1. O le ā e te ono mafaufau i ai pe a māeʻa ona e suʻesuʻeina lelei lenei tusi?

E TELE aʻoaʻoga moni o le Tusi Paia ua e aʻoaʻoina a o faagasolo lau suʻesuʻega i lenei tusi, e pei o le folafolaga a le Atua mo le ola e faavavau, le tulaga o ē ua maliliu ma le faamoemoe o le toetū. (Failauga 9:5; Luka 23:43; Ioane 5:28, 29; Faaaliga  21:3, 4) Atonu ua amata ona e auai i sauniga a Molimau a Ieova, ma ua e talitonu o i latou o le tapuaʻiga moni. (Ioane 13:35) Atonu ua amata ona atiaʻe sa oulua faauōga māfana ma Ieova, ma atonu ua e filifili e auauna iā te ia. O lea e te ono mafaufau ai, ʻO le ā e tatau ona ou faia i le taimi lenei ina ia auauna ai i le Atua?’

2. Aiseā na manaʻo ai se tamāloa Aitiope e papatisoina o ia?

² O le mea lenā sa mafaufau i ai se tamāloa Aitiope sa ola i taimi o Iesu. Ina ua mavae le toe faatūina mai o Iesu, na talaʻi atu ai lona soo o Filipo i lenā tamāloa. Na faamaonia atu e Filipo i lenei tamāloa o Iesu o le Mesia. Na matuā pāʻia le loto o lenā tamāloa ona o mea na ia aʻoaʻoina. O lea, na ia faapea atu ai loa: “Faauta! O le vai, o le ā se mea e taofia ai aʻu mai i le papatisoina?”—Galuega 8:26-36.

3. (a) O le ā le faatonuga na avatu e Iesu i ona soo? (e) O le ā le auala e tatau ona papatisoina ai se tagata?

³ Ua aʻoaʻoina ma le manino i le Tusi Paia, pe afai e te fia auauna iā Ieova e tatau ona e papatiso. Na fetalai Iesu i ona soo: “[Ia] fai tagata o nuu uma lava ma soo, ma papatiso atu iā i latou.” (Mataio 28:19) Na faataatia foʻi e Iesu le faaaʻoaʻoga e ala i le papatisoina o ia. Sa faatofu atoa lona tino i le vai, ae e lē na o le faatulutulu o le vai i lona ao. (Mataio 3:16) Pe a papatisoina foʻi se Kerisiano i aso nei, e tatau foʻi ona faatofu atoa lona tino i le vai.

4. O le ā ua e faailoa atu i isi pe a papatisoina oe?

 ⁴ Pe a e papatiso, e faailoa atu ai i isi e te manaʻo moni lava e avea oe ma uō a le Atua ma auauna iā te ia. (Salamo 40:7, 8) O lea, e te ono tuufesili ai, ʻO ā laasaga e manaʻomia ona ou faia ina ia mafai ai ona ou papatiso?’

5. (a) O le ā le mea muamua e tatau ona e faia a o leʻi mafai ona papatisoina oe? (e) Aiseā e tāua ai sauniga faa-Kerisiano?

⁵ A o leʻi mafai ona papatisoina oe, e tatau ona e iloa Ieova ma Iesu. O lona uiga, e tatau ona e maua le poto e faatatau iā Ieova ma Iesu. Na amata ona e maua lenā poto i le taimi na e suʻesuʻeina ai le Tusi Paia. (Faitau le Ioane 17:3.) Peitaʻi, e tele isi mea e ao ona e iloaina. O loo taʻua i le Tusi Paia e tatau ona “faatumuina [oe] i le poto saʻo” e faatatau i le finagalo o Ieova. (Kolose 1:9) O le a fesoasoani sauniga faa-Kerisiano a Molimau a Ieova iā te oe, ina ia atili vavalalata ai la oulua faiā ma Ieova. O se tasi na o māfuaaga tāua e tatau ai ona e auai e lē aunoa i na sauniga.—Eperu 10:24, 25.

6. O le ā le tele e manaʻomia ona e iloa e faatatau i le Tusi Paia a o leʻi papatisoina oe?

⁶ O le mea moni, e lē faatalitalia e Ieova ina ia e iloa mea uma i le Tusi Paia a o leʻi papatisoina oe. E leʻi faatalitalia e Ieova le tamāloa Aitiope ina ia iloa mea uma a o leʻi papatisoina o ia. (Galuega 8:30, 31) E faaauau pea ona tatou aʻoaʻoina mea e faatatau i le Atua. (Failauga 3:11) Ae ina ia mafai  ona papatisoina oe, e manaʻomia ona e iloa ma talia aʻoaʻoga faavae o loo i le Tusi Paia.—Eperu 5:12.

7. Ua faapefea ona fesoasoani iā te oe lou suʻesuʻeina o le Tusi Paia?

⁷ O loo taʻua i le Eperu 11:6: “A aunoa ma le faatuatua e lē mafai ona faafiafiaina [le Atua].” O lea, e manaʻomia ona e faaalia le faatuatua a o leʻi mafai ona papatisoina oe. O loo faamatalaina i le Tusi Paia sa iai nisi i le aai anamua o Korinito na faalogo i mea sa aʻoaʻoina e soo o Iesu, ma o le iʻuga, na “talitonu ma papatisoina i latou.” (Galuega 18:8) I se tulaga talitutusa, o lou suʻesuʻeina o le Tusi Paia ua fesoasoani iā te oe ina ia e faatuatua ai i folafolaga a le Atua, ma le aogā o le taulaga togiola a Iesu lea e mafai ona faasaʻolotoina ai i tatou mai i le agasala ma le oti.—Iosua 23:14; Galuega 4:12; 2 Timoteo 3:16, 17.

8. O le ā o le a uunaʻia ai oe e faailoa atu i isi mea ua e aʻoaʻoina?

⁸ A o faateleina mea e te aʻoaʻoina mai i le Tusi Paia ma mātauina le aogā i lou olaga, o le a atili ai ona malosi lou faatuatua. O le a e manaʻo e faailoa atu i isi mea o loo e aʻoaʻoina. (Ieremia 20:9; 2 Korinito 4:13) Ae o ai e tatau ona e faailoa atu i ai nei mea ua e aʻoaʻoina?

9, 10. (a) Atonu o ai e mafai ona e amata faailoa atu i ai mea ua e aʻoaʻoina? (e) O le ā e tatau ona e faia pe afai e te fia talaʻi faatasi ma le faapotopotoga?

⁹ Atonu e te manaʻo e faailoa atu mea ua e aʻoaʻoina  i ou aiga, uō, tuaoi po o i latou e tou te faigaluega faatasi. O se mea lelei le faia faapea. Peitaʻi, ia e faia i taimi uma i se auala agalelei ma alofa. I se taimi mulimuli ane, o le a mafai ona e talaʻi faatasi ma le faapotopotoga. Pe afai ua e fia talaʻi, e mafai ona e talanoa atu i le Molimau a Ieova o loo aʻoaʻoina oe e faatatau i le Tusi Paia, ma faailoa atu iā te ia e te fia auai i le galuega talaʻi faatasi ma le faapotopotoga. Pe afai e manatu lenā tagata ua mafai ona e talaʻi ma o loo e ola e tusa ai ma taʻiala a le Tusi Paia, ona faia lea o se tou talanoaga ma ni toeaina se toʻalua mai i le faapotopotoga.

¹⁰ O le ā o le a faia i lenā talanoaga? O le a talanoa atu nei toeaina iā te oe ina ia iloa ai po ua e malamalama ma talitonu i aʻoaʻoga faavae o le Tusi Paia, ola e tusa ai ma taʻiala o le Tusi Paia i aso uma, ma pe e te manaʻo moni lava e avea o se tasi o Molimau a Ieova. Ia manatua e leoleoina e toeaina sui uma o le faapotopotoga, e aofia ai ma oe. O lea, aua e te fefe e talanoa atu iā i latou. (Galuega 20:28; 1 Peteru 5:2, 3) Pe a māeʻa lenā talanoaga, o le a faailoa atu e toeaina po ua mafai ona e talaʻi faatasi ma le faapotopotoga.

11. Aiseā e tāua tele ai ona e faia ni suiga a o leʻi mafai ona e talaʻi faatasi ma le faapotopotoga?

¹¹ Atonu e faamatala atu e toeaina iā te oe, e manaʻomia ona e faia nisi suiga a o leʻi mafai ona e talaʻi faatasi ma le faapotopotoga. Aiseā e tāua tele  ai lou faia o nei suiga? Talu ai o loo fai i tatou ma sui o Ieova pe a tatou talanoa atu i isi e faatatau iā te ia, o lea, e tatau ai ona tatou ola i se auala e faamamaluina ai o ia.—1 Korinito 6:9, 10; Kalatia 5:19-21.

12. Aiseā e manaʻomia ai ona salamō tagata uma?

¹² E iai se isi mea e tatau ona e faia a o leʻi mafai ona papatisoina oe. Na taʻua e le aposetolo o Peteru: “O le mea lea, inā salamō ia ma liliu, ina ia soloiesea a outou agasala.” (Galuega 3:19) O le ā le uiga o le salamō? O lona uiga, o le matuā faanoanoa lea i so o se mea sesē lava sa tatou faia. O se faataʻitaʻiga, pe afai sa e ola i se olaga lē mamā taufeusuaʻiga, e manaʻomia la ona e salamō. E tusa foʻi pe na e faia taumafaiga uma e fai le mea saʻo i lou olaga atoa, e manaʻomia lava ona e salamō, talu ai o i tatou uma lava e agasala ma e manaʻomia ona talosaga atu i le Atua mo lana faamagaloga.—Roma 3:23; 5:12.

13. O le ā le uiga o le “liliu”?

¹³ Pe e lava le tau ina faanoanoa mo mea sesē sa e faia? E leai. Na faapea mai Peteru e manaʻomia foʻi ona e “liliu.” O lona uiga e manaʻomia ona e teena so o se amioga sesē lava sa faia i le taimi ua teʻa, ma amata loa ona faia le mea saʻo. Ina ia faataʻitaʻi lenei mea, seʻi faapea o le taimi muamua lea ua e malaga atu ai i se nofoaga patino. E leʻi umi ae e iloa ane e sesē le itu o loo e agaʻi i ai. O le  ā lau mea o le a fai? E mautinoa o le a e alu lemū, tu, liliu ma agaʻi atu i le itu saʻo ina ia taunuu ai i le nofoaga o loo e fia agaʻi atu i ai. I se tulaga talitutusa, a o e suʻesuʻeina le Tusi Paia, e te ono mātauina ai ni masaniga po o ni vala i lou olaga e manaʻomia ona faia ai ni suiga. Ia e lotomalie e “liliu” pe faia suiga manaʻomia, ma amata ona faia le mea saʻo.

14. E faapefea ona e tuuina atu lou ola i le Atua?

¹⁴ O se isi laasaga tāua e manaʻomia ona e faia a o leʻi papatisoina oe, o le tuuina atu lea o lou ola iā Ieova. Pe a tuuina atu lou ola iā Ieova, e te faia se tatalo e taʻutino atu ai o le a e tapuaʻi tau lava o ia, ma o le a avea le faia o lona finagalo ma mea e sili ona tāua i lou olaga.—Teuteronome 6:15.

15, 16. O le ā e uunaʻia ai se tasi e tuuina atu lona ola i le Atua?

¹⁵ E tai pei le taʻutino atu iā Ieova o le a e auauna tau lava o ia, o lou taʻutino atu lea i se tasi e te alofa i ai o le a oulua faatasi i le olaga atoa. Seʻi faapea o loo faia se faigāuō a se alii ma se tamaʻitaʻi. O le tele o mea e iloa e le alii e faatatau i le tamaʻitaʻi, o le atili foʻi lenā ona alofa i ai ma manaʻo ai e faaipoipo iā te ia. E ui lava o se filifiliga e tatau ona mafaufau lelei i ai, ae ua talia e lea alii lenei tiute tauave talu ai e alofa i le tamaʻitaʻi.

¹⁶ A o e aʻoaʻoina mea e faatatau iā Ieova, o le a oo ina e alofa iā te ia ma manaʻo e faia le mea sili  e auauna ai iā te ia. O lenei mea o le a uunaʻia ai oe e faia se tatalo e taʻutino atu ai o le a e auauna iā te ia. Ua taʻua i le Tusi Paia e tatau i so o se tasi e fia mulimuli iā Iesu ona “faafitia e ia o ia lava.” (Mareko 8:34) O le ā le uiga o lenā manatu? O lona uiga, e te faamuamua i lou olaga le usiusitaʻi iā Ieova. E sili atu le tāua o le mea e finagalo i ai Ieova nai lo o ou faanaunauga ma ou sini.—Faitau le 1 Peteru 4:2.

17. Aiseā ua lē tuuina atu ai e nisi o latou ola iā Ieova?

¹⁷ O nisi tagata e lē tuuina atu o latou ola iā Ieova, ona o le fefefe neʻi lē mafai ona latou ola e tusa ai ma la latou taʻutinoga e auauna iā te ia. E latou te lē mananaʻo e faatigā le finagalo o Ieova. Atonu e latou te manatu foʻi pe afai e lē tuuina atu o latou ola iā Ieova, e lē faasalaina foʻi la i latou e Ieova mo gaoioiga e latou te faia.

18. O le ā o le a fesoasoani iā te oe e manumalo ai i le faalogona fefe ina neʻi e faatigā i le finagalo o Ieova?

¹⁸ O lou alofa mo Ieova o le a fesoasoani iā te oe e manumalo ai i le faalogona fefe ina neʻi e faatigā i lona finagalo. O lou alofa mo ia, o le a e faia ai le mea sili e ola ai e tusa ma lau taʻutinoga na faia iā te ia. (Failauga 5:4; Kolose 1:10) O le a e lē manatu ai e faigatā tele ona e faia le finagalo o Ieova. Na tusi le aposetolo o Ioane: “O le alofa lenei i le Atua, ia tatou tausi i ana poloaʻiga; ma e lē mamafa ana poloaʻiga.”—1 Ioane 5:3.

19. Aiseā e lē tatau ai ona e fefe e tuuina atu lou ola iā Ieova?

 ¹⁹ E lē manaʻomia ona avea oe o se tagata lelei atoatoa ina ia tuuina atu ai lou ola iā Ieova. E na te lē o faatalitalia i tatou e faia se mea e sili atu nai lo o le mea e mafai ona tatou faia. (Salamo 103:14) O le a ia fesoasoani iā te oe e faia le mea saʻo. (Isaia 41:10) Ia faatuatua iā Ieova ma lou lotoatoa, “ona ia faasaʻoina lea o ou ala.”—Faataoto 3:5, 6.

20. O le ā le isi laasaga pe a māeʻa ona tuuina atu lou ola i le Atua?

²⁰ Pe e te manatu ua e nofosauni e tuuina atu lou ola iā Ieova? Pe a māeʻa ona tuuina atu lou ola iā Ieova, ua e nofosauni nei mo le isi laasaga. E manaʻomia ona papatisoina oe.

21, 22. E faapefea ona e ʻtaʻutino atu lou faatuatua i luma o tagata’?

²¹ Ia faailoa atu i le sooupu o le ʻautoeaina o la outou faapotopotoga, ua māeʻa ona tuuina atu lou ola iā Ieova ma ua e fia papatiso. O le a ia faatulaga ni toeaina ina ia autaluina ma oe aʻoaʻoga faavae o le Tusi Paia. Afai e ioe na toeaina ua e agavaa mo le papatisoga, o le a latou faailoa atu iā te oe e mafai ona e papatiso i se fonotaga po o se tauaofiaga o loo loma a Molimau a Ieova. I na faatasitasiga, o le a faia ai se lauga lea e faamatalaina ai le uiga o le papatisoga. Ona fai atu lea e le failauga o ni fesili se lua i ē uma o loo fuafua e papatiso. O lou taliina o na fesili, o le a e “taʻutino atu ai  i luma o tagata” lou faatuatua.—Roma 10:10.

²² Ona sosoo ai lea ma le papatisoina o oe. O le a faatofuina atoa lou tino i le vai. O le papatisoga e faailoa atu ai i tagata uma, ua tuuina atu lou ola iā Ieova ma ua avea nei oe o se tasi o Molimau a Ieova.

23. O le ā le uiga o le papatisoina “i le suafa o le Tamā, ma le Atalii, ma le agaga paia”?

²³ Na fetalai Iesu o le a papatisoina ona soo “i le suafa o le Tamā, ma le Atalii, ma le agaga paia.”  (Faitau le Mataio 28:19.) O le ā le uiga o lenā manatu? O lona uiga, e te amanaʻia le pule a Ieova ma le matafaioi a Iesu i le faataunuuina o le finagalo o le Atua, faapea le auala o loo faaaogā ai e le Atua lona agaga paia ina ia faataunuu lona finagalo.—Salamo 83:18; Mataio 28:18; Kalatia 5:22, 23; 2 Peteru 1:21.

24, 25. (a) O le ā le uiga o le papatisoga? (e) O le ā o le a tatou iloiloina i le mataupu mulimuli?

²⁴ E iai se uiga tāua o lou papatisoga. Pe a faatofuina lou tino i le vai, o lona uiga ua e lafoaʻia pe fulitua i lou olaga sa iai muamua. O lou toe ea aʻe mai i le vai, ua faaalia ai o le a e amata se olaga fou i le faia o le finagalo o le Atua, ma o le a e auauna iā te ia seʻia oo i le faavavau. Ia manatua, e lē o tuuina atu lou ola i se tagata, se faalapotopotoga po o se galuega. O lea ua tuuina atu lou ola iā Ieova.

²⁵ O lou tuuina atu o le a fesoasoani iā te oe e atiaʻe ai se faauōga māfana ma le Atua. (Salamo 25:14) E lē o le uiga o lenei mea e faapea, pe a papatiso se tagata ona mautinoa lea o lona mauaina o le faaolataga. Na tusi le aposetolo o Paulo: “Ia faaauau ona outou galulue mo lo outou faaolataga, i le mataʻu ma le gatete.” (Filipi 2:12) O le papatisoga ua na o se amataga. Ae e faapefea la ona e mafuta vavalalata atu pea iā Ieova? O le a taliina lenā fesili i le mataupu mulimuli o lenei tusi.