1. We kwela meshi kinyi kunyima k’obe kulonga uno mukanda?

WE MUPWE kulonga myanda ibungi ya binyibinyi ya mu Bible ku bukwashi bwa uno mukanda. Kileshesho; mulayilo w’Efile Mukulu pabitale muwa wa ikalaika, akuyiyaa muntu su baafu, na lusangukilo. (Mulungudi 9:5; Luka 23:43; Yowano 5:28, 29; Kibafumbwilwe 21:3, 4) Pangi tobangile kwibunga na Batemwe ba Yehowa mu bisangilo byabo na kumona byabadi mu lulangwilo lwa binyibinyi. (Yowano 13:35) Pangi tobangile mpa na kudya  bukuuku na Yehowa, na okumiina kwata kitshibilo kya kumufubila. Byabya, we kwiyipusha’shi, ‘ne kukita kinyi bwa kufubila Efile Mukulu binobino?’

2. Nkinyi kibaadi kitakule mwin’Etshyopii bwa kwamba’shi bamubatshishe?

² Dingi efuku, ungi mwin’Etshyopii baadi munangushene byabya. Kunyima kwa Yesu kusanguka, Fidipe mulongi aye baadi mulungule uno muntu mukandu wibuwa. Aye nkumushinkamisha’shi Yesu nyi Mesiya. Mwin’Etshyopii baadi musankile bikata myanda ibaadi mulongye. Ngi’ye nkwamba’shi: “Mema byaadi’bi! A kya kunkutshishwa kubatshishibwa’nyi nkinyi?”​—Bikitshino 8:26-36.

3. (a) Yesu baadi mupe balondji baye mwiya kinyi? (b) Na mushindo kinyi ulombeene muntu kubatshishibwa?

³ Bible alongyesha patooka’shi su okyebe kufubila Yehowa, abitungu obatshishibwe. Yesu balungwile Balondji baye shi: “Ndaayi mu miilo yooso nwibeekashe buu balondji bande, nwibabatshishe.” (Mateo 28:19) Dingi’nyi, Yesu mmwitulekyele kileshesho paye kubatshishibwa. Babamwinyine aye ooso mu mema, nta bamumyamine mema mu mutwe nya. (Mateo 3:16) Lelo uno, su mwina Kidishitu akyebe kubatshishibwa, mbalombeene kumwina sunga kumututumika aye ooso mu mema.

4. Lubatshisho loobe alulesha kinyi kwi bangi?

⁴ Nsaa y’obatshishibwa, olesha bangi bantu’shi okumiina kwikala kuuku’Efile Mukulu na okyebe kumufubila. (Misambo 40:7, 8) Byabya, we kwiyipusha shi, ‘Nkinyi akitungu kukita kumpala kwa kubatshishibwa?’

5. (a) Nkinyi akitungu’shi okite kumpala koobe kubatshishibwa? (b) Bwakinyi bisangilo bya beena Kidishitu bi na muulo?

⁵ Kumpala koobe kubatshishibwa, abitungu’shi, oukye Yehowa na Yesu. Tobangile kukita byabya p’obe kulonga  Bible. (Badika Yowano 17:3.) Sunga mbyabya nta nkupwe nya. Bible amba’shi abitungu ‘oushibwe na kiwukilo’ kya kikyebe ki’eshimba dya Yehowa. (Beena-Kolose 1:9, Kilombeeno kipya 2014) Bisangilo bya Batemwe ba Yehowa abikukwasha bodya kwikala mu kipwano na Yehowa. Ngi bwakinyi, we mulombeene kwikala na kiubishi kya kutwela mu bisangilo.​—Beena-Ebelu 10:24, 25.

6. Nkinyi akitungu’shi oukye kumpala koobe kubatshishibwa?

⁶ Eyendo, Yehowa t’akutekye’shi oukye myanda yooso i mu Bible kumpala kwa kubatshishibwa nya. Tabaadi mutekye mwin’Etshyopii bwashi aukye myanda yooso kumpala kwa kubatshishibwa. (Bikitshino 8:30, 31) Atuyididiila na kulonga pabitale Efile Mukulu ikalaika. (Mulungudi 3:11) Kadi bwa kubatshishibwa, abitungu oukye na okumiine ndambukisho ya kitako yatupete mu Bible.—Beena-Ebelu 5:12.

7. Kulonga koobe kwa Bible nkukukwashe naminyi?

⁷ Bible amba’shi: “Kushi lukumiino bi bukopo kusangasha Efile Mukulu.” (Beena-Ebelu 11:6) Byabya, abitungu’shi oleshe lukumiino kumpala kwashi obatshishibwe. Bible etulondela’shi, pabaadi balondji ba Yesu abalongyesha, bangi bantu ba mu kibundji kya Kodinda babaadi abebateemesha, “babaadi bapete lukumiino abo nkutambula lubatshisho.” (Bikitshino 18:8) Bi mumune, kulonga koobe kwa Bible nkukukwashe bwa kutuula lukumiino mu milayilo y’Efile Mukulu na mu bukome bwi na nkuulo ibatushishe Yesu bwa kwitupasha ku milwisho na ku lufu.​—Yooshwa 23:14; Bikitshino 4:12; 2 Timote 3:16, 17.

8. Nkinyi akikakutakula bwa kulungula bangi myanda yoodi mulongye?

⁸ Bu byolongo myanda ibungi ku bukwashi bwa Bible  na kumona kipaso kyayikukwasha mu nshalelo oobe, lukumiino loobe alukanyisha kutama. Okapete lukalo lwa kalungula namu bangi pabitale myanda yokwete kulonga. (Yeelemiya 20:9; 2 Beena-Kodinda 4:13) Byabya, nanyi oodi mulombeene kulungula?

9, 10. (a) Nnanyi odi mulombeene kubanga kulungula myanda yodi mulongye? (b) We kukita kinyi su okyebe kubanga kulungula pamune na kakongye?

⁹ We mulombeene kulungula beena kifuko, ba kuuku, ba nkungishanyi, sunga beena mudimo noobe pabitale myanda yokwete kulonga. Kukita byabya kwibuwa. Byabya, ikala webalungula na kalolo na kifulo kyoso. Kushi mpaka, okekala na ngobesha ya kubanga kulungula mukandu wibuwa pamune na kakongye. P’okamono’shi nsaa ibalombana, we mulombeene kulungula Temwe olongaa naye Bible shi, okyebe kubanga kulungula mukandu wibuwa pamune na kakongye. Su yawa mukwetu bamono’shi bolombana na dingi nshalel’obe bepushena na miiya ya mu Bible, anwe booso nwi bakumbeene kwenda mu kwimonena na bakulu babidi ba kakongye.

¹⁰ Nkinyi kyanukakitshi mu kyakya kisangilo? Bakulu abakataluula noobe su we mupushe na su we mukumiine ndambukisho ya kitako i mu Bible, na su okokyelaa akilongyesha Bible mu nshalel’obe na su okumiina binyibinyi kwikala umune a ku ba Temwe ba Yehowa. Tentekyesha’shi bakulu ndjo bakwete kukunkusha beena kakongye booso, pamune noobe’nyi. Byabya, totshinanga kutentekyesha nabo. (Bikitshino 20:28; 1 Mpyeele 5: 2, 3) Kunyima kwa kisangilo, Bakulu abakwiukisha su we mulombeene kubanga kulungula mukandu wibuwa pamune na kakongye.

11. Bwakinyi abitungu oshintuule nshalel’obe kumpala kwa kubanga kulungula mukandu wibuwa pamune na kakongye?

¹¹ Bakulu mmbalombeene kumona’shi, biky’abitungu  oshintuule nshalel’obe kumpala kwa kubanga kulungula mukandu wibuwa pamune na kakongye. Bwakinyi abitungu’shi oshintuula nshalel’obe? Ku mwanda p’atulungula bangi pabitale Yehowa Efile Mukulu, atulesha mpala yaye. Byabya, abikyebe ngikashi yetu imutumbishe.​—1 Beena-Kodinda 6:9, 10; Beena-Ngalatea 5:19-21.

12. Bwakinyi abitungu’shi bantu booso belangye?

¹² Kwi kingi kintu kyodi mulombeene kukita kumpala kwa kubatshishibwa. Mutumibwa Mpyeele bakwile’shi: “Elangyeeyi, nwalukiile kwi Efile Mukulu, bwa’shi milwisho yeenu ipwishiibwe.” (Bikitshino 3:19) Kwilanga akupatuula kinyi? Akupatuula kwinyongola bwa bubi booso bwatudi bakite. Kileshesho, su bodi otambuka lusandji, byabya abitungu’shi welangye. Na, sunga byekala’shi okitanga myanda ibuwa, we mulombeene nka kwilanga, mwanda atwe booso twi bakitshi ba milwisho, na atukumiina’shi Efile Mukulu etufwile lusa.​—Beena-Looma 3: 23; 5:1.

13. “Kwalukiila” akupatuula kinyi?

¹³ Abitungu penda kwinyongola bwa bubi bwatudi bakite su? Nya. Mpyeele bakwile’shi abitungu’nyi “kwalukiila.” Bino abipatuula’shi abitungu olekye mwikelo ooso wibubi wekalanga nao kumpala na obangye kukita myanda ibuwa. Banda kupwandjikisha’shi bwende mususa wa kumpala ku kibundji kyoshw’euku. Obe bapu kutambuka kapindji, bomono’shi bolubu eshinda. We kukita naminyi? Eyendo, obanga kutambuka bipela bipela, wemane, walukiile, akupu otwele mwishinda dibuwa. Bi mumune, bu byolongo Bible, we mulombeene kumona’shi kuki myanda mu nshalel’obe ayitungu’shi oshintuule. Kumiina ‘kwalukiila’—kwamba’shi, kushintuula nshalel’obe—na kubanga kukita myanda ibuwa.

14. Mushindo kinyi odi mulombeene kwilambula obe nabeene kwi Yehowa?

¹⁴ Dingi etabula di na muulo kumpala kwa kubatshishibwa nyi nkwilambula obe nabene kwi Yehowa. Nsaa yuelambula obe nabeene kwi Yehowa, wele luteko bwa kumulaa’shi okyebe kumulangwila nka pend’aye na kutuula kikyebe ky’eshimba dyaye pa mbalo ya kumpala mu nshalel’obe.​—Miiya Ikituulwe 6:15.

15, 16. Nkinyi kilombeene nkutakula bwa kwilambula obe nabene kwi Yehowa?

¹⁵ Nsaa y’olaa bwa kufubila nka penda Yehowa, we bu bakumiina kushala na muntu oodi mufule bwa mafuku ooso a muwa obe. Banda kupwandikisha na muntu kwete kuyila mukashi. Nsaa yafiki mu kwiuka ngikashi ibuwa i na yawa mukashi, ekala naye kifulo na kukumiina kumwibakila. Sunga byamweneka’shi nyi nkitshibilo akimutekye bwa kwela binangu kalolo, uno muntu akumiina kwata buno bushito mwanda mmufule mukashi.

¹⁶ Bu byolongo pabitale Yehowa, okamukumiina na wepana bwa kukita moobe mooso bwa kumufubila. Bino abikutakula bodya kumulaa mu luteko bwa kumufubila. Bible akula’shi muntu ooso akyebe kulonda Yesu abitungu ‘Epele aye nabeene.’ (Maako 8:34) A bino abipatuula kinyi? Bino abipatuula’shi botuulu kikyebe ky’eshimba dya Yehowa pa mbalo ya kumpala mu nshalel’obe, na’shi kyakya akikumiina Yehowa ki na muulo ukata kukila bitshibilo na nkalo yobe.​—Badika 1 Mpyeele 4:2.

17. Bwakinyi bangi bantu t’abakumiiina kwilambula abo banabene kwi Yehowa?

¹⁷ Bangi bantu t’abakumiina kwilambula kwi Yehowa abo banabene nya, mwanda abatshinyi’shi tala bakutwa  kulombasha mulayilo wabo wa kumufubila, na Yehowa eyongola pa mwanda wa byabya. Abanangushena’nyi shi, su abelambula kwadi, na kumongo abakitshi mulwisho, abekala na kya kwimuka kumpala kwaye.

18. Nkinyi akikakukwasha bwashi okatushe moo wa kwilambula kwi Yehowa?

¹⁸ Kifulo kyobe bwa Yehowa akikakukwasha bwa kukatusha moo wa kwilambula kwadi. Mwanda wa’shi we mumufule, okakitshi moobe mooso bwa kulombasha mulayilo oobe kwadi. (Mulungudi 5:4; Beena-Kolose 1:10) T’okamono bu bi bukopo kukita kikyebe ky’eshimba dya Yehowa nya. Mutumibwa Yowano bafundile’shi: “Mwanda kifulo ky’Efile Mukulu kii bino: tulame miiya yaaye. Na iinyi miiya yaaye ta mbushito bwitutentekwe nya.”​—1 Yowano 5:3.

19. Bwakinyi t’abitungu’shi opushe moo wa kwilambula obe nabeene kwi Yehowa?

¹⁹ T’abitungu’shi wekale mupwidikye ndjo welambule kwi Yehowa nya. Aye t’etutekaa bwa kukita kintu kyatushi bya koobesha nya. (Misambo 103:14) Akakukwasha bodya kukita myanda ibuwa. (Yeeshaya 41:10) Kulupila Yehowa n’eshimba dyobe dyooso, na ‘aye namu akalumbûla eshinda dyobe.’​—Nkindji 3:5, 6, EEM.

20. Kunyima koobe kwilambula kwi Yehowa, abikutekye’nyi okite dingi etabula kinyi?

²⁰ Topwile kwilambula obe nabeene kwi Yehowa su? Kunyima koobe kwilambula kwi Yehowa, Abikutekye’nyi okite dingi etabula. Abitungu obatshishibwe.

21, 22. Mushindo kinyi oodi mukumbeene “kubwela mukanwa mwobe” pabitale lukumiino loobe?

²¹ Lungula mukunkushi a kasaka ka bakulu a mu kakongye koodi shi, bopu kwilambula obe nabeene kwi Yehowa na binobino okumiina kubatshishibwa. Aye  namu, alungula bangi bakulu bwashi bataluule noobe ndambukisho ya kitako ya mu Bible. Su bano bakulu babamono’shi bolombana, abakulungula’shi, we mukumbeene kubatshishibwa mu kikongeno kya Batemwe ba Yehowa ki pepi. Mu kikongeno, abakakitshi mwisambo aulesha muulo wa kubatshishibwa. Mwisambi akeele bakwetu bapwe kwilumbuula bwa kubatshishibwa nkonko ibidi. P’waluula ino nkonko, ‘obwela  [kwakula] mukanwa mwobe’ pabitale lukumiino loobe.​—Beena-Looma 10:10.

²² Ndjo bakubatshishe. Abakwinyi mu mema oobe ooso. Kubatshishibwa koobe akulesha bantu booso shi, bwelambula obe nabene kwi Yehowa na binobino bofiki Temwe a Yehowa.

23. Kubatshishibwa ‘mwishina dya Yaya na dya Mwana na dya kikudi kiselele’ akupatuula kinyi?

²³ Yesu bakwile’shi, abitungu balondji baye babatshishibwe ‘mwishina dya Yaya na dya Mwana na dya kikidi kiselele.’ (Badika Mateo 28:19.) Bino abipatuula kinyi? Abipatuula’shi, oshinguula matalwa e n’Efile Mukulu na mudimo wi nao Yesu mu mpàngo y’Efile Mukulu, na kipaso akitumikaa Efile Mukulu na kikudi kyaye kiselele bwa kulombasha kikyebe ky’eshimba dyaye.​—Misambo 83:18; Mateo 28:18; Beena-Ngalatea 5:22, 23; 2 Mpyeele 1:21.

24, 25. (a) Lubatshisho alulesha kinyi? (b) Mmwanda kinyi watwakwila mu shapitre a nfudiilo?

²⁴ Lubatshisho alulesha kintu ki na muulo ukata. P’abakwinyi mu mema, abilesha’shi boofu sunga’shi bolekye nshalel’obe a kala. Nsaa y’otuuku mu mema, olesha’shi bobanga nshalelo mupya a kukita kikyebe ky’eshimba dy’Efile Mukulu. Olesha’nyi shi kubanga yaya nsaa oyididiila na kufubila Efile Mukulu. Tentekyesha’shi twe mwilambule kwi muntu, kwi ndumbulwilo sunga ku mudimo kampanda nya. Bwelambula obe nabeene kwi Yehowa.

²⁵ Kwilambula koobe akukakukwasha bwa kutamisha kipwano kyobe n’Efile Mukulu. (Misambo 25:14) Bino t’abipatuula’shi muntu akapashibwa kumwanda babatshishibwa nya. Mutumibwa Mpoolo bafundile’shi: “Fubilayi kipandjilo kienu’nwe banabene na moo na kusuusa.” (Beena-Fidipe 2:12, Kilombeeno kipya 2014) Lubatshisho ngi mbangilo. Byabya, mmushindo kinyi oodi mulombeene kushala pepi na Yehowa? Shapitre a nfudiilo a uno mukanda alula luno lukonko.