1. Che domanda ti te pol farte dopo che te ghè studià sto libro?

TI TE ghè imparà tante verità bìbliche col stùdio de sto libro, come la promessa de Dio dela vita eterna, la condission dei morti e la speransa dela ressuression. (Eclesiastes 9:5; Lucas 23:43; João 5:28, 29; Apocalipse 21:3, 4) Ti te ghè scominsià a assister le riunion dele Testimònie de Geovà e creder che lore le pratica la vera adorassion. (João 13:35) Fursi te ghè scominsià a gaver una forte amicìssia con Geovà e te  ghè dessidio servirlo. Pol esser che ti te sì drio pensar: ‘E adesso, cossa mi go de far par servir a Dio?’

2. Parché un etiope el volea esser batesà?

² Nei giorni de Gesù, un etiope anca el se ga fato sta domanda. Un tempo dopo dela ressuression de Gesù, Filipo el ga predicà a sto omo e el ga mostrà a lu che Gesù l’era el Messia. El etiope l’è restà tanto impressionà con quel che el ga imparà che el ga suito dito: “Varda! Qua ghen’è àqua; cossa me impedisse de esser batesà?” —Atos 8:26-36.

3. (a) Che comandamento Gesù el ga dato ai so seguidori? (b) Come un cristiano el ga de esser batesà?

³ La Bìblia la insegna che, se te vol servir a Geovà, te ghè de esser batesà. Gesù el ga dito ai so seguidori: “Fé dissìpoli de persone de tute le nassion, batesàndole.” (Mateus 28:19) Gesù anca el ga dato el esémpio quando l’è stà batesà. Gioani el ga imerso del tuto Gesù ntel’àqua, no’l ga sol spandesto un pochetin de àqua ntela testa. (Mateus 3:16) Ancoi, quando un cristiano l’è batesà, el ga de esser imerso del tuto ntel’àqua.

4. Cossa el to batésimo el mostra a tuti?

⁴ El batésimo el mostra a tuti che ti te vol esser amigo de Dio e che te vol servirlo. (Salmo 40:7, 8) Alora, te pol domandarte: ‘Cossa me ocore par esser batesà?’

5. (a) Cossa ti te ghè de far vanti de esser batesà? (b) Parché le riunion cristiane le ze importanti?

⁵ Vanti de esser batesà, te ghè de cognosser Geovà e Gesù. Te ghè belche scominsià  a far questo par meso del stùdio dela Bìblia. (Lesi João 17:3.) Ma sol questo no’l basta mia. La Bìblia la dise che te ghè de esser ‘pien dela giusta cognossensa’ dela volontà de Geovà. (Colossenses 1:9) Le riunion dele Testimònie de Geovà le te giutarà a gaver una forte relassion con Geovà. Par quela, te ghè de assister sempre ale riunion. —Hebreus 10:24, 25.

6. Cossa te ocore saver dela Bìblia vanti de esser batesà?

⁶ Geovà no’l speta che ti te sàpia tuto sora la Bìblia vanti de esser batesà, cossita come Lu no’l spetea che el etiope el savesse tuto. (Atos 8:30, 31) Par dir la verità, continuaremo a imparar sora Dio par sempre. (Eclesiastes 3:11) Ma par esser batesà, ti te ghè de co­gnosser al manco le verità principai dela Bìblia. —Hebreus 5:12.

7. Come el stùdio dela Bìblia el te ga giutà?

⁷ La Bìblia la dise: “Sensa fede no l’è mia possìbile contentar a Dio”. (Hebreus 11:6) Alora, te ocore gaver fede vanti de esser batesà. La Bìblia la dise che arquante persone dela antiga cità de Corinto le scoltea quel che i seguidori de Gesù i insegnea. Par quela, ste persone “le ga scominsià a creder e esser batesade.” (Atos 18:8) Dela medèsima maniera, el to stùdio dela Bìblia el te ga giutà a gaver fede ntele promesse de Dio e ntel poder del sacrifìssio de Gesù, che el pol salvarte del pecà e dela morte. —Josué 23:14; Atos 4:12; 2 Timóteo 3:16, 17.

8. Cossa te giutarà a parlar ai altri sora quel che te ghè imparà?

⁸ Quanto de pi te studi la Bìblia e te vedi come la te  giuta ntela to vita, tanto de pi la to fede la restarà pi forte. Questo te giutarà a gaver voia de parlar ai altri sora quel che te sì drio imparar. (Jeremias 20:9; 2 Coríntios 4:13) Ma a chi te pol parlar?

9, 10. (a) A chi ti te pol parlar sora quel che te ghè imparà? (b) Cossa ti te ghè de far se te vol predicar cola congregassion?

⁹ Ti te pol parlar sora quel che te sì drio imparar con quei dela to fameia, amighi, visini o coleghi de laoro. Questo l’è bon, ma te ghè de farlo sempre de maniera amorosa e gentile. Col tempo, ti te sarè bon scominsiar a predicar cola congregassion. Quando te cati che te sì pronto par farlo, te pol parlar con quel che el stùdia la Bìblia con ti e dirghe che te piaseria ndar ntela predicassion. Se lu el cata che ti te sì pronto e che te sì drio viver d’acordo coi principi bìblichi, alora valtri ndaré riunirse con due ansiani dela congregassion.

¹⁰ Cossa sucederà in questa riunion? I ansiani i ndarà veder se ti te ghè capio le verità bìbliche principai, se ti te credi in queste, se ti te obedisse a quel che la Bìblia la dise e se ti te vol pròpio deventar una Testimònia de Geovà. No stà mia gaver paura de parlar coi ansiani parché lori i tende con amor tuti quanti dela congregassion e anca ti. (Atos 20:28; 1 Pedro 5:2, 3) Dopo de questa riunion, i ansiani i te farà saver se te pol scominsiar a predicar cola congregassion.

11. Parché l’è importante far cambiamenti vanti de predicar cola congregassion?

¹¹ Pol esser che i ansiani i te spiega che te ghè de far arquanti cambiamenti vanti de scominsiar a predicar  cola congregassion. Parché l’è importante far sti cambiamenti? Parché quando parlemo ai altri sora Dio, semo drio rapresentar a Geovà e gavemo de viver de una maniera che la ghe dà onor. —1 Coríntios 6:9, 10; Gálatas 5:19-21.

12. Parché a tuti i ghe ocore pentirse?

¹² Ti te ghè de far nantra roba vanti de esser batesà. El apòstolo Piero el ga dito: “Pentive, partanto, e cambié de vita parché i vostri pecadi i sìpia eliminadi.” (Atos 3:19) Cossa vol dir pentirse? Vol dir ciamarse gramo, o sia sentirse mal de gaver fato robe sbaliade. Par esémpio, se una persona gavea una vita imoral, alora la ga de pentirse. Fursi ti te ghè sempre proa far quel che l’è giusto, ma ancora cossita te ocore pentirte parché tuti semo pecadori e ne ocore domandar perdon a Dio. —Romanos 3:23; 5:12.

13. Cossa vol dir ‘cambiar de vita’?

¹³ Sarà che basta sentirse mal par quel che gavemo fato? Nò. Piero el ga dito che gavemo de ‘cambiar de vita’. Questo vol dir che ne ocore abandonar tuti i tipi de condota sbaliada e far quel che l’è giusto. Femo un esémpio. Imagina che ti te sì drio far un viaio a un posto par la prima volta. Dopo de un tempo, te sì incorto che te sì drio ndar ntela diression sbaliada. Cossa ti te faria? Sicuro che te ndaria pian pian fin che te fermi, te cambiaria de diression e te ndaria in quela giusta. Dela medèsima maniera, par meso del stùdio dela Bìblia ti te pol capir che te ghè de cambiar arquante robe ntela to vita. Te toca gaver la disposission de ‘cambiar de vita’, o sia cambiar quel che te ocore par scominsiar a far quel che l’è giusto.

14. Come ti te pol dedicarte a Geovà?

¹⁴ Vanti de esser batesà, te ghè de far nantra roba importante: dedicarse a Geovà. Te fè questo quando te fè una orassion spessìfica a Geovà prometendo adorar sol a Lu e far dela so volontà la roba pi importante ntela to vita. —Deuteronômio 6:15.

15, 16. Cossa ndarà giutarte a far la to dedicassion a Dio?

¹⁵ Prometer servir sol a Geovà l’è come prometer passar tuta la to vita cola persona che ti te ami. Imagina che un gióveno e una gióvena i ze drio smorosarse. Quando el gióveno el cognosse meio la gióvena, lu la ama de pi e el vol maridarse con ela. Anca se la è una dessision tanto importante, el gióveno el aceta la responsabilità parché el ama la gióvena.

¹⁶ Quanto de pi te impari sora Geovà, tanto de pi te lo amarè e te volerè far el to meio par servirlo. Questo ndarà giutarte a far una orassion prometendo servirlo. La Bìblia la dise che tuti quei che i vol seguir Gesù i ga de “renunsiar a se stesso”. (Marcos 8:34) Cossa vol dir? Vol dir che obedir a Geovà toca star al primo posto ntela nostra vita. La volontà de Geovà la è pi importante che le to voie e i to ogetivi. —Lesi 1 Pedro 4:2.

17. Parché arquanti no i fà la so dedicassion a Dio?

¹⁷ Arquanti no i fà la so dedicassion a Geovà parché i ga paura de no mantegner la so promessa de servirlo. Lori no i vol assar  Geovà disgustà. Fursi i pensa che, se lori no i ze dedicadi a Geovà, alora Lu no li considera responsàbili par quel che i fà.

18. Cossa te giutarà a perder la paura de assar Geovà disgustà?

¹⁸ El to amor par Geovà el te giutarà a perder la paura de disgustarlo. Ti te ndarè far el to meio par mantegner la to promessa parché ti te ami a Geovà. (Eclesiastes 5:4; Colossenses 1:10) No stà mia pensar che l’è massa difìcile far la volontà de Geovà. El apòstolo Gioani el ga scrito: “Questo l’è quel che el amor de Dio vol dir: che obedimo ai so comandamenti; ma i so comandamenti no i ze mia un peso.” —1 João 5:3.

19. Parché no te ocore gaver paura de far la to dedicassion a Geovà?

¹⁹ No te ocore mia esser perfeto par far la to dedicassion a Geovà. Lu no’l speta mia de noantri de pi de quel che podemo far. (Salmo 103:14) Sicuro che Lu el te giutarà a far quel che l’è giusto. (Isaías 41:10) Fìdate del tuto de Geovà e Lu “ndarà indrissar i to camini.” —Provérbios 3:5, 6.

20. Qual l’è el pròssimo passo dopo dela dedicassion a Geovà?

²⁰ Ti te credi che te sì pronto par far la to dedicassion a Geovà? Dopo de farla, te sì pronto par el pròssimo passo: el batésimo.

21, 22. Come ti te pol far una “proclamassion pùblica” dela to fede?

²¹ Parla col cordinador del corpo de ansiani dela to congregassion che te ghè fato la to dedicassion a Geovà e che te vol esser batesà. Alora el  farà che i ansiani i fassa con ti una considerassion dei principai insegnamenti bìblichi. Se lori i ze d’acordo che ti te sì pronto, i te dirà che te pol batesarte ntela pròssima assemblea o congresso dele Testimònie de Geovà. In questa ocasion, ghen sarà un discorso che el spiega cossa vol dir el batésimo. El orador el farà due sémplici  domande a quei che i ze pronti par el batésimo. Al risponder ale domande, ti te sarè drio far una “proclamassion pùblica” dela to fede. —Romanos 10:10.

²² Alora ti te ndarè esser batesà. Te sarè imerso del tuto ntel’àqua. El batésimo el mostrarà a  tuti che ti te sì dedicà a Geovà e che adesso te sì una Testimònia de Geovà.

23. Cossa vol dir esser batesà “nel nome del Pare, del Fiol e del spìrito santo”?

²³ Gesù el ga dito che i so dissìpoli i saria batesadi “nel nome del Pare, del Fiol e del spìrito santo”. (Lesi Mateus 28:19.) Cossa questo vol dir? Vol dir che ti te ricognossi a Geovà come Tuto Poderoso, la posission de Gesù nel propòsito de Dio e che Dio el dopera el so spìrito santo par far la so volontà. —Salmo 83:18; ­Mateus 28:18; Gálatas 5:22, 23; 2 Pedro 1:21.

24, 25. (a) Cossa rapresenta el batésimo? (b) Cossa ndaremo considerar ntel pròssimo capìtolo?

²⁴ El batésimo el rapresenta una roba tanto importante. Quando ti te sì imerso del tuto ntel’àqua, l’è come se ti te morisse o te abandonasse la to maniera de viver. Quando te vien fora del’aqua, l’è come se ti te scominsiasse una nova vita, drio far la volontà de Dio da quel momento avanti. Ricòrdate che ti te ghè dedicà la to vita a Geovà, no a un umano o a una organisassion.

²⁵ La to dedicassion la te giutarà a gaver una relassion pi forte con Dio. (Salmo 25:14) Questo no vol dir che una persona la sarà salva sol parché la è stata batesada. El apòstolo Paolo el ga scrito: “Seité laorar con temor e tremor par la vostra salvassion.” (Filipenses 2:12) El batésimo l’è sol el scomìnsio dela to vita cristiana. Alora, come ti te pol mantégnerte darente de Geovà? El ùltimo capìtolo de sto libro ndarà risponder a questa domanda.