O Filip vačerdža oljese soj tano o Isus o Mesija. Ked odova haljilo o manuš andi Etiopija, odova khudžaljese ko vilo hem pheja: „Ače o pani! So čhinavi man te krstinama?“ (Čeriba e apostolengo 8:26-36).

3. (a) So o Isus rodija kotar peklje učenikija? (b) Sar valjani o manuš te krstinipe?

³ I Biblija sikavi ako mangeja te služine e Jehovase, tu valjani te krstinetu. O Isus pheja pe učenikondže: „Odoljese, džan hem čeren učenikon ando manuša kotar sa o narodija hem krstinenljen“ (Matej 28:19). O Isus dijamen šukar primer adžahar so ov kokri krstijape. Ov khudža celo talo pani, na hineljese samo čhordo o pani upro šero (Matej 3:16). Avdije ked e Devljese sluge krstinenape, on isto valjani te khuven cela talo pani.

4. So mothoveja averendže ked krstinejatu?

⁴ Ked krstinejatu tegani mothoveja sarinendže so tu čače mangeja te ove e Devljeso amal hem te služine oljese (Psalam 40:7, 8). Odoljese šaj pučejatu: „So valjani te čerav te šaj te krstinama?“

5. (a) So valjani te čere angljeder te krstinetu? (b) Sose tano važno te dža ko sastankija ando Jehovase svedokija?

⁵ Angljeder te krstinetu, tu valjani šukar te pendžare e Jehova hem e Isuse. Tu odova čereja adžahar so sikljoveja  andi Biblija (Čitinen Jovan 17:3). Ama odova nane sa. I Biblija phenela so valjani „sa pošukar te pendžaren“ soj tani e Jehovasi volja (Koloskonendže 1:9). O sastankija ando Jehovase svedokija ka pomožinentu te ove popaše e Jehova. Odija tani jekh važno buti sose valjani uvek te dža ko sastankija (Jevrejendže 10:24, 25).

6. Kobor valjani te džane andi Biblija angljeder te krstinetu?

⁶ O Jehova na adžičeri tutar te džane sa andi Biblija angljeder te krstinetu. Ov na adžičerdža ni kotar manuš andi Etiopija te džanel sa angljeder te krstinipe (Čeriba e apostolengo 8:30, 31). Amen večno ka sikljova ando Devel (Vačerutno 3:11). Ama te šaj te krstinetu, tu valjani te džane hem te ičeretu ko glavna biblijake sikljoviba (Jevrejendže 5:12).

7. Sar pomožijače odova so sikljiljan andi Biblija?

⁷ I Biblija phenela: „A bizo vera našti te čera odova so o Devel mangela“ (Jevrejendže 11:6). Odoljese valjani te oveltu vera angljeder te krstinetu. E Devljeso Lafi phenela amendže so disave manuša andi purani diz Korint, šuje so vačerdže e Isusese učenikija hem adžahar „verujie hem krstijepe“ (Čeriba e apostolengo 18:8). Isto adžahar, odova so sikljiljan andi Biblija pomožijače te oveltu vera ko Devljese lafija hem ko Isuseso dživdipe kova dija, kova šaj te spasini amen ando greh hem ando meribe (Ješua 23:14; Čeriba e apostolengo 4:12; 2. Timotejese 3:16, 17).

8. So ka čhiveltu te mange te vačere averendže odoljestar so sikljiljan?

⁸ So pobuter sikljoveja andi Biblija hem dikheja sar oj pomožiniče ko toklo dživdipe, tegani ti vera ovela  pozoralji. Ka mange te vačere averendže ando odova so sikljiljan (Jeremija 20:9; 2. Korintskonendže 4:13). Ama kase šaj te vačere?

9, 10. (a) Kase šaj te vačere odova so sikljiljan? (b) So valjani te čere ako mangeja te vačere o šukar haberi averenca andi skupština?

⁹ Tu šaj mangeja te vačere odova so sikljoveja te familjijače, te amaljendže, te komšijendže ja okoljendže kasa čereja buti. Odova tano šukar, ama uvek vačer šukaripa hem mangipa. Sar džala o vakti, tu ka mange te počmine te vačere o šukar haberi averenca andi skupština. Ked mislineja so hijan spremno te čere odova, tu šaj te vačere okoljeja kasa sikljiljan andi Biblija hem te phene oljese ja olače so mangeja te vačere o šukar haberi averenca andi skupština. Ako ov phenela so hijan spremno hem so ičerejatu ko odova so vačeri i Biblija, tegani tumen ka džan te vačeren e duje starešinenca ki skupština.

¹⁰ Sostar ka vačeren tuva o starešine? On ka vačeren tuva te dikhen da lji haljoveja hem verujineja ko glavna biblijake sikljoviba, da lji te dživdipa mothoveja odova so sikavi i Biblija hem da lji čače mangeja te ove e Jehovaso svedoko. Ma bistre, o starešine akharena gajlja svakonestar andi skupština, čak hem tutar, odoljese na valjani te dara te vačere oljenca (Čeriba e apostolengo 20:28; 1. Petareso 5:2, 3). Palo odova so ka vačere oljenca, o starešine ka dikhen da lji šaj te počmine te vačere o šukar haberi averenca andi skupština.

11. Sose valjani te promine diso ko to dživdipe angljeder so ka vačere o šukar haberi averenca andi skupština?

¹¹ O starešine šaj ka vačerenče so valjani te promine diso ko to dživdipe angljeder so ka počmine te vačere o šukar haberi averenca andi skupština. Sose valjani te čere odova? Ked vačera averendže ando Devel o manuša prekalo  amende dikhena e Jehova. Amen na manga amare dživdipa te dukhava e Jehova, a ni te ladžačeralje (1. Korintskonendže 6:9, 10; Galatskonendže 5:19-21).

12. Sose valjani sa o manuša te peren pišmani?

¹² Isi pana diso so valjani te čere angljeder te krstinetu. O apostol Petar pheja: „Peren pišmani hem irinen tumen te kosenpe tumare grehija“ (Čeriba e apostolengo 3:19). So značini te pere pišmani? Odova značini, soj tano amendže pharo ko vilo sebepi o lošna buča kola čerdžam. Na primer, ako pana ko to dživdipe isi disave melalje seksualna buča, tegani tu valjani te pere pišmani sebepi odova. Šaj celo to dživdipe dijan sa tutar te čere odova soj tano šukar, ama palje valjani te pere pišmani, sebepi so sare hijam grešna hem valjani te roda ando Devel te oprostini amendže (Rimskonendže 3:23; 5:12).

13. So značini te promina amaro dživdipe?

¹³ Da lji samo valjani te ovelče pharo ko vilo sebepi odova so čerdžan diso lošno ja isi pana diso? O Petar vačerdža so isto valjani te promina amaro dživdipe. Odova značini so valjani te cide tutar sa o lošna buča so čerdžan angljeder hem te počmine te čere okova soj tano šukar. Te dikha jekh primer, zamislin so džaja prvo puti ko disavo than kova na pendžareja. Palo disavo vakti, tu haljiljan so dželjan ko aver drumo. So ka čere tegani? Tu ka terdžove, ka iranetu palal hem ka dža ko drumo kuri valjani te dža. Isto adžahar, sar počmijan te sikljove andi Biblija tu haljiljan so disave tabijatija ja buča ko toklo dživdipe valjani te promine. Čer ko odova te irinetu,  adžahar so ka promine to dživdipe hem so ka počmine te čere okova soj tano šukar.

14. Sar deja to dživdipe e Devljese?

¹⁴ Pana jekh važno buti koja valjani te čere angljeder te krstinetu tani te de to dživdipe e Jehovase. Ked deja to dživdipe e Jehovase, tu deja lafi ki molitva so ka služine samo oljese hem so oljesi volja ka ovelče ko jekhto than ko to dživdipe (5. Mojsieso 6:15).

15, 16. So čhivela džikas te del po dživdipe e Jehovase?

¹⁵ Ked deja lafi so ka služine samo e Jehovase, odova tano sar ked deja lafi so celo toklo dživdipe ka ove džikasa kas mangeja. Zamislin so jekh čhavo hem jekh čhaj pendžarenape. So pošukar o čhavo pendžari e čhaja, ov pobuter mangelala hem mangela te ljela romnjače. Ov džanela soj tani odija odluka bari, ama palje ka čerel odova sose mangela e čhaja.

¹⁶ So pošukar ka sikljove ando Jehova pana pobuter ka mangelje hem ka mange viljestar te služine oljese. Odova ka čhiveltu te de toklo lafi ki molitva so ka služine oljese. I Biblija phenela so svako ko mangela te džal palo Isus valjani te „ačhavi kokri pes“ (Marko 8:34). Sar šaj te čere odova? Adžahar so ko jekhto than ko toklo dživdipe ka šune e Jehova. Okova so o Jehova mangela te čere tano považno ando odova so mangeja tu te čere (Čitinen 1. Petareso 4:2).

17. Sose disave manuša na dena po dživdipe e Jehovase?

¹⁷ Disave manuša na dena po dživdipe e Jehovase, sebepi so darana so na ka ičerenpe ko lafi so dije, te služinen  oljese. On na mangena te dukhaven e Jehova ja mislinena so ako na dena po dživdipe e Jehovase na te oven kriva anglo oljeste sebepi o buča kola čerena.

18. So ka pomožiniče te na oveltu nisavi dar so ka dukhave e Jehova?

¹⁸ Toklo mangipe premalo Jehova ka pomožiniče te na oveltu nisavi dar so ka dukhavelje. Sebepi so mangejalje tu ka de sa tutar te ičere to lafi kova dijan Oljese (Vačerutno 5:4; Koloskonendže 1:10). Ma mislin soj tano pharo te čere odova so mangela o Jehova. O apostol Jovan pisija: „O mangipe premalo Devel značini te ičeramen ko oljese zapovestija, a oljese zapovestija nane phare“ (1. Jovaneso 5:3).

19. Sose na valjani te dara te de to dživdipe e Jehovase?

¹⁹ Tu na valjani te ove savršeno te šaj te de to dživdipe e Jehovase. Ov niked na adžičeri amendar te čera diso so našti (Psalam 103:14). Ov ka pomožini amendže te čera odova soj tano šukar (Isaija 41:10). Verujin e Jehovase celone viljeja hem „ov ka ispravini te drumija“ (Godžalje lafija 3:5, 6).

20. Ked deja to dživdipe e Jehovase, so valjani te čere?

²⁰ Da lji hijan spremno te de to dživdipe e Jehovase? Ked deja to dživdipe e Jehovase, tegani šaj te krstinetu.

21, 22. Sar šaj te mothove anglo sarinende so isitu vera?

²¹ Vačer jekhe starešinase andi tiklji skupština so dijan to dživdipe e Jehovase hem so mangeja te krstinetu. Palo odova nekobor starešine ka mangen te vačeren tuva ando glavna biblijake sikljoviba. Ako dikhena so tu hijan spremno, on ka vačerenče so tu šaj te krstinetu ko  dijekh regionalno kongres ja ko pokrajinsko sastanko. Ko kongres ka ovel vačeribe kuri ka mothovipe so značini te krstinetu. O phral kova ka ičeri o vačeribe ka pučel duj pučiba okoljen so ka krstinenpe. Ked ka odgovorine ko akala pučiba, tu ka mothove anglo sarinende ti vera (Rimskonendže 10:10).

 ²² Palo odova ka krstinetu adžahar so ka khuve celo talo pani. Odoljeja ka mothove anglo sarinende so dijan to dživdipe e Jehovase hem so hijan e Jehovaso svedoko.

23. So značini te krstinetu „ko Dadeso, e Čhaveso hem e sveto duhoso nav“?

²³ O Isus pheja so oljese učenikija ka krstinenpe „ko Dadeso, e Čhaveso hem e sveto duhoso nav“ (Čitinen Matej 28:19). So odova značini? Odova značini so džaneja o čačipe odoljestar soj tano o Jehova najbaro vladari, e Isusesi uloga ko odova so o Devel ka čerel e manušendže hem e Devljeso sveti duh koljeja čerela pi volja (Psalam 83:18; Matej 28:18; Galatskonendže 5:22, 23; 2. Petareso 1:21).

24, 25. (a) So mothoveja ked krstinejatu? (b) So ka dikha ko dešuenjato šero?

²⁴ Te krstinetu tano diso but važno. Ked khuveja celo talo pani, odoljeja mothoveja so ačhadžan sa o lošna buča kola hinetu angljeder ko to dživdipe. Ked ikljoveja ando pani, tu počmineja jekh nevo dživdipe, adžahar so čereja e Devljesi volja. Odova mothovi so kotar akana služineja e Jehovase. Ma bistre, tu na dijan to dživdipe ki disavi organizacija ja e manušese. Tu dijan to dživdipe e Jehovase.

²⁵ Odova so dijan to dživdipe ka pomožinitu te bajačere to amaljipe e Devljeja (Psalam 25:14). Odova na značini so ka ove spasimo samo sebepi so krstijantu. O apostol Pavle pisija: „Čeren ko odova te spasinen tumen adžahar so ka daran hem ka tresinen“ (Filipskonendže 2:12). Ma bistre, odova so krstinejatu tano samo početak. Ama, sar šaj te ačhove paše e Jehova? Ko dešuenjato šero andi akija knjiga ka dikha sar šaj te čera odova.