1. Hi fanele hi tivutisa yini ndzhaku kodjondza buku leyi?

SE U DJONDZE mintiyiso yotala ka buku leyi. Hi xikombiso, u djondze leswaku Xikwembu xihi tshembisa wutomi lelinga heliki, ntiyiso hi xiyimo xa vafi ni ntshembo wa kupfuxiwa ka vafi. (Eklesiasta 9:5; Luka 23:43; Yohane 5:28, 29; Nhlavutelo 21:3, 4) Swinga yendleka se u sungule kuya ka minhlanganu ya Timboni ta Yehovha nakambe se uswi vonile leswaku ti le ka wugandzeli la ntiyiso. (Yohane 13:35) Kumbexana se u sungule kuva ni wunghanu na Yehovha naswona u yendle xiboho xolava  kumu tirhela. Kutani ungaha pimisa leswi: ‘Se swoswi ni fanele ni yendla yini leswaku ni tirhela Xikwembu?’

2. Hi mhaka muni Muetiyopiya a lave kutsakamisiwa?

² Hi leswo wanuna mun’wana wa Muetiyopiya lweyi anga hanya masikwini ya Yesu anga vutisa. Ndzhaku ka loko Yesu a file a tlhela a pfuxiwa, Filipi mudjondzisiwa wa Yesu a chumayele wanuna lweyi. Amu kholwise leswaku Yesu hi yena Mesiya. Se Muetiyopiya a khumbeke swinene hi leswi angaswi djondza lakakuva a tekela kuvula a ku: ‘Waswivo, mati hi lawa; kungasivela yini leswaku nitsakamisiwa xana?’ — Mintirho 8:26-36.

3. a) Hi xihi xileriso lexi Yesu a nyikeke vadjondzisiwa va yena? b) Hi fanele hi tsakamisiwa hi ndlela yihi?

³ Bibele li djondzisa leswaku loko u lava kutirhela Yehovha, u fanele u tsakamisiwa. Yesu a byele vadjondzisiwa va yena a ku: ‘Fambani ka tinxaka hinkwatu, mivayendla vadjondzisiwa va mina, mivakhuvula’. (Matewu 28:19) Yesu a tlhele ahi vekela xikombiso hi kuva a tsakamisiwa. Miri wa yena hinkwawu wu nyuvelisiwe ka mati, kunga li kun’wan’waseliwa swimatana ka nhloko. (Matewu 3:16) Ni namuntlha, loko Mukreste a tsakamisiwa, a fanele a nyuvelisiwa ka mati hi kuhelela.

4. U kombisa yini ka van’wana loko u tsakamisiwa?

⁴ Loko u tsakamisiwa, u komba van’wana leswaku hakunene u lava kuva munghanu wa Xikwembu naswona u lava kuxi tirhela. (Tipisalema 40:7, 8) Hi mhaka leyo, ungahati vutisa leswi: ‘Ni fanele ni yendla yini leswaku ni tsakamisiwa?’

5. a) U fanele u rhanga hi kuyendla yini na ungese tsakamisiwa? b) Hi mhaka muni minhlanganu yi li ya lisima?

⁵ Na ungese tsakamisiwa, u fanele u tiva Yehovha na Yesu. Se u sungulile kuswi yendla leswo hi kudjondza Bibele.  (Lerha Yohane 17:3.) Kambe leswo aswi yenelanga. Bibele li vula leswaku u fanele u tala ‘hi vutivi la kurhandza’ ka Yehovha. (Vakolosa 1:9) Minhlanganu ya Timboni ta Yehovha yitaku pfuna leswaku u va ni wunghanu la le kusuhi na Yehovha. Lexi i xin’wana xa swivangelo swa lisima leswi faneleke swiku yendla unga lovhi ka minhlanganu. — Vaheveru 10:24, 25.

6. U fanele u va ni wutivi la kugama kwihi na ungese tsakamisiwa?

⁶ I ntiyiso leswaku Yehovha anga nyimelanga leswaku u tiva hinkwaswu leswinga ka Bibele na ungese tsakamisiwa. Aswi li tanu ni le ka Muetiyopiya. (Mintirho 8:30, 31) Naswona hita tama hi djondza hi Xikwembu hilaha kunga heliki. (Eklesiasta 3:11) Kambe leswaku u tsakamisiwa, u fanele u tiva tidjondzo ta masungulo ta Bibele u tlhela u kholwa ka tona. — Vaheveru 5:12.

7. Yiku pfunise kuyini djondzo ya wena ya Bibele?

⁷ Bibele li vula leswi: ‘Handle ka kupfumela aswikoteki kutsakisa Xikwembu.’ (Vaheveru 11:6) Hi mhaka leyo, u fanele u va ni lipfumelo na ungese tsakamisiwa. Bibele lihi byela leswaku vanhu van’wana le doropeni la Korinto va twe leswi valandzeli va Yesu vangava djondzisa swona, kutani ‘vapfumela, vava vatsakamisiwa.’ (Mintirho 18:8) Hilaha kufanaka, djondzo ya wena ya Bibele yiku pfunile leswaku u va ni lipfumelo ka switshembiso swa Xikwembu ni le ka gandzelo la Yesu, leli lingahi ponisaka ka xidjoho ni lifu. — Yoxuwa 23:14; Mintirho 4:12; 2 Timotiya 3:16, 17.

8. I yini leswingataku pfuna kubyela van’wana hi leswi ungaswi djondza?

⁸ Loko u ya u djondza leswi yengetelekeke ka Bibele naswona u vona ndlela leyi swiku pfunaka hi yona ka  wutomi la wena, lipfumelo la wena lita ya li kula. Uta lava kuchumbutela van’wana hi leswi uswi djondzaka. (Yeremiya 20:9; 2 Vakorinto 4:13) Kambe u fanele u byela vamani?

9, 10. a) Unga sungula hi vamani kuva byela leswi uswi djondzaka ka Bibele? b) U fanele u yendla yini loko u lava kuchumayela ni bandla?

⁹ Ungaha lava kubyela ndjangu wa wena, vanghanu, vatirhikuloni hi leswi uswi djondzaka. Leswo i swinene, kambe u fanele uswi yendla hi ndlela leyinene ni ya lirhandzu. Hi kufamba ka nkama, uta kota kusungula kuchumayela ni bandla. Loko u titwa u lunghekile kuyendla leswo, vulavula ni Mboni leyiku djondzelaka Bibele, yi byeli leswaku u tsakela kuchumayela ni bandla. Loko yi vona leswaku u hanya hi kupfumelelana ni leswi Bibele liswi djondzisaka, yita famba na wena ka madoda mambirhi ya bandla.

¹⁰ Madoda mata bulisana na wena hi yini? Mataku vutisa leswaku wa titwisisa ni kutikholwa tidjondzo ta Bibele. Naswona mataku vutisa leswaku ka awuton’wini la wena la siku ni siku, u yendla leswi Bibele liswi djondzisaka naswona waswi tsakela kuva Mboni ya Yehovha. Kambe awu fanelanga uma chava madoda hikuva mani mhaka ni swirho hinkwaswu swa bandla, kupatsa na wena. (Mintirho 20:28; 1 Petro 5:2, 3) Ndzhaku ka nhlanganu lowu, mataku byela loko se u fanelekela kuchumayela ni bandla.

11. Hi mhaka muni u fanele u cinca swokarhi ka wutomi la wena na ungese sungula kuchumayela ni bandla?

¹¹ Madoda mangahaku byela leswaku u fanele u cinca swokarhi awuton’wini la wena na ungese sungula kuchumayela ni bandla. Hi mhaka muni swi li swa lisima kucinca?  Hikusa loko hi vulavula ni van’wana hi Xikwembu, hi nyimela Yehovha naswona hi fanele hi hanya hi ndlela leyi yimu vangamisaka. — 1 Vakorinto 6:9, 10; Vagalatiya 5:19-21.

12. Hi mhaka muni vanhu hinkwavu va fanele va tisola?

¹² Ku ni xilo xin’wana lexi u faneleke uxi yendla na ungese tsakamisiwa. Mupostola Petro a te: “Ti soleni, mihundzuka leswaku swidjoho swa n’wina swisuliwa”. (Mintirho 3:19, NM) Swi vula yini kutisola? Swi vula kuva u titwa nandzu hi mhaka ya swilo swobiha leswi ungaswi yendla. Hi xikombiso, loko swiku munhu a atikhoma hi ndlela yobiha, a fanele a tisola. Hambiloko u zama kuyendla leswi lulameke awuton’wini la wena hinkwalu, swaha lava u tisola, hikusa hinkwerhu hi vadjohi naswona haswi lava kurivaleliwa hi Xikwembu. — Varhoma 3:23; 5:12.

13. Swi vula yini ‘kuhundzuka’?

¹³ Swa yenela kuva u titwa nandzu hi mhaka ya leswi ungaswi yendla? Nikatsongo. Petro a vule leswaku u fanele u tlhela u ‘hundzuka’. Leswi swi vula kutshika mahanyelo hinkwawu yobiha ivi u sungula kuyendla leswinga swinene. Leswaku hiyi twisisa kahle mhaka leyi, ahinge u yendza ka ndhawu yokarhi leyi ungayi tiviki. Ndzhaku ka nkama nyana, u tsumbula leswaku u lahlekile. Awuta kuyini? Awuta nyimisa movha, u djika, u tlhela uya teka ndlela leyi faneleke. Hilaha kufanaka, loko u ya u djondza Bibele, ungaha tsumbula leswaku ku ni minkhuva ni swilo swokarhi awuton’wini la wena leswi u faneleke uswi lulamisa. Kutani tinyimiseli ‘kuhundzuka’, kunga kuyendla kucinca loku faneleke leswaku u sungula kuyendla leswinene.

14. Unga tinyiketelisa kuyini ka Xikwembu?

¹⁴ Nchumu xin’wana xa lisima lexi u faneleke uxi yendla na ungese tsakamisiwa, i kutinyiketela ka Yehovha. U tinyiketela ka Yehovha hi kuyendla xikhongelo umu tshembisa kumu gandzela ni kurhangisa kuyendla kurhandza ka yena kutlula hinkwaswu awuton’wini la wena. — Deteronoma 6:15.

15, 16. I yini leswinga pfunaka munhu leswaku a tinyiketela ka Xikwembu?

¹⁵ Kutshembisa kutirhela Yehovha ntsena swi fana ni kutshembisa kuhanya wutomi la wena hinkwalu ni munhu lweyi umu rhandzaka. Pimisa hi wanuna ni wansati lava namoraraka. Loko wanuna a sungula kumu tiva kuyampsa wansati, a sungula kumu rhandza naswona a lava kuchada na yena. Hambileswi kunga xiboho lexikulu, wanuna lweyi a tinyimisela kumu chada hikusa wamu rhandza.

¹⁶ Hilaha kufanaka, loko u ya u djondza hi Yehovha, u ya umu rhandza naswona u yendla leswi ungaswi kotaka leswaku umu tirhela. Lirhandzu lelo litaku susumetela kutinyiketela ka yena hi xikhongelo. Kutani leswaku hi tirhela Yehovha hilaha Yesu a vuleka ha kona hi fanele hi ‘titshika’. (Marka 8:34) Swi vula yini leswo? Swi vula leswaku u fanele u rhangisa kuyingisa Yehovha awuton’wini la wena. I swa lisima kuyendla kurhandza ka Yehovha kutlula kunavela ka wena kumbe leswi u lavaka kuswi yendla awuton’wini. — Lerha 1 Petro 4:2.

17. Hi mhaka muni vanhu van’wana vanga tinyiketeli ka Yehovha?

¹⁷ Vanhu van’wana ava tinyiketeli ka Yehovha hi mhaka va chava leswaku vanga tsandzeka kuhetisisa xitshembiso  xa vona xa kumu tirhela. Avaswi lavi kudanisa Yehovha. Va pimisa leswaku loko vanga tinyiketeli, vangata va ni nandzu ka swiyendlo swa vona.

18. I yini lexingataku pfuna kuhlula kuchava kudanisa Yehovha?

¹⁸ Ndlela leyi umu rhandzaka ha yona Yehovha yitaku pfuna kuhlula kuchava kumu danisa. Uta yendla leswi ungaswi kotaka leswaku u hetisisa xitshembiso xa wena hi mhaka leswi umu rhandzaka. (Eklesiasta 5:4; Vakolosa 1:10) Awungata pimisa leswaku swa karhata kuyendla kurhandza ka Yehovha. Mupostola Yohane a tsale leswi: ‘Hikuva leswi i lirhandzu la Xikwembu, xileswo ahihlayiseni Milawu ya xona, hikuva Milawu ya xona ayitiki.’ — 1 Yohane 5:3.

19. Hi mhaka muni unga fanelanga u chava kutinyiketela ka Yehovha?

¹⁹ Awu fanelanga u va munhu lweyi a hetisekeke leswaku u tinyiketela ka Yehovha. Anga nyimeli leswaku hi yendla leswi tlulaka leswi hingaswi kotaka. (Tipisalema 103:14) Yehovha ataku pfuna leswaku u yendla leswinga swinene. (Esaya 41:10) Tshemba Yehovha hi mbilu ya wena hinkwayu, kutani “yena ata lulamisa tindlela ta wena.” — Swivuriso 3:5, 6.

20. U fanele u yendla yini loko se u tinyiketelile ka Xikwembu?

²⁰ U pimisa leswaku u lunghekile leswaku u tinyiketela ka Yehovha? Ndzhaku ka loko u tinyiketelile, uta va se u lunghekile kunghenela xiyenge xin’wana, kunga kutsakamisiwa.

21, 22. Ungali kombisisa kuyini lipfumelo la wena a “livaleni”?

²¹ Byela muhlanganisi wa ntlawa wa madoda leswaku u tinyiketele ka Yehovha naswona u lava kutsakamisiwa. Ataku lulamisela madoda lawa mangata pfuxeta  tidjondzo ta Bibele na wena. Loko ma vona leswaku u lunghekile, mataku byela leswaku unga tsakamisiwa ka asembleya kumbe kongresu ya Timboni ta Yehovha leyi landzelaka. Ka asembleya yoleyo, kuta va ni nkulumi leyingata hlamusela leswi ntsakamiso wu vulaka swona. Muveki wa nkulumi ya ntsakamiso ata vutisa lava lunghekeleke kutsakamisiwa swivutiso swimbirhi  swovevuka. Loko u hlamula swivutiso leswo phambeni ka vanhu hinkwavu, uta va uli kombisa “livaleni” lipfumelo la wena. — Varhoma 10:10.

²² Ndzhaku ka leswo, uta tsakamisiwa. Miri wa wena hinkwawu wuta nyuvelisiwa ka mati hi kuhelela. Ntsakamiso wuta komba vanhu hinkwavu leswaku u tinyiketele ka Yehovha naswona swoswi se u Mboni ya Yehovha.

23. Swi vula yini kutsakamisiwa ‘hi vito la Tatana, ni la N’wana, ni la moya lowokwetsima’?

²³ Yesu a vule leswaku vadjondzisiwa va yena avata tsakamisiwa ‘hi vito la Tatana, ni la N’wana, ni la moya lowokwetsima’. (Lerha Matewu 28:19.) Kambe swi vula yini swoleswo? Swi vula leswaku wali pfumela wuhosi la Yehovha, ntirho lowu Yesu Kreste awu yendlaka a kuhetisiseni ka makungu ya Xikwembu ni leswaku xi tirhisa moya wokwetsima leswaku xi hetisisa kurhandza ka xona. — Tipisalema 83:18; Matewu 28:18; Vagalatiya 5:22, 23; 2 Petro 1:21.

24, 25. a) Ntsakamiso wu nyimela yini? b) Se hita bula hi yini ka ndzima leyi landzelaka?

²⁴ Ntsakamiso wu nyimela nchumu xa lisima swinene. Loko u nyuvelisiwa ka mati swi fana ni kufa ka mahanyelo ya khale; kutani loko se u humesiwa, u sungula wutomi la nyiwani la kuyendla kurhandza ka Xikwembu. Swi kombisa leswaku kusukela kolanu uta tama u yendla kurhandza ka Yehovha. Khumbuka leswaku awuti nyiketelanga ka munhu, ka nhlengeletanu kumbe ka ntirho wokarhi. U nyiketele wutomi la wena ka Yehovha.

²⁵ Kutinyiketela ka wena kutaku pfuna leswaku u hlakulela wuxaka la le kusuhi ni Xikwembu. (Tipisalema 25:14) Leswi aswi vuli leswaku munhu ata pona hi kutsakamisiwa ntsena. Mupostola Pawulo a tsale leswi: “Tirhelani kuponisiwa ka n’wina hi kuchava ni kurhurhumela”. (Vafilipiya 2:12) Ntsakamiso i masungulu. Kambe unga yendla yini leswaku u tama u li kusuhi na Yehovha? Ndzima ya wugamu ya buku leli yita hlamula xivutiso lexo.