1. Kiki eky’osobora kuba n’oyekaguza hanyuma y’okusoma akatabu kanu?

OYEGERE ebintu bingi eby’amananu kuruga omu Baibuli obw’obaire n’oyegesebwa omu katabu kanu. Ekyokurorraho, twegere ngu Ruhanga aturaganiize obwomeezi obutahwaho, kiki ekihika ha bantu obu bafa, hamu n’okunihira kw’okuhumbuuka. (Omugambizi 9:5; Luka 23:43; Yohana 5:28, 29; Okusuku’rwa 21:3, 4) N’osobora kuba otandikire ira kwija omu nso’rokano z’Abakaiso ba Yahwe kandi okigumize ngu nubo bonka abarukuramya omu mulingo oguhikire. (Yohana 13:35) N’osobora kuba otandikire kwirra haihi na Yahwe kandi  ocwiremu kumuheereza. Hati n’osobora kuba n’oyekaguza, ‘Kiki ekinsemeriire kukora kufooka muheereza wa Ruhanga?’

2. Habwaki omusaija Omunyesiyopya yagondeze kubatizibwa?

² Kinu nikyo omusaija Omunyesiyopiya ayabaireho omu busumi bwa Yesu yayekagwize. Hakaba harabireho akasumi hanyuma ya Yesu okuhumbuuka, omwegeswa we arukumanywa nka Firipo obu yatebiize omusaija onu. Firipo akamusoborra yananuka ngu Yesu nuwe Masiya. Omusaija onu akakwatwaho muno habw’ebintu yayegere nukwo kugamba: “Dora amaizi; kiki ekirukuntanga okubatizibwa?”—Engeso Ezabakwenda 8:26-36.

3. (a) Yesu akaha abegeswa be kiragiro ki? (b) Omuntu asemeriire kubatizibwa mu mulingo ki?

³ Baibuli n’ekyoleka kurungi ngu obworaaba n’ogonza kuheereza Yahwe osemeriire kubatizibwa. Yesu akaragira abegeswa be ngu: ‘Mugende, muhindule amahanga gona abegeswa, nimubabatiza.’ (Matayo 28:19) Yesu obuyabatizibwe, akatuteraho ekyokurorraho eky’okuhondera. Batamuseseho busesaho amaizi ha mutwe baitu bakamwibikira kimu omu maizi. (Matayo 3:16) Omu kasumi kanu, Omukristaayo obwaba n’abatizibwa, weena aibikirwa kimu omu maizi.

4. Obwobatizibwa kiba nikyoleka ki abandi?

⁴ Obwobatizibwa, kyoleka abandi ngu mali n’ogonza kuba munywani wa Ruhanga kandi n’ogonza kumuheereza. (Zabuli 40:7, 8) Nahabwekyo n’osobora kwekaguza, ‘Kiki ekinsemeriire kukora kusobora kubatizibwa?’

5. (a) Kiki eky’osemeriire kubanza kukora otakabatiziibwe? (b) Habwaki kikuru kwija omu nso’rokano z’Abakaiso ba Yahwe?

⁵ Otakabatiziibwe, osemeriire kumanya Yahwe na  Yesu Kristo. Ekiro eki watandikire kwega Baibuli nubwo watandikire kubamanya. (Soma Yohana 17:3.) Baitu okwega Baibuli kwonka tikirukumara. Baibuli egamba ngu “muijule okumanya.” Kinu nikimanyisa ngu tusemeriire kumanya Yahwe ebyagonza. (Abakolosai 1:9) Enso’rokano z’Abakaiso ba Yahwe niziija kukukonyera kuba n’enkoragana enungi na Yahwe. Enu eri emu ha nsonga enkuru habwaki osemeriire kubaho omu nso’rokano butoosa.—Abaheburaniya 10:24, 25.

6. Biki eby’osemeriire kumanya otakabatiziibwe?

⁶ Yahwe tarukugonza obanze kumanya buli kintu ekiri omu Baibuli otakabatiziibwe. Kitetaagise omusaija Omunyesiyopiya kubanza kumanya buli kimu kyona atakabatiziibwe. (Engeso Ezabakwenda 8:30, 31) Okwega ebirukukwata hali Ruhanga nikwija kweyongerayo ebiro n’ebiro. (Omugambizi 3:11) Baitu kusobora kubatizibwa, osemeriire kuba omanyire ebintu eby’okubandirizaaho rundi ebintu ebikuru kandi n’okubiikiririzaamu.—Abaheburaniya 5:12.

7. Okwega Baibuli kukukonyire kuta?

⁷ Baibuli egamba: “[Hataroho] okuikiriza tikisoboka okumusimwa.” (Abaheburaniya 11:6) Nahabwekyo osemeriire kubanza kwikiriza otakabatiziibwe. Baibuli etugambira ngu, kara muno omu rubuga rwa Kolinso, abantu bakahurra abakurasi ba Yesu ebi bakaba nibeegesa “baikiriza, babatizibwa.” (Engeso Ezabakwenda 18:8) Nikyo kimu, kwega Baibuli kikukonyire okwikiriza ngu Ruhanga eby’araganiize nibiija kuhikirra kandi n’okwikiriza ngu ekicunguro ky’omwana we nikisobora kutujuna kuruga omu kibi n’okufa.—Yosuha 23:14; Engeso Ezabakwenda 4:12; 2 Timoseo 3:16, 17.

8. Kiki ekirukwija kukusikiriza kugambira abandi eby’orukwega?

⁸ Obworayeyongera kwega Baibuli kandi okarora omulingo eby’orukwega birukukukonyera omu bwomeezi bwawe, okwikiriza kwawe nikwija kweyongera kuguma. Nikiija kukusikiriza kugonza kubigambiraho abandi eby’orukwega. (Yeremiya 20:9; 2 Abakolinso 4:13) Baitu, nibaha ab’osemeriire kugambiraho?

9, 10. (a) Nibaha ab’orukusobora kugambiraho eby’orukwega? (b) Osemeriire kukora ki obworaaba n’ogonza kufooka mutebezi?

⁹ N’osobora kugambiraho ab’omu maka gaawe, abanywani, abataahi, rundi ab’okora n’abo ha mulimo. Baitu otajumirra bujumirra enyikiriza yaabu kandi otakwatwa ekiniga. Obwire obutali bwahara, n’oija kutandika kutebeza n’ekitebe. Obworahurra n’ogonza, gambiraho omuntu arukukwegesa Baibuli ngu wa kugondeze kutandika kutebeza n’ekitebe. Omwegesa waawe obwararora ngu ohikire, n’aija kugambira abagurusi b’ekitebe. Abagurusi babiri nibaija kukora enteekaniza y’okwikara naiwe hamu nogu arukukwegesa nukwo babe n’ebibakubazaaho.

¹⁰ Biki ebimurukwija kubazaaho obw’oraikarra n’abagurusi? Abagurusi nibaija kubazaaho naiwe barole obworaaba n’oyetegereza ebintu ebikuru eby’osemeriire kumanya, obworaaba n’obiikiririzamu, kandi obworaaba n’obita omu nkora. Ekigendererwa kyabo kiri ky’okurora mali obworaaba n’ogonza kufooka Kaiso wa Yahwe. Ijuka ngu abagurusi nubo barolerra buli muntu weena ali omu kitebe omu by’omwoyo, nahabwekyo otatiina kubaza nabo. (Engeso Ezabakwenda 20:28; 1 Petero 5:2, 3) Hanyuma y’okubazaaho nabo, abagurusi nibaija kukumanyisa obw’oraaba ofookere mutebezi.

11. Habwaki kikuru kukora empinduka otakatandikire kutebeza n’ekitebe?

 ¹¹ Abagurusi obu bararora ngu tokahikire kufooka mutebezi, nibaija kukugambira ngu oine ebintu eby’osemeriire kuhinduramu otakatandikire kutebeza n’ekitebe. Habwaki kikuru kuba n’eby’orukuhinduramu? Habwokuba obutuba nitutebeza, tuba tutumirwe Yahwe. Nahabwekyo, ebituba nitukora biba bisemeriire kuhaisa Ibara lye ekitiinisa.—1 Abakolinso 6:9, 10; Abagaratiya 5:19-21.

12. Habwaki buli muntu asemeriire kwegarukamu?

¹² Haroho ekintu kindi eky’osemeriire kukora otakabatiziibwe. Omukwenda Petero akagamba: ‘Mwegarukemu, muhinduke nukwo ebibi byanyu biragazibwe.’ (Engeso Ezabakwenda 3:19) Kwegarukamu kimanyisa ki? Kimanyisa okweijukya ebibi ebiwakozere n’okubireka. Ekyokurorraho, obworaaba wali musihani, kiba nikimanyisa oine kwegarukamu okaleka ekikorwa eki. Kandi n’obworaaba olengereho omu bwomeezi bwawe bwona okwerinda kukora ebibi, okwegarukamu kuba nikwetaagisibwa habwokuba itwena tusiisa. Nahabwekyo, tusemeriire kusaba Yahwe ekiganyiro.—Abarumi 3:23; 5:12.

13. Ekigambo “muhinduke” nikimanyisa ki?

¹³ Okwegarukamu kwonka nikumara? Nangwa. Petero akakozesa ekigambo “muhinduke.” Kinu nikimanyisa ngu osemeriire kuleka ebikorwa byona ebibi eby’oikaire n’okora nukwo otandike kukora ebintu ebihikire. Ekyokurorraho, kakuba oba n’ogenda omu kiikaro nambere otakagendaga, baitu hanyuma okamanya ngu ohabire, kiki ekiwakukozire? Hataroho kugurukyagurukya  ohinduka n’ogaruka omu omuhanda oguhikire. Naiwe noija kusanga ngu haroho ebikorwa eby’osemeriire kuleka. Ikiriza ‘ohinduke’—rundi, oleka ebikorwa ebibi—nukwo otandike kukora ebihikire.

14. Omuntu ayehayo ata hali Yahwe?

¹⁴ Idaara erindi erirukwetagisibwa otakabatiziibwe nukwo kwehayo hali Yahwe. Obwoyehayo hali Yahwe omuraganiza omu kusaba kwawe ngu nuwe wenka ow’orukwija kuheereza kandi ngu noija kwebembeza eby’agonza.—Ekyebiragiro 6:15.

15, 16. Kiki ekisikiriza omuntu kwehayo hali Yahwe?

¹⁵ Kuraganiza Yahwe ngu n’ogenda kumuheereza nikiingana n’okuraganiza omuntu ow’orukugonza ngu n’ogenda kwikara nauwe obwomeezi bwawe bwona. Teekereza ha musaija ajumbiire omukazi ow’arukugonza kuswera. Omusaija obwarora ngu omukazi aine engeso nungi, ayeyongera kumugonza kandi ayehayo kumuswera. N’obukiraaba ngu enu eba ncwamu y’amaani, okugonza kuletera omusaija kwehayo kurora ngu yamuswera.

¹⁶ Obworayeyongera kwega hali Yahwe, noija kweyongera kumugonza kandi n’oija kuhurra n’ogonza kukora kyona ekirukusoboka kumuheereza. Kinu nikiija kukusikiriza kumuraganiza omu kusaba ngu n’oija kumuheereza. Baibuli egamba ngu omuntu weena arukugonza kukuratira Yesu “ayeyangise wenka.” (Marako 8:34) Kweyangisa nikimanyisa ki? Nikimanyisa ngu okworobera Yahwe kibe kintu kikuru muno ekirukukira n’obwomeezi bwawe. Yahwe eby’agonza obitwale kuba bikuru muno kukira ebigendererwa byawe habwawe, kandi bikire n’ebintu eby’ogonza.—Soma 1 Petero 4:2.

17. Habwaki abantu bamu batiina kwehayo hali Yahwe?

¹⁷ Abantu bamu batiina kwehayo hali Yahwe habwokuba bateekereza ngu nibasobora kukora ekibi bakamubiihiza. Nibasobora kuteekereza ngu kakuba baikara bateehaireyo tasobora kubajunaana habw’ebikorwa byabu.

18. Kiki ekirukwija kukukonyera kulekeraaho kutiina kubihiza Yahwe?

¹⁸ Obworaaba n’ogonza Yahwe, nikiija kukwihamu okutiina kwona okw’okumubihiza. Habw’okumugonza, noija kukora kyona ekirukusoboka kulinda omurago gwawe ogw’okumuheereza. (Omugambizi 5:4; Abakolosai 1:10) Torukwija kutekereza ngu kigumire kukora Ruhanga eby’agonza. Omukwenda Yohana akahandiika n’agamba: “Baitu kunu nukwo kugonza Ruhanga, itwe tukwate ebiragiro bye, kandi ebiragiro bye tibirukulemera.”—1 Yohana 5:3.

19. Habwaki otasemeriire kutiina kwehayo hali Yahwe?

¹⁹ Tikirukwetagisa kuba ohikiriire kurora wayehayo hali Yahwe. Tatusaaba tukole ebintu eby’amanyire ngu titurukusobora. (Zabuli 103:14) N’aija kukukonyera kukora ekihikire. (Isaya 41:10) Wesige Mukama n’omutiima gwawe gwona, kandi “aliterekereza emihanda yawe.”—Enfumo 3:5, 6.

20. Hanyuma y’okwehayo hali Yahwe, idaara ki erindi ery’osemeriire kugendaho?

²⁰ Notekereza ngu mali ohikire kwehayo hali Yahwe? Hanyuma y’okwehayo hali Yahwe, n’oyetaagisa kugenda ha idaara erindi. Noyetaagisa kubatizibwa.

21, 22. N’osobora kwatura ota okwikiriza kwawe?

²¹ Gambira omuteraniza w’abagurusi b’ekitebe  kyanyu nk’oku omazire ira kwehayo hali Yahwe kandi hati ngu n’ogonza kubatizibwa. N’aija kugambira abagurusi abandi nukwo murabemu ebiwayegere. Obu bararora ngu ohikire kubatizibwa, nibaija kukugambira ngu n’oija kubatizibwa ha ruso’rokano orukooto orurahonderaho. Ha ruso’rokano runu nihaija kubaho orubazo orukusoborra amakuru g’okubatizibwa. Ow’Oruganda  ow’araaba naha orubazo n’aija kusaba abarukugenda kubatizibwa bemerre nukwo bagarukemu ebikaguzo bibiri ebyorobere. Obworagarukamu ebikaguzo ebi, noija kuba ‘noyatura’ kwoleka okwikiriza kwawe.—Abarumi 10:10.

²² Hanyuma n’oija kubatizibwa. Nibaija kukwibikira kimu omu maizi. Okubatizibwa kwawe nikwija kwoleka boona abaroho ngu oyehaireyo kuheereza Yahwe kandi ngu ofookere Kaiso wa Yahwe.

23. Kubatizibwa ‘omu Ibara lya Isitwe n’Omwana n’omwoyo ogurukwera kimanyisa ki?

²³ Yesu akagamba ngu abegeswa be bakaba baine kubatizibwa ‘omu Ibara lya Isitwe n’Omwana n’omwoyo ogurukwera.’ (Soma Matayo 28:19.) Kinu nikimanyisa ki? Nikimanyisa ngu oikirize obusobozi obwa Yahwe aine, obujunanizibwa Yesu obwaine omu kuhikiriza ekigendererwa kya Ruhanga, kandi ngu Ruhanga akozesa omwoyo gwe ogurukwera kuhikiriza ebigendererwa bye.—Zabuli 83:18; Matayo 28:18; Abagaratiya 5:22, 23; 2 Petero 1:21.

24, 25. (a) Okubatizibwa kwine makuru ki? (b) Kiki ekiturabazaaho omu suura erukumalirrayo?

²⁴ Okubatizibwa kwine amakuru g’amaani. Obw’oibikwa omu maizi, kiba nikimanyisa ngu ofiire ha bibi rundi olekiire kimu engeso zaawe ezikaba zitasemiire. Obworugamu omu maizi, otandika obwomeezi buhyaka obw’okugendera ha bintu Ruhanga eby’agonza. Kiba nikimanyisa ngu noija kuheereza Yahwe obwomeezi bwawe bwona. Oijuke ngu toyehaireyo hali omuntu, ekitebe, rundi omulimo. Ohaire obwomeezi bwawe hali Yahwe.

²⁵ Okwehayo kwawe nikwija kukukonyera kutunga enkoragana enungi na Yahwe. (Zabuli 25:14) Kinu tikirukumanyisa ngu omuntu obwaba abatiziibwe naragirwa okujunwa. Omukwenda Paulo akahandiika nagamba ati: “Muhikirizege [mukolerre] okujunwa kwanyu, inywenka omu kutina nokutukimira.” (Abafiripi 2:12) Obwobatizibwa oba otandikire butandika. Baitu n’osobora ota kulinda enkoragana yaawe na Yahwe eri nungi? Esuura y’okumaliira ey’akatabu kanu n’eija kugarukamu ekikaguzo kinu.