1. Musafunika kunyerezeranji pakumala kupfundza mwacidikhodikho bukhu ino?

IMWE mwapfundza undimomwene uzinji wa Bhibhlya pikhapfundza imwe bukhu ino, ninga pikiro ya Mulungu ya umaso wa kwenda na kwenda, makhaliro a anyakufa, na cidikhiro cakulamuswa muli akufa. (Koelete 9:5; Luka 23:43, Tradução do Novo Mundo; Jwau 5:28, 29; Apokalipse 21:3, 4) Panango imwe mwatoma kugumanika pa misonkhano ya Mboni za Yahova pontho musakhulupira kuti iwo asacita ulambiri wandimomwene. (Jwau 13:35) Panango imwe mwatoma kukulisa uxamwali wapantima na Yahova, pontho imwe panango mwatonga kuntumikira. Natenepa panango munanyerezera, ‘Ndisafunika kucitanji cincino toera kutumikira Mulungu?’

2. Thangwi yanji mamuna wa ku Etiopya akhafuna kubatizwa?

 ² Pyenepi ndipyo pidanyerezera mamuna wa ku Etiopya akhakhala m’midzidzi ya Yezu. Pa ndzidzi unango pidamala Yezu kulamuswa muli akufa, nyakupfundza wa Yezu anacemerwa Filipi akhamwaza mphangwa kuna mamuna unoyu. Filipi aphedza mamuna unoyu kudziwa kuti Yezu akhali Mesiya. Mamuna wa ku Etiopya adzumatirwa na pidapfundza iye na mwakucimbiza alonga: ‘Onani madzi si awa; ninji pinafuna kundipingiza kubatizwa?’​—Machitiro 8:26-36.

3. (a) Ndi matongero api adapereka Yezu kuna atowereri ace? (b) Kodi munthu asafunika kubatizwa tani?

³ Bhibhlya isapfundzisa mwakubveka kuti khala imwe musafuna kutumikira Yahova, musafunika kubatizwa. Yezu apanga atowereri ace: ‘Citani anyakupfundza kwa anthu a madzindza onsene, mbamuabatiza.’ (Mateo 28:18) Yezu apangizambo citsandzo mukubatizwa kwace. Iye abizwa m’madzi manungo onsene, tayu basi ene kukapirwa madzi mu nsolo mwace. (Mateo 3:16) Lero Nkristu angabatizwa, asafunikambo kubizwa m’madzi manungo onsene.

4. Kodi kubatizwa kwanu kusapangizanji kuna anango?

⁴ Mu ndzidzi unabatizwa imwe, pisapangiza kuna anango kuti mwandimomwene musafuna kukhala xamwali wa Mulungu na kuntumikira. (Masalmo 40:7, 8) Natenepa panango munabvundzika, ‘Ndisafunika kucitanji toera kubatizwa?’

5. (a) Mbamudzati kubatizwa musafunika kucitanji pakutoma? (b) Thangwi yanji misonkhano Yacikristu ndi yakufunika?

⁵ Mbamudzati kubatizwa, imwe musafunika kudziwa Yahova na Yezu. Imwe mwatoma kale kucita pyenepi mukupfundza Bhibhlya. (Lerini Jwau 17:3.) Mbwenye si pyenepi basi tayu. Bhibhlya isalonga kuti musafunika  ‘kukhala na cidziwiso candimomwene’ ca cifuno ca Yahova. (Akolose 1:9) Misonkhano ya Mboni za Yahova inadzakuphedzani toera kukhala na uxamwali wakuwanga na Yahova. Ineyi ndi thangwi inango yakufunika kuna imwe toera kugumanika pa misonkhano ineyi mwakukhonda phonya.​—Ahebere 10:24, 25.

6. Kodi musafunika kudziwa pya Bhibhlya mpaka papi mbamudzati kubatizwa?

⁶ Natenepa, Yahova nee asadikhira kuti mudziwe pyonsene pinagumanika m’Bhibhlya mbamudzati kubatizwa. Iye nee adikhira kuti mamuna wa ku Etiopya adziwe pyonsene mbadzati kubatizwa. (Machitiro 8:30, 31) Pontho ife tinadzapitiriza kupfundza pya Mulungu kwenda na kwenda. (Koelete 3:11) Mbwenye toera kubatizwa, imwe musafunika kudziwa na kutawira pipfundziso pyakutoma pya Bhibhlya.​—Ahebere 5:12.

7. Kodi pfundziro yanu ya Bhibhlya isakuphedzani tani?

⁷ Bhibhlya isalonga: ‘Mwakusowa cikhulupiro nkhabe kwanisika kukomeresa Mulungu.’ (Ahebere 11:6) Natenepa imwe musafunika kukhala na cikhulupiro mbamudzati kubatizwa. Bhibhlya isatipanga kuti anthu anango ku nzinda wa Korinto wakale abva pikhapfundzisa atowereri a Yezu, ninga maphindu, iwo, ‘atoma kukhulupira mbabatizwa.’ (Machitiro 18:8) Munjira ibodzi ene, pfundziro yanu ya Bhibhlya isakuphedzani kukhulupira mapikiro a Mulungu na mphambvu ya ntsembe ya Yezu, yakuti inakwanisa kutipulumusa ku madawo na kufa.​—Yoswa 23:14; Machitiro 4:12; 2 Timoti 3:16, 17.

8. Ninji cinadzakukulumizani toera kupanga anango thangwi ya pidapfundza imwe?

⁸ Munathimizira imwe kupfundza Bhibhlya na kuona kuti iyo isakuphedzani mu umaso wanu, cikhulupiro  canu cinakhala cakuwanga. Imwe munadzafuna kupanga anango thangwi ya pire pinapfundza imwe. (Yeremiya 20:9; 2 Akorinto 4:13) Mphapo mbani asafunika imwe kupanga?

9, 10. (a) Mbani anafunika imwe kutoma kupanga pidapfundza imwe? (b) Musafunika kucitanji khala musafuna kumwaza mphangwa pabodzi na mpingo?

⁹ Panango munapanga acibale anu, axamwali, anthu a cisa canu, peno andzanu a kubasa thangwi ya pire pinapfundza imwe. Pyenepi mphyadidi, mbwenye ndzidzi onsene citani pyenepi mwakukoma ntima na mwaufuni. Mukupita kwa ndzidzi, munadzakhala wakuthema toera kumwaza mphangwa pabodzi na mpingo. Mungaona kuti munakwanisa kucita pyenepi, munakwanisa kulonga na Mboni ya Yahova inapfundza na imwe Bhibhlya, pontho mpangeni kuti musafuna kucita basa yakumwaza mphangwa pabodzi na mpingo. Munthu unoyu angaona kuti mwathema, pontho musakhala maso mwakubverana na midida ya Bhibhlya, uwiri wanu munadzagumanyikana na akulu a mpingo awiri.

¹⁰ Ninji pinadzacitika pa nsonkhano unoyu? Akulu a mpingo anadzalonga na imwe toera kuona khala musabvesesa na kukhulupira pipfundziso pyakutoma pya Bhibhlya, khala musabvera pinalonga Bhibhlya mu umaso wanu wa ntsiku na ntsiku, pontho khala mwandimomwene musafuna kukhala m’bodzi wa Mboni za Yahova. Kumbukani kuti akulu a mpingo asatsalakana m’bodzi na m’bodzi m’mpingo, kuphatanizambo imwe, natenepa lekani kugopa kulonga nawo. (Machitiro 20:28; 1 Pedro 5:2, 3) Pakumala kwa nsonkhano unoyu, akulu a mpingo anadzakudziwisani khala munakwanisa kutoma kumwaza mphangwa pabodzi na mpingo.

11. Thangwi yanji mphyakufunika kakamwe kucita macinjo mbamudzati kumwaza mphangwa pabodzi na mpingo?

 ¹¹ Akulu a mpingo anakufokotozerani kuti musafunika kucita macinjo akuthimizirika mbamudzati kutoma kumwaza mphangwa pabodzi na mpingo. Thangwi yanji mphyakufunika kakamwe kucita macinjo anewa? Thangwi mu ndzidzi unalonga ife na anango pya Mulungu, ife tisaimirira Yahova, pontho tisafunika kukhala maso munjira ya kumulemedza.​—1 Akorinto 6:9, 10; Agalata 5:19-21.

12. Thangwi yanji anthu onsene asafunika kutcunyuka?

¹² Pana cinthu cinango cakuti musafunika kucicita mbamudzati kubatizwa. Mpostolo Pedhru alonga: ‘Tcunyukani, mphapo, mbamuzungunuka, toera kulekererwa madawo anu.’ (Machitiro 3:19) Kodi kutcunyuka kusabvekanji? Kusabveka kutsukwala thangwi ya cinthu cakuipa cidacita ife. Mwacitsandzo, khala imwe mukhakhala na umaso wakucita ulukwali, musafunika kutcunyuka. Pontho ngakhale kuti mu umaso wanu onsene musacita pinakwanisa imwe toera kucita pinthu pyadidi, musafunika kupitiriza kutcunyuka thangwi ife tonsene tisadawa na tisafunika kuphemba Mulungu toera atilekerere.​—Aroma 3:23; 5:12.

13. Kodi ‘kuzungunuka’ kusabvekanji?

¹³ Kodi tisafunika kutsukwala basi thangwi ya pidacita ife? Nkhabe. Pedhru alonga kuti tisafunikambo ‘kuzungunuka.’ Pyenepi pisabveka kuti musafunika kukhonda makhaliro onsene akuipa, buluka penepo mbamutoma kucita pinthu pyadidi. Onani citsandzo ici, nyerezerani kuti mukucita ulendo wakuenda kumbuto yakuti nee musaidziwa. Mbamudzati kufika kumbuto ineyi, musadzindikira kuti muli kuenda na njira yakuipa. Kodi mbamudacitanji? Mwakukhonda  penula mbamudathowesa mafambiro anu, kulimira, kuzungunuka, buluka penepo mbamuenda na njira yadidi. Munjira ibodzi ene, munapfundza imwe Bhibhlya, panango munadzindikira kuti pana misambo inango peno pinthu mu umaso wanu pyakuti musafunika kupisiya. Khalani na cifuno ‘cakuzungunuka’​—pyenepi pisabveka, kucita macinjo akufunika​—mbamutoma kucita pinthu pyadidi.

14. Munaperekeka tani kuna Mulungu?

¹⁴ Cinthu cinango cakuti musafunika kucicita mbamudzati kubatizwa ndi kuperekeka kuna Yahova. Mu ndzidzi unaperekeka imwe kuna Yahova, musalonga m’phembero mbamupikira kulambira iye basi na kucita cifuno cace cakuti ndi cinthu cakufunika kakamwe mu umaso wanu.​—Deuteronomyo 6:15.

15, 16. Ninji cinakulumiza munthu toera kuperekeka kuna Mulungu?

¹⁵ Kupikira toera kutumikira basi ene Yahova kusakhala ninga mwapikira toera kukhala ndzidzi onsene mu umaso wanu na munthu wakuti musanfuna. Nyerezerani kuti mamuna na nkazi akubanyirana. Mu ndzidzi wakuti mamuna asadziwa mwadidi nkazi, iye asanfuna pontho asapangiza cifuno toera kumanga naye banja. Ngakhale kuti ceneci ndi cisankhulo cakufunika, mamuna asafunika kutawira basa yakutsalakana nkazi thangwi iye asanfuna.

¹⁶ Munapfundza imwe pya Yahova, imwe munadzanfuna, pontho munadzafuna kucita pinakwanisa imwe toera kuntumikira. Pyenepi pinadzakukulumizani kucita phembero toera kupikira kuti munantumikira. Bhibhlya isalonga kuti munthu onsene anafuna kutowerera Yezu asafunika “akhondeke ekhene.” (Marko 8:34) Kodi pyenepi pisabvekanji? Pyenepi pisabveka kuti pakutoma  musafunika kubvera Yahova mu umaso wanu. Pinafuna Yahova ndi pyakufunika kakamwe kupiringana pifuno na pidikhiro pyanu.​—Lerini 1 Pedro 4:2.

17. Thangwi yanji anthu anango nee asaperekeka kuna Yahova?

¹⁷ Anthu anango nee asaperekeka kuna Yahova, thangwi iwo asagopa kuti nee anakwanisa kukoya pikiro yawo yakuntumikira. Iwo nkhabe funa kutsukwalisa Yahova, peno iwo asanyerezera kuti khala nee aperekeka kuna iye, Yahova nee anadzaapasa mulando thangwi ya pire pinacita iwo.

18. Ninji pinafuna kukuphedzani toera kumalisa kugopa kutsukwalisa Yahova?

¹⁸ Ufuni wanu kuna Yahova unadzakuphedzani toera kumalisa kugopa kuntsukwalisa. Nakuti musanfuna, munadzacita pinakwanisa imwe toera kukoya pikiro yanu yakuntumikira. (Koelete 5:4; Akolose 1:10) Imwe nee munadzanyerezera kuti ndi pyakunentsa kucita cifuno ca Yahova. Mpostolo Jwau alemba: ‘Kufuna Mulungu kusabveka kukoya matongero ace; thangwi matongero nkhabe lemera.’​—1 Jwau 5:3.

19. Thangwi yanji nee musafunika kugopa kuperekeka kwa Yahova?

¹⁹ Nee musafunika kukhala waungwiro toera kuperekeka kwa Yahova. Iye cipo asadikhira kuti ticite pizinji piringana pire pinakwanisa ife. (Masalmo 103:14) Iye anadzakuphedzani toera kucita pinthu pyadidi. (Izaiya 41:10) Nyindirani Yahova na ntima wanu onsene, na ‘iye anadzalungamisa njira zanu.’​—Misangani 3:5, 6.

20. Mungamala kuperekeka kuna Yahova, ndi thanyo ipi inatowera?

²⁰ Musanyerezera kuti mwakhunganyika toera kuperekeka kuna Yahova? Mungamala kuperekeka kuna  Yahova, mwakhunganyika toera kucita thanyo inatowera. Musafunika kubatizwa.

21, 22. Munacita tani ‘malongero apakweca’ a cikhulupiro canu?

²¹ Dziwisani m’bveranisi wa nsoka wa akulu a mpingo wanu kuti mwaperekeka kuna Yahova, pontho kuti musafuna kubatizwa. Buluka penepo iye anadzasankhula akulu a mpingo angasi toera abwerezere pipfundziso pyakutoma pya Bhibhlya na imwe. Iwo angaona kuti mwakhunganyika,  anadzakupangani kuti munabatizwa pa nsonkhano wa cisa peno wa gawo wa Mboni za Yahova. Pa nsonkhano wa cisa peno wa gawo, panadzacitwa nkhani inafokotoza mabvekero a ubatizo. Buluka penepo nyakucita nkhani ineyi anadzacita mibvundzo miwiri yakukhonda nentsa kwa anyakufuna kubatizwa onsene. Mukutawira mibvundzo ineyi, imwe ‘munadzalonga pakweca’ pya cikhulupiro canu.​—Aroma 10:10.

 ²² Buluka penepo munadzabatizwa. Imwe munadzabizwa manungo anu onsene m’madzi. Ubatizo unadzapangiza kuna anthu onsene kuti mwaperekeka kuna Yahova pontho kuti cincino ndimwe m’bodzi wa Mboni za Yahova.

23. Kodi kubatizwa ‘mu dzina ya Baba, na ya Mwana na ya nzimu wakucena’ kusabvekanji?

²³ Yezu alonga kuti anyakupfundzace mbadabatizwa ‘mu dzina ya Baba, ya Mwana na ya nzimu wakucena.’ (Lerini Mateo  28:18.) Kodi pyenepi pisabvekanji? Pisabveka kuti imwe musadzindikira cidzo ca Yahova na basa ya Yezu mu cifuniro ca Mulungu, musadziwambo kuti Mulungu asaphatisira tani nzimu wace wakucena toera kukwanirisa cifuno cace.​—Masalmo 83:18; Mateo 28:18; Agalata 5:22, 23; 2 Pedro 1:21.

24, 25. (a) Kodi ubatizo usaimiriranji? (b) Tinadzadinganji mu nsolo wakumalisa?

²⁴ Ubatizo usapangiza cinthu cakufunika kakamwe. Mu ndzidzi unabizwa imwe m’madzi, pisabveka kuti mwafa, peno mwasiya umaso wanu wakale. Mu ndzidzi unabuluka imwe m’madzi, munadzatoma umaso upswa wakucita cifuno ca Mulungu. Pyenepi pisapangiza kuti munadzatumikira Yahova kutomera ndzidzi unoyu kuenda kutsogolo. Kumbukani kuti nee mwaperekeka kuna munthu, gulu peno kubasa. Imwe mwapereka umaso wanu kuna Yahova.

²⁵ Kuperekeka kwanu kunadzakuphedzani toera kukulisa uxamwali wanu wapadhuzi na Mulungu. (Masalmo 25:14) Pyenepi nee pisabveka kuti munthu anadzapulumuka basi ene thangwi abatizwa. Mpostolo Paulu alemba: ‘Pitirizani kusasanyira cipulumuso canu mwakugopa na kutetemera.’ (Afilipi 2:12) Ubatizo basi ene ndi matomero. Mphapo munakwanisa tani kukhala cifupi na Yahova? Nsolo wakumalisa wa bukhu ino unadzatawira mbvundzo unoyu.