1. Σο μπορεί τι σκεφτίνες ακανά σο σικλιλάν μπουτ πράγματα κατά Αγία Γραφή;

ΚΑΖΟΜ διαβάνεας ανταβά βιβλίος, σικλιλάν μπουτ πράγματα κατά Αγία Γραφή, σαρ για παράδειγμας ι υπόσχεση ι Ντεβλέσκι ότι κα τζουβντιάς για πάντα, κάι ισί ο μουλέ ντα ότι κα αβέλ ανάσταση. (Εκκλησιαστής 9:5· Λουκάς 23:​43· Ιωάννης 5:​28, 29· Αποκάλυψη 21:3, 4) Μπορεί τι τζάσα κο συναθροίσεις σο κερένα ο Μάρτυρες του Ιεχωβά ντα τι πακιάσα ότι ντένα λατρεία ι Ντεβλές με το σωστός τρόπος. (Ιωάννης 13:​35) Μπορεί τι αρχισάλαν τι τθερές εκ λατσσί φιλία ι Ιεχωβάσαρ ντα τι αποφασιντάν ότι  μανγκέσα τι υπηρετίνες-λες. Οτθάρ, μπορεί τι σκεφτίνες: “Σο πρέπει τι κεράβ ακανά για τι υπηρετίναβ ι Ντεβλές;”

2. Σόσκε μανγκέλας τι μπολντιόλ εκ Αιθίοπας;

² Ανταβά σκεφτιντάς εκ Αιθίοπας σο τζουβντιόλας κο ντιβεσά κι Ιησούσκε. Μετά κατά ανάσταση ι Ιησούσκι, ο Φίλιππος, εκ μαθητής ι Ιησούσκο, κερντάς λάφι ι Ντεβλέσκε οντουλέ μουρσέστε. Ο Φίλιππος σικαντάς λέσκε ότι ο Ιησούς ισινέ ο Μεσσίας. Οντουλά σο σικλιλό ο Αιθίοπας κερντέ λέσκε αζόμ μπαρί εντύπωση σο βακερντάς αμέσως: «Ντικχ! Πανί! Σο τσσιναβέλα-μαν τι μπολντιάβ;»​—Πράξεις 8:​26-36.

3. (α) Καγιά εντολή ντινάς ο Ιησούς πι μαθητέντε; (β) Σαρ πρέπει τι μπολντιόλ εκ τζενό;

³ Η Αγία Γραφή σικλιαρέλα ξεκάθαρα ότι, άμα μανγκέσα τι υπηρετίνες ι Ιεχωβάς, πρέπει τι μπολντιός. Ο Ιησούς βακερντάς πι μαθητένγκε: «Κερέν μαθητέν σαρέ κατά τθεμά [ντα] μπολέν-λεν». (Ματθαίος 28:​19) Επίσης, πι μπολιμάσαρ μουκχλάς αμένγκε ο παράδειγμας τι κεράς ο ίδιος. Τσσουντάς-πες σαστό αντρέ κο πανί, να τσσουντάς λέσκε κάποιος απλώς χάνικ πανί οπράλ κο σορό. (Ματθαίος 3:​16) Αμαρέ ντιβεσέντε, όταν εκ Χριστιανός μπολντιόλα, πρέπει βοβ-ντα τι τσσουβέλ-πες σαστό αντρέ κο πανί.

4. Σο σικαβέσα κο γιαβερά τι μπολιμάσαρ;

⁴ Όταν μπολντιόσα, σικαβέσα κο γιαβερά ότι μανγκέσα μπαγιά τι αβές αμάλ ι Ντεβλέσκο ντα τι υπηρετίνες-λες. (Ψαλμός 40:7, 8) Οτθάρ μπορεί τι σκεφτίνες: “Σο πρέπει τι κεράβ για τι μπολντιάβ;”

5. (α) Σο πρέπει τι κερές πρώτα πριν τι μπολντιός; (β) Σόσκε ισί σημαντικές ο Χριστιανικές συναθροίσεις;

⁵ Πριν τι μπολντιός, πρέπει τι τθερές γνώση, δηλαδή τι σικλιός πιο μπουτ πράγματα ι Ιεχωβάσκε ντα ι Ιησούσκε. Αρχισάλαν τι κερές-λες ανταβά κατά μελέτη ι Γραφιάκι.  (Διάβανε Ιωάννης 17:3) Αλλά να ερεσέλα σάντε ανταβά. Η Αγία Γραφή βακερέλα ότι πρέπει “τι σικλιός λατσσές” καβά ισί ο θέλημας ι Ιεχωβάσκο. (Κολοσσαείς 1:9) Ο συναθροίσεις σο κερένα ο Μάρτυρες του Ιεχωβά κα βοηθίνεν-τουτ τι πλησιάνες πιο μπουτ ι Ιεχωβάς. Οτθάρ, ισί μπουτ σημαντικός μα τι χασαρές ο συναθροίσεις.​—Εβραίους 10:​24, 25.

6. Καζόμ πράγματα κατά Αγία Γραφή πρέπει τι τζανές για τι μπολντιός;

⁶ Βέβαια, ο Ιεχωβά να βακερέλα τούκε ότι για τι μπολντιός πρέπει τι τζανές σαρέ οντουλά σο βακερέλα η Αγία Γραφή. Να μανγκλάς-λες ανταβά κατά Αιθίοπας. (Πράξεις 8:​30, 31) Αμέν κα συνεχίνας τι σικλιάς ι Ντεβλέσκε για πάντα. (Εκκλησιαστής 3:​11) Αλλά για τι μπολντιός, πρέπει τι τζανές ντα τι δεχτίνες τουλάχιστον ο βασικά πράγματα σο σικλιαρέλα η Αγία Γραφή.​—Εβραίους 5:12.

7. Σαρ βοηθιντάς-τουτ η μελέτη ι Γραφιάκι;

⁷ Η Γραφή βακερέλα: «Χωρίς πίστη να αβέλα-πες κάποιος τι ευχαριστίνελ [ι Ντεβλές]». (Εβραίους 11:6) Άρα πρέπει τι τθερές πίστη πριν τι μπολντιός. Η Γραφή βακερέλα αμένγκε ότι μερικά τζενέ σο μπεσένας κι Κόρινθος κο πουρανέ μπρεσά ασουντέ οντουλά σο βακερένας ο μαθητές ι Ιησούσκε, ντα οτθάρ «αρχισάλε τι πακιάν ντα τι μπολντιόν». (Πράξεις 18:8) Η μελέτη ι Γραφιάκι βοηθιντάς τουτ-ντα τι τθερές πίστη κο υποσχέσεις κι Ντεβλέσκε ντα κι ζορ σο τθερέλα η θυσία ι Ιησούσκι, σο μπορίνελα τι σώνελ-αμέν κατά αμαρτία ντα κατά μεριπέ.​—Ιησούς του Ναυή 23:​14· Πράξεις 4:​12· 2 Τιμόθεο 3:​16, 17.

8. Σόσκε μανγκέσα τι βακερές ι γιαβερένγκε οντουλένγκε σο σικλιλάν;

⁸ Καμπόρ σικλιόσα πιο μπουτ πράγματα ι Γραφιάκε ντα ντικχέσα σαρ βοηθίνελα-τουτ τι ζωγιάτε, τι πίστη κα αβέλ πιο ζουρανί. Κα μανγκές τι βακερές ι γιαβερένγκε  οντουλένγκε σο σικλιόσα. (Ιερεμίας 20:9· 2 Κορινθίους 4:​13) Αλλά κάσκε πρέπει τι βακερές-λεν;

9, 10. (α) Κάσκε κα μπορίνεας τι βακερές οντουλένγκε σο σικλιλάν; (β) Σο πρέπει τι κερές άμα μανγκέσα τι τζας κο έργος μαζί ι γιαβερέ πφραλέντζαρ κατά εκκλησία;

⁹ Οντουλά σο σικλιλάν μπορεί τι μανγκέσα τι βακερές-λεν τι φαμιλιάκε, τι αμαλένγκε, τι γειτονένγκε ή οντουλένγκε σο κερέσα λέντζαρ μπουτί. Ανταβά ισί λατσσό, αλλά πάντα τι κερές λάφι με σουκάρ τρόπος ντα με σεβασμός. Τελικά, κα μπορίνες τι αρχίνες τι τζας κο έργος μαζί ι γιαβερέ πφραλέντζαρ κατά εκκλησία. Όταν κα αγαβές ότι ισινάν έτοιμος τι κερές-λες ανταβά, μπορίνεσα τι βακερές οντουλέ τζενέσκε σο κερέλα-τουτ μελέτη ότι κα μανγκέας τι τζας κο έργος μαζί ι γιαβερέ πφραλέντζαρ. Άμα ο τζενό σο κερέλα-τουτ μελέτη πακιάλα ότι ισινάν έτοιμος ντα άμα κερέσα τι ζωγιάτε οντουλά σο βακερέλα η Αγία Γραφή, αζομάν ντούι πρεσβύτεροι κατά εκκλησία κα αβέν τι κερέν τούσαρ λάφι γιεκ οντουλέσαρ σο κερέλα-τουτ μελέτη.

¹⁰ Σο κα βακερέν τούκε; Ο πρεσβύτεροι κα κερέν τούσαρ λάφι για τι ντικχέν άμα αγαβέσα ντα πακιάσα ο βασικά πράγματα σο σικλιαρέλα η Γραφή, άμα κερέσα τι ζωγιάτε οντουλά σο βακερέλα ντα άμα μανγκέσα μπαγιά τι αβές Μάρτυρας του Ιεχωβά. Τι ντες-τουτ γκοντί ότι ο πρεσβύτεροι πφαμπόνα σαρέ οντουλένγκε σο ισί κι εκκλησία, εμ τούκε. Οτθάρ, μα ντάρα τι κερές λέντζαρ λάφι. (Πράξεις 20:​28· 1 Πέτρου 5:2, 3) Μετά κατά συζήτηση, ο πρεσβύτεροι κα βακερέν τούκε άμα μπορίνεσα τι αρχίνες τι τζας κο έργος μαζί ι γιαβερέ πφραλέντζαρ κατά εκκλησία.

11. Σόσκε ισί μπουτ σημαντικός τι κερές αλλαγές πριν τι τζας κο έργος μαζί ι γιαβερέ πφραλέντζαρ;

¹¹ Ο πρεσβύτεροι μπορεί τι βακερέν τούκε ότι πρέπει τι κερές γιαβερά-ντα αλλαγές τι ζωγιάτε πριν τι αρχίνες τι τζας κο έργος μαζί ι γιαβερέ πφραλέντζαρ. Σόσκε ισί μπουτ σημαντικός τι κερές ανταλά αλλαγές; Επειδή οντουλά  σο βακεράσα κο τζενέ ισί ο λάφια ι Ιεχωβάσκε, ντα πρέπει τι τζουβντιάς με τρόπος σο ντέλα-λες δόξα.​—1 Κορινθίους 6:9, 10· Γαλάτες 5:​19-21.

12. Σόσκε πρέπει σαρέ ο τζενέ τι μετανιώνεν;

¹² Υπαρχίντιβελα κάτι γιαβέρ-ντα σο πρέπει τι κερές πριν τι μπολντιός. Ο απόστολος Πέτρος βακερντάς: «Μετανιώνεν ντα αλλάνεν για τι εξαφανίντιβεν τουμαρέ αμαρτίες». (Πράξεις 3:​19) Σο μανγκέλα τι βακερέλ τι μετανιώνας; Μανγκέλα τι βακερέλ ότι στεναχωρίντιβασα μπουτ για το λάθη σο κερντάμ. Για παράδειγμας, άμα τζάας γιαβερέντζαρ εκτός τι ρομνιάταρ ή τι ρομέσταρ, πρέπει τι μετανιώνες. Ατζέ-ντα άμα σαρί τι ζωή προσπαθίνεας τι κερές ο σωστός, πάλι πρέπει τι μετανιώνες, επειδή σαρέ αμαρτίνασα ντα πρέπει τι μανγκάς κατά Ντεβέλ τι συγχωρίνελ-αμέν.​—Ρωμαίους 3:​23· 5:12.

13. Σο μανγκέλα τι βακερέλ τι “αλλάνες” ο τρόπος σο τζουβντιόσα;

¹³ Ερεσέλα σάντε τι στεναχωρίντιβες μπουτ οντουλένγκε σο κερντάν; Όχι. Ο απόστολος Πέτρος βακερντάς επίσης ότι πρέπει τι “αλλάνες”ο τρόπος σο τζουβντιόσα. Ανταβά μανγκέλα τι βακερέλ ότι πρέπει τι μουκχές σαρέ ο μπέτι πράγματα σο κερέας ντα τι αρχίνες τι κερές οντουβά σο ισί σωστός. Για τι αγαβάς-λες ανταβά, κα βακεράς εκ παράδειγμας: Βάκερ ότι τζάσα ταξίδι εκχέ τθανέστε για πρώτη φαρ. Μετά από χάνικ αγαβέσα ότι λιντάν λάθος ντρομ. Σο κα κερέας; Σίγουρα, κα νασέας πιο χάνικ, κα σταματίνεας, κα μπόλντεας ντα σοράν κα λέας ο σωστός ντρομ. Καζόμ διαβάνεσα ι Γραφή, μπορεί τι αγαβές ότι υπαρχίντιβενα κάποιες συνήθειες ή πράγματα σο πρέπει τι αλλάνες τι ζωγιάτε. Κερ ο αλλαγές σο χρειαζίντιβενα ντα άρχινε τι κερές οντουβά σο ισί σωστός.

14. Σο πρέπει τι κερές για τι αφιερώνες το νεαυτός κο Ντεβέλ;

¹⁴ Εκ γιαβέρ σημαντικός πράγμας σο πρέπει τι κερές πριν τι μπολντιός ισί τι αφιερώνες το νεαυτός κο Ιεχωβά. Για τι αφιερώνες το νεαυτός κο Ιεχωβά, πρέπει τι κερές εκ προσευχή ντα τι ντες το λάφι ότι κα υπηρετίνες σάντε λες ντα ότι λέσκο θέλημας κα αβέλ ο πιο σημαντικός πράγμας τι ζωγιάτε.​—Δευτερονόμιο 6:15.

15, 16. Σο μπορίνελα τι κερέλ εκχέ τζενές τι μανγκέλ τι αφιερώνελ πο νεαυτός κο Ντεβέλ;

¹⁵ Η υπόσχεση σο ντέσα τι υπηρετίνες σάντε ι Ιεχωβάς μοιάζελα με την υπόσχεση τι τζουβντιός σαρί τι ζωή οντουλέ τζενέσαρ σο μανγκέσα. Βάκερ ότι εκ μουρς ντα εκ τζουβέλ νικιόνα ραντεβού ντα τθερένα σκοπός τι παντρίνεν. Καζόμ ο μουρς σικλιόλα πιο μπουτ πράγματα ι τζουβλιάκε, μανγκέλα-λα πιο μπουτ ντα μανγκέλα τι παντρίνελ λάσαρ. Παρόλο σο ισί εκ μπουτ μπαρί ευθύνη, ο μουρς λέλα ανταγιά απόφαση επειδή μανγκέλα-λα.

¹⁶ Καζόμ σικλιόσα ι Ιεχωβάσκε, μανγκέσα-λες πιο μπουτ ντα μανγκέσα τι κερές ο πιο λατσσό σο μπορίνεσα για τι υπηρετίνες-λες. Ανταβά κα κερέλ-τουτ τι προσευχίντιβες λέστε για τι ντες το λάφι ότι κα υπηρετίνες-λες. Η Γραφή βακερέλα ότι οντουβά σο μανγκέλα τι ακολουθίνελ ι Ιησούς πρέπει «τι κερέλ πέρα πο νεαυτός». (Μάρκος 8:​34) Σο μανγκέλα τι βακερέλ ανταβά; Μανγκέλα τι βακερέλ ότι ο πιο σημαντικός πράγμας τι ζωγιάτε ισί τι ντες καν ι Ιεχωβάς. Οντουβά σο μανγκέλα ο Ιεχωβά ισί πιο σημαντικός οντουλένταρ σο μανγκέσα τούι.​—Διάβανε 1 Πέτρου 4:2.

17. Σόσκε μερικά τζενέ να αφιερώνενα πουμαρό νεαυτός κο Ιεχωβά;

¹⁷ Μερικά τζενέ να αφιερώνενα πουμαρό νεαυτός κο Ιεχωβά επειδή νταρένα ότι να κα μπορίνεν τι ατσσικιαρέν  ο λάφι σο ντινέ τι υπηρετίνεν-λες. Να μανγκένα τι στεναχωρίνεν ι Ιεχωβάς, ή μπορεί τι αμντίνεν ότι, άμα να κα ντεν πουμαρό λάφι τι υπηρετίνεν-λες, ο Ιεχωβά να κα κρίνελ-λεν οντουλένγκε σο κερένα.

18. Σο κα βοηθίνελ-τουτ τι νασκιαρές ι νταρ ότι κα στεναχωρίνες ι Ιεχωβάς;

¹⁸ Τι αγάπη ι Ιεχωβάσκε κα βοηθίνελ-τουτ τι νασκιαρές ι νταρ ότι κα στεναχωρίνες-λες. Επειδή μανγκέσα-λες, κα κερές ο πιο λατσσό σο μπορίνεσα για τι ατσσικιαρές ο λάφι σο ντινάν λέστε. (Εκκλησιαστής 5:4· Κολοσσαείς 1:​10) Να κα σκεφτίνες ότι ισί μπουτ δύσκολος τι κερές οντουβά σο μανγκέλα ο Ιεχωβά. Ο απόστολος Ιωάννης γραφιντάς: «Αντικάς σικαβάσα αμαρί αγάπη κο Ντεβέλ: τι κεράς οντουλά σο βακερέλα αμένγκε· ντα οντουλά σο βακερέλα νανέ πφαρέ».​—1 Ιωάννη 5:3.

19. Σόσκε δεν πρέπει τι νταρές τι αφιερώνες το νεαυτός κο Ιεχωβά;

¹⁹ Να χρειαζίντιβελα τι αβές τέλειος για τι αφιερώνες το νεαυτός κο Ιεχωβά. Βοβ ποτές να βακερέλα αμένγκε τι κεράς πιο μπουτ πράγματα οντουλένταρ σο μπορίνασα τι κεράς. (Ψαλμός 103:​14) Κα βοηθίνελ-τουτ τι κερές οντουβά σο ισί σωστός. (Ησαΐας 41:​10) Τθερ εμπιστοσύνη κο Ιεχωβά σαρέ τι γκίσαρ, ντα «βοβ κα κερέλ το ντρομά ίσια».​—Παροιμίες 3:5, 6.

20. Αφού κα αφιερώνες το νεαυτός κο Ντεβέλ, σο πρέπει τι κερές σοράν;

²⁰ Πακιάσα ότι ισινάν έτοιμος τι αφιερώνες το νεαυτός κο Ιεχωβά; Αφού κα αφιερώνες το νεαυτός, κα αβές έτοιμος τι κερές κάτι ατζέ-ντα. Πρέπει τι μπολντιός.

21, 22. Σαρ μπορίνεσα τι σικαβές τι πίστη ανγκλάλ κο γιαβερά;

²¹ Βάκερ ι πρεσβυτερόσκε σο ισί συντονιστής τι εκκλησιάτε ότι αφιερωντάν το νεαυτός κο Ιεχωβά ντα μανγκέσα τι μπολντιός. Σοράν, βοβ κα κανονίνελ τι συζητίνεν τούσαρ κάποιοι πρεσβύτεροι ο βασικά πράγματα  σο σικλιαρέλα η Αγία Γραφή. Άμα βον κα συμφωνίνεν ότι ισινάν έτοιμος, κα βακερέν τούκε ότι μπορίνεσα τι μπολντιός κι γιαβέρ συνέλευση σο κα κερέν ο Μάρτυρες του Ιεχωβά. Κι συνέλευση, κα αβέλ-πες εκ ομιλία σο κα εξηγίνελ σο σημασία τθερέλα ο μπολιπέ. Σοράν, οντουβά σο κερέλα ι ομιλία κα κερέλ ντούι απλές ερωτήσεις οντουλένγκε σο ισί έτοιμοι τι μπολντιόν. Όταν κα απαντίνες οντουλέ ερωτησιέντε,  κα σικαβές τι πίστη ανγκλάλ κο γιαβερά.​—Ρωμαίους 10:10.

²² Σοράν κα μπολντιός. Κα τσσουβές-τουτ σαστό κο πανί. Ο μπολιπέ κα σικαβέλ σαριλέντε ότι αφιερωντάν το νεαυτός κο Ιεχωβά ντα ότι ακανά ισινάν Μάρτυρας του Ιεχωβά.

23. Σο μανγκέλα τι βακερέλ τι μπολντιός «κο ναβ κι Νταντέσκο ντα κι Τσσαβέσκο ντα του αγίου πνεύματος»;

²³ Ο Ιησούς βακερντάς πι μαθητένγκε ότι έπρεπε τι μπολντιόν «κο ναβ κι Νταντέσκο ντα κι Τσσαβέσκο ντα του αγίου πνεύματος». (Διάβανε Ματθαίος 28:​19) Σο μανγκέλα τι βακερέλ ανταβά; Μανγκέλα τι βακερέλ ότι αγαβέσα ο δικαίωμας σο τθερέλα ο Ιεχωβά τι κυβερνίνελ, ο ρόλος ι Ιησούσκο κο σκοπός κι Ντεβλέσκο, ντα σαρ χρησιμοποιήνελα ο Ντεβέλ πο άγιος πνεύμας για τι κερέλ οντουβά σο μανγκέλα.​—Ψαλμός 83:​18· Ματθαίος 28:​18· Γαλάτες 5:​22, 23· 2 Πέτρου 1:21.

24, 25. (α) Σο μανγκέλα τι σικαβέλ ο μπολιπέ; (β) Σο κα ντικχάς κο τελευταίος κεφάλαιος;

²⁴ Ο μπολιπέ μανγκέλα τι σικαβέλ κάτι μπουτ σημαντικός. Όταν τσσουβέσα-τουτ σαστό κο πανί, σικαβέσα ότι μουλάν σαρέ κο πράγματα σο κερέας πριν, δηλαδή ότι μουκχλάν τι πουρανί ζωή. Όταν νικιόσα κατά πανί, αρχίνεσα εκ νεβί ζωή για τι κερές οντουβά σο μανγκέλα ο Ντεβέλ. Ανταβά σικαβέλα ότι από ακανά ντα για πάντα κα υπηρετίνες ι Ιεχωβάς. Τι ντες-τουτ γκοντί ότι να ντινάν το λάφι τι υπηρετίνες εκχέ τζενές ή εκ οργάνωση. Αφιερωντάν τι ζωή κο Ιεχωβά.

²⁵ Τι αφιέρωση κα βοηθίνελ-τουτ τι τθερές εκ ζουρανί φιλία ι Ντεβλέσαρ. (Ψαλμός 25:​14) Ανταβά να μανγκέλα τι βακερέλ ότι κάποιος κα σώντιβελ απλώς επειδή μπολντιόλα. Ο απόστολος Παύλος γραφιντάς: «Συνεχίνεν νταριάσαρ τι κερέν ο πιο λατσσό σο μπορίνενα για τι σώντιβεν». (Φιλιππησίους 2:​12) Ο μπολιπέ ισί σάντε ο πρώτος πράγμας σο πρέπει τι κερές για τι σώντιβες. Αλλά σαρ μπορίνεσα τι ατσσός πασέ κο Ιεχωβά; Ο τελευταίος κεφάλαιος ανταλέ βιβλιόσκο κα ντελ ι απάντηση ανταλέ ερωτησιάτε.