1. Niinzi nchunga ulayeeya nwaamana kwiiya bbuku eeli akulimvwisisisya?

WAKIIYA zyiingi atala akasimpe kali muBbayibbele chiindi nwaakali kwiiya bbuku eeli, zili mbuli chisyomezyo chabuumi butamani, chiimo chabafwide, alimwi abubuke. (Mukambausi 9:5; Luka 23:43; Johane 5:28, 29; Ciyubunuzyo 21:3, 4) Amwi chimwi chiindi wakali wasanguna kunjila miswaangano yaBakamboni baJehova akubona kuti nzibachita nzyabukombi  bwakasimpe. (Johane 13:35) Alubo amwi wakasanguna kuba abweenzinyina bulaafwiifwi aJehova, amwi akuti wakasala kuyanda kumubelekela. Nga ulakonzya kuyeeya kuti, ‘Ndeelede kuchitaanzi lino kuti ndibelekele Leza?’

2. Nkamboonzi mwaalumi waku Etiopiya naakayanda kubbabbatizigwa?

² Nchichicho mwaalumi waku Etiopiya iwakapona muchiindi chaJesu nchaakayeeya. Mukweenda kwachiindi Jesu kali wabusigwa, sikwiiya wakwe Filipi wakakambawukila mwaalumi ooyo muna Etiopiya. Filipi wakamutondeezya kuti Jesu wakali Mesiya. Makani ngaakayiiya muna Etiopiya akamujata-jata zyakuti wakamba kuti: “Ngaya maanzi, ncinzi ino icindikasya kubapatizigwa?”—Incito 8:26-36.

3. (a) Nguuli mulawu Jesu ngwaakapa basikwiiya bakwe? (b) Muntu weelede kubbabbatizigwa biyeni?

³ IBbayibbele likubikkaa ntanganana kuti, ikuti kuyanda kubelekela Jehova, weelede kubbabbatizigwa. Jesu wakabuzya basikwiiya bakwe kuti: ‘Kamuya mukabayiisye bantu bazisi zyoonse kuti babe basikwiiya akubabapatizya.’ (Matayo 28:19) Jesu lwakwe wakabikka chikozyano kwiinda mukubbabbatizigwa. Chiindi naakali kubbabbatizigwa taakasansilwaa mutwe biya pe, pesi wakabbizigwa mumaanzi. (Matayo 3:16) Mazuba aano ikuti muKristu kalikubbabbatizigwa, weelede kubbizigwa mumaanzi.

4. Kubbabbatizigwa kwako kubatondeezyaanzi bamwi?

⁴ Chiindi nubbabbatizigwa, zitondeezya bamwi kuti uyanda kuba mweenzinyina waLeza akuti uyanda kumubelekela. (Intembauzyo 40:7, 8) Ulakonzya kuyeeya kuti, ‘Niinzi nchindeelede kuchita kuti ndibbabbatizigwe?’

5. (a) Niinzi nchweelede kusaanguna kuchita kutana bbabbatizigwa? (b) Nkaamboonzi miswaangano yabuKristu niigwasya?

⁵ Kutana bbabbatizigwa, weelede kuziba Jehova aJesu. Wakasaanguna kale kuchita eezi kwiinda mukwiiya Bbayibbele. (Bala Johane 17:3.) Pesi tazimanini aawo pe. IBbayibbele lyaamba kuti weelede ‘Kuzuzigwa aluzibo lwini-lwini’ lwakuyanda kwaJehova. (BaKolose 1:9) Miswaangano yaBakamboni baJehova iyookugwasya kuti ukabe aabweenzuma buli afwiifwi aJehova. Nkikaambo kamwi kapati nchweelede kujanika kumiswaangano eeyi chiindi choonse.—BaHebrayo 10:24, 25.

6. Weelede kubaa luzibo lwiingi biyeni atala aBbayibbele kotana bbabbatizigwa?

⁶ Nisimpe, Jehova talangili kuti uzibe zyoonse zili muBbayibbele kutana bbabbatizigwa. Jehova taakwe naakali kulangilila kuti muna Etiopiya azibe zyoonse katana bbabbatizigwa. (Incito 8:30, 31) Alimwi tuyooyinkilila kunembo katulikwiiya atala aLeza kukabe kutamani. (Mukambausi 3:11) Ikuti ubbabbatizigwe, weelede kuziba zimwi njiisyo zijanika muBbayibbele akuzizumina.—BaHebrayo 5:12.

7. Kwiiya kwako Bbayibbele kwakakugwasya biyeni?

⁷ IBbayibbele liti: “Kuti kakwiina lusyomo tacikonzeki kukonda Leza.” (BaHebrayo 11:6) Nkikaako weelede kubaa lusyomo saansi kutana bbabbatizigwa. IBbayibbele litubuzya azyabamwi bantu bamumunzi wachiindi wakuKorinto aawo nibakamvwa basikutobela baJesu kabali kuyiisya zyakabapa kuti, ‘basyome babapatizigwe.’ (Incito 18:8) Munzila ikozyenie, kwiiya kwako iBbayibbele kwakugwasya kuti ube alusyomo muzisyomezyo zyaLeza alimwi amunguzu zyachinunuzyo chaJesu chakutufutula kuzwa muchibi amulufu.—Joshua 23:14; Incito 4:12; 2 Timoteo 3:16, 17.

8. Niinzi chiyoopa kuti uyande kubuzya bamwi atala anzulokwiiya?

⁸ Nuya bwiiya zyiingi muBbayibbele akubona kuti likugwasya biyeni mubuumi bwako, lusyomo lwako luyoosima. Uyobaa chiyandisyo chakubuzya bamwi nzulokwiiya. (Jeremiya 20:9; 2 BaKorinto 4:13) Pesi mbaani mbweelede kubuzya

9, 10. (a) Mbaani mbweelede kusanguna kubuzya atala anzulokwiiya? (b) Niinzi nchweelede kuchita kuti kuyanda kukambawuka abamumbungano?

⁹ Ulakonzya kuyanda kubuzya bampuli yako, beenzinyokwe, basimayakilane nikuba mbubelekaabo atala anzulikwiiya. Nzibotu loko eezi, pesi zichite munzila yaluyando ayakutondeezya luse. Wachitoobo, ulakonzya kutalika kukambawuka ambungano. Ikuti wabona kuti walibambila kuchitoobo, ulakonzya kwaambuula ayooyo ulikukuyiisya Bbayibbele akumubuzya kuti uyanda kutalika kukambawuka abamumbungano. Ikuti ukuyiisya Bbayibbele wabona kuti walibambila, akuti ulokupona anjisyo zili muBbayibbele, aboobo kamuli babili mulaswaanana abaalu bobilwe bamumbungano yanu.

¹⁰ Niinzi chiyoochitika kumuswaangono ooyo? Baalu bayoowambuula anduwe kuchitila kuti babone kuti ulazimvwisisisya akuzisyoma na njiisyo zijanika muBbayibbele, ikuti kuswiilila Bbayibbele nzilyaamba mubuumi bwako bwabuzuba-abuzuba akuti ulayanda na choonzyo kuba Kamboni waJehova. Weelede kuziba kuti baalu balangania bantu boonse bali mumbungano, kuswaanizya anduwe, aboobo tweelede kuyoowa pe kwaambuulaabo. (Incito 20:28; 1 Petro 5:2, 3) Kuzwaa muswaangano ooyo, baalu bayookuzibisya kuti uleelela na kutalisya kukambawuka abamumbungano.

11. Nkaamboonzi nikuyandikana kuchincha maponeno aako kutana talika kukambawuka abamumbungano?

 ¹¹ Baalu balakonzya kukupandulwida kuti uchiyandikana kuchincha maponeno aako kutana tanguna kukambawuka abamumbungano. Nkaamboonzi nikuyandikana kuchincha ooku? Nkaambo chiindi nitwaambuula abamwi atala azyaLeza, twiimikilila Jehova akuti tweelede kupona munzila iimupa bulemu.—1 BaKorinto 6:9, 10; BaGalatiya 5:19-21.

12. Nkaamboonzi bantu boonse nibeelede kweempwa?

¹² Kuli chimwi chintu nchweelede kuchita kutana bbabbatizigwa. Mwaapostolo Petro wakaaamba kuti: “Amweempwe, musanduke, kuti zibi zyanu zijatilwe.” (Incito 3:19) Kweempwa chaambaanzi? Chaamba kulisola atala achimwi chintu chibi nchwaakachita. Muchikozyano, ikuti wakali kupona buumi bwakuchita bwaamu, weelede kweempwa. Nikuba kuti uliikweezya kuchita zintu zili kabotu, uchiyandikana kweempwa, nkaambo toonse tulabisya alimwi tweelede kukumbila lulekelelo kuli Leza.—BaRoma 3:23; 5:12.

13. Chaambaanzi “kusanduka”?

¹³ Weelede kumanina akulisola biyo na kuzintu nzwaakachita? Peepe. Petro wakaamba kuti tuyandikana “kusanduka.” Eezi zyaamba kuti weelede kukaka buumi bwachiindi butali kabotu akutalika kuchita zili kabotu. Kuti tukozyanisye eezi, atwaambe kuti uyakuli bumwi busena kwakusaanguna. Nikwaba chiindi wasikubona kuti watola nzila iitali njiyo pe. Kujana wachita biyeni? Nisimpe kuti walikunooleka kuya kunembo, pesi walikunoobweeda musule, mpawo kuyooyinda nzila iili njiyo. Munzila iikozyenie, nuya bwiiya Bbayibbele, ulakonzya kubona kuti kuchili bumwi bube naa zintu  mubuumi bwako nzucheelede kuchincha. Weelede kuzumina “kusanduka”—chaamba kuchincha akuchita zintu ziyandikana—alimwi utalike kuchita zintu zili kabotu.

14. Ulipeda biyeni kuli Leza?

¹⁴ Imwi ntaamu iiyandikana kuchitwa kutana bbabbatizigwa nkulipeda kuli Jehova. Chiindi nulipeda kuli Jehova, ulakomba kumusyomezya kuti uyookomba nguwe alikke, akuti kuyanda kwakwe kube chintu chakusaanguna mubuumi bwako.—Deuteronomo 6:15.

15, 16. Niinzi chisungwaazya muntu kuti alipede kuli Leza?

¹⁵ Kusyomezya kubelekela Jehova alikke kuli mbuli kusyomezya kuzookkala amuntu nguyandana aawe mubuumi bwako boonse. Yeeyela atala amulombe amusimbi bayandana. Mulombe mbwaya bumuziba kabotu musimbi, ulatalika kumuyanda alimwi ulayanda kuzoomukwata. Nikuba kuti kusala ooku teekwakusaana pe, mulombe nga uliyandide kuzumina mutolo ooyu nkaambo nga uyanda musimbi.

¹⁶ Mbuya bwiiya atala aJehova, uyoosika mpumuyanda akuyanda kuchita kufumbwa nzukonzya kuti umubelekele. Eezi ziyookusungwaazya kukombela kuti umubelekele. IBbayibbele lyaamba kuti kufumbwa muntu uuyanda kutobelezya Jesu weelede “kulyuubaula.” (Marko 8:34) Chaambaanzi eechi? Chaamba kutaanguna kulibombya kuli Jehova mubuumi bwako. Jehova nzyayanda ziyandikana loko kwiinda nzuyanda anzupeekezya.—Bala 1 Petro 4:2.

17. Nkaamboonzi bamwi bantu nibatalipedi kuli Jehova?

¹⁷ Bamwi bantu tabalipedi pe kuli Jehova, nkaambo  bayoowa kuti bazookachilwa kuzuzikizya zisyomezyo zyabo zyakumubelekela. Tabayandi pe kumunyemya Jehova, naa balakonzya kuyeeya kuti, Jehova takabapi mulandu pe nkaambo kakutalipeda kwabo kuli nguwe.

18. Niinzi chiyookugwasya kuti ukazunde kuyeeya kuti tukonzyi kuchita nzyayanda Jehova?

¹⁸ Kuyanda Jehova kuyookugwasya kuti uzunde kuyeeya kuti tukonzyi kuchita nzyayanda. Akaambo kakuti ulamuyanda, uyoochita kufumbwa nchukonzya kutegwa ukabambe chisyomezyo chako chakuyanda kumubelekela. (Mukambausi 5:4; BaKolose 1:10) Tukayeeyi kuti nkuyumu loko kuchita kuyanda kwaJehova. Mwaapostolo Johane wakalemba kuti: “Oku nkokuyanda Leza, kuti twabamba milazyo yakwe; alimwi milazyo yakwe tiili miyumu.”—1 Johane 5:3.

19. Nkaamboonzi nuteelede kuyoowa kulipeda kuli Jehova?

¹⁹ Toyelede kuba muntu uumaninide pe kutegwa ulipede kuli Jehova. Takulangilili kuti uchite zintu nzutakonzyi kuchita. (Intembauzyo 103:14) Jehova uyookugwasya kuti ukachite zintu zili kabotu. (Isaya 41:10) Syoma Jehova amoyo wako woonse, alimwi “uyooenzya myeendelo yako.”—Tusimpi 3:5, 6.

20. Nwaazwa kulipeda kuli Leza, njiili ntaamu iitobela?

²⁰ Uyeeya kuti ulilibambilide na choonzyo kulipeda kuli Jehova? Nwaazwa kulipeda kuli Jehova, unooli ulilibambilide kutola imwi ntaamu. Weelede kubbabbatizigwa.

21, 22. Nga ulakuchita biyeni ‘kwaambilizya kwaantanganana’ kwalusyomo lwako?

²¹ Weelede kuzibya mulangizi wakabunga kabaalu wamumbungano yenu kuti walipeda kuli Jehova akuti  uyanda kubbabbatizigwa. Mpawo uyootamba bamwi baalu kuti bakalange-lange njiisyo zijanika muBbayibbele anduwe. Ikuti bazumina kuti walibambila, bayookubuzya kuti ulakonzya kubbabbatizigwa kumuswaangano mupati uutobela waBakamboni baJehova. Kumuswaangano ooyu, kunooli nkani iitakapandulule kubbabbatizigwa nchikwaamba. Sikupa nkani uyookumbila aabo banooli bambilide kubbabbatizigwa  kuti bakasandule mibuzyo iibili iitali miyumu pe. Kwiinda mukusandula mibuzyo eeyi, uchita ‘kwaambilizya kwantanganana’ kwalusyomo lwako.—BaRoma 10:10.

²² Kuzwaawo uyoobbabbatizigwa. Uyoobbizigwa mumaanzi mubili woonse. Kubbabbatizigwa kwako  kuyootondeezya bantu boonse kuti walipeda kuli Jehova akuti waba Kamboni waJehova.

23. Chaambaanzi kubbabbatizigwa “muzina lya-Taata alya-Mwana alyamuuya uusalala”?

²³ Jesu wakaamba kuti basikwiiya bakwe bakali kuyoobbabbatizigwa “muzina lya-Taata alya-Mwana alyamuuya uusalala.” (Bala Matayo 28:19.) Chaambaanzi eechi? Chaamba kuti ulabuzumina bweendelezi bwaJehova amulimu waJesu mumakanze aaLeza, mbuli nzila Leza njabelesya muuya wakwe uusalala kuti uzuzikizye kuyanda kwakwe.—Intembauzyo 83:18; Matayo 28:18; BaGalatiya 5:22, 23; 2 Petro 1:21.

24, 25. (a) Kubbabbatizigwa kwiimininaanzi? (b) Tuyoolanga-langaanzi muchaandano chakumamanino?

²⁴ Kubbabbatizigwa kwiiminina chimwi chintu chiyandikana loko. Ikuti wabbizigwa mumaanzi mubili woonse, chaamba kuti wafwa naa kusiya buumi bwako bwachiindi. Chiindi nwaazwa mumaanzi, utalisya buumi bupya bwakuchita kuyanda kwaLeza. Chitondeezya kuti kuzwa lino uyoobelekela Jehova. Weelede kuyeeya kuti teewalipeda kuli umwi muntu, kumbunga, naa kumulimu pe, pesi unooli wapeda buumi bwako kuli Jehova.

²⁵ Kulipeda kwako kuyookugwasya kuti ukomezye bweenzinyokwe bwaafwiifwi aLeza. (Intembauzyo 25:14) Eezi tazyaambi kuti muntu uyoofutuka akaambo kakuti wabbabbatizigwa. Mwaapostolo Paulo wakalemba kuti: “Musungwaale kukulibelekela lufutuko lwanu cakuyoowa acakuzyangama.” (BaFilipi 2:12) Kubbabbatizigwa matalikilo biyo. Pesi kujana waswena biyeni aafwiifwi aJehova? Chaandano chamamanino chabbuku eeli chiyoosandula mubuzyo ooyu.