1. Кыӵе тӥляд юанды кылдыны быгатоз?

ТА КНИГАЕЗ дышетыса, тӥ тодӥды ини троссэ, малы дышетэ Библия. Кылсярысь, тӥ тодӥды, мар луэ адямиен кулэм бераз, улӟыса султон сярысь но пырак улон сярысь (Екклесиаст 9:5; Иоанн 5:28, 29; Усьтӥськон 21:3, 4). Тӥ Иеговалэн Адӟись-Ивортӥсьёсызлэн пумиськонъёсазы но ветлыны кутскиды ини, дыр, но валады,  соос Инмарлы шонер йыбыртъяло шуыса (Иоанн 13:35). Тӥляд Иеговаен кусыпъёсты но юнманы кутскизы ини, дыр, озьы ик мылкыдды ӝутскиз солы ужаны-тыршыны. Соку тӥляд юанды кылдэ, луоз: «Мар кароно мыным табере?»

2. Малы одӥг эфиоп пиосмуртлэн пылатӥськемез потӥз?

² Сыӵе ик юанэз кылдӥз одӥг эфиоп пиосмуртлэн но, кудӥз улӥз Иисус Христос улон вакытэ. Со вераз: «Тани, ву. Мар мыным люкетэ пылатӥськыны?» (Апостолъёслэн ужъёссы 8:26—36). Малы солэн пылатӥськемез потӥз? Куке Филипп, Иисус Христослэн одӥгез дышетскисез, валэктӥз солы, Иисус Мессия вал шуыса, со солэн сюлмаз ик пыриз но солэн пылатӥськемез потӥз.

3. а) Мар карыны косӥз Иисус аслэсьтыз дышетскисьёссэ? б) Мар карыны кулэ адямилы пылатӥськон дыръя?

³ Библия валамон вера, адямилэн Иеговалы ужамез-тыршемез потэ ке, солы пылатӥськыны кулэ шуыса. Иисус Христос косӥз аслэсьтыз дышетскисьёссэ: «Вань калыкъёсты дышетэлэ; соосты... пылатэ» (Матфей 28:19). Ачиз Иисус но пылатӥськиз, озьы милемлы пример возьматӥз. Но вераны кулэ, пылатӥськыкуз сое быдэсак вуэ зымытӥзы, солэсь йырзэ вуэн пазяса гинэ ӧз коттэ (Матфей 3:16). Озьы ик туннэ но, пылатӥськыкузы христианъёслы быдэсак вуэ зымыны кулэ.

4. Мае возьматэ адямилэн пылатӥськемез?

 ⁴ Пылатӥськыса адями возьматэ, солэн Инмарлэн эшез луэмез но солы ужамез-тыршемез потэ шуыса (Псалтирь 39:8, 9). Мар кароно пылатӥськемлэсь азьло?

5. а) Тӥляд пылатӥськемды потэ ке, мар тӥледлы нырысь ик кароно? б) Малы туж кулэ Иеговалэн Адӟись-Ивортӥсьёсызлэн пумиськонъёсазы ветлыны?

⁵ Пылатӥськемлэсь азьло Иегова но Иисус Христос сярысь тодон-валан басьтыны кулэ. Библиез дышетыны кутскыса, тӥ сыӵе тодон-валан басьтӥськоды ини. (Лыдӟе Иоаннлэсь 17:3.) Но со нырысетӥез гинэ вамыш. Библиын верамын, милемлы Инмар сярысь тросгес тодыны тыршоно шуыса (Колоссыослы 2:2). Та удысын тӥледлы юрттозы Иеговалэн Адӟись-Ивортӥсьёсызлэн пумиськонъёссы. Со пумиськонъёсы ялан ветлыса, тӥ быгатоды Инмарен матысь кусыпъёс тупатыны (Еврейёслы 10:24, 25).

6. Макем умой тодоно Библиез пылатӥськемлэсь азьло?

⁶ Иегова уг возьма, пылатӥськемдылэсь азьло ик ини тӥ Библиез пыр-поч тододы шуыса. Со сое ӧз возьма эфиоп пиосмуртлэсь но, кудӥзлэн пылатӥськемез потӥз (Апостолъёслэн ужъёссы 8:30, 31). Ми пырак дауръёс ӵоже Инмар сярысь тодон-валан басьтомы (Екклесиаст 3:11). Пылатӥськон понна тӥледлы тодоно Библиысь валтӥсь дышетонъёсты но соосын соглаш луоно (Еврейёслы 5:12).

7. Мар карыны юрттӥз тӥледлы Библиез дышетон?

 ⁷ Библиын гожтэмын: «Осконтэк Инмарлы ярамон луыны уг луы» (Еврейёслы 11:6). Соин пылатӥськемезлэсь азьло ик адямилы осконзэ будэтоно. Библиын верамын, вашкала Коринф карын куд-ог улӥсьёс Иисуслэн дышетскисьёсызлэсь верамзэс кылӥзы но «оскыны кутскизы, пылатӥськизы» шуыса (Апостолъёслэн ужъёссы 18:8). Озьы ик тӥляд учырады но: Библиез дышетон юрттӥз тӥледлы Инмарлэн кыл сётонъёсызлы оскыны. Со сяна, со юрттӥз тӥледлы тодыны, Иисуслэн дун тыремез адямиосты сьӧлыклэсь но кулонлэсь мозмытыны быгатэ шуыса, но соин соглаш луыны (Иисус Навин 23:14; Апостолъёслэн ужъёссы 4:11б, 12; 2 Тимофейлы 3:16, 17).

8. Мар тӥлесьтыд мылкыддэс ӝутоз тодэмдэс мукетъёсызлы но вераны?

⁸ Библиысь выль тодон-валанъёс басьтыса но адӟыса, кызьы соос тӥледлы юртто, тӥляд осконды юнгес но юнгес луоз. Тӥляд мылкыдды ӝутскоз, дыр, тодэмдэс мукетъёсызлы но вераны (Иеремия 20:9; 2 Коринфъёслы 4:13).

9, 10. а) Кинлы тӥ тодэмдэс вераны быгатоды? б) Мар кароно, кенешен ӵош тодытыны кутскон понна?

⁹ Тодэмды сярысь тӥляд семьядылы, эшъёстылы, бускельёстылы яке ӵош ужасьёстылы верамды потоз, дыр. Тырше вераны соослы лякытэн,  гажаса но яратыса. Дыр ортчыса тӥ кенешен ӵош тодытыны быгатоды. Куке тӥляд сыӵе мылкыдды кылдоз, вералэ со сярысь солы, кин тӥледын Библиез дышетэ. Со малпа ке, тӥ дась ини шуыса, но тӥ улӥськоды ке ини Библиысь возетъёсъя, соку тӥ соин ӵош кенешысь кык тӧроосын пумиськоды.

¹⁰ Тӧроос вераськозы тӥледын но учкозы, валаськоды-а тӥ Библиысь валтӥсь дышетонъёсты, оскиськоды-а тӥ соослы, улӥськоды-а тӥ соосъя но зэмзэ ик-а тӥляд Иеговалэн Адӟись-Ивортӥсез луэмды потэ. Кулэ ӧвӧл кышканы тӧроосын пумиськонлэсь, малы ке шуоно тӧроос яратыса сюлмасько кенешысь котькудӥз сярысь (Апостолъёслэн ужъёссы 20:28; 1 Пётр 5:2, 3). Тӥледын вераськемзы бере тӧроос вералозы, быгатӥськоды-а тӥ кутскыны кенешен ӵош тодытыны.

11. Малы кенешен ӵош тодытыны кутскемлэсь азьло улонамы куд-ог воштӥськонъёс лэсьтыны кулэ?

¹¹ Тӧроос вераны быгатозы, тодытыны кутскемлэсь азьло тӥледлы улонады мае ке воштыны кулэ шуыса. Малы сыӵе воштӥськонъёс лэсьтыны кулэ? Малы ке шуоно, куке ми адямиослы Инмар сярысь вераськомы, ми шоры Инмарлэн адямиосыз шоры кадь учко, соин ик милемлы асьмеды гажамон возёно, Инмарлэн ужась-тыршисьёсыз кадь (1 Коринфъёслы 6:9, 10; Галатъёслы 5:19—21).

12. Малы ӧпкельыны кулэ вань адямиослы?

¹² Пылатӥськемлэсь азьло эшшо одӥг кулэ луись вамыш лэсьтоно на. Апостол Пётр вераз: «Тӥляд сьӧлыкъёсты мед ӵушиськозы шуыса, ӧпкельыса сьӧлыкъёстылэсь куштӥське но Кузё-Инмар пала берытске» (Апостолъёслэн ужъёссы 3:19). Мар со сыӵе ӧпкелён? Адями ӧпкеле, куке вань сюлмысьтыз жаля, азьвыл шонертэм ужъёс лэсьтӥз шуыса. Кылсярысь, ӧпкельыны кулэ, тӥ азьвыл азыса-калгыса улӥды ке. Ӧпкельыны кулэ соослы но, кинъёс котьку шонер ужъёс гинэ лэсьтыны тыршизы, малы ке шуоно вань адямиос сьӧлыкоесь но вань адямиослы куроно, Инмар соослэсь сьӧлыкъёссэс мед куштоз шуыса (Римъёслы 3:23; 5:12).

13. Мае возьмато «Инмар пала берытскыны» кылъёс?

¹³ Тырмыт луоз-а, адями огшоры гинэ жаляз ке, шонертэм ужъёс лэсьтыса улӥз шуыса? Уз. Апостол Пётр вераз, Инмар пала берытскыны кулэ на шуыса. Мукет кылъёсын вераса, шонертэм улонлэсь куштӥськоно но выль сямен улыны кутсконо. Кылсярысь, пуктэ син азяды: тӥ нырысетӥзэ кыӵе ке каре мыныны потӥды. Одӥг вакытэ, тӥ валаны кутскиськоды, шонертэм мынӥськоды шуыса. Мар тӥ кароды? Веранэз ӧвӧл, тӥ калленгес мыныны кутскоды но дугдоды. Собере берытскоды но мыноды отчы, кытчы кулэ. Со выллем ик, Библиез дышетыса, тӥ шӧдоды, оло, улонады мае ке воштоно  шуыса. Дась луоды-а тӥ воштӥськыны, яке «берытскыны», но кутскыны шонер улыны?

14. Мар кароно, Инмарлы сӥзиськон понна?

¹⁴ Эшшо одӥгез кулэ луись вамыш, кудзэ пылатӥськемлэсь азьло лэсьтоно,— со Иеговалы сӥзиськон. Сӥзиськон — со нимысьтыз вӧсяськон, кудаз ми Иеговалы кылмес сётӥськомы, солы гинэ йыбыртъяломы шуыса но солэсь эриксэ быдэсъян милям улонамы валтӥсез луоз шуыса (Кыкетӥ Закон 6:14, 15).

15, 16. Мар адямилэсь мылкыдзэ ӝутыны быгатоз аслэсьтыз улонзэ Инмарлы сӥзьыны?

¹⁵ Иеговалы гинэ ужаломы-тыршомы шуыса кыл сётонэз ӵошатыны луоз быдэс улонэз одӥг адямиен улыны кыл сётонэн. Эскеромы сое одӥг пример вылын. Егит пи нылмуртэн пумиськылыны кутске. Дыр ортчемъя пи нылэз умойгес но умойгес тодэ, со сое яратэ но сое кышно басьтэмез потэ. Егит пи вала ке но, кышнояськон шудон уж ӧвӧл шуыса, со дась сыӵе вамыш лэсьтыны, малы ке шуоно со нылэз яратэ.

¹⁶ Иеговаез умойгес но умойгес тодыса, тӥ валалоды: тӥ сое яратӥськоды но тӥляд солы вань сюлмысьтыды ужамды-тыршемды потэ. Тӥляд вӧсяськыса Инмарлы кылдэс сётэмды потоз, тӥ солы ужалоды-тыршоды шуыса. Библиын верамын, котькудӥзлы, кинлэн Иисуслэн  дышетскисез луэмез потэ, аслэсьтыз куштӥськыны кулэ шуыса (Марк 8:34). Мае со возьматэ? Со возьматэ, котьку Инмарлэсь кылзӥськыны кулэ шуыса, малы ке шуоно солэн эрикез, асьмелэн мылпотонъёсмы но ужпумъёсмы сярысь, кулэгес. (Лыдӟе 1 Пётрлэсь 4:2.)

17. Малы куд-ог адямиос улонзэс Иеговалы уг сӥзё?

¹⁷ Кин ке но, оло, аслэсьтыз улонзэ Иеговалы уг сӥзьы, малы ке шуоно кышка, Инмарлы ужаны-тыршыны сётэм кылзэ быдэстыны уз быгаты шуыса. Сыӵе адямилэн Иеговаез ӝоже уськытэмез уг поты. Нош кин ке но малпа, улонзэ Инмарлы ӧз сӥзьы ке, лэсьтэм ужъёсыз понна кыл кутоно уз луы шуыса.

18. Мар юрттоз тӥледлы кышкандэс вормыны, тӥ маин ке но Иеговаез ӝоже уськытоды шуыса?

¹⁸ Иеговаез яратон юрттоз тӥледлы кышкандэс вормыны, тӥ маин ке но Иеговаез ӝоже уськытоды шуыса. Тӥ Иеговаез яратӥськоды ке, кароды ваньзэ, мае быгатӥськоды, сётэм кылдэс быдэстон понна (Екклесиаст 5:3; Колоссыослы 1:10). Тӥ уд малпалэ, Инмарлэсь эриксэ быдэсъяны туж секыт шуыса. Апостол Иоанн гожтӥз: «Инмарлэсь курон-косонъёссэ быдэсъяса улонмы возьматэ Инмарез яратэммес. Солэн курон-косонъёсыз секытэсь ӧвӧл» (1 Иоанн 5:3).

19. Малы кулэ ӧвӧл кышканы аслэсьтыд улондэ Иеговалы сӥзьыны?

¹⁹ Иегова уг возьма, соос, кинъёс асьсэлэсь  улонзэс солы сӥзьыны малпазы, ноку но уз янгышалэ шуыса. Со ноку но уг куры карыны сое, мае ми ум быгатӥське (Псалтирь 102:14). Со кылзэ сётэ юрттыны милемлы шонер ужъёс лэсьтыны (Исаия 41:10). Библия ӧте милемыз: «Вань сюлмыныд Кузё-Инмарлы оскиськы... ...Со тынэсьтыд сюресъёстэ шонертоз» (Мадёнъёс 3:5, 6).

20. Мар кароно улондэс Иеговалы сӥземды бере?

²⁰ Тӥ улондэс Иеговалы сӥзиды ке ини, озьыен, тӥ дась мукет вамыш лэсьтыны — пылатӥськыны.

21, 22. Кызьы тӥ ваньмыз азьын возьматыны быгатӥськоды, Инмарлы ужамды-тыршемды потэ шуыса?

²¹ Вералэ асьтэ кенешысь тӧроослэн кенешсылэсь ужзэ радъясь тӧролы, тӥ улондэс Иеговалы сӥзиды но тӥляд пылатӥськемды потэ шуыса. Со куроз куд-ог тӧроосты тӥледын ӵош Библиысь валтӥсь дышетонъёсты эскерыны. Тӧроос адӟизы ке, тӥ дась шуыса, ӵектозы тӥледлы пылатӥськыны Иеговалэн Адӟись-Ивортӥсьёсызлэн одӥгаз матысь конгрессазы. Конгрессын верамын луоз речь, кудаз валэктэмын луоз, мае возьматэ пылатӥськон. Собере речь верась агай пылатӥськыны мылкыд карисьёсты кык огшоры юанъёслы ответ сётыны куроз. Со юанъёсын соглаш кариськыса, тӥ ваньмыз азьын возьматӥськоды, тӥляд  Инмарлы ужамды-тыршемды потэ шуыса (Римъёслы 10:10).

²² Собере тӥ дась луоды пылатӥськыны. Тӥледыз быдэсак вуэ зымытозы. Пылатӥськыса тӥ возьматоды, улондэс Иегова Инмарлы сӥзиды но Иеговалэн Адӟись-Ивортӥсез луиды шуыса.

23. Мае возьматэ «Атайлэн, Пилэн, Святой Духлэн нимыз понна» пылатӥськон?

²³ Иисус вераз, солэн дышетскисьёсыз «Атайлэн, Пилэн, Святой Духлэн нимыз понна» пылатӥськыны  кулэ шуыса. (Лыдӟе Матфейлэсь 28:19.) Мае со возьматэ? Со возьматэ, ми тодӥськомы но соглаш луиськомы шуыса соин, кыӵе инты басьтэ Иегова, валаськомы, кыӵе инты басьтэ Иисус Христос Инмарлэн малпаназ, но валаськомы, аслэсьтыз эриксэ быдэстон понна, Иегова святой духез уже кутэ шуыса (Псалтирь 82:19; Матфей 28:18; 2 Пётр 1:21; Галатъёслы 5:22, 23).

24, 25. а) Мае возьматэ пылатӥськон? б) Мар сярысь вераськон мыноз книгалэн берпуметӥ люкетаз?

²⁴ Пылатӥськон туж кулэ мае ке возьматэ. Куке адямиез вуэ зымыто, со возьматэ, адями кулэ но азьвыл улонэзлэсь куштӥське шуыса. Нош куке адями вуысь потэ, со возьматэ, Инмарлэн ужась-тыршисез луыса со выль сямен улыны кутске шуыса. Тодады возе: тӥ кыӵе ке адямилы, организацилы яке ужлы асьтэлэсь улондэс уд сӥзиське, тӥ сое Иеговалы сӥзиськоды.

²⁵ Веранэз ӧвӧл, сӥзиськон но пылатӥськон тӥлесьтыд Иеговаен кусыпъёстэс юнматозы (Псалтирь 24:14). Но со уг возьматы, адями пылатӥськеменыз гинэ утиськоз шуыса. Апостол Павел вераз: «Асьтэлэн утиськонды понна кышкаса, куалекъяса тырше» (Филиппыослы 2:12). Тодады возе, пылатӥськон — со утиськон пала нырысетӥез гинэ вамыш шуыса. Мар кароно, Иеговаен кусыпъёсмы ноку но медаз сӧриське шуыса? Та юанлы валэктон сётэмын луоз книгалэн берпуметӥ люкетаз.