1. Yini longatibuta yona ngemuva kwekudadisha lencwadzi ngekucophelela?

MANYENTI emaciniso eliBhayibhelini losewuwafundzile usachubeka nekudadisha lencwadzi. Lamaciniso afaka ekhatsi setsembiso saNkulunkulu sekuphila phakadze emhlabeni lolipharadisi, simo salabafile kanye nelitsemba leluvuko. (Umshumayeli 9:5; Lukha 23:43; Johane 5:28, 29; Sembulo 21:3, 4) Mhlawumbe  sewucalile kuya emihlanganweni yaBoFakazi BaJehova futsi uyakholelwa kutsi batikhonti teliciniso. (Johane 13:35) Kungenteka sewunebuhlobo lobuhle naJehova futsi sewukhetse kumkhonta. Ngako kungenteka uyatibuta: ‘Yini lokufanele ngiyente nyalo kuze ngikhonte Nkulunkulu?’

2. Kungani indvodza lenguMtopiya beyifuna kubhajatiswa?

² Nguloko lokwacatjangwa yindvodza lenguMtopiya lebeyiphila ngesikhatsi saJesu. Ngemuva kwesikhatsi Jesu avusiwe, umfundzi wakhe Filiphu wayishumayela lendvodza. Filiphu wayikhombisa bufakazi bekutsi Jesu bekanguMesiya. LomTopiya watsintseka kakhulu ngalabekakufundza, waze watsi: “Nankha emanti; yini lengivimba kutsi ngibhajatiswe?”​—Imisebenti 8:26-36.

3. (a) Ngumuphi umyalo Jesu lawunika balandzeli bakhe? (b) Umuntfu kufanele abhajatiswe njani?

³ LiBhayibheli likwenta kucace kutsi nawufuna kukhonta Jehova kufanele ubhajatiswe. Naku Jesu lakusho kubafundzi bakhe: “Nente bantfu bato tonkhe tive babe bafundzi bami, nibabhabhatise.” (Matewu 28:19) Jesu wasibekela sibonelo ngekutsi abhajatiswe. Wacwiliswa emantini kunekutsi amane afafatwe ngemanti enhloko. (Matewu 3:16) Lamuhla, nangabe umKhristu abhajatiswa, kufanele acwiliswe ngalokuphelele emantini.

4. Kubhajatiswa kubatjelani labanye ngawe?

⁴ Nawubhajatiswa, usuke utjengisa labanye kutsi ufuna mbamba kuba ngumngani waNkulunkulu nekutsi ufuna kumkhonta. (Tihlabelelo 40:7, 8) Kungenteka uyatibuta kutsi, ‘Yini lekufanele ngiyente nangifuna kubhajatiswa?’

5. (a) Yini lekufanele uyente kucala usengakabhajatiswa? (b) Ibaluleke ngani imihlangano yebuKhristu?

⁵ Kufanele wati Jehova naJesu kucala usengakabhajatiswa. Sewuvele ucalile kwenta njalo ngekudadisha liBhayibheli. (Fundza Johane 17:3.) Kodvwa loko akukeneli. LiBhayibheli litsi kufanele ugcwale “lwati lwentsandvo yaNkulunkulu lolungulonalona.” (Kholose 1:9) Imihlangano yaBoFakazi BaJehova itakusita ube nebuhlobo lobuhle naJehova. Leso sizatfu lesibaluleke kakhulu lekufanele sikwente uchubeke uya njalo kulemihlangano.​—Hebheru 10:24, 25.

6. Kunganani lokufanele ube sewukwati eBhayibhelini usengakabhajatiswa?

⁶ Jehova akagadzi kutsi wati konkhe lokuseBhayibhelini usengakabhajatiswa. NakulomTopiya bekangakagadzi kutsi ati tonkhe tintfo asengakabhabhatiswa. (Imisebenti 8:30, 31) Sitawuchubeka sifundza ngaJehova kuze kube phakadze. (Umshumayeli 3:11) Nawufuna kubhajatiswa, kufanele utati timfundziso teliBhayibheli letisisekelo uphindze uvumelane nato.​—Hebheru 5:12.

7. Kukusite njani kudadisha liBhayibheli?

⁷ LiBhayibheli litsi: “Ngaphandle kwekukholwa ngeke kwenteke kutsi umuntfu amjabulise Nkulunkulu.” (Hebheru 11:6) Kufanele ube nekukholwa kucala usengakabhajatiswa. LiBhayibheli lisitjela kutsi endvulo bantfu basedolobheni laseKhorinte bakuva loko lebekufundziswa bafundzi baJesu, “bakholwa, base bayabhajatiswa.” (Imisebenti 18:8) Nawe kudadisha liBhayibheli kukusite kutsi utikholwe tetsembiso taNkulunkulu kanye nenhlawulo yaJesu lengakhona  kusikhulula esonweni nasekufeni.​—Joshuwa 23:14; Imisebenti 4:12; 2 Thimothi 3:16, 17.

8. Yini letawukwenta ufune kutjela labanye ngalokufundzile?

⁸ Kukholwa kwakho kutawucina nawuchubeka ufundza tintfo letinyenti eBhayibhelini futsi ubona kutsi tikusita njani ekuphileni kwakho. Utawufuna kutjela labanye ngaloko lokufundzako. (Jeremiya 20:9; 2 Khorinte 4:13) Bobani longabatjela?

9, 10. (a) Ungacala kubobani kucoca ngalokufundzile? (b) Yini lokufanele uyente nawufuna kushumayela nelibandla?

⁹ Kungenteka ufise kutjela umndeni wakho, bangani, bomakhelwane nobe losebenta nabo ngaloko lokufundzako. Leyo yintfo lenhle, kepha kufanele ubatjele ngemusa nangelutsandvo. Ngekuhamba kwesikhatsi utawubese ufuna kushumayela nelibandla. Nasewutiva sekuwukulungele kushumayela, ungakhuluma naFakazi lodadisha naye liBhayibheli umtjele kutsi sewufuna kushumayela nelibandla. Nangabe abona kutsi sewungakhona kushumayela futsi sewushintjile, sewuyakwenta loko lokufundze eBhayibhelini, nitawubese nihlangana nalabadzala belibandla lababili.

¹⁰ Kutakwentekani kulomhlangano? Labadzala batawucoca nawe kute babone kutsi uyawacondza futsi uyawakholelwa yini emaciniso eliBhayibheli lasisekelo, uyakwenta yini loko lokufundza eBhayibhelini ekuphileni kwakho, kanye nekutsi uyafuna yini vele kuba nguFakazi waJehova. Ungesabi kukhuluma nalabadzala, ngoba banakekela bonkhe labasebandleni, lokufaka ekhatsi nawe. (Imisebenti 20:28; 1 Phetro 5:2, 3) Ngemva kwalomhlangano laba labadzala batakutjela kutsi sewungacala yini kushumayela nalabasebandleni.

11. Kungani kubaluleke kakhulu kushintja usengakacali kushumayela nelibandla?

 ¹¹ Labadzala kungenteka bakutjele kutsi kufanele uyishintje kakhudlwana indlela lophila ngayo usengakacali kushumayela nelibandla. Kungani kubaluleke kakhulu kutsi ushintje? Kubalulekile ngoba nasitjela labanye ngaJehova sisuke simelele yena futsi kufanele siphile ngendlela lemdvumisako.​—1 Khorinte 6:9, 10; Galathiya 5:19-21.

12. Yini leyenta kudzingeke kutsi bonkhe bantfu baphendvuke?

¹² Kunalokunye lokufanele ukwente usengakabhajatiswa. Umphostoli Phetro watsi: “Phendvukani nigucuke, khona tono tenu titewusulwa.” (Imisebenti 3:19) Kusho kutsini kuphendvuka? Kusho kuva buhlungu kakhulu nganoma ngabe yini lembi lesiyentile. Sibonelo saloko kutsi nangabe bewutiphatsa kabi ngekwelicansi kufanele uphendvuke. Ngisho noma ngabe bewetama kwenta lokulungile kuphila kwakho konkhe, kufanele uphendvuke ngoba sonkhe siyona futsi sidzinga kucela kutsi Nkulunkulu asicolele.​—Roma 3:23; 5:12.

13. Kusho kutsini ‘kugucuka’?

¹³ Kufanele ugcine ngekuva buhlungu yini ngalokubi lokwentile? Cha. Phetro watsi kufanele uphindze ‘ugucuke.’ Loku kusho kutsi kufanele uyekele konkhe lokubi bese ucala kwenta lokuhle. Kute ukucondze loku, asewuticabange uya endzaweni longayati, bese kutsi ngemuva kwesikhatsi ubone kutsi ulahlekile. Yini longayenta? Asingabati kutsi unganciphisa litubane, ume, ujike bese sewuhamba ngendlela leya lapho ufuna kuya khona. Usachubeka nekufundza  liBhayibheli utawutfola kutsi kunemikhuba noma tintfo lekufanele utishintje ekuphileni kwakho. Timisele, ‘ugucuke’​—ushintje lakufanele ushintje khona—​bese wenta lokufunwa nguNkulunkulu.

14. Utinikela njani kuNkulunkulu?

¹⁴ Lesinye sinyatselo lesibalulekile lekufanele usitsatse usengabhajatiswa, kutsi utinikele kuJehova. Nawutinikela kuJehova, uyathantaza umetsembise kutsi utawukhonta yena kuphela futsi intsandvo yakhe kube ngiyo lebalulekile ekuphileni kwakho.​—Dutheronomi 6:15.

15, 16. Yini leyenta umuntfu afune kutinikela kuNkulunkulu?

¹⁵ Kwetsembisa kutsi sitawukhonta Jehova kuphela kufana nekwetsembisa umuntfu lomtsandzako kutsi utawuhlala naye kuphila kwakho konkhe. Ase ucabange ngelijaha nentfombi labatsandzanako. Njengoba lelijaha lichubeka liyati kahle lentfombi, ligcine seliyitsandza kakhulu futsi selifisa kuyishada. Nanobe lesincumo singasilula, lelijaha liyatinikela ngoba liyayitsandza lentfombi.

¹⁶ Kufundza ngaJehova, kukwenta umtsandze kakhulu futsi ufise kumkhonta ngawo onkhe emandla akho. Loku kutawukwenta uthantaze kuye wetsembise kumkhonta. LiBhayibheli litsi wonkhe umuntfu lofuna kuba ngumlandzeli waJesu kufanele ‘atidzele.’ (Makho 8:34) Kusho kutsini loko? Kusho kutsi kulalela Jehova kuta kucala ekuphileni kwakho. Kwenta loko Jehova lakufunako ngiko lokubaluleke kakhulu kwendlula tintfo lotifunako kanye nemigomo yakho.​—Fundza 1 Phetro 4:2.

17. Yini leyenta labanye bantfu bangatinikeli kuJehova?

¹⁷ Labanye bantfu abatinikeli kuJehova ngoba besaba kutsi batawehluleka kugcina setsembiso sekumkhonta ngekwetsembeka. Abafuni kumvisa buhlungu, kantsi labanye batitjela kutsi nabangakatinikeli, Jehova ngeke abasole ngetintfo labatentako.

18. Yini lengakusita ulwisane nekwesaba kuvisa Jehova buhlungu?

¹⁸ Kutsandza Jehova kutokusita kutsi ulwisane nekwesaba kumvisa buhlungu. Utawenta konkhe lokusemandleni kutsi ugcine setsembiso sakho ngobe umtsandza. (Umshumayeli 5:4; Kholose 1:10) Angeke ucabange kutsi kulukhuni kakhulu kwenta intsandvo yaNkulunkulu. Umphostoli Johane watsi: “Nguloku lokushiwo kutsandza Nkulunkulu, kutsi sigcine imiyalo yakhe; kantsi nemiyalo yakhe ayisiwo umtfwalo.”​—1 Johane 5:3.

19. Kungani kufanele ungesabi kutinikela kuJehova?

¹⁹ Akudzingeki ube ngumuntfu lote sono kute utinikele kuJehova. Akagadzi kutsi sente lesingeke sikhone kukwenta. (Tihlabelelo 103:14) Utakusita kutsi wente lokulungile. (Isaya 41:10) Tsemba Jehova ngayo yonkhe inhlitiyo yakho futsi “yena uyakucondzisa tindlela takho.”​—Taga 3:5, 6.

20. Ngusiphi sinyatselo lokufanele usitsatse nasewutinikele kuJehova?

²⁰ Ucabanga kutsi sewukulungele yini kutinikela kuJehova? Nasewutinikele kuJehova usuke sewukulungele kutsatsa sinyatselo lesilandzelako. Kudzingeka kutsi ubhajatiswe.

21, 22. Ungakuvuma njani ‘embikwebantfu’ kukholwa kwakho?

²¹ Khuluma nemchumanisi wesigungu salabadzala  losebandleni lokulo umtjele kutsi sewutinikele kuJehova futsi sewufuna kubhajatiswa. Utawubese uhlela kutsi nicoce nalabanye labadzala belibandla ngetintfo lotifundze eBhayibhelini. Nababona kutsi sewukulungele, batakutjela kutsi sewungabhajatiswa emhlanganweni wesigodzi noma wesifundza waBoFakazi BaJehova lolandzelako. Kulomhlangano kutawuba  nenkhulumo lechaza kutsi kusho kutsini kubhajatiswa. Umzalwane lotabe abeka lenkhulumo utawubuta labo lesebakulungele kubhajatiswa imibuto lemibili lelula. Ngekuphendvula leyo mibuto, utawube ‘ukuvuma embikwebantfu’ kukholwa kwakho.​—Roma 10:10.

²² Utawubese uyabhajatiswa. Utawucwiliswa emantini. Lokubhajatiswa kutawukhombisa wonkhe muntfu kutsi sewutinikele futsi sewunguFakazi waJehova.

23. Kusho kutsini kubhajatiswa “egameni leYise, neleNdvodzana, nelemoya longcwele”?

²³ Jesu watsi balandzeli bakhe batawubhajatiswa “egameni leYise, neleNdvodzana, nelemoya longcwele.” (Fundza Matewu 28:19.) Kusho kutsini loko? Kusho kutsi uyalihlonipha ligunya laJehova, indzima yaJesu ekufezeni injongo yaNkulunkulu kanye nendlela Nkulunkulu lasebentisa ngayo umoya wakhe longcwele kuze afeze intsandvo yakhe.​—Tihlabelelo 83:18; Matewu 28:18; Galathiya 5:22, 23; 2 Phetro 1:21.

24, 25. (a) Kumelelani kubhajatiswa? (b) Sitawucoca ngani esehlukweni lesilandzelako?

²⁴ Kubhajatiswa kumelela intfo lebaluleke kakhulu. Kucwiliswa emantini kusho kutsi sewufile endleleni lebewuphila ngayo nobe sewuyishiyile. Nawuphuma emantini, utawucala imphilo lensha yekwenta intsandvo yaNkulunkulu. Kukhombisa kutsi kusukela manje utawukhonta Jehova kuphila kwakho konkhe. Ungakhohlwa kutsi awukatinikeli kumuntfu noma emsebentini nobe enhlanganweni. Unikele kuphila kwakho kuJehova.

²⁵ Kutinikela kwakho kutakusita wakhe buhlobo lobuhle naNkulunkulu. (Tihlabelelo 25:14) Loko akusho kutsi umuntfu utawusindziswa ngoba nje sewubhajatisiwe. Umphostoli Pawula watsi: “Chubekani nisebentela kusindziswa kwenu ngekwesaba nangekutfutfumela.” (Filiphi 2:12) Kubhajatiswa kumane nje kusicalo. Ungahlala njani usondzelene naJehova? Sehluko lesilandzelako sitawuphendvula lombuto.