1. Nga murahu ha u guda yeneyi bugu ni nga ḓivhudzisa mini?

MUSI ni tshi vhala yeneyi bugu, no guda ngoho i re Bivhilini. No guda uri Mudzimu o fhulufhedzisa vhutshilo vhu sa fheli, uri vho faho a vha ḓivhi tshithu na uri vha ḓo vuswa. (Muhuweleli 9:5; Luka 23:43; Yohane 5:28, 29; Nzumbululo 21:3, 4) Khamusi no no thoma u ya tshivhidzoni tsha Ṱhanzi Dza Yehova nahone ni tenda uri vhurabeli havho ndi ha ngoho. (Yohane 13:35) Khamusi no no thoma u vha na vhushaka ha tsini na Yehova. Ni nga  vha no ita na phetho ya uri ni ṱoḓa u mu shumela. Nga zwenezwo, ni nga ḓivhudzisa uri, ‘Zwino ndi fanela u ita mini uri ndi shumele Mudzimu?’

2. Ndi ngani munna wa Muetopia o ṱoḓa u lovhedzwa?

² Zwenezwo ndi zwe muṅwe munna wa Muetopia we a tshila tshifhingani tsha Yesu a humbula nga hazwo. Nga murahu ha tshifhinga musi Yesu o no vuswa, Filipo mufunziwa wa Yesu o huwelela kha onoyo munna. Filipo o sumbedza onoyo munna uri Yesu o vha e Messia. Onoyo munna wa Muetopia o kwamiwa nga zwe a zwi guda lwe a mbo ḓi ri: “Kheḽi tivha ḽa maḓi; ndi ngani ndi sa lovhedzwi?”​—Mishumo 8:26-36.

3. (a) Yesu o ṋea vhatevheli vhawe ndaela ifhio? (b) Muthu u fanela u lovhedzwa hani?

³ Bivhili i funza uri arali ni tshi ṱoḓa u shumela Yehova, ni fanela u lovhedzwa. Yesu o vhudza vhatevheli vhawe a ri: “Ni ite vhathu vha tshaka dzoṱhe vhafunziwa, ni vha lovhedze.” (Mateo 28:19) Yesu na ene o vhea tsumbo nga u lovhedzwa. Ho ngo sokou shashiwa maḓi kha ṱhoho, o tou mbwandamedzwa tshoṱhe maḓini. (Mateo 3:16) Na ṋamusi, musi Mukriste a tshi lovhedzwa, muvhili woṱhe u fanela u mbwandamedzwa maḓini.

4. U lovhedzwa haṋu zwi sumbedza vhaṅwe vhathu mini?

⁴ Musi ni tshi lovhedzwa, zwi sumbedza vhaṅwe vhathu uri ni khou ṱoḓa u vha khonani ya Mudzimu na uri ni ṱoḓa u mu shumela. (Phisalema 40:7, 8) Nga zwenezwo ni nga ḓivhudzisa uri, ‘Ndi fanela u ita mini uri ndi lovhedzwe?’

5. (a) Ni fanela u ita mini ni sa athu u lovhedzwa? (b) Ndi ngani u ya tshivhidzoni tsha Ṱhanzi Dza Yehova zwi zwa ndeme?

⁵ Musi ni sa athu lovhedzwa, ni fanela u ḓivha Yehova  na Yesu. No no ḓi thoma u zwi ita nga u guda Bivhili. (Vhalani Yohane 17:3.) Fhedzi zwenezwo a zwo ngo eḓana. Bivhili i ri ni fanela u ‘ḓadzwa nga nḓivho yo teaho’ ya zwine Yehova a zwi funa. (Vhakolosa 1:9) Miṱangano ya Ṱhanzi dza Yehova i ḓo ni thusa uri ni vhe na vhushaka ha tsini-tsini na Yehova. Tshenetsho ndi tshiṅwe tshiitisi tsha ndeme tsha uri ni ye tshivhidzoni tsha Ṱhanzi Dza Yehova tshifhinga tshoṱhe.​—Vhahevheru 10:24, 25.

6. Ni fanela u vha na nḓivho nngafhani nga ha Bivhili ni sa athu u lovhedzwa?

⁶ Yehova ha lavheleli uri ni ḓivhe tshiṅwe na tshiṅwe tshi re Bivhilini ni sa athu u lovhedzwa. Ho ngo lavhelela uri munna wa Muetopia a ḓivhe zwithu zwoṱhe a sa athu u lovhedzwa. (Mishumo 8:30, 31) Ri ḓo bvela phanḓa ri tshi guda nga ha Yehova vhutshilo hashu hoṱhe. (Muhuweleli 3:11) Uri ni lovhedzwe, ni fanela u ḓivha na u tenda pfunzo dza ndeme dzi re Bivhilini dzine dza thusa uri ni vhe na vhushaka na Yehova.​—Vhahevheru 5:12.

7. U guda haṋu Bivhili zwo ni thusa hani?

⁷ Bivhili i ri: “U nga si kone u takadza Mudzimu arali u si na lutendo.” (Vhahevheru 11:6) Nga zwenezwo, ni fanela u vha na lutendo ni sa athu u lovhedzwa. Bivhili i ri vhaṅwe vhathu muḓini wa kale wa Korinta, vho pfa zwe vhatevheli vha Yesu vha zwi funza nahone zwenezwo zwa ita uri vha ‘tende vha lovhedzwe.’ (Mishumo 18:8) Nga hu fanaho, u guda haṋu Bivhili ho ni thusa uri ni vhe na lutendo kha zwe Mudzimu a zwi fhulufhedzisa na kha maanḓa a tshiṱhavhelo tsha Yesu, tshine tsha nga ri tshidza kha tshivhi na lufu.​—Yoshua 23:14; Mishumo 4:12; 2 Timotheo 3:16, 17.

8. Ndi mini zwine zwa ḓo ni ṱuṱuwedza u vhudza vhaṅwe zwe na zwi guda?

⁸ Musi ni tshi guda zwo engedzeaho Bivhilini na u vhona nḓila ine zwa ni thusa ngayo vhutshiloni haṋu, lutendo lwaṋu lu ḓo khwaṱha. Ni ḓo ṱoḓa u vhudza vhaṅwe zwine na khou zwi guda. (Yeremia 20:9; 2 Vhakorinta 4:13) Fhedzi ndi vhafhio vhane na fanela u vha vhudza?

9, 10. (a) Ni nga thoma nga u vhudza vhonnyi zwe na zwi guda? (b) Ni fanela u ita mini arali ni tshi ṱoḓa u huwelela na tshivhidzo?

⁹ Ni nga ṱoḓa u vhudza vha muṱa wahaṋu zwine na khou zwi guda, dzikhonani, vhahura kana vhane na shuma navho. Zwenezwo ndi zwavhuḓi, fhedzi ni tshi zwi ita ni sumbedze vhuthu na lufuno tshifhinga tshoṱhe. Mafheleloni, ni ḓo kona u thoma u huwelela na tshivhidzo. Musi ni tshi ḓipfa uri no lugela u ita nga u ralo, ni nga amba na Ṱhanzi ine ya khou ni gudisa Bivhili nahone ni mu vhudze uri ni nga takalela u shela mulenzhe kha mushumo wa u huwelela na tshivhidzo. Arali yeneyo Ṱhanzi i tshi vhona uri no lugela nahone ni khou tshila u tendelana na zwine Bivhili ya funza, vhahulwane vhavhili vha tshivhidzoni vha ḓo dzudzanya u haseledza na vhuvhili ha vhoiwe.

¹⁰ Hu ḓo itea mini kha wonoyo muṱangano? Vhahulwane vha ḓo amba na inwi u itela u vhona uri ni a pfesesa na u tenda pfunzo dza ndeme dzi re Bivhilini. Vha sedza na uri ni a tevhedza zwine Bivhili ya amba vhutshiloni haṋu ha ḓuvha ḽiṅwe na uri ni ṱoḓa u vha muṅwe wa Ṱhanzi dza Yehova zwa vhukuma. Ni songo hangwa uri vhahulwane vha ṱhogomela miraḓo yoṱhe ya tshivhidzo u katela na inwi, nga zwenezwo ni songo  ofha u amba navho. (Mishumo 20:28; 1 Petro 5:2, 3) Nga murahu ha wonoyo muṱangano, vhahulwane vha ḓo ni vhudza arali ni tshi nga thoma u huwelela na tshivhidzo.

11. Ndi ngani zwi zwa ndeme u ita tshanduko ni sa athu u huwelela na tshivhidzo?

¹¹ Vhahulwane vha nga kha ḓi ni vhudza uri ni fanela u ita tshanduko dzo engedzeaho musi ni sa athu u thoma u huwelela na tshivhidzo. Ndi ngani zwi zwa ndeme u ita dzenedzo tshanduko? Ndi ngauri musi ri tshi amba na vhaṅwe nga ha Yehova Mudzimu, ri vha ri tshi khou mu imela nahone ri fanela u tshila nga nḓila ine ya mu hulisa.​—1 Vhakorinta 6:9, 10; Vhagalata 5:19-21.

12. Ndi ngani vhathu vhoṱhe vha tshi fanela u rembuluwa?

¹² Hu na zwiṅwe zwithu zwine na fanela u zwi ita ni sa athu u lovhedzwa. Muapostola Petro o amba uri ri fanela u rembuluwa na u shandula matshilele ashu uri ri hangwelwe zwivhi. (Mishumo 3:19) U rembuluwa zwi amba mini? Zwi amba u ḓisola zwi tshi bva mbiluni kha zwithu zwo khakheaho zwe ra zwi ita. Sa tsumbo, arali no vha ni tshi ḓifara luvhi nga zwa vhudzekani, ni fanela u rembuluwa. Naho arali vhutshiloni haṋu hoṱhe no lingedza u ita zwo lugaho, ni kha ḓi fanela u rembuluwa, ngauri roṱhe ri a khakha nahone ri fanela u humbela pfarelo kha Mudzimu.​—Vharoma 3:23; 5:12.

13. Zwi amba mini u shandula matshilele aṋu?

¹³ Naa zwo eḓana u sokou ḓisola kha zwe na zwi ita? Hai. Petro o amba uri ri fanela u dovha ra shandula matshilele ashu. Zwi amba uri ni fanela u iledza zwithu zwoṱhe zwo khakheaho zwa tshifhingani tsho fhiraho nahone ni ite zwo lugaho. Sa tsumbo, kha ri ri ni khou reila goloi ni khou ya huṅwe fhethu lwa u tou thoma.  Nga murahu ha tshifhinga, na wana uri no fara nḓila i si yone. Ni ḓo ita mini? A zwi vhudziswi uri ni ḓo fhungudza luvhilo, na ima, na rembuluwa na fara nḓila yo teaho. Nga hu fanaho, musi ni tshi guda Bivhili, ni nga wana uri hu na dziṅwe nḓowelo kana zwithu vhutshiloni haṋu zwine na fanela u zwi shandula. Ḓiimiseleni u shandula matshilele aṋu, zwine zwa amba u ita tshanduko dzo teaho na u ita zwo lugaho.

14. Ni ḓiṋekedza hani kha Mudzimu?

¹⁴ Zwiṅwe zwa ndeme zwine na fanela u zwi ita ni sa athu u lovhedzwa, ndi u ḓiṋekedza kha Yehova. Ni ḓiṋekedza kha Yehova, nga u rabela inwi muṋe na mu fhulufhedzisa u gwadamela ene fhedzi na u ita uri zwine a zwi funa zwi vhe zwa ndeme vhutshiloni haṋu.​—Dotoronomio 6:15.

15, 16. Ndi mini zwine zwa ita uri muthu a ḓiṋekedze kha Mudzimu?

¹⁵ U fhulufhedzisa u shumela Yehova fhedzi zwi fana na u fhulufhedzisa muthu ane na mu funa uri ni ḓo fhedza vhutshilo haṋu hoṱhe nae. Kha ri ri muṱhannga na musidzana vha khou seisana. Musi muṱhannga a tshi ḓi bvela phanḓa na u ḓivha onoyo musidzana khwiṋe, u a mbo ḓi mu funa a ṱoḓa u mu vhinga. Naho yeneyo i phetho khulwane, muṱhannga u ḓiimisela u ṱanganedza vhuḓifhinduleli honohu ngauri u a mu funa.

¹⁶ Musi ni tshi guda nga ha Yehova, ni a mu funa nahone na ṱoḓa u ita zwoṱhe zwine na nga kona uri ni mu shumele. Zwenezwi zwi ḓo ni ṱuṱuwedzela u rabela ni tshi khou mu fhulufhedzisa u mu shumela. Bivhili i ri muṅwe na muṅwe ane a funa Yesu u fanela uri a “ḓihangwe.” (Marko 8:34) Zwi amba mini? Zwi amba uri u  thetshelesa Yehova zwi ḓa u thoma vhutshiloni haṋu. Zwine Yehova a zwi ṱoḓa ndi zwa ndeme u fhira zwine na zwi tama na zwipikwa zwaṋu.​—Vhalani 1 Petro 4:2.

17. Ndi ngani vhaṅwe vhathu vha sa ḓiṋekedzi kha Yehova?

¹⁷ Vhaṅwe vhathu a vha ḓiṋekedzi kha Yehova ngauri vha ofha uri vha nga si dzule vha tshi mu shumela sa zwe vha zwi fhulufhedzisa. A vha ṱoḓi u shonisa Yehova kana vha nga vhona u nga arali vha songo ḓiṋekedza khae, a nga si vha vhone mulandu kha zwine vha ita.

18. Ndi mini zwine zwa nga ni thusa uri ni sa ofhe u shonisa Yehova?

¹⁸ U funa haṋu Yehova zwi ḓo ni thusa uri ni sa ofhe u mu shonisa. Ngauri ni a mu funa, ni ḓo ita zwoṱhe zwine na nga kona uri ni ite zwe na mu fhulufhedzisa. (Muhuweleli 5:4; Vhakolosa 1:10) A ni nga humbuli uri zwi a konḓa u ita zwine Yehova a zwi funa. Muapostola Yohane o ṅwala uri: “U funa Mudzimu zwi katela u tevhedza milayo yawe; milayo yawe a si muhwalo.”​—1 Yohane 5:3.

19. Ndi ngani ni songo fanela u ofha u ḓiṋekedza kha Yehova?

¹⁹ U ḓiṋekedza kha Yehova a zwi ṱoḓi uri ni vhe o fhelelaho. Ha lavheleli uri ri ite zwi fhiraho zwine ra nga kona u zwi ita. (Phisalema 103:14) U ḓo ni thusa u ita zwo lugaho. (Yesaya 41:10) Fhulufhelani Yehova nga mbilu yaṋu yoṱhe nahone ‘u ḓo ni lugiselela nḓila dzaṋu.’​—Mirero 3:5, 6.

20. Ni fanela u ita mini musi no no ḓiṋekedza kha Mudzimu?

²⁰ Naa ni vhona u nga no lugela u ḓiṋekedza kha Yehova? Musi no no ḓiṋekedza kha Yehova, ni vha no lugela vhukando vhu tevhelaho. Ni fanela u lovhedzwa.

21, 22. Ni nga ‘vhudza hani vhaṅwe zwine na zwi tenda’?

 ²¹ Vhudzani mudzudzanyi wa tshigwada tsha vhahulwane wa tshivhidzoni tsha haṋu uri no ḓiṋekedza kha Yehova nahone ni khou ṱoḓa u lovhedzwa. U ḓo humbela vhaṅwe vhahulwane tshivhidzoni uri vha vusuluse na inwi pfunzo dza ndeme dzi re Bivhilini. Arali vha tenda uri ni a fanelea, vha ḓo ni vhudza uri ni ḓo lovhedzwa guvhanganoni kana buthanoni ḽi tevhelaho ḽa Ṱhanzi dza Yehova. Henefho  guvhanganoni, hu ḓo vha na nyambo ine ya ṱalutshedza zwine u lovhedzwa zwa amba zwone. Musi tshiambi tshi tshi fhedza u amba na vhane vha khou ya u lovhedzwa, tshi ḓo vha mbudziso mbili dzi leluwaho. Nga u fhindula dzenedzo mbudziso, ni ḓo vha ni tshi khou ‘vhudza vhaṅwe zwine na zwi tenda.’​—Vharoma 10:10.

²² Ndi hone ni tshi ḓo lovhedzwa. Ni ḓo mbwandamedzwa maḓini. Ndovhedzo i ḓo sumbedza vhoṱhe uri no  ḓiṋekedza kha Yehova na uri zwino ni muṅwe wa Ṱhanzi Dza Yehova.

23. Zwi amba mini u lovhedzwa “dzinani ḽa Khotsi na ḽa Murwa na ḽa muya mukhethwa”?

²³ Yesu o ri vhafunziwa vhawe vha ḓo lovhedzwa “dzinani ḽa Khotsi na ḽa Murwa na ḽa muya mukhethwa.” (Vhalani Mateo 28:19.) Zwenezwo zwi amba mini? Zwi amba uri ni ṱalukanya maanḓa a Yehova na mushumo wa Yesu kha zwine Mudzimu a ṱoḓa u zwi ita, u katela na nḓila ine Mudzimu a shumisa ngayo muya wawe mukhethwa u khunyeledza zwine a zwi funa.​—Phisalema 83:18; Mateo 28:18; Vhagalata 5:22, 23; 2 Petro 1:21.

24, 25. (a) Ndovhedzo i imela mini? (b) Ri ḓo haseledza mini kha ndima ya u fhedza?

²⁴ U lovhedzwa zwi imela zwithu zwa ndeme vhukuma. Musi ni tshi mbwandamedzwa maḓini, zwi amba uri no fa nga lwa pfanyisedzo nahone a ni tsha ḓo tshila nga nḓila ye na vha ni tshi tshila ngayo kale. Musi ni tshi bva maḓini, ni ḓo thoma vhutshilo vhuswa na u ita zwine Mudzimu a zwi funa. Zwi sumbedza uri ni ḓo shumela Yehova u bva zwino u ya phanḓa. Ni songo hangwa uri a no ngo ḓiṋekedza kha muthu, kha dzangano kana kha mushumo. Vhutshilo haṋu no vhu ṋekedza Yehova.

²⁵ U ḓiṋekedza haṋu zwi ḓo ni thusa uri ni vhe na vhushaka ha tsini-tsini na Mudzimu. (Phisalema 25:14) U lovhedzwa a zwi ambi uri muthu u ḓo tshidzwa. Muapostola Paulo o ṅwala uri: “Shumani nga maanḓa ni tshi ofha na u tetemela uri ni tshidzwe.” (Vhafilipi 2:12) U lovhedzwa ndi ḽiga ḽa u tou thoma. Fhedzi ni nga dzula hani ni tsini na Yehova? Ndima ya u fhedza ya yeneyi bugu i ḓo fhindula yeneyo mbudziso.